دردشة بنات مصر , دردشة حوامل مصر , تجمع بنات مصر [الأرشيف] - الصفحة 88

ام انس المصريه

11-16-2011, 09:57 PM

طب منا يابت يارنا لا صعيديه ولا فلاحه ونفسى فى اورطة عيال يبقو عيله ولمه وعزوه

والنبى صلى الله عليه وسلم قال

تناكحو تناسلو تكثرو فاانى مباهى بكم الامم يوم القيامه

بس انا نفسى فى 6 عيال بسسس

تصدقو بالله واحده قريبتى مجوزه بعدى ب6 شهور بسم الله ماشاء الله حامل فى سادس عيل

يعنى بقالها 8 سنين مجوزه خلفت فيهم 6 عيال

عقبالى

om arwa

11-16-2011, 09:58 PM

سلاموز بقى

om arwa

11-16-2011, 09:59 PM

بالهنا يا نورا

ام انس المصريه

11-16-2011, 10:02 PM

بنت اخت جوزى كانت مجوزه 3 يوم العيد جايه هنا عندى حماتى اللى هى ستها تعيطططط

وعماد نزل جرى انا منزلتش ماليش دعوه

ربنا يسلم

somia

11-16-2011, 10:04 PM

نورا كنت كثير بدخل ما بلاقيش حد فاتعقدت

somia

11-16-2011, 10:07 PM

شيمااااااااااااااااااااااااااااااااااااااااااااااا اء انا عايزة اشوف صور انووووووووووووووووووووووووس قبل ما اقفل

رنا خالد

11-16-2011, 10:10 PM

اقسم بالله ياجماعه انا ماعارفه اقولكوا ايه
انا كل اما اتكلم كلمه الاقي حد زعل
انا بذكر مثل واحده خلفت 9 هو حد فيكم خلف 9 ؟؟
انا اسفه للكل بجد انا بدات احس انكم بتتلككوا
دانا مابفتحش موضوع العيال ده خالص
انتوا بتنكشوني وانا بهزر الاقيكوا بتزعلوا
ليه مش فاهمه؟
انا اسفه مره تانيه
ولو كلامي معاكوا مضايقكوا كده بلاش تكلموني
اعتبروني هوا
يعني اكني مش موجوده
وشكرا لردكم الغريب عليا
شكرا

somia

11-16-2011, 10:10 PM

انتوا رحتوا فييييييييييييييييييييييين؟؟؟؟

somia

11-16-2011, 10:14 PM

ايه يا رنا ولا زعلنا ولا حاجة الكلب بيجر ف شكلك ... يا ستي انا ناوية باذن الله تعالى اجيب على اد ما اقدر بس اسيب ما بينهم وقت اخد نفسي ايه المشكلة ؟؟ ده اراء واقتناع اعرف واحدهعايزة تجيب بنت وولد توأم وخلاص على كده ايه المشكلة يا جماعة ..
كل واحدة على حسب ما هيه حاسة انها تقدر تربي عشان ما تظلمش اي عيل ..
ومع اني مش قادرة على واحدة ولى رأي زوجي هيه اللي بتربيني بس انا بموووووووووووووووت في العيال ,,

رنا خالد

11-16-2011, 10:15 PM

كان ممكن يانورا تفهيني اني غلط في كلامي بشكل اظرف من كده شويه
علي العموم حقكم علي راسي وانا استاهل لو فتحت الموضوع ده تاني
وياريت محدش يفتحه معايا عشان لاتزعلوا ولا انا ازعل

رنا خالد

11-16-2011, 10:17 PM

ياسميه انا كده عداني العيب والله
انا لغلطت في حد ولا لمحت علي حد بس اتوجهلي كلام جارح جدا
انا بجد منهاره من العياط ومضايقه جدا
لا حول ولا قوة الا بالله
ربنا وحده اللي عالم بنيتي

somia

11-16-2011, 10:19 PM

يا جماعة استهدوا بالله بقى احنا اخوة وبنحب بعض في الله رنا انا واثقة ان نورا مكانش قصدها تزعلك انت عارفة الحامل اقل حاجة بتضايقها فهتلاقيها التعبير خانها فالكلام طلع كده غصب عنها اهدي يا بنتي وصدقيني ما حد بيتلكك ولا حاجة

somia

11-16-2011, 10:23 PM

يا بنتي كلنا عارفيين وصدقيني كلنا بنجر في شكل بعضنا عادي يعني لو الواحدة مهزرتش مع اخواتها في الله هتهزر مع مين ..
ويا جماعة الفلاحين والصعايدة ميزتهم اللي احنا مفتقدينها ان الواحدة بتبجى جمب اهلها عني في حملها وتعبها بيبقوا معاها عشان كده مبيشيلوش هم العيال والخلفة مش زيينا في بلد واهنا في بلد نتانية فيا دوب مش عارفيين اصلا نلاحق على عيل تاني ...
ومع ذلك انا لسة بعشق العيال وعندي امل اني ان شاء الله تعالى اخس عشان اعرف احمل تاني

somia

11-16-2011, 10:26 PM

انتوا رحتوا فيييييييييييييييييييييييييين؟؟؟؟؟؟؟؟؟؟؟؟؟؟؟

رنا خالد

11-16-2011, 10:27 PM

انا ماشتمتش الفلاحين والصعايده انا بقول انهم بيحبوا العزوه واللمه
هل ده عيب ؟
انا اللي كل ماقول مأجله الحمل يقعدوا يقولولي حرام عليكي غيرك مش لاقي استغفري ربنا انتي ليه كده
وكأني بقول اني هاشيل الرحم مثلا
وعديت مره والتانيه وفضلت اقول حريه شخصيه وهما يعلقوا تعليقات مش حلوه
ولما قلت كلمتين مافيهمش اي حاجه وماتوقعتش ابدا انهم هيزعلوا حد لقيت الكل اتقمص
طب مادينا امبارح قالت نفس الكلام محدش علق ليه؟
يلا الحمد لله علي كل شئ
الحمد لله

توتة السيد

11-16-2011, 10:30 PM

بالذوق كده اي حد حط صور يقب بيها تاني

somia

11-16-2011, 10:31 PM

رنا صدقيني كلنا بنكلمك كانك اختنا يعني بنتمنالك اللي بنتمناه لنفسنا يعني لو واحدة نفسها تحمل بيبقى نفسها اختها تحمل عشان تفرحلها .. يا بنتي هما خايفيين عليكي لا تندمي بعد كده مش أكثر صدقيني كاخت ليهم مش اي حاجة تانية

ام انس المصريه

11-16-2011, 10:32 PM

فى ايه يارنا وحدى الله

اوعى تكونى زعلتى منى يابت

طب انا هراجع اللى فاتنى واشوف كده

somia

11-16-2011, 10:35 PM

توتة وحشتينيييييييييييييييييييي

دودى مجدى

11-16-2011, 10:36 PM

رنا متزعليش يا حبيتى فعلا كل واحدة حرة فى رايها الى عاوزة تخلف تخلف واللى شايفة انها متقدرش خلاص رحم الله امرىء عرف قدر نفسو يا بنتى وانتى حرة تخلفى وقت ما انتى عاوزة لكن بتعيطى لية بس احنا اخوات وعمرنا ما نزعل من بعض ابدا خلاص حقك عليا انا متزعليش بالله عليكى

ام انس المصريه

11-16-2011, 10:37 PM

طب ماتزعليش يارنا حقك عليا امسحيها فيا المره دى

انتى زعلانه من نورا

والله دى نورا مفيش اطيب منها والله العظيم يابت كلنا اخوات وبنحب بعض

طب شوفتى انا وتوته لما بنمسك فى شعور بعض ونردح لبعض

واحنا اخوات يابت وبنفضفض لبعض ياهبله

متزعليش يارنرون بقى وادى راسك ابوسها

وان كان ع الظرب انا نفسى اظرب كتير لحد مااتعب من كتر الظرب هههههههههههه

somia

11-16-2011, 10:38 PM

شيمو صدفيني هاضعك لو ما حطيتيش صور انس

ام انس المصريه

11-16-2011, 10:39 PM

تووووووووووووته وحشتينى

...........

سميه وحشانى اوى اوى وازى البت توته

ماشاء الله الله اكبر زى القمر

ربنا يحميها يارب

somia

11-16-2011, 10:39 PM

يعني ايه ظرب يا حماعة؟؟؟؟؟؟؟؟؟؟؟؟

ام انس المصريه

11-16-2011, 10:40 PM

ظرب يعنى ولاده كتير هههههههههه

.........

