دردشة بنات ليبيا , دردشة حوامل ليبيا , تجمع بنات ليبيا

[زهرة2000]

نهاركم الى تدورو فيه طلعتو

[ام معاد]

السلام عليكم كيف حالكم كلكم ولاباس عل مرت حوك ياعيون ومبروك عليكم المزيودة ، زهورة نبي نشوف انوووووووووووووووووووس الحلو

[عيون زوجي]

وعليكم السلام ام معاد

بارك الله فيك والله يسلمك كيف حالك وحال عبادي وماريه

انا طلعت فجاءة بنتي دارت ككا حاشاكم في المحبس ولازم انقعمز جنبها ونغني ونتهيبل لين تكمل اخخخخخخخخخخخ

اي سؤال يا زهوووورة يا ام الحلووو

[عيون زوجي]

منو فيكم ضايقه البوظة الشامية (العربي) انا انحبها هلبه هلبات تفضلوا ولو تبوا الطريقه قولوا

http://forum.hwaml.com/imgcache2/hwaml.com_1335971584_357.jpg

[عيون زوجي]

http://forum.hwaml.com/imgcache2/hwaml.com_1335971817_434.jpg


المقا دير ...كوب و ثلاث ارباع دقيق ...ثلاث ارباع كوب كاكاو ساده ...ملعقه ونص بيكربونات الصودا ...ملعقه ونص بيكنبودر ...ملعقه صغيره ملح ...2كوب سكر ....كوب حليب ..2بيض ....نص كوب زيت ذره ...فانيليا...كوب ماء مغلى .......الطريقة ...اولا ندهن ...الطاجين بالزبده والدقيق ...نخلط جميع المقادير الجافه مع بعض جيدا بعدين نضع عليهم البيض والحليب والزيت ..ونخلطهم جيدا وفي الاخير نضع كوب الماء المغلي ...ونمزج الخليط جيدا يصبح عندي الخليط سائل .....تم يسكب في الطاجين ويخبز ...ويترك حتى يبرد تماما ...تم يزين حسب الرغبه ..ممكن وضع كريم شانتى من فوق وترش بالوز جربوها خفيفه وهشه ....صحتين

[عيون زوجي]

تفضلوا يلي يعجبها خاتم تاخده هديه


http://forum.hwaml.com/imgcache2/hwaml.com_1335971998_348.jpg

[أم ورد]

السلام عليكم كيف حالكم
عيوون كيف حالك وكيف حال عويلتك ومبروك عليكم المزيودة ولاباس على مرة خوك
أم أنس كيف حالك وكيف حال أنس ولين وشن صار فيه

[أم أجنادين 80]

السلام عليكم
كيف حالكم يابنات حاضرات وغايبات
ومبروك البنوته عيون تتربي في عزكم

[أم ورد]

وعليكم السلام أم أجنادين كيف حالك وين هالغيبة إن شاء الله خير

[أم أجنادين 80]

الحمد لله أم ورد
والله انشغلت بين العمل والحوش ولما نفضي شوي يادوب نشوف التلفزيون

[أم أجنادين 80]

عيون طلعتي

[أم ورد]

ربي ايعاونك

[ام معاد]

السلالالالالالام عليكم ، نص ساعة ونجيكم بالله فكونا من الكساد

[ام معاد]

تي ونكمممممممممممممممممم

[أم ورد]

وعليكم السلام أم معاذ كيف حالك وكيف حال السنافر

[ام معاد]

الحمد لله كسااااااااااااااااااااد

[أم أجنادين 80]

وينكم الباين مكسدين وين انا دخلت

[عيون زوجي]

السلام عليكم

ام ورد الله يبارك فيك عقبالك يارب

ام اجنادين عقبالك وكيف حالك ووينك وشنو صاير معاك بشرينا

ام معاد اني موجودة تعالي

[عيون زوجي]

طلعت عزيت مرت خال زوزي عالسريع وجيت جري وينكم؟؟؟

[ام معاد]

شن تعشيتوا

[أم أجنادين 80]

انا كنت في تونس درنا فحوصات ثاني
ودرت صورة ملونة ألم فظيع فظيع
تحاليل زوجي مش كويسة الحمد لله علي كل حال
الدكتور قاله زيد خود بروكسيد 6 شهور او دير عمليه عالدوالي
ومش عارفة توا بنزيدوا انراجعوا دكتورنا في ليبيا

[ام معاد]

شن اخبار البلاد البرا

[ام معاد]

الحمد لله علي السلامة ، وتوكلي علي الله وهدا اختبار ليك انت وزوجك دائما قولي الحمد لله علي كل حال ويلي عند ربي مش بعيييييييييييييييييييييييييييييد

[أم أجنادين 80]

شوية ونرجع

[أم أجنادين 80]

صحيتي ام معاذ
عندك الحق الخيره في مااختاره الله والمهم انه متفاهمين ومرتاحين مع بعض

[ام معاد]

اهم شي الرااااااااااااحة

[عيون زوجي]

انا اتعشيت طابونه من برا وانتم

[ام معاد]

اني عجة دحي

[أم أجنادين 80]

ام معاذ مانعرفش انديرها العجه تصدقي ههههههه

[عيون زوجي]

صحتييييييييييين

[أم أجنادين 80]

صحتين ام معاذ وعيون
باصبايا تعرفولي مصور في طرابلس في عنصر نسائي يطلع صور العرس ويخدمهم خدمة كويسة

[ام معاد]

حتي اني كنت مانعرفش انديرها بعدين اتعلمتها ، في بداية زواجي درتها لكن بدل الدقيق حطيت خبزة مرحية خخخخخخخخخخخخخخخخخخخخخخخخخخخ طلعت مش حلوة زوزي قالي ديريلها دقيق مش خبزة ههههههههههههههه زوزي يعرف خير مني هههههههههه

[ام معاد]

لالالالالالا ياحبية والله ماعرف

[أم أجنادين 80]

باهي قوليلي شن مقاديرها

[أم أجنادين 80]

عندي صاحبتي قالت انديروا فيها اللب متاع الكوسه وتطلع حلوة

[ام معاد]

المقادير بالنسب لعائلتي اندير في خمسة دحيات ونص راس بصل وفلفل اخضر نص قرن انحط الدحي ونحط معاه ملح وبهارات ونخلطهم بلمظرب الكهربائي وبعدين انضيف الدقيق لين اتولي زي عجينة الباسطي وبعدين انحط البصل والفلفل والمعدنوس ونخلطهم وبعدين انسخن الطاجين ونحط فيه شوية زيت ونحط شوية من المقدار كيف ماتبيها انت غليظة او رقيقة ونخليها اطيب وبعدين نقلبها من جيهة التانية

[ام معاد]

ايه سمعت هكي لكن اني ماجربتهاش

[أم أجنادين 80]

تسلمي ام معاد

[ام معاد]

ام اجنادين معليش بنسالك انت فاش تخدمي ؟

[أم أجنادين 80]

معيده في الجامعة

[ام معاد]

ماشاء الله الله يبارك شن تخصصك

[أم أجنادين 80]

وانتي تشتغلي او لا

[أم ورد]

السلام عليكم

[أم أجنادين 80]

web design,,,,,

[ام معاد]

انا معيدة في الحوش خخخخخخخخخخخخخخخ

[أم أجنادين 80]

وعليك السلام
حتي الحوش كويس هدا الأهم من أي خدمة

[أم أجنادين 80]

انتي من وين ام معاد

[أم ورد]

صحتين عشاكم أني مازال ما تعشيتش

[أم أجنادين 80]

انا مادرتش عشي بس انفكر بندير مهلبية بالشعيريه توا القيت طريقتها في اليوتيوب

[ام معاد]

انا من الزنتاااااااااااااااااااااااااااااان وعايشة في طرابلس

[عيون زوجي]

ام ورد نبعثلك طابونه حصة سارة قعده في كيستها

[عيون زوجي]

انا عندي موضوع معين شهر 6 ادعولي يصير منه ولو صار منه نحكيلكم كان هذا لا ... لانه معناها انكم ما ادعيتوش اخخخخخخخخخخخخخخخ

[أم ورد]

لالالا صحيتي وصيته إيجيب كباب ما عنديش نية ندير إعشي

[ام معاد]

ربي يسرلك ويعطيك ما تتمني ، اسمعي اني اول وحدة ادعيتلك معناها كان صار نبي حصتي خخخخخخخخخخخخخخخخخ

[أم ورد]

