دردشة حوامل مصر - دردشة بنات مصر - تجمع حوامل مصر

[dr.princess]

مش عايزة اقلقك ياا سمية امال لو مش مية البيبى هتكون مية ايه
انتى لسه مستنية ليه ماتروحى تشوفى دكتورة تانية هو مفيش غير دى يعنى طيب ساعة الولادة لو مش موجودة هتستنيها يعنى روحى اكشفى واطمنى على نفسك انتى والبنوتة و ان شاء الله خير

[*رحمه*]

طيب يا سميه مستنيه ايه ما تروحي لأي دكتوره و تطمني و ان شاء الله خير

[dr.princess]

معلشى يا بنات جوزى اتصل وجاى فى الطريق
لو عرفت هبقى ادخل اطمن عليكى يا سمية
سلالالالالام يا دينا

[somia]

المشكلة اني معرفشي واحدة تانية كويسة يا جماعة انا خايفة اروح لاي واحدة من هنا متفدنيش بحاجة ومعنديش استعداد اروح لدكتور وزوجي اصلا عنده امتحان رخم بكرة يا رب يبقى اخر مرة لان ده تالت مرة ..
بس انا سالت كام واحدة من اصحابي بيقولولي طالما ان المية م بتشر مني وانا واقفه يبقى طبيعي والتقلصات دي برضه طبيعية عشان انا في التامن والرحم بيستعد للولادة بس انا برضه قلقانه قوي ومش عارفة حتى لو رحت لدكتورة هروح فين ولمين

[somia]

ربنا يباركلك يا لولو ويتمملك على خير ويسهلك ولادتك ورضاعتك يا رب .. ويرزقك يا دينا بالحمل الثابت السليم والولادة السهلة الميسرة

[*رحمه*]

الله يخليكي يا سميه و يطمننا عليكي ان شاء الله
بس بالله عليكي شوفي اي دكتوره ، دي مش محتاجه شطاره ، هتعملك سونار و تطمن على نبض البيبي و ممكن تديكي حاجه للتقلصات دي و ان شاء الله خير
لكن لو فضلتي قاعده كده والعياذ بالله في حاجه ممكن تضر البيبي هتلومي نفسك بعد كده
و الله العظيم مش عايزه اخوفك و اصلا ما عنديش خبره بالحاجات دي
بس اهم حاجه تطمني يا حبيبتي
و ربنا يطمنك ان شاء الله

[somia]

والله يات دينا ربنا يسترها يعلم ربي اني اصلا مش قادرة اقعد مكاني فما بالك باني اخرج بس هاحاول اشوف زوجي كده وربنا يسترها معايا يا رب .. بالله عليكي تدعيلي من قلبك بظهر الغيب لحسن انا مرعوووووووووووبة

[somia]

دينا معلشي هاضطر اخرج الوقتي لاني مش قادرة اقعد خالص وباذن الله هاحل اطمنك عن قريب ان جد جديد

[somia]

السلام عليكم ورحمة الله وبركاته

[*رحمه*]

يا حبيبتي و الله ما تقلقي ان شاء الله مش هيكون في حاجه ، البنوته بس عايزه تشوف غلاوتها عندك ، و طمنيني عليكي يا سميه اول ما تبقي كويسه ان شاء الله و مش هنساكي في الدعاء
و لو عايزه تقومي تريحي براحتك مفيش مشكله

[Rania Negm]

معقولة ؟؟؟ ده حكيكى ؟؟؟؟؟؟

[*رحمه*]

شفتي يا رووني مش قلتلك الفيل في المنديل !!!
المهم الباقيين هيعرفوا ازاي

[توتة السيد]

هيصة عند العريس هيصة عند العروسة هيصة

المنتدي فتح الله اكبر انتصرنااااااااااااااااااااااااااا

العواف عليكم يامزز

[gogo]

معقوله ده المنتدى فتح ده انا كنت بفتح ابص عليه شكله وحشنى لقيته شغال

[توتة السيد]

منورين ياحلواااات

[توتة السيد]

جوجو ازيك ياقمر عاملة ايه

[gogo]

تمام ياتوته انتى عامله ايه
هما فتحوا المنتدى بسرعه ليه مش قالوا اسبوعين غريبه صح

[*رحمه*]

السلاااام عليكم
توته و جوجو اخباركم ايه

[malak ahmed]

سلام عليكم يا وحشييييييييييييين

انا زعلانه منكم اووووووى

[malak ahmed]

اخبار كل الموجودين ايه

يارب تكونو بخير كلكم

[gogo]

ملك رحمه عاملين ايه منورين
ملك زعلانه ليه

[*رحمه*]

ليه يا ملك زعلانه ليه ؟؟؟؟

[*رحمه*]

بنااااااااات نتيجة التحليل بتاعة الحديد طلعت
و الدكتوره بتقولي ان الطبيعي من 100 ل 170

تخيلوا انا طلع عندي كام















18

[gogo]

ياربى وليه عملتى فنفسك كده يابنتى كولى عسل اسود كتير وتفاح وموز كل الحجات دى فيها حديد

[*رحمه*]

ان شاء الله يا جوجو
بس الدكتوره كتبت لي كورس حقن حديد ، كل يوم اروح اخدها في محلول كده بتقولي هتحتاجي حوالي من 10 - 15 حقنه و اعيد التحليل تاني و اشوف النتيجه
ادعوووووووووووولي
والله تعبت شويه يقولولي خسي و شويه يقولولي لازم تغذيه
ربنا يحتسب لنا الأجر إن شاء الله

[gogo]

تعرفى يادينا ان نسبه الحديد ف الدم لو كانت منخفضه تمنع الحمل اتغذى كويس

[malak ahmed]

الف سلامه عليكي يا دينا
النسبه قليله اووووووى بجد
خدي بالك ع نفسك وحاولي تزوديها بقي باكلك ومش تسيبي نفسك كده تاني

[malak ahmed]

بنات هو المنتدي شغال معاكم كويس ولا مهنج زيي كده ؟؟

[حنين الجنة]

بسااااااء الخير عابلين ايه << بعلش عندى برد

[*رحمه*]

اه والله يا جوجو الدكتوره بتقولي كده ، ممكن ده يكون سبب ، و الحمد لله انا اكتشفته بالصدفه
و الله يا ملك بدأت اغذي نفسي بحاجات مفيده ، سلطه خضراء و بحط فيها جرجير و فجل أحمر
و الله المستعان
و كتبت لي كمان فيتانين اسمه stress tabs with zinc

[malak ahmed]

هههههههه بساء النور يا قمر
احنا كونسين والحمد لله .. الف سلامه عليكي انا كنت زيك كده بس ابتدي يروح مني اهو وعقبالك بقي

[gogo]

تمام يامصريه انتى عامله ايه
بما انك مشرفه قوليلنا سبب رجوع المنتدى بسرعه كده

[حنين الجنة]

دينا لو عندك نقص حديد خدى الحل السحري اللى رفعه عندى تانى يووووووووووووم


















العسل الاسووووووووووووووووووود

[malak ahmed]

معلش يادينا اصبري كده يا حبيبتي وان الله مع الصابرين

جوجو صحيح نسيت اقولك الف سلامه عليكي عرفت م الصفحات اللي قبل كده
انك كنتي تعبانه .. حمدلله ع سلامتك ياقمر

[حنين الجنة]

ملاك وجوجو هلووو يا بنات المنتدى كان بيتنقل لسيرفر اعلى عشان الاقبال زاد على المنتدى من زوار واعضااااااء وكان المفترض يقعد 4 ايام بس الحمد لله رجع عند الكثير

[malak ahmed]

الدكتور قايلي كلي عسل اسود عشان الحديد بردو بس انا من يوم ما حملت كرهت الاكل كلووووووو

معتمده بس عالفيتامينات اللي باخدها
يارب بقي الوحم ده يروح وارتاح منه

[*رحمه*]

ازيك يا ام جنه ، و جنه عامله ايه
و الف سلامه عليكي من البرد
و ان شاء الله هجيب عسل اسود اكل منه و ربنا ييسر الاحوال

[*رحمه*]

ده انا قلت يا ام جنه هيغيروا اللوك بتاع المنتدى و يعملولوا الوان جديده كده تفتح النفس
طلعت تغيير سيرفرات مش اكتر

[حنين الجنة]

استغفر الله استغفر الله

[gogo]

الله يسلمك ياملك

[malak ahmed]

الحمد لله انه مطولش ... انا اصلا مكنتش بفتح اليومين اللي فاتو وجيت النهارده اتفاجئت بالموضوع ده

