تجمع حوامل ليبيا

[ام لقمان]

اهلين حكومه
مراحب باهل الزاويه
انشالله ربى يرزقك عن قريب وتبدى تتوحمى واحنا انعلق
آآآآآآآآآآآآآآآآآآآآمين

[غرام الغالي]

سلام
بنات ان شاء الله اموركم تمام
ام سعد
الف الحمد لله على سلامتك و ان شاء الله صحتك و امورك تمام
الله ايخليه لك يارب و يجعله من عباده الصالحين البارين يارب

[غرام الغالي]

اية
منورة التجمع و ربي يخلي اسولة و يجعلها من عباده الصالحين
و الحمد لله عملية بلا بنتوات افضل و الله اعلم
حكومة مرحبة بيك و ان شاء عقبالك

[ام لقمان]

اهلين بالزاويه واهلها
يارب يا حكومه ما يمر هالشهر الا وانتى تتوحمى واحنى انعلقوا

[غرام الغالي]

سؤال الى اية و ام سعد
شن درتوا في تطعيم البيبي؟
نعرف انه عند الولادة في تطعيمة ياخذها المولود
و لو الولادة في مستشفى خاص كيف ايصير في هالتطعيمة(اللقاح)؟؟؟
و اللقاحات الاخرى اللي بعد شهور كيف تعرفوها؟؟
عطوكم كتيب خاص بالتطعيمات و مواعيدها؟؟؟؟
و التطعيم في العيادات المجمعة و الا الخاصة فيها؟؟؟

[غرام الغالي]

ام لقمان كيف الحال انا من بنغازي و انت؟؟

[ام لقمان]

مرحبتين حكومه
ربنا يعطيك مافى بالك

[ميمونة]

ياهلا ومرحبا حكومه منوره بين خوتك


ام لقمان تشرفت بيك وبااهل زليتن

غرام/كيف حال الحمل معاك ربي يسهل عليك وتجيبي بالسلامه

[ام لقمان]

تشرفنا غرام
شن هالاسم الصقع
بنات وين الناس البطوطات الى مايقدروش ايعوموا(( اعيون))؟

[ام لقمان]

كلا انى النت عاملتها معاى
نكتب ونعاد
ميييييييييييييييييييييييييييييرنا بنقولك عندنا فى زليتن دكتور ممتاز فى علاج حالات الاجهاض المتكرر والى يقولوا ان سببه الجرتومه واجدات حملن على ايديه اسمه (( الدكتور مصطفى عقيل)) كان تقدرى بالكى ايكون سبب للفرج

[ام لقمان]

توا سلامات
قبل ما اتطفوا الضى

[ღॐ آية ღॐ]

سؤال الى اية و ام سعد
شن درتوا في تطعيم البيبي؟
نعرف انه عند الولادة في تطعيمة ياخذها المولود
و لو الولادة في مستشفى خاص كيف ايصير في هالتطعيمة(اللقاح)؟؟؟
و اللقاحات الاخرى اللي بعد شهور كيف تعرفوها؟؟
عطوكم كتيب خاص بالتطعيمات و مواعيدها؟؟؟؟
و التطعيم في العيادات المجمعة و الا الخاصة فيها؟؟؟

غرام كيف الحال والله يبارك فيك
وعقباليك
وبنسبة لتطعيمة موجودة بس في المستوصفات العامة
طعمتها يوم طلعت من المصحة في مستوصف وعطوني كتيب
والممرضة لما طعمتها كتبتلها موعد التطعيمة الجاية وهاكدا
في كل تطعيمة يكتبو موعد التطعيمة الي بعدهآ..

[ღॐ آية ღॐ]

حكومة
نورتي التجمع وربي يرزقك بلحمل التابت السليم
عاجل غير اجل يارب
اللهم اميييييييييييييين

[ام وسونة]

السلام عليكم

كيفكم حبوبات اني مشتركة في المنتدى جديدة

ونقول لكل الحوامل ربي يسهل عليكم واللي جابت الحمدلله على سلامتها

واني حابة نهدرز معاكم شوية ونبي مساعدة

[ميمونة]

هلا أم وسونه منورة بين هالشمعات

[ام لقمان]

آيه شن بنيتك عياطه والا هاديه؟ربى ايخلهلك ويخليك ليها

[ميرنا]

كلا انى النت عاملتها معاى
نكتب ونعاد
ميييييييييييييييييييييييييييييرنا بنقولك عندنا فى زليتن دكتور ممتاز فى علاج حالات الاجهاض المتكرر والى يقولوا ان سببه الجرتومه واجدات حملن على ايديه اسمه (( الدكتور مصطفى عقيل)) كان تقدرى بالكى ايكون سبب للفرج

والله ان شالله اذا كان ربى قدرنى نمشيله انى اختى كل ما تعطل المدرسة تاخذ صغارها وتمشى لعربها فى زليتن بس قوليلى ياام لقمان الدكتور مصطفى ما عندش ايميل انراسله

[ميرنا]

آية وين ها البنوتة الصقع قالو سمحة زى بوها صح

[ميرنا]

ام وسونة انستى وان شالله وجهك خير علينا وان شالله خشيتى ومعاك الفرج لى خاطرها فى الحمل تحمل ولى خاطرها فى ولد اتجيبا ولى خاطرها فى حوش ابروحها تسكن ولى خاطرها يزوجن صبياتها اتريح منهن

[ميرنا]

ام السعد ربى يحفظلك و ان شالله يشيلك للحج انتى وبوه

[ميمونة]

صباح الخير
ميرنا شن الأمور

[نسرينا]

صباح الخير

كيف حالكم ؟؟؟

.

[ميمونة]

هلا بالقمر سرينا وينك يابنت شن حالك من البرده انشاءالله تمام

[ღॐ آية ღॐ]

السلام عليكم
ميمونة ونسرينا
منوريييييييييييييين
شن اخباركم وكيف مدايرين ..!!
انا للاسف بديت نعاني في الاكتئاب مخلطه عليا قعدة بروحي
وقلت الصلاة مدايرتلي ضيق نفسي..
ومع قلت النوم والله نحس في عمري مخنوقه
ماما روحت من يوم الخميس قعدت نعاني في صغاري والحوش بروحي وراجلي يخدم واليوم بيتاخر
يارب عيني وعطيني الصاحة ونقدر نعاني حوشي وصغاري يااااااارب

[ام قصى محمد]

hwaml25ميمونه الليمونه وين كنتى غاطه
hwaml7مرحبتين نسرينا حتى انتى
وينك ليا زمان ما شفتلك مشاركه
hwaml36من شاف عاشقه والله اشتقت لها عععععععععشوق
hwaml03ميرنا غاليه انتى مش درناويه
hwaml13ايه وين صوره الصغيره وشن دايره معاك معبتك
hwaml03ام لقمان مرحبه بيك

[ღॐ آية ღॐ]

ميرنا كيف الحال
اسولة طلعت تشبه لي بوها وخوها
بس بيضه زي مامتها ..
ام لقمان الايام الي فاتو كانت هادية بس امس واول امس مارقدتش باهي من بطنها
الغزات الله يرزيني فيهم مهبلينهارغم اني والله ديرا بالي على مكلتي لا مشروبات غازية
ولا بقوليات ولا حلبه بس
حليب الام من ربي فيه نسبة غازات عاليه
ربي يعينها...

[ღॐ آية ღॐ]

ام قصي
نورتي اسولة بخير بس متعبينها الغزات وحرميني النوم
وصورتها حنحطها في اقرب وقت بادن لله..

[أم سعد]

السلام عليكم

مساء الخيرات

كيف حالكم جميعا

[ღॐ آية ღॐ]

ام سعد
صباح الانوار كيف حالك
وشن مدايرة مع سعوود
ان شاء الله صحته تمام

[ღॐ آية ღॐ]

وين عيون وعاشقة وام اسيل وسورينام
مغطسين ؟؟
ليبيا قلبي مشتاقين وينك وشن اخبارك؟؟؟

[أم سعد]

أهلين أيوتة

والله باهي الحمد لله

أهو ماشية أموري معاه جاي صغيرون هلبه

ماتعرفي كيف تخشي فيه

بس ماشية الأمور

[حبل الوصل]

اهلين نسرينا وميمونة
اية التعب لازم منه لكن امك روحت عنك بدري قداش ليك جايبة انتي
ام سعد اهلين وماشاءالله عليه سعد

[أم سعد]

أهلين حبل الوصل .. كيف حالك ؟؟ وكيف حال الصغيويرة؟؟

[ღॐ آية ღॐ]

ربي يحفضهولك
كم جي وزنة اسولةمشاء الله تلاتة كيلو و
800وضريفة هلبا؟؟

[ღॐ آية ღॐ]

حبل كيف حالك وحال صغيويرتك؟؟
لماروحت ماما قعدة ما سبعتش والله بكيت لين عيوني ورمو..
واليوم اندير 11 اليوم جايبة

[أم سعد]

أية .. ولدي أقل من بنوتك بكيلو بالضبط

2.800 تخايلي شوفي روحك

[ميمونة]

بعيد الشر عليه اسوله

امك روحت بكري

[حبل الوصل]

الله يسلمكم يارب انى تمام وصغاري كويسين

[ღॐ آية ღॐ]

يا حبيبي صغيرون
ديري بالك عليه انا والله تقولي بكره
نسيت التشميل والغسيل نحس فيها جت اصغر من خوها رغم انهم
نفس الوزن لاكن ضريفونها وكل شي فيها صغير هلبا ..
ميمونه ماما روحت بكري على قد ما ترجيتها تزيد تقعد
ما بتش... والله نفسيتي دمار منضم الحوش ونطيب الغدي لين روحي
نحسها بتطلع ربي يعين وخلاص....

[ღॐ آية ღॐ]

ان شاء الله ديمة بخير حبل الوصل..
..بنسبة لي صورة اسولة حنحطها بعد ما ننقبلها ودانها
ونلبسها الخرصات نصورها صورة حلوة ونحطها
لعيونكم..

[طرابلسيه]

السلام عليكم ورحمة الله وبركاته ^_^
ماشاء الله ولا حول ولا قوة إلا بالله العلي العظيم
مبروك ألف مبروك البيبيات الجدد:-)مبروك آيه:-)مبروك أم سعد:-)مبروك ليبيا قلبي..
كيف حالكم ياباقي العضوات
عاشقة البازين شن صار فيك حصلتي الطريقه ولامازال؟

[طرابلسيه]

أكيد نسيتوني..اني سجلت معاكم من فتره وماعنديش الا مشاركه وحيده ولا هما زوز لأني ماعنديش نت في حوشي،الا نت النقال،بس نتابع معاكم^_^الغاليه غرام أكيده انتي غرام اللي نعرفها^_^غرام بنغازي ألف ألف مبروك حملك ياراقيه وربي يتمملك بخير وتولدي بالسلامه وتشوفي عيلك بين يديك صحيح معافى:) انتي وكل الاخوات الحوامل وربي يرزق اللي يستنوا..قولوا آمين..ويا عضوات انزلوا عليها راهي فالحه في المطبخ ماشاء الله لاقوة الا بالله ^_^..

