تجمع حوامل ليبيا

[معراج]

سلام كبييييير لصابره الغاليه ولايه وحبل الوصل وميرنا وام رنوة وام رفيده وام ردينه وبوسى وتيمو ليبياوميمونه الحبوبه وكن نسيت حد سامحونى العتب على الداكره هلطالبات معاش خلن فيا عقل ووين عيون شن صار فيها ان شاء الله خير وحتى انا زيك يا حبل الوصل عطاني الدكتور سمير الكلوميد من 5يوم فى الدوره لمدة 5ايام هذاااا كان جت المعطوبه المقرفه البغيظه يلى محبطتنى وان شاء الله مانشبحها ياااااااااااارب ادعلي تررررررررررررررررررررررررربحن

[تيمو ليبيا]

اهلين لولي تبي الحق هيا حلوه بس رطوبه ونو ديما زي قطرمفيش فرق وبنسبه لالاانسجام مش هلبه الحق لانه فراق ماليا ووووووووووواعر لاكن حمدالله راجلي مريحني هلبه وبديت ناخد علي وضع ومعندكش جيه تانيه اهني

[تيمو ليبيا]

الله يسلمك معراج تعرفي ياريت تشربو المراميه هلبه والهي تنظف الرحم وكويسه ديريها في شاهي وربي يرزقك يارب انشالله

[نسرينا]

صبااااااااااااح الخير للجميع

اللهم اني اسألك بإسمك الاعظم الذي اذا دعيت به اجبت واذا سؤلت به اعطيت

ان ترزق كل اخواتي في هذا التجمع الحمل القريب العاجل ، وان تزرع بحولك وقدرتك جنين سليم معافى في ارحامهن ، وان تفرح قلبهن وتهدئ سريرتهن وازواجهن ..

اللهم آآآآآآآآآمين يارب العالمين

صباح الخير

والله العظيم دعوة من وسط قلبي لكل وحدة تبي وتتمنى وتستنى في الحمل

صابرة وتيمو ليبيا واية وميمونة ومعراج وميرنا و ام روفيدة و ام رنوة حبل الوصل بوسي والجمييييييييع

يومك طيب ان شاء

معراج وحبل الوصل شكلنا بنديروا تجمع الكلوميد اني كملت الكورس وممكن غدوة نمشي انراجع وانتابع حجم البويضات دعواتكم يا غاليات
وربي يسمعنا الاخبار الطيبة على عيووون

حاجة ثانية منو تعرف تفسر الاحلام ؟؟؟

[poucie]

خييييييييييييير يا بنات انا بصراحة نبي نشكر جميع الاخوات الي رحبوا بيا انا وباقي العضوات الجدد والله حسيتكم كانكم خياتي ربي يحفضكم ويحفضلكم عويلتكم ويرزق كل وحدة تبي تحمل بالحمل السليم المعافى بإذن الله .

[نسرينا]

ام لقمان

صباح الخيرات

.

[poucie]

صباح الخير نسرينا شخبارك انشاء الله كويسة

[نسرينا]

صباحوااا بوسي

اني بخير والحمد لله

انتي كيف احوالك واخبارك وشنو عندك بتقولي ؟

[ميمونة]

صباخ الخير شن حالكم

ناشطين عالصبح ماشاءالله عليكم

[نسرينا]

صباح النور
هههههههههههههههههه
صللي عالنبي يا ميمونة

كيفك ؟؟

[ميمونة]

اللهم صلي وسلم علي

تعرفي الساعه 11 عندي حصه مانحكيلكش مخليا طاقتي غادي يبوا جهد الصغار ههههههه

[ميمونة]

توا نستادن علي سلامتكم

نتلاقوا بعد الظهر انشاءالله يارب نخش ونلقي بشاره علي عيون

[نسرينا]

بالسلامة

ربي يعينك ويعاونك

.

[تيمو ليبيا]

السلالالالالالالالالام كيفكم يوم انشالله بخير والهي نايضه القايله اليوم وفاشله وليل منرقدش فيه ومازال بنتي تبي تقعد شكلها عاجبها الجو راحه وبوبه ههههه

[حبل الوصل]

كيف الحال ربي يسهل عليك ياتيمو
انى امس كنت في حفلة عرس روحت الساعة 1 ونايضة اليوم مرهقة وماخاطري ندير شي وزيادة حزامى وصدرى يوجعو فيا بكل متعبينى

[حبل الوصل]

عيون هيا خشي وطمنينا والله انشغلت عليك وووااااااااجد
ميرنا وينك اليوم
ام اسيل وحم شنو والله نحس في روحى متنكدة مش من مساله الحمل هذى من ربي لكن الناس ماتخلى حد مرتاح تعبونى

[حبل الوصل]

سورينام واية وين النشاط متع قبل ان شاءالله المانع خير

[تيمو ليبيا]

انشالله لاباس عليك حبل وصل شكلك قعمزتي مقابله المكيف غلفي روحك وشربي شاهي بليم ضربه ضربه وعلاش متنكده ربي مايجيبلك نكد يارب

[حبل الوصل]

لايوريك باس
حشاك فيه وحدة تبي تخرب عليا وتدورلى في المشاكل دوارة تبي تفتن بينى وبين خالاتى وبين راجلى بيش يقول هذى متع مشاكل وعلى اساس تبينى نتطلق والاراجلى يتزوج عليا انا هذا الشي مش خايفة منه ولو كان هو بيسمع كلامهم بعد 7 سنين عشرة والله مش مدورته لكن انى منحبش المشاكل

[معراج]

ان شاء الله يانسرينا مفتووووووحه قدامك ولما تمشي للدكتور يقولك بويضاتك 100في100ابررررة تفجييير على طوووول وهل شهر حاااامل ان شاء الله

[حبل الوصل]

هلا معراج نورتى
انتى وين تسكنى بالزبط

[معراج]

حبل الوصل المراه هادي وحده حسوده طنشي الكلمه العاديه ولكلمه يلي توجعك متخليهاش في خاطرك عطيها على راسها وماتسكتيلهاش تبي تحرقيها مزبوط طنشيها

[معراج]

هلا بيك انا في براك نفسها وانتى وين في سبها

[حبل الوصل]

المشكلة هيا ماتواجهش فيا تبث في الكلام عليا للناس وعلى العموم هيا مرة خالى
انى نسكن في سكرة بس نعرف ناس من براك ومن قيرة ومن تامزاوة انتى شنو قبيلتك

[معراج]

انا من اولاد وافي من القضيه

[معراج]

باهي سامعه بلمريه يلي ماتوا عيالها الخمسه لما انحرقت شقتها السنه يلى فاتت هادي من بنات عمومتى

[معراج]

شوفي مدام الكلام مانقال في وجهك وما سمعتيه بودنك ماتاخديش بيه يمكن يكون كله كدب وحد يبي يفتن بيناتكم

[تيمو ليبيا]

ليه عليها حرام عليها تخربلك في بيتك وعلاش شني تبي هيا تبيك بعيد سو متطلقه شني بتربح بعدها وهو صغير باش يصدقها مظنيتش والله ناس هادم مايبو حد مرتاح بردي قلبك وخليك واتقه انك صح وانشالله ربي ينصرك عليها

[معراج]

زوجي جااااااا وينادي فيا =على قولت السورييين دخيييييلو يقبر عظامي0بطولت عمري بعييييييد السو عليا

[ام لقمان]

السلام عليكم
لا اعيون ولا جرتها
شكله الوع وع واخد الجو اكله
يارب اتفرحينا عن قريب
حبل الوصل مرحبتين
روقى وماتعدليش عليها ولا على غيرها دائما وفى كل مكان ناس مريضين
نستحمد ان الكلام علينا ومش منا
والحمد لله انت رايقه فى حوشك والباقى اكله فاضى
مرحبتين معراج وشن جو الجنوب؟
احنا اليوم نار شاعله يلطف ربى بس

[ام لقمان]

دخيييييلو يقبر عظامي0بطولت عمري بعييييييد السو عليا
اى والله بعيد السو عليك يا معراج

[نعمة]

السلام عليكم ورحمة الله وبركاته
اهلين بنات بلادي والله مستاحشة ليبيا هلبة اني جديدة في المنتدي الحلو هدا وحبيت نشارك معاكم واني حامل في السابع وعندي بنوته وهدا حملي الثاني ومبروك علي كل حامل وربي يرزق كل من تتمني انشاء الله

[ام اسيل]