استنى هحطها اهو يابت

دودى مجدى

11-16-2011, 10:40 PM

يخربيت عقلك يا رنا ضحكتينى بعد الشر عليكى يا بنتى من شيل الرحم والكلام الوحش دة خلاص انا فاهمة انك متحملة المسئولية اوى ومش عاوزة تقصرى مع جوزك ولا بنتك عشان كدة ماجلة موضوع الخلفة دة شوية لحد ما تقدرى علية وانا بفكر زييك بالظبط والله اقسم بالله من حق يا رنة هو انتى خريجة اية

ام انس المصريه

11-16-2011, 10:40 PM

بس انا والله معنديش غير صور له وهو عنده شهر ونص

ام انس المصريه

11-16-2011, 10:41 PM

http://www9.0zz0.com/2011/11/16/19/382505489.jpg

somia

11-16-2011, 10:42 PM

رضا يا شيمو بس اشوفه بس..
الا صحيح قوليلي عامله معاه ايه؟؟؟

ام انس المصريه

11-16-2011, 10:43 PM

الصوره اهى معرفتش انزلها غير كده اتكو ع الرابط ده هيفتح لكم الصوره

ماشى

تقريبا وريتك الصوره دى قبل كده ياسميه صح

دودى مجدى

11-16-2011, 10:43 PM

ما شاء الله توتة عسولة يا سمية ربنا يخليهالك يا رب

دودى مجدى

11-16-2011, 10:44 PM

اة دة مفيش غير الصورة دى يا شيماء امال قاعدة متهببة طول اليوم عمالة تعملى اية مش تصور الواد يا بةانتى

ام انس المصريه

11-16-2011, 10:45 PM

والله ياسميه محتاسه وملخومه لشوشتى

وبسهر اعد النجوم هههههههههههههه

بس مونسنى ومالى عليه البيت وشغلنى ومفرحنى ومنورنى

وعماد بيحبه اوى

ربنا يخليه ليه ويبارك فيه ويجعله من الذريه الصالحه

somia

11-16-2011, 10:46 PM

لا اول مرة يا شيمو ... ربنا يباركلك فيه يا رب ..
ربنا يخليكوا يا جماعة ادعولها بس ربنا يهديهال ويكرمها زيطلعلها شعر يملى قرعتها زي شعر ابويا

دودى مجدى

11-16-2011, 10:48 PM

يارب يحفظهوللك من كل شر يا شيمو ويجعلو ابن بار بيكى وبابوة ويهدى ابوة وجوزى بدل ما اموتو واخلص

somia

11-16-2011, 10:48 PM

اسيبكم انا واناااااااااااااااااام لحسن انا تعبت خالص

دودى مجدى

11-16-2011, 10:50 PM

رنا يا ام لوجى بالله عليكى ما تزعلى وتعالى بقى

دودى مجدى

11-16-2011, 10:51 PM

ماشى يا سومة تصبحى على خير يا حبيبتى

دودى مجدى

11-16-2011, 10:52 PM

عودى يا رنا عودى يا رنا

ام انس المصريه

11-16-2011, 10:55 PM

بصوره يادينا بس مش بنزل الصور ع الجهاز

مش فضيه هههههههههههههههههه

دودى مجدى

11-16-2011, 10:56 PM

طب ابقى نزليها لو سمحتى اما تفضى بالذوق اهو

ام انس المصريه

11-16-2011, 10:59 PM

رنا خلاص مبقتش زحلانه

البت توته صالحتها

عامله نفسها مصلحه اجتماعيه البت توته دى

ام انس المصريه

11-16-2011, 11:01 PM

حااااااااااضر هنزلها

..........

بس ياختى انوس بقى بسم الله ماشاء الله امور شبهى ونا صغيره

دودى مجدى

11-16-2011, 11:02 PM

بجد طب جزاكى الله كل خير يا توتة وربنا يجعلو فى ميزان حسناتك يا رب قوليها تخش بقى نلك شوية قبل ما اقوم انام واسيبكو

دودى مجدى

11-16-2011, 11:03 PM

ما شاء الله بجد خلاص ورينى صورتك وانتى صغيرة وصورتو وانا اللى احكم

دودى مجدى

11-16-2011, 11:04 PM

يعنى مش واخد حاجة من عماد يا شيماء ولا اية

ام انس المصريه

11-16-2011, 11:05 PM

اه يامناخيرى يانى يامه

........

بت يادينا دعيتى لي فى الحج بالله عليكى انى احمل واخلف عيال كتير

دودى مجدى

11-16-2011, 11:09 PM

اة والله يا شيماء دعيت ربنا يديكى ويراضيكى من غير عمليات وابر عشان عارفة ان زيزك ورمت هههههههههههههههههههههههه

ام انس المصريه

11-16-2011, 11:09 PM

مش واخد من عماد غير رجلووووووووو يا دينا هههههههههههههههههه

دودى مجدى

11-16-2011, 11:10 PM

نفسى اخرج اوى زهقت اقسم بالله دة انا لو مسجونة كانو فسحوها شوية يا رب عدى الايام بقى

دودى مجدى

11-16-2011, 11:11 PM

طب الحمد لله رجلو مش مهم اهم حاجة ان وشو شبهك انتى

ام انس المصريه

11-16-2011, 11:11 PM

ههههههههههههههههههههههه كلى ورم مش زيزى بس يادينا

زيزى نشفت خلاص هههههههههههههههههههههه مبقاش فيها حته مخدتش فيها حوقنه

..........

دودى مجدى

11-16-2011, 11:13 PM

يا حبيبتى يا شيماء معلش كلو فى ميزان حسناتك والله ما فى حاجة بتضيع وبالذات اللى عند ربنا مبيروحش ابدا

ام انس المصريه

11-16-2011, 11:14 PM

وشو شبهى وعينو الحمد لله خضره

وبوقو صغنونه ومناخيرو

اسمعى الاغنيه اللى طلعتها على انوس

انوسى سكره مناخيره صغننه عيونه اخضره وشعره اصفره

شوفو نوسى جميل اازاى طبعا طالع لامو

شكلو جميل وحلو مهو نوسه السكره

انوسه حلوه جميله انوسه طعمه ظريفه انوسه جميله جميله مهو نوسه السكره

ههههههههههههههههههههههه

رنا خالد

11-16-2011, 11:14 PM

دينا تسلميلي بجد انتي بنت زوق اوي والله العظيم
شيماء انا مش زعلانه منك علي فكره
ومش زعلانه من حد
وربنا يهدي النفوس

ام انس المصريه

11-16-2011, 11:15 PM

انوسى صحى يا ديناااااااااااااا

دودى مجدى

11-16-2011, 11:16 PM

هههههههههههههههههههه حلوة يا شيماء اوى ما شاء الله انتى قاعدة فاضية بقى وعمالة تطلعى اغانى ربنا يحفظهولك يا رب ويطلع امور وسكرة فعلا

دودى مجدى

11-16-2011, 11:18 PM

رنا كويس انك جيتى تعالى كلمينى بقى والله انتى اللى سكر وعسل مقولتيليش انتى خريجة اية

دودى مجدى

11-16-2011, 11:18 PM

انوس صحى يبقى شيماء بخخخخخخخخخخخخخخخخخخخخخخخخخ
روحى بقى غنى يا اختى الاغنية لايف صوت وصورة

رنا خالد

11-16-2011, 11:20 PM

انا خريجه اداب علم نفس جامعة حلوان
وانتي يادينا؟
بحاول افك يمكن يكون دمي تقيل شويه معلش انا اسفه استحملوني
والله غصب عني

توتة السيد

11-16-2011, 11:20 PM

صلوا علي النبي ياجماعة ودقوا في بعض عايزين دم احنا ههههههههههههههههههههههههههه

دودى مجدى

11-16-2011, 11:22 PM

يا بنتى متقوليش كدة بالعكس دة انتى دمك زى العسل
انا خريجة تربية جامعة قناة السويس قسم لغة عربية ودراسات اسلامية شعبة تعليم ابتدائى بس كنت فى اداب القاهرة علم نفس اول سنة بس كانت صعبة اوى وشيلت مواد كتير فحولت تربية فى بلدنا بكرامتى احسن

دودى مجدى

11-16-2011, 11:23 PM

توتة عملتى اة فى الضيوف شكلك قدمتيلهم شيح ورميتيهم من البلكونة

رنا خالد

11-16-2011, 11:25 PM

حلوه بكرامتي احسن دي يادينا ههههههههههه
تصدقي مكنتش وخده بالي انك جدعه كده
وانا بقرأ الكلام اللي فات لقيتك بدافعي عن وجهة نظري احسن ماكنت انا هدافع عنها
بجد بسطيني جدا
وتوته ربنا يخليهالي لما كلمتني خلتني افك
بحبها اوووووووووي ولما فضفضت لها ارتاحت والله
ربنا مايحرمني منك ابدا

توتة السيد

11-16-2011, 11:25 PM

انا تقريبا نمت منك في السكة يارنا هههههههههههههههههههههه

دودى مجدى

11-16-2011, 11:28 PM

يا رنا والله الاختلاف فى الراى لا يفسد للود قضية معلش مهما اختلفنا احنا اخوات انما وجهات النظر دى بقى كل واحد حر فيها بس انا بجد عاجبنى تفكيرك اوى لانى بفكر زييك بالظبط وكل ما اقول كدة برضو فى عيلتى يعدو يزعقولى ويقولولى متقاطعيش مع ان بالدليل القاطع والبرهان الساطع ثبت ان انا اللى صح وانا اللى خلانى بجد فهمت كدة انى اشتغلت مدرسة سنتين وشوفت فعلا ان السيطرة على العيال صعبة جدا وكنت بقول الله يكون فى عون اهاليهم واكيد انتى عارفة كدة برضو واى خدمة يا معلم