[ღॐ آية ღॐ]

طرابلسية نورتي
والله يبارك فيك والعقباليك

[أم أجنادين 80]

مساء الخير

ربي يسمع منك ام لقمان

النور نورك حبيبتي ميمونة

[أم أجنادين 80]

الف ألف مبروك البيبيات الجدد

وعقبال باقي البنات

[طرابلسيه]

ربي يبارك فيك ايوته اني ولله الحمد والمنه هذا وين خشيت شهري..أهلا بيك حكومه:)

[ميراس]

السلام على كل الحلوين الموجودين انستوا المنتدى يا طرابلسية وحكومة ام قصى انا عمرى 35سنة ومشكلتى هرمونات الحليب لدرجة اصابنى ورم حميدى بالغدة النخامية وانا انعالج فيه من سنتين وتوا الحمد لله انخفض اشوى قولولى وين عاشقة البازين

[ميراس]

طرابلسية وحكومة انتو من وين بالضبط

[طرابلسيه]

تسلمي ياميراس ،اني اصلي مصراتيه وحتى راجلي مصراتي بس مولودين وعايشين ومتزوجين في طرابلس:)

[ميمونة]

طرابلسية هلا بيك من جديد
أيوته ياعمري ربي يعاونك والله أكيد أمك مشتاقة لبوك غير ماتبيش تقولك _ربي يحفظهالك

[سورينام]

السلااااااااااااااااااااااام عليكم .. كيف حالكم كلكم كلكم كلكم

[سورينام]

ماشااااااااااااااااءالله تبارك الرحمن .. أم سعودي يتربى في عزكم ودلالكم انشاءالله وتشوفيه عريس يااااااارب وتحطيلنا صورته نشوفوه حتى احنى .. رغم ان الشوف بينقص بعدين هههههههههههههههه

[غرام الغالي]

اية
مشكورة اختى الغالية على الرد و الاهتمام و انا شايلة حمل التطعيمات

طرابلسية كيف الحال و يريت نتعرف؟؟
عاشقة الصحراء
و ينك ان شاء الله غيابك خير
ام سعد
خلي بالك عللى رضاعة سعودي و بعدها لما يبداء بالاكل ركزي على كل حاجة صحية و تو اتشوفيه يبقى ما شاء الله عليه الوزن مش مهم المهم الصحة ربي يخليهولك
ميراس
ميرنا
ليبيا قلبي
ام لقمان
ام محمد و قصي
و كل البنات ان شاء الله اموركم تمام

[سورينام]

أيوتة الكتكوتة ... الف مليون الحمدالله على سلامتك وسلامة بنوتك وانشاالله من قسمك وتونَس وخيها على طاعة الرحمن انشاالله .. وبالنسبة للعملية كلهم لحام توا معاش ايديرو في البنتوات اني عملياتي الزوز لحام والحمد لله ولا في ليهم أي أتر ومش متعبيني ابد ابدا بس في الأول يبو المحافظة وما تقيميش الرزين ابدا ابدا رديييييييييي بالك بالذات اول 6 شهور وانشاء الله تمشي امورك تمام وأي استشارة بخصوص العملية تفضلي وخيتك وليت خبرة ... والله الا حاجة عااااااااااااااااااادية واحسن الف مرة من التمزريط الطبيعي وهاذيكا الدنيا اللي تولي زي الشكارة (احنا قاعدة امورنا زي البنيات ضيق ضيق ضيق هههههههههه)

[سورينام]

عيوووووووووووون .. وين مغطسة .. انشاالله خير .. والا زعما طهرتي حمودي وحاصلة .. المهم انشالله ما في سو

[سورينام]

مرحيا غرام .. كيف الحال والاحوال ... انتي بكرا والا .. سامحيني ما نعرفكش كويس

[سورينام]

والله ولدي عملها وغطس حاشاك في الاسهال .. خلي انوض نغيرله ونرجع .. حااااااااااااالة وخلاص شورهم السنون ؟؟

[ღॐ آية ღॐ]

سورينام منورة
وعندك الحق افتكيت من البنتوات
ونحس في عمري بنغسل بكري ولله الحمد
بس سؤال امتى رجعتي لحياتك الطبيعية مع زوجك ؟؟
اول ما ننضاف او نستنى للاربعين..

[ღॐ آية ღॐ]

حكومة ان شاء الله تولدي على خير
انتي بكري او عندك اصغار؟؟

[ღॐ آية ღॐ]

بنات من عندها معلومه امس واليوم لاقيت في شمال بنتي دم
من جيهت الصرة ؟؟
والله خايفة عليها في ايوب مصارش هكي
نمشي نعاينها ولا عادي ..؟؟

[سورينام]

آية .. شكر حبيبتي النور نورك ياغالية .. انتي قاعدة توا والا لاااااااا؟؟

[طرابلسيه]

أيوته الدم شويه؟نقصد هل مجرد قطره او قطرتين؟لان ممكن تكون أسوله ماشاء الله حركيه وهذا خلا قطرة دم تبان،ياريت لو فيه وحده من العضوات تجاوب على سؤال آية

[سورينام]

سورينام منورة
وعندك الحق افتكيت من البنتوات
ونحس في عمري بنغسل بكري ولله الحمد
بس سؤال امتى رجعتي لحياتك الطبيعية مع زوجك ؟؟
اول ما ننضاف او نستنى للاربعين..

أني في رأي يا ايوته استني للأربعين أحسن حتى يلتئم الجرح كويس من داخل .. وآهو بالمرة يزيد يستاحشك ابو ايوب شويتين hwaml02
بالنسبة ليا أني والله خليته في جرتي لين سكرت لشهرين لين جتني دورة الأربعين باش عرفت راسي من رجليا من ناحية المانع hwaml11
وربي ايقدرلك اللي فيه الخيييير يااااااااارب

[ღॐ آية ღॐ]

انا قعدة سورينام
الدم شوية طرابلسية يعني قطرة تقريباً..

[سورينام]

بالنسبة للدم يا أيوته لو جهة الصرة أكيد منها .. ماتخافيش منه لأن الشدادة متاع الصرة كان تحركت مرات الجزء اللي لاصق فيها يكون تحته شوية دم لأنها لما اتطيح نلقو تحتها حاشاك دم مولي زي الأسود لأنه يبس .. ماتخاااااااااافيشش وطهور انشاالله لكن لو تكررت مرة تانية .. اطمني عند دكتور وخلاص

[ام قصى محمد]

اهلاين ايه الله يعاونك

[ام قصى محمد]

مرحبتين سورينام

[ام قصى محمد]

شوفى ايه ربى دار لكل حاجه عبره يعنى حتى وكان جبتى طبيعى لازم تربعنى قبل ما تقعدى مع راجلك وبعدين حلك رايفتى ههههههههه

[سورينام]

ليبيا قلبي . هيا خشي عاد طمنينا عليك وعلى بنوتك وقوليلنا شن بتسميها وحطيلنا صورتها راهي أم سعد اتدور لولدها في عريس وآية هوينها اتكم في بنتها وتلبسلها في الخراصات والذهوبات باش اتصورها لأم سعد هههههههه

[ღॐ آية ღॐ]

اللهم امين
هو صبر الهلبا قعد الشوية..

[ام قصى محمد]

وين طلاعتو

[سورينام]

أهلييييييييييييييين أم قصي كيف الحال والأحوال وكيف ال البنوتات اللي مش مخليين بوهم يكتب واجبه ههههههههههههههه عليك وعالأكتيفيد مرة مرة ما ايضرش ههههههههههه

[ام قصى محمد]

تعرفى ايه ذكرتينى لما جبت جنى بس طبيعى امى قعدت معاى 5 ايام بس والله اليوم الى مشت فيhwaml78ه بكيت نين قلت بس

[سورينام]

نسريناااااااااااااااااااااا .. وينك وييييييييييين وين وشو الأخبار .. خشيتى شوية وطلعتي انشاالله م فيش حاجة معكراتك يا غالية

[ام قصى محمد]

والله بوهن حتى لو رقدن راح يسقط لانى زعلانه منه هههههههههههههههه

[سورينام]

والله يا أم قصي ياسرهم امهاتنا عانونا ونبوهم يعانو حتى صغارنا .. واني من رأي المرا النافس وبالذات اللي جايبة بالعملية تقعد بروحها خيرلها باش ما تتعودش عالقعاد لأن العملية تبي الحركة والمشي باش تبرا بسرعة

[ام قصى محمد]

ايه شكلها طلعت مسكينه ربى يكون بعونها الايام هذى

[سورينام]

ليييييييش زعلاااااااانة يا شريرة .. خلي الراجل ايدير وجبه والمثل ايقول لا تؤجل عمل اليوم الى الغد .. بالك يعلق قصي ههههههههههه

[ام قصى محمد]

انا نفسى مقدره امى انها والله تمت بينى وبين حوشها عشان هكى ما مسكتها

[سورينام]

والله ربي ايكون بعونها توا وبعدين .. لأن العيل كل ما كبر كبر التب معااااه

[ام قصى محمد]

انا الحمل موقفته حاجه شهرين لعند ماتستقر امورى بعد الرمى بش مش عارفه ايش المانع المناسب بنسبه للواقى مش راضى عليه بكل

[سورينام]

كبر التعب معاه

[ام قصى محمد]

تعرفى انا لى مده نخش وما نلقى فى حد باهى الى لقيتك

[سورينام]

باهي خليك عالمانع الطبيعي .. رغم انه مش مضمون ويبي من يتحكم في نفسه ههههههههه وهاتي من يقدر يتحكم من الرجاله هاذيكا اللحضة ههههههههه

[ام قصى محمد]

سورينام انتى شن عندك يعنى فى اولاد

[ام قصى محمد]

حتى المانع هذى مش عاجبه لا يبى يساعدنى ولايبينى نضنى

[ام قصى محمد]

الرجاله يبو حياه من غير تعب ولايقدرو تعبنا الا مره مره

[سورينام]

اني والله مشيت فترة على حبوب منع الحمل متاع المرضعات لكن بعد ماخذيتهم 3 شهور وقفتهم .. يا اوخيتي هبلووووني وقفولي الدورة نهائيا +اني وليت اعصااااااااااااااب معاش متحملة صوت ولا دوشة ولا حتى هدرزة تخيليييي

[ام قصى محمد]

المشكله فى الحبوب انى نبى نعالج سنى واجعتنى وهم مايبوش معاهم دوا وخاصه المضاد

[سورينام]

خلاص ماعندكش حل الا حبوب وخلاااص .. بعدين ليش ما يبيكش تضني .. زي تو زي بعد شهرين نحس فيه مش فرق هلبة ..

[ღॐ آية ღॐ]

سورينام هي صرتها طاحت من خامس يوم
لاكن الدم صب اول امس واليوم..
غدوة تو نمشي نعاينها وربي يستر..

