تجمع حوامل ليبيا

[رجاء2]

أأأأأأسفة جدا يابنات ماانتبهتش للردكن لاني كنت فاتحة على الصفجة السابقة
ااااااااااسفة جدا جدا وشكرا على المواساه والله الجهاز طفا عليا والغدا قبل انحرق وهو على النار وحااااالة

[نسرينا]

ههههههههههههههههههه

اهم شيء الغداء ،،، هو انتي شن امدايرة غداك ؟

.

[أم سعد]

هههههههههههههههههههههههه

والراجل امتى يروح ؟؟؟؟

أنا قاعدة مابديتش فيه الغداء

[نسرينا]

امالا اني اللي قاعدة في العمل

يارب شنو بندير الغدي .؟؟؟؟

.

[أم سعد]

أنا بكبوكيييييييييييييييي

[رجاء2]

ام سعد و نسرينا
تعرفو انا اليوم مانيتيش في الضحك لكن ضحكت واااجد على كلمت نسرينا لام سعد لما قالت صورت ولدك حلوه وهو في الثامن هههههههههههههه
بالنسبة للغداء دايرة رز امحبب ومعاه محشى وراجلي المفروض ايروح الساعه3 الظهر لكن توا هو شهر عسكرية قاعد اطياح في الحوش

[عيون زوجي]

قاعدة نرجاء فى رحمت ربى والله كل يوم انشوف فيكم ومارت نقعد نضحك على تعليقكم مع بعض بس مانى قادر انخش خايفه انكد عليكم لانى ما عنديش حاجة اتفرح اقريب نترك دكاترة النساء ونخش على دكاترة الحالات النفسية(الرويعى )


كيف حالك يا اوخيتي ميرنا
انا عارفه انك حاسه بالعجز والضيق
ولما تكتبي واحنا نواسيك
تقولي في خاطرك هم بصغارهم ومش حاسين بيا
بالعكس يا يالغاليه
انا لما نرد اعليك نحط فيك حسبه اختي
شهادة بالله عندي زوز اخوات
نتخيلك اختي ثريا لانها غاليه عليا هلبه
ونرد اعليك بهالشعور
لانك حسبة اختي في الله
حبينا بعض من غير ما نعرفوا بعض
ولا نكدبوا على بعض
علاقتي بيكم اصدق من علاقتي بصاحباتي
لانني مع صاحباتي لازم انطلع روحي ديمه كويسه
وفاهمه وسعيدة
لكن معاكم كل شي ينقال وبمنتهى الصدق
واهم شي رحمة ربي كبيرة اكبر مني ومنك ومن هالدنيا
وعندك حكمه في انك ما حملتيش
اكيد اجرك حاصل وبالدعاء ربي يفرجها على عبده
انا اختي مواليد 1972 اكبر وحدة فينا
كلنا تزوجنا حتي الاولاد تزوجوا وهم اصغر منها
وبالدعاء وهي ديمه متوكله على ربي وتقول نصيبي عند ربي
تزوجت العام الفات شهر 3 الفات
وراجلها من عمرها مواليد 69 وشاب قنين وطيب وحنين
وتوا هي حامل في الثامن لان املها في ربي ما انقطعش
خليك متوكله على ربي وريحي روحك
لو ربي كاتب ان زوجك رح يتزوج او انك مش رح تجيبي
مهما حاولتي مش رح اتغيري من الامر شي
خلي نفسيتك مرتاحه واي شي يصير قولي لنفسك ربي كاتب ومانقدرش انغير منه شي
التوكل على الله سر استجابه الدعاء
ماتجيش الوحدة تتدعي يارب ارزقني عيل
وهي في خاطرها واتقه ان الدكاترة مقايلين لا وانه مستحيل
الله اكبر من الدكاترة ومننا
شفتي قصتي مع بنتي سارة
الكل هنا شخص انه ورم وكل الصور قالوا هكي
وبالدعاء وشهادة بالله كان عندي يقين ان الله بدعائي رح يغير القدر
ورح يستجيب لدعائي
قعدت 6شهور قبل ما نسافر المانيا
وكانت نفسيتي مش مرتاحه ميه ميه لكن كنت متيقنه بالله
كنت نمشي للمناسبات ونلبس
وعلاقتي بزوجي طبيعيه
مانكدتش لا على روحي ولا على زوجي
ولا على بنيتي الصغيرة
والله اكرمني بشفاء بنتي وبان تشخيصها غلط
ويالله يالله يالله يامن اكرمتني في كل النعم وفي شفاء بنتي
ريح اختي ميرنا وارزقها بالطفل السليم يارب

[رجاء2]

آمين الله يسمع منك عيون
ميرنا الله يجبر بخاطرك يارب المهم الصلاه والدعاء وقرآت سورة البقره مرة كل 3 ايام لانة الرسول علية الصلاه والسلام قال (قرآتها بركه وتركها حسره)

[رجاء2]

عيون وينك يا مديره

[ميمونة]

والله نفس الحاله

اخدت هالشهر حبه وحده كلوميد بس ماخديتش حبتين بالك مانستحقهم ودورتي الاسبوع الجاي عندي اعراض والله غريبه

جنابي يوجعوا فيا هلبه وصدري يوجع ممكن من الكلوميد

ربي يكتبلي هالشهر ويكتب لكل محرومه يارب

نسرينا شن صار معاك

[عيون زوجي]

رجاااااااااء...
كيف حالك اليوم ويارب يكتبلك الحمل السليم والثابت يارب
مش مهم هالمرة انشاءالله ربي يكتبلك الشهر الجاي
ماتفقديش الامل
وربي يونسك بعويلتك ببنيتك ووليدك
ميمونه ..يارب تكوني حامل وتبشرينا هالشهر يارب
ويارب العالمين يا مجيب الدعاء
ازرع في ارحام اخواتنا..( ميرنا ,حبل الوصل ,ام اسيل , ميمونه , رجاء , نسرينا ) الحمل الثابت تسعة اشهر بلا زياده ولا نقصان

[عيون زوجي]

كيف حالكم يا بناااات
تيموووو ,,ماشاءالله على رفيف تبارك ارحمن ربي يحفظهالك ويونسها بوخيها
بوسي ..قداش عمرها روان وانتي مواليد كم واي سنه تزوجتي؟؟؟

[أم ردينة]

السلام عليكم :
كيف حالكم اني حاليا مكسده بنتي طلعها بوها روح البارح تخلقنت من الحبس ووليدي راكد واني درت فنجان قهوه عربيه وقلت خلي نشوفكم شويه ونسمع اخر اخباركم ... رجاء: احمدي ربك وبوسي ايدك وجه وقفا على قوله السوريين ان عندك صغار .. خير من مفيش بكل واللي كاتبه ربي بتشوفي وخلي امللك في الله كبير لان الصغار نصيب في الدنيا زي اي شي تاني وانشالله تكوني حامل يا رب كان مش الشهر هذا الشهر الجاي

[أم ردينة]

نبي اندير لمه لاني الحمد لله نحس فس روحي بريت وبديت طبيعه نوعا ما .. شنو تقترحو عليا اندير في اللمه.. طبعا بنديرها في الحوش في صاله حوشي

[رجاء2]

