دردشة حوامل مصر - دردشة بنات مصر - تجمع حوامل مصر

[dr.princess]

رنا
ازيك انا هنااااااااااا

[dr.princess]

صباح النوووووووووووووم

[توتة السيد]

صباح الخير بالليل

[توتة السيد]

برنسيس ورنا موجودين

[dr.princess]

انا موجوودة

[توتة السيد]

ازيك برنسيس عاملة ايه

[dr.princess]

الحمد لله كويسة
انتى اخبارك ايه واخبار النونو ؟؟

[توتة السيد]

الحمد لله بخير حبيبتي والنونو كمان الحمد لله

[dr.princess]

الحمد لله

البنات مش عارفة مالهم كده فين نايمين ولا ايه

[توتة السيد]

سومة كانت مصدعة ومش قادرة تنام بس بعد كده دخلت تنام

ودودي وحشتني قوي مش عارفة راحت فين وملاك كمان خرجت وماجتش اظاهر ناموا

[توتة السيد]

نولارا يمكن تدخل بالليل شوية اعتقد

[dr.princess]

انا مش عارفة ليه سمية سايبة نفسها فى الصداع ده
ممكن تاخد بنادول عادى او بنادول اكتى فاست او اى حاجة باراسيتامول بس ( يعنى مايكونش فيها كافيين ) مفيش منه قلق على الحمل

[dr.princess]

يدخلوا براحتهم
السهرة النهاردة صباحى للفجر هههههههههههه

[توتة السيد]

مش عارفة بس يمكن خايفة ليضر

[توتة السيد]

ايه ده خلاص جوزك بدأ اسبوعين بالليل

[dr.princess]

توتة
قوليلى الدكتورة كانت قالتلك اى حاجة عن التمر انه وحش او كده لانى سمعت انه بيعمل انقباضات فى الرحم وانا بقالى مده هموت على الرطب وخايفة اكله

[dr.princess]

اه بدأ من النهاردة الشغل بالليل
حاجة مرمطة والله ههههههههههههههه

[توتة السيد]

لا ماقلتليش وانا مسألتهاش بس لو نفسك تاكلي كولي بس ماتكتريش انا باكل بس 3 بلحات بس

في اليوم علي نفسك وكمان سنة التثليث

[MALAK2010]

اناااااااااااااااااااا جيت

انا كمان عاوزة اعرف عن التمر
انا اسمع انة مفيد فى التاسع بس فى الشهور الاولى مش عارفة مضر ولا اية

[MALAK2010]

ازيكم الاول وحشتونى

[dr.princess]

انا عندى شوية صغيرين باقيين من رمضان
وقلت لجوزى يجيبلى رطب نفسى فيه اوى

[somia]

يا سلام على الحلوين اللي مجمعين كلهم..
السلام عليييييييييييييييييكم ..انا جيت

[dr.princess]

ايه النور ده
malak2010 و somia دخلوا مع بعض

[MALAK2010]

اهئ اهئ اهئ
ملك طلعة تانى جوزى عاوز الجهاز سلاااااااااااااااااااااااااااااام

[somia]

عادي يا ملاك بتحصلي كثيييييييييييييير بس انتي خلي بالك من نفسك ونشوفك اما يسيبه

[توتة السيد]

الله يقويه يارب ويديه الصحة يابرنسيس

[توتة السيد]

ازيك ياملاك عاملة ايه

[dr.princess]

يا فرحة ماتمت
يللا هنستناكى تانى يا malak2010

[توتة السيد]

سومة الحلوة اخبار الشونيور ايه ههههههههه

[somia]

توتة انتي عملتي ايه في الموقع؟؟؟

[توتة السيد]

حبيبتي برنسيس كولي علشان نفسك بس زي ماقولتلك ماتكتريش يعني 3 بلحات
مثلا في اليوم

[توتة السيد]

اسكتي ماتفكرنيش جنني كل ماكتب يقولي غلط احول اظاهر

[dr.princess]

انا مش واثقة اوى فى التمر اللى باقى من رمضان ده
فهغصب على جوزى يجيبلى بأسرع وقت ممكن

[somia]

الشنيور فضل لغاية بعد المغرب بنص ساعة وبعدين بطلوا نص ساعة فنمتلي ساعة قبل العشاء وصحيت

[somia]

يا بنتي لو عايزة أبعتلك أنا الروابط لغاية ما يتظبط الموقع وتسجلي فيه

[توتة السيد]

لا مادام مش واثقة ازا كان لسه كويس ماتكلهوش وخلي جوزك يجبلك وبالف هنا ياقمر

[توتة السيد]

ههههههههههههه طيب كويس لحتي تخطفي ساعة نوم نوم العوافي حبيبتي

[dr.princess]

سمسمة ياقلبى عادى ياحبيبتى تاخدى اى دواء فيه باراسيتامول بس يعنى مفيش فيه كافيين زى بنادول وبنادول اكتى فاست او شوفى اى دواء زيهم مفيش فيهم خطر على الحمل ( البنادول اكسترا لأ عشان فيه كافيين )
انا لسه واخداهم من يومين لما كان ظهرى واجعنى وقبله بيوم كان عندى صداع

[توتة السيد]

انا ياسومة مش عايزة اتعبك معايا احاول تاني معاه واشوف

[dr.princess]

توتة الله يهنيكى ياااااااارب

[somia]

الله يخليكي عارفة صحيح ساعة بس ظبتتلي دماغي شوية والحمد لله

[somia]

يا بنتي ولا تعب ولا جاجة لو عايزة معنديش مشكلة ولو عايزة تحاولي شوية برضه مفيش مشكلة

[dr.princess]

بقولكم ايه يابنات
انا قررت اسمحلكم تدلعونى ههههههههههههه
قولولى لولو ( طبعا انتى فاهمة يا توتة اه وكمان ملك عارفة ) اصلى الاسم اللى مسجلة بيه ده مش عاجبنى ابدا بس ساعتها مجاش فى دماغى اسم اسجل بيه ان شاء الله ابقى اغيره

[توتة السيد]

اكيد هتظبط دماغك شوية والف سلامة عليكي من الصداع ياسمسم

[توتة السيد]

ربنا يخليك ياسمسم تسلمي انا هحاول معاه تاني لو مرضيش اقولك ابعتيلي الروابط

[توتة السيد]

ههههههههههه اه فاهمة يالولو اسم الدلع

ده جميل خلاص ننتهك بيه علي طول

[somia]

ايه ايه ايه ده ..اشمعنى يعني هما الاثنين عارفين وانا لأ يا مدام لولو هوه انا مش أد المقام ولا إيه ؟؟؟
ههههههههههههههه

[somia]

مفيش مشكلة يا توته وربنا يسهلك وتعرفي تسجلي فيه

[dr.princess]

سمسمة لالالا ودى تيجى برده
هقولك السبب ايه
توتة انا بكلمها على الياهو من مدة يعنى تقريبا من اول ما دخلت على المنتدى
وكمان ملك لانى قبل كده كنت بعتلها على الخاص رسايل وفى واحدة منهم قلتلها اسمى اللى هو ناس بتدلعنى بتقولى يا لولو مع انه مش افضل دلع بس لو وضحت اكتر هيتعرف

[somia]

مفيش مشكلة يا لولو ..

[somia]

يا جماعة انا عندي احباااااااااااااااااااااط..

[توتة السيد]

ليه ياسومة بعد الشر
في ايه

[dr.princess]

سمسمة ليه الاحباااااااااط بعيد الشر عنك

[توتة السيد]

رحتو فين ياقمرات

[somia]

يا بنتي نفسي جابتني على مكرونة اسباكيتي مسلوقة فجيت على نفسي وقمت سلقتها وكان عندي لحمة مفرومة في الثلاجة سخنتها والله يا بنتي كنت بنهج من التعب فعمايل دول بس المهم بعد اما كلت وخت المثبت وانا باكل قلت بلاش اسيب في الحوض المواعين دي لو اتكوموا مش هقدر عليهم مجرد ما دخلت المطبخ وويا بنتي المطبخ مفيهوش حاجة بس مجرد ما الريحة اتغيرت فمناخيري لقيت نفسي قمت جايبة اللي فبطني والله يا بنتي نفسي صعبت عليا قوي والدموع في عيني انا مصدقت عملت لقمة تتاكل وكلتها واديني مفيش حاجة فبطني دلوقتي..
بس الحمد لله ربنا وحدة الخير ليا في الاكل ده ولا لأ

[توتة السيد]

ياسمسم والله كنت زيكم ياجماعة ماتقلقوش هي فتره وهتعدي انا

في اشهر الوحم دي ماكنتش بالكل اي حاجة يادوب تفاحة كوب لبن بس ولو فرجها ربنا يبقي

بيض ومابيقعدش والريحة اشمها من علي بعد 100 كيلو وتلقيني علي الحمام لما سفرت لجوزي والله ماعرفني في المطار خسيت جام ويقولي كده وانا موصيكي تاكلي وبتضحكي عليا في التلفون وتقوليلي باكل فين الاكل ده معلش استحملي الفترة دي وان شاء الله تعدي علي خير وبعد كده هيشيلوكي من علي الاكل شيل بالعافية هههههههههه

[dr.princess]

الف سلامة عليكى يا سمسمة
وانا عارفة انها حاجة تضايق بس هتعملى ايه يعنى بس ابقى دفى معدتك كويس ( ماما دايما بتقولى كده ) تلاقيكى مش مستحملة دلوقتى
هى الدكتورة مش كاتبالك دواء للترجيع ولا ايه انا باخده كل يوم اساسى
بس انا شايفه انك بتعملى مكرونة كتييير اوى ياحبيبتى جايز نفسك زهقت منها غيرى وممكن معدتك ترتاح شوية
وخليكى فى الفواكة بتسد معايا شوية لما معدتى بتبقى بايظة مثلا التفاح

[somia]

يا بنتي انا مكلتهاش من ساعة الحمل الا 4 مرات وبعدين نفسي كان جايباني عليها قوي كان نفسي فيها جدا

[somia]

يا رب تعدي المرحلة دي على خير لان الواحد مرعوب من عدم الاكل ومرعوب اكثر من اللي ممكن تقوله الدكتورة بكرة

[somia]

انتوا رحتوا فيييييييييييييييييييين؟؟

[dr.princess]

ان شاء الله خير ماتقلقيش

معلشى ممكن اكون غلطانة بس انا فاكرة انك قلتى كتير على المكرونة معلش الذاكرة بقى ههههههههههههه

[somia]

باذن الله ..
ايه رايكوا كل واحدة تحكي قصة ازاي اتعرفت على زوجها وازاي اتقدملها وازاي كان اللقاء الاول؟؟؟

[رنا خالد]

فكره حلوه اوي ياسميه حكاية طريقة التعارف علي ازواجنا دي
وكمان الف سلامه عليكي ومعلش استحملي شويه وبكره هتاكلي المرونه بكيسها من غير اي مشاكل هههههههه

[dr.princess]

معلشى يابنات
هقفل دلوقتى وشوية كده هابقى ارجعلكم تانى

[somia]

ماشي لولو ... السلام عليكم

[somia]

رنا ايه رأيك تبتدي انتي ؟؟؟ يلا مستنينك...