حبل الوصل سلم عويلتك ربي يخليهم لكي وماتعدلي على حد ودلعي راجلك واهتمي بيه وعلى قولة فرق الاعراس عندنا (انا في حوشي زايطة والناس عليا شايطة) ادلعي وافرحي وديري الزينة وخليها تنحرق وكان شفتيها بروحها مش قدام حد عطيها على راسها وعدي ديري روحك ماتندري على شي وخلي نفسيتك مرتاحة راهو حتى الحمل يبي نفسية كويسة

[ام اسيل]

ام لقمان

تعرفي بنتي توا عمرها 9 سنين ونظيفة وشاطرة والموضوع هذا مضايقها والله انا سالت لا انا لا بوها كان عندنا وشلتها من سنة درتلها حتى صورة تلفزيون مفش فايدة ممكن نشيلها لدكتور اخرى ربي يستر

بالنسبة للسمحة جنان نحنا فيه الي يقول للعيل الي ديما يعيط عنده خي العويلة وعندنا وحدة هنا طبيبة عرب تعطيله في دوا اسماها بنت عنان مشهورة بكل يقولو بعدها العيل يقعد كويس

[عيون زوجي]

السلااااااااام عليكم
الحمدلله الذي بنعمته تتم الصالحات
جبت اول امس الساعه 7المغرب
وكانت ولادتي متعسرة جدا
وحاليا تعبانه شويه
والبيبي تعبان في حضانه العنايه المركزة
صارله اختناق اثناء الولادة
ادعوا لوليدي ينوض بالسلامه
انا في الحوش بلا اوليدي
حاسه روحي كان مش نافس
وماجبتش
الفرحه مش رح تكمل لين نطمن اعليه
شفته من بعيد بس
وبوه لليوم ماشافاش
ادعوله ربي يقومه بالسلامه
ونروح بيه سليم ومعافى يارب
كاني انطمنت على اوليدي
رح انخش ونطمنكم
ادعواااااااااااا
اماااااااااااااااانه امااااااااااااااااانه

[ღॐ آية ღॐ]

حبيبتي عيون
الحمد لله على سلامتك
ويااااااااااااااااارب تكمل فرحتك برجعت وليدك معاك سليم معافى يارب
يارب يا مستجيب الدعاء اتم عليه بنعمة الصحه والعافيه وقر عينآ والديه برئيته
في تمام الصحة وكمال العافيه
اللهم امييييييييييييييييييييين

[تيمو ليبيا]

حمدالله علي سلامتك وانشالله اينوض مبيشي وتشوفيه قدامك يارب وتفرحي بيه ومترعشيش روحك تصير عادي للصغار ربي يحفظهولك هو وراجلك وبنيتك يارب

[حبل الوصل]

الف الف الف الحمد لله على سلامتك ياعيون
وان شاءالله ربي يكملك فرحتك بوليدك سليم معافى يارب
وماتخافيش ان شاءالله يكون الامر هين ويقوم بالسلامة

[لولى2010]

الحمد لله ع سلامتك وان شاء الله البيبي كويس ربي يسهل عليك ويفتحه فى وجك ويفرجك بيه وان شاء الله وليدك من قسمك

[سورينام]

السلام عليكم حبيباتي وأخواتي في تجمعنا الغااااااااااااااااااااالي

[سورينام]

والله مستاحشتكم هلبة هللللللللللللبة هلللبة ........ وكان مش من ظروف هالصيانة الغبرة اللي حوستنا الدنيا من غير فايدة وهذا كله ما خشوش الداخل مازال

[سورينام]

عيووووووووووووووووووووووونييييييييييييييييييييييي عيووووووووووووووووووووووووونييييييييييييييييييي
عيووووووووووووووووووووووونييييييييييييييييييييييي عيووووووووووووووووووووووووونييييييييييييييييييي الغااالية
الف مليون الحمدلله على سلامتك .. سبحان مخلص النفس من النفس سبحان مخلص النفس من النفس سبحان مخلص النفس من النفس
سبحان الذي خلص كربك وخفف حملك وشفتي وليدك الحمد لله
وانشاءالله بعون الله تشوفيه بين ايدياتك مونس وخيته هاليومين بجاه كل من عنده جاه عند المولى ياااااااااااااارب

[سورينام]

والله كنت نتابع في التجمع بالنقال .. لحد ما شفتك خشيتي .. ما طنت قادرة نخش وانتي مش موجودة حبيبتي

[سورينام]

آية الحلوة وينها .. معاش باينة .. انشاالله مش تعبانة في حملك .. والا ايوب هو اللي شاغلك عالمنتدى . والا زعما ابو ايوب هو اللي سارقك مننا
عالعمووم مكانك في المنتدى شييييييييييييين

[سورينام]

حبل الوصل .. كيف حالك وحال عموري واخلاص .. انشاالله ماشية كويس في المدرسة .. نحس فيه شعور حلووووووووو لما يبدا عندك عيل كيف بادي يقرا .. يارب نشوف سرورتي وفراس يقرو يااارب..
بالنسبة لمرت خالك والله لو كنت في مكانك ما نعالج الموضوع الا باحتقارها لين تهزا على روحها وتعرف غلطها .. وبعدين ديما الشجرة المثمرة ترمى بالطوب .. ولو مش منغاضة منك ما كانتش تدوي عليك ..أهم حاجة زوجك ديما وضحيله الصورة وما تخلي حد يخش بينك وبينه انشاالله ربي مايفرق بيناتكم .. ويفرحك ربي انتي وايه بعويل عن قريب باش مرت خالك تزيد تتمجمج .. ههههههههههه

[ღॐ آية ღॐ]

سورينام منورة التجمع والله
الفترة هادي كلها مناسبات مشاء الله اعراس وسوابيع
والله ماملحقه
نورتي وربي يكون بعونك يااارب وتكمل الصيانه بسرعه وترجعيلنا
زي قبل

[سورينام]

أم أسيل .. ربي يعاونك عالمدرسة وعالحوش .. والله الزوز مع بعضهم واعراااات .. اني جربت لما كنت حامل بسرورة كنت نخدم في المركز العام لتدريب المعلمين والله تشحورت كنت نطيب في غذاي من الليل ونروح تاااعبة مانعرف ناكل والا نرقد والا نضم .. هذا وما كانش عندي صغار .. وبعدها لما جبت بنتي خذيت اجازة وضع بعدين شفرتهم خلاااااااااص وسيبت العمل .. ربي يعاونك انشاالله وتحملي عن قريب وتبدي تاخذي في الاجازات وتدلعي بالوحم ..... يااااااارب

[ღॐ آية ღॐ]

كيف حال سرورة وفراس؟؟

[لولى2010]

عيون لازم تخشي وطمنينا ارجوك انا والله حاسه بشعورك تو لان وليدك مش امعاك لان صارلى زيك وخدو لولو فى الحضانه
ياربي العالمين ان شاء الله تحتضنيه فى اقرب وقت ممكن وتبقى دكرة
ان شاء الله وليدك من قسمك

[لولى2010]

ايوته كيف حالك انت وسورينام

[سورينام]

ميرنا .. يا سمحة السمحات .. يانا علي .. (خلي بنكلمك بالشرقاوي ) لنقنهم مطلعين دواوي قال ان المنطقة الشرقية فضت من الأرواب وقفاطين النوم السمحات وقالو إخرا .. ان مصر بدت تشكي من كلبيات بدالي الرقص لليبيا وان رقاصات مصر ما عاش خليتيلهم ما يلبسو .. وهذا كله تبعوه لقو وحدة اسمها ميرنا تاخد وتشري وهيا مدايرة سبلة الحمل وطايحة تلبس للراجل ليل ونهار وترقصله .. وقالو حتى باب الشقة مسكراته على صبياتك ومعش شافوك
هي الشهر هاذا بعد ماتحملي انشاالله شن السبلة اللي بتدريها .. وهالشلاتيت اللي شريتيهم وين بتديريهم قوووليلييييي

[سورينام]

لولي السموحة .. كيف حال لينا .. شن مدايرة فيك توا .. راهي ولت تهبل تبارك الرحمن

[سورينام]

والله يا ايوته فراس حاله باهي .. لكن سارة كان نحكيلك شن صارلها بنيتي الاما تدمع عيونك

[صابرة]

كيف حالكم يابنات
مبارك الولادة ياعيون والحمد لله على سلامتك ماترعشيش روحك الحمد لله نجا ولدك وان شاء الله يملا عليك الحوش بضحكه ولعبه

[صابرة]

نعمة مرحبتين بيك وان شاء الله ربي يسهل عليك الولادة

[صابرة]

بوسي شكله جوك مش عادي ....تسمني هلبة في الحبل وبعده.....قصقصة تاني ههههههههههه

[صابرة]

