تجربتي الخاصة بالتجهيزات

[نسمة المساء]

السلام عليكم ورحمة الله وبركاته

كيفكم يا عسولات أنا حابة أعرض عليكم تجربتي الشخصية عسى إنها تفيد حد وتكون أجر لي بإذن الله

قبل كل شي حابة أوضح إنو ابني الآن عمرو شهرين وهو البكر لي وكنت أشتري الأغراض بدون خلفية مسبقة...

نبدأ بسم الله الرحمن الرحيم :
- الملابس:
اشتريت بديات (بروبتوزات داخلية ) 16 قطعة وللأسف كان العدد كتير جدا وما استخدمت إلا 7 والباقي خليته متل ما هو عند ماما علشان إذا حد من أخواتي جاب بيبي قريبا ... وللمعلومة اشتريت بعضهم من سنتر بوينت بسعر غالي وخربو من أول غسلة وصارو زي القديمين والبعض الآخر من بوارث بلازا الواحد بريالين والله إنهم روعة وعنجد قطن ممتاز..

- تبانات (بروبتوزات خارجية) مغلقة الأقدام 3 قطع .... كفوني وزيادة لأني ما لبستهم لابني إلا أول أيام لأن الجو كتير حامي وهلا صارو صغار وما رح يستخدمهم بعد هيك

-أطقم ... صراحة ما بعرف ليش الكل بقول اشتري أطقم ... أنا اشتريت 2 وما استخدمت إلا البروبتوزات يعني بتقدري تشتري بربتوزات مفرقة أرخص و أحلى ... يعني المريلة إلي مع الطقم غير مفيدة لأنها قطن وما بتحمي الملابس إلي تحتها والجرابات ما بلبسهم لأن البربتوز مسكر من تحت و القماط مو حلو يكون غير الأبيض (رأيي)

الجرابات والأحذية ... كترت كتير للأسف وانصدمت إني ما استخدمت إلا 2 من كل واحد لأن البيبي ما بطلع برى البيت والجو جوا البيت حر وما بقدر ألبسو إياهم

القبعات 4 قطن ما استخدمت ولا وحدة لأن الجو حر

المريلة ... اشتريت 3 وحدة نايلون من الجهتين و2 نايلون من جهة وحدة وصراحة روعة ولا يبلش ابني إن شاء الله ياكل أكل عادي رح أزيد عليهم

البيجامات القطعتين ... اشتريت 4 وبحس إنهم كتير مريحين للبيت وكان العدد كافي

القماط ... جبت 2 فقط واحد كنت ألبسو للبيبي بعد الشور مشان ما يبرد والتاني كنت بس أستخدمو لو جا عندي حد أو لو خرجت من البيت فبقي نظيف ...

لباس قطعة واحدة نص كم ومفتوح القدمين ... اشتريت 5 استخدمت 3 للبيت وهمي جدا مريحين لبيبي خاصة إنو الجو حار ... و2 كنت ألبسو إياهم لو جا حد عندي للبيت أو خرجت مع جرابات وحذاء على لونهم طبعا

حرامات (بطانيات ) اشتريت 2 عاديين قبل ما أولد واحد للبيت والتاني للخروج وبعد ما ولدت اشتريت كمان واحد نوعية ممتازة للسرير . بس جد ممتاز من محل الفضل بمكة وكتير أحسن من إلي بسنتر بوينت

--- أدوات الاستحمام كلها اشتراها زوجي بعد الولادة
بانيو ، شامبو ، كرسي استحمام ، منشفتين ، ليفة (بس صراحة هادي ما استخدمتها لأني بليفو بمنشفة صغيرة كتير إلي بيجو مربعات أنعم علي وأسهل علي عندي منهم5 )

أدوات العناية:
-فرشاة ومشط (بس لسا ما استخدمتهم لأنا حلقنا لبيبي عالأسبوع ولهلأ لساتو أصلع ههههه)
- كريم الحفاض اشتريت بعد الولادة saudo cream و egozite وبالنسبة لابني saudo كان كتيرأحسن
- بودرة أطفال اشتريت جونسون والدكتورو منعتني أستخدمها لأنها بتعمل تحسس للبيبي لأنها معطرة وكمان بتسكر المسامات بالجلد وكمان قالت الدكتورة ممكن على المدى البعيد تعمل ربو أو مشاكل بالتنفس للبيبي
- ميزان حرارة ... براون إلي بقيس من الأذن عندي روعة
- لهاية أو مصاصة عندي وحدة بس ابني ما قبلها
- مقص أظافر ... بس كمان لهلأ ما استخدمتو لأنو أظافر لبيبي كتير طري وبتقدري تشيلي الزيادة بايديك بس أكيد بنحتاجه كمان شوي إن شاء الله

---- رضعات اشتريت 4 زجاجية 2 بايجون و2 تشيكو ... وأنا بعد التجربة شايفة إنو بايجزن كتير أحسن خصوصي إذا الحلمة إلي Y أسهل للبيبي بالمسك وكمان بتنزل حليب شوي شوي فما بتشردق بالحليب وكمان ما بتعود إنها أسهل بنزول الحليب وما بترك الرضاعة الطبيعية..... وطبعا مستلزمات الرضاعات فرشاة التنضيف وحافظ للماء الساخن ومقسم الحليب