توتة السيد

11-16-2011, 11:28 PM

والله يادينا قدمتلهم عصير وفاكهة وبعد مااكلوها بدات اتاوب هههههههههههههههههههههه

فهما بقي خجوها من قصيرها وروحوا كفايه ساعة اهو بحالها هههههههههههههههههههه

دودى مجدى

11-16-2011, 11:30 PM

هههههههههههههههه طب ونور نامت ولا لسة صاحية

توتة السيد

11-16-2011, 11:30 PM

ولا يحرمني منك ياغزال بالحضن بقي ههههههههههههههههههه

دودى مجدى

11-16-2011, 11:31 PM

ايوة فعلا توتة عسل والكلام معاها مريح ربنا يديم عليكو الصداقة الجميلة دى يا رب

ياسميين

11-16-2011, 11:31 PM

بون سوآآآآآآآار

توتة السيد

11-16-2011, 11:32 PM

لا نور نامت وتقريبا كده عرق الندالة هيفض وينط فيا وقلكم باي وتصبحوا علي خير

دودى مجدى

11-16-2011, 11:32 PM

من زمان نفسى اسالكو لية بتقولو لبعض يا غزال يعنى اكمنكو مفشولين وكدة فبترفعو من معنويات بعضيكو ولا اية

ام انس المصريه

11-16-2011, 11:32 PM

رنرون جات

متزعليش يابت كلنا اخوات والله وحقك على راسى من فوق

وامسحيها فيا المره دى

دودى مجدى

11-16-2011, 11:33 PM

طول عمرك ندلة طيب وانا بقى همسح المشاركة اللى فاتت متستاهليهاش

توتة السيد

11-16-2011, 11:34 PM

شالله يخليكوا يحبايبي احرجتوني وانتوا عارفيني كسوفة انا مكسوفة دلوقتي اهو وخدودي اخضرة هههههههههههههههههههههههه

دودى مجدى

11-16-2011, 11:34 PM

ياسمينا ازييك يا حبيبتى وازى حماتك ها اوعى تكون قالتلك بقى غيرى العيال دول وهاتيلى عيال من اول وجديد

توتة السيد

11-16-2011, 11:35 PM

مين دي المفشوله ماانت عارفة اللي فيها انا عايزة حقن محشي

دودى مجدى

11-16-2011, 11:36 PM

طب تعالى معايا مصر بقى يا توتة انا امى مجهزالى كورس مكسف على الاقل هطلعلى منو ب10 كيلو زيادة

om arwa

11-16-2011, 11:37 PM

يالهوى يا رانا انتى زعلتى
يا بنتى انا كان قصدى بس ماتقوليش حاجة ع اللى بيفكر كدة عشان محدش يتضايق
يا ستى حقك عليا ماتزعليش ان كان قصدى انبهك عشان اسلوب كلامك مش يزعل حد وووبس
مليش دعوة لا بوجهة نظرك ولا نظر غيرك
كل واحد حر ولية اسبابة

دودى مجدى

11-16-2011, 11:39 PM

سما لبستى الجلبية ولفحتى اروى على كتفك ونزلتى السوق يا بختك نفسى انزل السوق اوى وامشى فى الشارع عادى زى البنى ادميين واشوف البياعين

توتة السيد

11-16-2011, 11:41 PM

طيب اطير انا تصبحوا علي خييييييييييييييييييييييير

ياسميين

11-16-2011, 11:41 PM

ياسمينا ازييك يا حبيبتى وازى حماتك ها اوعى تكون قالتلك بقى غيرى العيال دول وهاتيلى عيال من اول وجديد

انا كويسه الحمد لله
وحماتي بتسلم عليكي ههههههههههههههههه سايباها جوه مع ابنها hwaml02
وجيت اقعد معاكم شويه
لا لا هي عارفه اني بولد قيصري وبالعكس لما جوزي يقولي اول مابلبل يكمل 3 سنين نجيب له اخت تقولي اوعي تسمعي كلامو hwaml7

om arwa

11-16-2011, 11:43 PM

جلبية ايه يا دينا هههههههه
كمان الفح مين انا قادرة امشى لوحدة
انا جرتها فى ااااااايدى طبعا
كمن سوق ايه بردو
هو محل خضار وفاكهه صغنون
ياريت فيه سوق قريب
انا بحب السوق اوووووووى عشان الخضروات بتبقى طازة بتلمع جميلة
هو فى واحد ممكن اروحة بس لازم الصبح
والف فى السوق بقى واعيش حياتى
صحتى بقتش حمل الحاجات دى هههههه

رنا خالد

11-16-2011, 11:44 PM

انا مازعلتش ياسما انا بس استغربت ليه بتفهموني غلط
انا كل مااقول مأجله الحمل يقولولي حرام عليكي كده غيرك مش لاقي
بحس انهم بيبكتوني
وبصراحه رد نورا غريب اووووووي
مش عارفه انا عملت لها ايه استاهل عليه الرد ده
بقول الفلاحين والصعايده بيحبوا العزوه واللمه عشان اهلهم جنبهم وحمواتهم
وفي اللي بيساعدهم
يعني لاغلطت ولا لمحت
بس نورا ردت عليا بشكل صدمني
وتقولي في اخر كلامها ياست رنا
نو كومنت

دودى مجدى

11-16-2011, 11:44 PM

وانتى من اهل الخير يا توتة
لا يا ياسمين انا قصدى يمكن مش عاجبها شكل العيال زى ما نظام الاوضة مش عاجبها فبتقولك غيريهم

ام انس المصريه

11-16-2011, 11:45 PM

لا يادينا بالذات توته ورنا مش مفشولين

انا اللى مفشوله وبكبوظه وتخينه ودبدوبه

هههههههههههههههههههه

توته بقت تتقطم ع الركبه بعد الحمل

ورنا ياختى عامله ريجيم وخست

رنا خالد

11-16-2011, 11:46 PM

تصبحي علي خير ياتوتي نامي بقي قبل مانور تصحي
ده انا ماصدقت نيمت التنين بتاعي ياااااااااااااه
البت هادي

دودى مجدى

11-16-2011, 11:48 PM

ما انا قولت انك هتعيشى فى دور مرات البواب بقى يا سما لانك مفتقداها بصراحة والله دول نعمة والواحد ميقدرش يستغنى عنهم لانهم بينجدونا والله فى اكتر الاوقات جزاهم الله خير

ام انس المصريه

11-16-2011, 11:48 PM

ماشى ياست رنا هههههههههههههههه

متزعليش ياغزال ونا صديقتك الفيله ههههههههههههههه

...............

بونجوووووووووووغ يا ياسمين بالفغنسى ههههههههههههههه

انا بغضو فغنسيه واعجبك ههههههههههههههههه

دودى مجدى

11-16-2011, 11:49 PM

اة دة بجد يا خسارة يعنى انا وانتى اللى مفشولين يا شيماء طب بصى استنينى اربع شهور هزلط الواد ونديها ريجيم للصبح ماشى

ام انس المصريه

11-16-2011, 11:50 PM

انا يادينا جوزى هو البواب بتاعى

الحق يتقال بيجبلى كل حاجه من السوق لحد الملح بيشتريه الله يكرمه ويخليه ليه

بس بيطلع عينى وبينشف ريقى لحد مايجبلة طلباتى

بقوله عاوزه حاجه ساقعه دلوقتى قالى والله منا جايب دنا جبت لترين شربتيهم لوحدك يامفتريه هتروحى فين بعد كده هههههههههههههههههه

ياسميين

11-16-2011, 11:50 PM

والله يادينا في الاول كانو كده وكان شكل ريان مش عاجبهم
وسمعت كلام جارح كتيير منهم وشفت ايام مايعلم بيها لا ربنا
لكن دلوقتي بقيت بطنش ولما يقولولي حاجه اقولهم دول ولاد ابنكم برضو
والخلقه بتاعت ربنا
والحمد لله علي كل حال

om arwa

11-16-2011, 11:51 PM

يا بنتى محدش فهمك غلط والله
خالص بالعك انا فاهماكى لانى ق4لتلك انا فضلت كتير بعدد اروى مرعوبة من فكرة الحمل
عشان التعب اللى اكنت فيه
خصوصا تعب الرضاعة محستش انى فقت الا لما فطمتها
فكرتك مفهومة جداااااااااا
بس ماتعيبيش ع اللى بيفكر بطريقة تانية بس وتقولى كلام مكن يدايقهم

دودى مجدى

11-16-2011, 11:51 PM

معلش يا شيماء اهو بيقضيلك طلباتك برضو استحملية

ياسميين

11-16-2011, 11:52 PM

عسل يا شوشو
هههههههههههههه

دودى مجدى

11-16-2011, 11:53 PM

اة دة انتى بتتكلمى بجد يا ياسمين معقول اة دة يعنى انتى جايباة من عندك ولا اية وبعدين مالو ريان دة زى العسل ربنا يخليهولك يا رب وتفرحى بية بصى يا بنتى كبرى كبرى مفيش حل الا كدة هيخلو الواحد يغلط ويفتح ام موضوع الحموات تانى

رنا خالد

11-16-2011, 11:54 PM

انا هحاسب علي كلامي خالص عشان انا مابحبش ازعل حد مني
حتي لو حد نكشني هطنش خالص
يلا الحمد لله علي كل شئ
وعسي ان تكرهوا شئ وهو خير لكم

om arwa

11-16-2011, 11:54 PM

انتى ليكى حق يا رانا فى ان محدش يقل عقبالك ولا يلمحلك الموضع
بس انا هقولك ربنا يديكى فى الوقت المناسب ليكى يارب تكونى فقتى
فكرتينى اما كنت لسة والدة يقولولى عقبال ماتخاويها
انا كنت بقولهم ااااااااااااااه
مش برد اكتر من كدة
هههههههههه

om arwa

11-16-2011, 11:56 PM

ازاى يعنى معترضين مش فاهمة
ههههههههههه
ده ريان زى العسل
امال عايزينة شكلة ايه
ربنا يهدى معلش