ربي إيسيرلك ويكملك موضوعك على خير

[ام معاد]

hwaml16شوية ونجي

[عيون زوجي]

خلاص ام معاد وام ورد حصتكم مضمونه غير مرة مرة اتفكروني وادعوا تاني مش تحسبوها عليا من توا

[عيون زوجي]

حتى اني بنمشي شوي وراجعه استنوني

[ام معاد]

انا جيييييييييييييييييييييت

[ام معاد]

تي وينكممممممممممممممممممم

[أم ورد]

أم معاذ بايتة بروحك الليلة

[ام معاد]

hwaml15ايه بروحي

[ام معاد]

تصبحوا علي خير

[ليبياقلبي]

- كم التذكرة لمصر؟ والتذكرة للاطفال بنتي 3 سنوات وولدي سنتين؟
تدكرة مصر تختلف حسب الخطوط المصرية اغلى انا نمشي عالمصرية طبعا قبل راهو الصيف لي فات المصرية 380 بس الليبية 280 الاطفال اكتر من سنيتن تدكرة كاملة بسعر تدكرتك اقل من سنيت بياخد النص لانا معندناش كرسي

- كم ايجار شقه لمدة مابين 3 اسابيع وشهر وتكون راقيه ونظيفه و5 نجوووم ومكان حلو
الشقة انا ننصحك في مدينة نصر ونعطيك اماكن في شارع اسمه عباس العقاد في مدينة نصر رئيسي هدا راقي في شارع اسمه نبيل خليا في مكتب اسمه الشروق للعقارات لو تبني نبعتلك رقمه نهطيك تمشي ويددلك علا سكن حلو ونظيف والايجار مابين 2000 الي 3000 مصري طبعا شهر اجري بالشهر افضل باه وطبعا بتعطيهم 500 تامين وبيحسبوا الساعة بروحها ننصحك متشغاليش التكيفات هلبة المصريين نصابة خلي بالك منهم بالدات انت اول مرة

- حاليا قالولنا البلطجيه في كل مكان وانفلات امني صح ولا لا؟
لالا مصر كويسة توا عندي ناس غادي مروقين
- اجرتوا سيارة للتنقل ولا التاكسيات خير؟
احنى نمشوا ناجروا السيارة تلقيها في اليوم بي 250 فما فوف في اليوم طبعا هدا اقل شي طبعا مصري مش ليبي
- نبي نمشي اخر اسبوعين في رمضان وانروح بعد العيد

- مطاعمهم حلوة ولا لا؟ واسواقهم شنو؟؟
حاجة تهبل تلقيها في مدينة نصر في سيتي ستارز عندك كافيه السينابون هدا يهبل وكافيهات تانية انزواع واشكال عندك شارع جامعة الدول مطعم دار القمر في ابو شقرة في المهندسين يهبل ماكلته ولو تبي الكشري تجربيه متاكليش الا من كشري التحرير في عباس العقاد
- لو ربي كتبلنا ومشينا كم تقريبا المبلغ يلي يسدنا ماكله وايجار ودهواري مدة شهر؟
والله تبي مبلغ باهي انت بترفعي دولار ولا ليبي احنى العام لي فات رفعنا معانا 3000 دولار عشنا ملوك لمدة شهر
عيون جنجاوبك انا باعتباري خبرة في مصر لانا ليا 10 سنين حافظتها شارع شارع طبعااا القاهخرة طبعا مصر لوة وفي رمضان جوها يهبل وونصحك بيها الحق بس بننصحك الرحاب فوتيها لانك انت جاية سياحة احسنلك تفوزتها الرحاب تو متلا زهورة بتقعد سكن فيها الرحاب هادية ومش متاع شياحة اسبوعين خليك في قلب القاهرة وننصحك بالسكن في مدينة نصر لانها توا هيا والله المهندسين ارقى مكان في القاهرة بس خليك مدينة نصر ارقى واحلى وجناججاوبك اكتر انا علا كل سوال حنحط الاجابة
المهم مصر تهبل عندك اماكن في مدينة ملاهي كبيرة اسمها دريم بارك هادي تجي في مدينة 6 اكتوبر هادي طبعا تفتح في اوقات معينة انت اتصلي بالمصرية لالاتصالات رقمهم 140 من مصر واطلبي رقم الملاهي واساليهم علا مواعيد العمكل هادي تحفة تهبل عندك سيتي ستارز جيننه مول في مدينة نصر عندك مكان اسمه الاناطر والمهم انا اعطيتك نبدة وللحديت بقية ويارب نكون افتدتك
\

[ليبياقلبي]

تعرفوا انا سالت سيادت طربلس عن محلات للملابس الاطفال ماجاوبني حد اليوم مشيت لطربلس لقيته كلا صيسفي احترت انا نوزة كاعدة مصيفتلهيش مشيت لي محل اسمه بيبي شوب في حي الاندلس يهبل بضاعته خديت منه تلاتة لباسات لنوزة ومشيت لي حنين لي في فشلوم حلو خدجت منه شخاشير بس

[ليبياقلبي]

ربي يسرلك موضوعك يارب ياعيون \ام اجنادين ووووووووووووووووووووينك غيبتك طويلة هلبة
مبروك لا وخيك المزيودة عيون والف سلامة علا مرة خوك

[ام اسكندر]

بنات صوتو معانا هنا

http://forum.hwaml.com/t108904.html

التصويت عن طريق ارسال رسالة للمشرفة شمس الشموس واضعة الموضوع

[ام روفيدة]

السلام عليكم ورحمة الله وبركاته

كيف حالكم كلكم يا حلوين ؟ والحمد لله البارح كان فيه شوية نشاط في التجمع وووووووووووووووووينكم اليوم ؟

عيون الحمد لله على سلامة مرة خوك وبارك الله لهم في الموهوبة لهم وشكروا الواهب وبلغت أشدها ورزقوا برها اللهم ااامين وكيف حال سارة وحمودي ؟

[ام روفيدة]

أم اجنادين الحمد لله على كل حال وربي ايسهل لكم اموركم ويرزقكم من حيث لا تحتسبون اللهم ااامين ونورتي التجمع من جديد وليك وحشة

[ام روفيدة]

أم ورد وام معاد ما شاء الله تبارك الله عليكم ديمة امنورات التجمع ربي يحفظكم

[ام روفيدة]

http://forum.hwaml.com/imgcache2/hwaml.com_1336056732_550.jpg (http://www.hwaml.com/up/)

[ام روفيدة]

من منكم صلت الفجر حاضرا اليوم ؟

من منكم قرأت حرفا من كتاب الله ؟

من منكم قرأت ادكار الصباح والمساء اليوم ؟

من منكم صلت النوافل اليوم ؟

من منكم صائمة اليوم ؟

من منكم امرت بمعروف او نهت عن منكر اليوم ؟

من منكم تحرت الصدق في اقوالها اليوم ؟

من منكم قرأت شيئا من العلوم الشرعية اليوم ؟

من منكم اكثرت من دكر الواحد القهار اليوم ؟

من منكم اكثرت من الاستغفار اليوم ؟

وغيرها وغيرها من الاعمال الصالحة التي لاتعد ولا تحصى فحاسبوا انفسكم قبل ان تحاسبوا فكل يوم يمضي يدني من القبر

ملاحظة : الاسئلة المدكورة للتدكير فقط وليست للإطلاع على أعمال الغير وهدانا الله واياكم سواء السبيل ويسر لنا سبل الهدى اللهم ااامين

[ام معاد]

هلا ام روفيدة كيف حالك وحال حزومي قبل نبي نهدرز عليك لاكن زوزي قاعد وتوا طالعة بوسي حزووووومي

[ام روفيدة]

س: المسافر الذي نزل عند ناس وهو مسافر ووجدهم يصلون العصر, صلوا ركعتين, دخل معهم في الركعتين, هل يسلم أم يكمل؟
ج: بل يكمل, المسافر إذا دخل مع المقيمين تكون صلاته صلاة مقيمين ما أدركه يصليه وما فاته يقضيه .

