دردشة حوامل مصر - دردشة بنات مصر - تجمع حوامل مصر

[MALAK2010]

ان شاء الله اول ماجيب الكارى هجربها بس هجربها فى الفراخ لان احنا عملنا مقطعه على اللحمة وشكلنا هنقاطع الفراخ كمان ربنا يستر

[dr.princess]

لييييه مقاطعين اللحمة ؟؟
انا عملتها بالفراخ وطلعت حلوة ماشاء الله

[MALAK2010]

انا اصلا من ساعه الحمل مش طايقة اكلها ونادر لو اكلت الفراخ
وياحبيبى جوزى لما بيلاقينى مش باكل حاجة بيكرهها هو كمان فمش بحاول احسسة بالفراخ كمان علشان ياكلها
مع ان هنا اللحمه جميلة ونظيفة وبنجيب من مكان كويس بس بصراحة انا بستطعم اللحمة اللى فى مصر اكتر
بس مش عارفة لما ارجع مصر ان شاء الله هاكل اللحمة ولا القرفة دى من اللحمة عموما

[MALAK2010]

هى مامتك ان شاء الله هتجيلك فى اول التاسع؟؟؟؟

[dr.princess]

انا طول عمرى ماليش فى اللحمة ابدا بس بعملها مع اى حاجة تستخبى فيها كده يعنى كباب حلة او بالخضار وبقطعها مكعبات صغيرة فبتبان كتيرة فلو كلت حتة او اتنين مش بيبان لجوزى انى مكلتش غير لو انتى حاطة قطع كبيرة هيبان طبعا وانا بحس ان المكعبات دى بتبقى احلى من الكبيرة ومستوية اكتر جربى كده

[dr.princess]

ماما بتقولى هجيلك قبل يومين او ثلاثة من الميعاد اللى الدكتورة محدداه انا قلتلها لا لازم قبلها باسبوعين اضمن ممكن يحصل حاجة او كده

[MALAK2010]

بصراحة لما بضغط على نفسى واكل حاجة بفضل يومها تعبانة وبطنى مقلوبة وممكن تفضل لتانى يوم كمان
ملهاش لازمة
انا اصلا اكلى غريب حتى قبل الحمل مش حريصة اوى على اللحمة ولا باكل البط ولا الحمام ولا الرومى ابدا
كنت بحب الفراخ والفراخ البيضة كمان مش البلدى يعنى من الاخر على راى حمايا انا مش بفهم فى الاكل هههههههههههههه
كنت عزماه بعد جوازى فقالى كدة ههههههههههههه

[MALAK2010]

هى مامتك مكسوفة تجيلك انا عارفة الامهات دى اسالينى انا
بس هى فعلا لازم تجيلك بداية التاسع ان شاء الله لان الولادة بتبقى فى اى وقت ملهاش معاد

[dr.princess]

انا بحب الفراخ والبط والحمام بس لما باكل تلاقى قطمتين وخلاص وبشبع على رأى ماما معدتى مقفولة

[dr.princess]

لالا مأظنش انها مكسوفة بس انا عارفة انها مش حابه تيجى نفسها انى انا اللى انزلها وكام مرة قالتلى وانا قلتلها ابدا فعلشان كده عايزة تيجى اقل وقت ممكن و اخر مرة قالتلى انزلى انتى قلتلها حد طايل تعالى انتى علشان تعملى عمرة فسكتت
انا فعلا هخليها تيجى ممكن على نص التاسع كده باذن الله

[MALAK2010]

خلاص طالما مامتك هتقدر تجيلك خلاص ملهاش لازمة انك تنزلى
وهو النزول مش عدل اصلا فى حاجات كتير بتخوف الواحدة من النزول

[MALAK2010]

هو ان شاء الله معاد الولادة بتاعتك امتى

[dr.princess]

لالالالا نزول مين مستحيل
هى كانت قلقانة تسيب اخويا لوحده وهو راح الجيش خلاص ورجعت قالت الشقة هقفلها ازاى فيها حاجتنا فأختى قالتلها انها هتروح تقعد فيها هى والولاد وجوزها فخلالاص ربنا ميجيبش حاجة وحشة وتيجى ان شاء الله

[MALAK2010]

دة اية التصميم دة ههههههههه
انتى لسة مانستيش اللى جرالك فى الخطوبة

[dr.princess]

الدكتورة قالتلى ان شاء الله 3 مايو بس هى مقدمة فى حساب الحمل تقريبا 5 ايام فممكن يبقى بعد كده بأيام

[dr.princess]

ودى حاجات تتنسى برده مستحيييييييل

[MALAK2010]

ربنا يقومك بالسلامة ويكملك على خير ان شاء الله

[dr.princess]

ياااااااااارب اللهم امين انا وانتى وكل المسلمين
الدكتورة حددتلك معاد الولادة امتى ان شاء الله ؟؟

[MALAK2010]

ان شاء الله على7 -6 يعنى بعدك بشهر ان شاء الله

[dr.princess]

ان شاء الله

[MALAK2010]

هسيبك شوية يالولو اظبط حاجات فى المطبخ وجيالك

[dr.princess]

ماشى يا حبيبتى ولا يهمك

[مامامشمشة]

ازيكم ياجماعة معلش دخولى مش كتير لانى تعبانة شوية

[مامامشمشة]

اهلى الحمدلله يخير

[dr.princess]

ازيك يا مشمشة الف سلامة عليكى
اخبار صحتك ايه دلوقتى

[MALAK2010]

انا جيييييييييييييت

[dr.princess]

ازيك يا ملك

[dr.princess]

بقولك ايه متعرفيش لو زرار اتخلع من كيبورد اللاب توب ينفع يتركب تانى ولا لازم اغير الكيبورد كله

[MALAK2010]

مجربتش قبل كدة لو اشوفة ممكن افيدك
بس حتى لو اتغيرت كلها مش مشكلة مش مكلفة

[MALAK2010]

هو لاب توب ؟؟؟
انا كنت فكراه جهاز كمبيوتر عادى ماعرفش اللوحة بتاعت الاب توب بيتغير ولا لاء

[dr.princess]

بتهيألى العادية هى الرخيصة اما اللابتوب بتبقى غالية مش عارفة
انا اكتئبت كل شوية حاجة تبوظ لما بدأت أحس انى مش طبيعيه

[MALAK2010]