دودى مجدى

11-16-2011, 11:56 PM

كل شىء بامر ربنا والله يا بنات وربنا يقدرلنا اللى فية الخير دايما يا رب

ياسميين

11-16-2011, 11:57 PM

اة والله بتكلم جد يادينا
واقسم بالله اني سمعت منهم كلام عمري ماحقدر انساه وبعد الولاده علي طول
وماكدبش عليكي في الاول ماكنتش بعرف اطنش وكنت بتاثر اوووي بكلامهم
بس دلوقتي خلاص بقيت بكبر دماغي واطنش بس بعد ماصحتي اتهدت

ام انس المصريه

11-16-2011, 11:57 PM

ليه ياختى يااياسمين مش عاجبهم شكل بلال ده بسم الله ماشاء الله زى العسل

انا شوفت صورهم

عامله زى حماتى تشوف انس تقول عليه ده وحشششش

شكل امه

اقولها محدش فى عيلتكو فى جمالو ياختى

تقولى القط فى عين امو مش بترضى تقول القط

حماتى بتحب انوس وعارفه انو حلو بس بتخزى العين عنو هههههههههههههه

رنا خالد

11-16-2011, 11:58 PM

ياسميين

11-16-2011, 11:58 PM

هههههههههههه عايزين يبقي مهند يا سما
ههههههههههههههههه

دودى مجدى

11-16-2011, 11:59 PM

معلش يا ياسمين ولا يهمك منهم ابنك زى القمر ماشاء الله ربنا يحميهولك وجدعة انك مبترديش خليهم هما ياخدو الذنب وانتى خدى من حسناتهم وربنا هيؤجرك ان شاء الله

ام انس المصريه

11-17-2011, 12:00 AM

علشان ريان شكلك يا ياسمين مش عاجبها لكن بلال شكل ابوه عاجبها هههههههههههههه بيتغاظو ياختى ان ابنهم بيحب مراتو

بيقولو لو العيل شكل امو يبقى جوزها بيحبها ولو شكل ابوه تبقى مراته بتحبه

ايه جاب ده لده

انا اعرف واحده بتكره جوزها وعيالها 6 شبه ابوهم هههههههههههه

om arwa

11-17-2011, 12:00 AM

يا بنتى كمان كلام نورا ما يزعلش هى بس حست انك خصيتى التفكير بالفلاحين الصعايدة واحنا اصلا كلنا منهم وحاسة انها منهم فقالتلك بس خصوصا انها هى اللى لسة عارفةانها حامل النهاردة
ماتزعليش بقى وماتتصدميش الحاجات دى
فى الاخر مالناش الا بعض والموضوع ده خلاص انتهى فهمنا جه نظر كل حد
بس محدش يزعل بقى

رنا خالد

11-17-2011, 12:02 AM

انا نفسي اشوف انس ياشيماء الصوره اللي ع الميل مش باينه خالص
تعالوا اتفضلوا معايا لب
بأزاز لب سوري وابيض وسوبر

ياسميين

11-17-2011, 12:02 AM

رنا حبيبتي ماتزعليش وبعدين لوجي لسه صغيره وانتي والده قيصري يعني ماينفعش تحملي حتي لو عايزه

دودى مجدى

11-17-2011, 12:04 AM

انا عاوزة لب يا رنا احدفيلى حبة
بقالى كذا يوم نفسى فى شيبسى بالشطة والليمون قولت لمحمد ملقاش وجابلى امبارح بالملح بس كلو منى ومش راضى يجيبلى تانى اهىء اهىء

ياسميين

11-17-2011, 12:06 AM

ههههههههههههههه ضحكتيني يا شوشو
وشويه هتقول عليا مجنونه بتضحك لوحدها

ام انس المصريه

11-17-2011, 12:06 AM

لاء لاء لاء

الموضوع ميسكتش عليه

انا شكلى حامل ههههههههههههههههههههههههه

.............

عارفه يابت يارنااااااااا

انا سلفتى عندها 35 سنه وحامل

وبنت سلفتى التانيه عندها 18 سنه وحامل تانى مره وبنتها عندها 10 شهور

انا غرتتتتتتتتت

غيرانه بجدددددددد ههههههههههههههههههه انتو اصحابى وبفضفض معاكو

نفسى احمل انا كمان مع ان انوسى صغير بس عارفه بيصعب عليه انى احمل دلوقتى وهو لسه نونو

وفى نفس الوقت انتى عارفه ظروفى الصعبه بقى وان حملى عزيز وانى من زوى الاحتياجات الخاصه فى الحمل هههههههههههههههه

فغرررررررررررررررت بصراحه ونفسى احمل بقى هيه ماليش دعوه

رنا خالد

11-17-2011, 12:06 AM

ردها ضايقني ياسما ومع ذلك اتأسفت لها وقدمكم تاني اهو
انا اسفه يانورا حقك علي راسي
والفلاحين والصعايده احسن ناس يخلفوا او مايخلفوش هما احرار انا مالي هو اللي هربي
ياسمين ده بلال ماشاء الله قمور واسمه جميل ولبس العيد بتاعه عسل الله اكبر ههههههههه هما عايزين ايه ولد عينه لونها موف وشعره اصفريكا

ياسميين

11-17-2011, 12:08 AM

احدف لك يادينا شيبسي بالشطة ريان بيحبه اووووي

رنا خالد

11-17-2011, 12:09 AM

القفي يادندون القرطاس ده مشكل
في لب سوبر وابيض وسوري وسوداني وفول حلبي كمان
جوزي ظبطني وانا هاظبطك
مانتي غلبانه برضه ههههههههههههه

دودى مجدى

11-17-2011, 12:09 AM

ايوة احدفيلى يا ياسمين يالا

دودى مجدى

11-17-2011, 12:10 AM

يا سلام لب وسودانى وشيبسى احمدك يا رب

ام انس المصريه

11-17-2011, 12:10 AM

رنرون ارجعى كده صفحتين ورا وانتى تلاقينى حاطه موقع كده لوحده اضغطى عليه هتطلع صوره انوسى

ياسميين

11-17-2011, 12:13 AM

انتو عارفين اكتر حاجه كانت بتضايقني في الموضوع دا
انهم مكانوش بيشيلوه خالص ولا بيلعبو معاه تقولو واحد عنده اعاقه لا سمح الله او حاجه
يآآآآآآآآآآه دانا لو قعدت احكي لكم للصبح مش هخلص
الحمد لله علي كل حال

رنا خالد

11-17-2011, 12:13 AM

عماله ادور اهئ اهئ
اظاهر اني اعمشيت

دودى مجدى

11-17-2011, 12:14 AM

معقول يا ياسمين لية كدة القسوة دى بس دة طفل ونعمة من عند ربنا بدل ما يفرحو بية سبحان الله دة الواحد اما بيشوف طفل قلبو بيتعلق بية على طول لا حول ولا قوة الا بالله

رنا خالد

11-17-2011, 12:14 AM

معلش ياياسمين انسي الحجات الوحشه دي بكره يتحايلوا عليه عشان يكلمكهم ويديهم الطرشه هههههههههههه
ده كميله خالص ماشاء الله

ام انس المصريه

11-17-2011, 12:14 AM

http://www3.0zz0.com/2011/11/16/21/525699903.jpg

ياسميين

11-17-2011, 12:15 AM

ولو ياحاجه دينا انتي بس اؤمري وكل اللي نفسك فيه نحدفولك
هههههههههههههههههه

دودى مجدى

11-17-2011, 12:16 AM

تعيشى يا ياسمين يا قمر يا رب ما تحرم منك ابدا

ام انس المصريه

11-17-2011, 12:17 AM

اضغطى ع الرابط ده يارنااااااااا

هتشوفى انوستى

ام انس المصريه

11-17-2011, 12:19 AM

ها شوفتى الصوره يا رناااااااااااااا

عمتا انا مش هشيلهم يعنى

ياسميين

11-17-2011, 12:20 AM

انا والله نسيت كل حاجه يارنا وكنت بقولهم بكرا لما يكبر اوعو حد يقولي ماجابليش هديه ماكلمنيش او وحده منكم تقولي عاوزه يخطب بنتها ههههههههههههههههههه دا من سابع المستحيلآت هههه

ام انس المصريه

11-17-2011, 12:20 AM

سلام بقى

المطبخ يضرب يقلب والمواعين مركنه

ونا معفنه قاعده ع النت وسايبه الشقه معفنه

رنا خالد

11-17-2011, 12:21 AM

الله اكبر عليه قمر ياشيماء ماشاء الله
فعلا شبهك اوي ربنا يخليهولك وتجبيله اخوات صبيان وبنات
قلبي حاسس انك هاتحملي قريب ان شاء الله

ياسميين

11-17-2011, 12:22 AM

عايزين صور جديده يا شوشو
مالناش دعوه اتصرفي ونزليهم علي الجهاز
يلا هههههههههههههههههههههه

رنا خالد

11-17-2011, 12:22 AM

هأكل لوجي واجي

om arwa

11-17-2011, 12:23 AM

انا كمان باكل شيبسى كتير يادينا
ولسة جايبة شيتوس بالجبنة ههههههه
بجد بتحم ع الحاجات الحدقة اوى
بعكس حملى فى اروى كنت مدمنة شيكولاتة

ياسميين

11-17-2011, 12:23 AM

بالهنا والشفا
بوسيهالي يارنا

رنا خالد

11-17-2011, 12:57 AM

انا اكلتها وجيت بس اظاهر ان انتوا اللي روحتوا تاكلوا ههههههههههه
الله يهنيكي ياياسمنتي ياقمر
فين باقي العيال

رنا خالد

11-17-2011, 12:59 AM

طب ادخل انا بقي ارخم عليها واقعد مع جوزي
تصبحوا علي خير ياللي مش هنا

رنا خالد

11-17-2011, 01:12 AM

مكالمة مجهولة :
|
|
|
|
|
|
|
|
|

الشاب : إنتي مرتبطه ؟
البنت : أه مرتبطه ،مين معايا ؟
الشاب : انا أخوكي اصبرى عليا لما اروح ..

