ربي لك الحمد رزقت بمولودي مُظاهر يوم الثلاثاء 11/1/1433هـ و الحمدلله كانت سهالات من رب العالمين بفضل الله و رضا الوالدين
..
طبعا أنا بكرية و كنت أسمع كثير عن قصص الولادة والرعب اللي يصير فيها هع و كنت كثييير أخاف و من دخلت التاسع و انا كل يوم أقول بكرة بولد اليوم بولد و تجيني آلام بس ما كانت تستمر فأعرف انها مو ولادة و كنت صراحة كثير خايفة من الولادة و بنفس الوقت متحمسة لها .. لما قربت ع نهاية التاسع قلت في بالي هي الولادة جاية جاية يعني لا الخوف بيفيدني ولا الحنه ع الولاده ههههه و متى ما ربي كتب لي بينور دنيتي ولدي الغالي ميمو .. و طبعا كنت دايما أجلس في مويه دافية و آكل عسل و تمر و أقرأ سورة مريم و الزلزلة ..
نجي ألحين للمفيد خلصت التاسع يوم السبت و قالت لي الدكتورة لو ما ولدتي خلال هالأسبوع تعالي يوم السبت الجاي علشان نعطيك طلق صناعي و انا صرت مرعوبة شوي و بنفس الوقت متوكلة على ربي ..
يوم الأثنين الفجر صرت كل شوي أصحى على ألم كل ساعة تقريبا بعدين الصباح صار الألم مره كل 10 دقايق و مره كل 5 أو 8 أو 7 دقايق .. و طبعا زوجي في العمل و اتصلت على مامي و قلت لها اني أحس بآلام و الوقت وكذا و اتصل على زوجي و آكل تمر و اتمشى في شقتي و أسمع سورة مريم في جوالي و أقرأ الزلزلة و أشرب مويه مقري فيها و الحالة حالة عندي و كل شوي مامي تتصل علي و تقولي روحي المستشفى و أنا أقول لها تو الناس .. و إذا خف الألم أقول ياليتني ما تصلت على ماما خوفتها شكله طلق كاذب مثل كل مره .. لين بابا كلمني و قال بوديك علشان نتطمن المهم هالكلام الساعة 9 ونص الصباح و انا انتظر بابا على ما جاني الساعة 10 و نص " متفرغ بابا فديته يمديني ولدت ههههه طبعا هوا رايح يتروش و يتكشخ " بعدها جاني و رحنا و في السيارة يسولف معي و يهديني بس كثير حاسته متأثر ثم دخلنا ع الطوارئ و صعدوني غرفة الكشف و حطوا علي التخطيط و قالوا فيه طلق و فحصوني و طلع واحد ونص بس الواحد سانتي كان مفتوح من نهاية الثامن يعني الجديد النص .. المهم قالوا لي روحي البيت انتي بكرية و البكرية تطول .. المهم وداني بابا بيت أهلي و تغديت و شبت لي ماما عود و تبخرب به من تحت "تقول ماما لو طلق كاذب يوقف و لو حقيقي يزيد " و فعلا زاد الألم ,, ثم جاني زوجي و رحنا بيتنا صلينا المغرب و العشاء ثم طلعنا نتمشى في العثيم كنا بنروح الممشى بس الجو مرررره بارد و رحنا العثيم الدور الأول كثير هادي و تمشينا يمكن بس نص ساعة لأني تعبت كثير و كل شوي نجلس أحس ما فيني طاقة و شرينا عشى و رجعنا البيت و تعشينا أنا مالي خلق نص عشاي ما اكلته و الألم نفس الشي مره كل 5 أو 7 أو 8 دقايق و أنا متحملة و أقول ما أبغى أروح إلا لين أحس إني خلاص وصلت حدي .. و نمت و طبعا كل شوي أصحى على ألم و أظل ساعة كاملة صاحية و أصيح بس بهدوء عشان ما