المسافر إذا اقتضى بإمام مقيم يكمل معه الصلاة | موقع معالي الشيخ صالح اللحيدان (http://lohaidan.af.org.sa/node/222)

[ام روفيدة]

س: هل يجوز أن أبيع الملابس التي عليها صور حيوانيات كقطط وغيرها وهي لا تلبس إلا في المنزل؟.
ج: نصيحتي للتجار عمومًا في المغرب وفي غير المغرب أن لا يتعاملوا في استيراد الملابس التي فيها صور, لأن أصل هذه الصور ليست فوتوغرافية حتى يقال إن هذه حبس ظل وإنما هي صورة حقيقية مصنعة عن طريق الجهات التي نَسجت أو صَبغ، فهذه من الصور, فينبغي للتاجر أن يترك التعامل مع الشركة التي تُنتج أقمشة وملابس تحمل هذه الصور, والشركات التجارية إنما تخضع لرغبات التجار والمستوردين والموزعين, النبي صلى الله عليه وسلم أخبر أن الملائكة لا تدخل بيتًا فيه كلب ولا صورة, ولا شك أن هذه الصور داخلة في هذا المعنى،ليست كالصور التي تكون في صحيفة فوتوغرافية, لكن هذه ما بين أن تكون نسيج وإما أن تكون صبغة حصلت تصنيع, فينبغي للتاجر أن يتجنبها, إذا امتهنت وصارت ممتهنة, لا أقول إن هذا مالٌ يُضاع لكن ينبغي أن نحتاط في الأصل، أن لا نستورد إلا ما لا يرفضه ديننا وأدب إسلامنا, وكونها لا تُلبس إلا داخل المنزل ليس التحريم لأن محلات اللبس تختلف, مادام أن الملائكة لا تدخل البيت الذي فيه صورة فالملابس التي تكون عليها هذه الصور تكون من أسباب عدم دخول الملائكة, وبالتالي تكون من سبب في إيواء الشياطين في المنزل فينبغي للمسلم أن يلاحظ ذلك, والله أعلم .

لا يجوز لبس الملابس التي بها صور داخل البيت وخارجه | موقع معالي الشيخ صالح اللحيدان (http://lohaidan.af.org.sa/node/220)

[ام روفيدة]

س: كنت طالبًا في أحدى الجامعات هنا في السعودية وتركت الجامعة وحصلت على الوظيفة ولم آخذ أوراقي من الجامعة ومضى على ذلك وقت من الزمن, هو إشكالية الأخ يقول: إنه في المكافآت التي صرفت له خلال شهرين خرج فيها من الجامعة, كان معه بطاقة صراف وتصرف له من الجامعة, يسأل عن المكافأة لمدة شهرين؟.
ج: هو يعرف ويعلم أن المكافآت والمرتبات إنما هي مقابل عمل يقوم به الإنسان،فإذا ترك العمل فما يقبضه على حساب أنه قائم بذلك العمل دراسة أو تدريسا أو غير ذلك فإنه مبلغ أو كسب لا يحل له, وينبغي أن يبادر الواحد, وإذا خاف أو كره أو استحيا فالنظام الذي يرد إلى بيت المال, ما أخذ منه يرده ولا يحتاج أن يخبرهم من هو, الله يعلم صدق من يعيد شيء كان دخل عليه بدون حق أن يتبرأ منه مادام أنه لبيت المال فرجوعه إلى بيت المال أرجو أنه يكفر ما عليهم في هذا الشأن .

تجنب الشبهات وتحري الحلال في المال | موقع معالي الشيخ صالح اللحيدان (http://lohaidan.af.org.sa/node/215)

[ام روفيدة]

س: سائلة تسأل وتقول إن امرأة تعدى عليها زوجها ضربًا فذهبت إلى أهلها وطلبت الطلاق ولكن والدها أخذ يماطل في هذا الأمر ولم يخبروا زوجها بهذا الطلب ومكثت عند أهلها (9) أشهر كانت تخرج من بيت أهلها لقضاء حوائجها، وتسافر مع أهلها دون إذنه هل كانت آثمة في فعلها؟.
ج: سفرها من دون إذنه أرجو أن يكون لا حرج فيه إن كان صح أنه ضربها ضربًا لا يليق، نعم الضرب جاء في القرآن الكريم في قول الله جلَّ وعلا: (وَاللاَّتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ) لكنه الضرب الذي لا يشق جلدًا ولا يكسر عظمًا ولا يسبب مرضًا ثم إن النبي صلى الله عليه وسلم نهى أن يأتي الرجل فيضرب زوجه بدون سبب،العرب يتمدحون بإكرام الزوجات وعدم إهانتهن؛ بل العرب سابقون لمن يزعمون أنهم أعطوا المرأة حقها في جاهليتهم سابقون لهم، وأما في الإسلام فلا تقارن العلاقة علاقة الرجال بالنساء لا تقارن بما كانت عليه الحال في سائر بقاع الدنيا في السابق والله المستعان، ونصيحتي لهذه المرأة أن تتراجع عن غضبها، وأن تراجع زوجها، وأن تحرص على لم الشمل والتودد له لعل الله جلَّ وعلا أن يجعل مستقبلها ومستقبله خير مما كانوا عليه في السابق .

ضوابط إباحة ضرب الزوجات الناشزات | موقع معالي الشيخ صالح اللحيدان (http://lohaidan.af.org.sa/node/214)

[ام روفيدة]

س: سائل يقول نسمع بعض الناس عند دخول شهر رجب يقولون: ((اللهم بارك لنا في رجب وشعبان وبلغنا رمضان)) نسأل الله أن يبلغنا.وإياكم شهر رمضان! هل هذه المقولة صحيحة وهل للإنسان أن يدعوا بها؟.
ج: هي لم تثبت عن النبي صلى الله عليه وسلم مرفوعة ولكنها لا حرج في ذلك أن النبي صلى الله عليه وسلم يكثر الصيام في شعبان فسئل فقال: " إنه شهر يغفل الناس عنه بين رجب ورمضان" فأصح ما قيل في رجب هو هذا الحديث رجب لاشك من الأشهر الحرم وهو الذي يسميه العرب رجب مضر؛ لأن مضر يعظمونه أكثر مما يعظمون الأشهر الثلاثة؛ ولهذا إذا دخل رجب انتهت وسائل الحرب وسار الناس في جزيرة العرب من أقصاها إلى أدناها لا يخافون أحد حتى قال ذلك الشاعر أظن سبق وأنشدته في مثل هذا موقف لكنه شاقه أن قيل ذا رجب ياليت عدة حول كله رجب يريد أن ينتقل ليرى معشوقته في الجاهلية في شهر رجب ووفد عبد القيس قالوا للنبي صلى الله عليه وسلم إنا لا نصل إليك بسابق كفار مضر إلا في شهر رجب لأن شهر رجب يقفون؛ ولهذا من الأمثلة العامية عندنا في جزيرة العرب البر برجب، أي بر الخيل والعناية بها إنما يعتني بها بشهر رجب لأنه ليس في أيام طراد وحرب، ويقول ما ينفع البر نهار الغارة يعني ما ينفع بر الخيل إذا كان في وقت إغارة ما بين الأعزاء والأصدقاء قصدي أن رجب استمرت له خاصيته لكنه في أمر الشرع رجب كغيره من الأشهر الحرم، والله المستعان ..

ما صحة ما يقال: من دعاء في غرة رجب | موقع معالي الشيخ صالح اللحيدان (http://lohaidan.af.org.sa/node/201)

[ام روفيدة]

س: هل تسقط تحية المسجد، والإمام على المنبر؟.
ج: لا يسقط تحية المسجد تصلى والإمام يخطب،دخل رجل دخل والنبي صلى الله عليه وسلم يخطب فجلس، فقال "صليت ركعتين؟ فقال: لا. قال: قم صل فصلي ركعتين" فالقول الراجح عند أهل العلم أن من دخل والإمام يخطب عليه أن يصلي ركعتين قبل أن يجلس .