[ام قصى محمد]

المشكله انه هو معش يبى نجيبو راضى بالبنات وانا الى نبى نجيب يقولى ديرى مانع زى اللولب بس انا نبى حاجه ما طولش فى حملى الى رميته حملت فجأه وكان وليد والله وجعنى وتوا هو مقتنع ان البنات يكفن

[سورينام]

الحل الأخير يا ام قصي ... هههههههه ديري معاه عركة وبعد شهرين صالحيه هههههههه لا لا انبصر عليك ربي مايجيب عراك .. لكن والله فترة شهرين مش هلبة تقدري تمشيهم بأي طريقة ..

[ღॐ آية ღॐ]

ام قصي ربي يكون في عونك
بنسبة ليا معنديش طقة غير في الوقي
لا حبوب ولا مانع طبيعي
وهو ربي هديه ومستريح للواقي زيني
بعد عام انشاء الله بنركب لولب
لان الدكتور قالي بعد العمليه بعام ارجعي نركبهولك
ان شاء الله...

[ام قصى محمد]

ايه اسفه بس كيف صرتك طاحت مش فاهمه

[ام قصى محمد]

ماشالله عيني عليك بارده نحن جربنا الواقى يقول يخنق فيا ههههههههههه

[سورينام]

|أيوته معنها ايشوفها دكتور احسن باش تطمني لكن ما تخافيش لأن الصغار سلامتهم لما يبدو مواليد توقعي تشوفي كل شي دم قشور لطعات ملونات .....الخ مايكبرو لين نتبهدلو برعايشهم ربي يحفظهم

[ام قصى محمد]

okايه قصدك صره البيبى عادى هذا معناها انها تتغذى كويس

[سورينام]

ام قصي انتي سايريه توا وفوتي فترة ماتحمليش لأنك حتى كيف رامية علأقل ترتاحي وبعد فترة انشاالله ربي ايسخرلك بالولد ورح تشوفي راجلك كيف يفرح بعدين والله الرجاله على ما ايديرو في روحهم عادي ومقتنعييين لكن من داخل ما في راجل مايبيش ولد

[سورينام]

اني نستأذن شوية وراجعه ..........

[ام قصى محمد]

تصدقى انا نريد انجيب ولد لانى لما جبت بنات وخاصه الثانيه قعدو ناس الى بالى بالك يجرحو فيا مع انى لا انا ولاراجلى متضايقين عشان بنات وبعدين انا نحس الولد حمايه لاخواته يلقنه بعدين انشالله

[ليبياقلبي]

كيف حالكم شن اخباركم انا الحمد لله ولدت بالعملية وجيبت بنوتة حلوة اسمها ناريز بس توا انا تعبانة من العملية والبنوتة عندها صفير وعندها غازات

[سورينام]

ماشاااااااااااااااااااااااءالله يا ليبيا على اسمها بنوتك ربي يحفظها .. ناريز حلو بجد لكن شن معناه ؟

[سورينام]

وانتي لاباس عليك ليش تعبانة من العملية .. أكيدا خواتك وامك امببينك ومايخلوش فيك تتحركي .. ردي بالك تكتري من التقعميز والرقاد راهو العملية تبي الحركة .. وبالنسبة للبنوته كتريلها من رضعات الكمون ومية غريب وبالذات الكمون مع سكر النبات والله اني مسمياته الحل السحري لغازات الموليد ولتوا اندير فيه لولدي رغم انه وصل لستة شهور لكن الكمون ايخلي فيه يرقد في الليل وحتى الرضاعة اينوضلي مريرة والا 2 بس الحمد لله .... وبنيتك الصفير حتى هو عادي كان مش هلبة ومش واصل لصدرها ورقبتها يعني كان وجهها بس ما تعدليش ومرة مرة حطيها في الشميسة متاع الصبح ضربة ضربة للصفير وانشاالله طهور ليك وليها

[lila osama]

مشكورة أم قصي على الترحيب وأسفة على التأخير في الرد....
بالنسبة ليا أنا من مصراته وحامل في الاسبوع 33 , وحاليا أنا خايفة من الولادة

[سورينام]

عيون وينك .. خشي هدرزي عليا استاحشتك .. عندي هلللبة اسئلة على صغارك وصغاري زعما حتى هما يشبهو بعض في الطبايع ولا لا ؟؟ وقوليلي شن مدايرة سرورتك مع حمودي .. اني في الأول كانت مية مية ومش غيرانه .. وتوا مهبلتني حتي الضحك ما تبيني نضحكله ومسمياته ( أودا ) زعميتك خويا لما انشده اتقولي (ماما أودا ككا ) .. وكل ما انشده نرضعه والا بنرقده تبدا تتلصق عليا وتبوس فيا وحااااااااااااااااااالة .... ربي يستر وخلااااص

[lila osama]

عندي سؤال وهو في حد منكم يعرف وين يبيعوا في ألبوم الطفل الرضيع

[طرابلسيه]

هههههههههه جو ياسورينام،،تهبل بنوتك ربي يحفظها،حتى اني ماما حكتلي ان اني غرت زمان من خوي اللي بعدي هلبه ودرت نفس حركات بنوتتك توا هههههههههه عاد كنت اول حفيده في عيلة بابا وعيلة ماما يعني شوفي شن مقدار الدلع من جميع الجهات ههههههههه وبعدين يجيني من يزاحمني في الدلع؟هههههههه المشكله ان كنت نحبه هلبه ولازلت،تحكيلي ماما ان اول ماروحت بيه من المستشفى دسيت العابي كلهم بش مايلعبش بيهم عاد عدو جديد بنكسد عليه(سمايلي شرير)تو يولي حب كله بعدين متخافيش:)

[طرابلسيه]

صباح الخير جميعا:)
صباح الإيمان وطاعة الرحمن:)
:
المطر اتصب
اللهم غيثا نافعا..
نوضوا وحده منكم اديرلنا عصيده(وحده تتصخف)

[طرابلسيه]

زعما حنين شن صار فيها؟زعما روحت؟يارب تكون بخير..
حنييييين شكلي هكي نعرفك،كنت نعرف وحده نفس العمر ونفس الجو ونفس الضحكه متاع نياهاهاهاها ههههههه تخلي فيا نضحك بروحي بروحي،
خشي وخيتي طمنينا عليك

[ميرنا]

بنات من عندها معلومه امس واليوم لاقيت في شمال بنتي دم
من جيهت الصرة ؟؟
والله خايفة عليها في ايوب مصارش هكي
نمشي نعاينها ولا عادي ..؟؟

اية حبيبتى فى مضاد حيوى بودارة خاص بسرة النونو يبيعو فيه فى الصيدالية اشرى وديريه لها وما تخافى هذا الدم ممكن الديبر او الحفظات هم لى يحركو فى المسكة امتاع السرة اثناء حركت بنتك عادى جدا انا ديمة نشوف فى خواتى وصبيا خواتى نفس قصت بنتك وهكى ما يديرو بودارة المضاد الحيوى او التنتورة الموف يحطو فيها على السرة بعد ما تطلع دم

[ميرنا]

كيف حالكم شن اخباركم انا الحمد لله ولدت بالعملية وجيبت بنوتة حلوة اسمها ناريز بس توا انا تعبانة من العملية والبنوتة عندها صفير وعندها غازات

الف الف مبروك وان شالله بسلامتك يارب واسم ناريز حاجة صقع اسم مميز وحلو بكل ان شالله ربى يحفظها لك وتشوفيها دكتورة

[ميرنا]

مرحبتين بيك يا طرابلسية نورتى لتجمع وان شالله خشيتى علينا بالفرج

[ميرنا]

ليلى انستى وشرفتى وان شالله ربى يتمم لك حملك على خير وراكى تنسى تعزمينا على اللمة

[ميرنا]

سورنيام سهفتينى على جو بنتك لحظات حلوة ان شالله ربى ما يحرمنا منها

[ميرنا]

تصدقى انا نريد انجيب ولد لانى لما جبت بنات وخاصه الثانيه قعدو ناس الى بالى بالك يجرحو فيا مع انى لا انا ولاراجلى متضايقين عشان بنات وبعدين انا نحس الولد حمايه لاخواته يلقنه بعدين انشالله

ام قصى كلامك صح الولد حماية لاخواته حاولى ما تاخري الحمل عندما تجيك الدورة المرة القادمة احملى وانا لو فى مكانك نحط العدد لى نبيه 10 او 11 ونسكر هههههههههههههه صح بيش يسكتو
hwaml10

[عاشقة الصحراء]

السلااااااااااااااااام عليكم ... كيف الحال والأحوال .. وشكراً لكل من سأل عليا وتنشد عليكم الصحة ياااااااااارب .. استاحشتكم موت وطول فترة غيابي في بالي وخاطري نشوف تعليقاتكم لكن الضي يهرب هلبا هالفترة ونت التليفون مانحباش بكل ...
المهم اني غبت لأن يوم الأحد كان الضي هارب طول النهار وفي الليل كان عيد ميلاد راجلي وطبعاً مافضيتش ( زي ما انتو عارفين الاحتفال الكبير امتى يكون ههههههههه) تاني يوم الاتنين ماجيتش للخدمة وخدينا إجازة من الخدمة اني وراجلي مشي معاي للدكتورة وخش وشاف النونو لأول مرة في الجهاز ( طبعاً مانحكيلكمش عالمشاعر الجياشة يومها ) ماشالله عالنونو كبر أكتر ويتحرك ويمد في رجليه وايديه ( ربي يحفظه يارب ونشوفه بين ايديا ) ...
المهم حبيباتي بعد ماطلعنا من المستشفى مشينا فطرنا وبعدها مشينا للمدينة القديمة درسنا السيارة وخشينا من جهة البحر تهببببببببببببببببل درنا فيها لين طاحو رجليا ولقينا روحنا في الساحة الخضرا .... طلعنا من غادي مشينا لبن عاشور خدينا ( جيلاطي ) قداش ليا خاطري فيه .. وبعدها مشينا للحفرة امتع السمك وتغدينا غدوة سمك معتبرة لين انفجرت بطني ههههههههههههه وخلاص بعدين وصلته للعيادة ومشيت لحوش أهلي ...
اليوم اللي بعدها طبعا واللي هو أمس أول مافتحت عيني حسيت براسي رزيييييييييين كأن فيه حجر لين عيطت من الوجع وجسمي كله يوجع فيا ( شكله خديت بردة ) وقعدت في الفراش طول اليوم ...
وهذا الملخص ياحبيباتي ...