عيون ام ردينة
تعرفي كلامك سمح و انحس فيه ايبرد عليا ومش هكي وبس كلام
ام سعد ونسرينا وحبل الوصل
خلاني انتريح لانة مازال في فرصه ومازال وقت الدورة ماجاش ومشهكي عايشه جو الحمل من جديد هضا بعد الفجعه اللي امبارح...والله حاله
ميمونة
انشاء الله تطلعي حامل
هنيدة
اهلا بيك بين خواتك

[رجاء2]

احسن ام ردينة اللمة في الحوش احسن من الصالة بالنسبة ليا انا مش مقتنعه بلمة الصاله لانه الجياب عند جو خاص

[رجاء2]

اللهما لك الحمد حمدا طيبا كثيرا مباركا كما ينبغي لجلال وجهك وعظيم سلطانك
سبحانك ربنا ماعبدناك حق عباده
استغفر الله العظيم الذي لا آله الاهو الحي القيوم واتوب اليه

[الايمان]

ردك على ميرنا راااااااااااااااااااااااااااااااااااااااااااائع يا عيون زوجي
وانتي يا مير نا توكلي على الله الحي الذي لا يموت واستغفري خلي الاستغفار ديما علي السانك وربي يرزقك ويرزقني

[الايمان]

هل من احد متواجد للتواصل

[الايمان]

شكلا مافيش حد نتمنالكن ليلة سعيدة وربي يجبر بخواطرنا

[poucie]

صبااااااااااااااااااااح الانوار للجميع

تيموووووووووووووو ههههههههههههههههههه بنيتك طالقين عليها الماليزيين هههههههههههههه تهبل ما شاء الله ربي يحفظها ويطول عمرها ..

بوسي / كيف حال روان توا ؟ وشنو جو الشغل معاك ؟ و روان وين تخللي فيها ؟ وامتى تمشي للشغل ؟ هههههههههه

جاري الإجابة: ههههههه
روان حالها الحمد الله تواء احسن وخير من قبل والله مسكينة بنيتة البردة دارت فيها حالة لاكن تواء الف الحمد الله.
والله الشغل حتى هو جواء كويس والحمد الله صح مرات يبدأ فيه ضغط لاكن الامور تمشي
روان انخلي فيها في الحضانة فيه حضانة جنب الشغل امتاعي هي مدرسة خاصة والحق ماشاء الله عليهم اهتمام بالطفل لأبعد الحدود والحلو اللي فيها انهم ما يأخدوش اكثر من 5 صغار في الحضانة لانهم خايقين من الاهمال صح هي اغلى من باقي الحضانات لاكن والله ماهي خصارة فيهم (وحدة اديرلهم في دعاية هههههههههه)
توقيت الشغل من الساعة 8:30 لا عند الساعة 2:00 هذا بالنسبة ليا لانه عندي طفل لاكن نهاية الدوام الرسمي لا عند الساعة 3:30
شن انشاء الله غير جاوبت على جميع الاسئلة ها قداش الدرجة امتاعي انضني سكرتها ههههههههه

[رجاء2]

السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين

انشاء الله نهراكم سعيد ويومكم مبارك
صباح الخير للجميع

[ميمونة]

صباح الخير صبحكم مبروك

شن حال رجاء وتشرفت بمعرفتك

[رجاء2]

اهلا ميمونة وانا تشرفت بمعرفتك وانشاء الله ربي يرزقك بألي في خاطرك
صباح الخير بوسي
ام سعد وينك اليوم
مش واعيه بدري اليوم والله تتغلي علينا

[poucie]

صباح النور يا رجاء ويا ميمونة كيف حالكم اليوم

[حبل الوصل]

صباح الخير شن حالكم اليوم

[ميمونة]

انا من طرابلس ليا متزوجه سنة وشهريين وماصار حمل

مواليد85 اخدت كلوميد هالشهر حبة وحده بس من غير ابره هل مممكن يصير حمل بحبه وحده؟؟؟؟؟؟؟؟؟؟انشاءالله يارب

[رجاء2]

ام سعد نوووووووضي امخليا النت شغال وراقده
هياااااااا نوضي

[ميمونة]

حبل الوصل صباح النور ياريت تردي علي سؤالي والا يعرف يجاوبني

بوسي منوره والله

[رجاء2]

صباح الخير يا حبل الوصل كيف حالك وشني آخر اخبارك
ميموتة الحبه خذيتيها بروحك والله صرفها ليك الدكتور

[حبل الوصل]

عادى ياميمونة ممكن يصير حمل مع كلوميد بس ربي يسهلك الحال وتكونى حامل يارب

[ميمونة]

الدكتور وصفلي حبيتين باليوم بس من غير مايتابع ويشوف التبويض هل استحق كلوميد او لا فنصحوني اني مادام مانعرف تبويضي خودي حبة واحده فقط هدا راي صديقة لي خير من حبيتين ممكن يسببو تكيس
وتوكلت واخدت حبه بس
بس ماتابعت

[حبل الوصل]

قصدك ماشوفتيش كانا فيه بويضة والا لا بعد خذيتى الكلوميد

[ميمونة]

الدكتور وصفلي علي تلات حبوب من غير مايشوف هل تبويضي كويس او لا مرات كويس ومانستحق كلوميد

قلت خلي نتوكل وناخد حبه بس وبعدها نمشي يوم12 ونشوف هل نستاهل ناخد 3 حبوب او لا

صار نصيب ومامشيتش تابعت التبويض الله غالب

وهده قصتي

[حبل الوصل]

ان شاءالله تكونى حامل ياميمونة

[poucie]

منورة بوجودك يا ميمونة الله يرزقك الحمل السليم انشاء الله انتي وكل الاخوات يا رب العالمين

[رجاء2]

ميمونه
المفروض راك مشيتي على كلام الدكتور وتابعتي التبويض عشان ابرة التفجير هي اللي تمنع التكيس سوا كنت واخذه حبه او اكثر
وانشاء الله خير لانه كل شئ عند الله

[ميمونة]

صدري صاير غريب والله بنات وحلمتي بارزه اكتر ولما نضغط عليها تالمني هل هده علامه للحمل

[رجاء2]

انشاء الله تكوني حامل ياميمونة

[حبل الوصل]

هى اكيد من علامات الحمل بس حتى المنشطات تخليك تحسي بنفس الشي

[ميمونة]

ها ممكن

بارك الله فيكم علي التفسير

واحد مايتفائلش هلبه خلي امله ماتخيبش مره عاشره

هههههههههههههههههههه

الحمد لله

[ميمونة]

بارك الله فيكم

[poucie]

انشاء الله خير يا ميمونة ماتحطيش في بالك وانتي يا رجاء زيدي فوتي يومين وديري تحليل الحمل بس مادابيك اديريه الصبح اول ما تنوضي من النوم لانه يكون البول( اكرمكم الله ) مركز

[ميمونة]

رجاء عندك اطفال والا متزوجه جديده

[أم سعد]

السلام عليكم

صباح الخيرات

أهو جيت يارجاء :)

[poucie]

مرحبتين يا ام سعد وينك شكله ابو سعد مش مخليك في حالك ههههههههه

[رجاء2]

بوسي حتى انا هضا اللي نبي انديره انراجي شوية اخرى
ميمونة انا متزوجه ليا 8 سنوات وعندي ولد وبنت
ام سعد نورتي التجمع

[أم سعد]

أهلين بوسي ... والله حااااااااااله ... نخمم في الغداء شن نطيب

[رجاء2]

ام سعد كنك طولتي والا شنو فيه؟ تعرفي انا مش عارفه ليش حبيتك واااجد

[أم سعد]

