اهلا باهل الجود والكرم **اهلا بسيدات ليبيا**

[dr.loly]

المشاركة الأصلية كتبت بواسطة اوشي

ام معاذ كيفك وكيف ابوني وخوته

بالنسبة للبيتزا درتها طلعت اتهبل جربيها بس

سلم فروسة يارب ونصائحها هي وخويلتها

نجك ليا م الاخير
ديما ترفعي ف المعنوياااات

نفس طبعي بعد ناخد طريقه او فكره يقولها ليا حد
انجربها ونشكره الحق


اكيد ماره عليك النوعيه المغروره اللي ع اساس
كل موالح وحلويات تعرف اتديرهن ومستحيل تسألك ع طريقه
خصيصا من لي اتحسس منها او تغار هههه

او تاخد طريقه وتقولي درتها بطريقتي هههه


طبعا نا حكيت هكي لان زمان خالتي ربي يرزقها الذريه الصالحه

كانت بنت جيران عيت جدي اتدير ف طرقها وتقول لالا مادرنلهش مثلا نشا

جربت دحي ومشكله خالتي ماشاء الله خبره وشطاره م الاخير

تعرف الحاجة من طعمتهااا

وبعدها اتجينا امها وتقول ماشاء عليك ع خالتي

طرقك اتدير فيهن بنتي وسماح يجن حتي البيتزا كانت تجي منها زي خبزة يابسه حشا النعمه

بس النشا عليك طريقه سلم يدياتك

نا وخواتي وبنت خالتي وقتها اطربقنا م ضحك ف مطبخ والله نذكر ف موقف



قبلها بيوم جايبتلنا طروف بيتزااااا ترد ف سونيه وقالت درتلها حليب ودحي


ههههههه مع ان خالتي قالتها لها ف وجها قتلها بس واضح انه مافيش دحي

وو داريتها هكي وجايه تفلسف ههههه





عموما خالتي عندها ابتكارات وطرق روعه ف مطبخ ان شاء اللله كل فتره
نعطيك حاجة او فكره

[dr.loly]

ام معاد خفت هههههههههههههه
لالا نبصر عاد مستحيل الطيوبه اتدير هكي

ان شاء الله يارب تضبط معاك الطريقه وتقعد ديما طريقتك المفضله ف العجن

وتريحي من بيكنج باودر ودحي وجو الاخر خخخخخخ



ونا عشان خاطرك الفتره الجايه حنديرها بالصور والمقاددير المضبووطه

[dr.loly]

هدووو فعلا مشكله محرجة
كانت عند صاحبتي بس استخدمت كريــم
وقالت نجح معاها وبعدها حملت وقفاتها
ومانقصش بالحجم ...

ونا سامعه ان اكل الدجاج بكثره خصيصا لي ياكل
ف منشطات ههههه يعني دجاج الوطن العربي ..
يكبر الصدر والله اعلمـ

[dr.loly]

فيفي مرحبااا
بالنسبه لحساسيه الجلد ف الحمل
ان شاء الله يارب ح تحول بعد الولاده ان شاء الله

وماشاء الله ارتفاع كويس بكل ف الدم......

ودم الحامل من 9 ونص ل 11 عادة يعتبر ممتاز
لان الجنين حتي هو ياخد ف الحديد من الهيموجلوبين معاااك

اهم شئ كثري من اي حاجة فيها فيتامين ســــــــــــــي

لانه يساعد على امتصاص الحديد في الدمــ...........بسرعه

مثلا لو بتاكلي كبدة خودي معاها سلطة بليم او كوب عصير برتقاااال


وبالنسبه للاكلات اقوي شئ غني بالحديد

اي شئ ينسود بسرعـــه زي الخرشوووووووووووووف او زي مانقولوله القعمــول


هذا دكتور عندنا زماااان خلانا نفكرو ساعه وماطلعنا اقوي شئ غني بالحديد

وكذلك التفاح والفووووول وجرجير وعدس واللحم لي من جهة عضلات الخروف
هذا لي يكون رطب واجد اعتقد

[dr.loly]

جيجي كيف حال اعويناتك توا
ان شاء الله احسن من قبــل\..
وربي يعطيك الصحه ع السهووور

انا اسبوع نرقد فيه ساعه ف اليوم

قعدت حاضنه بنتي ونبكي ف الليل هذكا اليوم لي جيت فسيت خلقي لكن هههههه
الحق بنوتي حتي كان وعت ساعه او 2 بالكثير لكن مشكلتي

ان يطير مني النوم ومعش نرد نرقد بسهوووله

لكن توا الحمدلله درنالهم نظام سهور ارتحنا جدا معااااه

لان نا بروحي بعد نرقد بكري... انوض ع 5 او 4 ويصيرلي ارق
والعيال بسلامتهم ينوضواا خلاص بعد يشبعوا نوووم


......



بالنسبه للسياحــه ف الجبل الاخضر


ماتقوليش مثلا نبي شحات او سوسه او راس الهلال

لان بالنسبه لينا كلهن مكان واااحد يعتبرن مسافه بنهن لا تذكر

ولا شن رايك اوشــي...؟


يعني مثلا احسن مكان للسكن ف الجبل عندك راس الهلال في منجع اسمه الينابيع

روعه منظر البحر والجبل وراااه .. هذا لي مره شموووسه حطتلنا صور منه

خشي ع ملفها الشخصي تلقيهن صور حاطتهن ..

