ديوانية البحرين - دردشة حوامل البحرين - البحرينيات

[طفلي حياتي]

اني نيمت ريلي وغافلته وهربت مالي بارض تسكسك هههههههههههههههههههههه

[Roze]

يالله يطفطف زارتني النومة اني بعد

بكرا نشوووفش ان شاءالله

قومي لريلش انتين بعد

يالله تصبحين على عسل ياعسل

[Roze]

لا تسكسكين بس اتعلفي فيه هههههههه

[rose soul]

جنة سمعت عقرة علي
ههههههههههههههههههه
طف طوفتي
لا ريلي مو معاي..اهو كان متصل يسأل عني
واليوم اهو في الشقة بروحه يقول بيغسل ثياب ههههههههه واعليه
والشقة حالتها حالة..اتخيلها غبار في كل مكان
يبي لي اودي شغالتنا تنظفها..صار لي اكثر من شهر ماقعدت فيها

[طفلي حياتي]

نام من زمان
في امان الله وحفظه التعلف لش الحين شوفي شغلش
ههههههههه

[طفلي حياتي]

هلا روزاتي اي طرشي شغالتكم تنظفها وتغسل ثيابه مره وحده روحي وياها يوم واحد

[rose soul]

سكتوو
اصلا من دشيت التاسع ومالي بارض لسيكو..بنتي كبرت..واحس يضايقها..وانا اتعور وايد..بس ماقول لريلي

[طفلي حياتي]

روز من شوي فرحه ضره وسكتت وردت ضربتني ضربه وسكتت مادري وشفيها عادي هالشكل؟؟
انزين الم في ضلعي كأنها حاشره ريولها لو شي اني ماحس بها بس اتوقع عيل ليش يعورني معقوله لازقه مني مو متباعده؟؟

[rose soul]

روزي..علينا؟؟
زارتها النومة تقول هههههههههههه

[طفلي حياتي]

طالع هالحاله لايكون انتين مثل بنوته السيكو سيكو عندها ع الطريقه المعتاده اصلا خطره ع البيبي ترعصون عمره ماليكم الا الفرنسي .. بصراحه بعيدا عن الخجل لازم هالشي تفهمونه موزين ترعصون في البيبي

[طفلي حياتي]

روزاتي ذكرتكم وغربلت روحي كلمن بحث عن التسكسك واني هربت عن ريلي خخخخخخخخ نيمته ومشيت

[rose soul]

طف طوف.. اي عادي يمكن قاعدة تعطس
وبالنسبة للألم في الضلع..يصير..انتي لأن ماتدرين شنو تسوي بالضبط..اهي ساعات تتمقط..او تسحب الحبل السري..ترا هذي الاشية تألم..وخصوصا كل ما يكبرون..وعظامتهم تخشن شوي وتكبر

[rose soul]

طف طوف..اصلا ومن قالج اقدر ع فرنسي ولا مصري
انا زين مني اتحرك..او انقلب على جهه خخخ

وانتي شلي حادج تطرين السيكو سيكو..الحين زين جذي..خليتيهم يروحون يجوفون رزقهم ههههههه

[طفلي حياتي]

حلفي تعطس فرحتي ؟؟ يعني هاللي حسيته كانت تعطس؟؟ ياخلف طوايفي هالورده
انزين اني استغرب شلون يصيدهم ابو فاق ويعطسون وهو مافي هوا هناك ماي في ماي؟؟ مادري مايدش مخي بس قولتش كانت تعطس؟؟ عممممري فرحتي
تصدقين مره كنت بنام ويومها ماكانت متحركه وايد وتحججت بها اضرب على بطني ابغيها تتحرك جان تطفر مره وحده وي على افادي نصرتي خرعتها وطفرت وبعدين سميت عليها وقريت عليها ههههههههه

[طفلي حياتي]

خليهم يستانسون وراهم بكره ولاده وحرمان 40 يوم ههههههههههههه

[rose soul]

اي يا طف طوفتي..الموقع اللي عطيتج وصلته من زمان فيه ان هالمراحل تصير..بس بدال ما يدخل لهم هوا..يدخل الماي اللي اهما فيه..ومن يطلعون ع الدنيا يتنفسون الهوا
وانتي ما تجوفين اغلب اليهالو اللي يطلعون..كله بطونهم..من الاوساخ واعليه اللي بلعوها

[rose soul]

حرام عليج..ضرب عاد..انتي من تمسحين على دبتج بيدج اهما يحسون فيج
واعليه خرعتيها .. واهي في عز نومها

[طفلي حياتي]

وي على عمري نصره لكن رب العالمين خلقنا هالشكل ومايعتبر شيء مضر وكلها فتره وينظف بطنهم ويصيرون عادي حبيبتي نصرتي متى ياربي اولد واشوف ضناي سليم معافى .. تصدقين روز ما متيقنه 100% انها بنت مو قانعني سونار المركز ابدا
احلى شي اذا يتمغطون ويرفعون ريولهم وهم ملفوفين يهبلون احح عليهم

[طفلي حياتي]

اي والله روز اذا ما تتحرك وتخمد وايد اضرب بطني مادري هالشي عادي لولا اطقطق على بطني ابغيها تعطيني ويه جان مو اذيت فرحتي .. بس صدق تقهرني اذا تصير هاديه خصوصا هاليومين كلش خايفه شكلها في سبات شتوي صربت بطني شربت بارد اكلت حلاوه ماتفتكر الا قليل وقت اللي تبغي تتحرك تسمعني حسها وترد تنام .. يصير لش هالشكل؟؟

[rose soul]

انزين ليش ما تروحين الحين خاص تجيكين..قبل لادشين الثامن..لأن من كبرت ازيد احتمال كبير ما يبين..علشان تقطعين الشك باليقين مثل ما يقولون

بس شكلج .. انتي خلاص ما بقى عليج شي..تقريبا اغراضج جهزتيها

[طفلي حياتي]

اي وين اروح الحين مابغي اروح ولا شي اذا يه ولد الحمدلله اهم شي السلامه والاغراض كلها فتره بسيطه وبعدين نغيرهم اذا ولد وبس.. ماجاوبتين على سؤالي اعلاه

[rose soul]

طف طوف..لا تقارنين حركة البيبي مع وحدة غيرج..لأن يقولون تختلف
بصراحة انا عكسج..ليومج الحين واهيه تتحرك..وبطني لحين يصير اشكال لما تتحرك..وانا ابيها تقل حركتها علشان اولد..لأن سمعت اذا لحين تتحرك يعني لحين مريظين ع الولادة ولا يندرى

[طفلي حياتي]

اهاا اني فعلا بحثت في النت وايد يقولون عادي ترى بعض الاجنه هاديين وبعضهم لا مشاكسين وان شاء الله يارب الخير للكل ولا فيهم الا العافيه ان شاء الله

[rose soul]

اي شكلها فرحتج هادية..تصدقين يقولون الاشيه اللي كانت تسويها في بطنج..نفسها لما تطلع على الدنيا
شكلها بتريحج وايد..وحتى الفترات اللي متعودة تقعد فيها وتتحرك وتربش..نفس الاوقات لما تطلع..بس بعدين شوي شوي لما تكبر انتي تعدلين نومها

[طفلي حياتي]

اي والله هي احس حركاتها في اوقات معينه وبنشوف اذا صدق لو هرار اذا يبتها بالسلامه يارب سليمه معافاه يارب يارب يارب وياكم كلكم.

[rose soul]

ان شاء الله يارب

طف طوفتي بعد جبدي..شكله الحموضة ارتفعت لي..بقوم اريح لي
وان شاء الله نجوفج على خير

لا الجماعة صج شكلهم كلهم يسكسكون وههههههههههههههههههههههه

شكله الليلة ..ليلة السيكو سيكو العالمية
انزين جان نطرتو لعيد الحب:p

[طفلي حياتي]

هااااااااا طحنا على سرش خاشه السالفه لعيد الحبببببببب هههههههههههههههه
اوكى توني بقول لش خلاص وصلت حدي والحموضه بدأت يلا باااي تصبحين على خير

[om khalil]

يالله صباح خير
ولدي مسوي وقعة كربلا لجل الدوامه مالته ضايعه
ويش الشور مافيي شده أطلع أشتري له شي


وسكتي ياطفلي ضكرتيني البارحه اللي في بطني مو مسوي سوايا
عافس الدنيا فوق حدر
طراخ طراخ مو طبيعي حسيت بضيق مادري جيفه
ريلي شافني أتطفر قام حط ايده على بطني ومات من الضحك
يقول ويش هالوقعه الصلاة على النبي
عفر مثل أخوه يدور دوامته خخخخخ

[شمس الصباح]

صباح الخير بنات شخباركم

اني من الصبح اليوم قاعده ما نمت قررت اني اطبخ من اليوم وقعدت وسويت صالونة لحم واكو الشباب وابوهم متخرعين على عمري اليوم وليمة تمللو من اكل المطاعم

اي عندي سؤال الي ام خليل او احلام ام او اي وحده عندها خبرة

اني للحين ما طهرت احيانا ما ينزل شي ومرة وحده ينزل على دم هل طبيعي وراح يوقف قبل لا اطلع من الأربعين مع العلم ان باقي تقريبا اسبوع واطلع من النفاس ؟