هو لو حطيتية كدة بيشتغل ولا لاء
انا اسفة يالولو اصلى مش عارفة شكلة اية من تحت الزرار
انا قاعدة اشد فى الزراير بتاعتى علشان اشوف بس مش عارفة

[dr.princess]

هو شغال من غير الزرار الخارجى بس بتهيألى ممكن يبوظ لو سيبته كده
لالالالا متعمليش حاجة عندك ممكن تبوظ

[MALAK2010]

اية اللى باظ تانى عندك؟؟؟؟

[dr.princess]

انا دورت على النت ناس بتقول ممكن يتركب تانى عادية وناس بتقول لا لازم الكيبورد كله يتغير

[MALAK2010]

بيقولوا النت رجع فى كل المحافظات ياااااااارب يكون رجع عند ماما
بس للاسف مش معايا رصيد اقولها اهئ اهئ يارب تاخد بالها

[dr.princess]

بجد مش عارفة والله
يااااااااااااااريت يكون رجع

[MALAK2010]

سبحان الله رصيدى خلص وانا بكلمها الصبح بس جيت اتصل لقيته شغال هههههههه
يلا الحمد لله بس بتقول انة مش شغال هى واخدة بالها

[MALAK2010]

ابقى قولى لمامتك علشان تاخد بالها

[dr.princess]

الحمد لله انك كلمتيها
انا شوية كده وهكلم ماما يارب يكون عندها

[MALAK2010]

http://forum.hwaml.com/imgcache2/hwaml.com_1296645751_622.gif

[MALAK2010]

http://forum.hwaml.com/imgcache2/hwaml.com_1296647646_908.gif

[MALAK2010]

انتى فين يا لولو

http://forum.hwaml.com/imgcache2/hwaml.com_1296647687_649.gif

[somia]

السلام عليكم ورحمة الله وبركاته..
وحشتونيييييييييييييييييييييييييييييييييييييييييييي ييييييييييييييييييييييييييييييييييييي

[somia]

لوكة انتي هنا؟؟؟؟

[MALAK2010]

سمسم طمنينى عليكى انتى اللى وحشانا كتير عامله اية والاخبار عندكم اية ياااااااااااااارب تكونوا بخير

[MALAK2010]

ايوا يا حبيبتى معاكى وكانت لولو هنا بس مش عارفة راحت فين

[MALAK2010]

كويس النت وصل عندكم عقبال ماما ياااارب

[somia]

الحمد لله كلنا بخير.. بس طبعا الامن ضياع والنوم بنام تقدري تقولي وانا سامعة كل اللي حوايا عشان لو فيه حاجة نلحق نفسنا

[somia]

أاااااااااااااااااااامين يا رب .. ربنا يطمنك عليها عاجلا غير اجل .. بس خلي بالك هوه يا دوب لسة جي الوقت الوقتي

[MALAK2010]

ماهم كاتبين فى التلفزيون ان النت هيرجع فى مصر كلها الوقتى

[MALAK2010]

انتى بتقولى علشان تلحقى نفسك
هو كان فية قلق فى المنطقة اللى ساكنة فيها ولا بعيد

[somia]

يا أمي احنا من يوم الجمعة ولا فيه شرطي واحد يوحد ربنا في المنطقة والشباب والرجالة هما اللي بيقضوا طول الليل في دوريات في الشارع وطبعا القسم اتحرق والحرمية كلهم طلعوا وكل شوية يقبضوا على حد فيهم بس بعد ما نكون متنا ن الرعب

[MALAK2010]

ماانا متابعه الاخبار كلها بس فى اماكن فيها قلق واماكن مش فيها
طيب الوقتى الوضع بقا احسن ولا لسة؟؟؟

[somia]

والله يا بنتي بيقولوا الجيش موجود بس بعيد عننا قوي يعني بينا وبينه حوالي ربع ساعة بالعربية وبيقولوا الشرطة هتنزل بس لسة مشوفناش ولا واحد منهم لسة وربنا بجد يسترها على البلد

[MALAK2010]

انتى بتروحى فين يا سمية ولا النت بطئ عندكم

[MALAK2010]

الحمد لله مفيش حاجة فى بلدنا بس ماما بتقول الشباب برضة فى البلد علشان يحموهم لو حصل اى حاجة ربنا يبارك فيهم

[MALAK2010]

انا اجلت النزول لمصر لاجل غير مسمى ربنا يهدى الاحوال

[somia]

معلشي والله يا ملك اصلي بتابع الاخبار برضه لان زوجي في المظاهرات الوقتي وخابفة عليه قوي..
والله كنت لسة هقولك اخري نزولك لغاية ما الجو يهدى شوية .. انتي سفرية زوجك امتى باذن الله تعالى؟؟؟

[MALAK2010]

لسه ماكدلوش السفر ياااااااااارب مايسافر لانى هموت لو سافر وسابنى لوحدى

[MALAK2010]

جوزك فى التحرير؟؟؟

[MALAK2010]

انتى بتتفرجى على قناة اية؟؟؟

[MALAK2010]

ربنا يرجعهولك بالسلامة هو وكل الشباب ياااارب

[somia]

حساكي والله يا ملك انا بحمد ربنا ليل نهار ان مأمورية زوجي خلصت من يوم الاربع

[somia]

انا مشغلة في العربية وزوجي لسة مكلمني وقالي انه في الطريق لان الضرب ما بين فريق مؤيدي خطاب مبارك والفريق المعارض ربنا يسترها بس ويلحق المترو

[somia]

معلشي يا ملك بتأخر عليكي عشان بتابع الاخبار وكل شوية بكلم زوجي أطمن عليه

[MALAK2010]

ربنا يستر
والله انا بتفرج وكان قلبى هيقف لما لقيتهم داخلين على بعض يااااارب سلم

[MALAK2010]

براحتك يا سمية ربنا يكون فى عونك
انا اصلا فاتحة الاخبار ليل ونهار

[somia]

ربنا يسترها مع البلد وتخرج من الازمة دي يا رب عاجلا غير اجل..
بقولك صحيح النونو أخباره ايه ولولو عاملة ايه الوقتي؟؟؟

[MALAK2010]

http://forum.hwaml.com/imgcache2/hwaml.com_1296650779_597.gif

[MALAK2010]

احنا كويسين الحمد لله لولو كانت بطنها تعبانة شوية بس بقت احسن الحمد لله

[somia]