هذا فيه نظام منازل في كبير للعائلات الكبار وفي متوسط زي عائلتكم

كان ايامات نمشولها ليله ب 120 دينار واحلي جو ف عيد الاضحي فيه

وحتي شوايه واقفه فيه ف حديقة لي من خلف


وفيه عندق فندق المنـــــــــــــاره اللي حتي هو ماعنديش معاه روح لاصيف ورشتا

هههه هذا لي مره حطيتلكم منه صور وقتلكم مش عارفه ليش اربع كبابي عصير جايبلنا ف الفطور.. لو تذكري


هذا موعه رهيب ع البحر طول اطلبوا الغرفه مثلا مواجهه للبحر ويجي الجبل من وراك او بلكونه اخري تشوفيه



هذا سعره في شتا وصيف يختلف

ف صيف جناح ب 120 و وشتا ب 100 الليله

والغرفه الزوجيه ب 82 ايام كنا عرسان
وف شتا جيناه ب 70

وبعدهااا جبت خدينا جناح فيه مطبخ ميني بار وصاله وغرفه اضافيه وحمامه كبير بكل


واكلهم سمح خصيصا المشاوي واحسن شئ يجيبولك ف الغرفه حتي الكابتشينووو

بعد تكلمو بتلفون الغرفه..

[dr.loly]

منورات اخواتنا الغائباااات

اموله ماشاء الله ع لمة ونستنوا فيك تنزلي صور نفس ماحكيتي
وربي يحفظلك طمطومه الاموره والاهتمااام المبالغ فيه

دائما يصير مع البكر يابال انتي نغتربه خطرتي عليا جارتي نفس جووو حتي


...


جنوده الحبوبه ربي يوفقك يارب ويسيرلك امورك
مابعد الضيق الا الفرج عزيزتي




...

ام ورد منورتينااااا كيف حال اموراتك؟

[dr.loly]

وين اثري ...؟

رجعت هلال العيد من جديد اثري ..



.........


شمووووسه اختفت..؟؟


...
ام وسونه معش خشت بكل ان شاء الله خير

[dr.loly]

طبعا اليومين هذه كنت لاهيه ف المشي للمركز..

قعدت نفوت ف دروس خشيت مجال اخر امس التعرف ع ثقافات المجتمعات الاخري

وتعلمت الباكورا الباكستانيه وشربه عدس ع طريقتهم
وتعلمت حتي سندويتشات تشبس من الانجليز ههه

جو من الاخير قتلهم تو نعلمكم حاجة ليبيه

وبعد حكيتلهن ع طرق وحاجات انبهرن قال واااو طباخه ماهره
قتلهن كل الليبيات مثثلي ..(نحب نعطي صورة جميله ع المراه الليبيه
في المجتمع وفي بيتهاااا قمة في العطاء وماتقصرش))
نحن هكي نظامنا ووو الخ
شرحتلهن قصتنا ع مطبخ وهكــي...
\
استغربن قالتلي وحده انجليزيه نحن الاحد ومش كل احد اخري ناكلو مع بعض
قتله حتى الابله قالتها ليااا..


ومنهاااا ندير هكي عشان نفس ماحكيتلكم ان الروووضه لازم نقعد
ف نفس المركز بس مش معاهم طبعا

[dr.loly]

سلام توا وان شاء الله نكون مانسيتش حد

[أمل ليبيا]

السلام عليكم
كيف حالكم ياحلا اخوات نفره نفره ع قولت اوشي العيوله


ان شاء الله تكونو بخير


وع فكره ام فروسه اليوم عجنت البيتزا بالنشا زي ماقلتي وبنشوفها واني واااااثقه ح تجي حلووووه لاني بصراحه وااااثقه من ذوووقك ربي يحفظك وسبحان الله كل مانستعمل عطر ايلي نتذكرك طوووول لاني جازفت وشريته وقلت في خاطري حاجه قالت عليها ام فروسي اكيد حلو وحتي 212 طلع يهبل وعجب زوجي هلبا
ربي يحفظك ياذووووق




وبالنسبه ياخوله حاااظر ح نقولك شن درت في لمتي وان شاء الله تستفادي مني في حاجه

طبعا درت بوفيه مفتوح اول حاجه قدمت عصير وشكلانه كواليتي ستريت وبعدين حطيت العشاء ع رخامة المطبخ طبعا مانحبش نقول بار :)
المهم وكان ك التالي طاجين جبن وهذا جهزته من الليل وحطيته في طاجين وحطيته في الثلاجه الصبح حطيت عليه الدحي والجبن وطيبته وفر عليا وقت وجي زي العسل



ودرت شيش طاووق وحتي هو تبلته من الليل والصبح حطيته في الكوشه



ودرت بوريك وحتي هو جهزت حشوته من الليل والصبح حشيته وقليته


ودرت كسكسي طبعا اول مانضت طيبت البصلة وتيتها ولصغر الطنجرة وكبر اللحم درته ع مرتين
ودرت اللحم بروحه والكسكسي بروحه والبصله بروحها ودرت بطاطا وطبعا شريت الفرينش فروزين الجاهزة اقلي بس ودرت معاه سلطة شرموله ومخلل مشكل وزيتون