للحفاظ على منطقة طفلك الحساسة / تجربتي

[fony]

السلام عليكم ورحمة الله وبركآته

صبآحكم / مسآئكم سعآدة وراحة بــال


ترددت كثير قبل مآ أحط الموضوع ، هل بيفيد أحد أو لآ !

بدآخلي حآجة ملحة إني أحطه بسبب الفظآيع إللي أشوفهآ بالأطفآل ،
لو مو قد مسؤولية إنك تهتمي بالطفل ليش تحملين من الأسآس !!
مع الأسف الآن كثير أمهـات مهملين أطفآلهم بدرجة مو طبيعية ، كل إللي يهمها لبسه الخآرجي وبس ،
عشآن شكله قدآم النآس طبعا ، بس من جوا رحمة الله عليه .
أمآ النوع الثآني إللي مخليه كل شي يخص طفلهآ ع الخدآمة وكأنهآ هي أمه ،
وهي تشوف إنجآزهآ بإنه حملته تسعة أشهر وولدته وبس إنتهت مهمتهآ كـ أم !!
م بتكلم عن كل شي في الطفل بس بتكلم عن المنطقة الحسآسة للطفل وكيف ممكن نحآفظ عليهآ بدون تسلخآت وإحمرآر ومشآكل !
هالمشكلة إللي أصبحنآ نشوفهآ كثير تسلخــآت وإحمرآر !! والمشكلة الأم تجي تدخل النت أو تسأل أي وحدة من جآرآتهآ أو أهلهآ
وكأنهآ دكتورة وفآهمه كل شي والمشكلة الأهم تجيكك الثآنية مسوية نفسهآ خبيرة تفتي وتعطيكك خلطآت على كيفهآ !!
بشرة الطفل وخآصة قبل ستة أشهر تكون جداً جداً حسآسة ، أرق من بشرة البآلغ بعشر مرآت تقريباً ،
إذاً يبغى لهآ عنآية خآصة وإهتمـــآم كبير ، وخآصة منطقة الحفــــاظ أكثر منطقة معرضة للتسلخآت والتهيجآت والإحمرار !
عشآن نحآفظ على هذه المنطقة بدون أي تسلخـــات أو إحمرار لآزم نرآعي أشيــاء كثير :


الحفــــــاظ :

طبعاً له دور كبير لأنه يبقى في الطفل أغلب وقته ، فـ نرآعي إنه يكون الحفـــاظ من نوع جيد ومعروف
أنآ مو خبيرة في الحفاظات ولا جربت كل الأنواع عشــان أفتيكم ! بس تقريباً كل الأنواع الموجودة بالسوق ممتآزة !!!
إيه تقريباً كل المآركآت الموجودة ممتآزة لآ تستغربون العيب مو في نوع الحفآظ العيب مننآ في طريقة التنظيف أو إن بشرة طفلنآ حساسة بزيادة
تجربتي كانت مع بامبرز بس كان يسرب كثير وهذآ إللي ضآيقني وتركته ،
بيبي جوي لي أكثر من سبع شهور آستعمله الحمدلله مآشيه التمـــام التمــام معه ،
كلنآ نعرف إن الشي إذا ارتفع سعره زادت جودته ، فـ أكيد مو تروحي تشتري أرخص الأنواع وبعدين تجين تقولين تسلخآت !

في مرة شفت نوع حفآظ تجي تقريباً 40 حفآظة بـ 10 ريآل !!! والمصيبة كثير يشترون منه !! وبعدين تجي تدور خلطآت للتسلخآت وتخسر أموآل في العيآدآت !!
ليش مو من البدآية نشتري نوع كويس ومعروف وينتهي الموضـــــوع !!

بالنسبة للتوفير في نآس للآن يستعملون الحفــاظ المتعدد الإستخـدام يجي كلوت نآيلون وتحطين له فوطة قطنية ،
هالطريقة صح موفرة و أنظف للبيئة بس يبغى لهآ آهتمـآم أكثر يعني لأزم الفوطة تكون مغسلة تمآم ومعقمة ونظيفة .
بس عموماً هي طريقة حلوة وأرحم من إنك تشترين حفآظ رخيص وسيء أو إنك تخلين الحفاظ ساعات طويلة في الطفل !