القلوب عند بعضها يا رجاء :)

[رجاء2]

hwaml13ام سعد كنك طولتي والاشنو فيه

[أم سعد]

شن أخباركم ؟؟؟؟

نسرينا وينك اليوم؟؟؟

[أم سعد]

أنا قاعدة يا رجاء

[poucie]

ما تفكرينيش في تخميم الغذاء والله مشكلة الوحدة ما تعرف شن انطيب لين دماعها ايش من التفكير تعرفي اني مرات نبدا انطيب في الغذاء وانفكر في غدوة شن بنطيب والله حالة وخلاص

[أم سعد]

خيره الموقع اليوم؟؟؟

[أم سعد]

ويــــــــــــــنــــــــــــــــكم؟

[أم سعد]

في آخر الحلقة قعدت بروحي

[poucie]

لا يا ام سعد حتى اني قاعدة لاكن عندي مشكله مش عارفتها هي من جهازي والا من الموقع

[رجاء2]

شكله الموقع فيه مشكله

[أم سعد]

من االموقع

[poucie]

شن يا ام سعد شن ناوية اطيبي اليوم وحتى انتي يا رجاء قولينا شن بطيبي

[أم سعد]

نويت ... بازيلياء وأرز أبيض

[رجاء2]

السلام عليكم ورحمة الله وبركاته
انا جيت ...

[رجاء2]

خلاص يابنات شكله معاش فيه خطأ بالسيرفر الخاص بالموقع

[ليبياقلبي]

يسعد مساكم من موجود

[ليبياقلبي]

مساء الخيرات
رجاء ربي كريم وماتييايشس مدام ربي موجود
ميرنا والله العظيم بالعكس انت خشي وافتحي قلبك لينا باهي خيرك متمشيش لدكتور محمد المحيشي والله هلبة حملوا علا ايديه جربيه
ووووووووووووووسلام لي بوسي وخيرها روان والله مانعلم بيها

[ليبياقلبي]

سلام لي عيون كيف حال صغارك تو ا
سلام لس ام سعد تتيمو ايه واهلا بيك هيلدا وري يتبت

[ليبياقلبي]

خاطري نهدرز معا حد
يارب نلاقي حد

[رجاء2]

مرحبا ليبيا
شن اخبارك انا خشيت قبل اشويه وشكله مافيش حد

[سورينام]

السلااااااااااام عليكم بنات ليبيا الحبيبة

[رجاء2]

ليبيا
في الصبح تعطل الموقع (خطأ في السيرفر)
هضا عليش مافيش حد من البنات

[ليبياقلبي]

هلا رجاء وسورينام ويييييييييييييييييييينك كيف حالك وحال الصغار

[ليبياقلبي]

رجاء انت منين

[ليبياقلبي]

امس اختي الصغيرونة مشيت لي طربلس خديت طاقية بي قونيطها وبالشال لي بنوتي تهبل والله حاجات البنات محلاهم وتصدقوا انا من بداية حملي نقول يارب بنية يارب نحب البنات اكتر انا بس اهلي مازال ماخدوا شي لي البيبي بس عتندي اخختي هادي صغيرة كبيدتي من يوم تزوجت وهي تهدلي هيا دلوعة بابا تقرا اولا جامعة تاخدبي والله حوايج الحمل اغلبيتهم منها وتوا قريب تهبل علا البيبي في محل اسم هايدي في شارع ميزران ننصحك يا اية فيها قفطاين لي بنوتات يهبلوا مش عاديات

[رجاء2]

رجاء انت منين
اهلا ليبيا انا من اجدابيا
وانتي منين وعندك اصغار والا لا

[أم سعد]

السلام عليكم

أنا جيت

:)

[رجاء2]

البياين مافيش حد هيا تصبحو على خير

[رجاء2]

خير يام سعد قبل سكرت لكن تحشمت منك

[أم سعد]

أهلين رجاء كيف حالك توا؟؟

[أم سعد]

ربي مايحشمك

كان عندك ماديري عادي

هو انت تسكني في اجدابيا؟؟ ومواليد كم انتي؟؟

[رجاء2]

تصبحي على خير يام سعد

[أم سعد]

قدامك كل خير

[عيون زوجي]

any body there

[عيون زوجي]

السلاااااااااااااام عليكن...
منو مازالت موجودة في التجمع
ولا الصقع خلاكم ترقدوا دجاج وتنوضوا نعاج
ههههههههههههههههههههههههههههههههههههههههه

[عيون زوجي]

ليبيا قلبي..مبروك ما شرولك للبيبي
ويارب تشوفيها بين ايديك بالصحه والسلامه
..............................

[عيون زوجي]

رجاااء ماشاءالله
ديمه متواجده شكلي بنسلملك ادارة التجمع
مش ينطفى هالنشااط وتختفي؟؟؟

[عيون زوجي]

ام سعد و الايمان كيف حالكم
وشن مدايرين في هالكسااااااااد
انا كسدت وليبيا مافيها وين تتدهوري في الصقع مع صغيورتك
مجمع سوق الثلاتاء كل يوم فيه والنتزه في الشط صقع ونسمه دلوني وين نمشي كساااااااااد

[عيون زوجي]

ايه..راجلك طول في بنغازي
شكلها ام اسيل دارتها وجابتلك الضرة للحوش الجديد
حي اعليك بيخليك في هالحوش القديم..

[أم سعد]

yes :) .....

[عيون زوجي]

سوريناااااااااااام شن قصتك
ماعادش تخشي زي قبل
كيف حالك وحال سارة وفراس
ومولى بيتك....
ووينك وشن اخبارك وكملتي صيام ولا لا

[عيون زوجي]

هلا وغلا بام سعد
كيف حالك وحال سعودي وبوه؟؟؟؟؟؟؟؟

[عيون زوجي]

روحوا اماليك ولا مازال
وحوشك شن صار فيه لوين واصلين في البني؟؟؟

[أم سعد]

أهلين عيون نورتي وينك اليوم؟؟

[أم سعد]

هلا وغلا بام سعد
كيف حالك وحال سعودي وبوه؟؟؟؟؟؟؟؟


الحمد لله تماااااااااااااااااااااام في أحسن حال

[أم سعد]

روحوا اماليك ولا مازال
وحوشك شن صار فيه لوين واصلين في البني؟؟؟

مازال ماروحو يبو لبداية الشهر

وحوشي نزوق فيه مازال ماكملتش

[أم سعد]

كيف حالك انتي والصغار وبوهم؟؟

[عيون زوجي]

http://forum.hwaml.com/imgcache2/hwaml.com_1293054006_373.jpg (http://www.a7laqalb.com/vb/t36269.html)
.http://forum.hwaml.com/imgcache2/hwaml.com_1293054006_489.jpg (http://www.a7laqalb.com/vb/t36269.html)
http://forum.hwaml.com/imgcache2/hwaml.com_1293054005_495.jpg (http://www.a7laqalb.com/vb/t36269.html)
http://forum.hwaml.com/imgcache2/hwaml.com_1293054006_557.jpg (http://www.a7laqalb.com/vb/t36269.html)
http://forum.hwaml.com/imgcache2/hwaml.com_1293054005_508.jpg (http://www.a7laqalb.com/vb/t36269.html)
http://forum.hwaml.com/imgcache2/hwaml.com_1293054006_693.jpg (http://www.a7laqalb.com/vb/t36269.html)

[عيون زوجي]

ربي تخشيله بالخير ويكون عتبه الخير اعليكم
وانشاءالله يروحوا اهلك بالسلامه
بتجيبي في حوشك ولا بتستجلوا البني ولا كيف؟؟
وحوشك الجديد وين؟ وانتم توا وين؟

[عيون زوجي]

اليوم حاولت انخش الصبح بس كان فيه مشكله في الموقع....
الله غالب فقدتكم...