تشرع صلاة تحية المسجد والإمام يخطب | موقع معالي الشيخ صالح اللحيدان (http://lohaidan.af.org.sa/node/200)

[ام روفيدة]

وينكم يا عويلة شكلكم امقيلين نوووووووووووووم العوافي

اهلين ام معاد كيف حالك وكيف حال عبدوا وماريا وبوستك لحزومي رح توصل ان شاء الله غير توا راقد

يقوووووووووووووووووووووونة المزيووووونة وينك غايبة ليك فترة يارب امورك اتكون تمام وفروتي وبوها والبيبي بخير ونعمة اللهم ااامين [/color][/size]

[ام روفيدة]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟

[ليبياقلبي]

يسعد مساكم حبوبات ام حزمومي شن اخبارك انت والبيبي

[ام روفيدة]

أهلين ليبيا قلبي كيف حالك وحال نوزة السنفورة اني والبيبي بخير ونعمة ولله الحمد كيف حال حناك توا ؟إن شاء الله امورها طيبة

[أم ورد]

السلام عليكم كيف حالكم اليوم
أم روفيدة كيف حالك وكيف حال حزومي وبوه والبيبي
أم نوزة كيف حالك وكيف حال نوزة وكيف حال حناك توى ربي اينوضها بالسلامة يارب

[ام روفيدة]

السلام عليكم ورحمة الله وبركاته

صباح الخير على الحلوين وكيف حالكم اليوم ؟

صليت الفجر وحبيت انصبح عليكم وبنقعد نايضة عندي واجب بنكتبه وعندي شغل في الخياطة تبيه الابلة اليوم بنتمه وبنحدد السورية البيضة الطويلة لأبوا حازم وبنرجع نرقد بعدها إلى الساعة 11:30 بنوض نفطر اني وحزومي وينوتيه باش لما اتجي الساعة 1 نمشوا وهو هدا بداية يومي اليوم وبعد ما انروح الله اعلم شنو فيه المهم حبيت اندكركم راكم تنسوا باش تقروا سورة الكهف وتكثروا من الصلاة على الرسول محمد صلى الله عليه وسلم وما تنسوش الدعاء في الساعة الاخيرة قبل المغرب وما تنسوناش من دعائكم ونهار سعيد للجميع والسلام عليكم ورحمة الله وبركاته

[ام روفيدة]

يا اخواتي تحدير هام جدا ارجوا النشر



http://forum.hwaml.com/imgcache2/hwaml.com_1336111599_618.jpg (http://www.hwaml.com/up/)

[احلى وردة]

دعاء في يوم الجمعه..



لاإله إلا الله الملك الحق المبين

لا إله إلا الله العدل اليقين

لا إله إلا الله ربنا ورب آبائنا الأولين

سبحانك إني كنت من الظالمين

لا إله إلا الله وحده لا شريك له

له الملك و الحمد يحي ويميت وهو حي لا يموت بيده الخير وإليه المصير

وهو على كل شيء قدير.

لا إله إلا الله إقرارا بربو بيتة

سبحان الله خضوعا لعظمته

اللهم يا نور السماوات و الأرض ، يا عماد السماوات والأرض ، يا جبار
السماوات والأرض ، يا ديان السماوات والأرض ، يا وارث السماوات والأرض
، يا مالك السماوات والأرض ، يا عظيم السماوات والأرض ، يا عالم
السماوات والأرض ، يا قيوم السماوات والأرض ، يا رحمن الدنيا
ورحيم
الآخرة .

اللهم إني أسألك ، أن لك الحمد ، لا إله إلا أنت الحنان
المنان ، بديع
السماوات و الأرض ، ذو الجلال و الإكرام ، برحمتك يا أرحم الراحمين .

بسم الله أصبحنا و أمسينا أشهد أن لا إله إلا الله و أن محمد رسول
الله ، وأن الجنة حق ، والنار حق ، وأن الساعة آتية لا ريب فيها ،

و أن الله يبعث من في القبور . الحمد لله الذي لا يرجى إلا فضله ، ولا
رازق غيره .

الله أكبر ليس كمثله شيء في الأرض و لا في السماء وهو السميع البصير.

اللهم إني أسألك في صلاتي ودعائي . بركة تطهر بها قلبي، وتكشف بها
كربي ، وتغفر بها ذنبي ، وتصلح بها أمري ، وتغني بها فقري ، وتذهب بها
شري ، وتكشف بها همي وغمي، وتشفي بها سقمي ، وتقضي بها ديني، وتجلو
> >>بها حزني ، وتجمع بها شملي ، وتبيض بها وجهي.

يا أرحم الراحمين




اللهم إليك مددت يدي، وفيما عندك عظمت رغبتي. فأقبل توبتي، وأرحم ضعف
قوتي، وأغفر خطيئتي، وأقبل معذرتي، وأجعل لي من كل خير نصيبا ، والى
كل خير سبيلا برحمتك يا أرحم الراحمين .

اللهم لا هادى لمن أضللت ، ولا معطى لما منعت ، ولا مانع لما أعطيت ،
ولا باسط لما قبضت ، ولا مقدم لما أخرت ، ولا مؤخر لما قدمت .

اللهم أنت الحليم فلا تعجل ، وأنت الجواد فلا تبخل ، وأنت العزيز فلا
تذل ، وأنت المنيع فلا ترام ، وأنت المجير فلا تضام ، و أنت

على كل شيء
قدير.

اللهم لا تحرم سعة رحمتك ، وسبوغ نعمتك ، وشمول عافيتك ، وجزيل عطائك
، و لا تمنع عنى مواهبك لسوء ما عندي ، ولا تجازني بقبيح عملي، ولا
تصرف وجهك الكريم عنى برحمتك يا أرحم الراحمين .

اللهم لا تحرمني وأنا أدعوك … ولا تخيبني و أنا أرجوك

اللهم إني أسألك يا فارج الهم ، و يا كاشف الغم ، يا مجيب دعوة
المضطرين ، يا رحمن الدنيا ، يا رحيم الآخرة ، أرحمني برحمتك .

اللهم لك أسلمت، وبك آمنت، وعليك توكلت ، وبك خاصمت وإليك حاكمت ،
فاغفر لى ما قدمت و ما أخرت ، وما أسررت وما أعلنت ، وأنت المقدم وأنت
المؤخر . لا إله إلا أنت الأول والأخر والظاهر و الباطن ، عليك توكلت
، وأنت رب العرش العظيم .




اللهم آت نفسي تقواها ، وزكها يا خير من زكاها ، أنت وليها و
مولاها
يا رب العالمين اللهم إني أسألك مسألة البائس الفقير- وأدعوك دعاء
المفتقر الذليل، لا تجعلني بدعائك رب شقيا ، وكن بي رءوفا رحيما يا
خير المئولين ، يا أكرم المعطين، يا رب العالمين .

اللهم رب جبريل وميكائيل و أسرافيل وعزرائيل، أعصمني من فتن الدنيا و
وفقني لما تحب و ترضى ، وثبتني بالقول الثابت في الحياة
الدنيا وفي
الآخرة – ولا تضلني بعد أن هديتني وكن لي عونا ومعينا ، وحافظا و
ناصرا.

آمين يا رب العالمين

اللهم أستر عورتي و أقبل عثرتي، و أحفظنى من بين يدي و من خلفي ، وعن
يميني و عن شمالي ، ومن فوقي ومن تحتي ، ولا تجعلني من الغافلين اللهم
إني أسألك الصبر عند القضاء ، و منازل الشهداء ، و عيش السعداء ، و
النصر على الأعداء ، و مرافقة الأنبياء، يا رب العالمين

امين يا ارحم الراحميين.اخواتي ارجو من كل من يقرا هذا الدعاء ان
يبلغه عنا و لو لاحد فقط و والله ان الله لا يضيع اجر المحسنين و
سيكون هذا الدعاء باذن الله حجة لنا يوم القيامة لا حجة علينا باذن الله تعالى

اسال الله ان يوفقنا لما يحبه و يرضاه و جزاكم الله كل خير

[ام معاد]

يا اخواتي تحدير هام جدا ارجوا النشر



http://forum.hwaml.com/imgcache2/hwaml.com_1336111599_618.jpg (http://www.hwaml.com/up/)
نسال الله العفو والعافية والله البلاد هاالايام وضعها بكل امس في الليل نضنا مخلوعين اني وزوزي لدي يعيط خايف علي صوت مدافع معرفناشي وين الساعة 2 ونص في الليل ويوم التلاتاء اطلعت امدايرة روحي بندهور القينا الدنيا رابخة فيه راجل قعد يقول لزوزي شن جايبك هني انت والصغار ولي بيهم وروحنا للحوش الله المستعان وخلاص رب يستر عليها بلادن ويصلح الاحوال يارب

[أم ورد]

السلام عليكم
كيف حالكم اليوم

[أم ورد]

أم روفيدة كيف حالك وكيف حال عويلتك وبارك الله فيك على التحذير
أم معاذ كيف حالك وكيف حال عويلتك والله البارح صارلي نفس الشيئ نسمع في رصاص قوي و14.5 قوية وفي الأخير طلع عرس
ربي ايهني البلاد ويهدي العباد

[سوسهs]

نورونا يا الغالية بهل الضيافه

http://forum.hwaml.com/t110354.html (http://forum.hwaml.com/t110354.html)