[غرام الغالي]

سورينام
اهلين بيك و فيك انا بكرة

[غرام الغالي]

سورينام
كيف الحال ...انا بكرة

[عاشقة الصحراء]

ليبيا ..ألف ألف مبروك وتتربى في عزك يارب .. لكن شن معناه اسم " ناريز " حلو ومميز ومن اللي اختاره ؟؟؟
سورينام كيف حالك ؟؟؟ وباهي باهي صحيتي على طريقة الطبيخة هربتي بيها بتطلع في عين النونو وفي رقبتاك بعدين ههههههههههههه
أم قصي حبيييييييييييييبتي استاحشتك موت وحسيتك اكتر وحدة فقدتني
شن أخبارك ؟؟ وشن هالمغامرات ؟؟ معقولة غيبتي دارت معاك كل هذا ههههههههههه
المهم حبيبتي بالنسبة للحمل معليشي استني هالشهرين مش هلبا بكل ومنها حتى ترتاحي لأنك توا رامية وبالنسبة للموانع ماننصحكش بكل بالحبوب والله يقلبولك كيانك على أعصاب وزيادة وزن وشعر في الجسم .. حاولي تتبعي الطريقة الطبيعية واحسبي أيام الدورة واعرفي إباضتك امتى .. وطبعا مش معناها تحرمي راجلك في أيام الإباضة وتقوليله لا مافيش ..دلعيه ودوبيه وجننيه لكن في الآخر خليه يكمل برا ... ماتزعليشي وفوتي هالشهرين على خاطره وحتى على خاطرك انتي ..
آية العسولة يا أم أسولة .. ربي يخليهالك يارب .. وبالنسبة للدم زي ماقالتلك ميرنا شي عادي وفيه بودرة تجيبيها من الصيدلية وحاولي تغطي الصرة هالفترة باش معاش يحتك بيها الشمال ( حاشاكم )
حكومة تشرفنا بيك ..
طرابلسية ... مرحبتين بهالقامة وبهالعين هههههههه شرفتينا حبيبتي
وبالنسبة لطبيخة الفول امتع البازين ماعدل عليا حد تقولي ندور في حاجة معجزة هههه والله هبلتني وشكلها بتطلع في عين النونو وفي رقبة التجمع بعدين ههههههههه
فرحيني وقولي تعرفي تديريها ..؟؟؟
غرام الحلوة كيف حالك ؟؟
ميراس حبيبتي لا باس عليك وربي يشفيك ياااااااااارب .. تنشد عليك الصحة ياعيوني
أم لقمان كيف حالك ياحبيبة .. قوليلي عالإكتئاب شنو ؟؟؟
حبل الوصل .. انشالله ربي يشفيك يارب والتكيس يبي صبر ووقت باش يخف .. ربي معاك يارب
عييييييييييييييييييييون الحلوة السموحة .. وينك وشن أخبارك ؟؟ تسلمي عالمواضيع الحلوة ياقمر ..
ميرنا مع انك تسلمي عالكل إلا عليا ... كيف حالك وشن أخبارك وربي يفرحك ويعطيك اللي في بالك يارب ..

[عاشقة الصحراء]

أم سعودي ... بسم الله ماشالله على وليدك ربي يخليهولك ويتربى في عزك يارب..
بنسألك بما انك بكرية شن شعورك ؟؟ وشن تحسي في روحك تحبيه ولدك ولا مازال مافيش مشاعر ؟؟؟ وشن مداير فيك وجع العملية ؟؟ظ
احكيلي كل شي بالتفصيل حبيبتي

[غرام الغالي]

اية
طمنينا على البنوتة و صرتها ان شاء الله خير يارب

[غرام الغالي]

عاشقة الصحراء
سلامتك من البرد و ما تكتريش المشي مازال بدري عليك
منورتينا اليوم

[غرام الغالي]

ليبيا قلبي
نورتينا باخبارك الطيبة و ان شاء الله كم يوم و معاش تحسي العملية و اسم بنوتك غريب شن معناه
ربي يحفظها و يجعلها من عباده الصالحين البارين

[ام قصى محمد]

سلامات بنات ايش الاخبار اهلاين غرام

[ام قصى محمد]

عاشقه ياعمرى وحتى انا انشغلت عليك ثاريتك عامله فيلم حب مع العاشق وتاركتنا الله يهنيكم ويدوم المحبه بينكم ويفرحك بالبيبى يارب وتشوفيه بين يديك

[عاشقة الصحراء]

النور نورك ياغرام .... شن أخبارك ؟؟؟
والله تعرفي مشيت من كتر ما مليت من الروتين اليومي .. خدمة وحوش و علي قد مانطلع راجلي مايطلعش معاي لأنه يخدم فترتين صبح وليل وماصدقت درنا يوم خاص بينا ...تسلميلي ياغالية

بنقولك حاجة تضحك .. كل مانشوف كلمة البارين اللي كاتبتيها نتخيل فيها بازين ههههههههههههه
بيهبلني البازين ... ياناس معقولة وحدة في ليبيا ويدير فيها البازين هالحالة ..؟؟؟
تقولي في أوروبا عايشة من كتر مامسهفني البازين ههههههههههه

[ام قصى محمد]

شوفى عاشقه حسيتى جسمك متكسر لانك مشيتى واجد خفى على روحك مازلتى ياعمرى راكى تضرى نفسك وبعيد السو عليك

[عاشقة الصحراء]

أم قصي حبيبتي ... شن أخبارك وشن دايرة ؟؟؟
ههههههههههه فيلم حب وربي يديم علينا يارب ... لكن بعدها مرضت ياناري ههههههههه يافرحة ماتمت وخلاص ... شن دايرة غداك ؟؟؟
تعرفي في العمل وميتة من الجوع والمطاعم اللي جنبنا كرهتهم ومعاش نحب السندوتشات من برا

[ام قصى محمد]

ميرنا وين غطيتى رايفت عليك معش تلاقينا تعرفى موضوع انى نجيب ولد شاغلنى وبحثت على الموضوع وشفت انه فيها نظام غذا معين وايام جماع ووضعيات معينه وحتى والله اعلم الجدول الصينى استغفر الله لما شفته صدق

[ام قصى محمد]

قوليلى انتى شن تشتغلى بالضبط زايطه فى العمل هههههههههههههه انا دايره غداى طبيخه مشكله بيضا بالدجاج تفضلى

[ام قصى محمد]

بولينا مرحبتين يبك وطرابلسيه انشالله امورك بخير

[غرام الغالي]

ام قصي و محمد
الله ايخليك سخبارك
انا خايفة من الالتهابات هلبة لانه في البداية قالوا عندك و عطوني علاج لكن؟؟؟ خايفة منه
لو في حد صاره الالتهابات مثلي من البنات يفيدن؟؟
عاشقة البازين
الله يسترك انسيه نين تحصليه التوحم و الوحم مشكلة بجد
ان لما يسالوني شن تبي تقول ..... بيتزا.................ههههههههههههههههههه

[ام قصى محمد]

اية حبيبتى فى مضاد حيوى بودارة خاص بسرة النونو يبيعو فيه فى الصيدالية اشرى وديريه لها وما تخافى هذا الدم ممكن الديبر او الحفظات هم لى يحركو فى المسكة امتاع السرة اثناء حركت بنتك عادى جدا انا ديمة نشوف فى خواتى وصبيا خواتى نفس قصت بنتك وهكى ما يديرو بودارة المضاد الحيوى او التنتورة الموف يحطو فيها على السرة بعد ما تطلع دم

ايه الكلام الى قالته ميرنا صح البودره هذى زى السحر hwaml03

[ام قصى محمد]

الالتهبات انا ذوبونى فى بنتى البكريه والله نقعد نبكى من الالم مافرحت بحملى بكل

[عاشقة الصحراء]

تسلميلي يا أم قصي ياقمر ... يالله معاش بنديرها وبنمشي هكي مسافات ..
تعرفي متضايقة من حاجة ومهبلتني حماتي اللي هي وحيدة أهلها ومواليد 84 ومش متزوجة
المهم جوها تمام معاي ونحبوا بعض وماشالله عليها إلا في حاجة وحدة .. مرات نحس فيها من كتر ماتحبني ولا مافهمتش شن نفسر تبي تتملكني .. ديما تحب تكون معاي وديما مع بعضنا حتى في الخدمة نخدموا مع بعض وكان مشيت لحوش أهلي تقولي نبي نمشي معاك وتخيلوا لما طلعت مع راجلي وقلنا ان يوم خاص بينا تغير شكلها وتضايقت وقعدت تقوللي باهي شن بندير من غيرك غدوة ... قلتلها عادي خودي راحة مني معليش يوم ويفوت .. وقبلي كانت مهبلة سلفتي بنفس الحالة لين جيت اني .. لكن سلفتي مشردتها أكتر مني كانت لأن تحب خوها التاني ومتفقين مع بعض اكتر من علاقتها براجلي .. المهم سلفتي مزينة وتقعد طول اليوم برا يعني مافيش عندها غيري شادتها في جرتي وتحب تعرف عليا كل شي وتحب كل شي نديره نقولهولها ومسكينة بالفعل تحبني ونحبها لأن لما تشوفني متضايقة ولا عندي مشكلة توقف معاي هلبا لكن خنقتني من كتر ماتلحق فيا في كل شي ... واني طبعا إلا في طلعتي مع راجلي مدايرة خط أحمر ومانقوللهاش تعالي معانا ولو قلتلها ماكانتش حتقول لا ... حتى اهلى لاحظو الموضوع ..
قولولي كيف ندير ؟؟؟

[غرام الغالي]

ام قصي و محمد
سلم ايدياتك على الغذاء
خطرتي عليا الطاجين الابيض بالدجاج
مرات الوحدة تحير فيه شن؟؟؟؟؟؟؟؟؟؟؟؟؟

[غرام الغالي]

ام قصي و محمد
المشكلة اني مش حاسة بيهن بكل الا لما كشفت عليا الدكتورة قالت انت كيف مش حاسة بيهن
شن الحل

[ام قصى محمد]

تعرفى هى مسكينه شكلها ما عندهاش اصحاب حاولى تخليها تكون صدقات بعيد عنك وانتى عوديها بشويش بشويش انك مستقله عنها ممكن هى تحبك ومفسره مشاعره غلط ومتمسكه فيك مره مره اطلعى مع راجلك من غير ما تقوليها وبعدين احكيلها وامشى لهلك وما تخبريها نين ترجعى هكى تفهم انك مستقله عنها ومثلا لما تجيك فى حوشك خليها تحكى مع خوها وفى نص الحوار اتركيهم وعدى اشغلى نفسك بعيد عليهم طبعا مع مراعاه مشاعرها بالابتسامه

[عاشقة الصحراء]

امممممممممممممممم جبتوا سيرة الماكلة ... لكن للأسف كرهت الدجاج بشكل غير عادي ومعاش نحب نشوفه حتى في الشارع ههههههههههههه
حبيبتي أم قصي انا نشتغل في مكتب خدمات تعليمية يعني نراسل في الجامعات اللي برا ويردوا عليا بالقبول ونكمل للطالب اوراقيه المطلوبة باش تخش للسفارة وتطلعله التأشيرة ويتوكل ..
وقرايتي بتبدا يوم 1/ 3 انشالله علي خير

[ام قصى محمد]

الالتهبات وصفتلى مره دكتورتى لبوس تحاميل يعنى ومن يومها من سنتين نسيتهم

[ام قصى محمد]

انتى زى ما صارلى فى بنتى الثانيه الدكتوره هى الى عرفتهم انا ما نحس فيهم بكل بس دكتورتى ايامها خوفتنى انهم مرات يأثرو على حملى ويسببولى ولاده مبكره

[عاشقة الصحراء]