كويس اني جيت ولقيته بيفتح لاني لو كنت جيت ولقيته لسه مخلصوش كان هيجيلي اكتئاااااااب عاللي عندي

[حنين الجنة]

يا دينا هما بالفعل هغيرو اللوك قريباااااااااااا باذن الله وان شاء الله يكون افضل

[*رحمه*]

سلااااااااااامتك يا جوجو ، بقيتي كويسه دلوقتى

[gogo]

اه الحمد لله يادينا كله تمام ده كوى قرحه مش تعب تعب
تعرفوا يابنات انا اتعودت على شكل المنتدى كده ومش عايزاه يتغير

[حنين الجنة]

ملوك هتسمى البيبي ايه ان شاء الله

[حنين الجنة]

جوجو لما يتغير اكيد هنتعب فى الاول بعدين هنتعود على شكله

[gogo]

اكيد يامصريه هنتعود وهيرجعوا يغيروه تانى وهكذا هى الدنيا مبتقفش كله بيتغير

[*رحمه*]

ربنا يرزقك يا جوجو بالذريه الصالحه ياااارب العالمين

[gogo]

مصريه انتى ليه غيرتى اسمك

[gogo]

يارب يادينا انا وانتى وكل الى تتمنى يارب
قوليلى انتى كمان غيرتى اسمك ليه

[حنين الجنة]

غيرته عشان كنت هرجع مصر ومش هبقى مغتربة بس يالله اتاخرنا وشكلى مش هرجع دلوئتى خالص

[*رحمه*]

والله يا جوجو
اولا عشان لو حد دخل المنتدى من الناس اللي انا اعرفهم ما يتعرفش على شخصيتي، عشان اكون براحتي
ثانيا عشان متفائله بالاسم ده فسميت نفسي رحمه

[*رحمه*]

خلاص يا ام جنه رجعيه مصريه مغتربه عشان تنزلي اجازه ههههههههه

[gogo]

ان شاء الله ترجعى يامصريه قريب
دينا عندك حق انك تغيريه مش اى حد يعرف اسمك

[حنين الجنة]

جوجو ضربت عصفورين بحجر

قصدى يعنى اللى على راسه بطحه احنا الاتنين جاوبنا ياستى

[*رحمه*]

جوجو انتي بتشتغلي ولا قاعده في البيت

[gogo]

ههههههههههههه مصريه اصل انا كل مره ببقى عايزه اسالكم وانسى ف قلت فرصه

لا يادينا قاعده ف البيت بهش وانش

[malak ahmed]

ملوك هتسمى البيبي ايه ان شاء الله

سوري اتاخرت شويه ف الرد عليكي لان كان معايا فون

ان شاءالله هسميها ملك .. ولسه بردو لاني سمعت ان الاسم غير مستحب ... فهسال واتاكد الاول باذن الله

عرفيني بنفسك اكتر انا اول مره اتكلم معاكي

[*رحمه*]

انا كمان بهش و انش ، تعرفوا احمد سافر النهارده الصبح و هيقعد 3 ايام و انا قاعده لوحدي ، و كنت هتجنن من الزهق لولا اننا عرفنا ندخل المنتدى و لقيتكوا

[malak ahmed]

ياااااااااااااا علي كده بقي ... نفسي بقي البيبي اللي في الشريط ده يبقي في الخانه اللي بعديه من يوم ما سجلت ف المنتدي ده وهو مثبت نفسه عالخامس كده .. ده انا زهقتلو والله

[gogo]

طب وانتى مروحتيش عند اهلك ليه يادينا

[malak ahmed]

طب كويس يادينا انه متاخرش عشانك ياحبيبتي
ربنا عمل كده عشانك

[حنين الجنة]

ملوك انا عندى 22 سنه
وعندى بنوتة اسمها جنة
وليا تقريبا 3 سنين فى انجلترا
اى خدمه








دينا لاااا متقوليش اكتر حاجه بكرهها ان جوزى يسافر محبش اقعد لوحدى ابدااااااااا مبعرفش انام

[gogo]

ان شاء الله ياملك هيبقى ف اخر الشريط وبعدين ينط يبقى ف ايدك

[*رحمه*]

صحيح يا لووكه انا من اول ما عرفتك و انتي في الخامس ؟؟؟
لا يكون الشريط بايظ

[حنين الجنة]

ملك يمكن الشريط بايظ انتى حاسبه كويس ؟؟؟؟؟؟؟؟؟؟؟؟

[*رحمه*]

اروح عند اهلي فين بس يا جوجو
هما في مصر و انا في الرياض

ام جنه انا كمان كارهه نفسي ، اعمل ايه انا في 3 ايام بين 4 حيطان كده :(

[حنين الجنة]

انتى مسجله يا ملك من شهر 4 يعنى اكيد مش بايظ

[malak ahmed]

اشترفت بمعرفتك يا ام جنه ... اهلا بيكي
انا بقي اصغر منك بسنه متجوزه من سنتين ونص كده وده اول حمل ليا

انا بقي جوزي بيكون مسافر طول السنه مش بييجي غير شهرين بسسسسسس حاسه اني همووووووووت لو فضل كده وياما كلمته ولا ينفع يشتغل هنا ولا ينفع ياخدني معاه وانا عايشه ف مصر ف بيتي مع حماتي بس من يوم ما حملت وانا عند ماما اللي هي في نفس المنطقه في وش بيتي علطول يعني مفيش تغيير

يلا بقي ربنا يصبرني


هههههه امتي بقي ينط يا جوجو زي ما بتقولي ده انا هفضل فاتحه ايدي من دلوقتي عشان استناها تنط بقي هههههه

هموت واشوف شكلها ايه بفضل اكلم نفسي لما هتجنن ... ياتري هتبقي شبهي ؟؟ ياتري هتبقي شبه باباها ؟؟ ياتري هتكون هاديه ولا شقيه؟؟ ياااااااه امتي بقي

[حنين الجنة]

دينا ملكيش غير النت وحاولى تكلمى اهلك يسلوكى

[أم إياد]

السلام عليكم
ازيكم يابناااااااااات؟؟؟

هيييييييييييييييييييه المنتدى فتح المنتدى فتح

[gogo]

انا كنت فكراكى قاعده ف مصر يادينا معلش استحملى واهو النت بيسلى

ملك اصبرى هانت عديتى مرحله الوسط

[*رحمه*]

صح يا ام جنه ، بس اهلي خرجوا كلهم معزمين على الغدا و نفضولي
الحمد لله على كل حال ، ربنا يحتسب لي الأجر ان شاء الله

[حنين الجنة]

ياه يا ملك صعب اوى شهرين

بس كله فى مصر يهون

[حنين الجنة]

وعليكم السلاااااااااااام ورحمة الله وبركاته يا ام اياد

[gogo]

ام اياد منوره المنتدى عملنا مفاجئه وفتح الغريبه ان كل الناس عارفه ان النتدى قافل وبتدخل تجرب بردوا

[malak ahmed]

المصيبه يا بنات اني لسه فعلا ف الخامس ههههههههههههه

الشريط مش بايظ ولا حاجه كل يوم ينقص يوم وكل اللي ف التوقيع ماشيين مع بعضهم ومظبوطين بس هي الايام اللي بطيئه وتخنق اووووووى
لسالي يومين ان شاءالله واخلص الخامس لما اشوف بقي الشريط هيعمل ايه
مش عارفه الحمل ده الدكتور ماخر ليا الميعاد كده ليه .. كنت ف حملي الاول كل اول شهر بكمل شهر .. ده كل اخر شهر لغايه ماروحي تطلع علي ما الشهر يخلص

[*رحمه*]

بناااااااااات عايزين نطمن على سميه ما حدش معاه رقمها ؟؟؟؟؟

[gogo]

ليه مالها سميه يادينا

[malak ahmed]

ايه ازيك اخبارك ايه يا قمر واخبار الحمل معاكي دلوقتي ايه ؟؟

فعلا يا دينا سميه انا قريت انها كانت تعبانه وسالت ماما علي الميه دي لقيتها بتقولي انها غلط ولااااااااااازم تروح للدكتور

[سولاف]

بنات مين حامل وكلت فسيخ
اهئ اهئ اهئ نفسي فية وجوزي مش راضي اكله
خايف عليا وعلى البيبي
انا في الشهر الثالث وبعد بكرة هادخل الرابع
تنصحوني بي اية
مع العلم انا نفسي فيه جدا

[*رحمه*]

ازيك يا ام اياد عامله ايه ؟؟؟؟

[*رحمه*]

جوجو
كانت بتقول انه بيجيلها طلق و نزل منها ميه
و قالت هتروح للدكتور ، كنا عايزين نطمن عليها بكره و لا حاجه ، لو حد معاه رقمها

[gogo]

ربنا يستر ان شاء الله خير بتهيقلى محدش هنا معاه رقمها يارب تدخل تطمنا

[malak ahmed]

بنات مين حامل وكلت فسيخ
اهئ اهئ اهئ نفسي فية وجوزي مش راضي اكله
خايف عليا وعلى البيبي
انا في الشهر الثالث وبعد بكرة هادخل الرابع
تنصحوني بي اية
مع العلم انا نفسي فيه جدا


بصي حبيبتي انا ف الاول بردو كان نفسي فيه اوووووووى .. وكنت سامعه انه غلط بردو عالحامل وسالت الدكتور وقالي كلي عادي بس اهم حاجه ميكونش مالح اوى وميكونش قديم ويكون معروف مصدره
فجوزي فوراااااااا جاب لي فسيخ بالمواصفات دي وكلته والله قبل ما اكمل 3 شهور والحمد لله ربنا كريم ويسترها بقي .. وكلته والله بردو من يومين .. اهلي يعني بياكلوه عادي وهما حوامل ومش بيحصلهم حاجه ..