[رنا خالد]

سمية انتي ليه هنا ولا مشيتي

[رنا خالد]

اوكي ابدأ انا بس ياريت لو حبيتي تطلعي قوليلي عشان مابقاش بكلم نفسي هههههه

[somia]

متخافيش لسة بدري على طلوعي ..
يلا سمي الله وابتدي..

[رنا خالد]

موجوده ياسميه ولا خرجتي؟؟؟

[somia]

يا بنتي موجوووووووووووووووووووووووووووووودة ..
سمي الله وابتدي .. منتظرىه حكايتك على نااااااااار...ههههههههههه

[somia]

توتة انتي رحتي فيييييييييييين؟؟

[رنا خالد]

انا اتعرفت علي جوزي عن طريق النت بشكل غريب جدا
انا كنت بدخل علي شات بس شات محترم وكل الناس اللي فيه كويسين وبدأ بينا الكلام وبعدين اخد الميل بتاعي وبدأنا نتكلم
ونتعرف علي بعض اكتر وهو بصراحه شدني ليه جدا لأنه بني ادم متدين اوي ومحترم وكان كلامنا كله عن البرامج الدينيه
والصلاه زكان دايما بينصحني وغير فيا حاجات كتير
انتي معايا ياسميه اكمل ولا ايه؟

[somia]

يا بنتي والله العظيم معاكييييييييييييييييييييييييييييييييي

[توتة السيد]

موجودة ياقمر بس كنت بكلم ماما

[رنا خالد]

بس وبدأنا نعجب ببعض وبالصدفه انه كان نازل الجامعه عشان يخلص شوية ورق وانا من نفس الجامعه بتاعته وشفنا بعض
بعد مافضلنا نتكلم حوالي شهرين
واول ماشفني قاللي انه معجب بيا وبأخلاقي وحابب يتقدم لي
وبدأ الموضوع ياخد شكل رسمي واتخطبنا بعد قصة حب استمرت حوالي 7 شهور
وقعدنا سنه ونص مخطوبين وبعد كده اتجوزنا
ويوم-2010- 2-11
وبقالي 8شهور و11يوم متجوزه
وهو اسمه احمد وشغال محاسب
انا خريجة اداب وهو خريج تجاره
وانا عندي 23 سنه
وهو عنده 30 سنه

[somia]

رنا اهلك قالولك ايه على موضوع النت ده؟؟؟
توتة خليكي معانا لو خلصتي مع مامتك انتي اللي عليكي الدور..

[somia]

رنا لعملك انتي محكتيش اول لقاء بالتفصيل الممل ..لو ينفع يعني

[توتة السيد]

ماشي ياقمر

[رنا خالد]

انا بابا متوفي وامي هي اقرب صاحبة ليا
في البدايه بصراحه كنت مش قايله لها علي موضوع النت ده
لأني كنت خايفه ترفض واستنيت لحد ماعرفت احمد كويس وبعدين قولتلها هي طبعا زعلت مني لأني خبيت عليها بس بصراحه احمد عريس مايترفضش خالص
بجد شاب متدين وبيصلي واخلاقه حلوه اوي وابن ناس محترمين
بجد كل الناس بتحسدني عليه هو كان اول ولد اعرفه ع النت احنا اشتركنا في النت يوم 3فبراير اتعرفت عليه يوم 5 فبراير
زي مايكون سبحان الله ربنا كان قاسمنا لبعض

[somia]

وأول لقاء..؟؟؟؟

[somia]

ايه يا بنتي انتي اختفيتي كده ليه؟؟؟؟

[رنا خالد]

ابدا اول ماشوفنا بعض كان كلامنا قليل جدا كنت طول الوقت ساكته ومتلخبطه جداااااااااااااا
وبعد شويه بدأ يكلمني عن نفسه وعن اهله وشغله
وعن مواصفات البنت اللي حابب يرتبط بيها
وسألني عن مواصفات الشاب اللي انا حابة ارتبط بيه
كان كلامنا رسمي اوي لأن محدش كان عارف نوايا التاني
اللقاء كله كان حوالي ساعتين جوه الجامعه وفي نهاية الساعتين
قاللي انه معجب بيا بشخصيتي وبعد ماكان مضرب عن الجواز خالص وان اخواته اللي اصغر منه اتجوزوا وهو كان رافض تماما الفكره دلوقتي الامر اختلف وطلب ايدي بشكل كله ادب وشياكه
في البدايه انا كنت خايفة اكمني ماكنتش مستريحه لموضوع النت ده وكنت دايما برفض الاسلوب ده في التعارف
بس عملت صلاة استخارة بعدها حسيت اني مطمنه ولقيت الموضوع بيتسهل لوحده وكل اللي حواليا كانوا بيشكروا فيه
بجد ساعدنا بعض كتير وكل واحد فينا كان بيقرب التاني من ربنا كنا بنصحي بعض بالتليفون في الفجر عشان نصلي وكنا بنصوم سوي الاتنين والخميس حسيت ان هو ده البني ادم اللي هايساعدني ارضي ربنا وهايكون اب صالح لولادي
بس انا رغيت كتيييييييير جدا معلش

[somia]

هوه ده كده رغي كثير ... اصبري اما يجي دوري هتشوفي الرغي..
يا سلام على الأدب والشياكة ماشي يا بنتي ..هههههههههههه
توتة دورك يا ماما انتي هنا ولا لأ؟؟؟؟؟ ههههههههههههههههه

[توتة السيد]

انا هنا انا هنا

[dr.princess]

انا رجعت
بس هموت من الزهق القعدة بالليل لوحدى حاجة تخنق والله

[توتة السيد]

بدأ دوري اسمي الله وادخل في الموضوع

[رنا خالد]

ياجماعه ايه رأيكم ناخد ايميلات بعض ونتكلم علي الميل بشكل جماعي واهو نسلي بعض شويه ده لو معندكوش مانع

[توتة السيد]

ايه الحركات دي يارنا

[dr.princess]

امال انتوا فين اجوازكم يا بنات رامينهم كده ولا على البال هههههههههههههه
انا لو جوزى هنا مكنتوش شفتوا خيالى هههههههههههههه

[توتة السيد]

ربنا يسعدكم ويخليكم لبعض بس بصراحة اول مرة اشوف جواز عن طريق النت بحق وحقيقي ربنا يحفظم من كل سوء

[دودى اشرف]

السلام عليكم ورحمة الله وبركاته ... ازيكم يا بنات عاملين ايه .. قلت اسلم وابقى اقرا براحتى الردود ,,,, وحشتونى والله كتييييييير hwaml7hwaml7

[توتة السيد]

هعمل ايه يابرنسيس جوزي دخل نام من الساعة 9 ونص وانا مابيجنيش نوم دلوقتي خالص

وطبعا لو رحت نمت هقعد اقلب وصحيه هو كمان

[somia]

اهلا بيكي لولو.. كله كوم والنوم لوحدك ده كوم تاني انا اما زوجي بيبقى فمأمورية ولا نبطشية بعاني عشان اعرف انام ..
توتة احكي احنا مستنيين الحدوتة

[توتة السيد]

دودي حياتي والله العظيم وحشتيني مووووووووووووووت

كل ده بتزوري صحبتك هي ساكنة في المريخ ولا ايه ههههههه

[dr.princess]

ازيك يا دودى
فينك من زمان انتى كمان وحشتينا

[somia]

اهلا بيكي يا دودي اقري على مهلك يا بنتي لغاية مت نسمع حكاية توتة...

[رنا خالد]

يلا ياتوته ابدأ في الحدوته بس بالتفصيل

[dr.princess]

سمسمة ومين قال انى بانام بالليل وهوا بره
لالالالا انا بفضل مستنياه للفجر على مايرجع علشان نتعشى طبعا كل المواعيد متشقلبة وهو مش بينام قبل الساعة 8 او 9 الصبح وانا بحاول افضل صاحية معاه بس لو مقدرتش بانام قبله

[توتة السيد]

شوفي ياستي خير اللهم اجعله خير >>> بحكي حلم ههههههههههههه

انا اول لقاء كان بجوزي قبل الفرح بأسبوع واحد فقط لاغير دا اول حاجة

[dr.princess]

رنا
احمدى ربنا انه طلع بنى ادم كويس ومش زى الولاد اللى بيبقوا على النت دول وفيهم العبر
وربنا يباركلك فيه ويخليكى ليه ياااااااااارب

[somia]

توتة فين الحكاية انا مستنيه اسمعها عشان نسمع برنسس كمان وأهرب انا وأدخل انام قصدي احكي انا وادخل اسافر مش بس انام ...هههههههههههههههه

[نولارا]

السلام عليكم انا جييييييييييييييييييييت

[رنا خالد]

ربنا يخليكي يادودي والحمد لله ان الواحده ربنا رزقها بشاب كويس لحسن شباب اليومين دول حاجه تحزن والله

[dr.princess]

نولارا
ايه ده العسل كله بيجى ورا بعضه ولا ايه

[somia]