صح يا أم قصي هي ماعندهاش صاحبات لأن تربيتها ماتعودتش تصاحب ومن يومها متعلقة بأمها وزي الصاحبات ماشالله ولما جينا احنى فرحت وديما تقول ربي بعتلي أحلى اخوات ( اني وسلفتي ) .. اني نحبها وهي تحبني لكن مانحبش حد يدقق في أموري ويسألني ني بطبعي ومن يومي مانحبش نحكي كل شي يصيرلي وديما عندي خصوصيتي وحتى راجلي لاحظها فيا هالعادة .. لكن المشكلة ان نخدموا مع بعض يعني أحيانا نبي نروح عند أهلي على طول وتبدا هي معاي مش تمشي تكمل لحوشهم .. لالا تنزل معاي ..
والله ماني عارفة كيف نتصرف معاها ومانبيش نجرحها .. لكن بالنسبة لطلعتي مع راجلي ولا يهمك هاذي خط أحمر من البداية .. يعني مستحيل نسكت لهالدرجة ...
تعرفي سلفتي ميتة عليا بالضحك وتقوللي عارفة شعورك ( شماته وخلاص )

[ام قصى محمد]

هههههههههه حتى هلك انزلى وقوليلها سلميلى على عميمه بلكى تفهم

[عاشقة الصحراء]

حبيبتي غرام عااااااااااااااااااااالجي روحك لكن تحت إشراف الدكتورة يعني ماتسألي حد إلا دكتورتك .. وردي بالك علي روحك والتعامل مع الحامل يبي حذر .. لااباس عليك يارب

[عاشقة الصحراء]

والله حالة وخلاص يا أم قصي ... سبحان الله
ربي يبعتلها ولد الحلال اللي يستاهلها ويهنيها ويريحها وتريحنا ياااااااااااااااااارب واللي عندها عريس تقوللي ... ماشالله عليها حلوة وماناقصها شي هههههههههههههههههههههه

[ام قصى محمد]

تصدقى انا فى الاول صارتلى مع ام راجلى هى ما عندها بنات وانا اول مرت ولد لها فى الاول ما تضيقتش بس بعدين تمت تدخل حتى فى ايش نلبس ومن نصاحب ولمن نمشى والله خنقتنى والعلاج انى تجاهلتا

[ام قصى محمد]

تميت اندير الى ببالى مع احترامى لها
انتى انشالله تتزوج خليها تسكن لراجلها ههههههههه

[ام قصى محمد]

عاشقه تصدقى نحنا مسجلين فى نفس الشهر القلوب عند بعضها

[ام قصى محمد]

تعرفى فى الاول انا كنت نحصاب روحى بس الى يصيرلى امور فى الحياه لاتطاق ولله الحمد بعدين لما تعرفت عليكم عرفت ان فى غيرى مرو بنفس الى مريت فيه واهو نستفيدو من بعضنا

[غرام الغالي]

الله ايعينك ياعاشقة الصحراء
لكن برضوا خليك لطيفة حتى في تنفيذ الحلول معاها
دائما باللين و الكلمة الحسنة و اشغليها بشىء
وجهيها تنشغل بحاجة ما.....مش عارفة شن بالزبط لين تتزوج و ربي يرزقها بولد الحلال

[عاشقة الصحراء]

ههههههههههههه تسلميلي حبيبتي رسمي القلوب عند بعض ... وبالفعل اللي صار معاك وصاير معاي شي مزعج جدا .. لكن انتي عالأقل قولي العزوز ..حاجة أهون من حاجة يعني متلا كان بتطلعي وبتمشي لصاحباتك مستحيل تقوللك بنمشي معاك نتعرف عليهم ...
اني بدت تعرف كل صاحباتي ومعاش مشيت لأنها حتمشي معاي والوحدة من الأخر تبي تحكي مع صاحباتها حاجات صعب تحكيهم قدامها والله انخنقت ... مرتين مشت معاي لأعز صاحبة عندي تعرفي ننوض للمطبخ معاها باش نحصلوا شويا تهدريز بروحنا .. وتوا غدوة يمكن تجيني صاحبتي بسيارتها باش نطلعوا مع بعض من توا دخلت روحها في الموضوع وتستنى .. مع ان لا تعرفها ولا عمرها شافتها ... وعععععععععععععععععععععع تعرفي بنهبل ..

[أم أجنادين 80]

مساء الخير

شن اخباركم يابنات

[عاشقة الصحراء]

تسلميلي ياغرام ... انشالله خير وخلاص .. مشكلتي خايفة تفلت أعصابي لأني مش من النوع اللي يساير هلبا ... ربك يستر ..
تعرفي حتى راجلي طلع ملاحظ الموضوع مع ان عمري ماشكيتله ولا قلتله ولا كلمة لكن مرة تعارك معاها وعيط عليها وقاللها خليك في حالك لأنك حتخربيلي بيتي كان بتقعدي هكي .. اني انصدمت ..
لكن ماقلت له شي ولا علقت عالموضوع نهائيا وأصلا لحسن حظي صارت العركة واني مش موجودة وسلفتي هي اللي حكتلي ...

[عاشقة الصحراء]

هلا بيك ياحكومة .. مساء الأنوار
شرفتينا ياحبيبتي

[عاشقة الصحراء]

ويييييييييييييييييينكم طلعتو ؟؟؟
عموما توا بعد شويا بنطلع حتى اني لأن الدوام خلص وأخيرا بنروح للحوش الدافي ...
تعرفوا خاطري في عصيدة والله الجو يبي حاجة زي هذي اممممممممممممممممممممم ..
سلام ياغرام ... سلام حبي أم قصي ... سلام حكومة
بااااااااااااااااااااااااااي نتلاقو غدوة

[غرام الغالي]

حكومة
شخبارك و انت من اين في ليبيا

[أم أجنادين 80]

انا من الزاوية وانت

[طرابلسيه]

غرام حتى اني عندي التهابات :(
تعرفوا ماشيه بنفتح ملف في الخضرا امشي الدكتوره قالتلي ماداما بتفتحي عندنا ملف معناها ضروري اديري تحاليل عندنا ومن ضمنها تحليل البول-أكرمكم الله -مع اني درته في حوالي الشهر الثالث او الرابع بس الحمد لله كنت سليمه هداكا الوقت،المهم درت التحليل وجبتلها النتيجه،نشبح في الدكتوره وجهها تغير قالتلي معقوله ماتحسيش في وجع؟طلع عندي التهاب حاد:( ربي مايكتبهولكم..يتبع..

[أم أجنادين 80]

صحتين عاشقة الصحراء

احسن شي ياعاشقة انك تسكتي وتصبري

وتخلي راجلك هوا يكلم امه

معليش ادخلت في الموضوع

[lila osama]

السلام عليكم .. كيف حالكم يا حلوات ....
يا عاشقة خلي بالك واسع وبتصرفاتك خليها تفهم أنك مستقل عليها وحاولي أنك تساعديها بالتعرف ع صديقات علشان تفك عليك .. أهم حاجة خلي زوجك بعيد عن الموضوع ..
وبالنسبة للبازين تعالي لمصراته وتحصلي أحسن بازين ع كيف كيفك

[طرابلسيه]

اني شن صارلي..هداكا الوقت كنت في نهاية السابع لما درت التحليل ونحس في وجع في منطقة الحوض كلها،وجع+ثقل+تسطير+ولما سألتني الدكتوره لو نحس بوجع أو لا طبعا قبل ماندير التحليل قلتلها اني نحس بثقل بس لاني ماكنتش نحس بحكة مثلا او وجع في المهبل هداكا الوقت ماقلتلهاش،ولأن الحوض كله كان ثقيل ويسطر ماقدرتش نميز لو فيه عندي التهاب مسالك أو لا،اعطتني الدكتوره دوا،هفت الوجع فتره واول ماتم الدوا رجع الوجع من جديد والحمد لله على كل حال

[طرابلسيه]

بس اللي نعرفه ان يابنات ردو بالكم من الجماع لما يكون فيه التهابات لان الجماع ينقل العدوى للزوج وهذا يزيد الطين بله،هذا اولا..
ثانيا:لازم التجفيف بقطعه قطنيه بيضاء نظيفه بعد استعمال التواليت ويكون التجفيف بالتربيت على المنطقه الحساسه ولا تنسي دائما عند تنظيف او تجفيف هذه المنطقه ان تنتقلي من الامام الى الخلف وليس العكس..
ثالثا:تبعي مع الدكتوره واشرحيلها اي تطور في الحاله..
رابعا:كثري من شرب الميه والاحسن لو تكون اميه معدنيه مش امية تحليه..

[ميرنا]

ميرنا مع انك تسلمي عالكل إلا عليا ... كيف حالك وشن أخبارك وربي يفرحك ويعطيك اللي في بالك يارب ..

واك على واك والله مانى منتبها ياعاشقة مع انى دائما نقر اء فى كلامك بس انى انرد هذه مانى منتبهتلها بكل وراكى تزعلى منى نفس المطب حدث مع سورنيام والله بس سهوة نين نبهتنى

[غرام الغالي]

الطرابلسية
كيف حالك ان شاء الله امورك تمام و شن تجهيزاتك للبيبي؟؟؟
المشكلة اني انراجع عند دكتور و هو ما يكشفش ...مرة وحدة ارسلني لدكتورة تكشف عن عنق الرحم عشان الربط و هي اللي قالت عندك التهابات
و رغم حرصي على التجفيف لكن بدون فايدة و خايفة منه خاصة مع هالرطوبة المرتفعة

[غرام الغالي]

ميرنا
كيف الحال

[ميرنا]

يابنات تصير امعكم لم تخشو على الدكتورة تنسو جميع الاسئلة لى تبى تسئليهم لها انا من كثر ما ننسى راجلى قالى المرة الجاية نخش ابروحى انتى ما تفرغيش السر

[ميرنا]

ما نيش عارفه ايش يصير معى بدل ما نا لى نسئلها هى لى تسئل كم عمرك وكم ليك متزوج وراجلى لم نطلع عليه نقول سئلتنى على عمرى يطير فى سماء ربه هذا عليش خاش عليها

[ام لقمان]

السلام عليكم
كيف حالكم انشالله بخيركلكن؟
عاشقه حاولى معاها بيش اتكون صداقات
وكملى جميلك معاها وصليلها الموضوع بكلمات بسيطه اغلبنا تعرضنا لمثل هالامور ومع الوقت مشى الحال وما بقى كان المحبه انشالله
مثلا انى من الناس الى عاشوا فى حوش العيله وكانت حماتى طول الوقت معاى لدرجة حتى حياتى الخاصه اصبحت فيها بغض المشاكل
المهم بشوية مواقف وبدون مشاكل مشى الحال واحنا توا مازالت العشره الطيبه بينا
تصدقى دائما ولله الحمد صافه معاى ضد العائله كلها واتجى من حوشها وتبات بيش انعدى لاى مكان نبيه وانخليلها الصغار
والحق انروح حتى غداى نلقاه واتى والحوش كانها فى حوشها واكثر وهى الى عانتنى نين سبعت لان امى كبيره وما تقدر على شىء
المهم صدقينى ما يضيع شىء عند ربى
وباش تعرفى مشاعرها حطى نفسك مكانها
الخلاصه اشوى اشوى ماتخبريهاش على امورك الخاصه توا اتلاحظ

