بنات شو احوالكم مع طرق كشف الحمل التقليدية؟؟

[Om yasmina]

السلام عليكم صبايا كيف الحال
والله هادا الموضوع كان يلفتني كتير واي بحث بعملو بلاقي الناس بجربو طرق جديدة قديمة لكشف الحمل واشي بيحلف ويصدق
المهم
خلونا نتشارك تجاربنا بهادا الخصوص
انا جربت اغلب هديك الطرق
قالو الكلور,,,لما تحطو اذا بيفور خليطو مع البول اعزكم الله فانتي حامل
ما فار ولا عمل اي شي وكنت حامل
رجعو قالو لا ما يفور لازم يصيرو لونو احمر ع بني,,فعلا صار لونو بني بس وقتها ما كنت حامل ههه
الاختبار البسيط الي بيقولو حطي البول اعزكم الله بشي كاسة شفافة واتركيه مدة ولما يصير فيه خيوط زي القطن فانتي حامل واذا ما صار مو حامل
بصراحة طلعلي خيوط وانا حامل وانا مو حامل كمان يعني طريقة فاشلة
جربت طريقة تحطي اصبعك ع السرة واذا ما حسيتي بنبض فانتي حامل
هاي زبطت معي صرااحة
وجربت تبع الابرة,,بتحطي ابرة بالبول وتخليها مدة واذا طلع فيه صدأ يبقا انتي حامل
جربتها وما طلع صدأ وفعلا ما كنت حامل
صراحة بضل هالطرق بالنسبة الي خرافية
وافضل شي هو تحليل الدم لتأكيد الحمل
لانو حتى الاختبار المنزلي احيانا قد يعطي نتيجة ايجابية كاذبة

مودتي