دردشة بنات العراق, دردشة حوامل العراق , تجمع بنات العراق

[رويدة_ أم ألق]

هههههههه فادية
بس هذه كلها دلائل حب وحرص
والرجل لازم يكون غيور على زوجته
الله يهنيكم ببعض يارب

أمونة لا حياة مع اليأس ولا يأس مع الحياة
ربي يرزقج بأقرب وقت ويفرح قلبج بحق النبي
صدكيني قريبتي من بعيد
بقت عشر سنوات
بدون أي طفل يعني مو مثلج الحمدلله عندج بنت وتسمعين كلمة ماما
حتى امها كالت لزوج بنتها تزووج لتظل تنتظر خصوصا اخوه تزوج وياهم
وصار عنده 3 أطفال
تعبوا شكد ما راجعوا وحاولوا


والله سبحانه وتعالى بفضله وبفضل زيارة الحسين
رزقها على لحظة .. ولد يجنن والله
وثاني سنة ولد آخر
التفاتات ربج حلوة خلي أملج بيه قوي.

[zena]

هلووو بنات تسلميلي ام الوقه ووام ايهومي وكل البنات هلونه الحمدالله شوي احسن اليوم الحمدالله






شخبار الكل ان شاءالله ع طول بخيييييييييييييييير

[zena]

زنووووبه الف عافيه تلبسيها بالهناااااا


واموووونه حبيبتي شغلتج يحتاجلها صبررر شوي انسي الموووضوع لان ترئ اكووو نسوان هنه اخلن ماانع مالت 3سنين وبنتج مو هذاك الكبر ومضييييييييييييييق اله تفررج الله كريم حبيبتي فلا تبقين تحركين بااعصابج

[فوفو العراقية]

مساء الخير

رويده حبي شكرا
وربي يسعدكم انتو هم.

امووونـــه حبي القلق كلش يأثر ترى
اني قلقت 3 اشهر وماصار
ورابع شهر ايست كلش وجنت رايده اروح للطبيب وكلت خل احلل حتى اقطع الشك باليقين وحللت قبل 7 ايام من الدورة ههههه
وطلعت حامل
الله يرزقج ماتتمنيه قريبا
نصيحتي امتنعي عن الاكلات الحارة والثوم وأي ابهارات لانها تمنع كلش
وزيدي الافطر بغذائج والله يسهل الج.

[مجنونة بحبها]

هلا حبيبتي رويده
ولاييئس من رحمه الله الا القوم الكافرون
انا مايئست بس تعبت من العلاجات
هذي الابر الي تحت الجلد تموت من الالم
وزياده المراجعات والتعب
احمد ربي واشكره



هلو زيونه حبيبتي اخبارج هلونه صايره تخبل
ماشاء الله لاقوة الا بالله
شكرا حبيبتي على مؤاساتي


هلا حبيبتي فوفو مشكوره على النصايح
انا مأحب الفلفل والبهارات هواي
وانا صار سنه وشهرين من اخر اسقاط وميصير حمل
رغم المنشطات وكل شي

[فوفو العراقية]

الله يرزقج الطفل السليم المعافا ويعوضج كل خير
والله احيانن المنشطات هية تخربط كل شي
اطلبي الحاجة من الله
واتركي العلاج لفترة
لان اكثر العلاجات بيها مواد ضارة ممكن تأثر حتى على الحمل بعدما يتم
خلي كل طبيعي
وحاولي تلعبين رياضة لانها تحسن من المزاج وتسرع الحمل كللللللللش
اني احجيلج من خلال تجربة
وتقربي من الله اكثر بالدعاء وطلبي حاجتج منه واني راح ادعيلج من كل كلبي
يارب الشهر الجاي تبشرينا انج حامل بس حاولي لا تفكرين بالموضوع ابد لانه يأثر على البويضة لما تخرج
وتكون قوية الغشاء وميتمكن الحيوان المنوي اختراقهة
حاولي تستفيدين من النت بالبحث
وأخذي بالاسباب لان رب العالمين جعل لكل شيئ سبب
وأمرنا أن نأخذ بالاسباب,

[مجنونة بحبها]

صباح الخيررررر


شكرا فوفو على النصائح

ونعما بالله

[مجنونة بحبها]

يارب ارزقني فرحه تجعلني اسجد لك باكيه يااااااااااااااااااااااالله

[عسل بغداد]

صباح الخير بنات اشلونكم

[مجنونة بحبها]

صباح النور هلا حبيبتي عسل اخبارج

[روح ملائكيه]

هلو بنات شلونكم؟

زوزو حلوه العبايه تتهنين بيها ان شاء الله..وانتبهي من تشترين من ايراني ياخذ فرق سعر هوووووووواي اني زوجي اذا العبايه بـ 600 ياخذها بـ400 من الايراني ومرات حتى ينزل اكثر(شاطر بالعمله ههههههههههه) لأن يعرف يحجي فارسي .. بس تدرين احسن شغل هو الشغل الهندي والباكستاني نقشاتهم وشغلهم كلش حلوووو..بس اني عباياتي مو بيها قماش مطعم مثلج لا بيها شغل يدوي تطريز مثلا ..

رويده عمري اسفه على الرساله البارحه مدخلت للمنتدى واول البارحه هم دقيقتين وطلعت عذرا..

امونه الله يصبرج ويرزقج الطفل ياااارب

فوفو هنيئا عالمشاوي قلب...

زيزنه عمري شلونج وشلونها هلونه؟

ايو قلبي شلونج شكد بقى بالشهر هههههههههههههه سوفي شلونه؟
نجوله عمري شلونج اخبارج؟

فله ماكو خيرها؟؟
زينب شلونج عمري ولولي شلونه؟

ام محمد شلونج عمري اخبارج؟

[روح ملائكيه]

هلو عسل منوره التجمع عيوني
اني ام شوق

امونه شلونج قلبي؟

[زينب السعدي]

هلو بناااااااات شلونكم انشالله زينيين 9
امونة حبحب خليها ع الله ورب العالمين مراح يقصر وياج ابدا (طبعا انتي دورتج ويايه ) منتبهة لهالشي هههه
مهاي شلونج ...هو اليبيع ايراني بس العمال مااعرف شنو ...يمعودة اني زوجي محد يلحكه بالعملة صدك تحجين يطيح حظ البايع خخخخخخخخ ..واني مهلكد ويه التطريز وهسه مو دارج هلكد ..هسه دتصير الفيكة بالقماش اكثر من الشغل
صدك وبالنسبة لكارفور ..يمعوجة اني هسه مال ابسط واكعد ابيع جدورة تيفال وستيل خخخ عندي اشكال والوان وطاوات هم عندي بس محتاجة بعد وسويتيلي واهس عالملاعق ...بلكي اليوم نروح اريد ملاعق وطاوات وبلكي الكه قوالب كيك فيكة وشكرا لان نبهتيني لان البارحة مكدرت ارد طبيت وطلعت بسرعه وبعد مافتحت

[روح ملائكيه]

زنوبه اني ماارغب للقماش بالعبايه احب التطريز ثم اني ماامشي عالموضه يمعوده ياموضه اهم شي الي يعجبني ههههههههههه
ولج روحي الاسعار خياليه بكارفور وشوفي الملابس اشتريت تنوره بـ100 درهم وبدي الصدر بيه لون والجوانب والظهر اسود وبيه فيكه حلوه للمناسبات يصير تصوري بس بـ 55 درهم ..والملاعق تفوتج روعه والطاوات 2 مقاس 24 و26 سم وام الدائره الحمره ...لمينا كارفور وطلعنا ههههههههههههههههههههه

[روح ملائكيه]

صدك زوزو اني مااستعملهن هنا القدوره التيفال والملاعق والطاوات اخذهن للعراق لأن ماكو اصلي هناك كله صيني مغشوش
ونسيت اكولج لو تشوفين اطقم الصحون رهييييييييبه ردنه ناخذ واحد بس كتله لزوجي لا شلون ناخذه للعراق ؟ بس اني عندي هنا طقم كامل 36 قطعه الي انزل بيه طبخاتي الابيض والذهبي ..