الحفآظ له دور كبير في حماية بشرة الطفل ونراعي إننآ نختــار نوع مناسب وماركة معروفة ،
وطبعاً التسلخــات مو كلهآ بسبب الحفآظ يعني لو طفلكك عنده تسلخآت مو تروحي تشتري كل الإنوآع في السوق وكل شوي تجربي نوع ،
هذآ يمكن يزيد الوضع سوء ، غيري النوع مرة أو مرتين بالكثير وبس ، روحي شوفي أشيآء ثآنية تعآلجيهآ ،
في تجيكك وحدة تقولكك آستعملت كل الأنوآع وم فآدت ، لآ حبيبتي ولدك مو جآي من المريخ ، أكيد العيب في الصآبون أو الكريم ... إلخ
وأهم شي الحجم ضروري تعرفين الحجم المنآسب لطفلكك ، لآ تستغربون كثير مايعرفون يختارون والله ،
الأكيد إنك إذا عرفتي وزن طفلك تشترين الحفاظ المناسب له ..


الخلآصة : إحرصي إنك تشترين لطفلك مآركة معروف للحفآظ ، ومآتغيرينهآ كثير ، وتعرفين المقآس المناسب لطفلك من وزنه ..
مو دآيماً يكون الحفآظ هو السبب في التسلخآت ، فـ لآ تحطين حرّتك فيه وكل إسبوع تشترين نوع ..



البــودرة :

أغلبنــا إذا مو كلنا قرأنـا عن مخاطر البودرة .. :
- لأنهآ تتكون من جزيئات صغيرة جداً ممكن تتنآثر وتوصل لأنف الطفل وتسبب له مشآكل كثير ..
- رشهآ بكثرة يغلق مسامات المنطقة وأكيد بيعرضهآ للخطر ..
وغيره ..

أنآ حكيت لأمي عن هذه المخآطر ، قآلت كلنآ إستعملنآه و عيآلي كلهم ربيتهم عليه ولآصآر لهم شي !!
ممكن في أطفآل مآ سبب لهم أي مشكلة ، وبالمقآبل في أطفآل يضرهم ..
ونحنآ في هالوقت نبعد عن أتفه شي ممكن يضر أطفآلنآ .. صح !
السؤآل : هل أقدر أستغني عنه ؟!
أكيد تقدري تستغني عنه ، لأنه أصلا مافي فآيدة منه !
- لآ يمنع حدوث الإحمرآر والتسلخــات !!
- لآ يمنع توقف الإحمرآر والتسلخآت !!
- ولآ يحآفظ على جفآف المنطقةة !!
- سبب ظهور لبعض البثور في جسم الطفل [ النوع المعطر ]

إذاً ليش آستعمله ؟
الشي الوحيد إللي يسويه هو إنه لو في بقآيا قطرآت ماء هو بيشفطهآ عشآن يمنع حدوث التسلخات ..
بس إنتي لو جففتي المنطقة تمآم بعد كل تنظيف بتستغنين عنه نهآئي .. لأن السبب الرئيسي في حدوث التسلخآت هو المنطقة المبللة ،
فـ لو حآفظنآ على جفاف هالمنطقة بإذن الله نمنع حدوث أي تسلخات أو إحمرار

في مرة كنت أبدل لبنتي في أحد الأسوآق ، لآحظت وحدة نظفت لإبنهآ وحطت نص علبه البودرة !!!!
خير من جد ليش !! لو إنك يعني مصرة تحطين تكفي رشة خفيفة ، والله إني ما أبآلغ مآسكة العلبة وتكب !!!

الخلآصة : البودرة مافي أي فآيدة منهآ لو جففتي المنطقة بعد كل تنظيف ، خلي عندك منشفة قطنية نآعمة نظيفة مخصصة لهذه المنطقة ،
بس لو إنك متعودة تستعملين البودرة وماتقدرين تستغنين عنهآ ممكن تحطين رشه خفيفة للمنطقة بعد الغسل ..



المنآديل المبللة المعطرة والغير معطرة :

تصدقون والله لو أقدر بآخذ كل أنوآع المنآديل المبللة وأحطهم بأكبر وادي وأحرقهم ..!
هذه أكبر مسببات التسلخآت ، يعني 95% من التسلخات والإحمرآر و التهيجات وكل المشآكل منها ..

قبل ما أولد أمي كآنت رايحة الصيدلية تشتري أغرآضي قلتلهآ لآتنسين المنآديل المبللة وجيبي نوع معطر ونوع غير معطر مستحيل أستغني عنهم ،
طنشتني ولآجابت شي ، قآلت تقدرين تستغنين عنهم ! أنا راسي كان معبأ من النت وكلام الدكآترة إني صعب أستغني عنها !!