سورينام ربي يعاونكم على الصيانة
والله واعرة ان شاء الله تكملو بسرعة وتنوري المنتدى من جديد

[سورينام]

تذكري بعد ما حطينا صور صغارنا في التجمع فترة وبعدين خشت اختنا راجية الفرج من ربها ونبهتنا ان نحل صور الصغار لأنها قرت ان ولدك تسكر على صبعه الباب وسرورة ينت عيون طاحت على فمها .. طبعا هيا شافت ان العين صابت الصغار .. بعدها على طول حولت صورة سرورتي .. والله العظيم يا بنات وفي نفس الليلة بنيتي ناضت بنيتي تعيط في الليل وتحك في ايديها ورجليها وتقوللي ماما دِدَِي دِدِي .. وفي الصبح نلقالكم رجليها وايديها طالع فيهم حب مفنقر حاشاكم والبنت تحك وتعيط .. ماخليت وين طرت بيها اني وبوها وهيا يومين عل هالحال لحد ما حصلنا دكتور في عيادة المنصورة عطاها مضاد ماشاالله والحمدلله توا كويسة ..
اني نبي نقوللكم ارجعو لكلام راجية ومعاش تحطو صور لصغاركم

[صابرة]

لولي شن اخبارك
لاباس عليها بنيتك ياسورينام ربي يحفظها من كل شر

[ღॐ آية ღॐ]

سورينام معاك حق والله
في ناس متسميش بالله
وهدا اكبر غلط
ربي يحفضهالك يارب ارقيها ديمه
وان شاء الله الف لا بائس عليها
والله وجعتني هلبا تقول بنتي حسيتها فسط كبدي من داخل

[ღॐ آية ღॐ]

لولي نورتي انا الحمد لله
فرحانه قريب نطلع من الخامس نخش السادس
انتِ شن اخبارك؟

[صابرة]

ربي يتمم فرحتك بالولادة ....بنت ولا ولد يا اية

[ام اسيل]

عيون حبيبتي حمدلله على السلامة
والله شغلتينا وانا نسمع ديما تصير وان شاء تشوفيه بين ايديك صحيح ومعافى يارب
ماترعشي روحك ياحبيبة والله يربحك طمنينا والله مشغولين عليك

[ام اسيل]

سورينام حبيبتي لاباس على سرورة السمحة
شن دايرة توا ان شاء الله كويسةوكيف حال فراس ربي يسلمه

والله ضحكتيني ان شاء الله نحمل ونتوحم لكن اجازة مفش لاني انا صاحبة المدرسة لمن بنسيبها لكن غير نحمل ساهل

[ام اسيل]

صابرة كيف حالك يا احبيبة وكيف حال عبودي

العصفورة قالتلي انك تتوحمي عليش داستيها هي قولي
يارب تخاوي عبودي وتجيبيلنا بنية حلوة زي امها يارب

[لولى2010]

صابرة كيف حالك ردى ع سؤالى من قبل
ايوته والله لولو حاله باهى بس مازال ماضحكت
سورىنام كيف حال سرورتك ووفراس ربي يكون فى عونك

[صابرة]

ربي يسمع منك انا انراجي في الدورة موعدها 14-10 وان شاء الله حامل

[صابرة]

لولي انا نسكن في طرابلس وعمر عبودي توا 4 شهور والحمد لله عقل والعياط قل هلبة وتوا نفكر في توامه .......يااااااااااارب
طماعة صح هههههههههه

[صابرة]

ام اسيل كيف حال الصغار ويقرو توا والا مازال

[صابرة]

ميمونة كيف حالك ان شاء الله بخير

يابنات عيد زواجي في نهاية عشرة شن اندير من جو للتغيير؟؟؟؟؟؟؟؟

[ღॐ آية ღॐ]

صابرة قالولي ولد والله اعلم
شكلك مستعجله على الحمل ربي ان شاء الله يحقق امنيتك
وتحملي بتوئم يااارب

[ام روفيدة]

السلام عليكم كيف خالكم اليوم عيون الف مبروك وحمد لله على سلامتك وربي يحفظ لك ولدك ويونسك بيه عن فريب ويملى عليك الحوش اللهم امين

[ام روفيدة]

اني والله زعلانة منكم لما نخش ما نلقاش حد ومافيش حد يسإل ويقول كيف حالك وكيف حال ولدك وشن داير فيك عياط ولا هادي أسألو حتى مجاملة على الاقل يا وخياتي

[ام روفيدة]

يا ميرنا وينك وين الزغروطة اللي وعدتيني بيها لما نجيب هيا خشي ونوري التجمع ونبي زغروطة على كيف كيفك

[نسرينا]

السلام عليكم

صباح الخير للجميع

عيون / الف مبروك وحم لله على سلامتك وربي يكمل فرحتك ويرجعلك وليدك لحضنك سيلم ومعافى عاجلا غير اجل

معراج الف شكر وربي يسمع منك الامل كله واقف على موعد يوم الخميس الجاي

.

[poucie]

صباح الخير يا بنات كيف حالكم اليوم انشاء بخير
عيون الف الف الف مبروك وحمدالله عالسلامة وانشاء الله وليدك ما فيه الا العافية ما تخافيش انشاء الله خير ويطلع وليدك من المستشفى وتشيليه بين ايدك ويتربى في عزك انشاء الله
ام روفيدة
شخبارك انشاء الله كويسة ولا تزعلي نفسك عندك عليا كل ما نخش للتجمع ننشد عليك وعلى وليدك ربي يحفضهولك انشاء الله

[نسرينا]

صباح الخير ام روفيدة / شنو حالك واخبار وامورك و وليدك شنو داير معاك عياك والا هادي ؟؟هههههههههههههه

بوسي ، نهارك زين

.

[poucie]

نسرينا انهارك مبروك انشاء الله

[ام ريحان]

صباح الخير كيف حالكم

[ام ريحان]

الف مبروك يا عيون وربى يكمل عليك فرحتك وتشوفى وليدك معافى بين يديك

[نسرينا]

مراحب ام ريحان

.

[ام لقمان]

صباح الخيرات
كيف حالك ام ريحان
انشالله عن قريب تكونى ام
كيفك نسرينا؟
كلا انى يا ام روفيده نسال عليك وراجعى الصفحات وانتى تشوفى
وينك يا ميرنا المنتدى شكله عجبك
والله امنورتيه

[ميرنا]

الف الحمد الله على سلامتك وسلمت اوليدك ياعيون راجالها وماتخفيش عليه هذه الحاجات ديمة يصيرنا ياامه يطلع شارق او مختنق يعنى ما تخفيش ولا ترعشي وباذان لله تفرحى به

[ميرنا]

ام لقمان رسالتك توة على الخاص قريتى رسالتى

[ميرنا]

ام روفيدة نجك لى والله ما تمشى فى خاطرك

سورنيام والله صدقتى فى كلمة قلتيه ياخوفى تطلعى قريبتى او جارتى هههههههههه والله العظيم صح دايره اضراب

ام ريحانة حتى انتى كيفى فقدتى ابنيتك صعبة صح اسمله على الصبايا لى يفقدن فى اعويلتهن وهم اكبار ربى ان شالله يعوضك

نسرينا ايش اخبارك

اية اشوى اشوى على ليمون

ام رودينة انا انحس بيك زى البنت لى حاطتها فى الصورة الرمزية امتعك

المعراج ان شالله يارب تلقى اليوم تبويضك ممتاز وتعطيك ابرة تفجير وتحملى بس ما تنسيش تساليها على الحجم قوليلها كم الحجم وتعالى بشرينا

[ام لقمان]

الف الف مبروك ياعيون
وبعون الله يكون معاك بس هوا عنده ذوق يبيك اتريحى يوم والا يومين وبعدين ايجيك شاحن وماشالله عليه
انشالله عن قريب تدخلى وتطمنينا

[ام لقمان]

ميرنا قريتها ورديت عليك
واى مساعده انا جاهزه

[ام لقمان]

اوتوا السلام عليكم
نبى انسقد لقمان للمدرسه واندير غدى
والراجل طول بالخضره شكله غير رايه
باهى حتى الدحى يدير حل

[ميرنا]

يا ميرنا وينك وين الزغروطة اللي وعدتيني بيها لما نجيب هيا خشي ونوري التجمع ونبي زغروطة على كيف كيفك

hwaml7
hwaml02 رورورورورورورورورورورورورورييييييي


ايش ريك اسمعتيها

[ميرنا]

هاب على مطرة الغداء مانى عارفة شن اندير روتين ممل

[ام لقمان]

وينك ياميرنا
ردى عليا

[poucie]