[حنين الجنة]

ملك مش بتقولى ده اول حمل ليكى ؟؟؟؟؟؟؟؟؟


سولاف بلاش يا قلبي فسيخ ورنجه والحجات دى فى الحمل عشان تسمم الحمل لاقدر الله

[*رحمه*]

ياااااااااااااااااااارب ، ربنا معاها و يطمنها

[سولاف]

يارب يطمنك يا ملاك احمد يارب والله هاخلي جوزي يقرا ردك يمكن يقتنع
وهاخد بالي من الموصفات اللي كتبتيها كمان
انشالة اكل ساندوتش واحد بس نفسي فية اوي
شكله وحم هههههههههههه

[سولاف]

حنين ممكن اكل بس مش هاكتر منة
سنتدوتش واحد بس
انا عاندي املاح زيادة بس سندوتش تفتكري هايعمل حاجة
مش عارفة محتارة ربنا يستر

[malak ahmed]

ايوة يا ام جنه ده اول حمل ليا اوصل فيه يعني للمرحله دي الحمد لله .. بقيت مش بحب افتكر حملي الاول خااااالص بعد المعاناه اللي شفتها فيه والارهاق النفسي وكده

من سنه حملت واجهضت وانا في التالت ولله الامر من قبل ومن بعد..

دعواتكم ليا يا بنات اصلي محتاجه الحمل ده اوى عشان الوحده اللي بكون فيها .. ربنا يتمملي حملي ده يااااااااارب انا وكل حامل ويرزق كل محرومه

سولاف ياحبيبتي الدكتور كان دايما بيقول كلي كل حاجه بس متكتريش واللي تتعبي منه مش تكرريه تاني

[أم إياد]

جوجو ديناااا أم جنة سولاف
ازيكم ياقمامير وحشتوووووووووني كلكم..
على رايك ياجوجو ههههههه لما انا عارفة انه قافل ايه اللي خلاني دخلت ههههه

دا انا طول اليوم والله باحاول ادخله مايفتحش لما جالي اكتئاب
مش متخيلة اني احاول ادخل وما الاقيهوش

خدت عليكم اويييييييي
عاملين ايه؟؟

دا انا بعتت لرانيا ع الفيس على ان المنتدى قافل وكنت شايلة همها هي ولولو

دا انتم طلعتوا غاليين اوي يابنانييييييييت

المهم انتم عاملين ايه؟؟

لو معاكم رقم او ايميل لسمية ياريت تبعتوهولي ع الخاص يا جماعة عايزة اتطمن عليها اوي ربنا يتمملها بخير وماتكونش حاجة وحشة

معلش يابنات والله هاستاذن عشان عندي كلية بكرة بدري

ويارب مايقفلوا التجمع تاني

اول ماآجي بكرة ان شاء الله هادخل اتطمن
السلام عليكم

[gogo]

ام اياد نشوفك على خير ان شاء الله عندك حق الواحد لما عرف ان المنتدى هيقفل حس بغلاوه الناس

[malak ahmed]

اتفضلي يا ايه ربنا معاكي يارب

[*رحمه*]

اتفضلي يا ام اياد تصبحي على خير

[حنين الجنة]

ربنا معاكى ام اياد

يا دينا شفتى موضوع رجيم النقاط

[malak ahmed]

قوليلي يا ام جنه انتي ليه ف انجلترا؟؟
ودارسه ايه ياتري؟

[malak ahmed]

انتو بتروحو فيييييييييييييين بس وبتتاخرو كده ليه ف الرد

[malak ahmed]

اوك يا بنات يا نايمين استاذنكم انا بقي واقولكم تصبحو علي خير

مش قادره اقعد خلااااااااااااص

سلام عليكم

[رنا خالد]

بخ
هو المنتدي فتح ولا انا بيتهيألي

[Rania Negm]

لولولولولولولى


لالالالالالالالالالا

انا سعييييييييييدة

ده النوم طاير من عينى من الفرحة

مين هونييييك ؟؟؟

هصلى واجى اوعوا تكونوا موش هنا

[*رحمه*]

ياااااااااااااااا شعب حد موجود ؟؟؟

[dr.princess]

اناااااااااااااااااا

[*رحمه*]

اهلا لولو عامله ايه ؟؟؟
كويس انك جيتي

[Rania Negm]

وانا ياولااااد

موجودة

حد يزقنى من ع السرير

لسه مصلتش

[dr.princess]

رانيا دينا ازيكم يا قمرات
انا صاحية من ساعة بس المطبخ كان يضرب يقلب تقريبا كل الاطباق والحلل والكوبايات مش نظيفة غسلت شوية ولسه هبقى اكمل الصبح بقى ان شاء الله

[*رحمه*]

تعالي يا رانياااااااااااا هاتي ايدك يا بنتي :) :)
ايه يا بنااات مش هتولدوا بقى
ولا لأ ما تولدوش دلوقتي خليكيوا قاعدين معايا شويه

[*رحمه*]

انا كمان هسيبكم 5 مينيت و جايه
لولو نتيجة تحليل الحديد بتاعتي طلعت 18
و الدكتوره بتقولي الطبيعي من 100 الى 160
فكري في مصيري لحد ما هجيلك تاني

[dr.princess]

طيب تصدقى يا دينا انى بقالى كام يوم مش راضية اكل رطب علشان مولدش وقرايب جوزى عندى
المهم انهم مشوا خلاص ودلوقتى بقى واااااااااتينج

[dr.princess]

تحليل حديد ايه اللى من100 ل 160 مفيش حاجة كده
الهيموجلوبين الطبيعى بتاعه بيكون نسبته 12 ولو 11 مش أزمة اقل من كده بيبقى فيه انيميا ولو وصل ل 8 او 9 بيبقى فقر دم

[dr.princess]

المعلم صحى لو اتأخرت فى الرد شوية ماتقلقوش

[*رحمه*]

لأ يا لولو هي ما عملتش تحليل هيموجلوبين ، هي عملت تحليل حديد
هي قالت لي كده
لما سألتها الهيموجلوبين كام قالتلي انا عملت تحليل حديد
بس

[Rania Negm]

بااااااااااااااااك

الجهل وحش يا جدعان

انا كمان اخر مرة نسبة الحديد كانت 10 وقالولى الدكاترة انها قليلة

دينا انتى دكتورة ايه بتتابعى معاها ؟؟؟ صنعتها ايه ياعنى ؟؟ باطنة ولا تغذية ولا امراض دم ولا مين عمل ايه؟؟؟ وفين بتتابعى مستشفى ايه ؟؟؟

[dr.princess]

ماهو الحديد علشان تتعرف نسبته بيتعمل تحليل هيموجلوبين
ولما بتطلع نسبة الهيموجلوبين قليلة بتبقى انيميا اللى هى نقص الحديد وبتتاخد حقن حديد علشان ترفعه فهمتى قصدى ايه ؟؟؟ يعنى الحديد والهيموجلوبين وجهان لعملة واحدة فكرتينى بفيلم ملك و كتابة هههههههههههههههه

انا فى الحمل عملت 4 مرات تحليل صورة دم كاملة وماشفتش فيها اى حاجة نسبتها كده
على العموم هسأل الباشا اللى صحى ده وهرد عليكى

[Rania Negm]