شوفي ياستي خير اللهم اجعله خير >>> بحكي حلم ههههههههههههه

انا اول لقاء كان بجوزي قبل الفرح بأسبوع واحد فقط لاغير دا اول حاجة
نعممممممممممممممممممممممممممممم؟؟؟؟؟؟؟؟؟ظ وليه جايه على نفسك ما لسة بدري ..ههههههههههههه.. انتي بتتكلمي بجد؟؟؟

[نولارا]

كل مره سميه تضحك علينا وتفضل للاخر
ملناش دعوه احكى انتى الاول هه

[رنا خالد]

ياجماعه مردتوش عليا في حكاية الايميلات دي
ايه رأيكم ناخد ايميلات بعضينا ونتكلم كلنا سوي واهو نسلي بعض ونتعرف علي بعضينا اكتر

[نولارا]

نولارا
ايه ده العسل كله بيجى ورا بعضه ولا ايه

ايه ده كسفتينى وخدودى احمرو

[somia]

ازيك يا نولار وازي الاستاذ أحمد سلميلي عليه كثييييييييييييير

[نولارا]

موكشه بيسلم عليكوا ادعوله ينام بدرى النهارده
بدل كل يوم ساعته مضبوطه على الساعه2 الصبح

[دودى اشرف]

ملك مبرووووووك انك اطمنتى الحمدلله ربنا يكملك على خير يارب ... وعقبال ما سمية وبرنسيس يطمنوا ويطمنونا ان شاء الله

[somia]

كل مره سميه تضحك علينا وتفضل للاخر
ملناش دعوه احكى انتى الاول هه
هههههههههههههههههههههههه.. ماما معلماني دايما ان الاخير ربه كريم..ههههههههههه.. عشان كده لازم أستنى للاخر خالص ...هههههههههههه

[توتة السيد]

بس كنا مخطوبين شوفوا بقي جوزي يبقي صديق اخواتي في الكلية وايام الثانوي

بس بعد الكلية كل واحد راح شاف مستقبله بعيد عن التاني وانقطعوا عن بعض

وجوزي سافر الامارات واخواتي كل واحد في شغله لحد بعد 6 سنين

العلاقة رجعت تاني حصلت حادثة لواحد قريب جوزي ونزل من السفر علشان يشوف الحكاية

كان المشرف علي الحالة في المستشفي اخويا فتقابلو بعد 6 سنين ورجعت العلاقة بعد كده

هو سافر تاني الامارات بس هو كان يعرف اني اخويا عنده اخت بس من زمان ماشفنيش

المهم راح طلب ايدي من اخويا واخويا سأل ابويا وبعد كده جوزي طلبني رسمي من ابويا

وكان هينزل ونكتب الكتاب بس حصلت ظروف في الشغل ومقدرش ينزل فبعت اهلوا قروا الفاتحة وبدأنا نتكلم علي الموبايل اتقرت فتحتي يوم عيد ميلادي شفتوا محاسن الصدف

وبعد كده نزل قبل الفرح بأسبوع واحد بس كان لقاء يالهوووووووووووووي انا اول مرة اشوفه كنت في الضياع مرتبكة ومش عارفة اقول كلمتين علي بعض دا حتي ماقولتلوش حمد لله علي السلامة وبعد كدة اتجوزنا يوم 11/4/2010

انا جوزي بيشتغل مهندس معماري

وانا خريجة تربية لغة عربية

انا عندي 23 سنة

وهو عنده 28 سنة

وعاشنا في تبات ونبات ههههههههههههه وكوكوووووووو يامسرور ههههههههه

[نولارا]

ايه ياتوته هى حدوته قبل النوم
روحتى فين يابنتى
اكيد بتكتبى يلا ربنا معاكى

[somia]

نولار سهله يا تقلعيه الساعة يا تظبطيهاله على بدري شوية يعني واحدة ونص مثلا..ههههههههههههههههههه

[توتة السيد]

هههههههههههههه اه والله يسومة جد الجد كمان

[نولارا]

سميه اتريقى اتريقى
بكره لما النونو يشرف افرح فيكى وانتى عيونك حمرا من قله النوم

[رنا خالد]

ربنا يخليكوا لبعض ياتوته ويبارك لك فيه
بس قوليلي اخدتي عليه ازاي ؟
يعني هل الجواز قربكم من بعض ولالسه
وهل بعد الجواز حبتيه؟
معلش اسألتي بايخه بس اصل حكايتك حلوه وجديده فاحابه اعرف تفاصيلها

[somia]

أهه انا كده فهمت مع انه صعب برضه بس ربنا يباركلكم فبعض
احم احم .. ربنا يستر.. نولار دورك اتفضلي..
ههههههههه

[توتة السيد]

نولارا ياقمر حللتي اهلا ونزلتي سهلا اخبار احمد الجميل ايه

[رنا خالد]

سميه عماله تعزم علينا واحده واحده
بس في الاخر هاتحكي يعني هاتحكي بالعافيه ههههههههههه
عشان اعملك مكرونه اسبجتي باللحمه

[توتة السيد]

ربنا يخليكي يارنا ويخليلك جوزك

لا حبيبتي لا بايخة ولا حاجة

رغم اني الفترة كانت قصيرة بس والله من فضل الله

حسيت اني اعرفه من سنين الحمد لله رب العالمين هو انسان جميل ربنا يخليه ليا

انا حبيته في فترة الخطوبة كمان مش بعد الجواز ههههههه يكسوفي

[dr.princess]

نولارا
انا حاسة بيكى كويس اوى
لان كانت اختى تدبسنى اقعد بابنها وهى تنام بس هى كانت بتبقى تعبانة حرام اظلمها
بس ابنك والله محترم ابن اختى كان ولا ممكن ينام قبل الفجر وحتى لما كبر لغاية قبل ما اسافر كان 4 سنين كان على اقل تقدير 12 بالليل ينام بالغصب اما لو سيبناه يفضل صاحى عادى
ربنا يعينا عليهم ان شاء الله

[توتة السيد]

وبعد الجواز توطد الحب >>>>>>> حلوة توطد دي هههههههه

[رنا خالد]

حلوه اوي ياتوته منك كلمة ياكسوفي ههههه
بجد انتي زي العسل ويارب يسعدك انتي وجوزك يارب

[somia]

سميه اتريقى اتريقى
بكره لما النونو يشرف افرح فيكى وانتى عيونك حمرا من قله النوم
نولار انا اسفة .. متزعليش مني..مكنش قصدي اتريق ..كنت بهزر معاكي بس.. ربنا يباركلك فيه ويهديهولك ويكبس عليه النوم كل يوم وقت اما تحبي تنامي

[رنا خالد]

توطد كمان هههههههههه
لا طالما توطد يبقي مانقدرش نقول حاجه

[توتة السيد]

ويبارك فيكي ياسومة ياله دورك وماتحوليش الهرب

احكي ياشهرزاد

[somia]

باركولي يا جماعة .. النونو بتاعي ايديه ورجليه بانوااااااااااااااااااااااااااا

[dr.princess]

توتة ياقلبى
ربنا يخليكم لبعض ويرزقكم اللى تتمنوه ان شاء الله
وزى ماقلتلك قبل كده هو موضوع صعب اوى بس انا ليا صاحبتى نفسك بالظبط بالظبط قبل الفرح باسبوع نزل واتجوزوا وزى ماقلتلك برده حتى انها حملت فى نفس الوقت معاكى بالظبط
ممكن ابقى اعرفك عليها مادام طلعتوا نسخة من بعض كده هههههههههههه اسمها أسماء على فكرة وكانت زميلتى فى المستشفى

[نولارا]

انا فى الخلعون
جوزى جه لما ينااااااااااااام واحمد طبعا يبقى لسه مانامش هكتبهالكم
احكوا انتوا عبال ما ارجع لكم

[توتة السيد]

ربنا يخليكي يارنا من ذوقك تسلمي يارب ويسعدك حبيبتي مع زوجك

[dr.princess]

سمسم مبروووووووووووك
تقريبا علشان بدأتى الاسبوع السابع انا اخدت بالى برده مع ملك من اول الاسبوع السابع

[somia]

سميه عماله تعزم علينا واحده واحده
بس في الاخر هاتحكي يعني هاتحكي بالعافيه ههههههههههه
عشان اعملك مكرونه اسبجتي باللحمه

هحكيلكوا من غير مكرونة بس بحلة محشي كرنب..هههههههههههههه
متقلقوش انا بحب احكي وبالتفصيل الممل فاحكوا انتوا الأول قبل ما تصدعوا مني .. نولار يلا يا ماما دورك شرف...

[توتة السيد]

ياحياتي يابرنسيس تسلمي يارب ويخليلك زوج ويسعدكم دايما

والله ياريت مادام متشبهين في القصة وفي فترة الحمل ههههههه

[توتة السيد]

نولارا خلعت مافيش غير احكي شف بتتهرب ازاي اجيلك ها ههههههههههههه

[somia]

ويبارك فيكي ياسومة ياله دورك وماتحوليش الهرب

احكي ياشهرزاد
ههههههههههههههه كده يا نولار رحتي فين ..
خلاص يا يا لولو احكي .. شفتي بدي شرف الحكي أولا...ههههههههههههههه

[رنا خالد]

مستنيه حكايتك ياسوميه علي احر من الجمر
اوعي تهربي ههههههههه
لحسن هاجيبك

[توتة السيد]

رحتو فين ياحلوات

[توتة السيد]

ودودي لسه بتذاكر اللي فاتها برضه هههههههههه

خليكي معانا شوية احنا اتوحشناكي

[dr.princess]

لالالا سمية كل البنات عايزاكى
وبعدين والله مفيش فيا نفس احكى النهاردة تقريبا بدأت أشطب ههههههههههههههه
ان شاء الله احكيلكم بكره

[رنا خالد]

شكل سميه بتكتب قصتها واحنا بننتظر القصة

[توتة السيد]

احنا مستنين الحكاية بس شكله طويييييييييييييييييلة ههههههههههه

[somia]

معلشي يا جماعة انا رجعتلكوا تاني

[somia]

هههههههههههههههههههه.. كنت مشغولة شوية ..كده يا لولو طيب أمري لله هابتدي أحكي

[توتة السيد]

يالة ياسومة احكي حرام عليكي عنيا بتقفل لوحدها

[ام يحيي 2011]

أزيكو يا بنات أنا ساره من مصر أحب أشارك معكم أنا من البحيرة حامل فى الرابع

ممكن تقبلونى

[رنا خالد]

اهلا بيكي ياساره نورتي المنتدي
ياريت تتواصلي معانا وبجد الدردشه هنا هاتعجبك وتسليكي جدا

[somia]

اولا انا زوجي اخو صديقتي وكان عادي يعني ما فتحت معايا المضوع من قبل بس تكلمي عليه عادي وفيوم اتصلت الساعة 11 بالليل والاقيها بتقولي صحيح بشموهندس فلان كان عايز يجي يقابل باباكي عارفين انا تنحت فضلت ساكته حوالي خمس دقايق اما البت اتخضت انا عمري فحياتي ما على حد متقدملي وكله كنت برفضه قبل اما يجوا البيت ده بفى معرفتش ارد المهم خدت تليفون البيت لانه مكنش معاها وتاني يوم اتصل وقال انه هيجي.. وفي اليوم الموعود..