السؤال الثاني للكل ابغي اقص شعري واني شعري طوووويل وناعم هل اقصه واسويه قصير لو بنفس الطول وشنو نوع التسريحة بصراحة متحيره وابغي احد يشور على لان خاطري اغير شكلي واي صالون اقدر اروح اليه واني مرتاحة ان ما راح يخربون شعري

يالله انتظر جاوبكم

[أحلام أم]

مساء الخير متباركيين اليوم ذكرى تنصيب الإمام الحجة (ع)
اللهم عجل لوليك الفرج
مسامحة اليوم تعبانه مالفيت على ردودكم سييييدة على رد شمس الصباح
اليوم رايحة تحليل السكر وأحس بطني معفوس من الجلكوز ومن الصبح للحيين مانمت
شمس الصبااح
هلا بيش حبيبتي منورة من زماان ماتطليين عدل شوي وتهربين مثلي ههههههه
عليكم بالعافية بصالونة اللحم ويش أخبار أبو صفار إللي عند ملووكة ياارب زين
بالنسبة للدم إلليي مازال ينزل متقطع عااادي حبيبتي ،أني صاادني للأربعيين بولدي الصغير أكثر من أخوته وطوف شوي وكل إستحاضات
ومو بس جدية العادة ماجتني لكم شهر من الرضااعة ولاكن مكانها كله إستحاضات بس تغربلت ولا قدرت أعتبرها عااادة لأنه متقطعة بالأياام ومو بكمية وبدوون ألم العاادة أضن حالتي شيء ثاااني
بس حاولي تمترخيين قبل الأربعيين بسرعة وتشربين أشياء تنزل الوسخ علشان تفتكيين وأحسن تنزل هذي الأوساخ وتفتكييين ونسوان واايد جدية
بالنسبة لشعرك الغجري الحريري
يتراوى ليي قصية مقطع على طوووله وصبغية كستنائي أو أي لون يناسب بشرتش حبيبتي
يقولون في صالون في البديع روعة عندة الصبغ إسمه (بنت العشرين ) وااايد ينعتونه شوفيه
أشوفكم على خيررر

[ام السادة]

السلام عليكم وشحوالكم

اليوم رحت السلمانية نقعوني تنقع الله يغربلهم واخر شي يوم دخلت الا تقول الدكتورة دامش للحين ما ولدتين يعني موعدش الصح 2-3 بطت جبدي جيت بادوس في جبدها ولا عطتني كل يوم تخطيط

هلا شموسة حرام مو زين تقصينه اصبغية وعدلي فيه شوي مو واجد

[طفلي حياتي]

السلام عليكم
شموس اني رايي مثل البنات خساره تقصين من طوله سويه مقطع على طوله او اقصر شوي عشان يصير تغيير اذا هو كلش طويل ماحب الطويل حده اني
ام الساده الله يعينش على كل يوم تخطيط ويش ليكم بالعجله بتولدون فيوم المكتوب ليكم
ام خليل الله يعينش على فصول خلي ربي يحفظه هههههههههههه مادري ويش بسوي في اخوه

[طفلي حياتي]

اتملل اطلع واتملل اقعد ويش الحل ويايي ابغي اروح ارجع هالشفاطه واخذ بدلها شي ومتعايره ع الطلعه معني ابغي اروح ديرة الحب اليوم بيقرون تنصيب المنتظر عجل الله فرجه
(&(متبــــــــاركين)&)

[ام السادة]

هلا طفطوفه عيوني الله يبارك فيش والله يعودنا وياكم ويه بيبياتنا الحلوين

خلها كل مرة تاخرة عادي ويش ورايي بس التخطيط الله يسلمش يملل واني يسونه لي لانه كنت جايبة جاهل ميت بسم الله عليكم

يا الله ويش باقي واحسن علشان خواتي يرجعون من السفر ويكونون ويايي وبالمرة يوم الجمعه مسويين رحلة الى المسجد اروح وياهم خخخخخخخخ مثل ما يقولون كل تاخيرة فيها خيرة

[طفلي حياتي]

اي الله مايسوي شي الا فيه صلاح ..الله يوصلهم بالسلامه وتولدين وتفتكين

[طفلي حياتي]

يلا حبيبتي ام الساده بقوم مع السلالامه

[ام السادة]

اليوم ملل حده اول شي نقعة المستشفى والحين رجلي راح السعودية وخلاني بروحي كاني ساحرة

[ام السادة]

اوكي خيو اشوفش بخير تحملي بروحش

[om khalil]

غربل الله ابليس للحين عندي ألم في عظامي عينة الطلق يوم أشرب هالرشوفه

شمس هلابيش من جهة الطهر اشربي سوائل الي تنظف الرحم دارسين وزعفران وانشالله تطهرين بسرعه

طفلي
متباركه وش فيش موقفه كارش في الوسطه خخ

[فلونة]

مساء الخير ،، اشصاير اليوم ماميش احد

شمووسة،، انا صار لي ثلاث سنوات ما قصيته بس اول مانخطبت قصيته في صالون علا شارع البلاد الي تقص الشعر اهناك وحدة تايلندية وقالت لي احين البنات يسوون قصة الفراولة وانا طاوعتها وقصيته صار حلو علا طوله من فوق يكون كثيف و من تحت خفيف نفس الفراولة والتغيير حلووو..

طفلوو،، انا البارحة ما ياتني النودة وتميت اتقلب كان خاطري ايي بس صووت الهوى كان يطق علا الدريشة وخفت اطلع الصالة برووحي ،، وانتي بس مستلمتني في العقرة انا موجودة او لا ،، مفارش فارنا حلووين انا الي خذيته عليه تطريز ياهل ميود برنوص خذيته طقم ويا الشنطة وانا المفارش الثلاثة ماخذتهم طقم ويا الشنطة الجاهزين علا قولتج ماحسيتهم عمليين حق الياهل في بداية الاشهر..

ابي امشي والجو ما يساعف موولية وماميش بوادر ولادة ولا شي ،، وانا عادي مو مستعيلة علا الولادة بس الي تجوفني ها للحين مواصلة للحين صامدة جيف علا كيفي



*

[شمس الصباح]

هلا بيكم

احلام ام الله يعافيش اني صاير وقتي معفوس كلش عكس قبل بس ان شاء الله بحاول انظم وقتي الأيام الجايه وتشوفوني عدل ابو صفار للحين في ملاك وارتفع وهاكو اعطيها ماي وكل احطها في الشمس وباشوف ويش يصير
وعلى طاري الطهر عادي اتوقع الدورة اني بعد تصيدني استحاضه لان قبل الحمل كانت معفوسه بعد الأجهاض بس ان شاء الله يخيب ضني وترجع نفس قبل منتظمة والمراخ اخاف هالأيام اطلع لان اكي من الحين الدراز محاصرة hwaml5 شكلي لا صالون ولا غيرة اذا استمر الوضع جدي الله المعين

طف طف اي اني طويل وايد شعري بس مثل ما قلتون بحاول اقصه في طوله وباشوف صالون اللي قالت عنه احلام ام

مشكورة ام خليل شوفي غبائي اني من شفت الدم مستمر قمت حتى الرشوفه ما اسويها بعد اشوي باسوي لي دراسين دله كبيرة

مشكورين وما تقصرون

اليوم فلونة ماليها

ام السادة ربي يسهل عليش انتي وباقي الحوامل

[شمس الصباح]

مساء الخير ،، اشصاير اليوم ماميش احد

شمووسة،، انا صار لي ثلاث سنوات ما قصيته بس اول مانخطبت قصيته في صالون علا شارع البلاد الي تقص الشعر اهناك وحدة تايلندية وقالت لي احين البنات يسوون قصة الفراولة وانا طاوعتها وقصيته صار حلو علا طوله من فوق يكون كثيف و من تحت خفيف نفس الفراولة والتغيير حلووو..

طفلوو،، انا البارحة ما ياتني النودة وتميت اتقلب كان خاطري ايي بس صووت الهوى كان يطق علا الدريشة وخفت اطلع الصالة برووحي ،، وانتي بس مستلمتني في العقرة انا موجودة او لا ،، مفارش فارنا حلووين انا الي خذيته عليه تطريز ياهل ميود برنوص خذيته طقم ويا الشنطة وانا المفارش الثلاثة ماخذتهم طقم ويا الشنطة الجاهزين علا قولتج ماحسيتهم عمليين حق الياهل في بداية الاشهر..