ألوووولووووو إزيك يا لووولووو

ميصحش كدااا

عاوزين نولد بئى

الاجاع الشهر ده غريبة اوى ومفزعة غير اى شهر عدى ... آلام جوه جوه جوووووووووه جوه اوووووووى

معرفش دخلت جوه كدا ازاى

[Rania Negm]

يالهوى ع العيال اللى أنا بكلمهاااا

أموااااااااااااااااااااااااااات

الساعة تلاتة يا عيااااااااااااااااااااااااااال

لو مجيتوش هكت

[*رحمه*]

بصي يا رانيا هي الدكتوره العامه في مستوصف عنندنا هنا اسمه المروج
لما تعبت اول مره عملتلي صوره دم كامله و دي الرموز اللي عرفت منها ان عندي فقر دم
( 11: 18 ) b 9.2 g\dl
(t 27.9 % (35 :60
(v 51.4 fl (80 : 99
(31 : H 17 pg (27

هي لما شافت الأرقام دي قالت لي عندي فقر دم و لازم أعمل تحليل حديد
و نتيجته طلعت 18 و كتبت لي حقن حديد

[*رحمه*]

يا رانيا انا هنا كنت بكتبلكوا القصه

[Rania Negm]

اااااه

انا طبعا موش فاهمة حاجة

طب ماتروحى لدكتور متخصص يا دينااا عشان متعكيش مع نفسك

[Rania Negm]

ايوة فى نسب بعيدة اوى صحيح عن النورمال

[*رحمه*]

طيب يا رانيا اروح لدكتور ايه اللي بيعالج الحاجات دي

[Rania Negm]

هههههههههههههههههههههههههه معرفش يا ديناااا

ممممممممممممممممممممممممممم

ممممممممممممممممممممممممممممممممممممممم

ما تسألى دعاء !!

تصدقى بابايا حبيبى كان عنده انيميا حادة وكان محجوز فى مستشفى ومخدتش بالى كان دكتور ايه اللى متابعه

بس ركزت فى الاخر وعرفت انو كمل مع دكتور امراض دم

[*رحمه*]

مممممممممممممممممممم و الله يا روني انا محتاره
و اصلا احمد لو قلتله نروح نتأكد في حته تانيه
هيقولي لأ ركزي مه واحده بس
لما يرجع بقى اشوف هعمل ايه

[يارا ويوسف]

ازيكم يابنات

[Rania Negm]

اهلا يا يارا حمدلله ع السلامة


دينا بجد اسألى دعااء سيبلها ماسدجع الفيس بوك قوليلها اروح لتخصص ايه

ولما زوجك يجى روحى

عشان بس تمشى على خطوات واضحة وتظبطى الدنيا بدرى بدرى ان شاء الله

[*رحمه*]

ماشي يا رووني هعمل كده ان شاء الله
ازيك يا يارا عامله ايه

[Rania Negm]

هتقضى ليلتك ازاى يا دينا ؟؟

هتنامى امتى ؟؟؟

أحلى حاجة انك موش هتطبخى لمدة 3 ايام

[*رحمه*]

ولا حاجه يا روني قاعده على النت و اتفرج على التي في و بثثثثثث
و طبعا مش هعمل اكل
بس متضايقة قووووووووي لوحدي

[Rania Negm]

امممممممممممممممممممم

انا كنت بخاف اوى اقعد لوحدى

اول ما جيت هنا كان محمد ماسك مشروع فى عز الشغل

فكان النايت شيفت شغال

كان بياخدنى معاه الموقع !!!!!!! تخيلى ؟؟؟

كنت بخاف من شقتى أوووووى

بخاف اقعد فيها لوحدى

كان هو بيروح من باليل ويجى بعد الفجر

كنت بروح معاه واول ما النور يطلع كان يروحنى البيت وانااااااااااااااااااام وهو كان يجيى بعديا بفترة

كانت ميزة الموقع انو كان جمب البيت شوية

دلوقتى بقى مافيش نايت شيفت والحمدلله لأن الموقع بتاعه دلوقتى فى اخر الدنييااااااااااا

[*رحمه*]

ياااااااااااااااااا يا روني بتروحي معاه الموقع
و الله يا روني انا حاسه انه مفيش حد حاسس بيا
و في نفس الوقت هعمل ظروف شغله
بس حاسه انه نفسيتي في الناااااااااااااااااازل بجد
حد يقولي لو كان مكاني هيعمل ايه ؟؟؟؟؟؟
تبقى قاعده لوحدك في الغربه
او بمعنى اصح قاعده في بلد لوحدك

[Rania Negm]

ايواا كان بيقعدنى فى المكتب ويقفل عليا بالمفتاح

وهو بينزل السايت عند الخبط والرزع والكلام ده


ومقولكيش مكنتش واخدة بالى ان ده مكان فى الصحراااا

فمرة رحت وكنت لابسه شبشب البيت

حاجة كدا بمبااا وشفافة وخفيفة هههههههههههههههههههه

مانا فى العربية بقى والساعة اتنين بعد نص الليل وموش بشوف حد ولا حد بيشوفنى

راح ودانى مكان اتوضى عشان اصلى الفجر

مكتب من المكاتب

وانا ماشية لاقيت أبرااص وعقارب يالهوووووووى خدتها جرى ههههههههههههههههههه فضل يضحك علياا

هو كان لابس فى رجليه سيفتى حديد

طب الراجل موش يقولى

لاااااء سايبنى اروح الموقع بشبشب البيت ههههههههههههه مهزلة

ديناااااااااااااااا

موش تخنقى نفسك

كل ده عشان بيسيبك يومين ؟؟؟

معلش اتحملى

تعرفى ؟ لو كنتى فى مصر

وجوزك كل شهر يسيبك يومين ويسافر .. فى الاول بس هتقضيهم مع عيلتك

لكن بعد كدا هتفضلى تقعدى فى البيت عشان تظبطى الدنيا فى اليومين دول وهتلاقى اللى يشغلك

معلش اعتبريهم برييييييييك عشان يوحشك

[*رحمه*]

هههههههههههههههههههههههههههههههههههههههه عقارب
والله موتيني من الضحك يا رانيا
و فعلا معاكي حق ، اعتبرهم برييييييييييك
، الله المستعان
قوليلي يا روني
زوجك مهندس ايه ؟؟؟؟

[Rania Negm]

مدنى

أخنق نوع من المهندسين

بيتبهدلوا أوى ياحرااام

[*رحمه*]

ههههههههههههههه
تصدقي انا و جوزي مدنييييييييييييي
بس بقى ايه احنا تخصص صرف صحي
حاجه كده ريحيتها وحشه

[Rania Negm]

هههههههههههههههههههههههههههه يانهااااااااااااااااااار

ايه صرف صحى دى يا دينا ؟؟؟

انا مرة محمد شرحلى قالى المدنى فيه منه نوعين ديزاينر بتوع مكاتب ياعنى وكدااا

وحاجة تانية ناسية اسمها

اللى هى زى شغل محمد .. فى مواقع وكدا

لكن ايه صرف دى بتنزلوا فين ياعنى ؟؟ قصدى بتشتغلوا فين ؟؟ المواقع بتاعتكو فين يادينا ؟؟ قرى واعترفى ههههههههههههههههههههه

[*رحمه*]

هيهيهيهيهيهي
بصي يا روني اصل مدني ده في تخصصات كتيير
انشائي اللي هما بيبنوا العمارات و كده
طرق
مياه شرب و صرف صحي
الخ

المهم كل تخصص من دول في تصميم و فيه تنفيذ
احنا كنا بنشتغل الاول في التصميم بتاع شبكات المياه و الصرف الصحي
دلوقتي احمد بينزل موقع بينفذ شبكات صرف صحي و بلاليع ههههههههههه
و بثثثثثثثثثثثثثث

[Rania Negm]

يانهاااااااااار احوس

هى البلاليع محتاجة مهندسين كمان ؟؟؟؟

شوف ياا أخى التكنولوجيا بقت فى كل حاجة ياولاد

ههههههههههههههههههههههههههههههههه

طب يادينا انتى ملقتيش حاجة أرق من كدا تتخصصى فيها ؟؟

وبعدين انا محمد بيرجعلى منالشغل عليه طوب وحصى وزلط ويا سلام لو كان عندهم صبة بيرجعلى بالخرسانة مالية هدومه وشعره

بجد بتكلم بجد لو زوجك فى شبكات الصرف دى بيرجع بحاجة من الحاجات اللى فيها ولا هو بيكون فيها قبل ما تتملى ولا ايه ولا انا مالى مهيسة كدا ليه ومخى تخين ع المسى