كون هسه الم الموعين واخذهن وياي هههههههههههههههههههههه

[قمر بغداد]

وسعووووووووووووووووووووووووو اني اجيت راح يصير انقلاب يمعودين اشتاقيتولي لولا خخخخخخخخخخخخخ

[قمر بغداد]

منو موجود منكم يلة اعترفو مشتاقتلكم هووووووووووووووووواية

[زينب السعدي]

بالنسبة للعبي اني لا من النوع الي ويه الموضة وبنفس الوقت الي يعجبني
وبالنسبة للجدورة انتي من كل عقلج تاخذين منا للعراق يمعودة اني بيا عصر الله يخليج روحي شوفي العراق شصاير بي اشكاااااااااال والواااااااان الجدورة تجنن وكلشي موجود الاصلي والكوبي وكل شي بفلوسه ..يمعودة اصلا اني هنا المنزليات ميعجبني بكد ماا الموجودبالعراق ...رحت هناك دخلت محلات مال منزليات ومال تحفيات وكرستالات يخبلن شتحجين انتي ..اني طبعا احجي عن كربلا وعن بغداد بس بمدينتكم ماادري لان اصلا مشايفتها خخخخخخخخخخخ

[قمر بغداد]

يابة وينجن معودات حبيبات قوليبات امورات حلوات نايمات

[قمر بغداد]

هلة بزنوبة

[زينب السعدي]

و ع فكرة اني كارفور ابد مااقلب ملابسه هههههه وثانيا شسوي بالملابس ذاك اليوم اجيت من لندن جبت كومة ملابس ويايه ورحت للعراق اهلي حملوني كومه جايبيلي من سوريا ولبنان والمشكلة اني معندي طلعات اجتماعية حتى استفاد منها ولا عندي دوام كل طلعتاي برة والبس عبايه عود من اروح للعراق البسهن وشيوديني بعد خخخخخخخخخ
بس انتي تستفادين منها لان رايحه للعراق وحتداومين وهذا وحده يرادله كومة ملابس غير حتصير عندج علاقات اجتماعية وطلعات وواجبات فلازم تجهزين نفسج

[زينب السعدي]

لج هلو حبي هبة
توني انتبهت
بشري شلونج ويه الحمل
مابين ولد لو بنت

[قمر بغداد]

هلو زنوبة اني هسة الي 20 يوم بالرابع بعدني واللة ماشفت بس برأيج يبين هسة لو بعد
تدرين ماعندي بطن عبالك موحامل كلشي مامبين هههههههههههههههههههههههه

[روح ملائكيه]

هلوووووو هباوي عمري شلونج غلاتي؟؟

[زينب السعدي]

يمعودة يبين ويبين ابوه خخخخخخخخخخ مرت اخوية نهاية الثالث بعدها مطابه الرابع وبين ...والله انتي باردة هه معندج حماس تشوفين الجنس
اني هم مثلج دخلت الخامس ورحت لاهلي وماكو بطن نهائي بس صدري كبران ياهو اليشوفني كان يتعجب
يلا احلى هيج حتى ميخرب الجسم

[روح ملائكيه]

اي والله زينب محتاجلي كوووووووومة ملابس وراي دوام ومناسبات يبوووووو نسيت هالشغلات من زماااااان

كارفور مااشتري منه ملابس مرات اخذ من الموناليزا او ماكس او سبلاش او العراق اكثر شي اتسوك من النجف او بغداد بالديوانيه مو هالكد الشغلات حلوه بس اختي تكولي كلشي نازل عدهم بعد ماادري وراح اسأل على القدوره اذا اكو اصلي اشتري من العراق وشايفتهن القدوره الالوان اهلي عدهم منهن بس كله صيني مغشوش ..
زوجي يكولي نشتري من بغداد اجهزه للبيت بس تعرفين النسوان يمووووتن بسوالف المطبخ وخصوصا اني ههههههههههههه

[قمر بغداد]

هلو روح ملائكية شلونج وية النونو
زنوبة تدرين ماعندي حماس بس اتمنى تكون بنت اموت عالبنات ههههههههههه ورة مؤتمر القمة اروح للطبيب حتة الشوارع تكون مفتوحة واشوووووووووف حتة اعرف شنو اجهز غراض بعد ما اعرف

[روح ملائكيه]

هباوي هو البكريه مايصير عدها بطن احسن الج هههههههههه

ربي يتممها عليج بخير وسلامه

[قمر بغداد]

هههههههههههههههه يبين ابوووووووه طبعاً ابوه مبين وشايفتة هههههههههههههههههههههههههه شعندج سوالف زنوبةخخخخخخخ

[روح ملائكيه]

هلو عمري النونو كبر وصار رجال دخل بالشهر السادس ههههههههههههههههه

يكلي ثنو خاله هباوي تدول عليه نونو اني ثرت رجال خخخخخخخخخخخخخخخخخخخخخخخ

[قمر بغداد]

تسلميلي حبي اي هم كالولي لان اول طفل ميبين عندج بطن وهم احسن حتة الجسم لايخرب

[زينب السعدي]

هباوي لتجهزين هسه من تدخلين بالسابع يلا جهزي احسن ...هاي عاداتنا
مهاوي اي ماكس وسبلاش مرات يجيبون اشياء حلوة واني هم مرات اخذ من نيولوك ونيكست وh&m ومن اريد اخذ شي حلو وفيكة اروح لدبنهامز
اكلج القدورة الاصلية الي بالعراق اسعارهن من 80 دولار وفوك اهلي اشتروهن يخبلن وتكمة حتى ثكال وبيهن الوان هواي
امي اشترت سيت 3 جدورة لونهن اسوديخبل اشترهن ب130 دولار بس كلش زينات

[قمر بغداد]

ههههههههههههههههههه حبيبي فدوه لروحة بوسيليا وكوليلة اروح فدوة للزلم خخخخخخخخخخخ
بس اكلج اريد اسأل يعني صار اسبوع ماكو حركة عادي لولا

[قمر بغداد]

اي طبعاً بعد موهسة بعد وييييييييييييييييييين

[روح ملائكيه]

لا تخافين هو اكو حركه بس خفيفه ماتحسين بيها عادي حبي...

زنوبه اني اريد تيفال بس اذا هالاسعار لقدورة تيفال خلاص اشتري مناك

انتي لو تدرين شكد عندي سيتات قدوره تتخبلين اسم الله عليج ومن كل الانواع بس اني احبهن هههههههههههههههه

[رويدة_ أم ألق]

هلاااو بنات شلونكم؟

هبة احنه اشوق شلوونج؟
انت مثلي كلش أحب البنات
حتى زوجي من قبل زواجه كان يتمنى الطفل الأول يكون بنية
وبالنسبة للحركة أنا ماحسيت بيها إلا بالخامس لتخافين

مهاوي عادي عيوني معذورة

زينب وفادية وعسل بغداد شخباركم؟

[قمر بغداد]

سلامي لامونة ورحومة وايوتة وزنوبة ولرحوبة وانفال وام نورهان وام بساسة وزينة وام الق وام ايهم وكل البنات واعذروني اذا نسيت فد بنوتة

[زينب السعدي]

هلو رويدة شلونج
الحمد لله ع سلامة قاسم
ربي ميحرمكم من بعض انشالله

[قمر بغداد]

هلو ام الوقة الوردة شلونج لا اني قصدي حسيت بالحركة بس صار اسبوع مختفي ههههههههههه يجوز نايم مزعوج خخخخخخخخخخ

[زينب السعدي]

أنشالله ماكو شي هباوي لتقلقين

[قمر بغداد]

بااااااااااااااااااي بنات سلامي وتحياتي للجميع

[زينب السعدي]

الله معاكي هباوي

[رويدة_ أم ألق]

تسلمين زينب الله لا يحرمج من أحبابج ومن كل اللي تتمنيه

الله وياج هباوي.

[مجنونة بحبها]

سلام بنات اخباركم

مهاوي اسفه حبي البارحه ماكدرت اجاوبج


هلا هباوي عاش من شافج وين هالغيبه

ام الوقه شلونج اخبارج

زنوبه شلونج حبي

[مجنونة بحبها]

راسي راح ينفجر

[مجنونة بحبها]

هلأووووووووووووووووو

[عسل بغداد]

مساء الورد والفل سلامتج حبيبه ماما

[عسل بغداد]

اليوم النت موتني بس كلت صباح الخير و انكطع شكو ماكو اخباركم

[غنى2011]

سلام عليكم
شلون الحبايب

زينب عبايتج الثانيه كولش حلوه احلى من الاولى صراحه

ام شوق شنو راح ترجعين للعراق ليش ؟ يمعدوده الناس دتهج من العراق هههههههه

وعلى الجدور كلشي اكو بالعراق اشكال الوان اني جزعت من التيفال لان يرادله شويه حرص حتى لينكشط او ينشخط

قبل شكم شهر اخذت سيت جدور ستيل ب 200 الف عراقي كولش زينات وجعبهم 3 طبقات وحيل ثكال حتى يتعبن بالغسل من وره الثقل هههههههه كلمن بسعره وبغداد بضاعتها احسن

[مجنونة بحبها]

سلام خاص للغاليات

[فوفو العراقية]

السلام عليكم
شلونكم حبيباتي
ان شاء الله الكل بخير وصحة
شلون بيبياتكم واطفالكم؟

بنات اني هسة بشهر الرابع مثلما تعرفون ...
وعندي حالة التبول تكرمون كلش دا تزيد كل شوية رايحة للحمام
وبس اطلع احس بعدني محصورة
شنو السبب؟ معقول يكون الطفل ضاعط عالمثانة؟ لانه بعده صغير
واصلا ماحس بالحركة الا كم يوم شوية وتروح
واحس عندي انتفاخ ابطني وثكل

اني صح عندي اطفال 3 بس مدا اذكر فترت حملي ولا بواحد منهم هههههههههه
الي تعرف تفسير لهل شيئ تفيدني والله يجزيكم كل خير.