عارفة يا ملك انا ساعات بصحى من النوم عالتليفزيون اطمن على الوضع وارجع انام تاني وطول الليل على النظام ده وياه بقى لو سمعت حس غريب في الشارع تلاقي جسمي ده بيتنفض

[somia]

ليه بعد الشر عن لولو بطنها تعبتها من إيه

[MALAK2010]

ربنا يهدى الاحوال انا اعصابى خلااااااااااااص من الاخبار وصعبان عليا الشباب ربنا يسلمهم يااارب
عارفة انا يوم تعبت من كتر الاخبار اللى فى الجزيرة ففتحت الاخبار اللى فى القنوات المصرية لقيتنى هدييييييييييييييت لانهم الحياة وردى عندهم

[MALAK2010]

هى بتقول اخدت دوا للمغص واتحسنت الحمد لله

[dr.princess]

سمية حمدالله على السلامة كويس اننا اتطمنا عليكم
انا فتحت على العربية لقيت الدنيا ولعت فجأة معرفش فى ايه ربنا يستر

ملك اسفة نمت فجأة معلشى لانى اصلا قاعدة على السرير

[somia]

ملك قنوات النيل جايبة صورة النيل ولا كإن في حاجة في البلد ..
بقولك النونو ابتدى يضرب بالجامد ولا لسة؟؟؟

[MALAK2010]

لولو انا قلت انك بتكلمى مامتك صح النوم يا جميل
شايفة الدنيا ولعت فعلا ربنا يستر

[MALAK2010]

لا يا سمية لسة مؤدب ورقيق بيخاف على مامتة بيضرب براحة هههههه

[somia]

لولو انتي عاملة ايه الوقتي ؟؟؟
بجد والله ربنا يسترها على البلد

[MALAK2010]

اللى راكب جمل دة داخل يعمل اية يارب هم يبكى وهم يضحك

[somia]

طب الحمد لله يا لوكة انا اما ببقى عايزة ادخل حمام بتديني شوية شلاليت في المثانة ببقى بصوت وزوجي يتبسط ويقولها شدي حيلك عايزين ماما تصوت بجد

[dr.princess]

بيقولوا النت رجع جزئيا فى مصر
لسه مكلمتش ماما هكلمها واشوف

[dr.princess]

انا الحمد لله يا سمية وخلاص بانت الرؤية واتأكدنا انه محمد ان شاء الله
انتى اخبارك ايه

[MALAK2010]

هو النونو لما بيتحرك تحت بتبقى صعبة فعلا ربنا يهون ويكملنا على خير

[somia]

باسم الله ماشاء الله .. يعني من هنا ورايح هقولك يا أم محمد ..هههههههههههههههههههههه طب والباشموهندس محمد اخباره ايه بيضرب بذمة ولا خايف على ماما..
لوكة عرفتي النوع ولا لسة؟؟؟

[dr.princess]

اه ياستى قولى براحتك
والله الاخ محمد بحالات شوية بيشد حيله ماشاء الله وشوية بينااااااام فى الخط

[MALAK2010]

لسة مارحتش للدكتورة ان شاء الله الاسبوع الجاى ربنا يسهل وتبان الرؤية هههههههههههههههه

[dr.princess]

سمية معلشى سؤال ملوش دعوة باللى بنتكلم فيه
عندى زرار اتخلع من اللابتوب ينفع يتركب تانى ولا لازم أغير الكيبورد كله

[somia]

ربنا يباركلك فيه ويجعلهولك ذرية صالحة يا رب ..
بمناسبة النوم زوجي النهاردة اول ما صحي حط ايده على بطني وبيقولي هيه مبتتحركش ليه قولتله زمانها لسة نايمة قعد يخبط على بطني ويقولها اصحي بقى وخبطي في ماما .. شايفيين الراجل بيفرح فيا قوي اما بضرب

[نولارا]

النت رجع النت رجع
وحشتوووووووووووووووووووووونى

[dr.princess]

ههههههههههههههه سمية فكرتينى بجوزى عمل نفس الحركة امبارح قعد يخبط على بطنى بقوله هو انت بتصحيه ولا ايه هههههههههههههههههه

[somia]

ربنا يطمنا عليكي وعلى النونو يا لوكة يا رب..
لولو والله مش عارفة بس اما زوجي يرجع باذن الله تعالى هسألهولك

[MALAK2010]

انا برضة جوزى بيفرح لما يحس النونو بيخبط فيا ويقوله يلا شيد حيلك كمان وكمان ههههههههههههههه

[dr.princess]

نوراااااااااااااااا هل هلالك
والله يا بنات التجمع كان وحش من غيركم

[MALAK2010]

نورا ازيك يا حبيبتى عاملين اية طمنينى عليكم وموكشة عامل اية

[dr.princess]

ايوه ياسمية بالله عليكى اسئليه وابقى حتى سيبيلى الرد وانا هفتح اشوفه

[MALAK2010]

http://forum.hwaml.com/imgcache2/hwaml.com_1296652749_154.gif

[MALAK2010]

http://forum.hwaml.com/imgcache2/hwaml.com_1296652899_846.gif

[نولارا]

احنا الحمد لله بخير وموكشه كان محبوس فى البيت اليومين اللى فاتوا هو وامه

[dr.princess]

معلشى يابنات شوية وهرجعلكم تانى

[somia]

نورا ازيك عاملة ايه والاستاذ أحمد عامل ايه ؟؟
لولو باذن الله اول ما يوصل هاسألهولك..
لوكة شكل الرجالة كلهم واحد تخصص فرح في الستات وخلاص ..
عارفيين من كام يوم قلتله حط راسك على بطني شوف يمكن تسمع حاجة راح حاطط راسة وعمال يقول ألووووووووووووو ألووووووووووو ألووووووووووووو بقوله يا بني هوه انت بتكلمه على الموبايل ولا إيه...ههههههههههههه

[MALAK2010]

لولو مستنياكى يا جميل

[MALAK2010]

نورا:طيب والوقتى الدنيا هديت ولا المنطقة بتاعتكم فيها قلق

[MALAK2010]

سمية:ربنا يكملك على خير وتشيلية بين ايديكى وتفرحى انتى وباباه

[somia]

مستنيينك يا لولو.. نورا الدنيا عندكوا كانت عاملة ازاي؟؟ الوضع كان مستقر ولا لأ؟؟؟

[نولارا]

يابنتى احنا اساسا فى قريه الصغيره يعنى القلق بس كان من المساجين اللى هربوا

[somia]