تقبلو مودتي سوسه

[أم أجنادين 80]

مساء الخير

[أم أجنادين 80]

كيف حالكم ومن موجوده

[ليبياقلبي]

مساء الخيرات

[أم ورد]

السلام عليكم ورحمة الله وبركاته
كيف حالكم اليوم

[أم سعد]

وعليكم السلام

كيف حال ام ورد

[أم ورد]

أهلين أم سعد وميار كيف حالك وكيف حال السنافر

[أم سعد]

الحمد لله تمام ... أهو مهبليني مش مخلييني ندير شششششششششششيييييييييييييييييييي

[أم سعد]

شن غداك؟؟؟

[أم ورد]

ربي يحفظهم

[أم سعد]

سلمك ويحفظلك صحيحتك

[أم ورد]

سلمك
شن امدايرة غداك

[أم سعد]

رز مسقي وانتي؟

[أم ورد]

قلوب عند بعضها حتى أني رز إمسقي
صحتين

[حبل الوصل]

السلام عليكم كيف حالكم كلكم وكيف حال عويلتكم والله خاطري نهدرز معاكم لكن من بعد ماجبت شذى وقتى كله مش فاضي بسلامتهم الصغار مدرسة وهيا مش مخليتنى شن اندير

[ليبياقلبي]

ههههههههههههههههههههههههلا ام ام ورد وام سعودي شن حال ميورة واهلين حبل الوصل ربي يخلهولك شدى

[ليبياقلبي]

قوللي نبي نمشي اسبوع لتركيا مني منكم ماشيلها واعطوني تقصيل تام عليها احلى فنادقها مناطقها

[أم أجنادين 80]

مساء الخير
كيف حالك ليبيا قلبي وام ورد وحبل الوصل وام ورد

[أم أجنادين 80]

حتي انا خاطري نمشيلها بس لما تكون الظروف مناسبة
ان شاء الله تمشي وتجي تحكيلنا ام نوزة

[أم ورد]

السلام عليكم
أم أجنادين كيف حالك اليوم

[أم أجنادين 80]

اهلين ام ورد انا الحمد لله وانتي

[أم ورد]

الحمد لله حال الكساد بنطير خخخخخخخ

[أم أجنادين 80]

صح كساد
وين باقي البنات
لاحظت يقين وام وسن ومعادش مبينات ان شاء الله المانع خير
وحتي ميمونة وتمر حنه ومتفائلة وآية

[أم ورد]

و الله مش عارفة خيرهم إن شاء الله المانع خير

[ليبياقلبي]

مشكورة ام اجنادين شن اخبارك انت

[ليبياقلبي]

خيرا راح كساد

[رغوده2006]

صباح الخير ياخميرات النوم

[رغوده2006]

وينكم العفو هدا كله نووووووووووووووم اخص

[أم ورد]

السلام عليكم
كيف حالكم يا حلوات يا مكسدات
وينكم اليوم

[أم أجنادين 80]

وينكم اليوم

[poucie]

صبــــــــــــــــــــــــــــــــــــــاح الخير
والله ليكم وحشة

[poucie]

كيف حالكم كلكم ان شاء الله الكل بخير

[أم ورد]

السلام عليكم
صباح الخيرات والوردات
كيف حالكم اليوم

[أم ورد]

رغووودة _ يقونة _ زهيرة _ عيون _ شموسة _ سورينام _ أم وسونة _ ميمونة _ سوسو _ أم نوزة _ أم روفيدة _ أم سعد

كيف حالكم وليكم وحشة وطولتوا الغيبة

[رغوده2006]

صباح الخير

[أم ورد]

صباح النور كيف حالك رغودة وكيف حال السنافر

[رغوده2006]

ام عبدالله فاولتلك ياام ورد ان شاءالله تجيبي وليد وتسميه عبدالله ياااااااارب كيف حالك وحال عويلتك ومولاى بيتك ان شاءالله كويسين ومن اليوم بناديك ام عبدالله راهو

[رغوده2006]

والله الا في نعمه يا ام عبدالله كيف حال ام عبدالرحمن وصغارها

[رغوده2006]

ام عبدالله وين غاطسه تي تعالي جاي لا انجيك نحارفلك بختك هههههه حقه نسيت وين الفراشيه يامقلبه ههههههههه

[أم ورد]

اللهم أمين يارب عادي ولا ايهمك مش مشكلة
والله الحمد لله حال الكساد وأم عبد الرحمن حالها باهي لكن أمس ما تلقيناش

[أم ورد]

تي قاعدة متفكرتيها ههههههههههههههههه
بعدين تعالي جاي يومتها استنيتك نبيك تحكيلي شن صاير بين الزنتان والرياينة منعتي خخخخخخخخخخ

[رغوده2006]

خيره المنتدى امكسد العفو

[رغوده2006]

ياحنه بنت الحن جماعة الزنتان وين ما ايكسدوا ينوضوا يضربوا بالجراد يخوفوا في الرياينه والله المره هلي فاتت طاح جهة الكاف جنب شيابيني هي الحكايه بدت لعب الباين ( شن درنالهم ياحبيبتي رعشونا) ههههههه

[رغوده2006]

تي قاعدة متفكرتيها ههههههههههههههههه
بعدين تعالي جاي يومتها استنيتك نبيك تحكيلي شن صاير بين الزنتان والرياينة منعتي خخخخخخخخخخ
هديكه الفرراشيه الباهية تنتسى بكل ياغبينتي عليها هئ هئ هئ هئ ربي يصبرني عالفراقها هههههههههه

[أم ورد]

ههههههههههههههههههه معليشي يا حبيبتي الله غالب يا حبيبتي هههههههههه

[رغوده2006]

ام عبدالله تي وينك عاد هيا تعالي عالقريب اررررروح

[أم ورد]

ههههههههههههه شن بنديرلك جبتلك وحدة في مكانها ما تبيش تاخذيها خخخخخخخخخخ

[أم ورد]

تي قاعدة ما تشوفيش فيا هكي كبري

[رغوده2006]

ههههههههههههههههههه معليشي يا حبيبتي الله غالب يا حبيبتي هههههههههه
الله غالب زي ماقلتي واخلاص وبعدين شنو يضحك فيك ياخاينه زي ماقالت اختك هههههه

[أم ورد]

ياحنه بنت الحن جماعة الزنتان وين ما ايكسدوا ينوضوا يضربوا بالجراد يخوفوا في الرياينه والله المره هلي فاتت طاح جهة الكاف جنب شيابيني هي الحكايه بدت لعب الباين ( شن درنالهم ياحبيبتي رعشونا) ههههههههذي إلي ضحكتني
بعدين أني مش راضية علي إيديروا فيه الزنتان في الناس

[رغوده2006]

ام عبدالله شنو فطرتي وشنو درتي غداك بسرعه جاوبي لا انجيك نهارك احرف عالراسك ههههههههه

[أم ورد]

لالالالا ما يساعدش توى انكلمهم انقوللهم يبعتولك إنتي صاروخ جراد
اليوم من الصبح بتحرفيلي بختي ونهاري هههههههههههههههه
الفطور فطرت زبادي بس والغدي رز مخلط بالخضرة ولحم مفروم
وإنتي شن فطورك وشن غداك بسرعة أحسن ما نبعتلك صاروخ بسرعة خخخخخخخخخخخخ

[رغوده2006]

هذي إلي ضحكتني [/color][/size]
بعدين أني مش راضية علي إيديروا فيه الزنتان في الناس

الله يرحم ولديك عالكلام الحق بارك الله فيك مع احترامي ليك ولاختك الزنتان داروا العار في الاول والله الا كانوا رجاله ونص وبعدين بسلوها بدت لعب صغار ربي يهديهم واخلاص

[أم ورد]

وفيك بارك الله هذا كلام حق يارغوودة والحق مايزعل حد

[رغوده2006]

لالالالا ما يساعدش توى انكلمهم انقوللهم يبعتولك إنتي صاروخ جراد
اليوم من الصبح بتحرفيلي بختي ونهاري هههههههههههههههه
الفطور فطرت زبادي بس والغدي رز مخلط بالخضرة ولحم مفروم
وإنتي شن فطورك وشن غداك بسرعة أحسن ما نبعتلك صاروخ بسرعة خخخخخخخخخخخخ
تربحي لاااااااااااااا ايديروها راهو انقول انقول
افففففطرت طررررفين ككككيكه تهبل بكريم شانتي وقهوه وبعدها بشوي خديت طرفين بسكويت وتفاحه ونص موزه وانجاصه جنبي انفكر ناكله والا لا هي والعصير والغداء كب ايام هلي باله فيه هههههههههههه واحتمال بكبوكي