ابي امشي والجو ما يساعف موولية وماميش بوادر ولادة ولا شي ،، وانا عادي مو مستعيلة علا الولادة بس الي تجوفني ها للحين مواصلة للحين صامدة جيف علا كيفي



*

يؤؤؤؤؤؤ توني اقول ما ليش حس زين شفتش

اي بشوف شنو يقولون لي الصالون هذا اذا رحت هاكي الدراز فيها حاله استنفار

[ام السادة]

هلا شموسة شخبارش واخبار ملوكة

[rose soul]

سلامي عليكم
توني رادة البيت..تعبت وانا امشي في المجمع
و أخيرا شريت ربطة حق بنتي الحلوة
بس تضايقت من شي..ان مرت اخوي تقول اسم بنتي عوووووود بس من وراي
عرفت من بنتها الصغيرة
بس جدامي كانت تقول حلووو..شكلها تجاملني
انا كنت ما بقول لأحد..بس لأن من الاغراض يبتهم بيت ابوي وعرفو بيتنا كلهم

انتو شرايكم في اسم بنتي صج عووود؟؟
عموما انا بقوم اريح شوي ظهري ..بعدين بدخل

[Roze]

روزززه
شعليش من راي الناس
اهمشي انتين وريلش عاجبنكم وموافقين عليه
اني قلااااعه نسوان الاخوة مااشتهيهم يدخلون في كل شي ونفاقهم ازيد منهم
وعلى فكره يغارون من حمواتهم حمه رصاصه هدي ماتاخدين راي ركنيها على الرفhwaml5

[طفلي حياتي]

السلام عليكم
هل من احد هنا؟

[Roze]

hwaml02
اني هني

ميته من البرد

[طفلي حياتي]

روز بنت بلادي شوفي القماط اللي في المرفقات هذا اللي تقصدينه؟؟ وهالنوع زين لولا؟؟ اني اشوفه متين ويمكن يعضل لفرحة حياتي ويغربلها..شفت لخيوط الخفاف كلش بس ماعجبني خيط عادي ويفشل ابغي مرتب وحليو وفنفس الوقت خفيف
ام خليل جان دخلتين تحتفلين ويانه بيوم المنتظر عجل الله فرجه اني اوقفها هالصوب ساعات وساعات على الباب هههههههههه
فلونتي ويش هالغرور تمرين وتهربين مابتعلف بش خلاص اخاف ازعجش مافي تحجج خلاص يلا امشي

[طفلي حياتي]

انتين هنا؟؟
عيل بقوم شوي خخخخخخخخخ وبرجع تالي ولا تنامين هالبرد يخلي الواحد يتقرقف وينام بس اصطلبي لين ايي
بـــرب

[Roze]

طفطف هذا نفس الي اخذته اي اوكي ده
بس امي تقول الضعيف احسن عشان يصير مجل يفج روحه ويتحرك داخل القماط ماادري الصراحه خل نشوف الامهات الي عندهم خبره

متباركين بهالليله
اي قاعده اطالع اخبار البحرين يقولون شيخ خليفه يأمر فورا بصرف الالف دينار

[Roze]

عيل بقوم اسبح سبوحة النومة عشان ارتاح جدي احس روحي لوفه وماتيي النومة
وبنصطلب لش بشوف متى ترجعين

[طفلي حياتي]

اني ييت بس شكلش نمتين وراحت عليش نومه عالميه
رحت بس قهرت روحي ويش ليي بهالقعده لكن ما اتوب

[Roze]

جي خيشه انام منوقت ههههههههههه
لحين قاعده اباوع التي في
منهو قهرش

[طفلي حياتي]

خلها على الله
وكله رايح في الزمن وبيصير ذكرى :)

[طفلي حياتي]

مادري احس انفعلت وايد حذفت الرد

[Roze]

وي ياحبيبتي لاتقهرين روحش وتكدرين فروحه
عندنه وعندش خير كلهم العمات جدي وهالمشاكل ماتخلص
خليها عنش نسوان لول بعد الواحد مايقدر يكلمهم ولاتقولين لريلش اذا تبين نصبحتي مهما يصير مايرضون على اهلهم يابعد عمري ولابغلط امه
على قولتش امهاتنه ماعطوهم اني امي كل يوم تجهز صينية الغدا لمرت اخوي اتخيلي يوميا ترتفع لها فوق وهي طول اليوم ناايمه بس اني امي تقهرني ماتقولها شي
واني لين اروح بيت عمي الصباحي تستلمني للطباخ واني ثقيله يالله خليها على الله ياحبيبتي

[om khalil]

ياساعد الله قلوبكم الله يهونها عليكم ويفسحها عليكم وتستقلون ان شاءالله في مكان بروحكم ولاحد يطالعكم اكلتون ولا ما اكلتون، الحمدلله على كل حال

طفلي ماقدرت أيي لجل توي راجعه من لشغل هديكلحين الساعه اربع ونص
وسيده إنفلت

[طفلي حياتي]

لو بقول بتعيزين من القراءه وبيفتر مخش وكله على البلع ياعلي عالم غريب

[Roze]

احسن يوم حذفتينه لحد يجي يقول انتين تخرين كل شي وماتخلين شي بعد هالبنات

[طفلي حياتي]

هلا ام خليل ويش مودينش صوب بيت يدي؟؟
انتين غير بيتكم مناك؟؟
قعدي طيبي خاطري ويى روز مره منقهره

[Roze]

مو راده على الاكل بس لانش مرت ولدها لو بتها مابتعاملها بهالخياس

[طفلي حياتي]

ههههههههههههههههههههههههه حلووووه روزاتي
اني بعد ماحب هالشكل انشر غسيلي لكن القهر ومايسوي عفر المسنجر يروح في مهب الريح لكن هناا خخخخخخ
بلاوي

[Roze]

انتين ويش منزلنش ليهم الليله الافنين مالش راده جان تسبحتين وقفلتين باب شقتش وريحتين بدنش وبالش بدل المجاملات ويا اهل ريلش لازم تفتقينها ابتسامه ويا الكل

[طفلي حياتي]

روز فوق هذا كله تعاملي وياها ذووووق عدل تربية امي اني
واقدم ليها قبل لا امد ايدي وادللها لكن مايفيد ماني عارفه السبب
كل مره انقهر اسبوع وارجع طبيعي بس ما امد ايدي لاكل الا قليل وعقب مده وانصاد
بس خلها على الله

[طفلي حياتي]

اللي صار ان حميي هنا ومرته مسكينه طيبه فحالها ولا نشوفها الا مره في السنه وقعدت وياها وتالي من دخلو لجياسه هذا اللي جرا ههههههههههههههههههههههههههههههه ياعلي نكت الدنيا

[Roze]

خلها تاكله بروحها تشبع فيه
ريلش مو ميوعنش ولاتفتكرين

[Roze]

دخير بالله مو عشانش شافيه عليه حق بتها الي في بطنش لاتتنفخ على شي
ياااعلي الاكل بعد يتحجون فيه
ويقولون الدراوزه بخله هههههههههههههههه

[طفلي حياتي]

لا والله الا الاكل عاااد استغرب والله
الموهم يقولون حسون في غيبوبه ملا يندرا هالخبر صح لوهرار.. لان بلا اكل من صارت الثوره ههههههههههه

[om khalil]

رجعتي مريت بيت ابويي آخذ حاجه ومريت صوب هاك الوادي

والله يساعدش ويفسحها عليش وتفتكين من لمطالع في الأكل وغيره ناس فاضيه
يرضون حد يسوي لبناتهم جذا
مرر هالدنيا

[طفلي حياتي]

مره تمزح حماتي تقول الدرازوه بخله قلت ايييييييييييي امبلى البخل بأصوله عندكم ويدرس في اكبر فصوله بعد
اما لدراز منتون كفوووووووووووووووو

[om khalil]

دايما تصدقي بنية تيسير الأمور والله يشغلها بنفسها عنش وعن ريلش

[om khalil]

يمكن شفيانه على شي من عندش
اقول لاتعطينها لو هو دواها ههههههه

[Roze]

من تحررت مصر تركت الاخبار اني هههههه
اي والله يم خليل الله يفرجها على الكل وتتفسحون يطفطف وتطلعون من هالضيق وتزورينها نوبه في السبوع زياره السلام والاطمأنان

[طفلي حياتي]

اني حسستها اني منقهره ولاني يوعانه وفهمت الدرس عددددددل

[om khalil]

داهيه دهته جذبوا
قال غيبوبه قال
عمره ألف وماصاده شي والحين بغيببونه عن لا يحاكمونه

يالله الفال للي بعده

[طفلي حياتي]

اني ما اخليها تشفي بالعكس لازم اغرها واحترمها هو نسيتين الامام علي وشقال؟؟
ان انت اكرمت الكريم ملكته ...........
روز اني للحين اتابع الاخبار ماتركتها عن مصر والياي بعد يبغي متابع ازيد من اللي راح

[Roze]

هههههههه مو سهله طفطف بعد

[طفلي حياتي]

الحين الاخبار تتفلت على اشكال والوان والايام كفيله كل شي ببان

[Roze]

هو االليله الفلنتاين هههههه توي داريه
هابي فلنتاين دي حسني مبارك

[Roze]

الله يستر باجر بس
وينصر الشباب

[طفلي حياتي]

حلوه روز هبي فلنتاين اتخيل يغرغرونه بشوربه وهو ماله خلق شي سرحان ولا يدري من صوبه
امواله تجمدت ومحاكمات على البنوك اللي بتصرف مليم واحد او بتحول قرش واحد من حسابه

[om khalil]

افتكوا مساكين الفال لينا وتتعدل اوضاعنا

[Roze]

احين ويش بنسوي في الالف محتارين والله
شكلي بسافر فيها سويسرا وفرنسا
او امممم تدرون خاطري في شنطة لويس فيتون اتكشخ بها او لاااا لا لا
بقول لريلي يسوي ليي بها برجه ورا فلتنه

[طفلي حياتي]