[عسل بغداد]

مساء الخير لكل البنات هلو فوفو الغاليه شلونج علمود الادرار المتزايد شي طبيعي لان وزن المشيمه والرحم يضغط على المثانه والانتفاخ سببه الامساك اشربي ماء كثير حتى يروح الانتفاخ وقللي اكل البقوليات حتى تميزين حركه الجنين من الغازات انشاء الله يتمملج على خير وتكومين بالسلامه

[مجنونة بحبها]

صباح الخيررررررررررر

[عسل بغداد]

صباح الخير والانوار

[روح ملائكيه]

مساء الخيرر للجميع

هلو امونه صباح الانوار عمري

هلا عسوله شلونج عمري؟

شو صايرات ماتدخلن ابد شنو السالفه قبل جنت ماالحك اقره الي يفوتني شو هسه يوم كامل بس صفحه تكتبن شنو السبب؟

[روح ملائكيه]

غناوي عمري ..مو اذا مارجعت للعراق تروح وظيفتي عليه اني معلمه وكل سنه اخذ اجازه وهذي خامس سنه وآخر سنه الي اذا مارجعت انفصل ...

خلاص سجلت شوق بمدرسه بالعراق واهلي جاي يبنولي مشتمل بالحديقه يعني هيأت كلشي تقريبا ..بس المشكله زوجي يظل هنا صراحه شغله مايتعوض وراتبه زين مايتحصل بالعراق ..

نفسيتي صايره مو زينه بس اسمع كلمه ابجي ..البارحه زوجي عجبه الغده يكولي اي هذا الطبخ مو تطبخين من وره خشمج
تصوروا اني اطبخ من وره خشمي!!!!!!!! ههههههههههههههههههههه سكتت ومشيت ارضع محمد بس بجيت هواي
عود ليش الي يستحي ويسكت هالشكل يصير بيه؟؟؟؟؟؟ يعني اذا رديت وطولت لساني اصير زينه ومايتجرأ يحجي عليه؟؟؟

استغفر الله....
الوضعيه زفت وتعبت وهسه من اسافر للعراق بعد اكثر ..واكثر..
يعني حياتي كلها كضيتها بمسؤوليه وحزن وهم وتعب ..بالله اريد اشوف اني شنو الي شفته من حياتي؟؟

وربي لو ضاله بلا زواج احسنلي ...بس المجتمع والناس وحجيهم الي مايرحم ...الخ

يلاااا هي كلها تبن بتبن ههههههههههههههه(اسم الله عليكم)

اسفه بنات بس حسيت نفسي مخنوكه ...

[عذراء الجابري]

سلا م عليكم بنات مشتاقتلكم هوايه
اليوم يلا كدرت افتح المنتدى

[روح ملائكيه]

هلو عذوره شلونج عمري؟؟
وشلونه البيبي؟

[عذراء الجابري]

هلو بيج عمري الحمد لله زينة باركيلي اليوم طبيت بالتاسع
بس كلش خايفة من الطلوكة وماعندي خبرة الله يستر ويسلم

[رويدة_ أم ألق]

السلام عليكم

عذراء منورة شلونه سيد جعفوري؟

مهاوي اي ركود فظيع بالتجمع
والله يساعدج على وضعج فعلا انت في موقف صعب
وبالنسبة للرد زين تسوين ماجاوبتي
الشخص" سواء الزوج او غيره"
اللي يحجي حجاية تغثنا وغير منصفة
الرد ماراح يغير شي هي انكَالت بعد!
أما شنو اللي حصلتي بحياتج
هذولة الورود الثلاثة الله يحفظهم يعادلون الحياة بأكملها.


فادية بالنسبة للادرار انا صار عندي بعد السادس
أكيد كل حامل الها وضعها
اما الانتفاخ فحدددث ولا حرج
من صار الحمل لليوم نسيت شلون تكون بطني فارغة ومرتاحة.

[عذراء الجابري]

هلو حبي رويدة الله يتمم حملج

[kokee]

هلووووو بنات شخباركم
والله هليام كلش واهسي مكطوع لا افتح حاسبه ولا شي
اليوم اشتاقيتلكم كلت افوت اسلم
عذراء حبيبتي ابد لتخافين ماكو اسهل منها

[kokee]

مها فدوه لكلبج لا تضوجين
وداعتج كل واحد همه جبل على كلبه بس شنسوي والله خاف اكلكم راسي انترس شيب كمت اصبغ لان كذلتي صارت بيضه
ارجعي يم اهلج ودوامج لا تضيعينه تره مستقبل وماكو تعيينات بعد تظلين هاي ظلتج

[kokee]

وهذوله جهالج ال3 يسوون الدنيا ومابيهه جنهم ورد الله يخليهم
وانتي تطبخين من وره خشمج شو انتي نادره بالطبخ لعد احنه شتكول زلمنه هههههههههههههه

[عسل بغداد]

مساء الخير بنات شلونكم هلو ام شوق الغاليه حبي لتضوجين ولتنقهرين والله ماكو احسن من الكعده يم الاهل والياجيل الله خلقهم للمغثه سحابه صيف وتعدي

[kokee]

التجمع صاير فاهي فد مره ليشششششششششششش

[kokee]

لا عاب حلكج عسوله هههههههههههههههههههههههههههههههههههه

[kokee]

هذا لولي بالزوراء خخخخخخخ

[عذراء الجابري]

الله يخلي الج فدوة لهالنصبة اكيد البنات صارن عليه ازدحام

[عذراء الجابري]

مشتهية طماطا والسوك مابي اللي يمنةhttp://forum.hwaml.com/imgcache2/hwaml.com_1332765944_621.jpg (http://www.iraqup.com/)

[زينب السعدي]

هلو بنات شلوووووونكم كلكم
يمعودة مهاوي انت ام العقل الكبير دير بالج ع نفسج ماكو شي يسوى
امونه شلونج وشخبارج
كوكي لج هاي شنو لولي يخبل صاير
عذورة مبروك دخولج التاسع انشالله الولادة السهلة من اول صوت ههههههه
رويدة شلونج انشالله زينه
عسل شلونج عيوني شو منطيتينه السي في مالتج
بقية البنااااااات وينكم شنو هالاختفاء الموطبيعي

[عسل بغداد]

هلو بنات شلونج زوزوحبيبتي شلونج شنو هذا القمر الي شايلته ولد لو بنوته الله يهنيج بيه علمود السي في ماادري النت جان ضعيف اني دخلت كام يكطع هاي صار يومين على هالوضع وضووووووووجه راح اموت

[زينب السعدي]

عسوله هاي بنوته وهي يت اخويه اني بعدني معندي شي ...كنت حامل وسقطت بالخامس صارلي 5 اشهر ونص تقريبا وهسه مسويه مانع لان منعو عني الحمل لمدة لا تقل عن 6 اشهر

[عسل بغداد]

الله يخليها لاهلها ويعوضج يارب ويرزقج الذريه الصالحه لحد متملين من الاطفال

[زينب السعدي]

تسلمين حبي ربي يخليلج اطفالج وزوجج

[رويدة_ أم ألق]

هلاوو بنات شلونكم

زينب لولي يجنن صدقة للمغرور

زينب السعدي شخبارج عمتج بعدها يمكم
أنا بخير الحمدلله

عسل بغداد اعطتني سيفيها على الخاص هههههه
منورة عيني أنت وكتاكيتج.

[زينب السعدي]

هلو رويدة
اني زينه الحمد لله
عمتي بعدها يمنا بس مريضة حييل لان يمكن عدها دسك واليوم ودوها للطبيب وسوولها اشعه ومااعرف شو وباجر الطبيب يشوفهن ونشوف شيكول احتمال عمليه
خطيه حالتها كللللللللللش تعبانه ومتكدر تمشي هلكد ونايمه صارلها 3 ايام ويوميه للطبيب الله يكون بعونها

[عسل بغداد]

هلو رويده شلونج اخبارج شوماكو اليوم مشتاقيلج ماادري شنو سالفه السي في يمج ويم زينب

[رويدة_ أم ألق]

ياا مسكينة الله يشافيها وعندها العافية

عسل بغداد السي في يعني فايل بمعلوماتج الشخصية

أروح أضرب اخر أبرة عندي من أبر فقر الدم وأرجعلكم.