[توتة السيد]

اهلا ياسارة حبيبتي شرفتي ياغالية ربي يحفظك ويقومك بالف سلامة

[توتة السيد]

هههههههههههههههه يعيني يابنتي ازبهليتي من المكالمة كملي كملي مشتاقة اسمع باقي القصة

[somia]

انا اتفقت مع ماما ولا هطلع عصير ولا ما يحزنون قلتلها العصيرهيدلق والكاسات هتتكسر فوافقت المهم فانا اصلا منتقبه فاخويا الصغير قاعد فبابا عمال يقوله يا فلان خلي فلانة تدخل وهوه طبعا مش فاهم ايه الوضوع ومستغرب يعني ازاي انا هادخل كده بوشي وانا مرعوبة ومكسوفة جدا من زمان محدش شاف وشي ادخل ازاي كده المهم بابا جه ناداني قلتله حاضر انا جاية وراك اهه طبعا خرج وانا ولا هنا عمالة برتعش جوه وبقول لماما هوه انا المفروض اقعد اد ايه قالتلي يعني عشر دقايق ربع ساعة متطوليش قلتلها طب اندهيلي قالتلي مينفعش المهم بابا اخر ما زهق جه وراح شاددني وراه ...

[dr.princess]

اهلا بيكى يا سارة معانا
اخبارك ايه واخبار البيبى ؟؟؟

[رنا خالد]

كملي ياسمسمه احنا معاكي يالقمر

[ام يحيي 2011]

ربنا يخليك يا رنا أنا متابعه المنتدى من زمان وأشتركت مخصوص عشانكم يا حلوين ممكن أتكلم معكم شويه فى حاجه عايزه افضفضها ليكم

[somia]

المهم انا طالعة طبعا عيني في الارض وبترعش قمت قعدت على اول كرسي قصادي وكان الكرسي اللي قصاده وكانت بينا الطربيزة المهم قعدنا انا ساكته وهوه ساكت شوية قعد يتكلم هوه وبابا على الشغل هما الاثنين تخصص واحد وكل اما اجي ابصلة الاقيه هيبصلي نقوم احنا الاثنين مكسفين ومنزلين عنينا في الارض المهم في الاخر قلت كده اكيد الربع ساعة خلصت وقمت دخلت جري فبسأل ماما هيه الربع ساعة خلصت قالتلي هوه انتي كملتي خمس دقايق اصلا..هههههههههه.. وبعدين..

[توتة السيد]

اتفضلي ياسارة احنا اخواتك حبيبتي فضفضي واحنا سمعينك

[ام يحيي 2011]

مرسى ليكم يا توته ويا دكتور برنسيسه

الحمد لله أنا كويسه والبيبى كويس بس لسه ما حستش بحركته عادى وكمان مش باين فالدكتوره قلتلى أحتمال بنوته

[ام يحيي 2011]

من ساعه ما الدكتوره قالتلى أنها أحتمال تكون بنت وزوجى بيهزر معيا كل شويه عارفه لو جبتى بنت هزعل منك هو نفسه فولد مع أنه أول نونو لينا وأنا الكلام ده بيزعلى حتى لو هزار أعمل أيه

[somia]

قعدت جنب باب الغرفة اسمعهم بيقولوا ايه طبعا نقاش في مواضيع الشغل بتاعتهم وبس وفجأة الاقيه بيقول لبابا ينفع الانسة.. تدخل تاني .. انا سمعت كده ولا كإن عقرب لدغني قمت منفوضه ودخلت جري وقفلت عليا الباب المهم فبابا عمال يناديني وانا ولا الهوى المهم فيين على ما طلعت تاني فبابا فضل قاعد ويقوله كلمها على الكتب هيه مدمنة كتب وهوه يقول طب حضرتك افتح الموضوع وكالعادة احنا الاثنين نرفع عنينا فنفس الوقت فنكسف ونزلها تاني وبرضه فضلنا ساكتين فبابا سابنا ووقف عند باب الغرفة ولكن يبقى الحال على ما هو عليه فرجع بيقوله يا ابني انا سيبتلك القودة كلها وبرضه متكلمتوش شويه وبابا دخل البلكونة فسألني على كتابين لانيس منصور فقلتله ان انا قريتهم وبرضه معرفتش اشوفه المهم بابا رجع تاني ورجعوا يتكلموا في الشغل وشاورلي اني ادخل هوه اللي شاورلي مش بابا تخيلوا الموقف

[دودى اشرف]

انا جيييييت ... بس الحقيقة مكلمتش قراءة الردود كلها ... كده مش هخلص ... قلت الحق اتكلم وكمان كلكم ماشاء الله سهرانين انهارده وكمان برنسيس مش مصدقة
توتة حبيبت قلبى ازيك يا قمر انتى والله وحشتينى موت وطبعا حكايتك انا عرفتها قبلهم هههههههههه يوم مكنا هنتشال من المنتدى هههههههههه
رنا حكايتك فعلا نادرة انها تتم بس الحمدلله ان ربنا رزقك بابن حلال ربنا يسعد يارب
سمية حكايتك بتحسسنى ان الدنيا لسه بخير ههههههههههه ... متهيألى مفيش بنات بتتكسف دلوقتى بالشكل ده ابدا هههههههههه ده هما اللى بيخطبوا الولد دلوقتى هههههههه .. ربنا يسعدك يا حبيبتى
سارة اهلا بيكى يا قمر معانا واحنا كلنا اخوات وانتى كملتينا ... فضفضى برااااااااحتك مش هتلاقى سميعة احسن من كده وفااااااااااضية ههههههههههههههههه
نولارا كيفيك وكيفه احمد انشالله يكون بخير

[رنا خالد]

بصي ياساره انا حسيت بالحركه في نهاية الشهر الرابع او في اول الخامس مش قبل كده يعني ماتخافيش مش لازم يتحرك بدري
بس انتي كلي كويس عشان الحركه بتبقي كويسه لما بتتغذي كويس انا ماكنتش بتغذي كويس لحد الشهر الخامس وماكنتش بنتي بتتحرك خالص
دلوقتي انا داخله في الثامن بقالها حوالي شهرين بتتحرك كأنها بتلعب كراتيه لدرجه ان جوزي بيقولي انا حاسس انك حامل في تنين او ديناصور مش بنت ههههههههههههه

[somia]

انتوا هنا ولا انا بحكي لنفسي ؟؟؟.. اهئ اهئ اهئ

[توتة السيد]

لا ياحبيبتي ماتزعليش انا كمان الدكتورة قلتلي مش باين احتمال بنوتة

كله فضل ونعمة من رب العالمين وزوجي بيهزر ماتزعليش استني بس لما تقومي بالسلامة وهتلقيه بيموت فيها البنت دايما حبيبة ابوها ماضيقيش نفسك علشان الننة الجميلة ماتزعلش كمان
ده هزار ولسه ياعمري قدامك العمر وتجيبوا الولد ربي يبارك في اعماركم حبيبتي ويسعدكم

[ام يحيي 2011]

أنتى بتترعشى وأنا جالى سعتها هستريه ضحك ما تعرفيش ليه هبل بعيد عنك المهم وبعدددددددددددددددين

[توتة السيد]

نحن هنا نستمع لكي بانساط

[توتة السيد]

ايوة كده يادودي تعالي شرركينا ابقي ذاكري بعدين ههههههههههههه

[توتة السيد]

احكي ياسومة انا حاسة اني بقرأ الحكاية في الحلم بخطف نومة ورجع تاني ههههههههههههه

الحقيني فبل مافصل شحن

[رنا خالد]

كملي ياسميه دي حكايتك حلوه اوي احنا معاكي

[ام يحيي 2011]

ربنا يخليك يا دودى أحلى حاجه أنك تلاقى حد ترغى معه وخصوصا لى ذى العسل ذيكم

دنياصور يا رنا ربنا يبشرك بالخير يارب يا قمر بس أكيد بتفرحى صح

إن شاء الله يا توته أصله هو خايف منى لحسن أدلعها ذياده عن اللزوم لبس وكده أصلى بموت فى لبس العريان للبنات الصغيره وهو عايزه محترمه تقريبا هيلبسها النقاب أول ما تتولد ربنا يستر بقى

[دودى اشرف]

سارة متقلقيش دايما فى الاول كده مش بيكونوا قادرين يحددوا نوع اجنين وانا واحدة صحبتى كانت حامل فى ولد وفى دكتور قالها بنت وعاشت على كده لحد ما راحت لدكتور تانى بالصدفة عرفت منه انه ولد ... وحتى حبيبتى لو بنت كله فضل وعدل من عند ربنا .. بس ان شاء الله تقومى بالسلامة ... هما الرجالة كده يحبوا يغلسوا ههههههههههههه .. هو اكيد بيهرج حبيبتى ... وبعدين ربنا يرزقكم المرة الجاية بولد ان شاء لله

[توتة السيد]

حبيبة قلبي سومة انا اسفة خالص بس والله بجد مش قادرة اقعد اكتر من كده هكمل قريتها بكرة بأذن الله سمحوني حبيباتي الحلوين استأذنكم وتصبحو علي الف خير وسعاده

[دودى اشرف]

توته لا خلاص .. مش هينفع اراجع ده كله ... هدخل على طول بقى الامتحان وربنا يستر هههههههههههههههههههههه .. كتيييييييير اوى .. وانتوا بقيتوا رغايييييييين موووووووت ههههههههههههههه ... ده انا الاول كنت بتنشق على حد يدخل يقول كلمة كنت اسيب الصفحة باليومين اجى الاقيها زى ما هى .