والله يا نورا ربنا يسترنا والبلد تهدى بسرعة يا رب

[MALAK2010]

واحنا برضة كان كل القلق من المساجين اللى هربوا ربنا يستر الدنيا بقت ملخبطة

[MALAK2010]

نورا:جوزك بيروح الشغل ولا ميش شغل اليومين دول

[نولارا]

يارب بس اللى حصل ده يكون بفايده والاحوال تتصلح فى البلد
والبطاله تنتهى وكل حاجه تبقى كويسه

[MALAK2010]

سمية:جوزك ركب المترو ولا لسة

[somia]

الحمد لله زوجي لسة واصل

[نولارا]

جوزى بيروح المعهد اللى فى البلد
لكن اللى هو فيه انتداب مش بيروحه لان فيه دبابات هناك وقلق
اصل جوزى متعاقد بقاله 4سنين ودى السنه الخامسه
يااااااااااارب بقى يسبتوه وده اول مطلب للشعب المصرى تسبيت خالد جوزى ههههههههههههه

[نولارا]

سميه حلوان كانت عامله ايه
انتى من حلوان برضه ولا انا نسيت

[somia]

لولو زوجي بيقولك هوه ميعرفش لانه مشافش الوضع ده قبل كده بس جربي تلزقيه كده او تركبيه تاني

[نولارا]

ملك ولولو انا سمعت ان المنصوره كان فيها 90 الف متظاهر ما شاء الله

[MALAK2010]

جوزى بيروح المعهد اللى فى البلد
لكن اللى هو فيه انتداب مش بيروحه لان فيه دبابات هناك وقلق
اصل جوزى متعاقد بقاله 4سنين ودى السنه الخامسه
يااااااااااارب بقى يسبتوه وده اول مطلب للشعب المصرى تسبيت خالد جوزى ههههههههههههه
هههههههههههههههههه وانا كمان عاوزة ارجع بلدى انا وجوزى دة تانى مطلب للشعب

[MALAK2010]

سمية:حمد الله على سلامتة
نورا الاخبار بتقول نص مليون واحد ماشاء الله بس بصراحة مش متاكدة لاننا فى بلد جنب المنصورة

[somia]

ايوة يا نورا انا من حلوان والوضع كان الله ينور القسم ولع والشرطة اختفت والحاجة غليت وبقت نار عارفة كارت الموبيل زاد 3 جنيه

[MALAK2010]

سمية:عجبتنى الصورة دى اية رايك هههههههه ولا ننسى الموضوع دة خالص

http://forum.hwaml.com/imgcache2/hwaml.com_1296654337_628.gif

[somia]

والله يا لوكة فكرتيني بالذي مضى انا كنت مدمنة نط حبل إهئ إهئ إهئ ... يا ريت الزمن يرجع تانييييييييييييييييييييييييي

[MALAK2010]

ههههههههههههههههه

الوقتى لو اتهورنا وعملنا كدة هيغنولنا
نطى نطة يا دبدوبة اهئ اهئ هههههههههههه
وكمان نطة ههههههههههه ونطة كمااااااااااااااااااان

بهزر يا سمسمههههههه

[somia]

ده لو غنولنا دي بس يبقى كتر خيرهم .. انا زوجي كل ما يشوفني يقولي العرض بقى عرضييييييييييييييييييييييين..ههههههههههههههههههه

[MALAK2010]

انا يعتبر الشهر دة ماخرجتش غير مرة او اتنين
لما حاسة انى بقيت دبدوب هههههههههه
عارفة جوزى كان بيقولى الاول قمرى - قطتى ههههههههههههه وبعد ماشاف الميزان بيزيد بقى بيقول دبدوب ههههههههه والوقتى بيقولى شكلك داخلة على لقب جديد مفيش داعى اقوله هههههههههههههههه

[somia]

هههههههههههههههههههههههه .. طب الحمد لله مش انا لوحدي اللي باخد من الكلام السكر ده .. ربنا يكرمنا بس ونخس بعد الولاده من عندك يا رب

[MALAK2010]

انا مش بحس بالميزان غير لما اجى اشترى هدوم
جوزى مش بيبطل تريقة فى المحل بيفطسنى من الضحك ههههههههههههه
علشان المقاس حاجة فضيحة

[somia]

انا بطلت اشتري هدوم عشان مفضحش نفسي .. انا بشتري هدوم النونو وخلاص ده لو خرجت من البيت أصلا

[dr.princess]

ههههههههههههههههههه ايه اللى انتوا بتقولوه ده ضحكتونى والله
انا بقى جوزى مش بيقولى حاجة من دى لان الميزان ناصفنى فمش عارف يمسك عليا ذلة ههههههههههههههههههه

[dr.princess]

شكرا يا سمية انك سألتيه لما جوزى يرجع هاقوله جايز يكون عارف

[يارا ويوسف]

ازيكم ياكروشاات وحشتونى بجد بس بجد بجد الواحد ملهوووش نفس لاى حاجة خالص

نظرا للاحوال اللى بتمر بيها بلدنا العزيزة يارب حسبى الله ونعم الوكيل فى المخربين واللى كانو السبب فى اللى حصل

[dr.princess]

جوزى جه جرى وقت صلاة العصر لقيته جايب بطة مدبوحة وبريشها فرحت انظفها وبطنى وجعتنى جدا ااااااااااااااااه يابطنى حتى مقدرتش اكمل وافتح انظفها من جوه شلت الريش بس اتذلت الحلة اللى عندى صغيرة بهدلتنى

[dr.princess]

صحيح يا ملك النت رجع عند ماما الحمدلله

[MALAK2010]

لولو الحمد لله عقبال ما يرجع عند ماما

[MALAK2010]

لولو جوزك جايب بطة وورق عنب هههههههههههه بيرتب لمحشى محترم يلا وريه شطارتك الراجل عداة العيب

[dr.princess]

ملك ياااااااااارب ان شاء الله

[dr.princess]

يارا ازيك عاملة ايه
نعمل ايه بس حسبى الله ونعم الوكيل

[MALAK2010]

يارا ازيك يا حبيبتى انتى عاملة اية
ربنا يهدى الحال فى مصر يااااااااارب

[دودى اشرف]