[عيون زوجي]

وينك يا ام سعودي؟؟؟؟؟؟؟
؟؟؟؟؟؟

[أم سعد]

الله يسلمك .. بارك الله فيك

والله بنحاول نكمل البني ونطلع في حوشي ... وبنيتي في 11 يوليو

وتوا قاعدة في حوش بوي في بن عاشور

[أم سعد]

ومشت عيون وقعدت بروحي يلا تصبحو على خير

إلى الملتقى

[أم ردينة]

سألتكم مفيش حد رد عليا قلتلكم نبي اندير لمه السبوع الجاي انشاء الله شنو تقترحو عليا اندير؟؟؟؟؟؟ مفيش ولا حد رد عليا . العفوووو

[أم سعد]

السلام عليكم

صباح الخيرات

أم ردينة ... والله مانعرف بس في الصفحات اللي فاتو في اقتراحات حلوة

أرجعي أقريهم

أنا قاعدة ماقررت شي ... وكل واحد شن يحب

أنا نحب ندير صواني ... عشاء رقيق كله يعني

وفي اللي يحب المسقي

قولي مثلا انتي شن خاطرك ونقولولك احني مثلا نقصي هذه والا زيدي هذه

هكي أحسن نحس


وين التجمع فااااااااااااااااااااضي

[رجاء2]

صباح الخير يام سعد ساااامحيني يااحبيبة والله ماانتبهتش لسؤالك لانه كنت فاتحه على الصفحه لولى تاريتا فتحت صفحه اخرى وماانتبهتشانا مواليد1977

[poucie]

خير يا جماعة الخير
ام سعد شخبارك اليوم
نسرينا وينك شكلك إجازة ؟؟؟
رجاء شن اخبارك؟

[poucie]

من فضلكم عندي استفسار نبي نعرف وين ايديرو في الاتراسوند 3d يعني في اي عيادة لانه اللي نمشيله يقول ما عندناش اني انتابع في الاخوة هما قالو ان عندهم بس عاطل من فضلكم الي تعرف وين تقولي شكراً مقدماً

[رجاء2]

ام سعد انشاء الله غير مانك زعلانه لانه وانا انشوف في مشاركتي في الصفحه الاولى قعدت انقول كنها ام سعد طولت في الرد مانحسابش انك راده في الصفحه التانيه وهذي تاني مره اتسير معاي

[رجاء2]

صباح الخير بوسي
انتي قصد السونار .الموجات فوق الصوتيه

[poucie]

ايوة يا رجاء الالتراسوند هو نفسه السونار والموجات الفوق الصوتية

[أم سعد]

السلام عليكم

رجاء .. صباح الخيرات .. نورت التجمع ... لالا مانيش زعلانة .. كيف حالك اليوم

بوسي .. صباح الأنوار .. الجهاز في في الجلاء لكن يبي واسطة أعتقد ... وفي في السويسري ثلاثي ورباعي لكن أعتقد انه تكلفته عالية ... وقالو في في مصحة تانية أعتقد في جنزور .. انتي علاش تبي اديريه؟؟

[poucie]

شكراً يا ام سعد خلاص تواء انشوف السويسري
اني نبي انديره لانه خلاص الفضول قتلني نبي نعرف جنس الجنين

[أم سعد]

أنا ننصحك تستني للسابع أقل شي

حتى تشوفيه وهو كامل الخلقة إن شاء الله

أنا نفكر نديره توا

لكن مش عارفه مازال

[poucie]

زعما هكي رأيك
انا غير فضول مش اكثر مع اني مقتنعة والحمد الله انه اللي ايجي من ربي يا محلاه المهم ايكون كامل الخلقة دون زيادة او نقصان

[أم سعد]

والله هذا رأيي

تعرفي أنا كان الفضول بيقتلني

مشي صارتلي ظروف خلتني مانشوفاش إلا في السادس

يعني اصبري منك ليك خير :)

[أم سعد]

وينك يا رجاء ؟؟؟؟ ان شاء الله غير الغداء ماشيطش بس

[poucie]

يلا نصبرو وخلاص بارك الله فيك يا ام سعد على النصيحة

[أم سعد]

وفيك بارك الله

نسرينا غياب يومين إن شاء الله خير ؟؟

[رجاء2]

شكلها عيون عطتني بعين اليوم مشغوووووووله على طول

[أم سعد]

ربي يعااااااااااون

[عيون زوجي]

السلااام عليكم
كيف حالكم اليوم ووينكم
شكله كله نووووووووووووم
نوضوا انشطوااااا هيا بنهدرزوا كساااااااااد
ويــــــــــــــنـــــــــــــــــكم؟؟؟؟؟؟؟؟؟؟؟؟؟؟

[عيون زوجي]

انا مريضة رقبتي محتقنه وراسي ووداني يسطروا حاله
شكلها بداية برده
لاباس اعليا وطهور ليا انشاءالله

[ام لقمان]

السلام عليكم
سلامتك ياعيون والف لاباس عليك

[ام لقمان]

عليك وعلى الزعتر بخريه واستنشقيه ومضمضى بيه
وانشالله ماعندك سو

[رجاء2]

بسم الله الرحمن الرحيم


موقع يوجد به العديد من التلاوات الجميلة و الادعية ويوجد به مزايا كثيرة انتمنا تعجبكم اخواتي

الرجاء الضغط على الرابط
http://www.tvquran.com/



السلام عليكم ورحمة الله وبركاته

[ام لقمان]

تسلمى اختى رجاء
ويجعله المولى فى ميزان حسناتك

[ام لقمان]

شكلها اعيون عدت رقدت
مسكينه الباين متخده بكل

[ام لقمان]

السلالالالالالالالالالالالالالالالالالالالالالالال الالالالالام عليكم

[أم سعد]

السلام عليكم

خيرنا معاش نتلاقو العفوووو

[رجاء2]

خير يام سعد
.ام لقمان كيف حالك
عيون لاباس عليك باش تعرفي انك مديره حق لما امرضتي امرض امعاك الموقع وكسد
ام سعد كنهم مش قاعدين لاحر لاشرhwaml15

[أم سعد]

والله مانعرف قعدت بروحي وخلاص

[أم سعد]

اليوم خميس شورهم كلهم طالعين يهيجو

إلا أنا ياناري عليا

:(

[أم سعد]

عيون طهورا ان شاء الله

ردي بالك على الصغار

[رجاء2]

ام سعد انتي قاعده والا مشيتي

[رجاء2]

كيف صار سعودي جاء....ايهبل

[ام ريحان]

السلام عليكم :والله ليكم وحشه

[رجاء2]

مرحبا ام ريحان ....أنستي

[رجاء2]

ام ريحان
اول مره انتقابل معاك

[ام ريحان]

ربى يرزقكم ويرزقنى الذرية الصالحة آمين
الحمد لله بعد ما رميت ربى عوضنى الحج

[ام ريحان]