[ام لقمان]

ميرنا كيف الحال؟

[طرابلسيه]

غرام
ربي يسلمك ويخليك الحمد لله توا بديت احسن لان ليا 3ايام ناخد في مضاد اقوى من الاول،قعدت الحكه بس تو بنجربلها اميه وملح هلبه ناس شكروهولي.
:
ميرنا:هههههههه باهي فيه وحده زيني نحساب روحي اني بس هكي ههههههه مانتفكر الاسئله الا لما انروح نقعد انقول ما ابردني خيرني ماسألتهاش عن كذا وكذا بس قلت ان شاء الله الموعد الجاي بنكتب الاسئله في ورقه بش ماننساش

[أم أجنادين 80]

مساء الخير يابنات

[طرابلسيه]

عاشقه ياعاشقه
حرام عليك جايبتلك طريقة طبيخة الفول نلقاك مدايره عياطات عالعصيده؟
شدي عندك ياحنه
وعينك ميزانك،خودي طنجره صبي فيها اميه وشوية زيت وحطيها عالنار،مابين تغلي خودي الفول المجروش اللي بتطيبيه،نقيه واغسليه كويس وحطيه على جنب،خودي بصله افرميها ناعم،اه غلت الميه؟حطي فيها الفول اللي غسلتيه،اوكي توا خودي طنجره ثانيه صبي فيها شوية زيت واول مايسخن حطي البصل اللي فرمتيه ماهو بش اديري المرقه،المهم،تبدي تحركي البصل لحد مايذبل..يتبع

[طرابلسيه]

مساء الورد حكومه:)شن اخبارك؟
:
عاشقه انتي خليك في المطبخ،توا ذبل البصل؟حطي عليه طماطم حكه وباقي الدباير،ملح بزار فلفل احمر،وخلي عينك عالفول مره مره حركيه بش تعرفي امتى يطيب،اوكي؟فيه من يدير في الحريقه لو تبي اللي هي زيت وبصل وفلفل ورشة ملح،خلاص طاب الفول؟وبدي شكله كأنه ذاب في الميه؟خوديه حطيه فوق المرقه طبعا المرقه قاعده تغلي،توا فيه من ياخد في شويه من خليط المرقه والفول على جنب في صونيه ويحط عليهم شوية كمون،تخلطيه كويس وترديه في طنجرة المرقه..

[طرابلسيه]

ماهو لو تحطيه في المرقه طول مرات يتكركب منك،خلطيه برا في صونيه مع شوية مرقه وبعدين رديه في الطنجره اسهل،وتوا راجي لحد مايتخلط الفول مع المرقه مضبوط عالنار،اصبري عليهم شويه وردي بالك راهو فيسع ماينزل الفول تحت ويتكتل وهذا يسهل حرقه،ودوري من يديرلك كركوبة بازين ههههههه ردي بالك مش تتفلحي واديريها انت راهو خايفين عالبيبي،وصحتين..

[lila osama]

السلام على الجميع
ميرنا كيف حالك ومشكورة على الترحيب بيا وأكيد أنت أول المعزومين ع اللمة وطبعا بنات التجمع كلهن معزومات

[lila osama]

يلي نايضة منكم يا حلوات تشور عليا بكرى عيد ميلاد زوجي الاول بعد الزواج وملخبطة كيف اندير وشنو نهديه

[طرابلسيه]

هلا ليلى،شن اخبارك اني درت دوره في موضوع البكريات وجيت..اني راجلي كان ذكرى ميلاده السبوع اللي فات اللي هو كان مطر ماشاء الله وصعب نطلع فيه كنت نبي ندير حفله بسيطه نفاجأه بيها ماهو حتى احني هذا اول ذكرى ميلاد لزوجي بعد عرسنا..وان شاء الله بندير حفيله صغيرونه اني وياه،وغدوه ان شاء الله لو ربي سخر بنطلع ناخد الهديه،فكرت في سوريه قنينة،وعندي قفطان مازال ماشافنيش فيه ولا يندري عليه اصلا ههههههه وبندير عشي بسيط ومكسرات وكيكه وكابتشينو

[lila osama]

شكراً يا غالية على هالفكرة لكن شوفي الحظ الحلو اليوم الجو صقع ومطر وماقدرتش نطلع ناخد شي...
زعما لوطلعت بكرى وهو معايا حتكون حلوة الهدية لما نشريها ونأخد تورتة وحلو ونرجعوا للحوش ونحتفلوا

[طرابلسيه]

اني لان زوجي مايفضاش الا يوم الجمعه،شوفي فكرتي:بنوتي قائمه مشتريات وهميه بش يطلع يجيبها مابين مانجهز روحي ونلبس ونكمل مكياجي ونغير غطا سرير دار النوم ونفضي زاوية من الدار نفرشها ونحط طاوله صغيرونه فيها الكيكه والعشي والشموع والهديه حتكون مغلفه ونحطها عالسرير،قبل مازوجي يطلع يجيب المشتريات ناخد موبايله ونغير اسمي فيه،ونبعتله مسجات حلوه في الوقت اللي يكون فيه برا،وقبل مايطلع بنحطله كرت دعوه صغيرون في السياره بدون مايشوفني طبعا نكتبه فيه كلام حلو

[طرابلسيه]

ياناري يحسابني ناسيه يوم ميلاده هههههههه،واني مدايره روحي ناسيه ومانندري عليها منين زارقه..
:
شوفي اني من رايي تفاجئيه بيها أحلى،اني مانسوقش ومانقدرش نطلع بروحي،بس حيعاونني خوي هو اللي حيطلعني بإذن الله

[ميراس]

سلامات يامدامات تحية للجمبع

[طرابلسيه]

هلا ميراس حتى انتي ساهره؟اني طار من عليا النوم ماهو طولت في رقاد القايله

[ميراس]

عاشقة حى عليك عالخيانة اللى درتيها وينك ياعيون مسكينة واخدتها بردة هى واصغارها من الصقع اللى ضربها وهى تستنى فيك بيش تخطمى عليها وعليا نت لقى احبابه نسى اصحابه حصلتى راجلك رفعتيه واحنا خليتينا نلقطوا فى الصقع باهى ياعاشقة العصيدة

[ميراس]

كيف حالك باطرابلسية

[ميراس]

اسكتى انا زى الخفاش نسهر لعند الافجار ديما هدا حالى لما انخش ديما نلقى فيه امكسد

[ميراس]

شنى طلعتى حتى انت ماتقوليهاش

[ليبياقلبي]

شكرا حيوباتي لي باركتولي واسم ناريز من اخيتاري انا ومعناه الدهب القليل غالي التمن
شفتوا بنيتي يعني دهب هههههههههههههههههه والله مشتاقة ليكم كلكم تو يجي وقت ونخش نشوف ونهدرز غير توا جو امومة رضاعة وسهر ليل وووووووووووووووين الحلوات عيون ووحنونة ونسرينا شن صار فيها ميمونة وميرنا وسورينام وتحية للجدد

[طرابلسيه]

سامحيني ميراس امس كل ماندير ريفرش للصفحه مايطلعليش رد جديد :( متعبني نت النقال،اني ماهو تليفون حوشي ريفي ومايركبش عليه دي اس ال،وما بيتش نخليه يديرلي حساب في الدايل اب لاننا محولين ان شاء الله بعد3 او4شهور لو سخر ربي،،
ليبيا قلبي ايوه احني جو امومه ربي يحفظك ويحفظلك بنيتك ماشاء الله عليها،،

يابناااااات من تراجع في عيادات الخضراء؟

[عاشقة الصحراء]

صباحو ياحلوات ... كيف الحال ؟؟؟
أول شي شكرا لكل من رد عليا بالنسبة لمشكلة حماتي وانشالله ربي يفرج وتتزوج وتريحني ههههه ..
ميرنا ... عادي حبيبتي تصير لكن صدقيني مايلوم عليك إلا اللي يبيك ولو مش غالية عليا ماكنتش دورت سلامك ياقمر ...
غرام كيف حالك ؟؟؟ حاولي حبيبتي تعايني عند دكتورة أريحلك من ناحية الكشف يعني الدكتور مهما كان كويس مش حيرتاح ولا انتي حترتاحي في الكشف عليك .. وبعدين حي عليك راجلك يوريك هههههههههههه .
طرابلسية حبيبتي ... تسلميلي ياغالية عالطريقة والله طلعت ساهلة هالطبيخة اللي قلبتلي كياني ههههههههه ربي يخليك ويجعله في ميزان حسناتك يارب ..
ميييييييييييييييييراس ياحلو ... شن أخبارك وعاش من شافك .. توا تقولي عليا اني اللي خاينة ولا انتي اللي شحطيني وبعدين قلتي راجلي حزار ومايبينيش نطلع .. وعيون الراقدة حتى هي بسلامتها هي وصغارها قعدت ساعة برا نستنى وقلبت الشارع بصوت السيارة وماطلعتش لا هي ولا كتاكيتها وبعدين شن قالتلي ؟؟؟ قالتلي خداني النوم ومانحسابش الساعة 5 جت .. باهي باه
ياودي زي الطلعة مع الراجل مش حنلقى انتو سريبكم طويل وكل وحدة فيه شن رابطها ههههههههههه ..
ليبيا كيف حالك ؟؟؟ وربي يخليلك الغالية اللي زادت عليك يارب.
حكومة حبيبتي معاش تقولي آسفة عالتدخل .. عيب عليك .. اني حطيت الموضوع باش الكل يعطيني رايه ورايك على راسي من فوق وتسلميلي يارب ..
Lilaكيف حالك وشن أخبارك ؟؟؟ بالنسبة للهدية والمفاجأة حاولي تخلي حد يرفعك وتجيبيها لأن الموضوع والإثارة مش في الهدية هو بيفرح بالمفاجأة أكثر من الهدية وطبعا ماشالله على طرابلسية فالحة شكلها في المفاجآت وقالتلك على كل الخطوات ( ربي يهنيها انشالله )
حتى اني الاسبوع اللي فات كان عيد ميلاد راجلي ودرتله عيد ميلاد عائلي مع عيلتي وعيلته لأن حتى أهلي حبوا يفاجؤوه وهما جابوا التورتة واني على قولت طرابلسية عندي قفطان جديد مش شايفه تكمت روحي ولبسته وسبحان الله يومها طلع مكياجي مش عااااااااااااااااادي والعشي جي حلو وشريتله هدية من غير مايعرف .. لكن اللي ساعدني اني نسوق ونطلع بروحي .. ضروري تحاولي تخلي اي حد يجي يرفعك أو حددي شن تبي وابعتي حد يكون ذوق ...
طرابلسية نبي نتعرف عليك أكتر .. انتي قداش ليك متزوجة ومواليد كم وشن تخصصك في الحياة ؟؟؟ ونفس السؤال لحكومة وlila ؟؟؟

[عاشقة الصحراء]

طرابلسية اني نراجع في الخضرا عند دكتورة منيرة ...