بس اصلى مستغربة اوووى موضوع الصرف ده

دااانا هرغى رغى مع محمد عليه لما يصحى هههههههههههههههه

[*رحمه*]

هههههههههههههههههههههههههههههههههه
لا يا روني ما هي الشبكات ما بمتكونش لسه اشتغلت
لو كان بيرجعلي بحاجات على هدومه ما كنتش هدخله البيت اصلاااااااا
و بعدين يا رووني كان مشروع التخرج بتاعي صحيه ( مياه - صرف صحي ) فاشتغلت كده لما اتخرجت

[Rania Negm]

عموما يا دينااا احنا من غيركووووو يابنتى نتسوووووووووووح والله

سبحان الله

انا مستعجبة جدااا والله هههههههههههههههههه

وبعدين تعالى هنااا

انتى وجوزك جايين تعملوا ايه فى السعودية ؟؟؟؟ الا السعودية اساسا مافيهاش صرف صحى هههههههههههههههههههههههه

داحنا عندنا هنا فى جدة مهزلة

عربية الصرف الصحى بتيجى ريحتها سبقاهاااااااا

[*رحمه*]

طيب شفتي بقى اديكي قلتي السعوديه ما فيهاش صرف صحي ، هما بقى بينفذوا شبكات صرف صحي
و المواطنين كل يوم يتصلوا بيه قد كده عشان يعملهم التوصيله على الشبكة
عشان بيعملوا كسح للبيارات في عربيات الصرف الصحي زي انتي ما بتقولي كده

[Rania Negm]

ااااااااااااااااااااه

والله نورتينى يابت ياديناااااا

ربنا يكرم زوجك يااااااااااااااااارب ويملا البلد كلها شبكات صرف الا دى حاجة تقرف الصراحة موضوع عربيات البكابورت دى

انا اعصابى بتنهاااااار منهااااااااااااااااااا

ياستااار يارربى

[*رحمه*]

الله يخليكي يا رووني و يكرمك يا حبيبتي و تولدي بالسلامه ان شاء الله

[Rania Negm]

هههههههههههههههههههههههههه موش فاكرة مين

رنا ولا نورا

قرفت اووووى لما عرفت انهم بيرموا الصرف فى الصحراا

تقولى ياااااااااع بيرموا البيبى فى الشااارع هههههههههههههههههههههههههههههه

[Rania Negm]

ياااارب اللهم امين

وربنا يباركلك يا قوووليبى يااااارب

[Rania Negm]

ااااااااااااااه يانااا هقوم استعد للصلاة يادينااا وهناام بئى

الواحد بئى يحمل هم النوم عشان بعديه صحيان

اووووووووووووف بكره هشوف جاااارتى

شئ قميييئ بعد السهر ده موش عارفة هصحى امتى وهعمل الاكل امتى وهروحلهاا امتى

ياااااااااااااااااارب هى متجييييش يااااااارب

قولى امين يا دينااا

اصلى مغصوبة على زيارتها بكره

الست مريضة مع العلم انى شاكة بنسبة 99% انها بتستهبل

بس ما علينااااااااااااااااااااا قادر ربنا يبعدهااا عنى ان شاااااااء الله

[*رحمه*]

ههههههههههههههههههه طيب انتي تعرفي يا روني بيرموا الصرف الصحي بتاع القطارات فين ؟؟؟؟
في الطريق و القطار ماشي

[*رحمه*]

ههههههههههههههه ان شاء الله يا رووني ما تشوفيهاش بكره
تصبحي على خير يا حبيبتي

[Rania Negm]

أنهى قطارات يادينا ؟؟؟؟ اى قطر ؟؟؟؟

طب قوليلى بتاع الباصات ؟؟؟؟؟

اصل كنت راكبة مرة باص فيه تويلت والناس كل شوية تدخله فسألت نفسى بيروح الصرف ده فين ؟

[Rania Negm]

ياعنى اقصد اى قطر فى اى بلد بيرميه فى الطريق ؟

[*رحمه*]

ايوه يا روووني اي قطر ، بيرموه على الطريق
لكن في الباصات الكبيره بيجمعوه في خزان و يفضوه بعد كده
مش عايزة تعرفي اي معلومات تانيه عن الصرف الصحي

[Rania Negm]

ههههههههههههههههههههلا شكراااا

مسك الختام

بس فعلااا انا مكنتش اعرف الحاجات دى

العلم بحره وااااااااااااااااااسع اوى ياولاد

يلا يا ديناا اوومى صلى يابنتى وشغلى قرآن وناااااااااااااااااااااااااامى

تصبحى على خيييييييير

لو خفتى ولا حاجة اتصلى علياااا هى قيمة عشر ساعات بالعربية نكون عندك على طول انا ومحمد

متقلقيش

وراكى رجالة

[*رحمه*]

و انتي من اهله يا روووني ، انا فعلا هقوم اصلي ، و اكييييييييييد لو خفت هكلمك ما تقلقيش تصبحي على خير يا رووني

[dr.princess]

صباح الدوخة والهبووووط لا اله الا الله

[رنا خالد]

لولو سلامتك انتي لسه ماولدتيش الواحد نفسه يغيب ليه يومين يجي يلاقي جديد
هاشد شعري منك انتي ورانيا حنطوا
قلت اسلم عليكي ع السريع هاروح افطر وكمل وصله النوم العميقه الانيقه
ونتكلم بالليل
فاصل ونواصل

[dr.princess]

الله يسلمك يا رنا
انا ورانيا خلاص هيخللونا فعلا
خلاص هستناكى نتكلم بالليل ان شاء الله

[gogo]

انا جيت يابنات وانتوا كلكوا رحتوا تناموا محدش صاحى

[dr.princess]

صباح الخير ازيك يا جوجو
هقيس الضغط وارجعلك

[gogo]

صباح النور يالولو
قيسى ربنا يعينك

[dr.princess]

ايه الهبل ده ومتأكده انى هلاقيه نااازل لقيته عاالى بس مش اوى يعنى

[gogo]

مظبوط يعنى
لولو متعرفيش حاجه عن سوميه دى كانت تعبانه عايزين نطمن عليها

[dr.princess]

لا والله ابدا معرفتش حاجة جديدة
هبقى اسيب لايمان على الفيس تبقى تطمنا عليها

الضغط طلع 127/86 هو عالى بالنسبة ليا لانى متعودة عليه بيبقى نازل على كده

[gogo]

يالولو انتوا ف حلتكم دى مفيش حاجه مظبوطه اصلا ان شاء الله تولوا قريب وتستريحوا

[dr.princess]

يااااااااارب اللهم امين

عايزة حد يجى يطبخلى اتبهدلت اليومين اللى فاتوا ومش قادرة اتحرك من التعب

[gogo]

اه منا قريت قرايب جوزك كانوا عندك طب هو فيه حد يجى يعد عند واحده على وش ولاده ويتعبها كده الله يكون ف عونك حتى لو مضطرين يعدوا عندك يساعدوكى

[gogo]

انتى احسن حاجه تقولى لجوزك يجيب اكل جاهز وهو جى وريحى انتى انهارده

[dr.princess]

والله اتبهدلت طبخ وغسيل اطباق وقبلها طبعا تنظيف وكنس ومسح
وكله كوم و جسمى اللى واجعنى ده كوم تكتيفة زى الزفت ولا عارفة اريح جسمى ولا اقعد براحتى لغاية ماجالى كرامبات فى كل عضلات جسمى وطبعا طول اليوم قاعدة بكم وبالطرحة والست مش بتحب التكييف لغاية ما كنت بسيح من الحر الله المستعان

وكل ده واسمع منها كلمتين زى الزفت لما كنت خلاص هضربها بالشلوت

[dr.princess]

ايوه لو لقيتنى مش قادرة اطبخ لغاية قبل ما يجى هكلمه يجيب اكل وهو جاى

[gogo]

اعوذ بالله ده بدل ما تحلف انك متعمليش حاجه وتقوم هى تطبخ ناس معندهاش دم بصحيح

[dr.princess]

والله يابنتى بعد ما مشوا امبارح كلمت ماما وحظها بقى طلعت كل نرفزتى فيها بس هى ماما مقدرة انى لوحدى فمزعلتش منى وقعدت تهدينى ربنا يخليها ليا

[gogo]

عارفه يالولو انا لما كنت حامل مراتات صحاب جوزى لما كانتوا يجى يزرونى واقدم حجات مثلا كانوا هما يقوموا يشيلوا ويحلفوا انى مقومش الواحد لما بيروح عند واحده حامل مبيقومهاش من مكانها وانتى مشاء الله ف التاسع يعنى حركتك صعبه ومتعبه