اهلا بيك رجاء كيف الحال

[ام ريحان]

انا كنت فى الحج وقعدت فتره مفتحتش النت بكل تعرفى عوايد الليبين ماشى وجاى

[رجاء2]

ماشاء الله حج مبرور وذنب مغفور ..الله يتقبل منك

[رجاء2]

انا مشيت عمره رمضان 2009 ...جو روحاني لاقوة الابالله

[ام ريحان]

عرفينى عليك اكثر

[رجاء2]

عرفينى عليك اكثر

انا من اجدابيا مواليد77 خريجة كلية علوم متزوجة من8 سنوات وعندي ولد وبنت وليا 5 سنوات ماحملتش بديت في العلاج من سنتين والشهر هضا واخذه علاج وقاعدة نننتظر في رحمة ربي

[رجاء2]

وانتي من وين ...شكلك من المنطقة الشرقية

[ام ريحان]

انا من طرابلس مواليد 86 خريجه كلية الزراعة متزوجه ليا سنة حملت ورميت فى الشهر السابع توا ليا4 شهور رامية ومازال مش حامل ربى يرزقنى توم يارب انت القادر على ذلك

[رجاء2]

تعرفي انا ولدت في اول اسبوع في السابع تؤم لكن الولد توفا والبنت عاشت . الحمل جا بعد عام ونص وبالعلاج

[رجاء2]

مادام احملتي من قبل يبقى انشاء الله مافيش مشكلة عن قريب تحملي بأذن الله

[رجاء2]

ام سعودي ...حتى انتي قعدتي مشفره

[ام اسيل]

مرحبا يابنات
منورة يارجاء تواجد دائم
انتي اكيدة مغربية ولا زويية هضوم عرب اجدابيا
على فكرة راجلي مغربي

[ام اسيل]

وينكن رقدتن ولا شنو

[رجاء2]

منورة بوجودك ام اسيل

[رجاء2]

اصلا انا كنت امطفيه الجهاز لكن قلت خليني انشيك على البنات انشوف من اللي واعية

[أم سعد]

الســـــــلامـــ عليكمـــــ

جمعة مباركة

كيفــــ حـــالــ الجميعـــ

[حبل الوصل]

السلام عليكم شن اخبارك ام سعد
ام ريحان مبروك عليك الحج وربي يتقبل منك ويغفرلك يارب

[أم سعد]

أهلين حبل الوصل

كيف حالك اليوم

[رجاء2]

ما جاء في حق الزوج على الزوجه
عن انس بن مالك رضي الله تعالى عنه عن النبي صلى الله عليه وسلم انه قـــــــــــال
(( ان المرأة اذا صلت خمسها وصامت شهرها واحصنت فرجها واطاعت بعلها فلتدخل من أي أبواب الجنة شاءت))
ماجاء في حق المرأة على الزوج
قال أنس بن مالك رضي الله تعالى عنه :سئل رسول الله صلى الله عليه وسلم أي المؤمنين أكمل أيمانه ؟ قــــــــــــــال
(( أحسنهم خلقا مع اهله ))

[أم سعد]

بارك الله فيك يا رجاء

[رجاء2]

وفيك يام سعد
انا تو انجهز في روحي باش نمشي الي بيت اهلي.....باي.ســــــــــــلام

[أم سعد]

حتى أنا نجهز في روحي بنطلع ندهور

سلامات

[تيمو ليبيا]

السلام عليكم ام ريحان حج مبرور ودنب مغفور يارب تعرفي طلعتي بنت صفي حتي اني نقرا في كلية الزراعه بس تزوجت وسيبتها وخديت موادي وبنعادلهم اهني وبنقرا انتي تخرجتي ولا مازال واما قسم وشني جو الحج قالو زحمه السني مشالله ربي اينولهانا يارب

[ام لقمان]

اهلين ام ريحان
ربنا يتقبل منك صالح العمل

[ام لقمان]

كيف حالك تيمو؟
ووينك يا عيون انشالله اليوم احسن؟

[ام لقمان]

شن اخبارك رجاء
وكيف حال اوليدك وبنيتك؟

[أم سعد]

السلام عليكمــ

[ام اسيل]

ما جاء في حق الزوج على الزوجه
عن انس بن مالك رضي الله تعالى عنه عن النبي صلى الله عليه وسلم انه قـــــــــــال
(( ان المرأة اذا صلت خمسها وصامت شهرها واحصنت فرجها واطاعت بعلها فلتدخل من أي أبواب الجنة شاءت))
ماجاء في حق المرأة على الزوج
قال أنس بن مالك رضي الله تعالى عنه :سئل رسول الله صلى الله عليه وسلم أي المؤمنين أكمل أيمانه ؟ قــــــــــــــال
(( أحسنهم خلقا مع اهله ))
رجاء مفروض بعدها قلتي ماشية لحوش هل راجلي مش حوش هلي هههههههههه
رجاء حتى انا مواليد 77
وعرب اجدابيا يعزو عليا لان راجلي منها
وطمنينا شن صار عندك معش عاودتي التحليل

[ام اسيل]

ام لقمان مرحبا بالغالية
وينك معش تخشي واجد
متغيبيش علينا

حبل الوصل وحشيني كيف حالك حتى انتي معش تخشي واجد ان شاء الله خير ضروري تبرير الغياب ولا احضار ولي الامر ايوه رانا مدرسة قاشطة

[ام اسيل]

اهلين ام سعد
ماشاء الله وليدك يهبل اكيدة يشبه لبوه
يابنات قالو راجل ام سعد واحد طرف مش طبيعي وام سعد تغير عليه من النسمة اللي تهي
اسكتن راكن تقولن اني بصيت انا ماقلت شي بعدك هي في الشهور الاخيرة وهرمونات الحمل يخلنها متعصبة كان شاطت فيكن مش شوري

[أم سعد]

ههههههههههههههههههههههههه
هههههههههههههههههههههههه

معلومات دقيقة من وين جبتيها يا أم أسيل؟؟؟

[ام اسيل]

ههههههههههههههههههههههههه
هههههههههههههههههههههههه

معلومات دقيقة من وين جبتيها يا أم أسيل؟؟؟


العصفورة قالتلي

[أم سعد]

تي غير من هي العصفورة

وشن تعرفي تاني

ههههههههههههههههههههههههههههههه

[رجاء2]

ام اسيل ....ضلمتيني و الله
كيف نمشي لحوش اهل راجلي وانا قاعده فيه وبعدين راجلي وحيد اهله وابوه وامه ( عمي وعمتي )متوفيين الله يرحمهم ويسكنهم فسيح جناته

انا نبي انسامحك عشان خاطر راجلك ولد عمي

[رجاء2]

ام سعد
شن اخبار الدهوير طلعتي والا لا

حبل الوصل
مازال 3 ايام على موعد الدوره

[أم سعد]

أهلين رجاء .. ايه طلعت ... إن شاء الله تطلعي حامل وماتشوفيها الدورة بككككككككككككل إلا بعد 9 شهور

[رجاء2]

تمام ام سعد المهم انك غيرتي جو
وانشاء الله ربي يسمع منك الثلاث ايام انحس فيهن ثلاث سنوات

[أم سعد]

شن جو إجدابيا راجلي شاد فيا يبي يرفعني ليها

خاطره يدهور فيها ... ديمة يحكيلي عليها

[رجاء2]