[توتة السيد]

نداء الي دودي ابقي ادخلي بدري شوية وكلمينا علي طول بلاش المذكرة والاجتهاد ده لسه الامتحانات بافي عليها كتير هههههههههههههه باي تصبحو علي خير

[دودى اشرف]

معلش يا بنات ... مضطة اسيبكم لانى جوزى قام علشان ينام وانا مش بعرف اقعد لوحدى .. مع انى صعبان عليا الصحبة دى بصراحة واول مرة ماشاء الله نبقى متجمعين كده .. اشوفكم على خير ... تصبحوا على خير ... سوما يا قمر كملى وانا هقرا بكرة .. وياريت بقى مترغوش كتير علشان الحق اقرا اللى فاتنى بقى ... سلااااااااااااااااام يا عسللللللللللل

[توتة السيد]

ههههههههههههههههههههههههههه

اه والله وانا كمان كنت ادخل انش في الاول بس ماشاء الله

دلوقتي فتحنا علي البحري هههههههههههههه باي بقي لحسن ملحقش اوصل السرير ونام علي الارض هههههههههههههه

[ام يحيي 2011]

... هما الرجالة كده يحبوا يغلسوا ههههههههههههه .. هو اكيد بيهرج


أنتى هتقوللى خاصه أحمد بيموت فالهزار بhwaml4س للأسف أنا زعلوووووله حبتين مش بعرف أفرق أن كان هزار ولا جد


ما تخليك معنا شويه يا توته اصلى أنا سهرتى صبحى بنام طول النهار وبصحى طووووول الليل

[somia]

المهم فدخلت جوه وسيبته هوه وبابا يتناقشوا وبعدين مشي وبابا قالي هوه قال هيتصر ان كان فيه نصيب طبعا عدى اول يوم وانا هموت لا اكل ولا شرب وعياط ازاي ميتصلش يبقى انا شكلي فيه حاجة وهتك يا عياط وبابا هديني ويقولي يا بنتي ده كان عايز يطمن على رايك قبل انا يمشي وانا ولا الهوا وثاني يوم نفس النظام ثالث يوم انا قلت لبابا انا هروح لصحبتي لاني كنت فعلا ابتديت اتجنن وانا هناك لقيت بابا بيكلمني فرجعت البيت وعرفت انه اتصل وجاي ثاني يوم مع اهله مش قادرة اقولكم الروح اتردت فيا ازاي انا فعلا كنت بموت المهم وفعلا جه هوه واهله وطبعا وانا داخله قال ايه لابسة جزمة كعب وقعتلي حتة وقعة محترمة بس فشوية دخلت اجيب الشاي سيبتهم بيتكلموا عادي رجعت لقيتهم بيقولوا نقرى الفاتحة بقى تاني مع العروسة.. تخيلوا تاني دي انا سمعت الكلمة وازبهليت تاني انتوا قريتوها اولاني امتى اصلا وبس ...
اتخطبنا سنتين وبعدين اتجوزنا وبقالنا سنة وشهرين.. بس لغاية دلوقتي مش قادرة انسالة اليومين الانتظار دول مع انه قالي انه مكنش مستوعب الموقف لانه اول مرة يروح يخطب فعلى ما جمع نفسة الا اني مستحيل انساهم لاني كنت بموت فيهم بدل المرة مليون مرة.. وتوتة توتة خلصت الحدوتة حلوة ولا بنتوتة .. قولوا رايكم بصراحة؟؟؟

[ام يحيي 2011]

أنتو كلكم هتسبونا ولا أيه أهئ أهئ ده ماصدقت أدخل وأكلمكم جوزى بيمشى من 6 صباحا لحد عشره بلبل غالبا ولو جيه بدرى يبقو 6 او سابعه يعنى بكلم نفسى والنونو بس علطول

أنا هخصمكم بقى

[somia]

ايه ده يعني الكل خرج وانا كل ده بحكي لنفسي طيب ... انا مخصماكوا كلكوا.. اهئ اهئ اهئ وهادخل انام لاني نعسانة موووووووووووووووووت وكنت قاعدة عشانكوا

[ام يحيي 2011]

يا بنتى ده تقل رجاله أسألنى أنا شويه غلاسه بس

طبعا حلوه وصغنونه وجميله

عرفنى بقى على نفسك يا جميل

[ام يحيي 2011]

ايه ده يعني الكل خرج وانا كل ده بحكي لنفسي طيب ... انا مخصماكوا كلكوا.. اهئ اهئ اهئ وهادخل انام لاني نعسانة موووووووووووووووووت وكنت قاعدة عشانكوا


كده كده وأنا مش مليه عينك ماااااااااااشى ربنا يسمحك مش هدخل تانى معكم هه

يا وحشييييييييييييينhwaml4hwaml4hwaml4

[رنا خالد]

حكايه جميله ياسوميه بجد وشيقه
ربنا يخليكم لبعض ياجميل وانسيله بقي اليومين دول الراجل باين عليه غلبان ده المسامح كريم هاسيبكم انا دلوقتي عشان جوزي صحي من النوم معلش نكمل كلامنا بكره وتصبحوا علي الف خير ياسميه انتي وساره

[ام يحيي 2011]

حكايه جميله ياسوميه بجد وشيقه
ربنا يخليكم لبعض ياجميل وانسيله بقي اليومين دول الراجل باين عليه غلبان ده المسامح كريم هاسيبكم انا دلوقتي عشان جوزي صحي من النوم معلش نكمل كلامنا بكره وتصبحوا علي الف خير ياسميه انتي وساره


تصبحى على خيريhwaml96ا رنا شكلى دخلت متأخر يلا اقوم أنا كمان بدل ما أكلم نفسى بره وجوه النت كمان

ما تتأخروش بس بكره يا حلوييييييين

[somia]

سارة معلشي ننام دلوقتي وبكرة عالساعة 12 الظهر باذن الله هتلاقي الكل موجود تاني

[ام يحيي 2011]

سارة معلشي ننام دلوقتي وبكرة عالساعة 12 الظهر باذن الله هتلاقي الكل موجود تاني


بأذن الله تصبحوا على ألف خير لو كنت صاحيه أدخلكم ولو مش كده يبقى بليل باذن الله

ودعواتكم كتتتتتتتتتتتتتتير

[ام يحيي 2011]

طب سؤال يا بنات لما تشفوه الصبح ردوا عليا بتعب لو قعدت كتير ورجلى بتورم حتى ساعات الشوز بيدخل بالعافيه عادى ولا الأملاح زياده ولا أيه

وبطنى لسه ماكبرتش أوى عادى برده ولا ايه أنا فأول الرابع

[نولارا]

n لا استنوا انا جيت
هقعد مع مين لحد ما احمد يناااااااااااااااام

[نولارا]

ساره نورتى المنتدى ياقمر
بالنسبه للورم مش عارفه فاسالى دكتورتك اللى انتى متابعه معاها
بالنسبه للبطن لسه بدرى
وحركه الجنين انا محستش بيها غير فىالخامس

[dr.princess]

نولارا
انا هنا بس كنت مهنجة شوية حتى ماردتش على البنات

[نولارا]

سميه
حلوه القصه
ضحكنا عليكى وخليناكى تحكى الاول ههههههههه
برنسيس
هى دى السهره الصباحى انت نمتى على الاب توب ولا ايه؟؟؟؟؟؟؟؟؟؟
طيب اشوفكم بكره ان شاء الله

[dr.princess]

انا هنا نولارا
جوزى مش هيجى قبل ساعتين فصاحية غصب عنى
أحمد لسه مانمش ولا ايه ؟؟

[dr.princess]

همووووت من التعب وفطسانة ومش هلحق انام واصحى قبل مايجى
لو دخلت نمت مش هصحى ولو بالطبل البلدى

[ام يحيي 2011]

يا بنتى ده تقل رجاله أسألنى أنا شويه غلاسه بس

طبعا حلوه وصغنونه وجميله

عرفنى بقى على نفسك يا جميل

همووووت من التعب وفطسانة ومش هلحق انام واصحى قبل مايجى
لو دخلت نمت مش هصحى ولو بالطبل البلدى


طب أدخلى نامى وأنا أصحيك

ماشى يا ستى ناس ناس تردى عليهم

المهم ربنا يقويك ورجعلك زوجك بالسلامه وعلطول

[ام يحيي 2011]

ساره نورتى المنتدى ياقمر
بالنسبه للورم مش عارفه فاسالى دكتورتك اللى انتى متابعه معاها
بالنسبه للبطن لسه بدرى
وحركه الجنين انا محستش بيها غير فىالخامس


تسلمى يا غاليه أصلهم كل شويه يقولولى بطنك لسه ما كبرتش خليها تكبر بقى ونحس أن فى نونو قلقونى والله وبرده الحركه كده أختى كل شويه تقولى روحى أطمن على الجنين ورحت والحمد لله الدكتوره قالت أنه بخير الحمد لله

[dr.princess]

لا والله يا سارة ابدا
بس مش قادرة حتى ارفع ايدى واكتب وشكلى غريب مرمية على الارض وجنبى اللاب توب وفاتحة التليفزيون اى هيصة وخلاص والاوضة مقلوبة مش قادرة اوضبها وحالتى يرثى لها

[dr.princess]

فكرتينى بماما تقريبا كل يوم بتسألنى اذا كانت بطنى كبرت شوية ولا لسه مع انها عارفة انه لسه شوية بس اهى بتحب تطمن وخلاص وانتى متحطيش فى بالك وبلاش القلق خالص