خير يا ميرنا باهي باهي انا الوحيدة اللي ما سالتيش عني نقني زعلت وهذا وانتي اول من تعرفت عليها في التجمع يالله عادي يا شماتت ابلة طازا فيا ههههههههههه لا يحنا امغير انبصر عليك امغير تسلمي انشاء الله

[لولى2010]

خيرات ام رفيده كيف حالك انا والله دكرتى بالهون قوليلى انت وين ساكنه توه وكم عندك عيل
يابنات تدكرو معايا فى وحده كانت حامل ...............وجابت وليد تقريبا وهى ساكنه فى بريطانيا من هى شنى اسمها من هى جارى البحت تدكرو معايا

[ام رنوة]

الف مبروك عييييييييييييييييييييييييييييييييييييييون بوسي وىنك ام اسيل مارينا ام لقمان لولي ريحان شنوا اخباركم

[صابرة]

لولي ..ام رفيدة جابت ولد وهيا في بريطانيا
وساجدة جابت بنت وهي في بريطانيا

[صابرة]

يابنات سئلتكم شن اندير من فكرة عيد زواااااااااااااجي قريب

[لولى2010]

صابره حبيبتى شكرا لانك ساعدتينى ع التدكر انت وليدك اسمه عبد الهادى ولالا وانت كم عندك عيل وشن اسماه
بالنسبه لعيد زواجكم شوفى منتدى الحياه الزوجيه فى المنتدى تو تلاقى افكار حلوة
هاتو وينك مختفيه ولا خداتك منا رتال

[صابرة]

عندي ولد واحد واسمه عبد الهادي

[صابرة]

جمعة مباركة عليكم يابنات التجمع

[صابرة]

انا اليوم عند اماليا
شكلكم حاصلين في الغداء
ربي يعاونكم

[ღॐ آية ღॐ]

جمعه مباركه على الجميع
كيف الحال
صابرة ان شاء الله تحملي في القريب العاجل
ميرنا كيف حالك ؟
لولي انتي عندك بنيه صح؟؟

[صابرة]

ميمونة كيف حالك؟؟

[ღॐ آية ღॐ]

اليوم اول يوم ليا في السادس hwaml7
والله فرحانه ربي يتمم باقي شهور حملي على خير
اللهم اميييييييييييييييييييين

[تيمو ليبيا]

مساء الورد عليك ايه وصابره وجمعه مباركه يارب عندي امساك ياريت اتقولولي شني ناخده معان ناكل في فاكهه كل يوم ونشرب في ميا

[ام ريحان]

السلام عليكم

[ام ريحان]

كيف الحال يا ايه وصابره وتيمو

[تيمو ليبيا]

الله يسلمك ام ريحان جمعه مباركه عليك يارب كيف حالك اليوم انشالله بخير

[صابرة]

الحمد لله باهية كيف حالك يا اية وتيمو وام ريحان

[صابرة]

تيمو تاخذي في حبوب حديد؟؟لأنهم يسببو الامساك

[صابرة]

اشربي حليب ناقة والا كثري من الحليب العادي ويفضل بقرة على الباكوات وباعدي على الياغورت

[ام لقمان]

السلام عليكم
كيف حالكم جميعا
تيموا انت مش حامل وما تنويش الحمل القريب اذا كنت هكى خودى اقراص زيت الحوت لانها ممتازه للامساك والا ما تقربيهاش
خودى زيت باك شى راهو ايساعد

[ام لقمان]

صابره ......تيمو...ام ريحان.........كل الاخوات جمعه مباركه للجميع

[تيمو ليبيا]

ام ريحان اني وقفت عليهم الفيتامينات لاني في 9 وزن بيبي حمدالله والحليب فرقت حالي منشربش فيه وياغورت ناكل فيه الحق زعما هو المدايرلي امساك وصحيتي سلم وخيتي ام لقمان اني قررررررررريب حتي نجيب حمدالله هادي بكرتي انشالله زيت زيتون قصدك نشربه زيت كبدة الحوت معندناش في ماليزيا

[لولى2010]

تيمو حبيبتي الكالسيوم يدير امساك راه
صبورة انت ام السموحه عبد الهادى ربي يحفظه انت تبي تحملى حرام عليك مازال صغيرون هو اكبر من لونى بشهر تقريبا مالحقش يدلع ههههههههههههههههه تجيبيله توم يدعكوه ع الغلاء هههههههههه
ايه انا متزوجه من تلات سنوات وحملت واجهضت فى الخامس وبعده حملت وجبت لونه فى شهر 6
هاتووووووووووووووووووووووووووووووووووووووينك
سجوده وينكككككككككككككككككككككككككككككككككككك
ام رفيده كيف حال وليدك شنى سميتيه وكم عمرة تو

[صابرة]

بوه يبي عيل
وتبي الحق نبي انجيبهم مع بعضهم ونتعب مرة واحدة ونستريح بعدها لما يكبرو مع بعض
ويستر الله

[صابرة]

ام لقمان جمعة مباركة علينا وعليك شن حالك

[معراج]

حبيبتى الغاليه عيوون اول شئ الحمد لله على سلامتك هادى بروحها تسوى الدنيا وتخليك تفرحي وبلنسبه لولدك ان الله اذا احب عبد ابتلاه فصبري واحتسبي وان شاء الله يكون من قسمك ويعطيه الله طولت العمر ويكون ان شاء الله من الذريه الصالحه وماتكذريش روحك باءذن الله ربي ميخيب رجائك ولا يضيعلك تعب وننصحك ارقيه ولو من بعيد بان تمدي كفك نحوه واقريله الموعذات واية الكرسي وصدقي بنية شفائه يمكن والله اعلم تكون عين ماقالت ماشاء الله صابتكم لانك دايم تتكلمي عن ولدك وعن الاسبوع يلي بذيريه لولدك والرسول الكريم قال واستعينوا على اموركم بالصبر والكتمان =ان شاء الله يفررررررحك ربي بشوفته بين ايذيك ااااااااااااااامين يااااااااااارب العالمين

[لولى2010]

خيرات بنات وينكن شنو اخباركن

[ام لقمان]

تيمو انشالله ربى يسلمك ومادام انك حامل ردى بالك تاخدى زيت الحوت اما الزيتون عادى
صابره جيبيهم جميع خيلك اسماك تاعبه تاعبه وبعدين الحمد لله اتجيبيهم وانت صغيره لاضغط ولا سكر وتعانيهم ما اتحسيهم اسالينى انى عن هالموضوع
لولى مسسسسسسسسسسسسسسسسسساء الانوار

[نسرينا]

صباااااااااااح الخيرات على الجميع

ميرنا ام ريحان ام لقمان بوسي اية لولي صابرة ام روفيدة معراج
كيف احوالكم كلكم واحوال ازواجكم و صغاركم

تيمو يا غالية لو تاخذي في الياغورت هو اللي ايدير في امساك سيبيه توا واشربي سوائل وامية هلبة

ماقلتوليش ما حد عرف يفسر الاحلام ؟؟؟؟

[حبل الوصل]

صباح الخير شن حالكم كلكم انى المفروض يوم الاثنين لوماجتش الدورة ندير تحليل ونحس بوجع شديد في الضهر والحزام وصدرى مش متحملة فيه شي حتى الدبش مش حاملتهم عليا

[نسرينا]

مراحب حبل الوصل وصباح الخير عليك

يعني نقولوا مبررررررررووووووووووووووك

.

[حبل الوصل]

مرحبتين بيك
إن شاءالله يسمع منك ربي ادعيلي والله قاعدة على نار

[نسرينا]

اللهم يارب العالمين ،
اللهم اني اسألك بإسمك الاعظم الذي اذا دعيت به اجبت واذا سؤلت به اعطيت

أسألك بجاه حبيبك ورسولك محمد ...
اسألك بكل من قال لا اله الله ...

ان ترزق اختنا حبل الوصل بحمل ثابت وسليم عاجلا غير اجل وان تزرع في رحمها جنين بقدرتك يا لله

هي وانا وجميع اخواتي المحرومات في هذا التجمع .

اللهم آآآآآآآآآآآآآآآآآآمين

.