كيف صار ام سعد هو راجلك جاي من قبل لجدابيا وشنو اللي عاجبه في اجدابيا مقارنة بطرابلس
اعتقد انكم من طرابلس

[أم سعد]

راجلي يحب جو الريف .. الهدوء .. والمناظر الطبيعية

[ام اسيل]

راجلي يحب جو الريف .. الهدوء .. والمناظر الطبيعية

هههههههههههههههههههههههههه رجاء احكيلها
بس اجدابيا مش ريف مدينة كبيرة وهي شبه صحراوية
بس الحق ناسها طيبين لابعد الحدود

[أم سعد]

شكار العروسة

:)

تي وين مشيتي انتي كملي شن قلتي

[رجاء2]

شوفي هي اصغر من بنغازي لكن ناسها غير وجوها غير واللي يطلع منها لازم ايفكر فيها وتبعد عن البحر 20كم (مدينة الشمس)

[أم سعد]

تو نزورها ونحكم عليها

[ام اسيل]

اه ياربي
خاطري في بيبي والله تقول ماعمري ضنيت بنموت على بيبي

[رجاء2]

100000 مرحبا صدر الحوش لك و العتبه لنا بعد تبي اتجي قوليلينا

[أم سعد]

ربي ينولك اللي في بالك يا أم أسيل

[أم سعد]

100000 مرحبا صدر الحوش لك و العتبه لنا بعد تبي اتجي قوليلينا

تسلمي ... إن شاء الله نجوك في الفرح

[رجاء2]

والله حااااااسه بيك ام اسيل حتى انا خلاص نين بكل

[رجاء2]

ام اسيل قريتي الرد اللي امبدري بخصوص بيت الاهل

[أم سعد]

زعمه كيف حال عيون اليوم غطشت

وآية خلت مكانها .. وتيمو ليبيا .. وليبيا قلبي .. وكل الليبيات اللي في التجمع اختفو

إن شاء الله خير

[ام اسيل]

رجاء
عليش جبتي بنتك في السابع وكم جا وزنها
وكيف درتي معاها وتوا صحتها تمام ان شاء الله

وشكرا يا ام سعودي ان شاء الله ربي يونسك ويسعدك بشوفة سعودي

[أم سعد]

سلمك يا أم أسيل

[رجاء2]

هههههههههههههههههههههههههه رجاء احكيلها
بس اجدابيا مش ريف مدينة كبيرة وهي شبه صحراوية
بس الحق ناسها طيبين لابعد الحدود


الله يجبر بخاطرك

[ام اسيل]

ام اسيل قريتي الرد اللي امبدري بخصوص بيت الاهل
قريته حبيبتي
وان راني نبصر وربي يخليلك راجلك
ومعاك صبيات مش متجوزات في الحوش ؟

[ام اسيل]

الله يجبر بخاطرك

لا والله جد انا لما نمشي غادي لين نتحشم من الكرم والمعاملة ناس على نياتها وطيبة جد
وبعدين مسقط راس عيالي حتى وكان لازم نقول هكي هههههههههههههه نبصر والله ناس عسل

[حبل الوصل]

ام لقمان مرحبا بالغالية
وينك معش تخشي واجد
متغيبيش علينا

حبل الوصل وحشيني كيف حالك حتى انتي معش تخشي واجد ان شاء الله خير ضروري تبرير الغياب ولا احضار ولي الامر ايوه رانا مدرسة قاشطة

انتى اللي وحشتينى يالغالية والله مش متغيبة ولاحاجة بس النت عندى زفت مايفتحش كويس من بدرى نحاول نكتب مايبيش

[رجاء2]

راجلي ماعندش خوت ولا خوات
وبنتي جبت معاها تومي ولد(ولد وبنت ) الولد توفا بعد يوم والبنت كان وزنها ما اتوقعيش بكل 800 جرام وقعدت شهرين في المستشفى ولما طلعت كان وزنها كيلو ونص وما عرفتش كيف نصرف معاها لولا جارتي هي اللي تعاملت معاها لين شدت روحه شويه

[رجاء2]

ام سعد وين عديتي

[ام اسيل]

راجلي ماعندش خوت ولا خوات
وبنتي جبت معاها تومي ولد(ولد وبنت ) الولد توفا بعد يوم والبنت كان وزنها ما اتوقعيش بكل 800 جرام وقعدت شهرين في المستشفى ولما طلعت كان وزنها كيلو ونص وما عرفتش كيف نصرف معاها لولا جارتي هي اللي تعاملت معاها لين شدت روحه شويه
وشن سبب الولادة المبكرة والله موقف صعب بس الحمد لله ربي ماينسى حد

تذكري شن كانت طريقة العلاج اللي خذيتيها وقتها ؟

[أم سعد]

قااااااااااااااااااااعدة

[ام اسيل]

حبل الوصل غيري النت رانا مانقدروش على غيابك ياحلو

[رجاء2]

العلاج اللي خذيته لما حملت بالتوم ابر منشطه اسماها مينوبير(meno per) وتوا انا لما كلمت دكتوري وقلت له عطيني نفس الابر اللي زمان قالي هذي حاليا مش متوفره وعطاني ابر مينجون

[حبل الوصل]

اه ياربي
خاطري في بيبي والله تقول ماعمري ضنيت بنموت على بيبي
والله نفس الحالة ياوخيتى بالذات لما نشوف وحدة حامل ولاجايبة
معادش نحب نمشي للوالدات منبيش نديرهكى ومش لانى حاسدتهم بس
خاطرى نكون زيهم غصبا عنى الموضوع

[رجاء2]

ام اسيل
كان سبب الولادة انه ليا فتره اتجيني ليا والم في ضهري بس ماكنتش عرفه انه هضا خطر ويؤدي الي الولاده سكتت عليه ولاني ابروحي في الحوش

[رجاء2]

حبل الوصل
الله يجبر بخاطرك والله حاسه بيك
ام سعد
شن رايك في جو الدراما

[حبل الوصل]

سامحونى توة والله النت درهلى كبدى والراجل جاي في الطريق كاين مسافر ربي يوصله بالسلامة نمشي نجهز روحى

[ام اسيل]

حتى انا ياحلوات
حان وقت نومي
نشوفكم بكرة على خير واخبار سعيدة
تصبحو على خير

[أم سعد]

ربي يرزقكم وينولكم اللي في بالكم

الحمد على سلامة زوجك ياحبل الوصل

بري تكمي الأمور

[ღॐ آية ღॐ]

ام سعد ربي يحفضك ووالله استاحشتكمhwaml29
راجلي روح اليوم الضهر وهادي مروحتنا من حوش سيدي
كيف حالكم كلكم كلكم والله مستاحشة نسمع اخباركمhwaml13.

[أم سعد]

أهلا ااااااااااااااااااااااااااااااا أيوتة

بنت حلال والله

نورت التجمع

[ღॐ آية ღॐ]

امس اختي الصغيرونة مشيت لي طربلس خديت طاقية بي قونيطها وبالشال لي بنوتي تهبل والله حاجات البنات محلاهم وتصدقوا انا من بداية حملي نقول يارب بنية يارب نحب البنات اكتر انا بس اهلي مازال ماخدوا شي لي البيبي بس عتندي اخختي هادي صغيرة كبيدتي من يوم تزوجت وهي تهدلي هيا دلوعة بابا تقرا اولا جامعة تاخدبي والله حوايج الحمل اغلبيتهم منها وتوا قريب تهبل علا البيبي في محل اسم هايدي في شارع ميزران ننصحك يا اية فيها قفطاين لي بنوتات يهبلوا مش عاديات

مبروك ماشرولها
ويارب لِباس التقوى والعافية
ياريتك قلتيلي من قبل عليه المحل لي اني كنت في حوش بابا
وطلعت انا وماما على رجلينا لان حوشهم في المدينة مشيت لي صالة القادسية
في اول سبتمبر ووالله ما لاقيت حاجة باهية للبيبيhwaml15..
نبي نزيدها قفاطين ومحصلتش ...