بس إستغنيت عنها ، والله ما استعملتها لبنتي أبداً غير مرة وحدة كنت في الطآيرة ومآ كان عندي غيره ..!
كل المنآديل إللي وصلتني هآديا رميتهآ ..
في مرة كنت أكلم دكتورة و سألتهآ بخصوص المنآديل المبللة قآلت :
[هو أكيد أحسن لو م نستعملهــا والماء أفضل بكثير منهآ ، بس نحن ك أمهآت صعب نستغني عنهآ !!]
تخيلوا بدل ما تنصحني تقول هالكلام !!!! والمصيبة مو لوحدها كثير سمعت في التلفزيون يقولون كذآ !!
م عليكم من الكلام إللي يقولونه ، والله لو عندكك الإرآدة تستغنين حتى ع الحفــاظ هههههههه

بنتي عمرهـا سبع شهور ولأني أرضعهآ طبيعي بعد كل رضعة توسخ نفسهآ ومع ذلك لآزلت أوديهآ الحمآم [ الله يكرمكم ] يعني باليوم أكثر من ست مرآت !!!

فـ لو كآن طفلك م يرضع طبيعي أبدا م بيتعبكك ، هي مرة أو مرتين بالكثير ثلاث لآ تمنعينه من الإستمتاع بهاللحظة ..

إذاً مثل ما أنآ إستغنيت عنه إنتي مثلي تقدرين تستغنين عنه نهآئي ! كيف !!
كل ما وسخت بنتي أنزل حفآظهآ وأغسلهآ بالمآء ! بتتكآسلين في البدآية كل شوي أوديهآ الحمام [ الله يكرمكم ] وأغسلهآ بيكون تعب !
لآ حبيبتي كل بدآية صعبه بعدين بتتعودين وتشوفين الوضع أسهل مما تتوقعين أهم شي بالمآء ، بالشهور الأولى لأن ما في ريحة للبرآز ممكن ماتستعملين الصآبون
بس بعدين شوية صآبون ورشة بالماء وإنتهى الموضوع ، بتشوفين كيف علامات الفرح ع طفلك وبتنسين كل تعب بعدها .. صدقيني والله يأثر كثير لا تستهينين في هالنقطة ..
[ ويفضل لو تستعملين الصآبون القوآلب أفضل من السائل ]
حتى لو في الشتاء خذي معك منشفة ثقيله أو حتى عشر نظفي طفلك ولفيه بالمنشفة ، بتلآحظين الفرق الوآضح ع نفسية طفلكك ..
أحيآنا يكون صعب تغسلين طفلك بالماء كنتي في سيارة أو طآيرة أو في سوق أو وقت الليل في الشتاء أو غيره .. الحل !
تآخذين قطنة وتبللينهآ بمآء وتنظفين والمنطقة عادي ! ما عندك قطنة بالشنطة مو مشكلة بالمناديل العادية الجافة ما اعتقد شنطتك تفضى من المناديل تبللينها بماء وتنظفين المنطقة ..
ولو في ريحة ممكن ترشين رشة عطر ع ملابسه ، أو مسحه خفيفه بدهن العود ، وإذا رجعتي للبيت تنظفيه بالصآبون ..

خالتي كانت ماتستغني عن المناديل المبللة ماتغسل إبنهآ بالماء إلا مرة وحدة بس ، وبعدها أي مرة يوسخ بالمناديل المعطرة ..
الآن إبنها عمره سنة والله لا يوريكم شكله يتعذب وربي ، المنطقة عنده مسلخه وإلتهآبات يبكي طول الوقت ولا يقدر حتى يجلس ،
ما خلت دكتور ماراحته ولا كريم ما استعملته ولا خلطة ماجربتها .. أصبحت تخليه 24 ساعة بدون حفاظ ! وتحط له الكريم ومع ذلك مافي فايدة !!

المفروض عناية واهتمام من البداية ماكان صار نص إللي صار


الخلآصة : وقفي إستعمال المنآديل المبللة نهآئي ..
غسلي طفلكك بالمآء بعد كل مرة يوسخ ، وبديل المنآديل المبللة هو قطنة أو منديل عادي نبلله بماء وننظف المنطقة ..