[حبل الوصل]

شكرا نسرينا يارب نحمل انى وياك وكل من يتمنى يارب

[تيمو ليبيا]

انشالله ام لقمان وصحيتي بارك الله فيك تعبتك معاي ونسرينا والهي ناكل فيه ياغورت هلبه لان منحبش الحليب زعميتك انعوض بيه وحاضر يومين هادم انوقف عليه لين انجيب وربي يرزقك بلي تتمنيه يارب

[تيمو ليبيا]

حبل الوصل انشالله يارب اتكوني حامل ومعاش تقعدي كل دوره تركزي هلبه والهي نفسيا هيا سبحان الله لما تقعدي تستني في حاجه وعلي اعصابك تعطل ولما تتجاهليها اوتنسيها تصير ريحي عصابك وبردي قلبك وانشالله تطلعي حامل يارب ياعليم

[ღॐ آية ღॐ]

يارب تكوني حامل يا حبل الوصل
وربي يرزق نسرينا وكل متمنيه في هدا التجمع
بحمل تابت وجنين سليم معافى
اللهم امييين
وربي يهونها على كل حامل ويارب نولدو ولادة سهلة
يااااااااااااااااااااااااارب

[حبل الوصل]

اية شن اخبارك وشن حال ولدك وصحيتى على الدعوة الحلوة ربي يسهل عليك

[ام اسيل]

صباح الخير على كل الحلوات
حبل الوصل يارب ياخيتي يرزقك ويفرحك بحمل عاجل غير اجل يارب
وتفرحينا ها الشهر ان شاء الله

[حبل الوصل]

أم أسيل شن اخبارك ان شاءالله ياوخيتى
شن حال هيمو واسيل وشن مداير هيمو مع الدراسة انى ولدى المفروض يقرا روضة لكن مايبيش يمشي مسببلى عقدة

[ريفان22]

مساء الخيرات كيف حالك بنات بلدي الحبيب انا رفان من الخمس وانا حامل في الشهر الخامس اول حمل الي قبله اجهضت في الشهر التالت المهم انا توا نتابع عند دكتور محمد المحيشي في مصحة لميس ونبي منكم مساعدة نحس في روحي نفخت هلبة وعطاني الدكتور اسبرين علشان ميجنيش تسمم حمل
بس انا عندي افرارزت مهبلية بكترة ولحذ الان لم احس بحركة الحنين ارجو منكم المساعدة

[سورينام]

مرحبا بالخمس وعربها .. أهلا اختنا ريفان اناالله تكملي حملك وتحلي عوينتك على خير يارب .. بالنسبة للنفاخ نقصي من الملح واشربي ميه هلبة ..وبعدين ما تخافيش منه فيه نساوين نوعيتهم يتنفخو هلبة في الحمل .. المهم تقيسي ضغطك كل فترة وتابعيه بانتظام ..
أما حركة الجنين المفروض انك تحسيها بما انك في الخامس لكن لانك بكرية .. فنعتقد انه يتحرك وانتي مش زابطة .. تابعي بالسونار وكل شي يبان ... ربي يهون عليك تشوفي ضناك بين ايدياتك آمين

[سورينام]

عيوني .. انشاالله هالساعة يكون حمودي بين ايديك يارب .. خشي طمنينا الله ايطمن بالك ياااا رب

[سورينام]

حبل الوصل .. وخيتي ربي يفرحك هالشهر وتطلعي حامل .. وحتى كان مش الشهر هاذا اللي بعده .. ربي يعطيك انت وكل المتمنيات آآآآآآآآآآآآآآآآآآآآآآآآآميييييييييييييييييييين

[ام اسيل]

أم أسيل شن اخبارك ان شاءالله ياوخيتى
شن حال هيمو واسيل وشن مداير هيمو مع الدراسة انى ولدى المفروض يقرا روضة لكن مايبيش يمشي مسببلى عقدة

الحمد لله العيال كويسين
شن دايرة اخلاص في اولى والله البنات الحمد لله شاطرات انا هيمو بيهبلني مازلنا في حرف الجيم شيبني مايبيش يكتب بيلعب وخلاص
بالنسبة لعموري خليه يمشي يبكي يومين ويسكت كل العيال هكي المهم انتي ماتمشيش معاه لان كان مشيتي معاه حايقعد يبكي هذا حسب خبرتي كمديرة دزيه والله يستفسد اكيدة حتى انتي تبيه يونسك في الصبح وخايفة عليه هذا راجل توا خلاص بلا دلع

[سورينام]

ميرنا .. اين انتي يا أختااااااااااااااااه .. ماالذي صدق في كلامي اليك ... هل هو الجزء المتعلق بصبياتك ؟؟ ههههههههههههههههه هي الفصحى .. شن رايك؟؟؟

[سورينام]

أم اسيل .. ازيك يا ست الناظرة ؟؟

[ام اسيل]

عيون طنينا عليك
والله طول الوقت نفكر فيك يارب يكون وليدك في بين ايديك وفرحانة بيه انت وكل العيلة يارب

[سورينام]

انتي مديرة خاصة والا مدرسة عامة .؟

[سورينام]

اني اليوم مكسدة ما خاطري نمشي لمكان .. والله من لما جبت فراس اللي جاني جاني .. معاش نبي نطلع ومعاش نبي حد ايجينى . قوليلي يا ام اسيل وضعي طبيعي ؟؟؟

[ام اسيل]

سورينام

الله يسلمك ياحبيبتي انا تمام الحمد لله
شن اخبارك انتي وكيف حال سرورة وفراس امتا عيالك يبدو يقرو بيش تشوفي المعاناة على حقيقتها
بس انتي وينك قعدتي كيف هلال العيد هضا كله انتقام من الراجل بعد النفاس بشوية عليه راهو يذوب

[سورينام]

والله يا ام اسيل انقوللك ماعاد خاطري في حاجة .. حتى هو مسكين كل ليلة نتسبل بحاجة .. ماعاش خاطري في شي

[سورينام]

وجاية على بالي عيون هلبة هلبة اليومين هادو .. نفكر فيها في كل وقت

[ام اسيل]

حبيبتي وضعك هذا طبيعي من تعب الحمل وبعدين الولادة وبعدين معاناة طفلين والسهر وتغير هرمونات لازم الجسم يتريح بيش يرد طبيعته انتي احمدي ربي فيه الي تجيهم كأبة بعد الولادة وياما يصير فيهم لكن الشعور الي عندك طبيعي جدا مع الوقت تبدي تردي لحياتك الطبيعية شوية شوية وبعدين حتى شـكــ وبارك الله فيك ـــرا لك ... لك مني أجمل تحية . فرحانة بفراس ربي يخلي لكي وتبي تشبعي بيه (وبوه)هههههههههههههههههههه

[ام اسيل]

والله حتى انا نفكر في عيون وشاغلتني ربي يسمعنا عليها الاخبار الطيبة يارب

[سورينام]

وين وخياتنا في التجمع آية وتيمو ونسرينا وام ريحان وام ردينة ولولي وام لقمان وام رفيدة

[سورينام]

صابرة .. كيف حال عبودي .. انشاالله تمام .. والله حرام عليك تبي تحملي عليه بسرعة .. انا بنتي لما حملت عليها كان عمرها 7 شهور .. والله بعد ماجبت خوها حسيت روحي بديت نبعد عليها شوي شوي وديما مع بوها تعرفي الشي هذا سببلي ازمة نفسية لاني متعلقة ببنتي هلبة هلبة ربي يحفظها ..
بوسي .. كيف الحال والأحوال .. قوليلنا شن امداير فيك الحمل .. انتي في الشهر الثاني صح؟؟ تتوحمي والا لا ؟ وعندك صغار من قبل ؟؟ وشن تبي وليد والا بنية ؟؟ شن رايك في هالقصقصة ؟؟ شعار تجمعنا

[لولى2010]

سورينام كيف حالك وحال فراس وسرورة وشنى دايرة معهم
عيون والله ليك وحشه ان شاء الله تكون بخير انت والبيبي
ام اسيل كيف حالك يامديرتنا عليش سالتينى ع ام راجالى
حبل الوصل ونسرينا وايه وميمونه و راجيه فرج ربها وهنديه وهاتو كيف حالكم ووينكم

[لولى2010]

بنات وينكن
هنديه وهاتو وسجودة وام رفيده
وينكن معش تخشن

[أم سعد]

السلاااااااااااااااااااام عليكم

[ام اسيل]

سورينام كيف حالك وحال فراس وسرورة وشنى دايرة معهم
عيون والله ليك وحشه ان شاء الله تكون بخير انت والبيبي
ام اسيل كيف حالك يامديرتنا عليش سالتينى ع ام راجالى
حبل الوصل ونسرينا وايه وميمونه و راجيه فرج ربها وهنديه وهاتو كيف حالكم ووينكم
لولي كيف حالك وحال لينة الحلوة
سالتك على ام الراجل لان فيه واحد نعرفوه يشتغل في شركة شلمبرجير في قطر هو وزوجته لعيت بونخيلة وامه اجنبية نحسابه زوجك

[معراج]