[ام يحيي 2011]

لا يا جميل ولا يهمك بهزر معك بس حاولى تقومى قبل ما زوجك يجى وألبسى حاجه حلوه ولو هيشوفك دقيقتن بس مش يجى من بره يلقيك كده حتى لو ما قدرتش تنضفى الأوضه المهم حاولى تبقى مصحصه شويه وتقليله وحشتنى من سعتها وأنا مستنياك ودلع المصريات بقى
وربنا يديك الصحه يااااااارب يا عسل

[ام يحيي 2011]

فكرتينى بماما تقريبا كل يوم بتسألنى اذا كانت بطنى كبرت شوية ولا لسه مع انها عارفة انه لسه شوية بس اهى بتحب تطمن وخلاص وانتى متحطيش فى بالك وبلاش القلق خالص


الحمد لله بس ساعات الواحد بيزعل أوى من الكلام ماما تقولى كلى كويس حرام عليك عايزه إلى فبطنك يموت أنا أسمع الكلمه دى و100 عفريت يركبنى أقولها حرااااااام عليكى يا ماما بعد الشر صحيح خايفين علينا بس أنتى عارفه الواحد ما يستحملش حاجه على أبنه أو بنته

أنتى فالشهر الكام يا جميل

[dr.princess]

الدلع ده كان زماااااااااااان
من اول الحمل معدتى مقلوبة ومغص وغممان نفس ودوخة وهبوط واخر بهدلة معدش ليا نفس فى اى حاجة حتى شغل البيت بالعافية ان مكومتوش على بعضه وحالتى حالة
عارفة انى مقصرة بس اعمل ايه بس غصب عنى
يللا الحمدلله على كل حال
ربنا يهون بيقولوا الاعراض دى اول 3 شهور وبعد كده بتخف ياااااااااااريت
ان شاء الله بعد 10 ايام بدخل الشهر الرابع

[dr.princess]

ماما وجوزى برده مبهدلنى فى موضوع الاكل ده وكمان اللبن
بس اعمل ايه معدتى مش قابلة الاكل خالص وكمان اللبن يعنى من كل الجهات بايظة ولما عملتها مرة قبل كده وكلت غصب عنى رجعت اللى كلته فحرمت خلاص لما اقدر اكل باكل ولو مقدرتش مضغطش على نفسى ابدا
برده بيقولوا بعد الثالث بيظبط الاكل شوية والمرة الجاية ان شاء الله اطلب من الدكتورة تكتبلى على كالسيوم وتبقى المشكلة اتحلت شوية

[ام يحيي 2011]

معلش يا قمر هما بيعذروا بس حاولى أنا كنت ذيك كده بس كنت بحاول قبل ما يجى بس بعشر دقايق البس حاجه تانيه وأسرح بس على الأقل عشان المنظر العام بس عشان الراجل ما يتخضش بس ما تخفيش يا قمر بعد التالت هتتحسنى بأذن الله وهتجوعى وتأكلى كمان برحتك(بس أوعى تأكلنا) وهتفرفشى بأذن الله أنا بدأت الرابع من 10 أيام تقريبا وبقت أحسن كتير الحمد لله


يارب عقبال الولاده تكون أسهل ياااااااااااااااااااااااااااارب

[ام يحيي 2011]

هو أنتى ما كنتش يتخدى حاجه للترجيع ع العموم هانت وتبقى أحسن بأذن الله أنا دلوقت بأخد حديد وكالسيوم وأعشاب حبوب للآنتفاخ هو بس الحديد إلى بيتعبنى حبتين عشان طعمه ووووووحش بس حاول أخلى الدكتوره تغيرهولى أنتى منين من مصر بالضبط

معلش أختك رغايه منين ما عايزه تقفلى قوللى يا عسل ولا يهمك

[dr.princess]

هههههههههههههه لالا مش لدرجة انه يتخض يعنى بس اول مابيدخل بيلاقينى هبطانة وهموت على نفسى كده ومش قادرة اخد نفسى بصراحة بصراحة شكلى اصلا مش عاجبنى وشى متغير من اول الحمل وباين عليه الاجهاد
ولو على قد الهدوم اكيد مش هقابله بهدوم مش نضيفة او وشعرى منكوش بس طبعا مش زى اول شوية فى الجواز
انا مستنية الرابع ده بفارغ الصبر اما اشوف هيفرق معايا ولا هيبقى الحال كما هو عليه
ياااااااااااااااارب يهون علينا الولادة والحمل

[dr.princess]

والله باخد حبوب للترجيع انا بتهيألى انها مانعة الترجيع عندى الحمدلله بس فى غممان نفس رهيييييييييب وقلبان فى المعدة ولما اول امبارح مأخدتهاش فامبارح رجعت فقلت مش هسيبها الا لما اتاكد ان خلاص بقى كله تمام
انا عارفة الحديد طعمه زى الزفت بس فى حبوب اسمها فروز مقبولة شوية هى بالشيكولاته وبتتمضغ والاهم مش بتعمل امساك
والانتفاخ ده حكايته حكاية مبهدلنى من اول الحمل وكنت برده هسئل الدكتورة تكتبلى حاجة ليه

لالا لا رغاية ولا حاجة بالعكس انا بدأت افوق الحمدلله لسه نص ساعة كده وهقفل ان شاء الله

[ام يحيي 2011]

ههههههههههه

هما بيكونوا فرحنين على فكره حتى لو مقصره معه شويه عشان بيحس أن ده أبنه أنا أول ما تعبت فى أول الحمل وكنت برجع كان بيقولى أنت حامل ولا أيه يا بنت وكان فرحان عادى يعنى بس لو الترجيع تعبك أوى كلى برحتك وخدى حاجه للترجيع

ما تخفيش يا قمر هتبقى أحسن فالرابع بأذن الله وهتجوعى ذى كده وأحس أنى أتفجعت على كبر بس برده ما عدتش بحب الحاجه إلى كنت بحبها قبل الزواج يعنى كنت بمووووت فى السمك قبل الحمل دلوقت ما فتكرش أكلت سمك من أمتى وما بقتش أحبه شكل النونو بيأكلنا على مزاجه بقى

ربنا يخليهم لينا ياااااااااااااااارب ويجعلهم خير منا وخير مسلمين الأرض يااااااااااره

[ام يحيي 2011]

والله أتصلت بها وقلتلها غيرهالى قالتلى بلاش دلع وخديها أصل الدكتوره دى جامده شويه بس عسوله فبخدها وأمرى لله ربنا يهديهالى وتغيرهالى

بصى حبوب الأنتفاخ أسمها فيردو هيا أعشاب أصلا اسألى دكتورتك عليها وشوفى هتقولك ايه

ربنا يسهلك الحال ياااااااااااااااااارب وتبقى أحسن بأذن الله

[dr.princess]

لالالا الحمدلله حملى مش جاى بترجيع والحمدلله مرتين بس اللى رجعت فيهم وربنا مايعده تانى
وفى موضوع الاكل ده كل يوم بحال اللى احبه النهارده محبوش بكرة والعكس حاجات غريبة بتحصل
وعلى رأيك لازم يبقوا مبسوطين مش ولادهم دول ولا ايه هههههههههههههه
انا لو جوزى عمل اى حاجة الايام دى وزعلنى او لو حسيته مش مهتم اقوله اه ما انت عملت عملتك وبتخلع دلوقتى خلاص بعد ماخدت غرضك هههههههههههههههه

[ام يحيي 2011]

وعلى رأيك لازم يبقوا مبسوطين مش ولادهم دول ولا ايه هههههههههههههه
انا لو جوزى عمل اى حاجة الايام دى وزعلنى او لو حسيته مش مهتم اقوله اه ما انت عملت عملتك وبتخلع دلوقتى خلاص بعد ماخدت غرضك هههههههههههههههه



هههههههههههههه والله أنتى عسل

أيوه يا بنتى لازم ندلع عليهم ذى ما بيدلعوا علينا هما يقدروا يزعلونا ولا أيه لو عمل حاجه أقوله هقول للنونو أن بابا وحش وبيزعل ماما عشان بيزعل هو كمان بس الحمد لله أجوزنا طيبيييين ربنا يبركلنا فيهم يارب ويبعد عننا الشيطان


اللهم آآآآآآآآآآآآآآآآآآآآمين

[ام يحيي 2011]

أنتى نفسك فى ولد ولا بنت وده أول نونو ليكى؟

[dr.princess]

اه والله فعلا طيبين بس احنا اللى هبل وبتلككلهم هههههههههههه
بالنسبة لحبوب الحديد اللى قلتلك عليها كانت الدكتورة كاتباها لاختى وهى حامل يعنى قصدى تنفع للحوامل وممكن تاخديها بدل ما تاخدى حبوب طعمها او ريحتها وحشة وتاخديها غصب عنك وممكن كمان تكون بتعمل امساك اه صحيح اسمها ايه الحبوب اللى بتاخديها

[dr.princess]

اه اول نونو الحمدلله
والله مش فارقة معايا خالص ولد او بنت كله واحد المهم يبقى سليم ومعافى وبصحة ان شاء الله

[ام يحيي 2011]

أسمها فيروترون هما بيقولوا حلوه بس أنا شايفه طعمها بشعععععععع

أيوه ما هما الستات كلهم كده بس الحمد لله بتعدى وربنا بيستر بس تعرفى الواحد بيحيهم بعد الزواج كتتتتتتير أكتر من قبله وبيبان أكتر أخلقهم الحلوه الحمد لله

يارب يارب يارب أنا وأنتى يا جميل يارب يكونوا بأحسن حال هيا الدكتوره قلتلى أحتمال بنت لأنها قفله على نفسها بس نفسى أتأكد عشان وأنا بكلمها وبدعلها الواحد يكون متأكد هههههههههههه المهم يارب يجوا بألف سلامه سواء حنين أويحيى أيه رأيك فالأسماء وأنتى ناويه تسمى أيه بأذن الله

[dr.princess]

حنين و يحيى حلوين اوى بالذات يحيى بصراحة بموت فى الاسم ده اختى كانت ناوية تسميه
لو ولد ان شاء الله غالبا محمد او يس ولو بنت لسه مش مستقريين
كلها شوية وهنعرف انا وانتى ويرتاح بالنا