[عسل بغداد]

اعرف السي في شنو بس ما اعرف شلون ينرسل يمكن من ارح لمشاهدة ا لملف الشخصي مالتكم

[توتايه]

عمري عسوله السي في يعني شسمج الحقيقي وشكد عمرج وصارلج شكد متزوجه وكرايب لو غريب وكم طفل عندج وحامل لو لا هاي كلها نسميها السي في فديت الحنافيش الي بالصوره

[فوفو العراقية]

صباح الخير ... قصدي مســـاء الخيـــــر على الجميع
شلونكم؟
ان شاء الله الكل بخير
اليوم نمت 4 نومات طويلة وبعدني نعسانة
شوفولي حل ويا هالانحراف النومي هذا
والله جسمي متكسر وااااااااااااااااااااااع

شلونكم انتووووو طمنوني عنكم


رويده حبي شكرا طمنتيني
والله جنت قلقانة من هالموضوع
الله يقضي هالحمل على خير
والله يكومج بالسلامة وتجيبين طفلج بأحسن حال يارب ويخليلج احبابج.

زم زم شلونج
الله ينطيها العافية عمتج يارب وميطلع عدها اي شي
والله خطية ديري بالج عليها الج اجر جبير عند الله
والله يرزقج الذرية الصالحة الي تفرح قلبج وتعينج.

[زينب السعدي]

هلو حبايب شلونكم كلكم
شلونج فوفو بله هسه انتي حامل وتنامين هلكد زين اني شبيه لج عيني النوم دقني كرهت روحي لان زوجي كلش يضوج من يشوفني كسوله يحب شوفني دايما اكتف والعب رياضه وهسه وعدته بعد مااخلص الدورة العب رياضه منها انشط جسمي ومنها اريح اعصابي وطلب مني بعد اروح بالاسبوع مرة اسبح لان السباحه رياضه كامله للجسم ...(شوفو هو يريد يفسدني ) خخخخخخخخخ

[توتايه]

عاااااااااااا بنات يمكن حامل نفسي دتلعب ودايخه شويه وظهري يموتني ودورتي يوم 29 ادعولي ماا كون حامل ربي ينطي هالشي لغيري لان زوجي ميريد واني ما اريد ومو بوضع احمل هسه

[زينب السعدي]

شوفي ايو انتي حبلانه قبل واكيد تعرفين الوحام ميبين بهاالسرعه يعني الوحام ميبين الا بعد موعد الدورة باسبوعين عالاقل وانتي لسه مجاي موعد دورتج فقد يكون مو وحام ...واذا كان وحام فعسى ان تكرهوا شيئا وهو خير لكم...مدامج صغيرة وكاعدة بالبيت وابنج صغير خليهم يربون سوا وبعده ارتاحيلج فتره ,,,وانشالله ميصير الا الصالح

[توتايه]

حبيبتي مو حبالتي هيه والموت سوه

[زينب السعدي]

لااسم الله عليج بعدين خلي ببالج حباله عن حباله تختلف يجوز بالبكر غير وهسه غير والله كريم

[فوفو العراقية]

زم زم حبي اخاف هالنحول والنوم العندج من العلاج؟؟
والرياضة ماكوووو احلى منها
والله الصحة كلها بالرياضة
اني الي سنين متعودة على النوادي وعندي اجهزة بالبيت ايربتراك وجهاز سير كهربائي واثقال .... الخ
بس من عرفت اني حامل بطلت
ف انصحج بالرياضة لان وقت تحملين تتعبين اكثر لو ماكو سوابق للرياضة هههه.

توتو
ان شاء الله يتم الي تتمنيه
بس علامات الدورة مثل الحمل
واني دائما قبل الدورة جانت تجيني الام بالادرار كلش حريك
وكتها اعرف راح تشرف
ونفس الشيئ صار قبل بعد الحمل ولحد هسة
بس صار عندي شي واحد وهوة علامة متصير الا بالحمل وهية...
الم بالصرة ودار مدارها لما اضل واكفة فترة مثلا اغسل مواعين
هذا لما يصير الحمل مباشرتا احس بي
وحللت قبل الدورة ب 7 ايام وبين ههههه
انتي حللي ومخسرانه شي لو طلع ماكو يعني ماكو
لان دورتج بعدلها 3 ايام .

[بنت الخليج]

حيييييييييييييييييل اشكد قديمة اني الله عليكم تتذكروني لو ناسيني كولوا لتستحون ههههههههههههه بذاتات ولا وحدة سالت وكالت هاي وينهة اشلونجن حبيبات كلجن بدون اسامي مشتاقتلكم مووووووووووووت لكن كان نت ما عندي ومرات ادخل وماكو ولا وحدة . ولجن شحجي شكول وامنين ابدي بيجن اشو كلجن غاليات شكو ماكو اخباركم

[بنت الخليج]

رحمة الله والديها اللي تنطيني الموجز الاخباري عنكم ترة حييييييييييييييل مشتاقة اعرف اخباركم الطيبة انشاء الله

[توتايه]

حبي زوبه مو اني الدكتوره مالتي قالت يصير عندج تسمم حمل من البدايه بثاني بطن يعني يراقبون الضغط وعلى اي لحظه ينهون الحمل كلت خلي سوفي شويه يكبر واني ارتاح يلا


تسلميلي فوفة حياتي الله يتمملج على خير


والله بيوده كومه مشتاقيلج بس اني هم مدا افوت نادر كلش

[بنت الخليج]

اية حبيبتي اشلونج حياتي واشلونة سوفي ..... بنات رحاب خابرتني وتسلم عليكم كلكم وهي حاليا بكربلاء

[توتايه]

هلو عمري بيوده الحمدلله والشكر سويت عمليه لعيوني ونزعت النظارات ويوسف يبوس ايدج بربج خابريها كوليلها خلي تدعيلي الله يفض حاجتي

[بنت الخليج]

يااااااا هاي شنو الاخبار النوب عيونج !! سلامة عيونج حبي الله يفض حاجتك بجاه محمد وال محمد يوسف شخبارة فدوة القلبة حبيبي

[زينب السعدي]

صبااااااح الخير شلونكم حبايب
هلو بيودة والله انتي عالبال بس اصلا كلنا مدندخل هلكد والشات بارد صاير وماكو اي جديد اطمني ههههههههههه
سلامي لرحوبة والله يتقبل منها ومنا ويقضي حوائجنا جميعا ...اميييييييين

[عسل بغداد]

صباح الخيرات عالحلوات الموجودات والغايبات البارحه خوش مسويات تعلوله بس اني من ادخل ما كو احد منكم شلون بالله شسوي

[توتايه]

هلو عسوله حبيبتي شلونج اني اجيت


اي بيوده يمعوده خلصت منها للمناظر خرب يومها والله زين بس دا اعاني ديطلع سنون ومخبلني

[بنت الخليج]

صباح الخير حبيبات زنوبة حبيبتي اشلونج مشتاقتلج حياتي وشكرا على الموجز الاخباري هههههههههههه . ايوتة حبي الف سلامة عليج وهاي فترة السنون ايصير كلش نحس بيهة ديري بالج عليه وعلى نفسج . صدك اريد اسالكم شنو هاي سبب الخمول اللي صاير بالمنتدى وين راحت اللمة مال قبل اشصاير ؟؟؟؟ امونة حبيبتي اشلونج حياتي شخبارج رحاب اتكول خابرتهة الايمان . بس مع الاسف اشكد ضجت عبالي نلتقي بالكاظم عليه السلام لو مو هاي القمة مال الكلجية ههههههههههههههه . عذورة رويدة هبة ام نورهان هند انفال رحمة والباقيات الجديدات منورات حبيبات كلكم شلع قلع

[بنت الخليج]

صدك بنات عندي اقتراح شتكولون لو انسوي قمة نسوية بيناتنة حتى انرجع الحماس للمنتدى هاااا مو خوش اقتراح هههههههههههه

[عذراء الجابري]

سلام عليكم بنات
ام كرار اشلونج عيوني
آية منورة مشتاقين
ام كرار خوش اقتراح بس منو يرأس القمةلو نسوي تصويت ههههههههههه

[بنت الخليج]

هلا بالعلوية حبيبة اشلونج حياتي شخبارج واشلونة سيد جعفر ترة اذا انريد رئيس اكيد راح اتكونين انتي دخيلج علوية منو يكدر يعبرج ههههههههههههه

[عذراء الجابري]

حيبتي ام كرار شلونج استغفر الله اني خادمتكم
عفوا جنت اصلي

[بنت الخليج]

الله يتقبل صلاتك حبيبتي خادمة الحسين احنا كلنا خدام اهل البيت بشريني اشلون صار حملك ووين وصلتي الله ايكومج بالسلامة بجاه محمد وال محمد

[عذراء الجابري]

تسلملي عمري هسة طبيت بالتاسع وشوية خايفة من الايام الجاية لان هذا اول حمل الي والبقي على رب العزة وآل بيته

[عذراء الجابري]

شوية النت يعلس عذريني حبيبتي

[زينب السعدي]

هلو عذورة لتخافين عمري الله يسهلها بساعتها انشالله
يلا بيودة همتج وعقديلنا هالقمه لان الشات صار باااااااااارد كلش
بنات اليوم عمتي المغرب تدخل عمليات ...خطيه عدها انزلاق بفقرة بالعمود الفقري ودتضرب عالعصب الخامس ودخلوها مشفى اليوم وعمليه عاجلة ادعوووووولها حبابات لان هي كلش خايفو وهسه حمايه يمها وفد شوي نروح اني وزوجي يمها نهياها للعملية
يمكن مراح اتواجد هلكد هالفترة لان لازم اداري عمتي لان ماكو غيري مرة هههه

[عسل بغداد]

مساء الخير هلو زنوبه شلونج الله يكومها بالسلامه ويشافيها ويعينج على هالمسؤليه شنو عمتج ماعدها بنات يداروها؟لو انتي تحبيها

[روح ملائكيه]

هلو بنات شلوووووووووووونكم؟

تعبانه وظهري مكسور اسم الله عليكم

اليوم سويت كيكه شوكولاته بصلصة الشوكولاته وللغده معكرونه بالبشاميل

هالفتره كللللللللش قليل دخولي عذروني لأن يومي قاضيته اسحب حليب من صدري لمحمد حتى انطيه الممه واكمل شغلي وهم دنعلم ملاك عالقعاده (تكرمون) طبعا صارلنه يومين ونص دمرتنه ملاك خاتون العفو تحصر الادرار ساعات وبس نلبسها البجاما تعملها ههههههههههههههه همزين الخدامه شالت الزوليه لأن جديده وحرامات تتدمر ..