مكالمة ثانية :

الشاب : إنتي مرتبطه ؟
البنت : لا ، مين إنت ؟
الشاب : نعم ؟ أنا حبيبك و إنتي جرحتي قلبي
البنت :حبيبي أنا اسفة فكرتك أخويا
الشاب : أنا أخوكي و اصبرى عليا لما اروحلك يا سافلة

رنا خالد

11-17-2011, 01:14 AM

اتفق زوجان في الصباح التالي لعرسهما ان لا يفتحا الباب لاي زائر كان..

وبالفعل جاء أهل الزوج يطرقون الباب ونظر كل من الزوجين لبعضهما نظره
تصميم لتنفيذ الإتفاق ولم يفتحا الباب.

لم يمض إلا قليل حتى جاء اهل الزوجه يطرقون الباب فنظر الزوج الى زوجته

فإذا بها تذرف الدموع وتقول والله لا يهون علي وقوف أبواي أمام الباب ولا أفتح

لهما سكت الزوج و أسرها في نفسه وفتحت لأبويها الباب.

مضت السنين وقد رزقوا بأربع أولاد وكانت خامستهم طفله فرح بها الاب فرحا

شديداً وذبح الذبائح فسأله الناس متعجبين فرحه الذي غلب فرحته بأولاده الذكور..

فأجاب ببساطه : هذه التي ستفتح لي الباب…

om arwa

11-17-2011, 01:30 AM

البت المؤرفة دى كسرت كباية
اتغبيت عليها وضربتاها على ايدها
عشان هى كل يوم بتكسر كوباية او ازازة تعببببببببببت

نولارا

11-17-2011, 01:39 AM

رنا هنعمل زى العيال الصغيره ونزعل ونتقمص ولا ايه
انا اصلا عمرى قولتلك انك غلطانه فى وجهه نظرك ولا حرام عليكى ولا نعمه وانتى بتبطرى والكلام اللى كتبتيه ده
كل اللى اتقال بكره نفرح فيكى
ده كان يستدعى ياجماعه ابوس ايديكوا بلاش الكلام ده كاننا مثلا هنقيدك ونخليكى تحملى غصب
وبعدين تقولى انا موش غاويه ظرب الكلمه وحشه واتكررت كتير حاجه تضايق فعلا
وترجعى تنسبى الموضوع للصعايده والفلاحين
كانهم مثلا جهله ولا دون المستوى
اقرى اخر مشاركتين ليكى فى الموضوع ده وانتى تفهمى انك زودتيها وده اللى زعلنى
الموضوع اصلا موش محتاج ولا مستاهل اللى حصل ده كله
كل واحد حر اللى عاوز يخلف براحته واللى عاوز ينظم براحته
كل واحده عارفه طاقتها وهى تقدر تشيل مسئوليه اد ايه
بس الكلام يكون بالراحه من غير ما نخص حد
وبعدين ده المنتجع كله غيبان
اكتر واحده معاها عيلين
حسستونى اننا مخلفيين دست دست
بلا هم كله بيدخل يتوجع ويخرج
رنا ما تزعليش منى
كل واحد فينا قال وجهه نظره وخلاص
نقفل على الموضوع ده بقى
وليكى عليا ياستى موش هاقولك عقبالك ابدااااااااا
دى فتحت علينا فواتيح ودوختنا
معلش يارنا وادى راسك ابوسها امووووووووووه
صافى يالبن
يالا هستناكى بكره تكتبيلى حليب ياقشطه
سلالالالالالالالالالالاموز بقى

نولارا

11-17-2011, 01:53 AM

عارفه ياسما انا مش بزعل لما حد يقولي عقبالك لأني ناويه تاني مقلتش اني خلاص علي كده
بس بضايق لما حد يعد يقولي عايزين نفرح فيكي اقولهم مركبه لولب يقولولي ممكن تحملي علي اللولب
وفي واحده زيك مأجله كده ولما حبت تحمل ربنا مدهاش وحجات غريبه
يعني بيفولي عليا في وشي
يعني ياحمل وابقي زيهم يااما كده ابقي وحشه
فعشان كده برد ردود عنيفه لأن الكلام بيخرجني عن شعوري
وكل شويه يلفوا يلفوا ويقولولي يارب نفرح فيكي
طب اقول ايه بقي !!!!

اهوه اهوه اعتراف رسمى وقاطع بالبراهين الساطعه انك بتردى ردود عنيفه
طيب انا عمرى جبت سيره اللولب
كل اللى قلته بكره نفرح فيكى
ايه الغريب فى كده ما اكيد فى يوم هاتشيليه ونفرح لك عادى ايه المشكله بقى
لكن حسيت انك بلغه السياسيين بتقلبى التربيزه
وايه بيفولوا عليا
وبعدين ايه اللى مزعلك فى ياست رنا
يانهار دا انا تقريبا كتبتهالك تانى فى المشاركه اللى قبل دى هههههههه
طيب انا اسفه يااخت رنا هههههههههه

نولارا

11-17-2011, 02:11 AM

وبعدين يارنا
لو رجعتى الصفحات تانى وشفتى اللى اتقال
هتلاقى انى بقولك بكره نفرح بيكى
قولتى انتى لا موش هتفرحوا فيا انا اللى هفرح فيكوا وانتوا جاريين اورطه عيال
كانى هاجيب العيل العاشر
رديت قولتلك ولا اورطه ولا حاجه
انتى بس اللى خايفه
لقيت ردودك بقت غريبه وكلها بتتكلمى عن دست عيال وكلام غريب
حطى نفسك مكانى واحكمى
والله يارنا انا اسفه للمره التالته وحقك عليا
بس انا ولا بتلكك ولا حاجه
يمكن اللى قالولك كلام ضايقك انا موش منهم
وانتى لما حبيتى تنفسى عن غضبك الكلام خبط فيا انا وعشان كده زعلت وقفلت الجهاز وقمت
وبرضه ما رضيتش انام وانا شايله منك
والحياه موش مستاهله نشيل من بعض
وكلنا هنا اخوات والمنتجع بالنسبالنا بقى شىء اساسى ما نقدر نستغنى عنه
وياريت تكونى نمتى وانتى موش مضايقه منى فى حاجه
انا هاقوم انام بقى وبجد موش زعلانه منك خلاص
بعيت اللى جواى وصفيت

رنا خالد

11-17-2011, 02:11 AM

نورا انا بعزك والله جدا عشان كده صعبت عليا نفسي منك وانتي عارفه ان انتي من الناس الغاليه عندي هنا وشوفتي الكلام ده قبل كده بنفسك فعشان كده اتقمصت بصراحه
بس مش انتي اللي قلتي كل الكلام ده انا سمعته من كذه حد بغض النظر عن الاسامي عشان محدش يزعل
وحقك علي راسي
انا مش بعرف انام ونا مزعله حد مني
الصبح لما شديت علي ملك اضايقت من نفسي جدا ولما حسيت انها مازعلتش ارتاحت
ودلوقتي ارتحت شويه لما حسيت انك فكيتي
صلي علي النبي ياحماة بنتي ومبروك ع الحمل وسيبك مني ياستي
وانا وربنا ماقصدت بكلمة فلاحين وصعايده حاجه انا كل قصدي انهم بيحبوا العزوه واللمه وبياكلوا عند بعض وعايشين في شقق بعض كده يعني
روح التعاون دي وربنا وحده هو اللي مضطلع علي نيتي
تصبحي علي خير ومبروك يانورا وربنا مايجيب زعل

somia

11-17-2011, 02:21 AM

حد هناااااااااااااا؟؟؟

somia

11-17-2011, 02:25 AM

نولارا

11-17-2011, 02:29 AM

انا كنت دخلت تحت البطانيه ورسالتك طلعتنى يارنا
والله انا كمان بحبك عشان كده زعلت
وانتى عارفانى مدب هههه
زعلانه بقول زعلانه موش بعرف اذوق او ادارى
وحقك عليا ياقمر والله موش زعلانه
خلاص ياحماه ابنى صافى يالبن حليب ياقشطه