معلشى حبيبتى لازم اقفل دلوقتى
واشوفك بكرة باذن الله تعالى

[ام يحيي 2011]

تصبحى على ألف خير يا قمر اشوفك بكره بأذن الرحمن

وجزاكى الله خيرا على الدردشه الجميله دى بجد فرحتى أوى ربنا يفرح قلبك ياااااااااااااااااااارب

[ام يحيي 2011]

خروووووووووخ
للتصويت على كليب طيور الجنه

هههههه أقصح خرووج للصلاه ثم للنوم

أراكم اليوم بليل بأذن الله

أحبكم فى الله

[MALAK2010]

طبعا مفيش حد هنا
كلكم كنتوا بترغوااااااااااااااااااااااااااا امبارح لغاية الفجر
ماينفعش كدة انا لوحدى الصبح وانتم كلكم مع بعض باللليل اهئ اهئ اهئ
انا قريت اللى كتبتوة امبارح كانت القاعدة حلوة اووووووووووووى
مش عارفة ارد على اية ولا اية

[MALAK2010]

انا اتعرفت علي جوزي عن طريق النت بشكل غريب جدا
انا كنت بدخل علي شات بس شات محترم وكل الناس اللي فيه كويسين وبدأ بينا الكلام وبعدين اخد الميل بتاعي وبدأنا نتكلم
ونتعرف علي بعض اكتر وهو بصراحه شدني ليه جدا لأنه بني ادم متدين اوي ومحترم وكان كلامنا كله عن البرامج الدينيه
والصلاه زكان دايما بينصحني وغير فيا حاجات كتير
انتي معايا ياسميه اكمل ولا ايه؟


ازيك يا جميل
ربنا يحمهولك ويخليكوا لبعض
بس زى ماالبنات قاللك احمدى ربنا انة طلع انسان كويس ومتدين لانى مش مقتنعة ان ممكن حد يتجوز حد عن طريق النت او يكون جد فى كلامة
انا اسمع ان النت دة مابيكونش فية صراحة ممكن تكون بنت وتعمل ولد ممكن يقول حاجة وهو مش كدة يعنى بيبقى تمثيل فى تمثيل
بس الحمد لله ربنا رزقك باللى تتمنية
وربنا يكمل فضلة عليكى وتولدى بالسلامة

[د×و]

السلام عليكم ورحمه الله وبركاته

ازييييكم صباح الفل مين هنا؟؟؟؟

[MALAK2010]

ربنا يخليكي يارنا ويخليلك جوزك

لا حبيبتي لا بايخة ولا حاجة

رغم اني الفترة كانت قصيرة بس والله من فضل الله

حسيت اني اعرفه من سنين الحمد لله رب العالمين

عندك حق ياجميل لو فى نصيب وتوافق بتحسى انك عرفاة من سنين وبتحبية اسرع ما كنتى متخيلة
اما لو مفيش توافق لو عطولك 100 سنة برضة مش هتحبية دة اسمة النصيب سبحان الله

[د×و]

باركولى شايفين النونو دخل فى الرابع ماشاء الله عليه قمووور ههههههههههه

عقبالكم

[MALAK2010]

انا بس اللى هنا كلهم نايمين من سهرة امبارح

[MALAK2010]

ماشاء الله تبارك الله احسن الخالقين
ربنا يتم عليكى وتقومى بالسلامة
وبعد كام شهر تشوفية بين ايديكى بخير ياااااااااااارب

[د×و]

ازيك يا ملوكه عامله ايه يا جميل

الله هو كان ف سهره امبارح

[MALAK2010]

باركولي يا جماعة .. النونو بتاعي ايديه ورجليه بانوااااااااااااااااااااااااااا

مبرووووووووووووووووووووووووووووك
مبرووووووووووووووووووووووووووووك
مبرووووووووووووووووووووووووووووك
مبرووووووووووووووووووووووووووووك

انا حاسة بيكى انا كنت فرحانة اوووووووووووووووى

ربنا يتم عليكى ويقومك بالسلامة وتطمنينا النهاردة ان شاء الله

[د×و]

ماشاء الله تبارك الله احسن الخالقين
ربنا يتم عليكى وتقومى بالسلامة
وبعد كام شهر تشوفية بين ايديكى بخير ياااااااااااارب

امييين يارب
تسلمى حبيبتى

وعقبال ما تشوفى النونو بين ايديكى وتقر عينك بيه
وكل البنات يااااااارب

[MALAK2010]

ازيك يا ملوكه عامله ايه يا جميل

الله هو كان ف سهره امبارح

ايوا ياستى سهرة لغاية الساعة خمسة الفجر وكانت اعترافات ليلية هههههههههههههههههه
كل واحدة قعدت تحكى تفاصيل اول لاء بينها وبين جوزها وكانت القاعدة حلوة بس للاسف انا ماكنتش معاهم اهئ اهئ اهئ

[د×و]

الله الله اموت فى الاعترافات الليليه دى
خساره راحت عليا انا وانتى يعنى :(

ملحوقه ان شاء الله هههههههههههه
ممكن انا وانتى نعمل اعترافات صباحيه ههههههههه

[د×و]

بس صعبه اوى 5 الفجر دى ده انا كنت بشخر ساعتها ههههههههههههههه

اكيد البنات دلوقتى فى سااااابع نومه

[MALAK2010]

انا اتفقت مع ماما ولا هطلع عصير ولا ما يحزنون قلتلها العصيرهيدلق والكاسات هتتكسر...


انا كمان ولا دخلت عصير ولا غيرة انا قادرة اشيل نفسى لما اشيل عصير ههههههههههههه

[MALAK2010]

اكيد مش هيدخلوا قبل العصر ههههههههههه

انا كمان كنت فى سابع نومه

[د×و]

الحقينى لوجى صحيت يعنى مش هنااااااااااااام دلوقتى خااالص

شوفتى الهنا اللى انا فيه

ده انا قولت اتسحب اعد شويه معاكم وادخل انام قامت هى عاوزة قناه براعم

اهئ اهئ اهئ تعاليلى يامه

[MALAK2010]

المهم انا طالعة طبعا عيني في الارض وبترعش قمت قعدت على اول كرسي قصادي وكان الكرسي اللي قصاده..

هههههههههههههههه سبحان الله فى الكرسى اللى قصادة ايه الاحراج دة بس الرؤيا هتبقى احلى
انا قعدت بينى وبينة كرسى فاضى يعنى فى الجنب فمكنش عارف يشوفنى ههههههههههههههه وانا كنت حاطة وشى فى الارض ومش راضية ابصلة
بس جوزى عرفنى من وانا صغيرة بس كان عاوز يبصلى
وانا كمان كنت عاملة الطرحة بطريقة مسيباها من الجنبين فلو قاعد جنبى مش هيشوف من الطرحة فوطى راسة شوية نحيتى وقالى مبروك (كان جرئ اوى يومها وكان فرحاااااااااااااااااااااااااااااااااان ماشاء الله )

[MALAK2010]

الحقينى لوجى صحيت يعنى مش هنااااااااااااام دلوقتى خااالص

شوفتى الهنا اللى انا فيه

ده انا قولت اتسحب اعد شويه معاكم وادخل انام قامت هى عاوزة قناه براعم

اهئ اهئ اهئ تعاليلى يامه

هههههههههههههههههه
ربنا يخليهالك يارب يعنى كمان انتى هتخرجى واقعد لوحدى اهئ اهئ

[د×و]

الله شايفاكى بتقرى الاعترافات دى عاوزالها قعده واقعد افصص فيها وحده وحده هههههههههههه

حرام عليكى انتى مستقصداه تلاقيه مش قادر ينسالك اليوم بتاع الطرحه ده هههههههههههه

[د×و]

لا مش هنام دلوقتى مدام صحيت غصب عنى هقعد

[MALAK2010]

الله شايفاكى بتقرى الاعترافات دى عاوزالها قعده واقعد افصص فيها وحده وحده هههههههههههه

حرام عليكى انتى مستقصداه تلاقيه مش قادر ينسالك اليوم بتاع الطرحه ده هههههههههههه

ههههههههههههه
وامتى هتعترفى زيهم؟؟؟؟؟؟
ولا لما لوجى تنام

اه دايما يقولى كنتى عاملة خيمة فى الطرحة ومخبية وشك هههههههههه

[د×و]

انا حكايتى بسيطه خاااالص ومش حاسه فيها تفاصيل كتير


بصي يا ستى صلى عالنبى
انا كنت مخطوبه قبل زوجى وبعدها اضربت واتعقدت من الجواز ونفس الكلام حصل مع جوزى قبلى ههههههههههه كنا متعقدين

المهم زوجى كان زميل زوجه عمى فى الشغل وهى بتحبنا اوى فكل شويه تروح تقوله عندى عروسه ليك يقولها لا مش عاوز اتجوز طبعا كل ده واحنا منعرفش حاجه

المهم جت فى يوم وقالت لماما وادتها صورته طبعا انا كنت رافضه تماما الطريقه دى فى التقديم (زى ستى وستك يعنى هههههه)
ماما اول ماشافته قالتلى هو ده عريسك والله وشوفى حلو ازاى وقمر ازاى وانا مرضيتش ابدا اشوف الصوره
المهم فات كام يوم كده ومرات عمه قالت لماما ان العريس جاى يتقدم وماما وبابا مصرين يقابلوه
وانا كنت رافضه جدااااا بس فى الاخر قولتلهم هعمل اللى انتو عاوزينه وهخرج اقابله بس استحاااااااااااااله انسو انى اتجوز بالطريقه دى