[gogo]

معلش يالولو اهى عدت ريحى نفسك انهارده بقى

[dr.princess]

تخيلى يا جوجو الست دى مفكره انى علشان سافرت عروسة انى بلطجت عليهم ومجبتش عفش فرصة بقى مادام مسافرة
جابت الكلام ازاى بقى انى كنت بصبع الكفتة جنبها وحاطة صينيتبن برص فيهم بتقولى اظن ان انتى معندكيش الحاجات دى فى مصر فسألتها حاجات ايه قالتلى صوانى وكده يعنى كنت عايزة اقولها ناااااااااااااااعم مسكت نفسى وقلتلها ازاى ياحجة ده انا مجهزة جهاز يكفى عروستين وربنا شاهد على كلامى ده انا جايبة صالون ب 11 الف ومطبخ ب 7 ونص والاجهزة ب 12 او 13 وجايبة غسالة اوتوماتيك وهاف والسجاجيد ب 5 ده غير اجهزة المطبخ وحاجة المطبخ
وبعد كام ساعة تسألنى يعنى عندك تلفزيون زى ده فى مصر
حسبى الله ونعم الوكيل

[gogo]

تعرفى انا كمان مكسله اعمل اكل كنت هروح عند ماما انهارده وصحينا متأخر ف هانى راح على الشغل علطول وانا بقى مكسله اعمل حاجه بس مليش حجه اريح بيها خصوصا انى كمان مطبختش امبارح

[dr.princess]

يابنتى ده كل حاجة المطبخ مش نظيفة ومن تعبنى افضل اغسل فيهم على مراحل يعنى غسلت الاطباق والكوبايات و لسه الحلل والصوانى جوه والله مش قادرة اقوم اعملها ظهرى حاسة انه هيتكسر الحمدلله

[dr.princess]

هههههههههههههه اهى دى بقى البلطجة بعينها حتى لو تعملى شاورما وتخليه يجيبلك فينو او عيش شامى اى حاجة والسلام واليوم يعدى

[gogo]

هههههههههههههه يالهوى على الشلل ده ايه الست دى
اما تنزلى وتفرشى شقتك لازم تعزميهم يوم علشان يتفرجوا ويتغاظوا ايه الناس دى

[gogo]

انا عندى رنجه ف قلت اعملها واتغدى بيها وهانى اعمله شورمه ومكرونه
اسكتى يالولو عملت البسبوسه بس قبل ما اعرف طريقتك وكانت غريبه مش وحشه بس بردوا مش بسبوسه والراجل كلها وسكت ياعينى رحنا امبارح كلنا بره والحلو كان فيه بسبوسه وهو بيكلها بيقلى اهى دى البسبوسه ههههههههههههه

[dr.princess]

لما جه جوزى قلتله على الكلمتين دول قالى دى ست غلبانة وعلى نياتها قلتله ممكن يكونوا اهلك بيفكروا فعلا كده انى استهبلت ومجبتش حاجة قالى حتى لو كده قالى اللى يقول يقول
على فكرة قبل ما اسافر بكام شهر وصلنا كلام ان عمه قال ان عفشنا يروح قبل ما اسافر علشان منمش عليه وكده شفتى الهنا
على فكره عمه ده معايا فى نفس البيت علشان بس تعرفوا انا ليه اخترت بمزاجى اولد لوحدى ولا انى اشوف خلقتهم ده طبعا غير طباع حماتى وحمايا الله المستعان
الحمدلله على كل حال

[dr.princess]

هههههههههههههههه والله كان على بالى اسئلك من شوية ايه اللى كان غريب فى بسبوستك بس نسيت
طيب جربيها بالطريقة اللى بعتهالك بجد تحفة وبتدوووووووب ما شاء الله

[gogo]

عارفه يالولو الدنيا مليانه والله انا بسمع حكاوى على اهل الجوز افظع من كده انتى الحل الى ميعملش مشاكل بينك وبين جوزك انك تتجنبيهم والحمد لله انكوا مسافرين فعلا راحه نفسيه بعيد عن اى ضغوطات
بس انتى مامتك مش هتجيلك ليه

[dr.princess]

اه الحمدلله انا لو كنت فى مصر مش عارفة كان ممكن يحصل ايه خصوصا انى مش بستحمل طول اللسان و بقلبها عكننة
ماما رجليها تعبانة شوية فمش هتقدر تيجى ابدا

[gogo]

عارفه انا اعرف ناس حماهم وحماتهم بيتكلموا عليهم قدامهم وكمان بكل وضوح حتى مش بيتكلموا من تحت لتحت

[gogo]

الف سلامه عليها بدام جوزك معاكى متقلقيش وكمان ليكى صحاب هناك يعنى مش لوحدك

[dr.princess]

هههههههههههههههه ايوه فى واحدة صاحبتى حماتها من العينة دى مظبطاها ياعينى

[gogo]

اه والله يابنتى واى تظبيط بيصعبوا عليا والله

[dr.princess]

الله يسلمك يا جوجو
انا سايباها على ربنا ومش شايلة هم حاجة الحمدلله
بس كل ما اكلم حماتى تقولى متزعليش هتعدى ماتشيليش الهم سيبيها على ربنا عايزة اقولها انتى عايزة تعكننى عليا وخلاص قلتلها انا عاااادى جدا مفيش اى مشكلة ست مستفزة صحيح
واخر مكالمة قالتلى ماتستعجليش الولادة دى فى المعاد اللى محدده ربنا فقلتلها براحته ماينزل وقت ماينزل وانا اشيل همه ليه هو مضايقنى فى حاجة ااااااااااااه يانى انا دلوقتى عرفت ليه ضغطى على هههههههههههههههههه

[gogo]

ههههههههههههههه عارفه يالولو مشكلتك مع حماتك انها ف الاول ادتك فكره سلبيه عنها وعملت بينك وبينها حاجز ف انتى بقيتى تتنرفزى من كلامها كله حلو او وحش انتى بقيتى حاسه انها ضدك

[dr.princess]

اه فعلا عندك حق
انا كل كلامها مش بستحمله حتى لو ممكن يبان انه كويس بس انا دايما بفهمه وحش
والله دى اوقات تقولى انتى عندى زى بناتى وبدعيلك وانا بصلى بس عمرى ما صدقتها بحس كلامها مش من القلب ابدا ربنا يسامحنى لو ده سوء ظن

[dr.princess]

عايزة اقولك انى اصلا مكنتش بطيقها من قبل ما اتخطب مع انى مكنتش بكلمها عارفة شكلها كده بس ولما اتعاملت معاها اتثبتت الفكرة خلالالاص

[gogo]

تعرفى يالولو انا ماما عانت كتير من جدى وجدتى واخوات بابا كلهم بنات وبردوا عانت منهم ماعدا واحده بس فيهم هى الى كانت طيبه معاها بس تعرفى جدى وجدتى قبل ما يموتوا الاتنين كانوا عايزين يعدوا عندها وطلبوا منها انها تسامحهم وعماتى الوقتى معاها كويسين اوى
انتى استحمليهم وهما هيجى عليهم وقت ويحسوا انهم غلطانين ف معاملتهم ليكى وبالعكس هيعملوكى كويس جدا
كل ما تقبلى السيئه بحسنه هيتغيروا من ناحيتك

[dr.princess]

والله نفس النظام عند ماما برده جدتى وعماتى بهدلوها اخر بهدلة الله يسامحهم

والله يا جوجو مع ان الست اللى كانت عندنا دى هى وابنها كانوا تقال على قلبى بس ربنا شاهد انى عاملتهم بما يرضيه وقبل ما يطلبوا الحاجة تكون عندهم فى الاول والاخر دى فى وش جوزى وعملت اللى يرضيه عنى

[gogo]

لولو الست الى كانت عندك دى صراحه انا متنرفزه منها
بس الواحد دايما بيعمل باصله ميقدرش ميكرمش ضيوفه حتى لو كانوا زى ضيفتك دى
تعرفى يالولو فعلا الواحد لما بيسمع كلمه تجرحه من حد بيقفل منه مهما كان طيب انا خالت جوزى لما نزلنا اجازه وكنت اجهضت ساعتها ورحت عندهم زياره وبنتها كانت لسه والده وانا كنت بروح عندهم عادى اول الجواز وكل الاطفال الى هناك بلعبهم واشيلهم عادى لكن المرادى اما جيت اشيل النونه الى لسه مولود عارفه قالتلى سمى وانتى بتشليه وادعى ربنا يرزقك بواحد زيه
والله يالولو انا صعقت منها ومن ساعتها مع انها بتعاملنى كويس جدا بس انا قفلت منها خالص وكل كلامها بقيت بخده على محمل وحش