والله شكلك عاملتيها ياحبل الوصل وحاااامل ربي يسخرلك الحمل السليم المعافى وسلام كبير واااجد واجد للغاليه صابره وام ردينه وام رنوه ميمونه وميرنا وايه وتيمو ونسرينا بعد خطرها شن صار في بويضاتك بلنسبه ليا نستنى فى الدوره مزال ما شرفت يوم 19=10 عيد ميلادي ان شاء الله تكون الدوره دايرتلى مفاجئه انها بتقدملى هديه حللللللللوه وهيا غيابها لمدة تسسسسسسعة شهوووووور ياااارب يا سامعيييين قوووولوا امييييين

[ام روفيدة]

السلام عليكم كيف حالكم اليوم

[ام روفيدة]

يا بنات ادعولي بالله قاعدة نعاني من كابة الولادة دعواتكم

[تيمو ليبيا]

معراج انشالله اتكوني حامل وفي توامه يارب مش واحد بس وام رفيده شنو هيا كابة الحمل وكل وحده جايبه لازم اتمر بيها

[MALAK2010]

http://forum.hwaml.com/imgcache2/hwaml.com_1286693728_965.gif

[نسرينا]

السلام عليكم

صباح الخيرات عالحلوات

شكرا لمن سأل عليا

وربي يطمنا عالغايبين

ام روفيدة / بعيد السوء عليك من المعاناة استهدي بالرحمن وتعوذي من الشيطان واقري القران ، هذا كله وسواس ما اضيعي روحك معاه .

صابرة / مازال قاعدة ما مشيتش للدكتورة موعدي يوم الخميس الجاي ان شاء الله ، قوللي خير

تيمو ليبيا / خيرك ساهرة فيك الوجع والا شنو ؟؟؟ هههههههههههههههههه ربي يسهل عليك

[ميرنا]

ام روفيدة ربى يسلمك ويفرجها عليك عينك من روحك ودافى نفسك واربطى محرمة على راسك وابتعدى على الضى حاولى بقدر الامكان تبتعدى على تيارات الهواء وان شالله ربى يخفف عنك ويبعد عنك الضيق

[ميرنا]

ايش اخبارك يا نسرينا نهارك سعيدة ان شالله

[ميرنا]

غريبة واعى اليوم بكرى نحسب روحى امغير انا لى مجهجهة

[نسرينا]

خيرات يا ميرنا

اني بخير والحمد لله وانتي ، شنو اخر ما صار معاك ؟؟

اسكتي من عندي اسبوع نساوين خوتي الزوز يوم الجمعة الجاية

[حبل الوصل]

صباح الخير جميعا كيفكم اليوم

[حبل الوصل]

ام اسيل انى ولامرة مشيت معاه لانى منبيش يتعود بيا معاه لكن هو في الاول مشي وبعدها قالى معادش نبي نمشي تعرفي نبعثه للروضة يقعد ربع ساعة ولانص ساعة ويهرب مايبكى ولاشي يضم شنطته ويطلع بيت جده قريب من الروضة يمشيله وعلى هالحال كل يوم
لكن تعرفي والله ماشاءالله عليه خطه نحساب روحى بنتعب معاه لكن الحمد لله هو صح مش زى اخلاص في الحفظ بس يعتبر ذكى لانه يفطن لحاجات انى نبقى مش فاطنتلها

[حبل الوصل]

ميرنا ونسرينا كيف الحال
ميرنا كيف صار فيك

[نسرينا]

صباحات الخير حبل الوصل

[حبل الوصل]

وين هربتو انى زعلت خلاص

[نسرينا]

ههههههههههه

تي منو اللي هرب ؟؟

قاااااااااااااااااااااااااااااااااعدة لنهاية الدوام هههههههههههههههه

.

[ღॐ آية ღॐ]

صباح الخير
التجمع نور
حبل شن صار معاك؟؟

[ღॐ آية ღॐ]

ام رفيدة الله يكون في عونك
والله صارلي زيك بعد الولادة جتني حالة كئابه
فترة وتفوت وان شاء الله تعدي على خير

[نسرينا]

صباح النور آية

.

[poucie]

خير يا بنات شخباركم كويسات وينكم يللي ما حد سال عني باهي باهي هذا من اولها هكي خطان عيني عينك لاكن عادي المهم انتوا حولكم كويس امغير تسلموووو

[نسرينا]

مرحب مرحب بوسي

نستنوا فيك

.

[poucie]

خير نسرينا شخبارك وشن امداير وانشاء الله كويسة

[نسرينا]

تمام بخير الحمد لله

بس نستنى في يوم الخميس عشان موعد الدكتورة

.

[poucie]

عندك موعد مراجعة ولا تتبويض (قصقصة)هههههه

[نسرينا]

هههههههه هلا

متابعة التبويض ان شاء الله ، خذيت الكلوميد الاسبوع اللي فات ، واعطتني موعد يوم الخميس الجاي ،

[تيمو ليبيا]

اهلين نسرينا ياريت فيا الوجع بينا وبينكم 6 ساعععععععععععععععععات

[ام روفيدة]

السلام عليكم كيف حالكم اليوم

[عيون زوجي]

السلااااااام عليكمكيف حالكم اليومشويه وراجعه نشوف بنتي خيرها تنقنق..........

[حبل الوصل]

نسرينا انتى في اي يوم من الدورة
تيمو ربي يسهل عليك
عيون ارجعى بسرعه وطمنينا مشغولين عليك

[حبل الوصل]

ام روفيدة شن اخبارك وشن حال وليدك

[ام روفيدة]

معراج انشالله اتكوني حامل وفي توامه يارب مش واحد بس وام رفيده شنو هيا كابة الحمل وكل وحده جايبه لازم اتمر بيها
كابة الولادة هدي شعور غريب جدا تحسي روحك ديمة بروحك وتبكي من غير سبب ووالدكاترة هني قالولي كله بسبب الهرمونات اللي كانت مرتفعة في الحمل بعد الولادة تنزل فجئة فتسبب هدا الشعور وهدي الحالة تصيب امراة واحدة من كل عشرة نساء يعني مش كل النساوين تجيهم

[poucie]

انشاء الله خير يا نسرينا والله يرزقك ما تتمني انتي وانا وكل من قال امين

[ام روفيدة]

ام روفيدة شن اخبارك وشن حال وليدك
الحمد لله بخير اني و ولدي بارك اللله فيك وانتي شن حالك وكيف حال الصغار إن شاء الله بخير ونعمة

[حبل الوصل]

الحمد لله الله يسلمك يام روفيدة

[ام روفيدة]

عيون شن حالك وكيف حال وليدك هيا ارجعي بسرعة وطمنينا

[نسرينا]

مراحب

تيمو 6 ساعات هلللبه


ام روفيدة / كيف حالك اليوم


عيووووووون // هادي انتي ؟؟؟ حمدلله على السلام كيف صار معاك شنو حال وليدك ؟؟

[نسرينا]

حبل الوصل

اليوم عندي 14 من اول يوم الدورة

5 ايام من اخر حبة كلوميد

.

[ام روفيدة]

مراحب

تيمو 6 ساعات هلللبه


ام روفيدة / كيف حالك اليوم


عيووووووون // هادي انتي ؟؟؟ حمدلله على السلام كيف صار معاك شنو حال وليدك ؟؟
الحمد لله بخير ونعمة كيف حالك إنتي اليوم

[ليبياقلبي]

شكرا سورينام علا ردك علي بس نبي نسالك انا ريفان لي من الخمس انا توا زي ماقتلك في الاسبوع 21 وماحسيبتش بحركة البيبي بس امس بالليل سمعت صوت زي الفقاعات او الغازات هل هي حركة الببيبي اولا

[عيون زوجي]

السلام عليكمالكمبيوتر مش عارفه شن مشكلته ايطلع الكلام لاصق في بعضه ومافيش خيارات كتابه

[عيون زوجي]

المهم اوليدي قاعدفي الحضانهوالحمدللهكل يوم خير من يومبس مازال تعبان شويهونمشي كل يوم مرتين او 3 نشفطله حليبواليوم اناتعبانهمن الخياطةقعده ما مشيتش شوفتهلتوا

[عيون زوجي]

الكمبيوتر مش عارفه خيره يطلع في الكلام لاصق ومش مفهوم عقدني معاه

[عيون زوجي]

البارح الساعه 12 كانت اخر زيارة ليا لوليدي الحمدلله كل يوم خير من يوم بس الدكتور قال مازال على الخروجومازال مايقدرش يقرر انه كويس 100%

[حبل الوصل]

الحمد لله ياعيون ان شاءالله وليدك من قسمك يارب

[عيون زوجي]