نولارا

11-17-2011, 02:33 AM

معلش يارنا كان نفسى ابعت لك رساله بس انتى عارفه الرصيد بقى والمكالمات الدوليه
النهارده يادوب اتصلت بالراجل وقلتله انى عملت الالاختبار وهو قالى انا كنت حاسس
يادوب جيت ارن بعدها على توته قالى الرصيد لا يسمح
بالحق ياتوته رنتك موش شوفتها ياقمر كنت عند علا
يادوب لسه شايفاها قبل رساله رنا

somia

11-17-2011, 02:37 AM

نورا انتي هتنامي ولا هتفضلي صاحية؟؟؟؟

om arwa

11-17-2011, 02:44 AM

ياعينى يا نورا هههههههههه
احلك رصيد تكلمي خالودك
الله انا كمان فلست من ام الشغل نفضل نتكلم على حسابنا كانهم بيقبضونا يعنى

somia

11-17-2011, 02:48 AM

بت يا سما اروى صحيت زي الهانم المزقططة جمبي ولا ايه؟؟؟

somia

11-17-2011, 02:50 AM

سما كنت عايزة أسألك هما الاطفال الطبيعي المفروض يسننوا ويقعدوا ويسحفوا ويقفوا ويمشوا امتى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

MALAK2010

11-17-2011, 07:32 AM

صباح الخير على الحلويييييييييييييين
اقرا بسرعه اللى فاتنى وجايه

MALAK2010

11-17-2011, 08:01 AM

ياااااااااااااااااااااااااااااه خلصت اخيراااااااااااااااااااا
ايه ده كله

انتوا كنتوا بتتناقشوا فى الموضوع ده وانا كنت عامله فرح علشان سلمى عملت بيبى هههههه
بس الحمد لله ان الكل نام وهو مش زعلان من حد
احنا بجد زى الاخوات والمنتجع هنا بقى اساسى فى حياتنا مش عارفه مين اللى قالت الجمله دى ههههه اصل قريت كتييييييييييييير

بس ياريت يابنات نعرف ان لغه التواصل بينا هى الكتابه يعنى مفيش ملامح وحش علشان نعرف مين بيكلم جد وميين بيهزر وكمان احنا مش اون لاين مع بعض علطول لا كل واحد يدخل يلاقى كلام يقوم يرد والتانى لما يجى يقوم يرد فالموضوع بيطوووووول

ربنا يبعد عن الشيطان يااااارب والله احنا بنكلم هنا اكتر ما بنكلم اجوازنا هههههههههه

توتة السيد

11-17-2011, 09:02 AM

صباح الحليب والقشطة يامزز عاملين ايش

ايون كده احنا اسرة مع بعتينا بسيوني بسيوني حازم حازم ههههههههههههههههههههههه

ربنا يديم علينا المحبة والصحبة الحلوة ومايفرقنا من بعض ويبعد عننا شوشو ابن التييييييييييييييت ده

راناا

11-17-2011, 10:19 AM

صباح الخيرات يا سيدات مصر
حموت وانااااااااااااام
ايدى منيمتنيش امبارح من كتر التنميل
كل ما انام اصحى امتى يجى الاتنين واقول للدكتور
حكم السيد الاستاذ الدكتور الباشمهندس مش بيرد على التليفون
انا عارفه حيولدنى ازاى ده وهو مش بيرد

ommaysoon

11-17-2011, 10:45 AM

الف سلامه عليكي يا رانا
نصيحه مني الدكتور اللى تلاقيه منفض دورى على حد غيره يكون عنده امانه وضمير وتحسي انه بيهتم وحاسس بيكي مش كل همه يلم فلوس الكشف والولاده وخلاص

om arwa

11-17-2011, 10:46 AM

ياسمية الافال ليهم رينج
التسنين مكن يبدأ من 6 شهور لغاية 9 شعور طبيعى جداااااا اى وقت فى النص
الزحف من 9 شهور
المشى على سنة
هى دى الرينجات الطبيعية
ممكن يزيدوا او يقلوا حاجة بسيطة يعتبر عادى بردو

توتة السيد

11-17-2011, 10:46 AM

ههههههههههههههههههههههه صباح النور يارانيا عاملة ايه الف سلامة عليكي

بقولك التنميل ممكن يكون انميا الانميا بتعمل تنميل شديد كده ابقي اعملي تحاليل وطمني

ولو مافيش يبقي من الحمل عادي ماتقلقيش والباش مهندس الدكتور هههههههههههههه ربنا يهديه ويرد

om arwa

11-17-2011, 10:48 AM

اه فعلا عندها حق م ميسون لازم وقت ماتحتاجية تلاقية

ommaysoon

11-17-2011, 10:49 AM

يا بنات انا مش عارفه ايه الحل فى تعبي
جوزي المرة دى منفضلي وبيقولى انتى حملتى قبل كده يعنى مش شغلانه
والبيت يضرب يقلب مش قادره اقوم اعمل اى حاجه

om arwa

11-17-2011, 10:50 AM

توتة السيد

11-17-2011, 10:51 AM

صباح الخير ياشوشو عاملة ايه انت واحمد والنونو

معاكي حق والله فعلا لازم يكون عنده ضمير

حسبي الله ونعمة الوكيل في الدكتور اللي مايرعيش ضميره لسه دلوقتي

سامعة قصة تقطع القلب عن اهمال الدكاترة

بعيد عنا وعفانا الله واياكم والجميع ست راحت تولد عند دكتورة

راحت اللي الله يجزيها ادتها 3 حقن طلق مرة وحده راح عفانا الله

عملها انفجار في الرحم واول ماعرفت ان الحاله ادهورت بسببها قلت لاهلها خدوها

مستشفي تانية فيها امكانيات اكتر وراح المستشفي مالقوس ولا دكتور اللي بيتطفح اكل

واللي مخمود وسابوا الست ياحبه عيني لحد ماتوفت منهم لله

om arwa

11-17-2011, 10:51 AM

طب ما ينفعش تجيبى حد يساعدك حتى لو مرة او مرتين فى الاسبوع
والاكل معلش ممكن تقضوها اى حاجة
المهم طلبات احمد هى اللى مش هتقدرى تفلفصى منها

توتة السيد

11-17-2011, 10:53 AM

معلش ياشوشو كلنا لها اول تلت شهور دول رخمين وتعبهم غلب والله ربنا يعديهم علي خير

ommaysoon

11-17-2011, 10:54 AM

انتى ممكن كمان تكونى محتاجة فيتامينات تقى الاعصاب
مجموعة فيتامينات ب
بس مش انتى اكيد بتاخدى المالتى فيتامين هى فيها
بتاخديها ولا لأ
كمان الحمل فعلا بيعمل تنميل غبى
انا كتير بصحى من وجع ايدى المنملة
وان اكمان الحمل ده قبل مااعرف انى حامل لاقيتنى بنمل بسرعة شكيت انى حامل هههههههه
كانة علامة من علمات الحمل

يا سلاام
يعنى التنميل ده من الحمل
ده انا مستغربه انا ليه ايديا بتنمل بسرعه وانا نايمه بس بقول يمكن نمت غلط
اصل انا بنام زى القتيله لانى مابعرفش انام طول النهار من احمد
مابقتش بعرف انام غير على ضهرى عشان ايديا ماتنملش
تفتكرو عشان مثلا الدورة الدموية بتتغير فبقى الدم بيوصل ضعيف لبقية الجسم

توتة السيد

11-17-2011, 10:55 AM

ازيك اسمسمة عاملة ايه ياقمر انت والقطط

بقول لجوزي امبارح ايه رائيك نسمي النونة سما قال حلو سبيني افكر ههههههههههههههههههه

om arwa

11-17-2011, 10:56 AM

انا كنت بتابع مع واحدة هى كويسة وممتازة بس مرة تعبت اوى الشهر اللى فات لقيتها ماردتش ع التليفون
وبعدين مرة قبلتها وان افى الشغل لانها مدرس عندنا قبل العيد على طول
كلمتنى عادى وقلتلها انا جيالك بعد العيد على طول
قالتلى اوكى ومستنياكى
روحت الاسبوع اللى بعد العيد لاقيتها سافرت مؤتمر
اتغظت طب انا كنت معاكى ماقلتيش ليه انك مسافرة
بعض الظن اسم بردو يمكن تكون ماكنتش عارفة
بس حاساها حاجة رخمة تلاقى الدكترة سافرت فجأة
روحت لدكتورة تانية اللى ولدت اختى
وهستخير بقى اكمل معاها ولا ايه

ommaysoon

11-17-2011, 10:58 AM

صباح الخير يا توتا عاملة ايه انتى والبنوتة ؟

والله يا ام اروا هو جوزي بمزاجه ساعات بيسكت ومابيتكلمش بس بلاقيه متعصب واى حاجه بيروح مزعق عليها حتى لو مش مستاهله
وسعات يتكلم ويقولى هتعملى اكل امتى وبطلى دلع هو ده اول حمل يعني فعلى قد ماقدر اقوم اعمل اى حاجه
امبارح قمت وقفت عملت بيتزا للغدا على السريع كده بالباف باسترى اللى نفسي قدرت تتحملها
بس طول مانا واقفه مش طايقه ريحه اى حاجه بس هو مش مقدر ده خالص وفاكرنى بتدلع

