قصتي لتحقيق حلم الإنجاب

[أم عائشة]

السلام عليكم ورحمة الله وبركاته
كنت مترددة واااااايد أني اكتب هالموضوع لاني احس باللي تحسونه بس الله الشاهد علي انه ماكتبت هالموضوع الا عشان أعطيكم امل واقولكم لاتياسوا من رحمة الله تعالى

حبيباتي أنا عندي ولدين ولله الحمد واصغر ولد عمره 12سنة يعني من صار عمر ابني سنتين وانا أحاول احمل وماخليت طبيبة مارحتلها هني وبالاردن وبسوريا
وكلهم اجتمعوا على راي واحد انتي صار معج عقم ثانوي وعلاجج بيطول
تعبت وانا اتعالج11 سنة وانا من طبيبة لطبيب
وكل مااسمع وحدة حملت اسألها وين اتعالجتي واروح لعند دكتورهاوابتدي العلاج من اول الطريق
زوجي تعب معاي وانا تعبت وياست وقلت خلاص ماابي احمل
الحمدلله عندي ولدين غيري ماعنده حتى واحد
لكن شعور الأمومة واشتياقي أني ارجع احضن طفل صغير ماكان يتركني واستخرت رب العالمين وقررت أني اسوي انابيب رغم أني فوق 35 وكانت نسبة نجاحها 40/:لاني فوق 35 بس قلت معليش خلني اجربها يمكن الله كاتبلي الخيرفيها وفعلا سويتها وفي اليوم 11حللت وسمعت الكلمة اللي صارلي 11سنة انتظرها
مدام أنتي حامل
ماصدقت سجدت لربي ابكي وأشكره
ومن فرحتي خبرت اهلي وأهل زوجي وصديقاتي والكل
لكن الله كان كاتبلي امتحان وبيشوفني اصبر لو لا
عقب ماعرفت أني حامل وتوام بعد توقف نبضهم ونا للحين بالشهر الثاني
انصدمت
ليششششششششش.?
ليش رب العالمين سوى فيني هاللون?,!! يعني اذوق الفرحة شهرين وعقب أموت مع موتة هالفرحةاللي كنت انتظرها سنين
مااكذب عليكم كنت مقهورة وانطويت على نفسي ونسيت انه الله سبحانه مايكتبلنا الا كل خير
نسيت انه كل أمورنا خير حتى ولو كانت بظاهرها فيها حزن واسى بس أهي خير لنا
رجعت استغفرت ربي وشكرته لانه أوكان فيهم خير لي أكيد رب العالمين ماكان بيحرمني منهم
وقررت ارتاح وتطوعت بمركز اورام الاطفال وشفت شكثر إحنا بالف خير ونعمة
شفت ليش الله وقف نبض اجنتي لانه سبحانه ماكان يبيني أبيب أطفال مشوهين او مرضى
سبحانك يارب
وظليتمع الاطفال حوالي ثمانية شهور وتعلقت فيهم وتعلقوا فيني وقررت أنا وزوجي انه نرجع نعيد العملية لآخر مرة
وعدتها برمضان وعند نفس الطبيب لاني كنت مقتنعة بانه طبيب رائع
وفي اليوم 11للترجيع سمعت الكلمة اللي كنت خائفة أني أسمعها
مبروك انتي حامل
خفت اكثر من أني افرح
خفت تنعاد تجربتي
خفت افرح وتموت فرحتي
بس شكرت ربي حتى لو كانت فرحتي مؤقتة شكرته لانه سبحانه يرزقني بالفرح حتى لو كانت فرحة مؤقتة وقررت أني مااخبر احد
مو لاني خائفة من الحسد لا
لاني ماابيهم يفرحون لي وعقب يصير معاي نفس اللي صار وينصدمون نفسي
وقعدت اعد الايام عشان اسمع نبض البيبي
ويوم الموعد كنت خائفة وكنت استغفر واقول يارب لاتحرمني من سماع نبضه يارب
ويوم سوالي الدكتور سونار ماسمعني نبضه سكت وطالعني وانا هني مت من الخوف
اقوله دكتور شنو فيه
الله يخليك لاتخش علي قولي الصراحة مافه نبض صح
طالعني وقالي صح مافيه نبض
دمعت عيوني وقلت الحمدلله وطالعت زوجي وشفت الدموع بعينه وقلتله سامحني لاني غربلتك معاي وخلاص أنا اقتنعت باللي عندي والحمدلله
وفجأة سمعت صوت غريب صارلي 12 سنة من سمعته سمعت نبض طفلي
طالعت الطبيب الا اهو يضحك ويقولي أنا قلتلك مافي نبض لانه فيه نبضين مو نبض واحد
انتي حامل بتوام
والله ماعرفت شنو ابي اسوي
سكت وطالعا زوجي
صج
أنا حامل بتوأم وسمعت نبضهم
يالله شكثرانت عظيم سبحانك اذا اعطيت أدهشت
والحمدلله مرت شهور الحمل بتعبها بس كنت مبسوطة رغم التعب والتقل كنت مبسوطة
والله رزقني بإبراهيم واحمد والحمدلله على عطاياه
ابي منكم بس دعوة انه الله يحفظلي أولادي واسأل الله العظيم رب العرش العظيم ان يرزقكم فرحة كفرحتي عاجلا وليس آجلا