الف شكر لكا اوخيه منكم سئلت اعليا وادعتلي ودعت لوليدي ويارب يعطيكم يلي في بالكم

[عيون زوجي]

انا الساعه 3الظهر بنمشي نعطيه رضعه ونطمن اعليه ويارب نسمع بشارة الخير اليوم

[عيون زوجي]

وانا نفسيتي شويه تعبانه الحمدلله على كل حال كل شي من ربي ولله الامر من قبل ومن بعدوتعبانه من الخياطة مووت متعبتني ومش مخليتني لا نتحرك ولا نرقد بشكل لا يوصف درت معاها كل الحلول بلا فايدة

[حبل الوصل]

يارب يسمعك كل خير على ولدك ويكون في حضنك في القريب العاجل يارب

[عيون زوجي]

الف سلااام توا ونتلاقوا على خير تحياتي للجميع وخصوصا سورينام

[حبل الوصل]

بخري باللوبان عيون والله كويس بكل

[ام اسيل]

عيون
الحمد لله الي اطمنتي على وليدك ويارب اليوم يبات في حضنك وهو صحيح وطيب والله عقولنا عندك يارب يهنيك ويفرحك بيه يارب

[ام اسيل]

حبل الوصل
شن صار في قريبتك الي مدرهتلك كبدك خفت عليك ولا مازالت تكبر في النار (اجعل سوها في دوها )
ونراجي معاك في بكرة اول مايطلع التحليل طمنيني يارب يرزقك ويهنيك
والله والله لوتطلعي حامل نفرح كاني انا الي حملت والله كيف خيتي واعز
ويارب يرزق ميرنا خيتنا بتوامة يارب

[عيون زوجي]

السلاااام عليكم ورحمة الله
اوخياتي الغاليااات
والحبيباات والصادقات واللاتي احببتكن في الله ولله
انا اليوم مرتاحه جدا جدا
مشيت الساعه 3 لوليدي واعطوهولي انرضعه من صدري
ولاول مرة نشده بين ايديا واليوم ليه 7ايام مولود
اكبر فرحه عقبالكم كلكم يارب
والدكتورة المناوبه طمنتني وقالت بالكثير يومين ويطلع
وتفاصيل الحاله الصحيه عند الدكتور والدكتور مهناش
بس فرحانه جدا جدا جدا
الحمدلله الذي بنعمته تتم الصالحات

[عيون زوجي]

اوخيتي حبل الوصل يارب العالمين نسمعوا اعليك
الاخبار الطيبه
وبشارة الخير
ام اسيل وميرنا يارب العالمين تحملوا وتتهنوا وترتاحوا يارب
ميمونه وام ريحانه عقبالكم يا عرايس التجمع
شكر خاص لصابرة ولولي وام رفيدة وام رنوة وام ردينه وام لقمان والحلوة معراج ربي يكرمها بالحمل السريع
الف شكر لخواتي يلي ذكرتهم ويلي نسيتهم سهوا
وقفتكم بدعائكم ليا تسوى الدنيا كلها
يارب يكرمكم بالحمل الثابت والطفل السليم
والزوج الصالح والذرية الصالحه يارب
دعيتلكم من قلبي في ولادتي ما نسيتكمش
ماننساش اميسر وراجية وسمحه وهاتو وساجدة استاحشتهم وينهم

[عيون زوجي]

وكلامي الى الحبوبة أية ما تخافيش ما نسيتكش ويارب في خلاصك وتنوضى على خير وبصحه وسلامه انتي وألياس

[عيون زوجي]

غاليتي وتوءمي سوريناااااااااام يارب يهنيك ويبعد عنك ضيقة الخاطر ويفرح قلبك ببر اولادك ويسخرلك زوجك ويهنيكم يارب

[عيون زوجي]

سامحوني يا اوخياتي لو نسيت وحدة
راني مش قاصدة
اوخياتي الجدد بالدات تيمو ليبيا صح هلا بيكم بينا
والعتب على التعب والالم يلي نعاني منه قعده لتوا
رح نكتبلكم قصة ولادتي
ورح تقدروا الوضع لما تقروها
ويارب ما تجربها مؤمنه ولا اوخيه

[تيمو ليبيا]

اهم شي انك بخير و وليدك بخير اني ملومش عليك بلعكس انتي باهي فيك جهد حتي تتفكري في حد ربي انشالله ايزيده من الشفي وغدوه ولا بعده يرقد علي صدرك والهي طمنتيني عليه حمدالله

[معراج]

الحمد لله على سلامة ولدك ياعيون والله والله فرحتلك من قلب قلبي الحمد لله يارب ان شاء الله هدا حد السو وصدقي ياختى بيش تدفعى البلى والعين عنك وعن ضناك ربي يكفيك شر كل دى شر من الانس والجان اللهم ااامين

[ليبياقلبي]

اول شي اختي عيون الف الحمد لله انك طمنتي علا وليدك بس ممكن نعرف شن سبب الحضانة والله ماتخافي اختي جابت توام ولاد اول يوم في التاسع واختي قريب ماتت هي وياهم من ضغظ الحمل ولما جو متوقعنهاش يعيشوا لانهم ضاعف هلبة وتاعبنين وحتى لما روحت بيهم للحوش درينلهم حضانة جو كانه في رحم امهم وتوا ماشاء الله ربي يكبر وليدك زيهم عمرهم بيخشوا سنة وسمان والصحة الحمد لله ربي معاك يارب
وتاني شي في عتاب لوخياتي االليبيات نسال فيكم علا حالتي مردتوش منعرفيش السبب ممكن ازعاج مني اسفة عموما

[ام اسيل]

نجك ليا ياعيون زوجي والله التجمع من غير مكسد مكسد وكلنا مشغولين عليك
الحمد لله الي ربي طمنك وطمنتينا معاك يارب تفرحي بيه وتشوفيه وهو متخرج دكتور وتشوفي عياله يارب

[ام روفيدة]

الف الف الللللللللللللللللللللللللللللللللللللللللف الحمد لله على سلامة ولدك يا عيون وربي يونسك بيه في حضنك عن قريب اللهم امين

[ليبياقلبي]

اه حبيت نسالكم انا اليوم وانا نطيبفي الغداء طاح مني شي فتبيصت جبته من الارض بعدان خفت لاني سامعة انو يضر البيبي في الشهور الاخيرة

[حبل الوصل]

الف الحمد لله على سلامة ولدك وان شاءالله ربي يفرح قلبك ويطلعلك وليدك في هاليومين والله فرحتلك

[حبل الوصل]

كيف ياريفان مافهمتش شن تقولى

[تيمو ليبيا]

اليوم ماليا متسقدين ل ماليزيا وبياتو ليله في قطر وبيوصلو تلات الصبحيه ربي يوصلهملي سالمين يارب بيحضرو ولادتي وبنتي اتقولو حاسه بيهم متبيش تنزل لين تشوفهم منوصفلكمش فرحتي وقداش مستاحشتهم من شهر واحد مريتهمش يارب احفظهملي وبنسبه ل ليبيا قلبي اني في تاسع وقريب انكمله وديما واني مطبسه ونحط ونقيم عادي بلعكس ميضرش البيبي متخافيش

[ام روفيدة]

كيف حالك ياتيموليبيا كانك قاعدة خلينا نهدرزو

[ام روفيدة]

يا اهل الديرة وينكم

[تيمو ليبيا]

الحمدالله وانتي كيف حالك وحال الغربه معاك انشالله تاقلمتي

[لولى2010]

عيون الحمد لله ع سلامتكم والله العظيم فرحتلك لان صارلى زيك وكل مانمشيله قلبي يتقطع لكن ربي جبر بخاطرى الحمد لله وهى كويسه وفى حضنى توووووووووو العقبالك

[ام ريحان]

السلام عليكم كيف حالكم

[ليبياقلبي]

اختي تيمو ليبيا الف شكر ليك ولي جوابك بس عالحلاكة انا اليوم حسيت بي زي الفاقاعات او الغازات هل هي حركة البيبي

[ليبياقلبي]

ويا اختي تيمو ليبيا ربي يوصلك اهليك سالمين ويحضروا ولادتك شن بتسميها البنوتة

[لولى2010]

حبيببتي تيمو ليبيا ان شاء الله هلك يوصلو طيبين وقوليلى كان هما بينزلو فى قطر لو احتاجو اى حاجه ممكن انساعدهم

[لولى2010]

ليبيا قلبي ممكن هدى هى الحركه يقولو الى اطول ماتحس بالحركه تكون حامل ببنت تبي تحسي بالحركه اشربي حاجه مسكرة زى العصير وافردى روحك تو تحسي بيه يتحرك نصيحه دكتورة

