مجموعه من الاطباق البحرينيه اللي ماتتفوت

[ايلاف]

السلام عليكم

اليوم التقرير منوع ان شاء الله من كل طبق صورة وطريقة إعداده

وكلها خليجيه ماعدا طبق واحد ايطالي وهو المفضل عندي من بين الاطباق الايطاليه واربع انواع من الحلويات

اثنين حلى شامي واثنين خليجي

نبتدي بسم الله

ماشاء الله وهذا طبق مشخول الربيان والسنه اللي طافت نزلت طبق مشخول الربيان بالرز الاسمر وكان ترتيب خليجي

كيلو ربيان منظف مقشر وبصلة مفرومه , ليمون اسود مكسر ’ طماطم مقطعه ’ كزبرة ’ فلفل اخضر

ثوم مطحونن حسب الرغبه والبهارات بعد الكميه حسب الرغبه ’ ملح كركم بزار فلفل احمر او اسود

بطاطس مقطعه مربعات كبيره فلفل رومي ’ مقطع مكعبات ’ زعفران وماء ورد حطوه في فنيال ينقع

الحين ندش على الطريقة

نحمس البصل والليمون الاسود في القدر مع ربع كوب ماء لين يذبل وينشف الماء نضيف الزيت

ونقلبه ونضيف باقي البهارات المذكورة ونضيف الربيان والبطاط وباقي الخضروات المذكورة

ونخليهم على النار مدة عشر دقايق وبعدين نسلق الرز مع اضافة البهارات الحب

نسلق الرز طبعا نص سلقة ونضيفه على الربيان ونغطي الجدر ونخليه ساعه الا ربع على النار هادية طبعا

الطبق صورته بشكل هذا اسمحولنا يعني ماهو ترتيب خليجي بس صديقاتي كانوا عندي يتغدون وسويت لهم هالشكل

مشخول الدجاج وهو يختلف اختلاف بسيط عن مشخول الربيان واللحم

مشخول الدجاج نفس مقادير مشخول الربيان والطريقة نقلي الدجاج في الزيت اولا وممكن اضافه بهارات على الدجاج نفس البهارات المذكوره

ونقليه ونخليه على جنب وبعدين نتبع نفس الخطوات المذكوره في مشخول الربيان اللي هي الكشنه ثم وضع الدجاج المقلي والرز الخ

شيش طاووق دجاج على الطريقة الخليجيه

اربع صدور دجاج كبيره بدون جلد وعضم مقطعين مكعبات ’ علبة روب ’ ملعقة كبيره ليمون اسود مطحون او نص ملعقة براحتج

ملعقة شاي فلفل اسود ’ شوي كركم ’ ملح ملعقة شاي ’ ملعقة ونص كبيره ثوم وزنجبيل مطحونين

بصل مكعبات ’ فلفل اخضر بارد مكعبات ’ تخلط كل المقادير سوا وتخلينها 12 ساعه بعدين تشك في اسياخ وتقلى في زيت

زبيدي وشيلاني

تراه سهل مايبيله شي الزبيدي ينضف ويغسل ويبهر بالبزار البحريني ثوم زنجبيل مطحونين عصرة ليمونه فلفل احمر وكركم وملح ونخليه ربع ساعه الى عشرين دقيقه ونقليه بالزيت

والشيلاني الكل يعرفه طبعا نسلق الرز في الماء والملح فقط ويشخل ويرش بالسمنه البلدي عند التقديم

وطريقة عمتي للشيلاني وايد عجيبه تحمس البصل في الزيت ممكن اضافة بعض البهارات المحبوبه عندكم ونضيف عليه الرز المسلوق مسبقا ونغطي القدر مدة عشر دقايق على نار هاديه ويطلع عندكم احلى شيلاني بالحمسه

والطبق الايطالي ريزوتو السبانخ مع دجاج بالكريمه طبق لذيذ وااااااااااااااايد انصحكم تجربونه لان ادمان

ناخذ رز اسمر او رز خاص للريزوتو اسمه اربوريو ينباع بالسوبر ماركت واذا ماحصلتوه استخدموا الرز الامريكي ابو بنت وربعه

ناخذ كوب من الرز ويسلق لين ينضج ويشخل ويوضع على جنب احين في مقلاة نحط ملعقة زبدة ونص ملعقة صغيرة بودرة الثوم او فص ثومه مدقوقه

وبعدين نحط نص كوب سبانخ مثلج مقطع لان السبانخ الطازج طعمه قوي شوي فيفضل المثلج ونقلبها خمس دقايق تذبل شوي

عقب ننزل الرز المسلوق عليه ونقلبه ونحط كوب كريمه المراعي ملعقتين جبن سائل او جبن موزاريلا حسب الرغبه ونقلبها

والدجاج ناخذ اربع صدور دياي نقطعهم قطع طوليه ونحط عليهم ملعقة صغيره ثوم وزنجبيل مطحونين وفلفل احمر وكركم