[أم سعد]

السلامـــ عليكمــ

صباحـــ الأنواااار

[ღॐ آية ღॐ]

صباح الخيرات
كيف حالك ام سعد
وشن اخبار النونو؟

[أم سعد]

أهلين آية .. أنا الحمد لله وإن شاء الله النونو حتى هو بخير

إنتي شن أخبارك بعد هالغيبة

[ღॐ آية ღॐ]

الحمد لله بخير
نستعد للمحوال
وربي يعيني والله خايفة منكملش قبل ما نخش شهري
امس والله نحساب عمري نولد والفالق بدي فيا
وجع في ظهري وليات ورا بعض بس هدا شي كويس
ماما قالتلي هادي تساهيل للولادة باش عظام الحوض والضهر تنفتح..
ربي يستر ونكمل الثامن على خير يارب

[ღॐ آية ღॐ]

وين نسرينا
مش باينة
ان شاء الله خير ..

[أم سعد]

والله حتى أنا خايفة مانحولش قبل مانخش شهري

الحكاية الباين انها مطولة ويستر الله وخلاص

أنا مازال ماحسيت بشي أموري عادية .... ربي يسهل علينا ونولدو على خير

إيه نسرينا ليها كم يوم مغطسة إن شاء الله خير

[ميمونة]

السلام عليكم


كيف حالك ايه وحال وليدك وبنيتك انشاءالله مش متعباتك وعاش من شافك والحمدلله علي سلامة زوجك

[عيون زوجي]

السلاااااام عليكم..
كيف حالكم جميعا؟؟؟؟؟؟؟
وشكر جزيل لكل الغاليات يلي سئلوا عني
البردة مازال فيا بس كل يوم احسن ولله الحمد
ساره وحمودي كويسين
ومش عارفه امتى انقوي قلبي ونطهر محمد

[عيون زوجي]

ميمونه... كيف حالك وروح راجلك ولا لا؟

[عيون زوجي]

ام اسيل..ربي يرزقك بقرة عين وليد ولا بنيه انتي وكل الغاليات يلي يستنوا ويتمنوا زيك يارب
ام ريحان...حجا مبرور وذنبا مغفور وتقبل الله منكم ويرزقنا حج البيت يارب
ايه..الحمدلله على سلامة زوزك وكيف حال ايوب واسيل
ام اسيل وحبل الوصل كيف حال الصغيويرة والرجاله معاكم
ام سعد ..بديتي تتطلعي من ورانا كيف حالك وحال سعودي
بس نبي نسئلك واعلاش اخترتي اسم سعد بالذات
بوسي..طمنينا عليك وعلى روان وشن صار عرفتي جنس البيبي ولا مازال
نسرينا..شكلك حامل وتعبانه وحم صح
ام لقمان..كيف حالك وحال عويلتك استحشناك وينك
ووين هالغيبه فيه بيبي عالطريق ولا شنوووو؟
ميرنا..كيف حالك يانوارة التجمع ؟؟؟
سوريناااام..وينك يا احبيبه وين هالغيبه انشاءالله المانع خير طمنيني اعليك بالله اعليك
تيمو...شن الجو وشن اخبار رفيف وماليزيا وجاكم الصقع ولا لا؟
ليبيا قلبي...كيف حالك وحال البنوته وشن قررتوا تسموها
ام ردينه..شن صار معاك في اللمه وفي طهارة عباده
انتي قررتي مسقي ولا حار
ام رفيده..وينك حتى مصارين البطن تتعارك واحنا خوات خشي طمنينا اعليك وعلى وليدك
وانتي مواعدتينا بقصة ولادتك ولا نسيتي...
حنين ومعراج وحمكم جاكم على التجمع ولا شنووو
ام الصبيان شن جوك وجو الحمل وفرنسا...
سامحوني لو نسيت نسئل على وحدة منكم كلكم في البال وعلى الرااااااس

[عيون زوجي]

صابرة ..واميسر ..وراجيه.. وسمحه..وساجدة ..وهنديه
وينكم يا بناااااااااااات وشن اخباركم؟؟؟؟؟؟

[عيون زوجي]

منو رح تجيب الاولى واديرلنا لمه في التجمع
لان التجمع مكسد ويبي شوية نشاط....
1-ايه
2-ام سعد
3-ليبيا قلبي
4-بوسي
5-ام الصبيان
6-حنين
7-معراج
وانتم رتبوا بالتدقيق انا مش متاكده منهم
وعقبال ما انديروا قائمه في السنه الجديدة:
1-ميرنا
2-حبل الوصل
3-ام اسيل
4-ميمونه
5-نسرينا
6-رجاء
7-راجيه
8-ام ريحان

[عيون زوجي]

نداااااااااااااء هااااااااااااام
الى كل من يعرف اي خبر عن لولي يطمنا
لوووووووووووووولي
لووووووووووووولي
لووووووووووووولي

[ام لقمان]

ام لقمان مرحبا بالغالية
وينك معش تخشي واجد
متغيبيش علينا
سلمك نشاده ام اسيل
غالبا انخش يوميا لاكن مانلقاش فيكن ممكن وقتى غير مناسب

[ميمونة]

سلمك نشاده ياوخيتي عيون والله روح والحمد لله

شن حالك وحال وليدك وبنيتك

[ام لقمان]

اهلين ياعيون
الحمد لله على السلامه
انشالله البرده عدت بلا عوده

[ام لقمان]

مراحب بالغاليه ميمونه
شن اخبارك انشالله خير

[أم سعد]

أهلين عيون

كيف حالك وكيف حال سارة ومحمد

قوي قلبك وطهريه كل ما تتأخري بيه يتصعب عليك

وإن شاء الله لاباس عليك

بالنسبة لاسم سعد بوه قال من قبل مايتزوج خاطره فيه على اسم الصحابي سعد بن أبي وقاص

وبالنسبة للطلوع أنا هذا وين نقصت الطلوع ومعاش نطلع

وأهو اليوم عندي لمة جياب

وكنت كل جمعة نطلع ندهور من الصبح لليل من غير باقي الأيامات

وتوا نقصت هلللللللللللللللبه

[ام لقمان]

شن تقولى ياعيون؟

ام لقمان..كيف حالك وحال عويلتك استحشناك وينك
ووين هالغيبه فيه بيبي عالطريق ولا شنوووو؟
خلينا انكبروا جنان قبل
اتصدقى بدوا خوتها ايخوفوا فيا بيها
خش احد منهم توا وقالى ماما الجو رايق ونت ماشاء الله
شن رايك انوض جنان؟
طبعا قريب هجمت عليه وهوا يضحك

[ام لقمان]

كيف حالك ام سعد؟
ربى ايتمملك على خير
وانشالله عتبت خير
ويمتعك بالصحه وراحة البال

[ام لقمان]

خاطين وما تبوش اتردوا
سلامات

[الايمان]