[تيمو ليبيا]

ليبيا قلبي تسلمي حبيبتي انشالله يوصلو سالمين وبنسبة لحركة البيبي كيف زي الفقعات وين في بطنك اني في بداية الرابع كانت اتجيني زي ليه الخفيفه وتشكيله في رجلي من فوق سالت ماما عليها قتلي هاده بيبي يتحرك

[تيمو ليبيا]

لولي الله يخليك وكبر مقدارك ياعسل والهي هما نازلين في هوتيل المطار تعرفي انتي ماليزيا يعيده هلبه فقالو نرتاحو يوم ونرجعو نركبو الطياره

[تيمو ليبيا]

وبنوته قاعدين كل مره اني وبوها انقولو اسم انحسوه مش حلو بس ل توا مقرره رفيف انشالله بس هو مش مقتنع بيه هلبه

[حكآية عطر]

http://forum.hwaml.com/t30708.html#post400060

[poucie]

خير يا بنات شخباركم اليوم
عيون
الف حمد الله على سلامت وليدك وانشاء الله ما عنده سوء والحمد الله انك اطمنتي عليه يا رب يطلع اليوم والا بكرة من المستشفى وتشيليه في حضنك وتقري عينك بيه والله يخليهولك ويحفضهولك .
تيمو ليبيا
ربي يوصلك اهلك بالسلامة انشاء الله وينوضك على خير وتفرحي ببنوتك انشاء الله

[نسرينا]

السلام عليكم

صباااااااااااااح الخيرات على الجميع

اولا : عيون حمد لله على سلامة وليدك ومش لايمين عليك غير بس تسلمي انتي و وليدك يعيم الله خفنا عليك ودعينالك من وسط قلوبنا .

تيمو الغالية / يا فرحتك ما في شيء احلى من زياة الاهل ، ربي يونسك بيهم ويوصلوا سالمين بعون الله وعقبال خلاصك يا رب العالمين بس طمنينا عليك وما تخلينا نفكروا ومشغولين

قلبي ليبيا / لو انت في الرابع وما حسيتيش بحركة البيبي هذا يعني بنوتة لان البنت تتحرك متأخر ، وحاولي انك لم اطبسي على شيء تنزلي كلك وتتثني رجليك ما اطبسي عادي
ربي يوفقك ومرحبتين بيك فالتجمع

ام روفيدة / شنو اخبارك قاعدة مضايقة ؟ ومكتئبة

الجميع / كيف حالكم اليوم /

[تيمو ليبيا]

الله يسلمك بوسي كلك دوق ونسرينا سلمها ياربي نستنا فيهم بدقيقه واكيد اول مانجيب حنخش ونحكيلك وربي يسهلي ولادتي يارب وبنتي تكون سليمه انشالله وعقبالكم ياااااااااااااارب

[نسرينا]

ماشاء الله

توا بس سمعت ان حماتي جابت وليد بس جابت في الاسبوع الاول فالشهر الثامن

اني كان عرسي مع حمواتي الزوز واحني الثلاثة حملنا في نفس الوقت يعني من ثاني شهر بعد الزواج

اني اجهضت بعد شهر وحماتي اجهضت بعدي وحماتي الثانية ما شاء الله ربي ثبت حملها واليوم جابت وليد

ان شاء الله بشرة خير لينا كلنا و عقبالكم يارب وكلنا انديروا تجمع في قسم الحمل والولادة

.

[ღॐ آية ღॐ]

عيون والله طمنتيني بالي كان مشغول عليك
وعلى وليدك ربي يطمنك اكتر واكتر عليه وتروحي بيه معاك ياااااااااااااارب
بنسبه للخياطه تاخد ايامها بس ردي بالك على نفسك
لازن تتنقعي في ميه وملح ميه دافيه شويه
وتجفيفي بسشوار طبعا عن بعد
ضروري تجفيفيهابعد الغسيل ضروري جدا
وربي يشفيك يارب

[حبل الوصل]

وينكم مكسدين اليوم

[ميرنا]

خير يا بنات ايش الاخبار جميعا ومساء سعيد انتن واعويلتكن

عيون راجالها // الف الحمدلله على سلمت اوليدك وطالما بداتى اترضعى فيه هذا طريق الشفاء ربى يدوم عليك فرحتك ويهنيك وديريله اطهار ولمة كبيرة

[حبل الوصل]

ميرنا مرحبتين بيك شن صار عندك طمنينى

[ام روفيدة]

السلام عليكم

صباااااااااااااح الخيرات على الجميع

اولا : عيون حمد لله على سلامة وليدك ومش لايمين عليك غير بس تسلمي انتي و وليدك يعيم الله خفنا عليك ودعينالك من وسط قلوبنا .

تيمو الغالية / يا فرحتك ما في شيء احلى من زياة الاهل ، ربي يونسك بيهم ويوصلوا سالمين بعون الله وعقبال خلاصك يا رب العالمين بس طمنينا عليك وما تخلينا نفكروا ومشغولين

قلبي ليبيا / لو انت في الرابع وما حسيتيش بحركة البيبي هذا يعني بنوتة لان البنت تتحرك متأخر ، وحاولي انك لم اطبسي على شيء تنزلي كلك وتتثني رجليك ما اطبسي عادي
ربي يوفقك ومرحبتين بيك فالتجمع

ام روفيدة / شنو اخبارك قاعدة مضايقة ؟ ومكتئبة

الجميع / كيف حالكم اليوم /
الحمد لله بديت نحس حالي احسن لكن قاعدة حالة البكاء شوية وبارك الله فيك على سؤالك عني

[سورينام]

الحمد لله والف الحمد لله .. شفتي حبيبتي عيون كيف ربي استجاب لدعاك ودعاء خواتك في التجمع وشفي وليدك .. الحمد لله .. لان الدعوات كانت صادقة ومن القلب .. والكل تأثرو بقصتك من لما خشيتي للتجمع يوم ماشية بتديري الوجع الصناعي وعشنا معاك الوضع كله .. عموما الحمد لله دائما وابدا وعلى كل حااااال

[سورينام]

وبالنسبة ليا ما تشكريني على شي لاني والله العظيم حاسة وليدك وليدي والله .. ربي يخليه وتشوفيه معبي عليك الحوش هو ووخيته وما تنحرني من ضحكاتهم يااااااارب لا انتي ولا وخياتنا اللي عندهم واللي يتمنو ياااااااااااارب

[سورينام]

والله ما نحكيلك (أمي) تسأل عليك كل يوم تقوللي شن حال عيونك (واني نقولها يا اوحيدة وليتي تعرفي بنات التجمع وحدة وحدة) والله كل ما تتصل بيا تسألني علي صغاري وبعدين تقوللي كيف حال وليد صاحبتك متاع النت (هههههههههههههه) وقالتلي قوليلها خالتك ام سورينام فرحتلك من قلبها وقاتلك وشقي وليدك لما تطلعيه كل يوم .. مفهووووووووم !!!

[سورينام]

وتوا السلام عليكم .. الى اللقا لأن فراس بدي ينفخ فيهم .. وسامحوني وخياتي في التجمع ما سألتش عليكم (الله غالب موضوع عيون وفرحتي بسلامتها وسلامة وليدها خلاني سهيت عليكم ) انشاالله ما ننساكم في يوم يارب

[ام اسيل]

السلام عليكم

حبل الوصل شن صار عندك طمنينا

ميرنا انا نرجا؟؟؟

[لولى2010]

كيف حالكن بنات

[poucie]

صباح الخير بنات شخياركم اليوم
ميرنا شن صار معاك طمنينا عليك انشاء الله خير يا رب

[نسرينا]

صباح الخير لولي

صباح الخيرات بوسي

يومكم طيب

.

[poucie]

يومك سعيد نسرينا شخبارك اليوم

[طرابلسيه]

السلام عليكم ورحمة الله وبركاته
:
واخيرا سجلت..ليا شهرين نتبع فيكم وكل مانقول بنسجل معاكم مايصيرش وربي ماسخرش الا توا..
معاكم اختكم طرابلسيه الشهر الجاي بنخش24سنه،حامل ولله الحمد..بكريه..عرسي كان في نص شهر4-2010 امممم شن ثاني..اه نتابع مؤقتا في مستوصف قريب مننا لان في الجلاء مشيت في بداية حملي قالولي تعالي شهر11 عطوني موعد يوم2..وكنت نتابع في مصحة الحياة في قرقارش المعامله ياسلام بس تطلب مني موعد مراجعه كل اسبوع وكل موعد تبيني ندير جهاز