ربنا يعدي الوحم ده على خير

om arwa

11-17-2011, 10:59 AM

هيه هيه
عايزين سما
ايوة يا توتة سميها سما عشان افرح بيكى
بصى بصراحة لغاية دلوقتى لما بقول لحد اسمى يقولى ماشاء الله اسمك جميل اوووى
الكلام ده من وانا صغيرة الى الان
استخيروا كدة ربنا يقدرلها اسم حلو

om arwa

11-17-2011, 11:01 AM

معلش انتى قوليلة انتى اد ايه تعبانة
هو يمكن مش متخيل حجم التعب بس انتى قوليلة عرفيه وربنا يهدية يقدر
وهانت ان شاء الله قوليلة شهرين وافوق وابقى كويسة اعوضك ان شاء اللله
مع ان الحمل كلة ارف ههههههه
بس اديلة امل

توتة السيد

11-17-2011, 11:02 AM

الحمد لله يشوشو بخير تسلمي معلش ربنا يهديه عليكي ويعدي اشهر الوحم علي خير

ommaysoon

11-17-2011, 11:02 AM

سما جميل يا توتا
خفيف وظريف اخف من اسماء ودلعه سوسو برضه جميل
بس خدى بالك ان شاء الله من الذرة بقى يا سوسو هههههههههههه

ommaysoon

11-17-2011, 11:04 AM

المشكلة انه فى حملى الاول يادوبك قعد معايا اول شهر وبعدين سافر لحد ما وصلت للشهر السادس فماعش معايا شهور الوحم والتعب دى امي هى اللى قفرت مني ايامها والله
ربنا يخليهالى كانت ترجع من الشغل تلاقيني نايمه اصحى اقعد معاها انام وانا قاعده كانت بتقولى انتى قاعده معايا عشان تنامي وخلاص
ههههههههههههههه

توتة السيد

11-17-2011, 11:06 AM

هههههههههههههههههههههه هو جميل فعلا ياسما ربنا يسهل يارب

ويكتبلها اسم حلو وجميل

توتة السيد

11-17-2011, 11:08 AM

اه فعلا ياشوشو بس مش فاهمة خدي بالك من الذرة يعني ايه

ommaysoon

11-17-2011, 11:10 AM

بتاعه محمد هنيدي فى عسكر فى المعسكر
الحب ولع فى الذره يا سوسو
هههههههههههههه

MALAK2010

11-17-2011, 11:10 AM

عودنااااااااااااااااااااااااااااااا

ommaysoon

11-17-2011, 11:13 AM

اهلا اهلا يا ملك

ommaysoon

11-17-2011, 11:19 AM

رحتو فين ؟

MALAK2010

11-17-2011, 11:19 AM

ازيك يا ام ميسون
انتى عاوزة تجيبى بنت وتسميها ميسون ولا انتى عندك ميسون

توتة السيد

11-17-2011, 11:20 AM

هههههههههههههههه اه

لوكة خلصتي وحياتك كل اللي عملته اني صليت بس

ommaysoon

11-17-2011, 11:20 AM

ازيك يا ام ميسون
انتى عاوزة تجيبى بنت وتسميها ميسون ولا انتى عندك ميسون

ههههههههه
انا كل يوم بيسالونى السؤال ده على فكرة
بتمنى ربنا يرزقنى ميسون ومش عارفه لو جه ولد هعمل ايه بس الحمد لله يارب تكون بنت ادعولى
:)

MALAK2010

11-17-2011, 11:24 AM

يانهارى ياتوتا صليتى بسسسسسسسسسسسسسسس ازااااااااااااى احنا سايبن بعض من ساعتين ههههه

om arwa

11-17-2011, 11:25 AM

انا نفسى اكل طعمية
اكيد مش هنزل اشترى
انا عايزة بوااااااااااب مليش دعوة اهىء اهىء
طب افطر ايه؟؟؟؟؟؟؟؟

MALAK2010

11-17-2011, 11:26 AM

معلش ياام ميسون ماخدتش بالى اصل الدارج ان اللى عندها طفل بتسمى نفسها بام كذا
اما اللى بتسمي نفسها على اسم اللى حامل فيه بيبقى فى الاغلب لماتكون حامل فى اول حمل

توتة السيد

11-17-2011, 11:26 AM

والله يالوكة صليت وكلت لقمة وبس طلعت اللحمة تفك وخلاويص ومكسلة اقوم ياربي

كل يوم اكل مافيش صيام قريب هههههههههههههههههههههه

ommaysoon

11-17-2011, 11:27 AM

يعنى لما تتوحمى تتوحمى على طعميه
الحمد لله ان مافيش بواب ههههههههه
الطعميه متعبه يا بنتى فى الحمل عشان البصل وكمان بتتعب القولون بعد الشر عليكي

ommaysoon

11-17-2011, 11:30 AM

معلش ياام ميسون ماخدتش بالى اصل الدارج ان اللى عندها طفل بتسمى نفسها بام كذا
اما اللى بتسمي نفسها على اسم اللى حامل فيه بيبقى فى الاغلب لماتكون حامل فى اول حمل

انا فى حملى الاول ماكنتش اعرف المنتديات لسه مالحقتش ههههههههههه
وكان نفسي من اول حمل برضه اجيب بنوته بس امدى دعتلى بالولد عشان اهل جوزى ارياف وكلامهم مش ظريف فى الحاجت دى فدعتلى اجيب ولد عشان اسكتهم
فبقيت ادعى ان ربنا يرزقنى باللى فيه خير لينا المهم يكمل على خير
فربنا يرزقنا المرة دى بنوته وتكون خير لينا ويكلمى الحمل على خير انا وانتو وكل الحوامل
امين

MALAK2010

11-17-2011, 11:33 AM

ازيك يا سما وازاى اروى
عاوزاكى فى استشاره يا دوكتور
سلمى كانت قبل مااكلها كانت بتعمل حمام بيبى طبعا مرة واحده فى اليوم
واذا اتاخرت يبقى تتاخر يوم وتانى يوم تعمل علطول بس مش علطول الموضوع التاخير ده
من بعد مااكلتها مش بتعمل حماما لواحدها خالص لازم اعطيها لبوسه اخر مرة قولت لما اشوف مش هعطيها لبوسه وعطيتها سوايا كتير بس برضه قعدت يومين والتالت بالليل تعبت وقعدت تعيط فعطيتها اللبوسه
اعمل ايييييييييه

MALAK2010

11-17-2011, 11:35 AM

من الصبح بتقوليلى اطلع اللحمه تفك هههههههههههههههههههه ولا فى طبيخ وعاوزة اعمل شيش طاااااوق وحركات امتى بقا ههههههه

توتة السيد

11-17-2011, 11:41 AM

انا عارف يالوكة ربنا يسهل واقوم من الكسل ده وعمل

om arwa

11-17-2011, 11:44 AM

ده مش وحم انا عديت شهور الوحم
انا نفسى فيها عشان بقالى كتير ماكلتهااااااااش
هى متعبة بس بتوحشنى

MALAK2010

11-17-2011, 11:46 AM

انا برضه عاوزة اكل طعميه بس مصرررررررررررررررررررررى

om arwa

11-17-2011, 11:47 AM

اكيد اكلتيها حاجة بتعمل امساك اكيييييييييد
جزر
بطاطس
ايه ؟؟؟؟
ممكن يكون لةس عشان مش واخدة ع الاكل
اكليها حاجات الاول تساعد ان ما يبقاش فيه امساك
عصير برتقال
كوسة
خضروات
موزة
بعد كدة خليكى ماشية بالسوايل لغاية ماهضمها ينتظم
ينسون نعناع الحاجات دى
وهتتحسن
هو فى اول الاكل ساعات يجيلهم امساك اواسهال
الحمدلله انه امساك

MALAK2010

11-17-2011, 11:48 AM

معقوله الطفل ممكن يحبى عند 9 شهور حاساه كتييير اوى انا متخيله ان على 6 شهور
والمشى من 9 شهور لغايه سنه وشهرين

om arwa

11-17-2011, 11:51 AM

كل الحركة تحت تحت ياربى انا تعبت الحمدلله

توتة السيد

11-17-2011, 11:52 AM

ده الحد الاقصي يالوكة يعني لو عد ل9 شهور ماحباش مايبقاش في مشكله

لكن الحبي ممكن قبل كده طبعا انا نور زحفت اول مادخلت السابع

MALAK2010

11-17-2011, 11:52 AM

انا بشربها برتقال وجوافه والاعشاب مش بترضى تشربها ابداااااااااااااا
اه انا اباكلها تفاح وجزر انا عارفه انهم بيعملوا امساك بس بقول العصاير والميه هتظبط بس مش بتظبط

يعنى اكلها موز الايام دى

om arwa

11-17-2011, 11:53 AM

لا يا لوكة سن الزحف الطبيعى 9 شهور
فى اكفال بتبقى اشطر
بيسحفوا 7 او 8
بس قليلين
التسنيد هو اللى من 9 شهور ل 11 شهر مثلا
المشى بعد كدة
لو بيبى شاطر بيمشى ع السنة تمام

توتة السيد

11-17-2011, 11:54 AM

انما لو اتاخر عن 9 شهور يبقي في مشكلة

بصي ياقمري اكلي سلمي زبادي وعصير برتقان

وبلاش الجوافة لانها بتعمل امساك

وشوفي اعمليلها مساج علي بطنها باطراف اصابعك

دي سذمعتها من ام خبرة وفعلا بعملها مع نور وتعمل حما/ علي طول

MALAK2010

11-17-2011, 11:55 AM

انا عاوزة سلمى تعمل اى حاجه تحبى تمشى اى حاجه هههههه بس من كلامكم يبقى لسه بدرررررى

om arwa

11-17-2011, 11:56 AM

يا ملك طبعا التفاح الجزر الجوافة امساك فظيع
اديها برتقال
وشربة خضار من غير بطاطس
لو عدت 6 شهر اديها موز