السلااااااااااااااااااااااااااام عليكم كيف حالكن يابنات
كنت عند هلي في بنغازي خميس وجمعة واليوم روحت مع ان ما فيش حد سأل
يا بنات مشيت للدكتور فتحي من الساعة 11:30 مانخش الا الساعة 3 وبصراحة الدكتور ما عجبنيش واجد الحالة واضحة وهو يبي يدخلني في متا هات انا في غنا عنها عشان هكي قررت اني نمشي العيادة اهليس عند مبروكة زوبي او نمشي لدكتورة ايمان بوطلاق اين احسن يا ريت تفاعلن معاي وتجاوبني وايمان بوطلاق وين تمسك ويا ريت رقم العيادة

[أم سعد]

أم لقمان ... أهلين كيف حالك ... سلمك ياربي

الايمان .. والله أنا مانعرفه الدكتور وانتي ولمن ترتاحي أكيد .. والدكتورات والله مانعرفهم تمنيت اني نخدمك بس والله مانعرف

[ميمونة]

ربي يحفضهم ليك يام لقمان يارب

[ღॐ آية ღॐ]

السلام عليكم


كيف حالك ايه وحال وليدك وبنيتك انشاءالله مش متعباتك وعاش من شافك والحمدلله علي سلامة زوجك

وعليكم السلام
ميمونة نورتي التجمع وانا حالي باهي والحمد لله
وايوب ناقصه يدير جوانح سلامته
امآ اسولة فاشكلها والله اعلم مش مطوله هلبا في بطني
بنيتي اوكان تسمع كلامي تقعد في مكانها لين تكمل التاسع خيرلها والله
وربي يستر وخلاص

[ღॐ آية ღॐ]

عيون ان شاء الله لاباس عليك
وننصحك استعجلي بطهارت وليدك قبل ما يبدى يقعمز ويمرد
والله يتعبك بعدين...

[ليبياقلبي]

يسعد مساكم انا نفسيتي تعبانة هلبة هلبة ومن مبكري نبكي الدكتور قالي مياه البيبي ناقصة واعطيني دواء والله نفسيتي تاعبنة ادعولي بالله عليكم

[عيون زوجي]

يسعد مساكم انا نفسيتي تعبانة هلبة هلبة ومن مبكري نبكي الدكتور قالي مياه البيبي ناقصة واعطيني دواء والله نفسيتي تاعبنة ادعولي بالله عليكم
الف لا بأس اعليك يا ليبيا
ماتخافيش معظم الحوامل تصير معاهم مشكلتك
اسمعي نصايحك دكتورك وماتشوفي شر لا انتي لا ابنيتك
انا في السابع كان عندي زيادة ماء الجنين
وفي بداية التاسع اتعدلت الكمية
ولله الحمد ولدي صحته كويسه
يارب ما تشوفي شر وسلامتك وسلامتها يارب

[عيون زوجي]

عيون ان شاء الله لاباس عليك
وننصحك استعجلي بطهارت وليدك قبل ما يبدى يقعمز ويمرد
والله يتعبك بعدين...
الله يبارك فيك يا ايه...
انشاءالله ناويه انطهره الاسبوع هذا كان سخر ربي
ادعولي وادعوله بس
ويارب ينولكم ما تتمنوا كلكم يارب
hwaml7hwaml7hwaml7

[عيون زوجي]

السلااااااااااااااااااااااااااام عليكم كيف حالكن يابنات
كنت عند هلي في بنغازي خميس وجمعة واليوم روحت مع ان ما فيش حد سأل
يا بنات مشيت للدكتور فتحي من الساعة 11:30 مانخش الا الساعة 3 وبصراحة الدكتور ما عجبنيش واجد الحالة واضحة وهو يبي يدخلني في متا هات انا في غنا عنها عشان هكي قررت اني نمشي العيادة اهليس عند مبروكة زوبي او نمشي لدكتورة ايمان بوطلاق اين احسن يا ريت تفاعلن معاي وتجاوبني وايمان بوطلاق وين تمسك ويا ريت رقم العيادة
انشاءالله لاباس اعليك
وانا من طرابلس مانعرفش دكاترة الشرق
بس اسم ايمان بوطلاق سمعته من ام اسيل وميرنا
اسئلي ام اسيل بأذن الله تساعدك

[ام اسيل]

مراحب بالغاليات
كيف حالكن اليوم
عيون لاباس عليك وانا والصغار تمام يارب نونسهم بخي ولاخية

ايه اهلين انستينا ها طمنينا شن جو بنغازي عجبت زوزك

ميمونة وحشتينا

رجاء اليوم عندك غياب بكرة خشي ومعاك ولي امرك

ليبيا قلبي متخافيش حتى انا صبيتي مرة صارتلها وعطوها اسبرين وتوا ماشاء الله وليدها عمره 4 سنين

الايمان انا نراجع عند ايمان بوطلاق وهي ممتازة جدا جدا وانا نطمن لها لابعد الحدود وعنوانها مقابل مركز شرطة الحدائق عيادة الامل
لو تبي نحجزلك انا ماشية الاسبوع الجاي ابعثيلي اسمك في رسالة وانا نحجزلك وفي يوم الحجز تمشي السعة اربعة ونص وتدفعي وترجي دورك

حبل الوصل سادك الراجل عذبتيه خشي هدرزي شوية

[عيون زوجي]

ويــــــــــــنـــــــــــــــكـــــــــــــــــــ ـــم؟؟؟؟

[عيون زوجي]

هلا وغلا بالغاليه ام اسيل
ياااااااارب يحقق مناك ويرزقك ب 5 صغار تانيين يارب يا مجيب الدعاء
لان دعوة المؤمن لاخيه في ظهر الغيب مستجابه..

[عيون زوجي]

انا حاصله في حمودة عيااااااااااط حاله
ليل ونهار ينقنق ومش عاجبه شي
ومايبيش يشد الزلباحه ويريحني نهائي
بسلامته متعبني هلبه

[الايمان]

يا ام اسيل ياريت تعطيني رقم العيادة وشنو تكاليف الحقن المجهري وكيف تباشر فيه وانتي تراجعي فيها عشان تزرعي؟

[ليبياقلبي]

باهي قوللي شن سببها المياة ناقصة وياعيون نحس في فرق بين نقص وزيادة مياة وخايفة تاتر علا البيي وخايفة من الولادة مبكرة

[سورينام]

السلاااااااااام عليكم

[سورينام]

كيف حالكم كلكم وحال صغاركم وازوازكم .. انشالله اموركم كلها تمااااااام التماااام ..

[سورينام]

عيووووون حبيبتي .. انا قاعدة متوفرة .. سلمك نشادة وياربي مانفقدك في يوم يا اغلى وخية .. اني كنت غاطسة في اللمات والجيابات ماشااااااااااااااااالله .. كلهم ولدو مع بعضهم .. شدي عندك .. يلفتي حكيتلكم عليها عندها 4 بنات و2 اولا وتوا زادت بنية ودارت لمتها يوم الجمعة .. صاحبتي عندها بنية وتوا زادت وليد ودارت لمتها السبت.. كنة عمي عندها 2 اولاد وتوا زادت وليد ولمتها ممكن الجمعة الجاية .. والحبل عالجرااااااار ربي يرزق وخياتنا اللي في التجمع آآآآآآآآآآآآآآآميييييييييييييييييين