السلام عليكم ورحمة الله وبركاته\
ازيكم يا بناااااااااااااااات
اخييييييييرا رجعوا النت
عاملين ايه وكل البنات اللى هنا فى مصر عاملين ايه ؟؟
يارب يكون الجميع بخير ان شاء الله .. انا الحمدلله كويسة بس شوفنا ايام ولسه مخلصتش والله لكن ربنا يخلصنا على خير بقى

[dr.princess]

ملك اه شفتى التدبيسة والله البطة دى جات صدفة واحد صاحبه جابهاله فغالبا ممكن يعزمه لما اعملهم

[MALAK2010]

دودى:ازيك يا حبيبتى حمداالله على سلامتك وحشتينى عاملين اية الوقتى الاخبار مش رادية تهدى
المنطقة بتاعتكم هديت شوية ولا لسة

[دودى اشرف]

ملوكة ازى يا قمر وحشانى كتير والله انتى نزلتى ولا لسه .. طمنينى عليكى

لولو ازيك يا حبيبتى عاملة ايه وعاملة ايه فى الحمل؟؟

يارا ازيك يا قمر اخبار النونو ايه؟؟

عاوزة اسأل على توته اخبارها ايه .. يارب تكون قامت بالسلامة ان شاء الله احسن يا عينى ايامها صعبة اوى وعاوزة اطمن عملت ايه فى الظروف دى؟

[MALAK2010]

لولو:بس بلاش تعزمية على محشى علشان البرستيج ههههههههه

[dr.princess]

دودى ازيك ياقمر ايوه كده يا بنات والله ليكم وحشة

[MALAK2010]

دودى انا كان المفروض انزلبعد بكره بس لغيت التذكرة لاجل غير مسمى لما الظروف تهدى ان شاء الله
توتة مش عارفة ولدت ولا لسة المفروض معاد ولادتها ان شاء الله 2-2 ربنا يسهلها يااااارب

[dr.princess]

ملك مااااااااااااااااشى طيب ده انا هعمله محشى يحلف بيه عمره كله ههههههههههههههههههه

[دودى اشرف]

والله يا ملك المنطقة عندنا الحمدلله مش فيها حاجة لكن طبعا فيها بلطجية بيدخلوا لكن الحمد لله الشباب اللى بتسهر فى الشارع بتمسكهم ماشاء الله عليهم كلهم ربنا يحميهم يارب ... حالنا زى الباقى لكن انهارده كان فى مظاهرات فى المنيل شوية مؤيدة للرئيس وطلعت على المهندسين تقريبا لكن فى ناس فى الشارع عادى مشغلين دى جى وكده علشان الريس .. والحمدلله بس الواحد نفسه بقى القلق ده يخلص وبتوع التحرير دول يروحوا بقى .. اصلا احنا جنب التحرير خالص ... مش عارفة هيروحوا امتى دول وعاوزين ايه تانى مخلاص الحمدلله كل اللى عاوزينه حصل ويارب فعلا البلد تتغير للاحسن

[MALAK2010]

فعلا يا لولو التجمع نور بالبنات

[MALAK2010]

ملك مااااااااااااااااشى طيب ده انا هعمله محشى يحلف بيه عمره كله ههههههههههههههههههه

هو فعلا هيحلف بيه هههههههههههههههههه

[dr.princess]

توتة المفروض معادها النهاردة ربنا يسهلها عليها ان شاء الله

[MALAK2010]

دودى ربنا يهدى الاحوال ياااارب بس الجزيرة كانت بتقول ان فى قلق فى التحرير النهاردة حسيتوا بية

[dr.princess]

ملك بقى كده طيب انا مخاصماكى

بطنى بتتقطع من الوجع مش قادرة اقوم اعمل الرز

[دودى اشرف]

احسنلك خليكى بقى عندك والله ههههههههههههه ... عمالين يقولولى اوعى تعمليها دلوقتى هنوديكى فين ... قلتلهم لسه شوية يكون الحال هدى ان شاء الله علشان كده بسأل على توته يا حبيبتى عملت ايه فى الظروف دى ؟؟ ... انا كمان دخلت التاسع انهارده برضه ربنا معاها يارب ونطمن عليها .. اصلا النت لسه راجع انهارده واكيد كان فاصل عندها برضه لانهم كانوا قاطعين الاتصالات كلها النت والموبايلات لكن الموبايلات رجعت السبت والنت اللى فضل فاصل لحد انهارده الصبح ... حتى الرسايل واقفة لسه ..اتصال بس اللى شغال

[dr.princess]

ملك انا بهزر ماتزعليش

[MALAK2010]

لا يالولو يا حبيبتى انا ماقدرش خلاص ياستى انا غلطانه هههههه
الف سلامه على بطنك يا حبيبتى من ريحة الريش ولا من اية؟؟؟؟؟

[دودى اشرف]

متسمعيش للجزيرة اصلا .. هاتى القنوات المصرية احسنلك لان كل القنوات الفضائية زى الجزيرة والعربية والحرة والبى بى سى العربية بتهيج الناس باخبارها وبتقول اخبار خطأ
اصلا قفلوا قناة الجزيرة هنا فى مصر والناس بتشتمها فى المظاهرات .. بتقول الجزيرة فين الشعب المصرى اهو على اساس انها كانت جايبة ان الشعب المصرى بياكل فى بعض فا اتفرجى احسن على القنوات المصرية لبانهم

[dr.princess]

دودى مبروووووووووك على التاسع عقبال الولادة ان شاء الله

[MALAK2010]

دودى:مبروك على دخولك التاسع ربنا يكملك على خير يااارب
طمنينى احوالك اية المفروض تكون اتظبطت ان شاء الله من اللى حصل اكيد الراجل كان قلقان عليكى مش كدة ولا ايييييييييييييييييييييية

[دودى اشرف]

متسمعيش للجزيرة اصلا .. هاتى القنوات المصرية احسنلك لان كل القنوات الفضائية زى الجزيرة والعربية والحرة والبى بى سى العربية بتهيج الناس باخبارها وبتقول اخبار خطأ
اصلا قفلوا قناة الجزيرة هنا فى مصر والناس بتشتمها فى المظاهرات .. بتقول الجزيرة فين الشعب المصرى اهو على اساس انها كانت جايبة ان الشعب المصرى بياكل فى بعض فا اتفرجى احسن على القنوات المصرية لانهم بيجيبوا صور قديمة والدنيا بتبقى هديت بس هما دايما بيجيبوا اللى ضد الريس مش اللى معاه كمان حتى لاحظى ده

[dr.princess]