MALAK2010

11-17-2011, 11:57 AM

الزبادى سما بتقول مش الوقتى دى ماما نفسها اكلها زبادى

انا قريتلك قبل كده على موضوع المساج عملته والله وماجبش نتيجه وانا مش عاوزة اعوده على اللبوس

om arwa

11-17-2011, 11:57 AM

اها حلو المساج ده بيمشى القاولون
بس بلاش زبادى قبل ماتتم 8 شهور

توتة السيد

11-17-2011, 11:58 AM

ايه ده ما شاء الله لا قوة الا بالله نور من الاطفال الشاطرين حبت علي السابع وباذن الله علي السنة هتمشي هي بتمشي ما شاء الله دلوقتي بس علي الحاجات يعني تقف علي التربيزة وتلفها بتحج ههههههههههههههههه

ربنا يحميهالي يارب

صلي علي النبي يابت منك لها لها ههههههههههههههههههههههه

om arwa

11-17-2011, 11:59 AM

بصى هى دلوقتى سن القاعدة اناه تقعد وصالبة نفسها
لو بتقعد يبقى كتر خيرها وماتستعجليش ع الباقى كلة باوانة

توتة السيد

11-17-2011, 11:59 AM

ليه بلاش زبادي ياسما انا اكلت نور زبادي وهي رابع شهور وكنت قايلة للدكتورة وقالتلي عادي

MALAK2010

11-17-2011, 11:59 AM

ماانا اكلتها يوم حاجه من اللى بيعمل امساك وبعدين اليومين التانين عاطيتها سيريلاك بس وعصاير وبرضه جالها امساك

خلينى علذى الكوسه لاسيريلاك اليومين دول واشوف لونها مش بطيق اصلا الخضار

om arwa

11-17-2011, 12:01 PM

ههههههههههههه
ربنا يحميها يارب

MALAK2010

11-17-2011, 12:02 PM

اللهم صلى على سيدنا محمد ماشااااء الله ربنا يحميها ويبارك فيها

om arwa

11-17-2011, 12:02 PM

لالا يا توتاوالله اخدين اناه مش قبل 8 شهور
زمان كانوا بيدوها بدرى بس غلط عشان هى من حليب بقرى وكدة
واللبن مش قبل سنة

MALAK2010

11-17-2011, 12:04 PM

جايبه ذلسلمى ايس كاب عسول اوى بس حاساه ضيق عليها هى اصلا بتعيط لو لمست راسها مش مديانى فرصه اعرف ضيق ولا على مقاسها

MALAK2010

11-17-2011, 12:07 PM

ماما نفسها اكل سلمى زبادى وبعسل ابيض كمان
وحماتى تقولى على العنب ههههههه
وانا اقول لماما قريت على النت صاحبتى من على النت قالتلى ههههلما خلاص قالتلى ربى بنتى واكلى بنتك زى ماانتى عاوزة

om arwa

11-17-2011, 12:07 PM

مبروك عليهااااااااا
قيسهولها وهى نايمة

MALAK2010

11-17-2011, 12:10 PM

وهى نايمه ههههه ابدااااااا ده انا بمشى على طراطيف صوابعى

om arwa

11-17-2011, 12:10 PM

كويس انها ماقالتلكيش ربيها ع النت هههههههه
بصى الناس الكبار ربنا يخليهم
بس بجد مادام ربنا رزقنا علم مانعملش بيه لية
انا ل سمعت كلام جدتى كنت هاكل اروى لبن وزبادى وكل حاجة على شهرين
حماتى بقتولى مرة كانت ماكلها بنتها محشى كرنب وهى 4 شهور هههههههه
وراحت للدكتور تقلة عندها كحة
الدكتور يكشف لاقاها عندها تلبك معوى فظيع
يقولها انتى اكلتيها ايه انتى سيبا البلاى اللى فى بطنها كل اللى لفت نظرك الكحة هههههههه

om arwa

11-17-2011, 12:13 PM

كمان حماتى تقولى الزبادى والبسكوت ع الاربعين هههههههههه
تخيلوا
بس بصراحة مابتدخلش تقلى اكليها كذا
لا هى بتقولى كنا بنعمل كذا
لكن لما اسيبها معاها تقولى ألأكلها ايه ؟؟؟؟
عشان تديها الحاجات اللى بأكلها مش حاجة تانية
تقولى انتى حرة فى بنتك

MALAK2010

11-17-2011, 12:14 PM

هههههههههههههههههههههههه

محشى كرنب يانهار ابببببببيييييضضضضضضض

توتة السيد

11-17-2011, 12:17 PM

ماعرفش ياسمسم والله انا شورت الدكتورة حتي وقالتلي عادي ياله بقي اكلتها واللي كان كان خلاص دولوقتي بقي كبرنا بناكل طوب الارض ما شاء الله

توتة السيد

11-17-2011, 12:21 PM

ههههههههههههههههههههههههههههههههههه يانهار محشي كرنب علي شهرين كماان

دي عايشة بقي

توتة السيد

11-17-2011, 12:26 PM

http://forums.fatakat.com/thread690551

توتة السيد

11-17-2011, 12:28 PM

http://forums.fatakat.com/thread852601

MALAK2010

11-17-2011, 12:30 PM

شوفوا الموضوع ده حلو اوووى فيه اسطوانات كتيييييييييييير لتعليم الاطفال ممكن تستفادى منه يا سما لاروى

http://forums.fatakat.com/thread1677503

توتة السيد

11-17-2011, 12:34 PM

http://www.youtube.com/watch?v=WUWcHkFFVX0

توتة السيد

11-17-2011, 12:51 PM

روحتوا فيييييييييييييييييييييييييين

دودى مجدى

11-17-2011, 02:19 PM

صباح الخير عليكو

نولارا

11-17-2011, 02:33 PM

ياعيال ادعولى نا بفطم احمد النهارده ومطلع عينيا
غير ان اللبن واجعلى صدرى
بصوا انا حطيت مكركروم وغليت لبان دكر وحطيته الماء بتاعته
فهو شاف الشكل وداقث الطعم قال اووف وقرف بس برضه بيعيط وعاوزه لانه موش بينام غيرر وهو بيرضع
ادعولى يابنات بالله عليكم يسهل الفطام عليه وعليا ياااااارب
سما هو صدرى هيفضل يوجعنى كام يوم

أم سلسبيل

11-17-2011, 02:38 PM

السلام عليكم

ازيكم يا حبايبى

أم سلسبيل

11-17-2011, 02:40 PM

استحملى يا نورا ربنا يكون فى عونك

هى تبقى صعبه فى اولها

وحاولى تخرجى بيه او تلاهيه مع اى حد بيحبه

مباااااااااااااااركــ عليكى الحمل يا قلبى

ربنا يتمملك بخير يارب

ويقومنى ويقومك بالسلامه يااارب

نولارا

11-17-2011, 02:44 PM

عاوز ينام وبيعيط موش عارفه اسكته
انا هاخد العصير والبسكوت وانزل بيه الشارع

om arwa

11-17-2011, 03:40 PM

يا حبيبتى يا نورا ربنا يعينك
اول 3 ايام اصعب ايام علية وعليكى
واللبن هيتحوش فيهم
بس ما ينفعش تاخدى الدوا اللى بينشف اللبن عشان انتى حامل
بصى النوم اصعب مشكلة هتواجهه
فانتى احسن حاجة تصحية بدرررى وتفضلى طول اليم تصحصى فيه عشان يجى على بليل على 9 ا او 10 بالكتير
يقع ينام لوحدة من غير ما يدور ع الرضاعة
وطبعا لو خرجتية او ودتية عند حد يلعب ويسهى عنك يبقى احسن
وربنا يعينك

om arwa

11-17-2011, 03:41 PM

مروة ازيك يا حبيبتى
وازاى عبد الله
كنتى مختفية فييييييييين

om arwa

11-17-2011, 03:42 PM

توتة ااااااااااه يا حبيبتى اخت جوزى اللى كانت بتاكل كرنب وهى 4 شهور كبرت وفى اولى هندسة ماشاء الله دلوقتى
بس وهى صغيرة كان عندها حساسية جامد انا شاكة انه من الاكل بدرى والله اعلم

دودى مجدى

11-17-2011, 04:08 PM

نورا ربنا معاكى يا رب معلش هو تربية العيال كدة مش بالسهل الله يكون فى عونك ويسهلها عليكى وعلية

نيهال

11-17-2011, 04:17 PM

السلام عليكم و رحمة الله و بركاته

om arwa

11-17-2011, 04:26 PM

دودى
اخبارك ايه؟؟؟؟؟؟

نيهال
عاملة
ايه نفسيتك عاملة ايه
دلوقتى يا بنتى بجد ماتقلقيش انتى بس عشان صغنونة اعتقد عشان كدة محصلش حمل
انتى عملتى التحاليل انتى وجوزك
كمان احلى حاجة بجد تعمليها للحمل الاستغفار وقيام الليل تتدعى قراة سورة البقرة بنية الانجاب
بس عيزاكى تفرفشى ومتكتبيش تعيشى حياتك وتفرحى وهو قت مارايد ربنا هيكتبلك ان شاء الله بس مع الدعاء طبعا