وعصير ليمونه او نص ليمونه خليهم يوم كامل بالثلاجه وبعدين عند الطبخ

والان ننتقل للحلويات

طبق المشهور جدا في البحرين وبعض دول الخليج طبعا هو الساقو

ناخذ كوب ساقو ننقعه مدة ساعه نحرق السكر تقريبا من 3 الى اربع 4 فنيال اكيد طبعا مانحركه وايد نسويه شوي مثل لون الكراميل

على نار وسط ونضيف عليه 3 كوب ماء لين يغلي ويذوب السكر المحروق نضيف ملعقة صغيره هيل مطحون

زعفران ماء ورد والساقو ونخليهم يغلو لين ينضج الساقو اذا الماء صار ناقص نزيد شوي ماء ساخن ونضيف عليه ملعقتين سمنه بلدي او زبده

شوي مكسرات ويقدم في طبق ويرش بالمكسرات

الجباب طبق اماراتي شهير جدا بالامارات ومحبوب عند الجميع

كاس دقيق فاخر ’ ملعقة صغيره خميره ’ فنيال سكر ’ كاس ماء دافي ’ رشة ملح ’ 3 ملاعق كبار حليب بودره زعفران وملعقة صغيره هيل ’ بيضه ’

تخلط كل هذه المقادير ونتركها تتخمر مدة ساعه اذا مستعجلين 40 دقيقه تكفي

الطريقة

مانسوي شي بس نصبها عالتاوه على هيئة دوائر في ناس تسويها بالزيت وناس بلا زيت ونا اسويها بالزيت

يعني احط ملعقة صغيره زيت بالتاوه واصب الخلطه بملعقة غزيره شوي المراد كنكم تسوون بان كيك وخلصنا

ويرش بالعسل الابيض او الاسود في ناس تحط دبس وانا افضل العسل الابيض

بقلاوة الفول السوداني والقرفه

البقلاوة اللي يحبونها وااااايد ومطلوبه مني دايما هي

مقاديرها كالاتي :

كوب فول سوداني بدون قشر يحمص عالنار وسط ويطحن خشن ملعقة صغيرة قرفة مطحونه عجينة بقلاوة الكرامه المثلجة ممكن استخدام اي ماركه ثانيه بكيفكم طبعا

كوب زبدة (( اللي فيه كلسترول يسكر الصفحه كامله))

الشيرة

كوب سكر +كوب ماء (( اللي فيه سكر يسكر اللابتوب ))

تغلى عالنار ربع ساعه الى 20 دقيقه

الطريقة

نخلط الفول السوداني مع القرفه المحمصه ناخذ اربع اوراق نحطهم فوق بعض ونحشيهم الحشوه

ونلفها مثل الشاورما نصفها بصينيه نقطعها وبعدين نصب عليهم الزبده السايحه بعد عشر دقايق ندخلها الفرن

ونخليها تقريبا 40 دقيقه عشرين تحت وعشرين فوق لازم وقت طويل شوي عشان تتحمص زين وتاخذ اللون الذهبي

نطلع البقلاوه الساخنه من الفرن ونصب عليها الشيره البارده اهم شي الشيره بارده بدرجة حرارة الغرفه وماتكون ساخنه

واخيرا وليس اخرا

الكنافة بالقشطه مابغت تضبط معي واخيرا نجحت فيها بعد صراع مرير صارت مقرمشه مثل مااحبها لاني مااداني الكنافه اللينه ابد

استخدمت كنافة السنبلة

كوب زبده ’ اهم شي تكون لينه شوي مب وايد اهم شي ماتكون سايحه

الحشوه

قشطة كي دي دي ’ ملعقة نشا كبيره ’ كوب حليب ’ كلهم عالنار لين تغلظ وترفع

الطريقة

ناخذ صينيتين بايركس بنفس الشكل والحجم ناخذ نص كمية الزبدة ونحطها في الصينيه والزبدة طبعا بتكون مثل كريمه

وفوقها نحط الكنافه اللي حنا مقطعينها بالمقص من قبل ونرصها فوق الزبده ونضغط عليها باليد لين تترتب نعمل مثل هالطريقه في الصينيتين وندخلهم الفرن

تتحمر من تحت بس مدة 40 دقيقه او نص ساعه على حسب فرنكم وحرارته اول مايصير لونها ذهبي خلاص نسكر الفرن

نخليها تبرد ونقلب الكنافه نحشيها القشطه ونسكرها بقطعة الكنافه الثانيه ونشربها بالشيره وهذا السر عشان تكون الكنافه مقرمشه ولذيذة

عليكم بالعافيه

[أم أيهومي]

[اميرة الحكاية]

ماشاء الله تبارك الله وصفات شهيه
يسلموووو يدينك
ويعطيك الف عافية

[عشيقة علي]

تسلم الأيـــــــــــــــــــــــــــادي

[حسناء الورد]

روووووووووووووووووعه. ماشاء الله

[ام ارجواااااان]

[سنيوريتا آني]

[jojo 123456]

[υм вtℓαα]

يعطيك العافيييه

[دموع الليل]