ام خليل ماتعرفين احد في لدراز يبيع دياي فرخات يعني
ولد اختي ميت على ديايه اقعد اهر وياه عنها ويتخيلها والحين مصدق ان عنده ديايه
امس يسولف وياي في التلفون ساعه كامله عنها واحسب صدق يابو له ديايه طلع حجيه هرار كله
يقول عطيتها عيش وخليتها في المخزن وصوبها في ماي ولونها منقطه
طلع كله شلخ .. اليوم في بيت يدي يايب ليي ريشة ديايه يراويني اياها وبغت تطير الا يقول لالالا وحملها ومشى بها وي على افادي خاطره في ديايه

[Roze]

اذا فضلت بطلع سياره من الوكاله اوووبها
والباقي بوزعه على الفقاره

[طفلي حياتي]

الله يستر من باجر مايندرا ويش بيحصل وبيجري اني خوفتي على ولاد اختي بس كله اخاف يصيدهم شي

[طفلي حياتي]

الا يشوف روز يقول مليون مو الف خخخخخخخخخخخخ

[om khalil]

روز
استريحي وكملي شقتش ياحظي هههههههه

طفلي
لا ماعرف باسايل لش بيت عمي خبرة في لدياي ولطيور

[Roze]

مشكلتنه فايضه فلوسنه ماندري وين نصرفها
مالها داعي هالالف ابببدن
عفر الكويت لو اني هناك بيعطوني الفين ويا الي في بطني
حتا فرختي يحسبون حسابها هههههههه
بقوم انام واحلم ويش بسوي فيها ههههههههههههههه
اقول لريلي هالالف خلها للحمام الاسباني الي بتركبه قد الديره في شقتنه

[طفلي حياتي]

اي الله يخليش يم خليل
المشكله امه ما تبي لديايه تقول بتلعوزهم اني قلت بس عن خاطره يستانس بها شوي وبنتصرف فيها.. ابوه اخذ له كتكوت وعبده عباده
عاد ييت بيت ابوي واقول له حمود وشخبار كتكوتك الا يقول كتكوتي مات قتلني من الضحك هههههههههههههه قلت له عظظم الله اجرك عيل

[Roze]

يالله تصبحوون على خير

ويوم سعيد ان شاءالله
والزعلان والمقهور لايكدر روحه ابدن اضحكو وطنشو وعيشو حياتكم

[om khalil]

مساكين اليهال اذا تعلقوا بشي صعب ينسونه
بس زين بتي نست سمجتها اللي فطسها خليل
عاد برا الماي ههههه

دهشني التلفون في الكتابه كل شوي ينقطع الاتصال ويروح الرد ماعرف جيفه اسوي له كوبي

[om khalil]

اني بعد خلفش ياروز
باحاول انام ولو انه هالارق هالايام داهشني
تصبحون على الف خيرر

[طفلي حياتي]

مع السلامه روز تصبحين على خير واني استانست وياكم وراح القهر
ام خليل صدق اليهال اذا تعلقو بشي صعب يفارقونه .. المفروض تودينها اي محل في بني يمره محل يبيع سمج خلها تختار وحده بدل اللي ماتت..

[طفلي حياتي]

في امانه وحفظه ام خليل
تصبحين على خير

[ام السادة]

شحوال خب اني اخر وحده اجي

نمتون لو بعدكم رحت اسوي روحي بانام جتني الافكار من كل مكان خوفت روحي وقمت

[طفلي حياتي]

هلا ام الساده قلت اني ما تيين الا الاوقات اللي محد هنا
بس اشوا اني هنا
واي افكار اللي يتش ؟؟

[ام السادة]

ويش اسوي خيو ما افضى الا في الاوقات غير مناسبة

اي افكار بعد كل افكر بيجيني الطلق وماحد وياي وبيصير فيي شي

[صعب تنساني]

ام الساده وطفطف صباح الخير

[صعب تنساني]

ام الساده لا تخافين توكلي على الله الله ما ينسى عبده خيو ولا تخوفين روحج

[ام السادة]

هلاااااااااااا صعب ويش اخبار عاش من شافش

[طفلي حياتي]

هلا صعب تنساني
ام الساده ولو ياش الطلق يعني البيبي بينزل في لحظه؟؟ شيلي هالهرج من راسش ولا تسوين هالشكل الله وياش وحافظنش ان شاء الله

[صعب تنساني]

عاشت ايامج يا قلبي انتي شخبارج للحين ما في بوادر ولاده

[ام السادة]

ويش اسوي من سافروا عني واني لا اعرف انام عدل ولاشي حتى اكل ما اكل عدل

اليوم الدكتورة تقول ادا نزل وزنش زياد اسبوع الجاي برقدش لانه هالاسبوع نزلت 4 كيلو

[صعب تنساني]

هلا يا طفلي اليوم سهرانه ؟؟

[ام السادة]

ههههههههههههه كل يوم من احس بالم اقول خلاص اليوم بولد

[صعب تنساني]

ام الساده ليش ما تاكلين من خوف الطلق لو تفكرين باهلج؟؟

[ام السادة]

طفطوفة انتين الي قلتين تبين كتكوت

[صعب تنساني]

ام ساده ان شاء الله يجون بالسلامه وتولدين وهم اهني ينتظرون البشاره

[ام السادة]

الله يسمع منش

ما اشتهي اكل من لثنين

[طفلي حياتي]

صعب اني تعبانه بس مافيني نوم
ام الساده هو اسبوع وبيرجعون بالسلامه لاتحاتين لهالدرجه انسى السالفه اشغلي روحش والحافظ الله

[ام السادة]

ان شاء الله
هدا غربال الي ما عندهم احد بسم الله عليكم

[صعب تنساني]

يعني مثلي انه بعد شكله فيني ارق وما عرفه انام

[صعب تنساني]

ام الساده افى عليج ابو الشباب موجود وما راح يقصر ان شاء الله

[طفلي حياتي]

ام الساده هوني على روحش اني محد لي غير الله امي الله يرحمها متوفيه وخواتي في بيوتهم ومتحيره بأمري لكن مع هذا موكله امري لله وهبني الجنين وما بتعطل ولا بضيع ان شاء الله
الله ارحم

[ام السادة]

مشكورة صعب والله فيش الخير

طفطوفة صادقة والله ريحتوني الله يريحكم ويسهل علينا وعليكم

[ام السادة]

طفطفاتي تبين كتكوت لو غيرتين رايش خخخخخخخخ

[طفلي حياتي]

اي امبي من وين؟؟
لولد اختي يبغي كتكوت قلت باخذ له ديايه صغيره احسن فرخه يعني الكتاكيت بسرعه يموتون

[ام السادة]

افا عليش انتي تامرين امر طرش لش رقمي علشان تقولين وين اجيبه لش

[طفلي حياتي]

هههههههههه ام الساده تبيعون دياي يعني؟؟

[ام السادة]

اي عمي عنده ورجلي مولع بهم وتوه تقريبا من اسبوع او اسبوعين مفرخين يعني موصغار واجد ولا كبار

[ام السادة]

وين رحتي صعب ما تبين كتكوت هههههههههههههه

[طفلي حياتي]

ما شاء الله
اني ابغي لولد اختي وحده صغيره فرخه يعني ماهي كتكوت نتفه لالالا ولا كبيره تهرب وشيطانه
شلون اسعارهم هديله؟؟ ابغي منقطه على قولته ههههههههههههههه

[ام السادة]

مو شغلش كم السعر انتين بس خليني اجيبها اراويش اياهاا بعدين يصير خير

يمكن ما تعجبش

[ام السادة]

ويش صار هربتون يعني

[طفلي حياتي]

النت حده ضعيف كتبت رد وطار مللني
انزين بنتفق على يوم تجيبونها لينا بس انتين على وشك ولاده اخاف نتفق وتولدين يومها خخخخخخخخخخ

[طفلي حياتي]

ماني قادره فرحتي حاطه ريولها مادري هو راسها على ضلعي ويعورني عدددل

[ام السادة]

هههههههههههههههه شوفي ادا تبين باجر في عندي وقت عقب صلاة المغرب تقريبا اتصلي وبتفق وياش اوكييييييييييي

[ام السادة]

ياعلي الله يساعدش

دكرتيني بيوم كنت حامل بالسيدة كلة متغصغصة ليي تحت ضلوعي كل ما انزل فيها مافي فايدة

[ام السادة]

يا الله علشان تشوفين الدبة قبل لا تهفت وتعلقين عليها وية البنات خخخخخخخخخخخخ

[طفلي حياتي]

اني باجر ويش يوديني مناك توني اليوم رايحه ماقدر من ظهري كل يوم اروح
ان شاء الله الخميس بروح انتين قريبه من لدراز؟؟؟
عاد اول شي ابغي اعرف وش في الوان بختار لون عفر

[طفلي حياتي]

ام الساده بقوم الحين اتمدد ماني قادره يحرقني ضلعي عدل وابغي انبطح يمكن ادخل من تلفون ريلي بشوف
يلا مع السلامه

[ام السادة]

يا الله خيو اني قفلت خلاص جتني النومه حدي بقوم الحين

تصبحين على خير وشوفش باجر على خير

[ام السادة]

اوكي خيو ما تشوفين شر

اي اني قريبة من لدراز بس يوم الخميس صعب شوي لانه زوجي اول ليل ادا تقدرين قبل

اتصلي فيني او سوي مسكول علشان اكلمش واقول لش عن الالوان
يا الله تصبحين على خير

[om khalil]

نمت  ونص وقعدني خلي 
كل شوي يبا شي دهشني خلاص برتفع لشغل وأني مترضرضه ويش هالحاله