[رغوده2006]

ام عبدالله يهبل رز مخلط نحبه انموت فيه وصحتين عالقليبك ان شاااااءالله

[رغوده2006]

ام عبدالله زوزك شنو يخدم قصقصه ههههههههه من هالكساد

[أم ورد]

ههههههههههههههه والله ضحكتيني ههههههههههه
صحتين فطورك وغداك

[رغوده2006]

ام عبدالله تي وينك فدتيني راهو تعالي هدرزي علي شويه بس

[أم ورد]

الله ايسلمك
زوجي مدرس لغة عربية وإمام مسجد ومدرس قرآن وخطيب جمعة

[رغوده2006]

الله يسلمك يا سمحه

[رغوده2006]

الله ايسلمك
زوجي مدرس لغة عربية وإمام مسجد ومدرس قرآن وخطيب جمعة
ماشاءالله تبارك الرحمن ربي يحفظهولك يااااارب ويرزكم بالذريه الصالحه ويطلعوا زي بوهم وزيك يااااااارب (الباين قاري القرايات الكل قالت التونسيه) هههههه

[رغوده2006]

اممممممممممممممم عبدالله وينك عاد اووووووووووه

[أم ورد]

ماشاءالله تبارك الرحمن ربي يحفظهولك يااااارب ويرزكم بالذريه الصالحه ويطلعوا زي بوهم وزيك يااااااارب (الباين قاري القرايات الكل قالت التونسيه) هههههه
الله ايسلمك ويبارك فيك
وين إلقيتيها التونسية هذي خخخخخخخخخخخخ
قوليلي كيف حالها أمك توى

[أم ورد]

توى إشبح عاد هي تي وينك وين مشيتي

[رغوده2006]

امي والله الا احسن شويه لكن رجليها امتعبينها هلللللبه ماهو امدايره عليهم عمليه ومركبه فيهم بلاتين الحمد لله على كل حال

[أم ورد]

ربي يشفيها يارب

[رغوده2006]

هيا سلامتك توه امروحه ونتلاقوا عالخير وبالله عليك سامحيني لو زعلتي مني (ام عبدالله وين مشيتي ياخنابة فراشيتي )ههههههههههه

[أم ورد]

لا والله علاش بنزعل منك وشن ديرتيلي بالعكس إنتي زي أوخيتي
توصلي بالسلامة

[عيون زوجي]

السلام عليكم ورحمة الله

كيف حالكم يا غاليااات

انا قعده ونخش مرة مرة ومايصادف ولا وحده موجودة وكساد نضطر نخش عالفيس ونطلع من التجمع

بوسي يا احبيبه كيف حالك وحال بنياتك ووينك هالمده كلها ان شاءالله خيرررر وتوا حامل ولا راحااات


رغووودة كيف حالك وحال بنياتك واحمد وحال الخدمه معاك هالفراشيه درهتيلنا بيها الكبد نشرولك عبايه بالكريستال بدلها شنو رايك وتنسي هالفراشيه نهائي اخخخخخخخخخخخخ


ام ورد كيف حالك وصحه غداك وربي يعقد عسلك انتي والشيخ ويخليهولك ويرزقكم الذريه الصالحه


ام معاد وينك انتي والصغار تعالوا هدرزوا عندنا انا وصغاري مدايرين جنان وغرسنا محابس بالورد والقرنفل يهبل جو العشيه برا تعالولنا


سورينااام وينك من يوم ما هدرزت عليك عالفيس اختفيتي العفو ان شاءالله خيرررر يومها زوزك كان في مصراته وانتي بتمشي حوش بوك شنو صار معاك وكيف حال سارة وفراس ونور وابوهم وامك توا شنو اخبارها


ام روفيدة يا احلى فراشه من الرفقه الصالحه كيف حالك وحال حزومي وحال الحمل والريجيم المستمر وحال بريطانيا وشنو اخر اخبارك يا سمحه؟؟


حبل الوصل ماشاءالله عليها شذى مازالت احلى من اخلاص ربي يخليهملك وكل عام تحملي وتجيبي لين زوزك يلزك من الصغار هههههههههه انبصر اعليك ماشاءالله عليهم بنياتك وخوهم وربي يهنيكم ويسهل اعليك تعبك وراهم


ام سعد كيف حال ميار وسعد توا وشنو الجو عندك وسافرتي تونس ولا لغيتيها السفره


ميرنا وين اختفيتي يا ام عمر غير تعالي جاي وشريتي الميك اب ولا شنو


زهووورة روحتي من مصر ولا مازال هيا تعالي نبوا عصيده انس السموووح ويارب ترجعي بالسلامه


شموووسه كيف حالك يا غاليه وشنو اخبار الحمل والوليد الجاي وحال شمس وحال الصينيين معااااك


ام ناريز ماشاءالله ناويين على تركيا تمشوا وتجوا بالسلامه ونصيحه بروا هالشهر لان شهر 6 و 7 نو وسخونيه هلبه غادي


ام وسن كيف حالك وحال وسووونه ووينك ماعادي اتنوري تعالي هدرزي علينا يا باش مهندسه


ميمووونه ماشاءالله منورة الفيس وغياااب هني خلي نحفرلك المهم يارب تحملي الشهر الجاي وتبشرينا

يقين ياغاليه وينك ان شاءالله خيررر ليك هلبه هلبه متغيبه كيف حالك وحال فرووتي تعالي طمنينا اعليك


سالي بالله لو كنتي اتخشي وتلصلصي وتتطلعي اكتبيلنا شنو اخبارك وطمنينا عالبيبيز ياغاليه

لو نسيت اي وحدة سامحوني العتب عالعمر ..هرمنا...

[عيون زوجي]

http://forum.hwaml.com/imgcache2/hwaml.com_1336400380_801.jpg

[عيون زوجي]

نستأذنكم توا توا............................

[أم ورد]

السلام عليكم
عيون كيف حالك وكيف حال عويلتك
وبارك الله فيك على الدعوة

[أم ورد]

نستأذن شوية وراجعة

[ليبياقلبي]

سسسسسسسسسسسسسسسسسسسسسلامات رغودة وام ورد وعيون شن اخباركم

[عيون زوجي]

هلا ام ورد

هلا نوووووووووووور

[أم ورد]

السلام عليكم

[أم ورد]

أم نوزة كيف حالك وكيف حال نوزة وكيف حال حناك
عيون تعالي قوليلي شن ديرتي غداك وشن بديري عشاك ؟

[أم سعد]

السلام عليكم

كيف حالكم جميعا؟؟

[أم ورد]

وعليكم السلام
أهلين أم سعد كيف الحال

[أم سعد]

أهلين أم ورد كيف الحال؟؟

سمعت راجلك ماشاء الله خطيب جمعة ... في أي جامع؟؟؟

[أم ورد]

الحمد لله
زوجي في مسجد عمر بن الخطاب إلي في طريق المطار في شارع ولي العهد

[أم سعد]

ربي يفتحها عليك وعليه

وربي يعينه ...مسئولية

وفي أي مدرسة يقري؟؟



وحدة قصقاصة :)

[أم ورد]

في مدرسة الشهيد (الإتحاد الإفريقي سابقا ) في غرغور

[أم سعد]

باهي توا شن تغديتي وشن بتتعشي

[أم ورد]

تغديت يا حنة رز مخلط بالخضرة والمفروم
والعش مازال في علم الغيب مش معروف
وإنتي

[أم سعد]

أنا تغديت بكبوكي .. وعشاي الله أعلم

قوليلي شني بديري بالك ندير زيك

[أم سعد]

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟

[أم ورد]

سامحيني أم سعد طلعت فجأة
العشي ديرت توست تن وجبنة وعصير
هيا توى سلام نتلاقوا على خير

[عيون زوجي]

السلام عليكم

ام ورد شن الجو وصحه عشاك

ام سعد كيف حالك وحال الصغار وصحه البكبوكي

انا اليوم راحات من الكوجينه فطرت اماخر انا والصغار وطلعت العشيه لعبناهم في طريق الشط وجبنا معانا عشانا من المطعم رز وبورديم دجاج وسلايط

[أم أجنادين 80]

مساء الخيرات ,,,,

[ليبياقلبي]

ووووووووووووووووين يقونة اختفاء تام هي وايوتة وسوري

[أم سعد]