والله معرفش الوجع ده من ايه ربنا المستعان

[MALAK2010]

انا هقوم يا بنات لان جوزى جة سلاااااااااااااااااااااام

[dr.princess]

مع السلامة يا ملك
اشوفك بكرة ان شاء الله

[دودى اشرف]

ميرسى يا بنات الله يبارك فيكم .. عقبالكم ان شاء الله ويقومنا كلنا بالف سلامة يارب

[dr.princess]

دودى معلشى انا هقفل جوزى جه سلالالالالام

[prịncēṧṧ]

في حد هنــــــــــــــــا

[رنا خالد]

وحشتوني يابنات والله حد منكم موجود ؟

[somia]

رنا انا هنااااااااااااااااااااااااا .. يا رب تكوني موجوده لسة

[رنا خالد]

سمسمه وحشتيني جداااااااااااااا
عامله ايه يابنتي والنونو عامل ايه
علي فكره لوجي بتسلم عليكي اوي

[somia]

رنا والله وانتي وحشتينييييييييييييييييييييييييييييييي وهموت واشوف لوجي بجد

[somia]

النونو بتسلم عليكي وعلى لوجي

[somia]

صحيح يا رنا انا عايزة أحتفظ بصورة لوجي لاني والله حبيتها بجد وساعات بتوحشني وببقى هموت وأشوفها ممكن؟؟؟

[somia]

رنا انتي هنا ولا لوجي خدتك مني؟؟؟؟

[رنا خالد]

طبعا ممكن ياسميه وبجد انا مبسوطه اوي انك حباها حاسه بكده من كلامك
وبعدين هو احنا نطول ياسمسمه قوليلي عامله ايه ورأيك ايه في اللي بيحصل ده
بجد انا خايفه علي بلدنا اوي

[somia]

تسلمي يا رنا ربنا يباركلك فيها يا رب ويجعلهالك ذرية صالحة يا رب ..
عارفة يا رنا انا حاسة انهم المفروض يرجعوا بقى خلاص ماهو عمل اللي عايزيينه والبلد بجد ابتدت تتخرب خلاص يا رب استرها على البلد يا رب

[somia]

رنا طب ممكن تحطيلي صورة الكتكوتة الصغننة بتاعتك ... وبوسيهالي كثيييييييييييييييييير عشان وحشتني ومستنيه اولد عشان اشوفها

[رنا خالد]

انا بقول زيك كده ياسميه كفايه بقي خراب حرام بجد الراجل كده عداه العيب وازح واللي كنا بنطالب بيه حققه اكتر من كده يبقي دبور وزن علي خراب عشه
قوليلي اخبار الحمل ايه معاكي وحركه النونو ولا اقولك النونه لحسن انا عارفه انك نفسك في بنوته
ربنا يديكي اللي نفسك فيه ياسميه ان شاء الله

[رنا خالد]

اصل انا عند ماما في حلوان من يوم الجمعه خفت اقعد في بيتي من المظاهرات والرعب ده
فالصور بتاعتها علي الكمبيوتر عندي في بيتي بس اوعدك اول ماروح هابعتلك صورتها والله
ومش صوره واحده بس لا كذه صوره ده انا مصوراها شوية صور جديده عسل

[somia]

يسمع منك ربنا يا رنا وتبقى بنوتة عسولة وأمورة زي ماشاء الله عليها لوجي ..
النونة ماشاء الله عليها بتتدرب كراتيه جوه مع المثانة اما ببقى بصوت من كثر دخول الحمام على الفاضي ..
رنا ممكن تحطيلي صورة العسل عشان أحتفظ بيها

[somia]

مفيش مشكلة يا رنا وانا مستنية الصور باذن الله تعالى

[somia]

المهم لوجي عاملة ايه الوقتي .. لسة مطلعة عينك من لخبطة النوم ولا ربنا كرمها وهديت .. صحيح احنا تمينا الشهرين ولا لسة؟؟؟

[رنا خالد]

ههههههههه ربنا يخليهالك ياسمسه دي باين عليها شقيه جدا وهاتغلبك زي الارنوبه اللي عندي هي لسه ماكملتش الشهرين
فاضلها 12 يوم
بس نومها متلخبط ساعات تنام بالليل وساعات بالنهار وشويه تنام كتير وشويه تانيه مابتنمش خالص ربنا يهديها لحسن انا خلاص جبت جاز ههههههههه بس اخواتي وماما الحمد لله مخففين عني خالص وجودي عند ماما راحه كبيره ليا لما انا نفسي كنت ابقي ساكنه جنبها
هو انتي ساكنه في حلوان ياسميه ولا مامتك هيا اللي في حلوان؟

[somia]

ماما هيه اللي في حلوان بس انا ساعات كثير قوي ببقى هناك

[somia]

احنا لسة صغننين قوييييييييييييي..
صحيح يا رنا انتي قولتي انتي منين من حلوان بالضبط؟؟؟

[رنا خالد]

انا زيك كده ماما في حلوان وانا عايشه في مدينة نصر انتي عايشه فين ياسميه؟
ومتجوزه من امتي صحيح ؟ ده انا عيد جوازي الجمعه دي لا اللي بعدها
الجمعه اللي فاتت سموها جمعة الغضب واللي جايه جمعة الرحيل مش عارفه الجمعه بتاعة عيد جوازي دي هايسموها ايه ؟ جمعة النكد هههههههههههه

[رنا خالد]

انا من حدايق حلوان علي الكورنيش قريبه من نادي دار المهندسين تعرفيه؟
وكنت في جامعة حلوان كمان وكان نفسي اسكن فيها عشان ابقي قريبه من ماما بس يلا بقي ماليش نصيب

[somia]

بس انا كنت في جامعة القاهرة .. صحيح انتي كنتي كلية ايه؟؟؟
انا اداب عربي

[somia]

انا متزوجة من حوالي سنة ونص ..
كل سنة وزواجك سعيد وربنا يباركلك في زوجك يا رب

[رنا خالد]

ربنا يخليكي ياسمسمه وعيد جواز سعيد عليكي ياقمر
انا وانتي مش هانعرف نجيب هديه وفعلا شكلنا هايبقي وحش بس مش دي المشكله
المشكله الحقيقه ان اجوازتنا مش هايجيبوا لنا هديه ههههههههههه
كنت مستنيه تورتايه حلوه يارب الامور بقي تتصلح ف البلد عشان يجيب جوزي التورتايه هههههههههه