[عاشقة الصحراء]

حد شاف حبيبتي أم قصي ؟؟؟
شكلها قاعدة راقدة ... أم قصي وييييييييييييييييييييييينك ؟؟؟

[طرابلسيه]

عاشقه يسلمك ربي،،
اني مواليد86متزوجه ليا قريب 10شهور،خريجة تقنية طبية قسم علم أمراض

[طرابلسيه]

اها واني عند الدكتوره كميله

[عاشقة الصحراء]

اووووووووووو طلعنا قراب من بعض في كل شي يا طرابلسية ..
اني مواليد شهر 12 سنة 85 .. ليا 6 شهور متزوجة .. كنت نقرا في الطب البشري وتوا عادلت موادي نبي علم أمراض وقرايتي بتبدا يوم 1/3 انشالله ..
اني أيامي مع الدكتورة منيرة كل اتنين من بداية كل شهر عندي ويوم الاتنين اللي فات كنت عندها . ماتندريش مرات يجي يوم ونتلاقو انشالله ..
قوليلي ؟؟ تخدمي توا ولا قاعدة في الحوش ؟؟

[أم أجنادين 80]

صباح الخير مدامات وصبايا

مفيش وحدة موجودة اتهدرز عليا

[طرابلسيه]

[quote=طرابلسيه;741030]سلمها ياربي واني دكتورتي نلقى فيها يوم الاحد،،
قاعده في الحوش مانخدمش ههههههه وين بنحطها الكرشه اللي قدامي اني يادوبك انلحق على حوشي وغداي،،كل مانكلم ماما نقعد نديرلها في الجو واندير في روحي انعيط وااك مابعد نساوين زمان اللي يولدوا في روحهم بروحهم تحت الزيتونه تخايلي وتبدا في شهرها تخدم في الحوازه وتلقط في الحطب وتعصد في البازين هههههه مش زينا توا ندلعوا،،ههههههه كل مانعيط لماما تقولي ترا فكيني منك اني
جربت قبلك ونبي نرتاح

[أم أجنادين 80]

خاطري انفضفض لحد

انا توا 4 شهور متزوجة وماحملتش لتوا

قبل الزواج كنت مقتنعة ان الوحدة تأجل حملها شوي اقل شي تتعود

عالحياة الجديدة وتستقر مع زوجها وتأقلم نفسها مع العيلة الجديدة

بس لما ماحملتش لتوا وبدوا الناس يسألوا شن مفيش حاجة

بديت نستني في موعد الدورة كل شهر تجي او لا وندور في وصفات للحمل وغيره...

لدرجة اني مشيت لدكتورة قالتلي مفيك شي الرحم والمبايض كويسات

بس قاعدة اموسوسة من الموضوع ونفكر فيه هلبة

رغم ان زوجي مخليها علي ربي ويقولي امتة يرزقنا ربي باهي

بس انا بنت ونعرف كلام الناس وتبوا الحق اتغيرت قناعتي

الحمل في اول الزواج احسن اقل شي الوحدة تتطمن علي روحها

وترتاح من الأسئلة والقصقصة ....

[عاشقة الصحراء]

ههههههههههههه والله حق ياطرابلسية فعلا تحسي جيلنا مايتحمل في شي لحد امبارح كنا نهدرزوا اني وشيبانيا وقعد يحكيلي قاللي اني امي جابتني وهي في الحوازة وقصت الحبل السري برشادة ولفتني وروحت بيا للحوش وووووووووووووووووه تخيلي اععععععععععععععععع
تعرفي صايرلي الوسواس والخوف من الولادة من لما حملت ونتمنى أمي تخش معاي ليييييييييين يطلع العيل ومانقعدش بروحي والله خايفة بنموت ... يستر الله ..
انتي عارفاتك في التاسع لكن شن قالولك عندك ولد ولا بنية ؟؟؟

حكومة صباح الخيرات والليرات .. شن جوك ؟؟
نحن هنا ونبوا نهدرزوا معاك ...

[عاشقة الصحراء]

لالالا ياحكومة صدقيني الحمل على طول مش حلو ... يعني ضروري الوحدة تتأقلم على حياتها قبل بعدين تحمل .. تعرفي لما توحمت قعدت نقول الحمد لله ماحملتش طول ..يعني تخيلي روحك جديدة وماعشتيش انتي وراجلك ويجيك الوحام ومرات تطلعي زيي تكرهيه عالحمل وتكرهي المطبخ وتكرهي روحك ووووووووووووووووووه هم ماهو هم ... اني في البداية من أول شهر كنت نبي وراجلي هو اللي مانع ومشينا عالجدول الطبيعي وفعلا قعدت 3 شهور وشويا بعدين حملت وعلى قولتك الناس يسألو مافيش حاجة ؟؟؟ حسسوني ان ليا سنين متزوجة ..
حبيبتي ماتقلقيش روحك وصدقيني كل شي بوقته والله بكري عالتخميم يعني كلها 4 شهور معقولة صاير فيك هكي ؟؟؟ والدكتورة طمناتك يعني عادي واللي يسألك قولي مازال مانبوش توا .. مازال بكري ... الناس دوتهم ماتكملش ياحلوة عيشي حياتك واطلعي واستمتعي مع راجلك وجايك الهم والوحام والتعب لين تفدي هههههههههههههههههههههه

[طرابلسيه]

وخيتي حكومه ماتقوليش هكي كله بتساخير رب العالمين والناس في يخمموا الا في تقييد احوال العباد؟قولي الحمد لله ان راجلك ربي يخليهولك مش مدايرلك دوه عالموضوع هذا وقولي الحمد لله انك مافيك شي وامورك سليمه،،وخليك مؤمنه بالله واحني الحوامل راهو مش من فلاحتنا هالصغار اللي بطوننا كله من رب العالمين بس..
وعادي عيشي حياتك وفرهدي وماتكدريش على روحك وعلى راجلك بالعكس استمتعي توا راهو العمر يجري ردي بالك تضيعيه في الحزن وان شاء الله ربي يطمنك عاجلا غير آجل

[أم أجنادين 80]

جيلنا هدا مايتحمل شي

كل شي جاهز وديما نشكوا ومش ملحقين علي شي

انحاول انظم وقتي للتنظيف والطبخ ولنفسي ولراجلي

بس لازم انقصر في حاجة

وعارفين انتم متطلبات العصر لازم كل شي تمام

تهتمي بمظهرك وبحوشك وراجلك هدا غير المناسبات الاجتماعية

لتوا قاعدة ماتعودتش نمشي بروحي من غير امي

وانا بنت هلبة مناسبات مانمشيش مش مفروض عليا

نمشي بس توا كل شي اتغير

قداش منا الصراحة

[طرابلسيه]

حي عالجو حيه قصاته برشاده واحني بالتعقيم والدلع اشكال والوان ونتعايطوا..

[أم أجنادين 80]

الحمد لله علي كل حال

اكيد كل شي تساخير مني وارزاق

لاااااا عارفة مش فلاحة ولاشي كله لحكمة من ربي

وربي يثبت حملكم ويسهل ولادتكم

وربي يرزقكم الذرية الصالحة

[طرابلسيه]

حكومه تشتغلي؟

[أم أجنادين 80]

حيه عليا مقوي قلبها

[أم أجنادين 80]

ايه نشتغل بالجامعة

[عاشقة الصحراء]

شفتوا ؟؟؟ رسمي قوة قلب ... ربي يعيننا يارب ويطمن قلبك ياحكومة وتحكيلنا عالوحام لين نفدوا منك ههههههههههههههههه
تعرفي اني في الشهر الثاني عانيت هلبااااااااااااااااا من الوحام وكرهت راجلي موووووت وكرهت روحي وحوشي والله تشردت تشرد مابعده تشرد حاااااااااااااالة صارت فيا .. ماتستعجليش حبيبتي جايك انشالله ...
ماقلتيلناش تفاصيل عليك .. مواليد كم ؟؟ وشن تشتغلي ؟؟؟

[طرابلسيه]

ماشاء الله شن تشتغلي:)

[أم أجنادين 80]

معيدة بالجامعة ومواليد 86

تعرفي جارت صاحبتي من طرابلس وحامها جاها عالزاوية

ياناري زوجها ديمة رافعها لحوش اهلها

[أم أجنادين 80]

في اما شهر حملك

[عاشقة الصحراء]

ماشالله .. شن تخصصك ؟؟؟ بالنسبة ليا ( كان السؤال ليا أصلا ههههههههه)
يوم السبت نخش الرابع والحمد لله .. ربي يتمم بخير يااااااااااااارب

[طرابلسيه]

سوري رصيدي تم وعبيت مره تانيه
:
واني ياحكومه خشيت شهري

[أم أجنادين 80]

http://forum.hwaml.com/imgcache2/hwaml.com_1297338476_908.gif

http://forum.hwaml.com/imgcache2/hwaml.com_1297338477_631.gif

http://forum.hwaml.com/imgcache2/hwaml.com_1297338477_171.jpg



http://forum.hwaml.com/imgcache2/hwaml.com_1297338478_993.gif

http://forum.hwaml.com/imgcache2/hwaml.com_1297338681_722.jpg

http://forum.hwaml.com/imgcache2/hwaml.com_1297338681_962.jpg

http://forum.hwaml.com/imgcache2/hwaml.com_1297338680_419.gif

اتفضلو التواقيع هذه هدية مني


وان شاء الله علي خير

[أم أجنادين 80]

شن مدايرين غداكم

[ميمونة]

شن حالكم صبايا
طاحين فيها هدرزة تهنوا ماشاءالله عليكم عاشقة_طرابلسية وحكومة منورين

[عاشقة الصحراء]

أوووووووووووووه تسلمي ياحكومة يسلموا ايديكي حلوات ...
بالنسبة للغدي اني في الخدمة مازال ونروح الساعة 4:30 يعني لا غدي ولا غيره حتى راجلي نشوف فيه في الليل بس الساعة 9:30 لأني لما نروح هو يكون رجع تاني للعيادة وماااااااااشية .. مرات نستاحش فيه ومرات نقول هكي أحسن ..
طرابلسية قوليلي الطبيخة امتع الفول لما كليتها كان الفول نااااااااااااااعم كأن مضروب في الخلاط هو هكي ينزل بروحه يعني ؟؟؟؟

ميمووووو عاش من شافك .. النور نورك .. وينك وينك وينك ؟؟؟
شن أخبارك استاحشناك ياقمر

[ميمونة]

ليبيا أسم بنت معناه حلو تتربي في عزكم يارب
عيون هن عاطسة آيه شن حال بنيتك توا

[ميمونة]

هلا عاشقة إنت المنورة
أنا عيد ميلادي السبت ونفكر في تفاصيل احتفالي هو قالي بنطلعوا أشبح وين يرفعني
وأشبح شن يهديني حبيب قلبي

[عاشقة الصحراء]

رسمي عيون السموحة مغطسة ... انشالله المانع خير ..
آية كيف حال البنوتة توا ؟؟؟

[عاشقة الصحراء]

كل سنة وانتي طيبة ياميمو وانشالله عقبال مية سنة ( مقدماً ) وانشالله السنة الجاية تحتفلوا وانتو ثلاثة ومعاكم أحلى نونو في العالم ياااااااااارب
حلو لما تستني هديتك امممممممممم شعور حلو تعرفي .. المهم انتي وتي لبسة حلوة وتكمي روحك وخليك نجمة الليلة وكان عندك روب جديد أحلى وأحلى بعد ماتروحوا ... ربي يهنيكم ببعض يارب ..