[فلونة]

صباااح الخيرر ،، هبي فلنتاين دي :p

البارحة رحت جيان يازعم ابي امشي وتكسرت عافيتي،، كل مكان حاطين وود وين مافر ويهي اجوف هالاحمر اقول حق ريلي خلنا نطالع ما خلاني ،، هل يوم سخافة بس تغيير شوي في الحياة نبي وردة دخيل الله ،، عندي موعد الساعة سبع وربع وخايفة اروح اكو من احين اسمع صوت طيارة مادري هلوكبتر تفتر في الجو والله يستر قعدت حق الصلاة واحين خلاص ماميش نووم

طفلوو،، ليكون انتي الي خاطرج في الكتكوت وتقولين ولد اختج،، تبين تتدربين عليه قبل لا تشرف زنوب اعتررفي ،، وانا علا قولتج اطل وامشي لاني مشغوولة بشغل البيت الي ما يخلص اخاف اييني الطلق والشقة حالتها تفشل وايد متفائلة الله يسلمج ان في هل يومين بولد شكلي الا باطوف موعدي،، الله لا يقوول مابي افاول

رووز،، اكو حاطين في الجريدة خبر نزلوا علاوة الغلاء،، روحي خلصي امورج فيها تالي نطري الالف لانه شكلها بتطووول وااايد والناس الف تخطيط حاطين لها الفقير يحتار شيسوي بالربيتين الله كريم ويفرجها علينا وعلا امة محمد

شموووس،، كل يوم بتجوفوني هو انا اقدر علا فراقكم ،، شكله البطل عاجبته الدفوة في بطني ومايبي يطلع في هالجو،، والله انا افكر في الثياب الي ماخذتهم ماخذيت شتوي الا جمن بدلة والجو كل يوم يبرد زوود

ام خليل ،،شو اخبارك واخبار خليل ماجوفج تسولفين عن مغامرات بنتج اكثر شي خليل الي امسوي لكم الجو الله يحفظه

احلام ام ،، امس كان دورج في الدختر واليوم انا عاد كلش ما لي بارض ارووح جنهم يسوون لي شي غير هالضغط والوزن ماميش بس ريلي راح الشغل ويوصيني لا ترقدين روحي الدختر واذا جفتي الاوضاع غير مستتبة قعدي مكانج وانا هالبرد الي ذابحني

روز سول تعالي اليوم دشي لا اتوتر عبالي ولدتي عالأقل طلي والله ادري فيج اليوم عندج مشروع خطير ويا ريلج :p جان تولدين قبلي هاا

ام السادة،، انا اصير في الشقة بروحي ريلي شغله شفتات بس الحافظ الله وبيتنا بعيد لو اتصل في اي احد مابيقصرون،، بيني وبينج انا حزة الي اييني الطلق مابي الكل يتيمع ويطالعوني احس فشيلة وحدة تتألم والاوادم يالسين معاها الله بيسرها انتي لا تعسرينها وتفائلي

باقوم اتسبح جان اتيسر الموعد وجان زين تسوي لي سونار متفررغة حدي لا ،، يلا نجوفكم بعد قليل

[فلونة]

رحت ورجعت ومحد دش كلكم رقوووود و تالي بتيي طفلوو انا مارقدت وما غفت عيني العيااارة
يعطوون الموعد من الساعة سبع ونص والدكتوورة ماتيي الا الساعة ثماان مادري شاقول غير الله يصبررني واولد وارتااح وتقول لي اكو ملفج خلص مافي خانة فاضية يعني بالاحرى بس خلاص لا اتيين آخر موعد متابعة الاسبوع الياي دعواتكم اولد قبل هل موعد ،، اكلت روتي وجبن والحموضة واصلة لي بلعومي
يلا قوموا بسكم نووم انا مصحصحة حدي والبطل الي في بطني شكله راقد اذا بغيت ارقد يقعد يفتر وان قعدت لا اجوف حس ولا خبرر

[أحلام أم]

شحوالكم ويش أخباركم
أمس كنه في زياارة لناس نعرفهم من العصر لليل تعبت ساعات أقعد على صوب وساعات أمد إرجولي وساعات أتكي على مسند وتالي لا إنسسسسدحت وإللي فيها فيها وولدي حمود ماينراح وياه مكان تقولون منفلت من سجن من الشطانه كل حين يحصل ضربة مني ومارتحت إلا ليين مشينه البيت
الله يريح قلوبكم
فلونة
الله يسهل ولادتش في أسرع وقت وترتاحيين من المستشفيات وقرفهم
أم السادة
ماتخافيين من الكتاكيت والدجاج ،اني خواافه حدي من كل أنواع الطيور وكأني جاهلة أولادي يخوفوني وموبس الطيور كل أنواع الحيوانات المتوفرة إللي نشوفها من خيل وبقر وغنم وأرانب وقطاووة
عندنه في زراعة عمي كان في ثور ذبحوه لوفاة النبي يحيى (ع) ورحت عن إفادي أشوفة قبل يذبحونه فتحوا الحضيرة ومن على الباب من شافوني الغنم قاموا وأولهم التيس وسيدة أركض وتنخزني سلاية من شجرة في إيدي من الخوف ،وليين صار عندنه طير أو أرنب في البيت ولا كأني أعرفه جبااانه حدي مع إني في طفولتي عندي حمام وأرانب ويش كثر أني وأخوتي
أم خليل
ويش أخبارش وأخبار أمش الله يساعدش على الدوام وتعبة
طفلي حياتي وروز وروز سول
أصدقاء السهر ويش أخباركم ،أني صدق أسهر للفجر بس أتقلب ،بس أخاف أفتح الكمبيوتر يقعد أبو الشباب ويسوي ليي قرقر وااايد ههههه
شمس الصباح
أكو الخوف يودي ويجيب على أهلي عندكم الله يستر علينه وعليكم
إعطي ملووكة ماي الحندبان واايد زين عن أبو صفار ،أني إختي لمن ولدت زااد أبو صفار على ولدها ومن خوفها راحت الإمريكي وهم ماصدقوا يصيدوون زبونه رقدووها وياه والحمدلله صاار زين
شرعن ملووكة داومي مثل ماقلتيين على تعريضها للشمس وإنشاء الله أبو صفار ينزاح عنها يااارب
ربي يحفظ الجميع وييسر أمور المؤمنين والمؤمنات

[rose soul]

سلامي عليكم
شخباركم؟؟
فلونتي لا لا ..لا تتوترين ولا شي ترا شكلنا ثنتينا مطولين خخخ
اي مشروع الخطير الله يهداج هههههههههه..مالي بارض كلش .. صايرة ماتحمل كلش .. حتى لو يتلزق فيني مالي بارضه صراحه ههههه
..
أحلام ام..هلا بيج..واعليه حمودي..ليش تضربينة..كسر خاطري..خليه يعيش طفولته
دامج تسهرين ..تعالي كملي السهرة علشان تحلووو معاج..انا امس ماسهرت معاهم..صادتني حموضة عدل ورحت انسدح واتقلب ليما رقدت

[rose soul]

ريلي متصل فيني يبني اروح بيت عمي الغدى هونيك
يلا بقوم اسبح اجهز نفسي بسرعة بسرعة
مافيني شدة
اجوفكم بعدين
ولا يندرى شخبار الوضع بررره اليوم

[فلونة]

انا تميت اقرى جمن موضوع اهني وغفت عيني واتييني احلام كله علا هل مواضيع ويشتغل الوسواس حتى في الحلم صج الشيطاان ما يخلي احد في حاله اعوذ بالله منك يا ابليس الرجييم

احلام ام،، يعطيج العافية وانا بعد يوم الجمعة الغدى في بيت خالتي واقعد بالاربع ساعات ماميش الا اقعد الا الكرسي شوي واذا تعبت انزل علا الارض وبس هاذي حالتي.. يلا هااانت ان شالله

رووز سوول ،، اشوة دخلتي ها تبين تقصين علي وتولدين قبلي حتى في احلامي جنج ولدتي قبلي والله من حنتي شكلنا بنطول والمستعاان ربنا،، انا اليوم مافيني شدة طباخ وان نزلت تحت بيطلع الغدى من خشمي لانه ماميش شغالة بس باروح اجوف الوضع يمكن اقعد تحت وانتي عليج بالعافية وانا قصدي شريف ها بس انتو فاهميني غلط روحي تمشي ويا ريلج ما يصير يعني :p

[ام السادة]

السلام عليكم ويش اخباركم


فلونه ويش اسوي جبانه حدي وخواتي يدرون عني وكل شوي اختي الكبيرة تتصل فيني تطمن
واني اسوي روحي صدق واقول ليها ما بيطلع الا في حظنش خخخخخخخخ

احلام ام لا ما اخاف ولا شي بس شوي اخاف من لحصان يعني الي يمكن يركضون وراش بس الدجاج والكتاكيت اني اركض وراهم خخخخخخخخخ والحين بتي ما تخاف من شي لا دجاج ولا خيول ولاهم يحزنون يعني شجاعه ازيد من امها ههههه

ام خليل الله يساعدش ويعطيش العافية

روز سول ويش احوالش شكلي اني بعد مطوله بالسيد عكس السيدة اخدت بس اسبوع من التاسع وولدت

[طفلي حياتي]