[روح ملائكيه]

هلا بيوده عمري شلونج ؟والله لا تعتبين عليه كوه ادخل للمنتدى ماكو مجال هسه اكتب ونايمه وهم ارضع بمحمد هههههههههههههههههههههه انتي شلونج اولادج شلونهم؟

زوزو ان شاء الله تكوم عمتج بالسلامه ومااااعدها الا العافيه وطمنينا عليها..

عذوره عمري هانت مابقى الا كم يوم وتحضنين طفلج ولا تخافين ااااااااابد وادعي شكد ماتكدرين ساعة الطلق وشوفي شلون راح تسهل..

عيوني عسل بغداد شلونج؟عيني ماانطيتينه الهويه هههههههههههههههه يلا اعترفي

ايووو عمري لا تخافين هذي اعراض دوره تشبه اعراض الحمل ..وديري بالج على سوفي خطيه اني عندي ملاك ومحمد سوه ديسننون اهئ

رويده عمري تسلمين للكلام الحلو يا حكيمة الجات هههههههههههه خوش لقب

كوكي شلونج شو ماتبينين؟

سلمونه على رحوبه مشتاقيلها هواي

فوفو شوكت تاخذين سونار ؟ ربي ينولج الي ابالج ياااارب

بنات شو فله وهنوده وهواي بنات مااااااااكو

امونه هم ماكو؟؟؟

[روح ملائكيه]

نجوله عمري شو هم اختفيتي؟ ماصدكنه ظهرتي ههههههههههههههه خطيب بنتي شلونه؟

بنات عذروني دااحس نسيت بنات بس صدكو دماغ ماكو بعد

[kokee]

هلو بنات
هلا مهاوي اني بخير بعد عمري

[kokee]

دلوعه مبررووك حملج الله يتمملج ع خير

[روح ملائكيه]

هلو زنوبه عمري ان شاء الله دووووووم بخيرررررر

فديته الي كاعد عالطاووس هههههههههه ياعمري كبران الله يحفظه الج ولأبوه..
اسفه تأخرت عليج بالرد جنت انزل كيكه شوكولاته بالمنتدى

[روح ملائكيه]

زوزو شوفي هذي عبايتي قبل لا اولد محمد فصلتها بس هذي للمناسبات مو لطلعه عاديه وردانه بيها شيفون من الوسط

بعجمان خيطتها بس مااكولج عالسعر حتى ماتنصدمين هههههههههههههههههه


http://forum.hwaml.com/imgcache2/hwaml.com_1332860717_564.jpg

[kokee]

خل الحك اشوف الكيكه ههههههههه
الله يخليج حبيبتي هاي بطاووس اللي بالزوراء يم حديقة الحيوانات

[kokee]

حلوه صايتج مها
هنا كله جاهز محد يخيط

[kokee]

حبيبتي ام حمودي عاشت ايدج ع الكيكه

[عسل بغداد]

هلو بنات شلونكم ام شوق شخبارج مبروك عبايتج كلش حلوه مسائو كوكي الله يخليلج هذا الحلو ويحفظه

[روح ملائكيه]

تسلمون حبايب قلبي هذا من ذوقكم..كدامكم العبايه يـ الغاليات

منوره عسل بغداد ...

زنوبه بالامارات اكو حاضر واكو خياط بس اني دااائما اخيط لأن العبايات ضيقه وتبين الجسم وزوجي مايرضى

[kokee]

هله حبيبتي مساء العافيه عليج
الله يخليج ويخلي اولادج وتشوفينهم اطباء يارب
مكبره جهالج يلا حبلانه عاشت ايدج والله

[روح ملائكيه]

والله يحتاجلي اخيط ع الاقل 3 عبايات بس تقريبا ساده البسهن بالدوام من اروح للعراق

زوجي يكلي تلبسين عبايه خليجيه وفوكاها عباية راس وطبعا من غير التنوره والقميص كتله شنو السالفه وين رايحه اني ؟كتله بس عبايه خليجيه لو عباية راس وتحتها ملابس عاديه خخخخخخخخخخخخخ

[kokee]

صحيح يصيرين فد مره لازكات ع الجسم

[روح ملائكيه]

احسن شي تكبرين اولادج يله تحبلين هسه شكد حلو الفرق بين بنتي شوق وملاك 3 سنوات ونص بس معاناة بالفرق بين محمد وملاك بس سنه وشهرين مثل التوم هههههههههههه

[kokee]

شسوين بيهن
بدلي وفوكاها عبايه راس
هسه اني هنا بالنجف كله عبايه راس وابدل جواهن

[kokee]

فرق ترتاحين
هسه اني يكلولي احبلي وخاصة ام رجلي كتلتني
كتلهه هوه هذا ومحد مساعدني عليه وعمره 10 اشهر وكلش متعبني خاصة صاير حرك ويتشلبه وكلسع طايح
تكول المانع مو زين وعفت الياسمين هذا الشهر وخايفه احبل كلش هههههه

[kokee]

رجلي جزع من الفلاش والخارجي وظل يدردم عليه لان ماخذت مانع ههههههههههههههههههههههه

[kokee]

شوكت تجين للعراق ؟

[روح ملائكيه]

اريد اسوي عجينة فوندان حتى اضبطها زين قبل عيد ميلاد ملوكه اريد اسويلها لعابات صغار وورود من الفوندان ..عيد ميلادها بالسابع (هع من هسه اتهيأ)

[روح ملائكيه]

يمعوده رجعي للحبوب احسنلج الخارجي مو امان هسه اني لازمه كلبي لا احبل ..

المصيبه دورتي صايره مخربطه تجي بس 3 ايام ومرتين بالشهر

[kokee]

تسوينهن بالقوالب غير

[kokee]

هسه غير خبلوني يكلولي الحبوب تسوي ضعف

[روح ملائكيه]

هالايام اروح للدكتوره احط لولب واخلص بس يجوز احط لولب هرموني العادي مايلائمني ..

لازم اسوي بحث بجوجل هههههههه حتى اثبت على قرار ..هسه لو يسوون لعمري عقد جا سويت من زمان الدكتوره تكلي مايصير الا بعد الاربعين

[kokee]

تسوي ضعف مبايض وتسوي مدري شتي لعبت روحي عفتهن هههههههههه
ليش متحطين لولب احسلج؟

[kokee]

لا ليش عقد خلي يولي حطي لولب
يعني هاي هيه قفلتي الانتاج ؟هههههههه

[kokee]

حطي هناك هنا ميفتهمن
والله بت عمي خلت لولي وحبلت هسه هيه طبت بالسادس واالولب بعده هههههههههههه

[روح ملائكيه]

لا ياقوالب اشكلهن بأيدي من هسه اخترعتهن بدماغي وداعتج هسه الكيكه مصوره بالمخ هههههههههههههههههههههه

عيني زنوبه احسنلج رجعي للحبوب وياضعف هذا؟ شو اختي الجبيره حبلت بسرعه بعدهن ثم فرضا لا سمح الله يسوون ضعف (الله لا يكولها) رأسا منشط ترجعين طبيعيه
معليج بحجي الناس اختاري راحتج ..ولج زنوبه وين تكدرين لطفل بعد اني عندي خدامه ومامدبرتها وربج انتي منو الج؟؟

عالاقل يصير عمر لولي سنتين وفكري بالحمل ثم شنو يكللولج حبلي قابل انتي جبيره لو مخلفه بنيه؟؟؟ يمعوده معليج باليحجي

[kokee]

حبيبتي مهاوي اروح اذكر الله اذن وانوب اسوي عشه
مع السلامه وبوسيلي ملوكه ام خدود ههههههه

[روح ملائكيه]