[ميمونة]

شن حالكم صبايا
طاحين فيها هدرزة تهنوا ماشاءالله عليكم عاشقة_طرابلسية وحكومة منورين

[ميمونة]

عشوقه ربي يهنيك وخيتي
أنا داسه روب جديد وردي يجنن لا نبي نعيش هاليلة مجهزة شموع ومكسرات وجو رومانسي وبنأخد ورد طبيعي بنحطة بالسرير بنشكل إسمي واسمه وقلب كبير بالورد

[ميمونة]

اليوم ماطيبتش الغداء راجلي متغدي بره قلت نرتاح من المطبخ

[عاشقة الصحراء]

اووووووووووووووووه ياميمو ياحركات ههههههههههههههه
ربي يهنيك يارب وتعيشي أحلى ليلة مع حبيبك وتعجبك هديته ... قداش ليك متزوجة ؟؟ وشن أحلى هدية جاتك منه لتوا ؟؟؟

[ميمونة]

حكومة ربي يسخرلك وحاسه بوضعك أنا ليا متزوجه سنة و3 شهور تعبت من حكي الناس مع أن زوجي ديما يطمن فيا بس نتمني نحمل ونحس بالأمومة ونفرح حبيبي وأهلي وأهله ربي يرزقنا

[ميمونة]

شن حالكم صبايا
طاحين فيها هدرزة تهنوا ماشاءالله عليكم عاشقة_طرابلسية وحكومة منورين

[طرابلسيه]

حي تهبل الهديه ياحكومه سلمها ياربي..
غداي رز بلاو وفاصوليا هي تفضلوا معاي..
:
ميمونه:هههههههه عاد شن بنديرولكم لقيناكم راقدين هدرزنا احني وخلاص،،شن اخبارك؟كل عام وانتي بخير وان شاء الله بطول عمرك في الطاعات..

[lila osama]

يسعد نهاركم يا حلوات

[عاشقة الصحراء]

شكلكم رقدتو ياصبايا ... وينكم ؟؟؟
ربي يفرحكم يا حكومة وياميمونة ويفرح كل من تستنى ياااااااااااااااااااااارب

[lila osama]

والله محتار من ناحية عيد ميلاد زوجي ويلي زاد الطين بله أن صبيتي اليوم بتجي يعني لازم تجامليها وتقعدي احداها وبعدها في الليل عزوزي جاينها صاحباتها يعني بتقعدي احداهم ... جو جميل جداااااااً وشاعري ..... زعما لو اجلته ليوم ثتني يكون فيها طعم زي اليوم

[طرابلسيه]

عاشقه صحتين..لو مسحون هلبه هلبه معناها طاب بزياده..المره الجايه حاولي لما تجي تحركيه وهو عالنار حركيه بالشويه لانه فيسع ماينسحن بالتخليط وحاولي اول ماتعرفيه خلاص طاب وبدي مهبز تقيميه من عالنار،،وصحتين مره ثانيه

[lila osama]

طبعا أني متزوجة من 9 شهور ومواليدي 84 وحملي في نهاية الشهر السابع مع العلم أني زوجي من نفس المواليد ونفس الشهر بينا 10 أيام بس
وبالنسبة للحمل يا حكومة مازال بدري وماتسعجليش وعيشي حياتك واستمتعي مع راجلك بكل ثانية تفوت عليكم .. طبعا أني استعجلت وسمعت كلام الناس وحملت بدري من الشهر الثاني ومانحكيلكش ع الوحم

[عاشقة الصحراء]

أهلين ياليلى شن أخبارك ؟؟؟
في رأيي مش حلوة لو تفوتيها الليلة لأن هذا وقتها ...احتفلي بأي طريقة الليلة في حوشك حتى لو ماحصلتيش تشري الهدية .. ديري عشي حلو في الحوش والبسي حاجة يحبها وحاولي تغيري تسريحة شعرك أو مكياجك يعني المهم يشوفك بحاجة جديدة .. ديري جو لروحك وبعدين عادي الهدية حتى يوم تاني .. خليك عروسة الليلة وغيريله الروتين كله ههههههههههه انتي تفهمي عاد هههههههههههههههههه

[عاشقة الصحراء]

اوخيتي سلمها الطرابلسية ..ليك بوسة من بين عيونك هههههههههه
تسلميلي يااااااااااارب

[poucie]

السلام عليكم
كيف حالكم كلكم والله استاحشتكم هلبة مع ان مافيش من سأل عليا يالله عادي مش مشكله اني غيبت عليكم لاني كنت امسافرة وروحت ليا يومين
المهم شخباركم انتم
عاشقة طيب فيك اللي حصلتي طريقة طبيخة الفول ههههههههههههه

[عاشقة الصحراء]

هلا هلا بيك يابوسي عاش من فاشك ههههههههههههه
سألت عليك ياغالية وارجعي للمشاركات القديمة شويا .. انتي طولتي الغيبة هلبا ..
الحمد لله عالسلامة وتوا نبوا تفصيل مفصل ... وين مشيتي ؟؟؟ وقداش قعدتي ؟؟؟ وشن درتي ؟؟؟ كل شي كل شي ...
اااااااااوه تعرفي طبيخة الفول طلعت عيوني على قد ماهي سهلة اليوم انصدمت لما عرفتها كيف وقلت هذي مدايرة فيا هذا كله هههههههههههههههههههههههههه ( سلمها الطرابلسية طبعا )
المولد النبوي الشريف يوم الاثنين الجاي انشالله .. ربي يعيده على خير ووتوا روحكم للعصيدة هههههههههههه

[poucie]

كل سنه وانتم طيبين انشاء الله ووربي يهني الجميع
هدا يا ستي امشيت لباريس وقعدت تقريباً إسبوع ادهورنا وغيرنا شوية جو راجلي كانت عنده دورة غادي وبالصدفة حتى اني كان عندي اجتماع ليوم واحد بس وهو الكورس امتاعه لمدة ثلاث ايام وباقي الايام خديناهم ادهوير وخلاص

[poucie]

نبي نسألكم عالميش خاطري انميش شعري عندي عرس صاحبتي بس المشكله اني خائفة إيأتر عالبيبي مع اني حامل في نصف السادس شن رائكم ومنو جربت تصبغ والا تميش وهي حامل ونبي ردو عليا بسرعة لانه العرس الاسبوع الجاي

[poucie]

عويلة وينكم شكلي قاعدة بروحي ياالله تواء انولي بعدين على امل اني نلقى حد

[غرام الغالي]

سلامات كيف الحال يابناويت و شخباركم
طرابلسية :حتى انا شكرولي الملح والماء تشطيف و ندير فيهم و شكروا القميلة (البابونج) تشطيف و خايقة منها
عاشقة الصحراء
ام قصي و محمد
ام لقمان
ليبيا قلبي محلاه معنى اسم بنوتك الله ايخلها
اية
ام سعد
و الكل ان شاء الله اموركم تمام
نبي نسال عن قياس الضغط ان لحد الان الدكتور ما قاسليش الضغط ولا مرة
و لا قال ديري تحليل سكر؟؟؟؟؟؟؟؟؟؟؟؟
من دكتورها زي دكتوري رغم انه من اكبر الدكاترة ببنغازي
وانا خايفة ؟؟؟؟

[تيمو ليبيا]

السلام عليكم والهي ليكم وحشه كبيررررررررررررره انشغلت الفتره ال فاتت شوبنق شوبنق لين بيطلع من عيوني انشالله نهاية 4 مروحه ل ليبيا مش مصدقه انعد فيهم بيوم ربي يوصلنا سلامين اني وزوزي وبنوتي يارب منحكيلكمش قداش مستاحشه ليبيا وماما تقولي اقعدي غادي علاش جايه ليبيا كساد انقوللها عادي حلو الكساد استحشته

[تيمو ليبيا]

الف الف مبروك ليبيا حبيبتي علي بنوته تتربا في عزك وعز بوها يارب وانشالله متعبتيش بعد العمليه وكولي كويس اهم حاجه ماكلتك وكتري سوائل بشكل مش طبيعي وام سعودي مبروك مبروك والهي فرحتلك من كل قلبي ومعليشي مش شرط وزنه شويه ضعيف اهم حاجه صحته وتوا بعد 4 شهور انشالله يسمن ويبططبط ويقيم صحته حتي انتي حبيبتي اهتمي بصحتك هلبه وبماكلتك ويتربا في عزكم يارب ومشتركات جدد انستونا ونورتونا وسورينام حبيتي هيا ال سئلت عليا بش ربي يخليهالي ويحفظلهالي صغوريتها طبعا كلكم يارب يحفظكم والهي مانزعل منكم كل واحد لاهيا في حياته وباهي حتي ال متفكر روحه دوتي هلبه صح الله غالب ليا هلبه شكلي مدويتش ههههههههه

[ميمونة]

بوسي شن الجو أنا من رأيي ماتميشيش أصبري لشهرك أضمن حتي ضميرك وقلبك يرتاح وبعدين لاحقه عالميش أهم شئ البيبي ربي يحفظه

[تيمو ليبيا]

غرام بنسبه ليا اني كانت دكتورتي كل موعد تقيسي ضغط وتوزني واندير تحليل سكر ضروي ضروي منهم انتي وقضيه بيهم دكتورك كيف لتوا ومدارلكش حتي تحليل دم لا حبيبتي الموعد الجاي اطلبيهم انتي باش تتطمني وانشالله تولدي علي خير يارب

[ميمونة]

هلا تيمو كيف الحال ونقول خيره المنتدي منور _سوري حبيبتي لاهيت بعمري شويا بس والله في البال

[تيمو ليبيا]

اهلين ميمونه النور نورك كل سنه وانتي طيبه والعمر كله يارب كيف حالك حبيبتي انشالله امورك تمام

[أم أجنادين 80]

ياسلام عالرومانسي

كل عام وانت بالف خير ياميمو وين كنتي مغطسة

زي ماقالتلك عاشقة خليك في الحوش اديروا جو لروحكم

ويارب تعجبك هديتك ماتنسيش تقوليلنا عليها

ان شاء الله ربي يرزقك ويرزقني ونحسوا بالامومة

صحتين علي قلبك طرابلسية

[أم أجنادين 80]

اهلين بغرام وتيمو

وينكم يابنات

[ميمونة]

بارك الله فيكم عاشقة_تيمو_ليلي_حكومة_طرابلسية_ وأنتم بألف خير