السلام عليكم
اكره شي في الحياة القعده متأخر اليوم يروح خساره وماشتهي اسوي شي
ابغي اروح ابدل هالشفاطه بحاجتين ثلاث ولاني مشتهيه اتحرك من مكاني حتى اكل اكره اسوي ليي بس هالجبن والخبز اففففففف
النجت المتبقى خليته يستوي والنار مرفعه واحترق فتكينه منه
فلونو اني اخاف من لدياي بس ولد اختي من يوم هو صغير ارسم له ديايه واقلد صوتها واول مره شاف حمامه انبهر عدل ماصدق ان اللي نرسمها في منها حقيقه والحين تعلق بأي شي فيه منقار وجناح واسولف له عن ديايه ومصدق الحين يبغي ديايه منقطه ونربط في ريولها خيط لاتهرب هههههههههههههه مادري ويش شعوره لين شافها
ام الساده تخافين من ويش ؟؟ ترى احنا مسبهين على عمانه لاجربنا الشي ولا ندري ويش بيجري علينا خلها على الله ولحزتها بنضوقه بضوقه هيهيهيهيهيه

[ام السادة]

هلا طفطف ويش فيش شكلش كلش متضايقة خير

بس خلاص اني متوكله على الله والي بيصير بيصير خفت لو ما خفت

[طفلي حياتي]

هلا ام الساده متضايقه من الخربطه اللي اني فيها انام قريب الصبح كل يوم هالحاله واقعد الظهر متكسره عدل ولا اشتهي اسوي شي
بلوه ولا ادري ويش الحل

[أحلام أم]

دخلت أسلم وباشيل علية ولي عودة
ويش هالأصوات إلليي أسمعها في الشارع الله يستر علينه
أم السادة
عجل بس أني الجباااااانة
أول ماإنخطبت زوجي يراويني زراعتهم مايدري ماخذ وحدة خواافه دخلني حضيرة كبيرة فيها غنم وأني لاصقة ورااه وأضحك ومن دخلنه شوي وجو الغنم تحتنه أهرب وأطلع وأقفل عليه بااب الحضيرة هو ويااهم هههههه فشيلة وتم يعايرني
مادري خوفي من الجاج والكتاكيت ليهم قصة أمي العودة أم أبوي كانت تربي دجااج ويش كثر ومسكينه كانت تخلي البيض في زبيل متروس رمل وتقعد عليه الدجاجة علشاان يفرخون ومن قامت الدجاجة هيك اليوم رااح أخويي وأخذ عصاة وكسر البيض وإللي طلعوا قتلهم وحملهم ويضحك يقول ماتت المتوه وصار شكلهم يخوفني من أذكرهم للحيين مع إني كنت في صف الأول
ومرة أمي في البيت الجديد قام أبوي سوى حظيره حليووه ومقسمه وحط عصافير ودجاج وبين الدجاج كان في ديك أبيض شرس يطب علينه وينتفنه تنتيف ويلحق ورانه وصارو الدجاج نفسه يضربون
إيه كل حالة خوف في الكبر لها مصدر خوف وقصة أثرت في الإنسان في صغرة ورافقته وخلته في حالة خوف لايستطيع التغلب على حالة الرهبة لدية وكل حيوان له أني قصة وياااه خخخخخخ جبن جباانه
ياربي زادت الأصوات خارجا الله يستر
أشوفكم في وقت لاحق

[ام السادة]

الله يعينش ويعينا يطفطوف اني بعد يصيدني جدي

ههههههههههههههههههههه ضحكتيني احلام ام

[ام السادة]

يا الله اشوفكم بعدين بروح اشحن الاب توب جارج

[فلونة]

تغديت ومن الكرف الي كرفته انهضم الغدى ولله الحمد ،، واكو اصوات الطائرات تفتر في الاجواء الجميلة والله يستر علا اخواني النتف اتصلت حق امي جان تيودهم الا تقول ماميش احد تغدو وطلعوو

طفلو،، محد قالج سهري لنصوص الليالي متعبة روحج ومتعبة بنتج معاج،، اليوم حاولي ترقدين الساعة 12 عالأقل وحتى لو ماياتج النودة انبطحي وعدي النمل والنجووم :p
طلعتي خطيرة وعندج موااهب ترسمين بعد انا خطي كريه ورسم ماعرف ارسم الحمدلله رب العالمين ماطلعت علا امي ماشالله عليها فنانة

احلام ام،، انا بعد متعقدة من شي اسمه حيوانات طيور او حمام والسبب يوم كنت صغيرة ياب لي ابوي عصفور وخليته في البلكونة و من الجو الحار داخ مسكين ولحقت عليه في آخر لحظة خليته في حظني ومات ذبحت روحي من الصيااح وسويت اضراب علا الاكل و الموقف جنه البارحة للحين صورته في بالي ،، وانتي الله يهداج تحبسين ريلج ويا الغنم عاااد عالأقل ويا طيووور او حمااام :p

ام السادة،، احنا علا قولة طفلو بندش الولادة وما ندري اشصاير علشان جذي يمكن مو مفتكرين نبي نولد والسلام ،، والله انا كل يوم يمر احس بشي غريب وخاطري اجوف هالبطل الي في بطني سليم معافى يااارب

[الفتاة الذهبية]

هلا شخباركم ؟
العفسه قايمة في الشوارع الله يستر

[شمس الصباح]

االسلام عليكم

شخباركم قلت اسلم عليكم واشوف اخر اخباركم

على فكرة اني احب الحيوانات وووايد

طف طف في واحد يقعد صوب القبائل يبيع صيصان اصغار وبعد تحصلين في سوق الأربعاء بعد يبيعون اني احبهم اذا صغار ومن يكبرون ما احبهم

احلام ام تذكرين الطير اللي كنت اربيه كبر واخذه ولدي وطيره فوق السطح هذا الطير يجيب سعر مائة دينار اذا بعته بس دفعة بله

يالله اشوفكم على خيررر

[طفلي حياتي]

هلا سيده
اني احب اطالع الصيصان فقط لا اعرف ليهم ولا شي وولد اختي اخذ له ابوه كتكوت على قولته وتم يعبده عباده ويقابله ليل ونهار وتالي مات قلت باخذ له ديايه صغيره احسن يعني عدت مرحله الخطر ههههههههههههههه يربيها ويستانس بها

[الفتاة الذهبية]

فــــــــي احــــــــد او امـــشــي

[الفتاة الذهبية]

هلا طف طف
شمسوية مع الحمل؟

[طفلي حياتي]

الحمدلله فتوت وشخبارش انتين؟؟ وشخبار وردتش؟ عفر صوبنا هدوء ماسمع شي اني الا خوافه
بس لدراز يقولون منقلعه قلاع الله يستر
فلونو لاتروحين تاكلين تحت غربلتينه اني اعذرش لان لين اروح بيت احد اتغدا لو شي مايسوى عليي لازم اقوم اكرف بعد فشله فأنتين قعدي مكانش ثقيله وحالتش لله يمكن يرأفون واييبون لش لقمه مايابو اكلي بصل وخبز وبس اما حاله وياش

[طفلي حياتي]

فتوت احس تحت بطني كأنه فرحتي قاعده فيه ماقدر امشي عدل ولا انبطح ولا انقلب معني توني بدخل الثامن مو كأنها تو الناس؟؟ ان شاء الله اولد بداية التاسع ما اتأخر مثلكم
اقول هالحجي ويعورني بطني خخخخخخ مادري ويش بيصدر علينه

[الفتاة الذهبية]

انا تمام ووردتي تمام تسلم عليش خخخ

احنا بعد صوبنا هدوء لكن خالتي جت بيت ابوي العود
تقول صوبهم قايمين

[فلونة]

طفلو ،، انا علا قولتج نزلت تحت وغدى خالتي ما يحبه ريلي ،، ركبت سويت غداي ونزلت تحت صار لي عفيسة مكانين ما يسوى علي بس ماقدر مانزل اخاف تزعل خالتي

فتووت،، شخبار الحلووة والله انا اسمع اصوات غير شكل من كل صوب وريلي يبي يطلع وانا قاعدة في جبده

بررب باكمل شغلي

[طفلي حياتي]

ويش قلتين فتوت عن هالالم عادي لولا تحت البطن؟؟ بس لين قمت اتحرك او بنبطح ماقدر انقلب الا يعورني؟؟ يعني هالفتره عادي لو تو الناس

[طفلي حياتي]

فلونه والله العظيم ماعندش سالفه بشاشه منش ترى
مدام ريلش وياش وبتطبخين وعندش شغل حقوي تحولين؟؟ ياعلي تبطين الجبد
وتزعل ليش خالتش؟؟ يوووو

[فلونة]

ذبحونا بمسيل الدموع الله عليهم خشمي حرقني حسبي الله عليهم ،، وريلي يقولي جوفي الاوادم وانتي منخشة

[الفتاة الذهبية]

الحلوه تمام

طف طف
اي عادي الالم

[طفلي حياتي]

اشتمي بصله فلونه عن ريحة المسيل

[الفتاة الذهبية]

تونسي يقول حطوو لكم لفاف فيه كولا واشتموه عن ريحة المسيل

[فلونة]

خالتي خرعتني تقول ريحة مسيل الدموع مب زينة حق الحامل وانا هبالتي بطلت الدريشة اطالع شصاير واحين بطني عورني من الخوف،، رحت شميت بصل والله يحفظنا من هالشر و يرد كيدهم في نحرهم يارب