اي خلاص انقفل الانتاج بأمر سيد البيت هههههههههههههههههه

الحمدلله اجت منه خخخخخخخخخخخخخخخخخخخ


اي هو لولب احط بس اسمه لولب هرموني

[روح ملائكيه]

صلاة مقبوله ان شاء الله وتوصل البوسه هههههه

اني هم اروح

[kokee]

اي خل يكبر يصير سنتين يالله لان محد الي وداعتج والبيت مكوم على راسي
رجلي ميقبل همزين يكلي مالي خلك مزعطه خل نرتاح كتله همزين اجت منك هههههههههههههههه
يالله مع السلامه حبيبتي

[عسل بغداد]

حبي كوكي ديري بالج تحبلين هسه ابنج بعده زغير خطيه وانتي همين لازم ترتاحين فد سنه لتسمعين كلام احد اني لو امشي براي الي يمي جان هسه بزونه ههههه حماتي تزوجت وياي هسه عدها 5 وحامل ب7

[ام سرمد]

هلو تسمحولي اصير صديقه الكم

اني ام سرمد جيران ام ايهومي الورده واتمنى صحبتكم

[عسل بغداد]

بنات تره اللولب الهرموني موزين الحبوب احسن مو اي دكتوره تكدر تخلي

[أم أيهومي]

السلام عليكم بنات
اشلونكم مشتاقتلكم وماعندي نت
طبيت من يم جيرانه ام سرمودي واتمنى اتقبلوهة صديقه النه وماعرف اشوكت راح يصير عدنه نت
مشتاقتلكم موتات
هوايات كولشات بوساتي للكلhwaml02hwaml02hwaml02

[توتايه]

ام سرمودي منوره هلا بيج حياتي كل الهلا

ولج نجلاء راح اتخبل يمكن حامل ادعولي لا

[توتايه]

هلو مهاوي قلبي الله يسمع منج زوجي كبل كلب وجهه اذا خارجي ميقبل وفلاش ميقبل ولولب ميوالمني وميقبل اخذ حبوب واذا حامل كلب وجهه شسوي بس كولولي كلتله والله اذا جتي الدوره اخذ الياسمين اني مو اظل كل شهر بالهباطه

[بنت الخليج]

هلوووووووو بنات اشلونكم اسفة حبيبتي عذورة اني هم النت فصل يمي هاي القمة ايكولون حتى على النت اماثرة . ام ايهم حبي اشلونج امنورة انتي وجيرانكم ام سرمد واهلا وسهلا بها . اية حبيبتي مشكلتك نفس مشكلتي اني هم كنت اعاني مثل معاناتك بس الحمد لله وصلنا الى حل يرضي جميع الاطراف ههههههههههههههه والحمد لله هسة ماشي الحال بقية البنات اشلونكم اهواية اكو مختفيات ليش ؟؟؟؟

[بنت الخليج]

ايمان وهبة وهند واهواية بنات مختفيات شنو القصة انشاء الله المانع خير

[مجنونة بحبها]

هلووووووووووووووووووو بنات



هلا ام كرار شلونج اخبارج
شفتي الحظ ماادري منين طلعت القمه
ومخلتني اشوف رحاااااب اليوم اتصلت بيها اتكول رايحين للنجف
ويوم الجمعه يرجون وتعبانه خطيه من السيطرات والشوارع المسكربه
عبالها السعوديه وتطورها هههههههههههههه
السعوديه تخبل متطوره وكلشي متوفر




ايه حب شلونج وشلون يوسف



زنوبه الله يشافي عمتج ويكومها بلسلامه


زنوبه شنو هذا لولي ماشاء الله صاير يخبل



مهاوي حبي شلونج اخبارج
انا الحمدلله بس تعبانه الدوره شرفت وكماشه مطلعه روحي
وتعبااااااااااااااانه بحيث معظم الوقت بس ابجي ومتضايقه



نجوله هلا والف هلا بيج وبجوارينج
ام سمودي منوره يالغاليه
نتشرف بوجودج



ام الوقه اخبارج


عذراء مبروك دخلت التاسع وامانه ادعيلي من اتطلكين
الله يفرجها علي



عسوله شلونج حبي اخبارج


فوفو اليوم ماكو سلامات



بااااااااااااااقي البنات شلونكم وحده وحده

[مجنونة بحبها]

هلا ام كرا حبيبتي مشغوله لحد شعر راسي

[بنت الخليج]

هلو حبيبتي امونة اشلونج حياتي مشتاقتلج اني اتصلت برحاب قبل يومين كالت اني بكربلاء وبعد محصلتهة عبالي نتشاوف بالامام الكاظم عليه السلام بس حرامات ماكو قسمة اشكد عيب من عدهة عود اني واعدتهة قبل متسافر اضيفهة عندي بالبيت بس اشو طلعت القمة صفح

[بنت الخليج]

الله يساعدك حبيبتي امونة هو منو منا مو مشغول اشو كلمن ضيمة شكل والله يكون بعون الجميع

[بنت الخليج]

صدك امونة الله يعوضج خير انشاء الله والله كريم انشاء الله تنرزقين بهذا الشهر بحق الحبيب محمد

[فوفو العراقية]

مساء الخير
حبيباتي عن تجربتي بالحبوب المانع سنة اخذت ونطني 5 اشهر استراحة وظل مفعولة وبعدها حبلت
ومرة ثانية اخذتهن 6 اشهر والشهر الخلصن حبلت رئسأ
وماله اي مضار ويقوي المبايض وينشف التكيس لو جان بيهن
لان جان عندي تكيس مبايض واخذته وطبت.

واللولب الهرموني دماااااااااار
اولا الدورة تنكطع
2 يسمن كلششششش يزيد الوزن
صاحبتي جانت قبل اللولب 70
وبعد اللولب صارت 107
ديرو بالكم

وهسة اكو لزكات الكتف احسن ومتضر ابد بس لازم الالتزام بيها
واكو كبسولة الايد هم ممتازة
بس ماعرف لو موجود عدكم بالعراق
واكو حتى فلاش نسائية المرة تلبسة قبل العملية الجراحية هههههههه بس ممجربته وموجود بالصيدلية هنا
يمكن ورا ما اجيب اجربه
بس اني ضليت 4 سنوات على الايلاج الخارجي وماصار ولا حمل ولا شي
وطبعا هالشيئ مو كل رجال يرغبة وهذي المشكلة بس العندي هوة يحب هالشي الحمد لله ابد مو اناني ,

[فوفو العراقية]

حبيبتي امون اني موجوده
انتي ماكو

شلونج يا قمر ؟

[فوفو العراقية]

شنو صار عنج وشسويتي بخصوص الجنين ؟؟؟ اموووون
والله قلبي محروق عليج
بس الله يجعلة طير من طيور الجنة الي يضلل عليج يوم القيامة
ويعوضج مكانه خير ياااارب وتفرحين بحق لا اله الا هوة.

[بنت الخليج]

هلو فوفو حبيبتي امنورة اني بيداء ام كرار . انتي يمكن قديمة بالمنتدى بس اني اقدم منك ههههههههههههه واعذريني ترة ما اعرف اسمج . اتشرف بيج

[توتايه]

والله شكوللكم يابنات ما ادري والله حايره وهو كاعد كالب خلفته يعني هوه ميسويها ميسويها ومن يسويها يطلع بوكت التبويض خرب حظي


بيوده حبيبتي حتى على الفيسبوك ماكو

[زينب السعدي]

شكد سعرها عبايتج مها ...لتخافين مااخترع ماخذه من كل الاسعار ماخذه من الغاليه ومن الرخيصة ومن الوسط هههههههه

[عذراء الجابري]

صباح الخير حبوبات
امونة بجاه الحوراء زينب بطلة كربلاء تحبلين وانشاء الله ما انساج خية
اكلجن رحاب جاية لبغداد وزايرة الامام واني ما ادري

[عسل بغداد]

صباح الخير عذوره حبي شلونج يارب تكومين بالسلامه ويفرحج بالولد الصالح

[عسل بغداد]

صباح الخير والورد والفل على عيون كل الحبايب اليوم كاعدتلكم من سبعه ونص شلونج حبي امونه الله يعوضج خير انشاء الله *صباحو فاديه شخبرج والنونو شلونه بدا يتحرك لوبعده *هلو زوزو عمري شلون صارت عمتج الله يشافيها *صباح الدلع حبي ايوته انشاالله الامور تمام مشتاقيلج *

[عسل بغداد]

صباح الورد عالورد رويده عمري مشتاقيلج اشو ماكو رحتي اضربين الابره ومارجعتي خوما تتعاركين انتي والق

[رويدة_ أم ألق]

ههههههههههههه هلاو عسل انزول عليج
لا والله رجعت ولكيت التجمع بارد وخفت أدخل أصير افلاونزا هههه

[رويدة_ أم ألق]

بيودة نورتي والله كل يوم والثاني أذكرج مع نفسي أكول وين صارت

أم أيهومي وجيرانها هلا ومرحبا بيكم

زينب طمنينا عن عمتج إن شاءالله عندها العافية يارب

أيوتة خلي أحجي عليج شوية
دائمااا تكتبين عبارة الحظ هاي .. شبيه حظج ياعيني
وحتى لو حامل رزق ربج بعد ولا اعتراض
وخليه كَالب وجهه بعدين يستسلم للأمر الواقع أنت مابيدج شي

مهاوي تسلمين على اللقب الحلو اللي منحتني اياه أتشرف حبيبتي


عذورة ربي يسهل عليج والبنات من سمعوا بقمة رجعوا للتجمع ههههههههه


أمونة , فادية , كوكي تحياتي الكم جميعا.