[أم عائشة]

ترى انا كنت كاتبة هالموضوع قببل شهر تقريبا والحين سويتله نسخ

بس بضيف عليه صور تونزي


بس صلوا على النبي وقولوا ماشاءالله







[IMG]http://i.imgur.com/u1189.jpg[/IMG[IMG]
[/IMG][/QUOTE]




[IMG]
[/IMG]
[/QUOTE][/IMG][/QUOTE]

[المتأمله خير]

ماااااااااااااااااشااااااااااااااااااااااء الله تباااارك الرحمن ربي يحفظهم لك ويحفظهم من كل شر

الحين انسخيها وحطيها في الموضوع المثبت وحطي شعار المسابقه في توقيعك

على فكره انا تذكرت قصتك

[حفيدة الامير]

ماااااااشاءالله تباااااارك الرحمن

سبحانك ربي مااكرمك كم فضلك علينااا كبير

والله فرحتلك من كل قلبي ربي يحفظهم لك

ويارب يرزقك ببنوته زيك قمررر

ياااارب لك الحممممد قصتك تعطي ااامل وتفاااائل

دعواتك لنـــــــــــا حبيبتي

[همسة برئية]

ماشاء الله تبارك الله

ربي عوضك عن صبرك خير لك الحمد يارب

الله يحفظهم ويخليهم لك ويرزقك برهم ويقر عينك

[صاحبة السمو الرفيع]

الله يحميهم يارب ماشاءالله تبارك الله

[ربي لا تذرني فرداً]

ماشاءلله تبارك الرحمن الله يحفظهم

[فوضت امري لله]

ام عائشه قصتك رووووعه



الله يحفظهم لك ويقر عينك ببرهم بك


فعلا مافيه اعظم من رب العالمين

يشرفني انضمامك لنا يالغلا

[خاتونة زوجها]

ماشاء الله تبارك الرحمن ربي يحفظلك اولادك ويفرحك فيهم قصتك رائعه ومؤثره ادعيلي ربي يرزقني بالذريه الصالحه لاني بموت خوف كل شهر نفسي بطفل يفرح زوجي ويفرحني امين رب العالمين

[أم عائشة]

المشاركة الأصلية كتبت بواسطة المتأمله خير

ماااااااااااااااااشااااااااااااااااااااااء الله تباااارك الرحمن ربي يحفظهم لك ويحفظهم من كل شر

الحين انسخيها وحطيها في الموضوع المثبت وحطي شعار المسابقه في توقيعك

على فكره انا تذكرت قصتك

فديتج والله ماقصرتي على دعوتك الحلوة
ربي يتمللج على خير يارب وماقصرت اختي فوضت امرئ لله نسختها يعطيها الف عافية