[somia]

هأدعيلك بس بشرط تديلي حتة حلوة من التورتة وطبعا شيكولاته ...
بس انا كده كده مكنتش هاخد هدية بس صدقيني كنت هاجيبها بس الظروف دي بقت فعلا صعبة قوي ربنا يسترها على بلدنا يا رب

[somia]

انا لسة ذكرى زواجي بدرييييييييييييييييييي .. انا ذكرى ميلاد زوجي فاضلها حوالي اسبوع ونص

[om aseel]

صباح الخير عليكم جميعآ

ازيكم ؟

أن شآآء الله تكونوا بخير ...~

[رنا خالد]

امين يارب ياسميه لحسن والله الواحد خايف علي حال بلدنا اوي
ده لسه حالا المسجد بينادي في الميكرفون وبيقول ان البلطجيه قريبين من المنطقه احموا نفسكم
بجد انا اول مره احس اني خايفه كده مرعوبه علي امي واخواتي البنات وعلي جوزي وبنتي ونفسي وكل الناس اللي بحبهم ربنا يعدي الايام دي علي خير

[رنا خالد]

كل سنه وهو طيب ياسميه مش لازم هديه اكيد النونه احلي هديه منك ليه
ازيك يادينا منورانا يلا شاركينا الحوار
علي فكره انا اداب علم نفس جامعة حلوان خريجة 2009 وعندي 23 سنه ونص كمان
اي خدمه ياسمسمه السي ي بتاعي تحت امرك
انا عرفت انك بتكتبي اشعار وقصائد صح؟

[om aseel]

مصر بخير يارنا وان شااء الله هاتبقى بخير بأهلها وناسها الطيبين

وربنا يستر علينا وعلى شبابنا وازواجنا ياارب...~

[somia]

ربنا يسترها معاكوا يا رب يا رنا انا حساكي قوي لاننا كنا في الموقف ده كذا مرة الايام اللي فاتت

[somia]

ازيك يا دينا عاملة ايه ؟؟
أه يا رنا بكتب قصائد وخواطر كمان بس للأسف الشديد الرئيس مانعني من نشرها مع اني هموت واعرف راي الناس فيها .. اهئ اهئ اهئ

[om aseel]

ااهلآ بيكى يارنا

انا دينا 25 سنة ولسه متجوزة من 3 شهور

واكيد هشارك فى الحوار انا سهرانة معاكم لحد اما نشوف مصير مصر هايرسي على ايه!!

[رنا خالد]

والله ياسميه مبقناش نحس بالامان واحنا جوه بيوتنا ووسط اهلنا حاجه مايصدقهاش عقل
ربنا يرحمنا برحمته
دينا عرفينا بنفسك اكتر يعني عايزين السي في بتاعك ههههههههه
واحنا كمان هانقدم لك السي في وياريت تبقي واحده مننا دي الدرشه هنا خطيره
مايتزهقش منها ابدا

[رنا خالد]

لا طالما الرئيس مانعك يبقي سمعا وطاعه بس اكيد انتي شاعره موهوبه
انا برضه مدمنه كتابة قصائد واشعار وبحمل صور واكتب عليها اشعار حلوه هاوريكي كام واحده كده علي الماشي

[somia]

رنا للأسف الشديد هاضطر اسيب لوجي وأسيبكم وأخرج لأني بجد مش قادرة أفتح عيني ادعولنا بس ان الليلة تعدي على خير ومنصحاش على مصيبة..
رنا هاستناكي تطمنيني على خير الله يخليكي اول ما الليلة دي تعدي على خير

[om aseel]

اهلآ بيكى ياسوما

ماشى يارنا ههههههههههههههه

انا دينا من 6 أكتوبر 25 سنة معايا معهد فنى صناعى سنتين

وحامل فى الشهر التانى فى حاجات كتير ممكن اقولها لو عاوزة ههههههههه

اسألى انتى بسس

[somia]

رنا حطي الصور وأنا هاشوفها واقراها اول ما ادخل تاني باذن الله تعالى ...
السلام عليكم ورحمة الله وبركاته

[رنا خالد]

شويه صغيرين وجايه عشان هاغير للوجين

[om aseel]

طيب ياقمرات انا كمان هاقوم عشان هنام مش قادرة خلاص

وكمان تعبانة شوية

تصبحوا على خير يااارب

[MALAK2010]

انا هنااااااااااااااااا

[dr.princess]

صبااااااااح الخير يا ملك

[MALAK2010]

صباح النور يا لولو عاملة اية وبطنك اتحسنت ولا لسة؟؟؟؟؟؟

[dr.princess]

الحمدلله احسن بس لسه واجعانى والله مانا عارفة ارجع تانى للدواء ولا ايه

[MALAK2010]

بطنك وجعاكى وجع عادى ولا تقلصات الرحم اللى كانت جاتلك من فترة

[dr.princess]

لا الحمدلله مش تقلصات الرحم بس مغص جامد جامد لدرجة انى مكنتش قادرة اقف منه والله بالعافية قمت عملت الرز امبارح الحمدلله

[MALAK2010]

الف سلامة عليكى يا لولو وربنا يشفيكى يا جميل وتخلصى بقا ايام الحمل على خير لانك تعبتى اوى

[dr.princess]

ياااااااارب اللهم امين انا وانتى وكل المسلمين

[dr.princess]

كنت بكلم زوج اختى قريب بيقولى انتى بقيتى فى الكام قلتله اواخر السادس قالى طيب خدى بالك بقى من الاسبوعين الجايين دول اصلى اتشائمت ههههههههههههههههه

[MALAK2010]

لا ربنا يكملك على خير يارب وتقومى بالسلامة

[MALAK2010]

انا قايمة من النوم بطنى وضهرى بيوجعونى
والقاعدة قدام الاب توب دى متعبة

[dr.princess]

يااااااااااارب اللهم امين
كنت عايزة اسئلك لو تعرفى مرات اخوكى دلوقتى بتتابع كل شهر ولا كل اسبوعين

[dr.princess]

من ايه الف سلامة
انا بقعد على السرير وبحط ورايا مخدة مريحة ولما بتعب بفرد جسمى شوية

[MALAK2010]

هى الحمد لله دخلت التاسع المفروض تتابع كل اسبوعين بس ماما بتشد شعرها ههههههه منها هى واخويا هههههه بتكسل تروح المتابعات اللى كل شهر مابالك اللى كل اسبوعين مع ان العيادة يدوبك تعدى الشارع
مش عارفة بدات تروح ولا لسة لان ماكلمتش ماما على النت بقالى مدة