[الفتاة الذهبية]

يلا بخليكم الحين

[طفلي حياتي]

الصفحه تشير مللتني ابغي اكتب ابغي اشوف الردود تمللت
اي سمعت حليب قواطي بعد يقولون خخخخخخخ يبللون خلقه ويشمونها

[طفلي حياتي]

حقوي تبطلين الدريشه بعد

[بنت الأياويد]

مساء الخير شخباركم ؟

[طفلي حياتي]

هلالا ام شيخه مساء النور
شخبار شيخه؟؟

[بنت الأياويد]

الحمدلله شيخه بخير بس مغربلتني مع بطنها والله يعزج الزواع وماتنام وايد مادري ليش ههههه

[طفلي حياتي]

بقوم اتجهز للصلاه القاكم وقت ثاني
باااي

[بنت الأياويد]

الا ام حماني شخبارها جنه من زمان مادشت؟

[Roze]

استر يا ساتر

[طفلي حياتي]

هلا روز
ههههههههههههههه تضحكيني
اللهم سترك وعفوك بس ويش صايوور عفر الحين؟

[Roze]

سكتي يروز قاعده اصيح
توي رجعت شقتي
وعييزت من ريلي لاتطلع اخاف عليك وجيف بتخليني بروحي قال اكو الاوضاع مستقره ولافي شي

الحين توهم قام الضرب على باب العماره واختنقت من مسيل الدموع
اتصلت له جني مينونه اقوله لاترجع البيت واني بروحي اهنيي حددي خااايفه

[Roze]

طالعي من بهدلتي كتبت روز بدل اسمش

ياررربي ويش اسوي

[طفلي حياتي]

روز الليله هناك واحد من حمياني هذا زين بس مرته وييييييييييع
ويبغون عشى ولا في مكان مفتوح واني متبله دياي ولو يقولون دواهم ماسويته وهم هنا مايضوقون عظم منه.. البارحه تسوي لي حركات ع الاكل واقوم الليله اقدم ليهم عشى؟؟
خلهم يطقعون ببستوك وحليب hwaml11

[بنت الأياويد]

الله يعينج ياروز حالتج صعبه
انا بعد بروحي في الشقة مع بنتي وخايفة اروح بيت امي شوي بعيد

[طفلي حياتي]

لاتاخفين حبيبتي ولا شي
اني ريلي رايح المسيد المغرب وتوه ماشي الا الطلقااااااااااااااااااااااااااااات قلت ياعلي راح الريل واتصل مايرد تالي طلعو مسيره واني على اعصابي وايي فلت البيت قلت ياعلي اشوا
عفر اذا هدأ الوضع اتصلي له ايي ولا تخافين صلي على النبي مابصيدش شي قومي شمي بصله

[Roze]

مااسمع الا صوت سيايير الشرطة داير مداري جيفه اعرف هدأ الوضع
يختش اني مو خايفه على عمري خايفه عليه بس جيفه بيرجع في هالديره بروحها مي ديرتنه وغرب فيها

[طفلي حياتي]

هلا ام شيخه جيف صوبكم في شي بعد؟؟ انتين وينه؟ المحرق مافي شي

[بنت الأياويد]

طف طف هههههههههههههههههههههههههههههه انا اخر مرة ماكلة الساعه 11 ونص الظهر وحدي ميتة من اليوع مسوية صالونة دال ومافي خبز واكي مرزوزة على الجدر بس جذي

[طفلي حياتي]

هو بيعرف المدخل يبين لين في شي روز مابجازف وبيدخل وفيه شي
وانتين داخل شقتش لاتخافين ولا عليش من الاصوات صلي على النبي شغلي التلفزيون وقعدي ويانه ع المنتدى ولا تحاتين

[بنت الأياويد]

لا احنا مافي شي بس زوجي محد ويقولي صعبه ايي الشقة لان الدرب الي بايي فيه عفسه

[طفلي حياتي]

بنت الاياويد لو منش اسوي عيش ابيض لذيذ ويى الدال قومي سوي واكلي تموتين من اليوع؟؟
وريلش بيتأخر؟

[طفلي حياتي]

اذا انتون في الحد او قلالي مافي الطريق شي خله ايي اصلا حتى القرى مافي شي مني بس على المداخل تفتيش وبس

[بنت الأياويد]

فكرت فيها بس بشوف عقب شوي شلون الوضع ، مشكلة احاتي زوجي وماعرف اكل بروحي

[طفلي حياتي]

روز انتين وينه اي منطقه ؟؟ سار؟؟

[بنت الأياويد]

احنا صوب ماكس مني الحمدلله هدوء ، شكلي بقوم اغسل لي عيش ابيض شوي وبصخن الصالونة شسوي بعد

[Roze]

لا اجار بني جمرا طفطوف

حطيت على روحي قطرة ماي وبسوي ليي عشا وبجي اقعد وياكم

[طفلي حياتي]

اوكى بقوم شوي وبرجع اني بعد

[Roze]

حاطين في المنار انه علي مشيمع قتلوه

[بنت الأياويد]

روز شصار عن زوجج؟

[Roze]

اتصلت فيه وقلت ليه تعال اذا شفت شي لاتدش الديره ارجع بيت ابوك
اكاني انطره
طلعت عنه صدقه
ياارب
دعوااتكم

[طفلي حياتي]

الله يرجعه بالسلامه ان شاء الله

[صعب تنساني]

روز للحين ما رجع ريلج؟؟؟

[صعب تنساني]

يقولون استشهد الثاني ولد سعيد من ستره عمره 25 الله يرحمه ويجعله شهيد

[Roze]

رجع الحمدلله بالمغافص كل الطرق مسدوده بالغصب حصل محل يدش منه مسكين
الحمدلله رب العالمين




الله يرحم الشهداء

[طفلي حياتي]

اهلا صعب
الحمدلله على سلامة ريلش روز

[Roze]

الله يسلمش طفطف

قعدت اطالع صور الشهداء في الفيس بوك ودار راسي عليي

[طفلي حياتي]

الله يرحمهم ان شاء الله بس شكله الخبر في هرار اللي سمعنه ان واحد

[Roze]

اي الي انتشر خبر واحد من الديه
مايندرا عن الاثنين الباقي
بس اني شفت صورة الي من ستره فاقعين عينه بطوها

[طفلي حياتي]

اني ماقدر اطالع شي هالشكل امرض

[Roze]

نزلو موقع حق التسجيل للالف دينار على الانترنت

[طفلي حياتي]

النت عندي ميييييييت لوع جبدي

[طفلي حياتي]

ويش هالموقع خلنه نسجل فيه

[Roze]

الموقع ماينفتح على التلفون
جربي تبحثين في قوقل
لانه نشروهم على البي بي والايفون

[طفلي حياتي]

ماحصلت موقع عفر ويش اكتب ويطلع؟؟

[ام السادة]

السلام وشحوالكم


هدا ويش الي صار في البحرين وقعه الله يطلع شبابنا

عورني قلبي واني اشوف

روز عيوني الحمد لله على سلامه رجلش

اي الف دينار الله يغربلهم ويغربل الف دينارهم بيطلعونها من شبابنا

[Roze]

رجعت ادرو لش الموقع في الفيس بوك اختفا
شالوه لانه كله اخبار عن الضرب والشهداء
باجر بخلي ريلي يطرشه من الواتس اب لانه وصله هو

[طفلي حياتي]

مادري ويش اخبار ام خليل اليوم رجعتها اكيد ماقدرت تدخل بسهوله لان الوقعه قايمه ولا ليها حس للحين

[ام السادة]

هلاطفطوف لا تخوفينا عليها ترى ما اقدر اني على الي يصير خايفة حدي

[Roze]

الله يستر من الياي

يالله نخليكم
تصبحون على خير

[ام السادة]

وين روووز ما هدرنا وياش

[طفلي حياتي]

هههههههههههه بتروح روز تتدفا... تصبحين على خير
هلا ام الساده اني بعد اخاف حدي

[طفلي حياتي]

بررررررررررررررب
ان شاءالله راجعه اكمل السهره خخخخ

[ام السادة]

ويش فيكم من اجي تهربون

[om khalil]

اني ييت
وسايلت عنش العافية طفلي وام الساده

رجعتي يختش ابي ادخل لطبيله سادينها صحفيين اجانب يايين يعكسون
فلت السياره برا وبدخل الا بهيك الطلقه مسافه قريبه وارفع العباية وأشيل عليه
حميي يقول ويش مسويه بعمرش ماشفت الا غبارش هههههه

الحمدلله نبصت امبي انام ارتاح ابدا اسمع الشباب يصارخون احنا نحب البحرين احنا نحب البحرين،، وتييهم الطلقات من كل صوب يالله بنصرك بس يالله

ومسكين اللي استشهد عور قلبي اختي راوتني صورته جذي على غفله واني ابزع هالمناظر وهذاك مال ستره اللي انبطت عيونه يافرج الله

والمغرب نسمع صراخ واصوات ضرب ومضارب الا جيب داعم له سياره ونزلوا كسروا جامتها وسحبوا اللي فيها عينوه عيان وشقلوه وياهم
:( وهيكي السياره مفلوته والباب مبطل ولكزاز منفر يامناكر الزمان


