تجمع حوامل ليبيا

[حبل الوصل]

المشاركة الأصلية كتبت بواسطة ام اسيل

حبل الوصل
ان شاء الله هذينا اعراض حمل عدي بكرة حللي دم بكرة 28 من الدورة يعني توقيت كويس والله انا امبدري عند هلي نفكر فيك ونقول زعمة شن صار عندها يارب يرزقك تعرفي قعدت نفكر فيك انت وميرنا تقول نعرفكن ليا عشر سنين كيف خياتي واعز وكل وحدة راسمتلها صورة في بالي بكرة نرجوك تبشرينا

إن شاءالله وانتى بعدى والله حتى انى نقعد نفكر فيكن ونتخيل فيكن وحاسبتكن زى خواتى كانى نعرفكم من زمان

[حبل الوصل]

المشاركة الأصلية كتبت بواسطة ميرنا

حبل الوصل امنورة على الخبزة ومشكورة جدا جدا روعة بكل وسلم يدايك والله درتها وذوقت منها الحوش كله تهبلو عليها امنورة ياعزيزتى وهل من مزيد

العفو خيتى صحتين وهناء لنا عودة بوصفات جديدة إن شاءالله

[ميرنا]

والله ياخيتى ام اسيل مانى امعقب جهد وفكرة الزرع من زمن خش راسى وحتى بعد ما مشيت المصر عديت لاسكندرية وسالت اكبر دكاترة مصر لزرع ولقيت احسن( مركز لاخصوبة حسان النعمان) وخذيت منهم برنامج كامل ولكن قالى انتى تحملى طبيعى واصبر اشوى وبعد جيتى من مصر والله العظيم احملت مرتين ولكن الاسف نزلت وفى طرابلس المركز الاردانى هذا باذان الله هولى نبى نمشيله بس مازال ما سخر ربى والله من كثر ما شغلتنى روحى حتى الليل ما نرقد فيه واذا كان رقدت نوعة زى المفجوعة مستغربه ليش صار لى هكى وامس بنت خالت راجلى عمرها 24 سنة طلعت فى الفجر وماشية الى المقبرة وهى امها ميت من زمن ولم ينتبه عليها اخواتها لا فى الصبح ساعة 9 ولقوها الساعة واحد نزلها صاحب تاكسى لقها راكب على الكوابرى تبى تنتحر فا شالتها عمتى ام راجلى للمراة فى طبرق روحانيى اسمها الشيخة احلام قالت لهم عندها مس وحكتلها عمتى قصتى فقالت لها امعها جنية تقتل فى العويل جيببيها لى ضرورى انعالجها وانا بينى وبينك خافت على روحى ايديرنلى شى حاجة انودر عقلى وبدل مانقعد نعالج فى الضنو نقعد نعالج عقلى واقعدن صبيتى على راجلى نين اقنعنه وبرغم هو ضد الاشئ هذا لانى من قبل قالتله فى وحدة فى بنغازى تقطع فى التبيعة واسمها آمنة بنت اعنان نبى انعديلها سال اصاحبه قالولا اتعمل بدحى فكك منها ولكن المرإة لى فى طبرق صبياتى سكرن رواسن بيش انعدو ولكن انا خايف على روحى انلبز شى حاجة يركبنى جن بصح قالته ولله مانى ماشى اتقولى هيا انعدى الاهلى والله انا متوكل على ربى ونقرا فى سورة البقرة كل يوم نقراء فى صفحة وامولعت يوميا فى شقتى ومسجل ايات الكرسى نسمع فيهن لمدة ساعة كل يوم وما نرقد الا وانا متوضى ومانخش افراشى نين ننفث فى يدى ونقر المعوذتين واية الكراسى و ما نسمع فى الاغانى بكل وماتخمره لى ما يقرب عشر سنوات ونحاول بقدر المستطع نبتعد عن المعاصى ونستغفر كل يوم 100 مرة ونقول فى الاذكار الصباح والمساء وحافظ جزء عم وكل يوم نسمع فى الاذان امسجلت فى دسك لمدة ساعة يوميا وتوة خش على ايات السحر نحفظ فيهم 7 ايات اما انى انعدى الى وحدة تكتب بالحروف وتقولك اسمك واسم امك دليل واضح على الشعوذا مستحيل انديرها على اثر ما تعذبت فى الدنيا على اثر ما نودر الاخرة وانى صابرة نرجاء فى رحمت ربى انعطانى عطانى وان ما عطانى كيفى كيف ها لصبايا وربى كريم ايفرحنا انشالله *

[راجيه فرج ربها]