الحفاضات اشتريتهم بعد الولادة لأن المستشفى كانو يلبسو البيبي وهو عندهم ولما خرجوني أعطوني 5 وبستعملو بامبرز كتير روعة
المناديل المبللة كمان اشتريتهم بعد الولادة ولأن الدكتورة نصحتني أستخدم الماء ما بستخدمهم كتير ولأن بشرت طفلي حساسة ما بستخدم إلا huggies pure أو بايجون لأنهم مش معطرين ... والنوعيتين ممتازين

مشمع التغيير عندي 2 بس ما استعملت إلا واحد وصراحة كتير ضروري أنا جبتهم بعد الولادة كنت أول أغير للبيبي بأي مكان بس ماما قالتلي ما بصير هيك لأنو بتوسخي كل مكان وبصير يطلع روائح بالبيت وبالبداية ما كنت مصدقة وكنت بقول مأنا بحط الفوطة القديمة تحت البيبي بس لما جبت المشمع كان لونه أبيض وصرت لما أغير لابني أشوف بوضوح أديش في آثار براز بتضل على المشمع حتى ولو كنت حريصة على اني ما أوسخ ... فتخيلو كيف رح تصير ريحة الأثاث بعد فترة ... وطبعا تنضيفه كتير سهل لأنو نايلون بعد كل استخدام

الأثاث :
- عربة خروج good baby وصراحة كتير كويسة ومو شرط تجيبي شي ماركة
- سرير روووووووووووعة من محل الفضل وكمان طقم السرير (الستارة و اللحاف والوسادة وغطاء للفرشة هاد الي بلف حول السرير للحماية ما بعرف ايش اسمو) كمان من هناك سعرهم كتير أرخص من باقي الأماكن إلي سألت فيها وشكل المفرش أحلى والسرير مركب علي قطعة بتخلي السرير يرج ومعها مصباح للإضاءة بالليل وكمان بطلع موسيقى وأضواء متناسبة مع الموسيقى وفوقه دباديب بتلف لما تشغلي طبعا كل هاد من سعر السرير
- خزانة ملابس صغيرة
- ألعاب للسرير و خشخيشات وألعاب للحمام

باقي بس أخبركم إني اشتريت مدس وما استخدمتو أبدا لأن الجو صيف

وللأسف في أشياء أجلتها قلت بتيجي هدايا متل شنطة الطفل و الكرسي الهزاز وكرسي السيارة والمشايةوكرسي الأكل بس اللي جو يباركولي كلهم أعطو ابني فلوس هههههه ... يعني لازم أشتريهم
وطبعا لازم أنزل أتبضع ملابس من جديد هلأ قبل ما يصغرو الملابس على ابني بعد أكم أسبوع

شكرا لكل الي تحملو يقرأأو الموضوع للآخر وأتمنى تستفيدو وتحياتي للجميع

[Om KHaled]

ماشاء الله تبارك الله
لبس العافيه ان شاء الله وربي يحفظ لك ابنك يا اختي
من جد موضوعك تستفاد منه كل أم جديدة
أما بخصوص البودرة والله انا اشتريت باكيت كثير وكل مرة استعملها لبنتي ,والله خفت من كلام الدكتورة
جزاكِ الله بالخير
انصح انه بروبتوزات الخارجية مغلقة القدمين , مالازم تكترو منها انا عندي كثير منهم وصغرو على بنتي وجمعتهم في حقيبة
وكمان لا تكتروو من الاشياء لانه باتجينا هدايا كثيرة من الاقرباء...
تحيتي...

[lovelygirl]

موضوعك كثير مفيد وخصوصا للبكريات
الله يجزاك خير

[ورد الشمال]

الله يعطيك الف عافية تسلمين عزيزتي على النصائح المهمة
والله انك صادقة
اتمنى البكريات يستفيدون
انا اشتريت لأبني 10 قطع لبسة النوم الكاملة واستخدمتهم فقط اول اسبوعين بعدها الجو مال للحرارة خصوصا الشقة جدا دافية فبطلت البسه اياهم
اللي جد استفدت منهم البربتوزات نص كم عندي كثييييير يمكن 20 حبة و مستفيدة منهم جدااااا
ومثل ما قلتي عن القبعات انا شريت كثيييير وفي البداية بس لبسته اما هذي الأيام بطلت عشان حر
الله يحمي لك ابنك يارب

[نسمة المساء]

•_• om śǻяą •_• .... الله يحييك حبيبتي وشكرا على النصيحة نورت الموضوع
lovelygirl .... وإياكم يا عسل شكرا على المرور العطر
ورد الشمال... الله يعافيك وأشكرك على الاطراء

[ميلاد حلم]

يعطيك العافيه

موضوعك جدا مفيد الله يجزاك خير..

[شجن1111]

يعطيك العافيه اختي على الموضوع
مفيد جدا

[نسمة المساء]

ميلاد وشجن حياكم الله الحمد لله إنو الموضوع أفادكم

[خير ان شاء الله]

موضوع جييييييييييييييييييييييييييييييييييييييييييييييييي ييييييييييييييييييييييد

[soul of love]

مشكوره الموضووع جدااا مفيد خصوصا اني بكريه واستفدت كثير
وخصوصا اني الحين اطلع اجهز للبيبي...

^ ^ شكرا