يوعانه بطني تقضه سلايه بس ماقادره آكل شي :(

[ام السادة]

هلا ام خليل الحمدلله على سلامتش

ياعلي الله يستر علينا يارب ويش هالاحوال

[om khalil]

الله يصلح الحال هذا اللي نتمناه

وتعالي باسايلش في الفامن يتش ارياح استقبال؟ عينة الم الدورة

[ام السادة]

اي واجد وكل يوم الم شكل لهذا يومش قالت ليي الدكتورة لا تقعدين واجد حاولي كل شوي تنبطحين

[om khalil]

قابضني الم في عظامتي من يوم الجمعه كنت ماكله رشوفه توقعت منها
بس مواصل ليي لامس بزود
واليوم فيه بس أشوى بوايد حتى ماقمت امشي لجل خفت اولد وولاده الثامن خطيره
الله يكفينا الشر وياكم

[طفلي حياتي]

اهلا ام خليل
من هاللي اخذوه من سيارته من صاقعه؟؟
اني احس فرحتي اسم الله عليها تحت مقعده ويعورني بطني من تحت لين اتحرك او اقوم واقعد هل هذا عادي لو ويش اني بعد خايفه ولادة الثامن خطيره الله يسر علينا ان شاء الله
واحس بحركتها فوق لكن وتحت

[ام السادة]

ما تشوفين شر يالقمر ريحي روحش عدل وخلي الشغل شوي لاحقة عليه

[ام السادة]

انتون قاعدين وتوسوسون بسم الله عليكم وعلى كتاكيتكم ان شاء الله ما يطلعون الا في وقتهم صلوا على النبي وادكروا الله ما فيكم الا العافية هدا من الفقل

[أحلام أم]

شحوالكم
أم خليل
الحمدلله على سلامتش ،المغرب أني متفرغة باروح نشتري لينه عشى ووصلنه لدوار الدراز الساعة 7 وشوي إلا العفايس والحاله حاله والمدخل مبنذ من سياير الشغبان والطلقات أشوى ماحملت أولادي على عمري يخافوون وسكتي أني حاملة ليي بصلة مفلوقة تحت الكرسي صار زحمة عند الدوار وبالغصب نفذنه
طفلي حيااتي
كلماات الدراز طالعه من بوزش عسل

[om khalil]

اني ما اوسوس على عوار الحمل اللي تعودته قبل
اني بس اوسوس جاموا من الرشوفه تنزل ليي الياهل الحين
ويش ليي نحاسه

طفلي عادي اذا شفتين الياهل تغصغص لش من صوب دون صوب
اختي تقول بتها كله يسار موكره
اني اذكر ببتي كانت كله تحت قفصي الصدري مباشره احسها بتدخل في ضلوعي
وبولدي ماشاءالله حسيته بكل صوب
واللي في بطني شكله شاق الارض وطالع ههههههههههه

[طفلي حياتي]

ام الساده لكن عادي اللي احس به ؟؟ تحت احس الم واحس بفقل فيه واذا بنبطح ويلي لو بنقلب
اي تعالي ماقلتين لي الوان لدياي؟ لصغار

[om khalil]

طفلي عفر واحد من ولاد بيت البناي ولا أدري
الله يطلعه من ايدهم يارب بحق احب الخلق اليك محمد صلى الله عليه وعلى آله وسلم
فرج عنا وعن معتقلينا فرجا عاجلا ياااااااكريم

احلام ام ويش ييبكم في عز الوقعه جان دخلتون من دوار سبنيس
اني تحركاتي اليوم كله من صوب لبديع لجل مافي عندهم شي

[طفلي حياتي]

اني النت عندي ماله حال
هلا احلام ام اقول ويش في ام خليل يايبه طاري احلام ماتدخل هالحزه الا انتين عفر منوره
والحلا والعسل فيش والله عفر دراوزه مانقدر مانفلت كلمات خصوصا وقت الغضب والاستنفار هيهيهيهيهيهي

[أحلام أم]

يختي عاادي إشترينه من روياان تدريين صوب البيت بس اللقافة وماأقدر ماأشوف الدراز وقلت مرة وحدة بنشتري من خبااز عبد المطلب الخبز
دااهية أي خباز وبراد هناك إلا قااايمة الصكة الله يساعدهم
أني العصر فيي نومة بس ماقدرت أنام من أصوات الطلقاات
لاتاكلييييين رشوفة ،الرشوفة تنضف الرحم نااوية على عمرش

[ام السادة]

هلا احلام ام

ام خليل لا يخلونش توسوسين من الرشوفة اني اكلت لين عجزت يوم كنت في الرابع ومرت اخوي من تسوي تجيب ليي تدري احبها ولا صادني شي عكس حملتي الاولى ما اكلتها كنت اخاف اكل وما ضل شي الا جاني

طفطوفتي عادي لانه السابع ما تشوفين الا مرة وحدة ما تقدرين تتحركين والوانهم الله يسلمش في اصفر منقط ببني وفي صفرة كامل وفي بعد اسود وفي بني مخلوط بشوي رصاصي كانه جدي

[طفلي حياتي]

ام خليل نصرتي من هي جم يوم لازقه صوب ضلعي ماهي مسويه سوايه عفر تمصمص فيه مادري ويش .. عساها السعاده فرحتي

[om khalil]

طفلي ويش اخبار ديايتش المبهره شفيتيني
لو هو دواها مرت حميش لا تعطينها ههههههههه

[طفلي حياتي]

شكلي باخذ صفرا منقطه ببني بس هذي فرخه صغيره له؟؟ مانبغي لا كبيره ولا صوصه عشان يستانس حمود

[ام السادة]

ههههههههههههههههههههههه الله يغربل بليسش تمصمص فيه
ويلي على الدراوزة اشوى صوبنا خخخخخخخخخخخخ

[أحلام أم]

طفلي حياتي
ويش نسوي ،مايتخلى عن أصله إلا قليل الشيمة وإخنه مانقدر نبرمج إلسانه وياديرة أزواجنه لو ويش يصير الدرازيات مايجاملوون بحجيهم لازم يغلطوون
الليلة هذا هو أحمد ناايم صوبي مو راضي يناام أشوه غفت عيوونة عن لا يناام صوبي ماأقدر على رفساته شوي باخلي أبووه يقعد يوديه سريرة

[ام السادة]

اي فرخه صغيرة بس بسرعه لانه ما ياخدون شي ويكبرون

[طفلي حياتي]

لا يوم مشت المقروده سويت لي ولريلي كل واحد قطعه ههههههههه عفر ان شاء الله باجر باكمل الباقي لغداي صاير اكلي هرار ازيد من قبل من الجناسه ...

[أحلام أم]

هلا أم السادة
حليوه ألوان الدياي إللي عندكم ،بس خواافه هالمره أحب أشوفهم محبوسيين

[om khalil]

تتسلق ضلوعش عفر
بس جذي متعب ويعور احس بشي يخويس ليي مره فوق ياعلي كنت امسح على بطني امبيها تنزل شوي على عمري هههههههه

[om khalil]

أشوى أخذت درازي لا ينعوي لساني

اصلا لو من برا جان هو اللي انعوى لسانه ههههههه

[ام السادة]

سكتي اليوم ماسويت غدى بالمرة بس عوضت في العشى لانه رجلي دبحني من الطحنه يقول بكبره وزنش ناقص

لا واليوم عمي جه اليي يقول خاطره في معكرونه من ايدي واقوم لش فلت ما خليت معكرونع ولا شوربه مكشخه ولا سلطه الا سويتها ليه

[صعب تنساني]

ام الساده وام خليل شكلها البحرين بتصير مثل مصر

[طفلي حياتي]

ام الساده بتكبر بسرعه يعني ويش الحل ونخليها كله صغيره خخخخخخخ قصدي امه متحججه تقول بتلعوز المكان قلت اني نتفه تنحط في ادناة سله لو شي مابتتحرك
المهم اني ابغي لمنقطه هالاسبوع ان شاء الله من الخميس الظهر الى الليل ان شاء الله انتين متى تقدرين اني بايي ليها لاتكلفين روحش عفر ولا ندري انتين من وين للحين

[أحلام أم]

بل شكله يتقلب هالولد إنجاان مايقعد ليي باقوم أخلي أبوه يشيلة سريرة ووباروح أعدل ظهري خبركم أني عندي كمبيوتر مو لاب توب ماأقدر أتصلب على الكرسي
أشوفكم الصبح وياارب أخبار زينه نسمعها الصبح والله يستر على الجميع

[ام السادة]

يوم الخميس يمكن ما اقدر بس ادا بتجين اكيد اتصلي ليي من وقت يعني قبل الظهر لانه يمكن اروح بيت ابي علشان اقولش اني في وين

اتصليي ليي الحين باقولش اني من وين هههههههههههههههه

[طفلي حياتي]

اي ام خليل يعور عدل بيني وبينش خايفه عليها من الضلع لا يخفس ليها شي مثلا يدعم يبينها لو يعور شي فيها امايي نصره اسم الله عليها
ام الساده تسلم ايدش ويعطيش العافيه وان شاء الله عمش طيب ويستاهل

[om khalil]

الله وياش احلام ام سلمي على الأهل

هلا صعب شخبارش، الله يستر من الياي بس

ام الساده زينه الحركه لش بس ماشوفش تطرين اي شي عن المشي