[ نداء لشركات المناديل المبللة ، كم تعطوني وأسويلكم إعلان ]


الكريمات الطبية :

أنآ ما بقول لاتستعملين أي كريمات ، لا إستعملي بس في حالة إن طفلك عنده تسلخات مزمنة ، لأنه ماعاد ينفع معها إلآ هالحل !
بس ك وآقي من التسلخات .. مافي دآعي له أبداً ..
بديل عنه زيت السمسم : صدقوني والله التجربة بتذهلكم ، بنتي من ولدت و أنا أدلكلهآ بزيت السمسم مرة في اليوم ..
الحمدلله المنطقة عندها مافيها أي إحمرار أو تسلخات ونآعمة و زي الفل
إحرصي تشترين زيت سمسم طبيعي من العطار ، وتدهنين جسم الطفل كله يعني تدلكينه حتى لو في الثلاث أيآم مرة وحدة لو ماتقدرين كل يوم ..
من جد فوايده كثيرة ،تحسينه يدخل في العظم ،يقوي العظام و أحسن من الكريمات الموجودة في الصيدلية ..
لآ تستخدمين زيت الزيتون لأنه حآر لو بشرة طفلكك حساسة ممكن سبب له إحمرآر ، ولو عند طفلك إحمرار بيزيد الوضع سوء ..

والمهم قبل كل هذآ هو إنك تريحين المنطقة ع الأقل سآعة في اليوم بدون حفاظ .. تتهوى المنطقة وبتشوفين طفلك ينطنط ويفرح لما تخلينه بدون حفاظ ..
حتى لو كان في إحمرار خفيف بتلاحظين إنه يختفي ع طول ..

في مرة كنت مشغولة ، إنشغلت عن بنتي يومين تقريباً ، خليتهآ عندالخدامة المهم جيت ثآني يوم الليل أبدلهآ لقيت المنطقة كلهآ إحمرار من قدام وورى وكآنت تصيح بشكل فظيع ..
أو ل شي دلكت المنطقة بزيت سمسم ، وبعدها نومتهآ بدون حفاظ حطيت في سريرها مفرش تبديل الحفاظ وفوقه حطيت غطاء قطني ثقيل ونومتها عشان م تعدم لي السرير
و كل ثلاث ساعات تقريبا اغير المفرش ، والحمدلله قامت الصباح والإحمرار شبه مختفي ، كملت باقي اليوم بدون حفآظ وانتهى اليوم وما عاد في اي اثار ..

أهم شي الإهتمــام والإهتمـــام والإهتمــام ..

الخلآصة : مرة في اليوم أحرصي على دهن المنطقة بزيت السمسم ، وبقاؤها بدون حفاظ لمدة نصف ساعة ع الأقل ..
ولاتنسين التدليك لطفلكك أقل شي مرة كل ثلاث أيام .. ممكن تستعملين زيت الزيتون بس هو حآر وما ينصح بإستعماله للأطفال إللي بشرتهم حساسة ..
إذاً الخيارالأمثل هو زيت السمسم ، ومثل ما نبهت إحرصي على شراء زيت السمسم الطبيعي ..


وأخيراً ..

أحلى لحظآت الحيآة ..

نظفي طفلك بعد ما يوسخ بالماء كويس ، ولفيه بالمنشفة وخليه بدون حفــاظ ، سويله تدليكك خفيف لجسمه كله
بتشوفين كيف يفرح ويستمتع وصدقيني شعوركك بيكون أحلى شعور ، و إنتي تشوفين علامات الرضى على طفلك ..


أعتذر إذآ كان موضوعي مو مرتب ، بس إن شاء الله يكون واضح ..

وأيضا أعتذر إذا كنت قسيت في كلآمي بس والله من قهري لما أشوف الأطفآل يتعذبون ..

لو في أي وحدة عندهآ إضافة ي ريت تذكرها ونستفيد ..

ولو في وحده عندها تعليق ع إللي قلته ي ريت تقول لأني في النهاية بشر وكلنا معرضين للخطأ ..

المعلومات إللي ذكرتها في منها من دكآترة وفي عن تجربة ..

الموضوع من مجهودي الخاص ومانقلته ، وأي سؤال أنا موجودة

أتمنى تكونوا استفدتوا من موضوعي .. أشوفكم في موآضيع ثآنية بإذن الله



إذا أصبت فمن الله ، و إذا أخطأت فمن نفسي ومن الشيطــان


والسلام عليكم ورحمة الله وبركاته



همسة للي بتنقل الموضوع :

[ بالعآفية عليكك إنقليه وإنسبيه لنفسك لو تبغين ، والله ودي لو يوصل لكل الأمهآت ويستفيدوا منه ، إحنآ نحط موآضعينآ عشآن توصل للكل ويستفيد منهآ ، إيش بستفيد لو منعت نقله !!! ]