[dr.princess]

عندك حق فعلا معدش فى حد بيحاسب على كلامه
انا برده هنا مرات صاحب جوزى كنت بكلمها اتطمن عليها وعلى ولادها وفى وسط الكلام لقيتها بتقولى ان مايلزمهاش اى حد فى الدنيا غير ولادها وجوزها وانها مستغنية عن كل الناس ومفيش حد يفرق معاها وانها معدتش بتسأل على حد بمعنى اصح الناس كلها ملهاش لازمة وبعد مدة خدت بالها وقالتلى انا مش قصدى حاجة ده احنا اكتر من الاهل ومن يومها هى كمان معدتش تلزمنى ومش بكلمها الا لو حصل عندها حاجة تستدعى انى اسأل

[somia]

السلام عليكم ورحمة الله وبركاته..
حد هنا؟؟؟

[gogo]

سميه كويس انك جيتى طمنينا انتى بخير
روحتى للدكتوره

[dr.princess]

سمية كنا قلقانين عليكى
اخبارك ايه دلوقتى ؟؟؟؟؟؟؟

[somia]

انا حبيت بس أطمنكم اني الحمد لله تعالى احسن .. لسة مرحتش للدكتورة هروحلها النهاردة ان شاء الله تعالى

[gogo]

الناس بقت صعبه اوى يالولو والله بس عارفه بردوا حبيبك تبلعله الظلط وعدوك تتمناله الغلط الواحد لما بيسمع حاجه من حد بيحبه بياخدها على محمل كويس

[gogo]

طب الحمد لله ياسميه هى البنوته بس بدربك من الوقتى بتديكى كورسات علشان لما تيجى تولدى تبقى شاطره

[dr.princess]

الحمدلله
طيب هى دكتورتك رجعت ولا هتروحى لواحدة تانية
كنت هقولك الحقى تابعى مع واحدة تانية علشان لو دكتورتك مش موجودة وقت الولادة
شوفى كده دكتورة ايمان او اسئلى اصحابك

[gogo]

صحيح هى ميرى مبتجيش ليه وحشتنى اوى

[dr.princess]

انا كنت مكلماها من ايام هى كويسة الحمدلله بس فى مشكلة فى النت علشان كده مش بتدخل الايام دى

[somia]

والله يا جوجو ربنا يهديها بس ويجعلهالها ذرية صالحة...
والله يا لولو ما اعرف السكرتير قالنا انها هتيجي النهاردة بس حتى لو مجاتش مش هستناها انا قاعدة على اعصابي هشوف أي حد تاني المشكلة ان ايمي كانت متابعة مع دكتور وانا مستحيل اتابع مع دكتور لو بموت فربنا يكرمني ودكتورتي دي ترجع وانا اتفقت مع اخت زوجي انها تيجي معايا تهزأها عشان أنا بتكسف

[dr.princess]

انتوا لو كلمتوها هتقولكم مانتوا عارفين من زمان انى بسافر يعنى مش جديدة عليكم
المهم فى كل الاحوال لازم تشوفى دكتورة تانية انتى مش ضامنة الظروف

[somia]

عارفيين يا جماعة امبارح انا طول اليوم كنت حاسة اني هموت يا اما هيغمى عليا وجت ايدي كملت عليا جتلي تشنجات فيها وبعدين جتلي رعشة غريبة كانت كل صوابعي بتترعش لوحدها

[somia]

والله يا لولو ما انا عارفة بقى انا مش بستريح مع اي حد ولازم دكتورة كده أعرف اتكلم معاها مش أروح وأرجع وانا مفهمتش اي حاجة دا انا بخلي الدكتورة تفليلي السونار حتة حتة وتفهمهوني وبرغيلي معاها نص ساعة كده أسئلة أجيب واحدة تانية منين تستحملني

[dr.princess]

الف سلامة عليكى يا سمسمة ولازم تطمنينا بعد ماترجعى من عند الدكتورة

[gogo]

سميه طب متروحى مستشفى هناك بيبقى فيه كل التخصصات اسالى على دكتوره نساء اكيد هتلاقى

[somia]

عارفين يا جماعة انا ناويالها نية محترمة لو جيت اولد ولقيتها مسافرة والكل طبعا عارف دعوة اللي بتولد هديها شوية دعوات من اللي قلبك يحبهم قبل ما ادعي لاي حد من اللستة اللي موصياني أدعيلها ربنا بس يسترها معانا ويسهلنا ولادتنا

[dr.princess]

انتى مش محتاجة واحدة تتكلمى معاها انتى محتاجة واحدة لو جاتلك الولادة تولدك

[gogo]

ياسومه متقلقيش والله الحجات دى ربنا بيرتبها هتبصى تلاقى كل حاجه متسهله وانتى بتولدى بس اهم حاجه تروحى لاى وحده الوقتى تطمنى بس

[somia]

أكيد هطمنكم باذن واحد كريم يا لولو .. دعواتكم بس الله يخليكم معايا..
جوجو انا مش عارفة اروح لمين ولا ازاي اي مستشفى ما اضمنش يبقى دكتورة مش دكتورة وما اضمنش انها تكون بتفهم اصلا المستشفى الوحيدة اللي مضمون الاقي دكتورة فيها مستشفى العزيز بالله بس المشكلة بتبقى زحمة قوي وبشر كثيييييييييييير يعني ممكن استنى بالعشرين دور على ما ادخل والمصيبة اني مبستحملشي اقعد اصلا اقصايا قوي نص ساعة وببقى بمووووووووووت من القعدة

[dr.princess]

وانتى تسيبى نفسك ليه لما تبقى تدعلى عليها خليكى فى السليم احسن ساعتها تعملى ايه لو كانت مسافره فكرتى فى الحكاية دى قبل كده ؟؟

[somia]

عارفة يا لولو المصيبة اني جبانة قوي يعني لو واحدة ما استريحتلهاش ممكن اموت وما اولدش معاها بس اللي مطمني ان ربنا ماسابنيش ساعة العملية اللي فاتت وعدت على خير ورزقني بالدكتورة دي فاكيد مش هيسبني في الولادة عارفيين يا جماعة والله موقف عمري ما انساه مع اني كنت لسة عارفاها واحنا داخليين نعمل العملية خلاص وهيه عمالة تهديني من المناحة اللي فتحتها اما اكتشفت اني هادخل لوحدي والله يا جماعة حسيت وشها منور كده فقلتلها حاجة مش فاكراها بالضبط بس معناها انها وشها منور قوي واني متفائلة بيه قوي ان ان شاء الله العملية هتعدي على خير

[gogo]

سميه لازم فعلا تبقى عامله خطه بديله لو دكتورتك مش هنا لازم تسالى على دكتوره تانيه وانتى لسه قدامك شهر تقدرى تدورى

[ايمان العليمي]

السلام عليكم


عاملين ايه يا بنات؟؟؟

[somia]

والله يا لولو انا عمالة بفكر بس مش عارفة اعمل ايه مفيش غير واحدة تانية كويسة اسمع عنها بس دي في حلوان كانت صحبتي متابعة معاها وانا على ما اوصل حلوان ممكن اكون ولدت اصلا اذا كنت الوقتي خايفة اروح هناك لاتعب من السكة فمش عارفة اعمل ايه .. أخت زوجي بتقولي نطلع على الفرنساوي ونسيبها على رربنال بس بقولها افردي كان دكتور مناوب مش دكتورة يبقى الحل ايه .. فربنا بقى يسهلهالي من عنده كده ويسترها وتبقى دعاء دي موجوده وزوجي ميكونشي مسافر عشان ما احتسشي لوحدي

[somia]

ازيك يا ايمي عاملة ايه ..
يا جماعة ادعولي لحسن حاسة نفسي ابتديت أتعب تاني ويجيلي هبوط

[dr.princess]

الف سلامة عليكى يا سمية ربنا يكتبلك الخير
ايمى صباح الخير اخبارك ايه

[ايمان العليمي]

لو في لخبطه كلام اتبعت باسمي تعرفوا انها ليلي او انا وليلي بنتخانق :( علي الاب توب

[ايمان العليمي]

الحمد الله يا لولو انا بخير وانتي ايه اخبارك والنونو عامل ايه فيكي ؟؟؟؟

[ايمان العليمي]