السلام عليكم

[عيون زوجي]

السلام عليكم

كيف حالكم اليووووووم وشنو اخباركم يا عويله؟؟؟

[سورينام]

السلام عليكم ,,,
كيف حالكم جميعا .. ان شاءالله ربي ايدوم عليكم الصحه ويعطيكم من وااااسع فضله...
أني حالي باهي وكنت غاطسه في الاعراس وزوزي رفع امه للعمره عقبالي وعقبالكم وكل من قال آآآآآمييييييييييييين واني طبعا صغاري سلامتهم صغيرين هلبا ما قدرتش نمشي معاهم قعدت في حوش بوي ووعدني السنه الجايه باذن الله نمشو كان اعطانا ربي عمر...
والاسبوعين قضيتهم ادهوير بالصغار وخلاص نسرفت بيهم لين كرهتهم في الطلوووووع ...
والله يا بنات ما في احلى من الاستقرار والقعاد في الحوش !! الحوش جنننننننننننننه جنه جنب العالم الخارجي والا احني بلادنا اعععععععع
المهم : درت صيانه لروحي خخخخخخخ قصيت شعري قصه حلللللللللللللوه وميشت ميش بلاتيني فوق لون شعري الاصلي طلع ايجنن مع القصه .. ودرت حنه منقرشه ومتسلقه هههههه اكيد فهمتوني!
اممممم وشن تاني::: شريت قفيطنات متاع حوش قصيرات ايهبلووووووو من سوق بوسليم ي 10 دينار بس مرسومات عالجسم رسم وخديت حوايج صيف للصغار ومداسات وخديت جراي لنور ودراجات لساره وفراس
ودرت كعك مالح ومقروض ايهبل للحجاج
وهاذي كل اخباري من غير ما اتقصقصو .. اكيد اشبعت فضولكم ههههههه

[عيون زوجي]

صحه صحه اللوك الجديد يا غاليه سورينام

ومبروك ما شريتي وتبيدي بالهني انتي والصغار

زوزك روح ولا مازال؟؟؟

وانتي لما زوزك مسافر منو ايطلع فيك ويدهور فيك ووين نسرفتي ؟؟؟


سبقتك وشريت لساره دراجه من شهرين تقريبا متاع عجلتنين وحمودي اعطيته دراجه سرو الاولى

والسي السيد زوزك شكلك خلالك تفتوفه فلوس وانتي دلعتي بيها روحيتك بالصحه وطولة العمر

انتي وين توا؟؟؟

في حوشك ولا حوش بوك؟؟

وكيف حالهم السنافر وخصوصا نووووور لانه ماعنديش طرف منها اخخخخخخ سارة وفراس عندي منهم ههههه


تعالي هدرزي اعليا اون لاين لو كنتي موجودة او خشي حدديلي ساعه معينه

[عيون زوجي]

انا مافهمتش نبي صورة للحنه المتسلقه اخخخخخخخخخخخخخخخخخخخ

[عيون زوجي]

http://forum.hwaml.com/imgcache2/hwaml.com_1336503582_758.jpg

[عيون زوجي]

مــــــــــساء الورد


http://forum.hwaml.com/imgcache2/hwaml.com_1336503654_410.jpg

[عيون زوجي]

http://forum.hwaml.com/imgcache2/hwaml.com_1336503748_125.jpg

[عيون زوجي]

http://forum.hwaml.com/imgcache2/hwaml.com_1336504308_230.jpg

[عيون زوجي]

http://forum.hwaml.com/imgcache2/hwaml.com_1336504325_702.jpg

[عيون زوجي]

http://forum.hwaml.com/imgcache2/hwaml.com_1336504364_296.jpg

[عيون زوجي]

http://forum.hwaml.com/imgcache2/hwaml.com_1336504397_828.jpg

[عيون زوجي]

http://forum.hwaml.com/imgcache2/hwaml.com_1336504432_777.jpg

[عيون زوجي]

http://forum.hwaml.com/imgcache2/hwaml.com_1336504463_139.jpg

[عيون زوجي]

http://forum.hwaml.com/imgcache2/hwaml.com_1336504492_828.jpg

[عيون زوجي]

http://forum.hwaml.com/imgcache2/hwaml.com_1336504542_170.jpg

[عيون زوجي]

شنو رايكم في فلاحتي؟؟؟؟؟؟؟

[عيون زوجي]

وضعكم في التجمع ميؤوس منه حاله وخلاص كساد والكل مهناااااش وينكم العفو
دلعناكم جبنالكم الحلو وقلنا الحلو للحلو شنو انتم شينات ولا فهمونا

[سورينام]

خخخخخخخخ شينات شينات واندرهو الكبد وبايراااات ...
كان هذا راهو جينا نتجارو في جرة هالحلو اللي يفتح النفس الله يفتح نفسك على كل خيييييييييييييييييييييير

[سورينام]

اسئلتك تو انجاوبك عليها حبيبيتي .. اني سامحوني والله وقتي محدوووووووود وبالذات لما روح راجلي ..
نبي نطمن على يقونه خيرها معاش خشت وأيوته وميمونه شن صار فيها وحنينه أم نوزه وكلللللللللللللللكم كلللكم يارب تكونو تمااااااام

[سورينام]

أم ورد وأم معاذ وأم حازم وشموسه ورغووده وزهره وسوسو وكل الغواااااااااااالي يارب اتكونو طيبين بخير

[ليبياقلبي]

شن اخباركم مبروك ماشيرتي وماسويتي لي سي السيد شن اخبارك سوري
عيون ايهبل الحلو

[سورينام]

صحه صحه اللوك الجديد يا غاليه سورينام

ومبروك ما شريتي وتبيدي بالهني انتي والصغار الله ايبارك فيك وايسلمك وايهنيكhwaml7

زوزك روح ولا مازال؟؟؟ روح بسلامتهhwaml16

وانتي لما زوزك مسافر منو ايطلع فيك ويدهور فيك ووين نسرفتي ؟؟؟ ايطلع فيا خوي ربي يحفضه ايموت في صغاري وهو عزري ربي ايفرحني بيه واندلع صغاره امين .. ونسرفت في كل مكان في المدينه مطاعم وجرادين ووصلت حتى للخمس والنقيزه ومشيت للبحر وركبنا السفينه في الميناء و.و.و.و..وقداش بنحكيلك .؟


سبقتك وشريت لساره دراجه من شهرين تقريبا متاع عجلتنين وحمودي اعطيته دراجه سرو الاولى حتى أني شريتلها متاع عجلتين مالتالي وفراس شريتله موطو على قده ايهببببل hwaml16


والسي السيد زوزك شكلك خلالك تفتوفه فلوس وانتي دلعتي بيها روحيتك بالصحه وطولة العمر الحمدلله واللي خلاهم صرفتهم كللللهم وخيتك ماتعرفش الدساااان ابدا ابداhwaml11

انتي وين توا؟؟؟

في حوشك ولا حوش بوك؟؟روحت لحويشي يا حبيبتيhwaml8

وكيف حالهم السنافر وخصوصا نووووور لانه ماعنديش طرف منها اخخخخخخ سارة وفراس عندي منهم ههههه ايسلم حالك يا عيوووني حالهم تمام ونور اتطلع في سنون مدهشتني شويه وان شاءالله عن قريب ايكون عندك الطرف اللي ناقصك وتمشي امورك والله عاااادي يا عيوني في دوره نور كبرت ماشاءالله عليها تجري في الجراي والليل ترقد وخف التعب هللللللباوبالكتير سنه ونرقدهم مع بعض في دارهم ونرجع لداري ونرتاح وفي الطلوع يقعدو عند امي ما يعرقلوش فيا وبالنسبه لقضيه الحوش بيهم والا بالهم ما اتمش والحمد للهhwaml12


تعالي هدرزي اعليا اون لاين لو كنتي موجودة او خشي حدديلي ساعه معينه
والله حتى اني مستاحشاااااااااااتك ونبي انهدرز معاك بصراحه لا يمل من اتهدريزك لكن اني وقتي ما ايخلينيش انحدد ساعه وبعدين نرخي بيك لا لا لا حليها عالصفه وحلاص رب صدفه خير من الف ميعاااد ... ههههههه
وقوليلي شن صار في شمال بنتك .. لوحتيه والا قاعد لاصق فيها .. اني بنحاول الصيف انحول شمال فراس وبوه قالي لا مازال الولد اصغير غير بتقعدي اتفشخي فيه ..قتله كان بنسمع كلامك الولد بيقعد للـ5 سنين بشمالهhwaml03 هههههه ما فيش حد امببي على صغاره زي راجلي ..hwaml02