والله كدرتيني يخيتي ميرنا ربي يفرجها عليك بجاه الله والادان توا ادن كان تسمعي كلامي هالنسوان وهالامور كلها فكي روحك منهن عليك بالرقيه الميه الي تشربي فيها انت وعيلتك ارقيها بالرقيه ادخلي عالنت واكتبي الرقيه الشرعيه واقريها وكل يوم بالهشكل وامسحي على بطنك واغتسلي بيها موش عندك الثلاجه امتاعت الميه في البنقا امتاعت الميه اقري وانفتي وكان حصلتي تمشى للعمره تضلعي بمية زمزم وتو تشوفي الخير قريبة زوجي كان تسقط على اربع اشهر كدا بطن وربك اكرمها بعد الرقيه والعمره وبفضل الله قبل كل شي وحسن الضن بيه وجابت ماشاء الله عليها عقبال عندك وربي يفرجها علينا يارب

[ميرنا]

اميسر الفارس الملثم من وين انتى ياختى وهل انتى متزوجة
اما بلنسبة لدكتورة فوزيه بن عامر 2008 موجودة فى عيادة المروة وهى دكتورة ممتازة راجعت عندها وهى من اكتشفت عندى هرمون الحليب مرتفع

[عيون زوجي]

السلام عليكم
كيف حالكم يا عويله انشاءالله كويسات
هلا براجيه ونصايحها الحلوة وربي يشفيك ويرزقك بالذريه الصالحه
وميرنا يلي ننصحوها تزرع باقرب فرصه وماتستناش راجلها يطير منها وانشاءالله ربي يرزقك يا ميرنا
ام اسيل الدلوعه تبي كل شي في مرة صبري بالك للشهر الجاي وانشاءالله تحملي ونحي فكرة الزرع منك وازرعيها في ميرنا
حبل الوصل مبروك الحمل مقدما وبري حللي خلاص وبشرينا
هنديه وينك ماعادش تخشي زي قبل وربي صبرك على حوش شيابينك

[امنيات]

السلااااااام عليكم انا عجبتني هدرزتكم قلت انخش معاكم ياريت ترحبوا بيا انا متزوجة من 10 سنين وعندي وليد وبنيتين وتوا حامل وهدا شهري موعدي 11 /6 ادعولي نولد بسرعه تعبت وتعبت الي معايا قولوا يارب قالولي بنية وانا خاطري في وليد لكن الحمدالله لك يارب

[ام اسيل]

خير يابنات انا ما صدقت نروح من العيادة بيش نحكيلكم شن صار انا اليوم ثامن يوم من الدورة وعديت لحكمت بوقرين بعد المغرب ودارتلي صورة وقالتلي ماشاء الله عندك بويضتين وحدة 20 ووحدة 17 وعطتني ابرة تفجير وقالتلي لو تحبي تجي يوم الاثنين في الصبح وتجيبي معاك عينة من سائل زوجك ونديرلك تلقيح صناعي يعني تحط سائل زوجي في المختبر وتاخذ منه انشط حاجة وبعدها تحقني بيهن والسعر 150 دينار وحتى استغربت وقالت عادة الي وزنهم زايد عادة ما يستجيبوش للعلاج بالسرعة هذي لكن استجابتي انا ممتازة وقالتلي اليوم وبكرة مافيش جماع المهم روحت فرحانة لزوجي نحكيله شاط فيا وقالي فكينا من اللخبطة خلينا عادي وزعل عشان مفيش جماع لان كان عليا الدورة وانا توا مش عارفة شن اندير نفك عا الموضوع ونرضي الراجل الي قاعد زعلان ولا نسكر راسي ونديرها وخلاص والله خاطري نجرب

[اميسر]

اميسر الفارس الملثم من وين انتى ياختى وهل انتى متزوجة


هههه

ضحكتيني يا ميرنا ونا ما عندي نيه نضحك

انا متزوجه وعمري 35

من بنغازي ونشتغل معلمه
يارب يارب نحمل ونجيب اوليد


بس انا مشكلتي ان زوجي عصبي ودائما يغضب من اتفه الاسباب
امعيشني في رعب

وكان يا ميرنا نحكيلك على دايره فيا ممكن تضحكي وممكن تبكي عليا

مثلا مثلا

بعد العرس بشهرين في يوم بعد روحت من المدرسه بعد العصر

وتغذينا وبعدها هو طلع

لما روح بعد العشاء قلتله حيه راهو ما فيش خبزه والله والله هزبني وعاركني واهانيي بسبب ليش ما نبهتيني امبدري

مع ملاحظه توجد ما لا يقل عن خمس محلات مواد غذائيه على بعد عشرين متر من باب البيت

وهو عمره ما جاب خبزه من كوشه

لكن حسيته ديما ايركز على اي تقصير من ناحيتي وما ايصدق ايلاقي سبله

والله امتعبلي نفسيتي ورايحه بعد الزواج زي الهبله

[اميسر]

يا ام اسيل ننصحك توضي وصلي وديري استخاره

وانشاء الله ربي يسرلك الخير

والدعاء الدعاء يا ام اسيل
بس انا ننصحك تنفذي نصائح الدكتوره بلكي تحملي بتوام وتجيبي اوليد وبنيه يا رب

وما تنسيناش ادعيلي انجيب اوليد