[رويدة_ أم ألق]

يمنى , مي , أنفال , علياء , نورس طولتوا الغيبة
يارب تكونوا بألف خير.

[عسل بغداد]

هلو رورو شلونج شنو هل خفه الدم من الصبح يربي شكد شاربه مي البارحه

[عسل بغداد]

اليوم شبكه ماكو لا اسيا ولا عراقنا والنت يكطع كل ساع يفصل وفوكاها كاعده من وكت كله من وره قمه الخير بس شي واحد زين كهرباء موجوده من البارحه!شتكولون اسوي غده من هسه واعزمكم مو لان ماكو طرق بس راح اسوي دولمه لو برياني مادام ابونه اليوم بالبيت

[رويدة_ أم ألق]

هههههههههه

صدك عسل ليش متعدلين التوقيع عيوني؟
لأن اخر كلمة عندج متظهر كلها
خلي الشريط تحت الصورة.

[رويدة_ أم ألق]

بعد وكت للغدة.

[عسل بغداد]

ضوجه شسوي وكاعده احجي ويه نفسي وكل الي يمي نايمين

[عسل بغداد]

راح اعدل التوقيع واكتب دعاء الصابرين بس اذا راح شريط الحمل انتي تسويلي واحد لان بالكوه سويته

[رويدة_ أم ألق]

اي هسة أحسن صار كلامج ظاهر كله
ولو الدعاء مفصول بس يلة زين من دبرتيه ههههه

[بنت الخليج]

صباح الخير بنات اشلونجن شخبارجن ام الق حبي النورنورك اشلونج شخبارج مشتاقتلج مووووووووت . عسولة حياتي امنورة واهلا وسهلا بيج ويانة ولو اجتي متاخرة بس اعذريني صار فترة طويلة مداخلة باقي البنات الحبيبات اشلونكم عساكم بخير

[غنى2011]

صباح الخير شلونكم ياحلوات

اسبوع الجاي انشاء الله اسوي ربط

والنوب الدرقيه من فرط هسه سويت تحليل طلعت ناقصه افرازها كولش شلون قهر لا الزياده ولا النقصان زين بالحمل
اسم على الحوامل تسمعون العافيه والشكوه لله
هسه وقفولي العلاج بعد 4 ايام رحت حللت لكيتها شويه صاعد بس بعدها اذا الدكتور ركعني ب 3 حبايات باليوم انوب خرطت هههههههههههههههه

انتو شلونكم هسه زوجي راح جابلي سمك بحري من الاسواق علمود اليود يكولي يوميه اكلي سمج
اني هذا الي ابطني هو سبحانه وتعالى انطانيا من عنده بدون انابيب وان شاء الله يحفظليا البارحه شبعت بجي
اريد رحمت ربي

[غنى2011]

اكول بنات صدك عندي سؤال

بالحمل انتو همين تستخدمون العطور والمكياج عادي اني اخاف بس دورات واحد هم يريد يتعطر يتمكيج هههههههه
وبالنسبه لبودره الجسم اني دائما استخدم بيبي جونسن مال اطفال شتكولون مابيها شي لومو زينه

قريت مو اضيع بالنت تخوف عن المكياج والعطور يكولون كلها كيمكل لعد ليش يسوها النا بس البيبي نخاف عليه لعد واحنه
ههههههه

[عسل بغداد]

هلو حبيبتي بيوده اشكرج عالترحيب وماكو داعي تتعذرين كلنا خوات انشاء الله

[عسل بغداد]

صباح الخير غنى الله يتمملج على خير ويعافيج من الدرقيه بالنسبه للعطور والمكياج عادي كلشي ميسوي بس الصبغه والاوكسجين موزين عالطفل

[روح ملائكيه]

مساء الخير بنات شلوووووونكم؟

[عسل بغداد]

مساء النور حبي نورررررررررتي

[عسل بغداد]

عمري انتي ام شوق تريدين الهويه شنو احنه بسيطره ههههههه

[روح ملائكيه]

منوره عيوني ام سرمد كل الهلا بيج غلاتي


زينب اي لا تسمعين كلام احد ع الاقل بعد سنه وفكري بالحمل وداعتج بس تحبلين كلها تتبره وتكلج معلينه طبعا هذا من غير التقيد وماكو طلعه وووو.....الخ
رجعي للحبوب احسنلج


ايو قلبي ان شاء الله مو حامل لا تقلقين هسه تجينه تكولين اجت الدوره وتركصين هنا ههههههههههههههههههه


نجوله شنو نوع خط النت عدكم ؟؟
حايره من ارجع للعراق مااريد اسوي شبكه اريد مثل الكارت بس كون نوعيه زينه ..


عسل بغداد شلونج عيوني وشلونه الحمل وياج؟

[روح ملائكيه]

هههههههههههههههههههههههههههه

لا مو كل الي تدخل التجمع لازم تنطي السي في ههههههههههههههههههه

وداعتج كل وحده هنا مرت بهالمرحله هع

[عسل بغداد]

اسمي سجى عمري 26 زوجي اسمه عدنان عمره37 ربه بيت عندي اطفال 2 وهسه حامل تدللين عيوني انتي

[روح ملائكيه]

من اجي للعراق اسوي سيطره على كل وحده جديده بالجات هههههههههههههههههههه

[عسل بغداد]

بالعكس حبي اني اتشرف بيج بس محد سألني

[عسل بغداد]

والله شكو بيها تره اني اريد اشيل جهاز الايدن

[رويدة_ أم ألق]

مساء الأنوار عليكم
بيودة تشتاقلج العافية عيوني

غنى الله يكتبلج السلامة يارب
وبالنسبة للبودرة أنا ايضا ما استغني عنها
كلش عادي هي والعطور متأثر.

[رويدة_ أم ألق]

مهاوي أهلج بالديوانية؟

[عسل بغداد]

رويده هاي صورتج وانتي زغيره

[روح ملائكيه]

هلو رويده منوره


اي اهلي بالديوانيه حاليا

[روح ملائكيه]

غناوي عمري لو تدرين شكد اخلي عطور ومعطرات للجسم جا شسويتي؟؟ هههههههه

عادي اني اتمكيج واستعمل عطور بس بودره الاطفال مااستعملها ..


رحوبه ان شاء الله توصلين بسلامه غلاتي

فوفو اذا الهرموني يسمن لعد شأستعمل والله حيره لا تكوليلي حبوب ولولب عادي مو زينات عليه

[روح ملائكيه]

رورو شلونج على الابر صرتي احسن؟

[رويدة_ أم ألق]

لا سجاوي هذا زوجي هههه

اها مها يعني مو بعيدة علينا
بين الحيرةو الديوانية أقل من نصف ساعة
تجين بالسلامة إن شاءالله

هيئتي نفسية بناتج؟
كليلهم رايحين لمكان اسمه وطن مع وقف التنفيذ !

[رويدة_ أم ألق]

اي عيوناتي الحمدلله تحسنت من زمان
بعد كم يوم أروح أسوي تحليل دم وأشوف.

[روح ملائكيه]

امونه عمري الكلام مايخلص ان شاء الله تحبلين وتسكتين كل من حجه عليج ياااااااارب
ولا تبجين ..... هو اليحجي عليج مراده يوصلج للبجي ياعمري ..واذا عالطفل انتي هسه عندج بنونه يعني تكدرين تنجبين اطفال والحمدلله بس هي مسألة وقت ..ان الله مع الصابرين

زوزو هذي العبايه سعرها معتدل مو غاليه سويتها بـ 380 درهم وسعرها الاصلي كان 650 درهم بس زوجي عامله للرجال ونزل السعر ..القماش درجه اولى اني شفت طول القماش وقريت الكتابه الي عليه

[روح ملائكيه]

اي الديوانيه قريبه عالنجف

يمعوده بنتي شوق كل شويه تكلي خلي نروح لجدو تقصد ابوي لأن يحبها ومدللها وهناك اكو مدينه العاب وطلعه يوميه ليش ماتكيف تروح هههههههههههههههههه

[زينب السعدي]

الف عافية عبايتج مهاوي
اهلا سجى همزين نزلتي السي في مالتج ربي يكومج بالسلامة
بنا عمتي البارحة ساعه 10 ونص بالليل والعملية ناجحة الحمد لله س طلعونه ب12 ونص كالو ميصير تباتون يمها والصبح راحلها حمايه ويكول زينه وديسوولها علاج فيزيائي ويمشوها ..الف الحمد لله

[رويدة_ أم ألق]

الحمدلله على سلامتها زينب الله يحفظها من كل سوء

اي هم زيين مهاوي حتى لا يحسون بالفرق ويضوجون.