[سورينام]

مرحبتين بأم نوووزه العسوووله .. كيف حالك وحال زوزك وبنوتك وحنونتك ان شاءالله روحت ؟؟

[سورينام]

نبي انحاول نرقد بكري بس عبس عبس لازم اتفوت الساعه 2 واني امفنصه لا حول ولا قوة الا بالله
والجوووووع ما نحكيلك عالجوووووووع الرضاعه امخليتني شرهان جاااااائع وماشاءالله كل ما كبرت كل مازااااد الجوووع الله المستعان

[ام معاد]

السلالالالالالالالالالالالالالالالالالالالام عليكم

[أم ورد]

السلام عليكم كيف حالكم اليوم

[أم ورد]

عيون كيف حالك وكيف حال السنافر إن شاء الله بخير
سورينام كيف حالك وكيف حال السنافر وحمد لله على سلامة زوجك وعزوزتك وربي يكتبلك إنك تمشيلها حتى أني عزوزتي ماشية يوم الجمعة بعد المغرب هي وسلفي وسلفتي وصغارهم وخالة سلفتي
أم نوزة كيف حالك وكيف حال نوزة وكيف حال حناك توى إن شاء الله أحسن
أم معاذ كيف حالك وكيف حال عبدو ميمي والدكتور

[ام معاد]

اهلين ام ورد اني الحمد لله وبالنسبة للصغار اكويسين وقعدة نجري في جرة عبدو علي الشمال الله يعين

[أم ورد]

ربي ايعاونك

[أم ورد]

قصـــــــــة وعبـــــــــــــــرة

يحكى أن إبنة عمربن عبد العزيز دخلت علية تبكى وكانت طفلة صغيرة آنذاك

وكان يوم عيد للمسلمين فسألها ماذا يبكيكى ؟

قالت : كل الأطفال يرتدون ثيابآ جديدة

وأنا إبنة أمير المؤمنين أرتدي ثوبآ قديمآ...

... فتأثر عمر لبكاءها وذهب إلى خازن بيت المال

وقال له :

أتأذن لى أن أصرف راتبى عن الشهر القادم...؟؟

فقال له الخازن ولما يا أمير المؤمنين ؟ فحكى له عمر ....

فقال له الخازن لامانع عندى يا أمير المؤمنين

و لكن بشرط

فقال عمر و ما هو هذا الشرط ؟؟

فقال الخازن أن تضمن لى أن تبقى حيآ حتى الشهر القادم

لتعمل بالأجر الذى تريد صرفه مسبقآ.

فتركه عمر وعاد إلى بيته فسأله أبناؤه ماذا فعلت

يا أبانا ....؟؟؟

قال : أتصبرون وندخل جميعآ الجنة أم لاتصبرون ويدخل أباكم النار ؟

قالوا نصبر يا أبانا

هذا هو عمر بن عبد العزيز خامس الخلفاء الراشدين

وحفيد الفاروق عمر بن الخطاب

عمربن عبد العزيز الذى فى عصره كانت ترعى الذئاب الغنم من عدله وعدالته ......

حقآ إذا صلح الراعى صلحت الرعيه

[زهرة2000]

السلام عليكم كيف حالكم كلكم وشكرا لكل من سال عليا انا حالى باهى الحمد لله لكن لهيت بالصغار شوى

[زهرة2000]

سورى كيف حالك والحمد لله ع سلامه زوزك والعمتك

[زهرة2000]

ام ورد اطلعى نشوف فيك راه
عيون شن اخبارك
هيا وينكم هدرزو عليا وينكم

[أم سعد]

بتجيني مرا ولتوا مازال ما خشت عليا كيف الحل ياناااااس

[اوشي]

السلام عليكم ورحمة الله وبركاته

[اوشي]

شفت دردشة حوامل ليبيا دخلت بتعرف عليكم بنيات بلادي

[أم ورد]

السلام عليكم
شلونك عساكم بخير

[اوشي]

ممكن تقبلوني معاكم في التجمع يا حلوات

[اوشي]

وين رحتو يا عسولات

[اوشي]

شكلي نغرق بروحي ..المهم انا جديدة عالمنتدى وحبيت نتعرف عليكم فرصة ثانية

[أم ورد]

عليكم السلام أختي أوشي مرحبتين بيك بينا عرفينا عليك
زهيرة أهو جيت وينك

[أم ورد]

أم سعد كيف حالك وكيف حال السنافر

[زهرة2000]

اهلين اختى اوشي عرفينا عليك
ام ورد شن اخبارك وانت واختك لولكم التجمع مسكر هههههههههههههه

[اوشي]

هيا ..اخيرا جيتو كيف حالكم

[اوشي]

انا من ليبيا

[أم ورد]

تعالي أهني وين كنتي امغيبة قاعدة في مصر ولا روحتي

[اوشي]

وينكم شكلكم تكتبو حرف والحرف الثاني ورا الصغار

[اوشي]

ماشي بنطلع وفرصة ثانية نلقاكم

[أم ورد]

أهلين بيك أوشي أنا أم ورد متزوجة وماعنديش صغار وأصلي زنتانية
وإنتي من وين متزوجة كم عندك عيل ؟
الله غالب هذا شعار التجمع امتاعنا القصقصة هههههههههههه

[اوشي]

طبعا لو ما قصقصتوش ما تقعدوش ليبيات

[أم ورد]

ههههههههههههه أكيد

[اوشي]

مرحبتين بيك ام ورد سعيدة بالتعرف عليك

انا عبيدية اصلي من طبرق ومتزوجة في شحات وعندي بنت و3 اولاد والخامس حشى عويناتك في الطريق

[اوشي]

سلمها الضحكة ان شاء الله دوم

انت من وين في ليبيا في الزنتان بروحها او لا

[اوشي]

وينك يا بطبوطة

[أم ورد]

بالجودة مرحبتين بعرب طبرق وشحات وربي إيخليلك عويلتك وينوضك بالسلامة

[زهرة2000]

ما شاء الله اوشى ربي يحفضهم انزيدك سؤال ههههههههههههه مواليد الكم

[اوشي]

انت بطيئة في الكتابة والا النت هو اللي بطيئ

[أم ورد]

سلمها الضحكة ان شاء الله دوم

انت من وين في ليبيا في الزنتان بروحها او لا
سلمك يارب
ما فهمتش سؤالك

[زهرة2000]

نعرفك بروحى متزوجه من اربع سنوات وعندى لين وانس من بنغازي

[أم سعد]

السلام عليكم

مرحبا أوشي نورتي التجمع وربي يحفظلك صغيويرتك

زهورة ... كيف حالك وشن آخر الأخبار عندك؟؟

أم ورد .. كيف حالك اليوم ؟؟

شن غداكم وعشاكم وغدي غدوة وعشاكم اخخخخخ

[اوشي]

بيك اجود يا ام ورد الله يسلمك

مرحبا اختي اختي زهرة ربي يحفظك ....مواليدي تقريبا نفسك

[أم سعد]

نعرفك حتى أنا بروحي

أم سعد ... مواليد 85 .. من مصراتة وعايشة في طرابلس .. متزوجة من سنتين وعندي سعد وميار ..

[أم سعد]

كان طلعت معناها المرا جتني

[أم ورد]

الحمد لله أم سعد
اليوم حداد على قولت يقونة الله يذكرها بالخير يعني الغدي ما طيبتش والعشي متعشية بره
وغدوة بندير بكبوكي الغدي والعشي مش عارفة

[اوشي]

نعرفك بروحى متزوجه من اربع سنوات وعندى لين وانس من بنغازي


مرحبا بعرب بنغازي امي بنغازينو يعني انت خالتي


اقتباس:
المشاركة الأصلية كتبت بواسطة اوشي
سلمها الضحكة ان شاء الله دوم

انت من وين في ليبيا في الزنتان بروحها او لا
سلمك يارب
ما فهمتش سؤالك


يعني قاعدة في الزنتان بروحها او في مدينة ثانية

[أم سعد]

صحتين ,, وشن عشوك اللي تعشيتي عندهم

[أم ورد]

مرحبا بعرب بنغازي امي بنغازينو يعني انت خالتي





يعني قاعدة في الزنتان بروحها او في مدينة ثانية
لا عايشة في طرابلس