الحمد الله يا سوما


قومي خدي اي حاجه ترفع الضغط متسبيش نفسك كده .........قومي اشربي شاي

[توتة السيد]

الله يسلمك يا جوجو
انا سايباها على ربنا ومش شايلة هم حاجة الحمدلله
بس كل ما اكلم حماتى تقولى متزعليش هتعدى ماتشيليش الهم سيبيها على ربنا عايزة اقولها انتى عايزة تعكننى عليا وخلاص قلتلها انا عاااادى جدا مفيش اى مشكلة ست مستفزة صحيح
واخر مكالمة قالتلى ماتستعجليش الولادة دى فى المعاد اللى محدده ربنا فقلتلها براحته ماينزل وقت ماينزل وانا اشيل همه ليه هو مضايقنى فى حاجة ااااااااااااه يانى انا دلوقتى عرفت ليه ضغطى على هههههههههههههههههه



بصراحة وماتزعليش مني يالولو الست ماغلطتش حرام عليكي

دي بطمنك بتريحك من التفكير يعني ماتقصدش تضايقك

[توتة السيد]

العواف عليكم الاول

[dr.princess]

توتة ههههههههههههههههههههه لالا غلطانة والف غلطانة انا معدتش عايزاها تكلمنى لان كل ما بتتكلم بفهمها غلط او هى فعلا بتقول كلام غلط مش عارفة بقى
طيب هى مين اللى قالها انى بفكر ولا متضايقة بالعكس والله دى هى كده بتشيلنى الهم وبتحسسنى ان الموضوع كبير

ايمى احنا الحمدلله كويسين نحمد ربنا

[توتة السيد]

سمية الف سلامة عليكي ياقمر ربنا يكملك علي خير

يابنتي روحي للدكتور ماتسبيش نفسك كده

[ايمان العليمي]

والله يا لولو الست كلامها كويس يعني مفيش كلام يزعل ولا حاجه


بس ممكن بس انتي الي مش طايقه نفسك من الحمل وكده وده عادي

انا لما كنت حامل اي حد يقولي حاجه اقوم اعيط كنت حساسه اوي

[توتة السيد]

توتة ههههههههههههههههههههه لالا غلطانة والف غلطانة انا معدتش عايزاها تكلمنى لان كل ما بتتكلم بفهمها غلط او هى فعلا بتقول كلام غلط مش عارفة بقى
طيب هى مين اللى قالها انى بفكر ولا متضايقة بالعكس والله دى هى كده بتشيلنى الهم وبتحسسنى ان الموضوع كبير


انتي قولتيها بقيتي كل متكلمك تفهميها غلط هي دي ا

[dr.princess]

بجد الست كلامها عادى وانا اللى طلعت مفترية هنيالك يا حماتى

[توتة السيد]

ادي نور شور سريع ونضفها من الجلخ اللي عليه ورجعلكم

[ايمان العليمي]

انا احتمال اقل الاب توب خااالص في احتلال ممكن يحصل عليه دلوقتي يا نهاري


ايه البت دي

[dr.princess]

قوليلى يا توتة انتى بدأتى تحميها بعد كام يوم من الولادة
مش عارفة اصلا هحميه ازاى اكيد هخااااف ومش هعرف

[dr.princess]

جوجو اين انتى
شفتى بتصل بجوزى علشان اقوله هات اكل وانت جاى الاقى موبايله مقفول

[somia]

معلشي يا جماعة اتأخرت عليكم بس جالي تليفون وقولت أصلي الظهر قبل ما النعب يزيد وأحتاس

[somia]

ههههههههههههههه الراجل عامل حسابه يا لولو .. شكله كده حس انك هتتصلي تطل أكل ..
طب ما تصبري شوية هوه مش لسة هيجي على المغرب باذن واحد كريم؟؟
ايمي توتة رحتوا فييييييييييييين؟؟؟

[dr.princess]

لالالا هو هيغير المواعيد النهاردة يعنى هيجى كمان ساعة كده ان شاء الله وانا هبطانة خالص مش قادرة اقوم اعمل اكل

[gogo]

معلش يابنات كان معايا تليفون علشان كده اختفيت هروح اصلى واجيلكم علطول ويت مى

[dr.princess]

هيييييييه هييييييييه فتح موبايله
يللا بقى اشوفكم بالليل ان شاء الله لانه جاى فى الطريق

[somia]

طب الحمد لله انه فتح الجهاز .. ابقي كوليلنا معاكي وانا لوكلت من الرنجة والفسيخ هاكلك معايا برضه ..
جوجو مستنيينك ..
توتة كفاية تنظيف في البت وتعالي مش لازم تحطيلها مكياج يعني ..ههههههههههه
ايمي هيه لولو استولت على الاب ولا ايه؟؟

[gogo]

انا جيت لولو بالهنا والشفا
سميه كولى حاجه متعديش كده

[somia]

والله يا جوجو مافينيش حيل اعمل لنفسي اي حاجة انا حاسة ضغطي وطي قوي كلت حتة شيكولاته قلبتلي بطني وكلت خوخ وبرضه ولا الهوا ..
دعواتك معايا ومع زوجي لحسن هوه في الامتحان الوقتي دعواتك ينجح فيه لحسن دي تالت مرة يدخل الامتحان ده

[gogo]

ربنا يوفقه يارب ويعملكم الى فيه الخير
كولى حاجه تسندك ياسومه اعملى سندوتش الفاكهه والشكولاته متسندش يابنتى
سومه عايزه اسءلك على حاجه هو بعد الكى انتى روحتى للدكتوره لما خلصتى العلاج تطمنى انه كله تمام ولا عشتى حياتك عادى

[somia]

جوجو انتي رحتي فيييييييييييييييين؟؟؟

[somia]

والله يا جوجو ما قادرة أقوم أعمل حاجة وبعدين احنا متعودين بنفطر مع حمايا كل يوم بس شكله نسيني النهاردة فعان كده معنديش حاجة خفيفة للفطار اصلا ..
انا رحتلها تاني بعديها بحوالي أسبوعين أو 20 يوم وطلع ان كان فيه جزء صغير كده مكانش اتعمل المرة الاولى فعملتهولي تاني وأكدتلي على الباقي لانها بتقولي كانت كبيرة قوي

[somia]

جوجووووووووووووووووووووووووووووووووووووو.. انتي فين يا بنتي؟؟؟

[gogo]

يابنتى مش لازم حاجه خفيفه شوفيلك ورك فرخه كوليه ولا حاجه انتى ف التامن لازم تبقى بتاكل كويس سيبك من الجبن والحركات دى

[somia]

ورك فرخة يا أمي انا مقاطعة الفراخ واللحمة من أول الحمل مبكلهمشي غير مشوي غير كده لو أجبرت نفسي وكلتهم برجع كل اللي في بطني وعندي بامية في التلاجة بس مش عايزة أكلها لوحدي وزوجي مش هنا وبعدين عايزة أكل حاجة خفيفة كده عشان ناوية اكل باذن الله تعالى معاهم رنجة وفسيخ النهاردة فمش عايزة أفطس من التعب لاني الوقتي باكلي رغيف عيش وتلاقيني بصوت من بطني ولا كإني واكله 20 رغيف وأصلا أكلي بقى خفيف ونفسي مبقتش تيجي على الاكل مش عارفة ليه

[gogo]

عارفه ياسومه انا عندى وحده صحبتى وهى حامل مشاء الله كانت بتاكل الفرخه على الغدا علشان الطفل ينزل صحته كويسه كولى كل الى تلاقيه قدامك يابنتى خليكى نصحه

[gogo]

سومه الرنجه والفسيخ دول مش غلط وانتى حامل

[somia]

باسم الله ما شاء الله .. انا لو عملت كده الراجل هيفلس .. الفرخة المشوية ب30 جنيه تخيلي في الشهر بكام ده غير الكباب والكفته اقل حاجة 60 جنيه .. هههههههههههههه ده هيدعي عليا مش هيفلس بس ..
بصي يا جوجو انا الدكتورة قالتلي لو نفسك فيهم كليهم بس على أد نفسك وخلاص لاني في أول الحمل كنت بتوحم فيهم وكنت باكل تقريبا رنجاية أو أكثر كل يوم كان ممكن أصحى الفجرية أكل واحدة من كثر ما كنت هموت عليهم .. فانا ناوية ان شاء الله تعالى اكل بس خفيف ولو حسيت بطني تعبانة هشيل نصيبي لغاية ما أبقى أحسن باذن الله تعالى

[somia]

جوجو انتي بتختفي فييييييييييييييييييييييييييييييييييييييييييييييييي ييييين؟؟؟