بس يا ستى وجه اليوم الموعود ورحت لابسه اى كلام ويادوب غسل وشي بالصابونه ههههههههه
وهو قاعد معاهم فى الصالون يجى ساعه وزياده وانا مش قادره اطلع كل ما ماما تيجى تاخدنى مرضاش كنت ميته فى جلدى من الكسوف
المهم لما زهقو بابا راح جه ساحبنى من ايدى هههههههههههه والله حتى جوزى مش قادر ينساها يقولى باباكى داخل بيكى انجاجيه هههههههههه
بس سبحااااااااان الله اللى حصل مكنتش اتوقعه اول ما شوفته زى ما يكون فى سكون كده دخل قلبى وهو بيقولى نفس الكلام دلوقتى
قعدت فى الكرسي اللى قدامه وبصيت له مره كده من تحت لتحت والباقى محركتش وشي من القرش اللى عالارض هههههههههههه
طبعا قمت جرى ماكملتش 10 دقايق
بس كده ومن بعدها بقا تليفونات وخطوبه وغراميات ههههههههه

[MALAK2010]

حلوة والله حكايتك تثبت برضة القسمة والنصيب وان الواحد مايعرفش نصيبة مع مين ولا يعرف الخير فين ربنا يهنيكم ويسعدكم

بس حكايتك فيها شبة صغير منى
انا برضة كنت مخطوبة قبلة وتعبت اوووووووووى من الخطوبة دى وهو كمان كان خاطب قبلى وتعب اوى منها بس هو ماتعقدش ولا انا اتعقدت بس بصراحة حاسة ان التجربة الاولى لما تكون فاشلة بتكبر الواحدة قبل اوانها ومايبقاش الاحاسيس الاولى والمشاعر الاولى موجودة بيحل محلها الخوووووووووووف من الفشل مرة تانية واحنا عندنا لو لا قدر الله حصل فسخ خطوبة مرتين بيكون قلق

[د×و]

انتى سبتينى احكى ونمتى هى دى حدودته قبل النوم ههههههههههههههههه

انتى حكيتى حكايتك ولا لسه ؟؟

[د×و]

حلوة والله حكايتك تثبت برضة القسمة والنصيب وان الواحد مايعرفش نصيبة مع مين ولا يعرف الخير فين ربنا يهنيكم ويسعدكم

بس حكايتك فيها شبة صغير منى
انا برضة كنت مخطوبة قبلة وتعبت اوووووووووى من الخطوبة دى وهو كمان كان خاطب قبلى وتعب اوى منها بس هو ماتعقدش ولا انا اتعقدت بس بصراحة حاسة ان التجربة الاولى لما تكون فاشلة بتكبر الواحدة قبل اوانها ومايبقاش الاحاسيس الاولى والمشاعر الاولى موجودة بيحل محلها الخوووووووووووف من الفشل مرة تانية واحنا عندنا لو لا قدر الله حصل فسخ خطوبة مرتين بيكون قلق

سبحان الله فعلا الموضوع لما يكون متيسر بتحسي انه خير وطبعا بتحسي ان استخارتك مقبوله من ربنا وان اللى انتى فيه خير

لكن الخطوبه الاولانيه دى كانت كلها مشاكل وكل اهلى محدش كان موافق عليه لكن انتى عارفه بئا اول حب ده زى مايكون السكينه سرقانى ومش شايفه عيوب اللى قدامى ولا قادره احكم بعقلى على حاجه ماشه ورا قلبى كده وخلاص زى الهبله
بس سبحان الله فقت فى الوقت المناسب من هبلى ده واخدت فتره راحه قدرت اقيم فيها علاقتنا وحسيت اننا فعلا مش متناسبين خالص

لكن الحمد لله خطوبتى لزوجى كان كلها رضا من بابا وماما وانا نفسيتى كانت مرتاحه
وطبعا كنت حاسه بتوافق وحبينا بعض بسرعه اوى :))

[د×و]

من ساعه ما الدكتوره قالتلى أنها أحتمال تكون بنت وزوجى بيهزر معيا كل شويه عارفه لو جبتى بنت هزعل منك هو نفسه فولد مع أنه أول نونو لينا وأنا الكلام ده بيزعلى حتى لو هزار أعمل أيه

يا حبيبتى هو بيهزر اكيد معاكى وعمره ما هيزعل منك
ده اول ما هيشوب بنته وهيطير من الفرحه وهتبقى حبيبه باباها
اسالينى انا ده زوجى ده انا بنتى ضرتى جوزى مش بيقدر يستغنى عنها
ربنا يقومك بالسلامه يارب ويرزقك الزريه الصالحه

[MALAK2010]

بصى يا ستى اصل حكايتى زى حكايات زمان ايام الابيض واسود هههههههههههههه

انا وجوزى كنا مع بعض فى سنة 5 ابتدائى(كنت فى فصل تانى الاربع سنين الاولنين وبعدين لسبب ما سبحان الله اتنقلت معاة فى نفس فصل وكنت قاعدة فى الدرج اللى قدامة ههههههههههههه)

وانا كنت هادية اوى وان صغنونة وكنت اعرفة بس لانة ابن اخت صاحبة ماما النتيم وكبرنا وماشفتوش طبعا فى الاعدادى ولا الثانوى لان المدارس منفصلة ودخلنا الكلية هو دخل نفس كليتى بس قسم تانى وبصراحة اخبارة كانت بتجينى (جاب كام فى الاعدادية جاب كام فى الثانوى )وبصراحة اكتر ماكنتش بستتظرفة كان صميم ماشاء الله وكل اخبارة عن المجاميع ومجموعى كلام من دة وطبعا كان بيجيب اكتر منى ممكن نفسيتى اسودت منة علشان كدة هههههههه

المهم اتخرجنا ممكن من الابتدائى لغاي ماتخطبنا شفتة مرة او مرتين فلما جة علشان يخطبنى ماكنتش فاكرة شكلة

المهم بعد التخرج هو راح الجيش وانا بعد اقل من سنة من التخرج اتخطبت (هو طبعا عرف من خالتة)(هو ماكنش راضى يتقدم الا لما يشتغل ولحظة هو لوحيد من فعتة اللى دخل الجيش)
قعدت فترة مخطوبة حوالى سنة ونصف وهى الخطوبة كلها ماتستحملش شهرين بس علشان ان كنت بتكسف اتخانق او ازعل كنت غريبة اوى كنت بتعامل مع خطيبى انة نصيبى بتاع العمر مش انا مخطوبة يعنى لو تعبنى ممكن افسخ لا ماكنتش بفكر كدة رضيت بنصيبى وخلاص بس حصلت مشاكل كتير وماكنتش بقول لاهلى بس حصلت اخر مشكلة وسبحان الله اهلى عرفوا مش منى منة هو الحمد لله فالموضوع كبر واخيرا فكيت

ماعرفش جوزى انى فكيت الا لما صاحب عمرة اتقدم علشان يخطبنى ههههههههههههههه وبيسالة اية رايك في فلانة
المشكلة ان جوزى من كتر ما كان بيشكر فى اخلاقى مع صاحبة لفت نظر صاحبة ليا ههههههههههههه

نسيت اقولكم ان فى اخر ايام خطوبتى الاولى جوزى خطب واحدة مايعرفهاش نتيجى ترشيح الاهل وبالفعل خطبها بس مارتحش معاها وفك الخطوبة اوام اوام

المهم صاحبة اتقدم لى والحمد لله محصلش نصيب
وانا فكيت وهو فك خلاص ماعدش مشاكل

جوزى قعد يبعت لصاحبة عرايس علشان عاوزة يخطب بس مايحصلش نصيب فجوزى قال انا هشترى خاطرة وهتعس نفسى

اتارى جوزى من واحنا فى ابتدائى بيحبنى يا عسل من وهو صغنون
وكان بيوقف فى الكلية فى مكان فى الدور الرابع ية مدرجى وا نافى الارضى يبص عليا كل يوم
وماكنش بيرضى يكلمنى لانى اولا مابكلمش اولاد اصلا وهو ماعملش برضة علاقات مع حد ولا عاوز يحطنى فى موقف مش حلو
وكان بيتابع اخبارى علطول وكان كل ما يقعد مع اخواتة يتكلم عنى


دة الجزء الماساوى من حكايتى كفاية كدة واذا حبين تعرفوا باقى حكايتى بس والله احلى بكتير من الجزء دة قولولى وانا اكمل

[د×و]

طب سؤال يا بنات لما تشفوه الصبح ردوا عليا بتعب لو قعدت كتير ورجلى بتورم حتى ساعات الشوز بيدخل بالعافيه عادى ولا الأملاح زياده ولا أيه

وبطنى لسه ماكبرتش أوى عادى برده ولا ايه أنا فأول الرابع


ازيك اختى ام حنين

انتى حللتى تحاليل الحمل الكامله هى دى اللى بتبين ا>ا كان فيه املاح او زلال
اكيد لسه بدرى عالورم انتى فى اول الرابع حاولى تروحى للدكتور عشان تعرفى السبب
وبسيطه با>ن الله
وحاولى وانتى قاعده تكونى رافعه رجلك على حاجه عاليه شويه

الف سلامه يا قمر

[MALAK2010]

انا هخرج الوقتى وهرجع تانى سلااااااااااااااام
وعوزة اعرف رايكم على المأساة دى واكمل ولا زهقتوا منى اصلى رغاااااااااااااااااااية

[د×و]

حكايتك حلوة اوى يا ملك ماشاء الله انتو وجوزك صبووووووووور اووى اووى
بس فعلا اللى يصبر ينول بصراحه قصه جميله اوى
ربنا يجمعكم دايما فيما يحب ويرضا ويخليكو لبعض ياااارب
انا منتظره الجزء التانى من القصه يلا احكيييييييييييييييي

[دودى اشرف]

hwaml60 صباح الخييييييييييييييييييييييير يا بناااااااااات ... انا صحيت بدرىىىىىىىىىى ... يا ترى حد هنااااااااا ولا استأذنhwaml29hwaml30hwaml30hwaml30

[د×و]

خلاص فصلتى يا ملوووكه

طيب روحى ريحى وانا منتظره باقي الحكاااايه

[د×و]

hwaml60 صباح الخييييييييييييييييييييييير يا بناااااااااات ... انا صحيت بدرىىىىىىىىىى ... يا ترى حد هنااااااااا ولا استأذنhwaml29hwaml30hwaml30hwaml30
hwaml7دودويييييييييييييييييhwaml7

ازيك ا قمر

عامله ايه وحشانى يا بنتى فينك من زمااااااااااااان