دى لسة واخدة حقنة التيتانوس من اسبوع ويا عالم بالحقنة التانيةههههه

[MALAK2010]

اصلى بخاف من الاشعه بتاعت الجهاز فبقالى يومين بحط الجهاز على الكنبة واحط مخدة على الارض واقعد فالقاعده دى تعبتنى بس رجعت اقعد زى ما كنت بقعد الاول بحطى على الكنبة وانام جنبة اصل كنب الانترية بتاعى عريييييييييييييييييييض هههههههههههه

[dr.princess]

يالهوى ايه الكسل ده ده انا بحسب ميعاد الكشف من قبله باسبوعين ثلاثة
انا بسأل لانى قرأت على النت ان المتابعة كل اسبوعين من اول السابع ومن التاسع كل اسبوع
وطبعا لانك عارفة دكتورتى مش بتقول حاجة فأنا اللى سألتها قالتلى اه تعالى كل اسبوعين فجوزى بيقولى مش لازم مادام الحمد لله مفيش حاجة وحشة فحبيت اتأكد ضرورى ولا عادى يعنى

[dr.princess]

هههههههههههه ماشاء الله فعلا لما تحطيه على الكنبه وتقعدى على الارض اكيد ده متعب اوى
انا بقعد على السرير وحاطاه على الكوميدينو جنبى
وفى الشقة القديمة كنت بحطه على الارض وانام او اقعد جنبه

[MALAK2010]

انا مافيدكيش فى الموضوع دة لانى زى ماحكيتلك بس لما البنات تدخل نبقى نسالهم
بس اللى كنت اعرفة ان المتابعة كل شهر الا فى التاسع بتبقا كل اسبوعين

[dr.princess]

لالالا انا متأكده من السابع كل اسبوعين ومن التاسع كل اسبوع
ان شاء الله اسئل دودى وباقى البنات اللى ولدوا

[MALAK2010]

نضفتى البطة امبارح ولا عملتى اية؟؟؟
عارفة انا عمرى مافتح بطة او فرخة وادخل ايدى جواها ههههههههههههههههههه بخاف
عمرى ماادخل ايدى فى حاجة مش شايفاها لو كانت افرخة شفافة وماله هههههههههههههههه

[dr.princess]

ههههههههههههههههه اه الحمدلله نظفتها
لا انا كنت بنظفها كتير لماما لان ايديها بتوجعها فكنت بعمل مكانها
جوزى دخل عليا وانا بنظفها من جوه ومقولكيش على الريحة بقى هههههههههههههه بيقولى ايه الريحة الحلوة دى وعلى وشه كل ملامح القرف اللى عمرى ماشفتها على وشه فقلتله البطة دى بتاكل بيبى على رأى عمنا اللمبى هههههههههههههههههههههههههههههههههه

[MALAK2010]

هههههههههههههه يلا الحمد لله انك نضفتيها
احنا كان قدامنا ماكنة تنضيف فكنا بنوديها تنضف من الريش ومن جواها وناخدها ننضفها ونغسلها

انا ضهرى بيوجعنى اوووووى مش عارفة اعمل اية

[dr.princess]

الف سلامة عليكى
طيب روحى افردى ظهرك مفيش اى حل تانى علشان مينفعش نستعمل اى مراهم دلوقتى ولما جوزك يجى خليه يعمل مساج بالراحة كده لظهرك

[MALAK2010]

طيب يا لولو لانى مش قادرة اقعد والله معلش هسيبك لوحدك
ولما ارتاح هدخل ان شاء الله سلام

[dr.princess]

لا ولا يهمك ابدا
خدى راحتك ارتاحى على الاخر ولما تبقى كويسة ابقى طمنينى عليكى

[MALAK2010]

انا الحمد لله بقيت كويسة يالولو حبيت ادخل اطمنك

[dr.princess]

الحمدلله كويس انك طمنتينى
معلشى مخدتش بالى الا دلوقتى

[MALAK2010]

انا هنااااااااااا

[MALAK2010]

http://forum.hwaml.com/imgcache2/hwaml.com_1296734185_676.gif

[ام البنوتة]

السلام عليكم
في حد هنا؟

[dr.princess]

حد هنا يا بناااات

[prịncēṧṧ]

انا هنااااااااا

[dr.princess]

ام البنوتة اخبارك ايه انتى والبنوتة

[dr.princess]

برنسيس ازيييييك
شفتى الفرق بينا الدكترة بس هههههههههههههه

[dr.princess]

انا لولو على فكرة

[ام البنوتة]

السلام عليكم
انتوا فين يا بنات؟

[ام البنوتة]

لولو وملوكة انتم فين؟

[ام سند]

اللهم ثبت جنيني واحفظه..واجعله سليم معافى لا زيادة في خلقه ولا نقصان..وجعله ذكراً صالحاً باراً..وقر عيني وعين زوجي به..يا حي يا قيوم..

[ام يحيي 2011]

السلام عليكم

[ام يحيي 2011]

حد هنا يا جماعه

فكرنى ولا نستونى

وحشتونى ااااااااوووووووووووىىىىىىىىى

[ام يحيي 2011]

لما حد يدخل ابقوا طمنونى عليكم

واحب افرحكم اننا ركبنا نت جديد الحمد لله

بس بالله ادعوا لمصر والى بيحصل فيها يعدى على خير

[MALAK2010]

ام حنييييييييييييين ازيك يا جميل اخيرا دخلتى ازيك عاملة اية وحشتينا
خلاص مالكيش حجه ادخلى بقا معانا علطووووووووووووول طالما جبتى نت جديد
ياااااااارب احمى مصر والمصريييين ياااارب ويبارك فيهم

[MALAK2010]

التجمع مهجووووووووووووور طبعا
حد يدخل لانى زهقااااااااااااااااااااااااااانة

[نولارا]

انا هنا يالوكه

[MALAK2010]

نورا الحمد لله انى لقيت حد يكسر الصمت اللى انا فية ههههههههههههههه
ازيك يا جميل عاملة اية وحشانى وموكشة عامل معاكى اية

[نولارا]

الحمد لله كويسه وموكشه مدوخنى خالص مش عاوزنى اعمل اى حاجه غير انى العب معاه وبس