[عسل بغداد]

هلو زوزو الحمد لله على سلامتها الله يشافيها

[زينب السعدي]

الله يسلمج قلب سجاوي

[عذراء الجابري]

مساء الخير عالكل
سجى منوره همزين عرفنة >>>>>>>>>cv
زنوبة حمد لله على سلامة عمتج وانشاء الله تكوم بالسلامه
غناوي خليها على الله
ام الق لمتنا هنا تسوه الدنيا
ام شوق ماكو احلى من العراق الله يهدي ابو شوق ويرجع وياج للوطن

[عسل بغداد]

مساء النور حبي عذوره

[kokee]

هلو بنات شخباررررررررررررجن

[kokee]

ام الق سجاوي امونه وعذوره وزبوبه شخبارجن

[عذراء الجابري]

مســــــــــــــــــــــــــــــــــــــــــــــــ ـــاء الانــــــــــــــــــــــــــــــــــــــــــــــ ـــــــــــــــــــــــوار
وعافية حبيبتي وأهلاً وسهلاً بيج ويانه

[عذراء الجابري]

هلو بيج زنوبة

[عسل بغداد]

هلو كوكي شلونج نورتي

[kokee]

اني بخير حبيباتي

[kokee]

هانت عذوره راح يشرف السيد
ساعة السهله ان شاء الله

[عسل بغداد]

لوبس ادري وين تروحن جان ارتاحيت

[kokee]

صبيت غده لرجلي واجيتجن ههههههههه

[رويدة_ أم ألق]

هلاو زينب نسأل عنج
ليش تخلين زوجج يتغدة وحده؟

أكيد عذراء.

[kokee]

سجى شكد عمر جهالج

[kokee]

يمعوده شسوي لعد لولي نايم فوك وبس يكعد يزحف ويوكع من الجربايه فاصب غداه وارجع اصعد بسرعه

[kokee]

اليوم غدانه زوري واني ما احبه

[رويدة_ أم ألق]

نوم العوافي لحبيبي لولي.

[عسل بغداد]

بحجه الولد تتونس امه ههههههههه علاوي عمره 11 وفرح عمرها 3سنه و11شهر و3اسبوع يوم 3/4يصير عيد ميلادها

[رويدة_ أم ألق]

زينب اني اذا مو بصفة وعكسي زارف رجله طول الكعدة منعرف ناكل ههههه

[رويدة_ أم ألق]

سجى أنت متزوجة كلش صغيررة
زوجج أقاربج لو غريب؟

[kokee]

لولي سولته بسطولة الزباله وين ميروح يبدي سطل واني الم وراه هههههههههههه

[عسل بغداد]

والله خطيه قاسم يله هسه تجيج التزرفلج كلشي تكومين متعرفين تاكلين

[زينب السعدي]

هلو بنات شلونكم
اليوم نريد نطلع اني وزوجي نشتري كنتور وسرير لغرفة النوم مال الضيوف لان قبل كنا فارشيهم منادر وهسه عمتي سوت عملية مو زين تنام عالكاع لازم سرير ولكنا نشتري كنتور حتى تترتب الغرفة

[عسل بغداد]

اسم الله عليج عقارب مو اقارب تزوجت 16سنه

[kokee]

اهاا فرق هواي بين بتج وابنج معناها متزوجه زغيرونه
شعجب هالفرق بين الولد والبنيه
بس زين تسوين

[رويدة_ أم ألق]

هههههههه سجى لا والله ميضوج أبد

وبالنسبة لألق خلي بس تجي هي
أزرفلها قلبي.

[زينب السعدي]

لأيش عقارب سجى

[عسل بغداد]

الله عليج كوكي جيبي سطل جديد وصوري ابنج بيه

[kokee]

ههههههههههههه هسه تجيج الوقه تلعب بيكم لعب
تصير بجيتهه ويه وكت الاكل ههههههههه

[رويدة_ أم ألق]

ياا ليش سجى؟ بعدج ساكنة وية عيالج؟

[عسل بغداد]

حبيبتي والله كلهم بالوجه مرايه وبالكفه سلايه من عمتي وهي طالعه اتعجب عليج شلون تحبين عمتج

[رويدة_ أم ألق]

اي عفية زنوبة ألاحظ كل الأطفال ميبجون إلا وية الأكل
طبعا هم زينة الحياة بس ياخذون هواية من راحة الزوجين ولحظاتهم الخاصة تقل.

[kokee]

هههههههههههه يمعوده شصوره خو الملابس كل شويه ابدله لالان بسع يوصخ

[عسل بغداد]

لا الحمد لله صارلي طالعه من يمهم 9سنين بس جانو يجون كلش هواي ويتدخلون بكلشي بس وره ما سافرنه ورجعنه شويه صارو حبابين

[kokee]

هههههههههههه رويده حاله خاصه
اليوم هم ام رجلي رادت تتعارك وياي بكل صوره بس نعلت الشيطان ونلصمت حتى صعدت لا ريوك ولا غده

[kokee]

ياالله اروح العب ويه لولي كام يدردم ويبجي هههههههههههههههه
\بااي

[رويدة_ أم ألق]

زين خلصتي من المشاكل
والفارق بين أولادج الثلاثة حلو.

[عسل بغداد]

الله يساعدج زنوبه شتسوين ان الله مع الصابرين اصبري واحتسبي

[رويدة_ أم ألق]

بيباااي زوزو
زين تسوين صعدتي وتركتيها.

[عسل بغداد]

هو عدنان طبعه حلو يحب يكون نفسه اني عندي اسقاط وره علاوي وميحب هواي العلاقات وي الاقارب يكول لازم تصير مشاكل على الرسميات

[رويدة_ أم ألق]

فعلا كثرة العلاقات تسوي مشاكل
والله عوضج خير سجاوي
أخذتي سونار بهذا الشهر؟

[عسل بغداد]

يله بيباي بنات تعاركو الجهال

[رويدة_ أم ألق]

هههه بيباي سجى أنا أيضا رايحة المولدة تنطفي ب4

[عسل بغداد]

الحمد لله والشكر رحت اخذ سونار كالت الدكتوره المي قليل والكلى مالت الجنين متشتغل يوم 2اروح اخذ شونار هسه اني بس اريد وضع الجنين

[zena]

هلوووو بنات مشتاقه للكل وطبعا البارحه جان عيد ميلاد هلونه وكلش حلووو جان مكانكم فارغ بعدين انزل صور من افرغ

[بنت الخليج]

السلام عليكم بنات ماشاء الله اللهم صلي على محمد وال محمد هاي اشكد كاتبات من الصبح ليهسة رجلي خضرة عليكم من رجعتلكم وانتوا هم رجعتوا كنتوا خمول كلش همزين راح الخمول ... اي عفية حبابات اريدكم انشط ... سجاوي حبيبتي اتشرف بيج واكيد كلنا اخوات انشاء الله وهمزين لكيت وحدة عدهة عقارب عبالي بس اني هههههههههههه .... زنوبة حبي الف الحمد لله على سلامة عمتج وماعدهة غير العافية انشاء الله ... ام الق واية وعذراء وام نورهان وايمان وكل الاخوات اشلونجن حبيبات

[غنى2011]

صباح الخير غنى الله يتمملج على خير ويعافيج من الدرقيه بالنسبه للعطور والمكياج عادي كلشي ميسوي بس الصبغه والاوكسجين موزين عالطفل


الله يسلمج ياورده اشكرج هوايه ع الدعوه الحلوه

[بنت الخليج]

هلو غناوي اعتقد ممتعرفين اني وياج قبل اني بيداء ام كرار والله يشافيج من الدرقية بحق الحبيب محمد .. انتي شنو قصتج وية الدرقية ؟؟ اني قبل فترة سويت عملية وشلتهة والحمدلله على كل حال

[غنى2011]

ام الق ياعيوني ويكومج بالسلامه

ام شوق ان شاء الله توصلين بالسلامه للعراق اشترتي جدور لو لا ؟ هههه فضول

زينب الحمد لله على سلامه عمتج

زينب او لولي شلونج حبيبتي اخبارج شبيها اليوم عمتج وياج يعني ضليتي بليا اكل اليوم ياحبيبتي


زينه كل عام وانتي بالف خير ان شاء الله العمر الطويل

[غنى2011]

هلو حبي بنت الخليج الله اهلا وسهلابيج الله يسلمج قلبج ويعافيج
هذي الدرقيه كولش جديده عليه والمشكله اكتشفتها ويه الحمل
الصراحه مفاجاه لكيتها زايده