أزعج حبيبي وراه دوام .. بس مره من الألم صحيته و انا اصيح و أقوله ودني المستشفى حضني بقوة وحسيت إني في جنه و أقول له لا تتركني أنا أحبك و هو يقولي ما راح أتركك و أنا أحبك أكثر يا حياتي و إلخ و يخفف عني كثير فديته <<< رومنسيات ما قبل الولادة ههههه بس من جد لما حضني حسيت بإحساس غريب و حسيت بالأمان و الحب الله لا يحرمني من حضن حبيبي و حنانه .. بعدين هديت شوي و قلت له خلاص إرجع نام و رجع نام ورجعت أنا نفس الحالة بس بنفسية أحسن و أقوى من بعد حضن غلاي ..و جا الصباح و اتصل بابا و قال لزوجي جيب حبـــhــــي |هههههه هو قال اسمي طبعا| البيت قبل تروح الدوام قاله زوجي أن إحنا مقررين يوديني بيت اهلي من الصباح و رحت بيت أهلي و نمت أحس مو مشتهية آكل شي ما فطرت حتى و نمت مع أختي في غرفتها و كل شوي أصحى من الأم بس ما أصارخ ولا أصيح علشان ما تخاف أختي وهي ع وجه زواج خخخ و حمل و ولادة و إلخ .. بعدين الساعة 10 سوت أختي فطور لي و لها و صحيت آكل و انا مو مشتهية بس علشان خاطرها كليت شوي في هالوقت اتصل زوجي ع ماما يتطمن علي و بعدين كلمني و كذا و الألم مستمر .. بعدين رحت الحمام تكرمون و طلعت إلا شافتني مرت خيو قالت الله يسهل عليك شكلك اليوم خلاص والده و مصره إني بجيب بنوته ههههه " انا وهمت كل العائلة إني بجيب بنوته إلا طبعا زوجي و ماما و بابا خخخخ " و انا أضحك و أقول لها يصير خير .. بعدين رحت شوي جنب ماما و أسولف وياها عن علامات الولادة اللي لازم أروح علشانها المستشفى و الأم قوي فقالت لي ماما أن بابا و خيو رايحين المسجد و إذا خلصوا بيجون يودوني طبعا جات الساعة 1الظهر و هم ما جاوا " يتمشون حضرتهم و أنا أتالم خخخ " .. بعدين الحمدلله كلمت زوجي وقال إنه طالع من الدوام علشان يجي يوديني "طبعا قبل ما ينتهي وقت دوامه .. و قال بروح البيت و على ما يتروش و يتكشخ ومدري إيش | طبع في رجال عائلتنا غريب يتصرفون ببرود و أنا أتألم خخخخ على فكرة زوجي يصير ولد ولد عم بابا | المهم رحت شوي أريح على ما يجي زوجي إلا أسمع بوووومممم " صوت إنفجار كيس الجنين و نزل مويه 3 مرات بس قلت يمكن كيس الجنين و يمكن مدري إيش لأن ما تدفق كثييييييير مثل ما أنا أعرف .. و ظليت شوي منسدحة بعدين قلت لازم أستشير ماذر و رحت لها قالت هذا ماي الجنين بس صبري زوجك قريب يجي و رجعت انسدحت إلا بعد دقيقتين جات ماما و قالت بسرررررعه اتصلي على زوجك و خليه يجي و اتصل عليه و انا فيني الصيحة وأقوله أنا خلاص اليوم بولد و نزل الماي ومدري شخربط هع .. و كنت اقول لماما تعالي معي على إني معارضة جيتها قبل بس حسيت إني محتاجة وجودها جنبي و هي تقول لا توكلي على الله و انتي شجاعة و مدري إيش تشجعني يعني خخخ .. بعدين بعد على ما تجهز زوجي و ترصع بالعطور والحركات والكشخة لإستقبال مولوده الأول .. جاني ع الساعة 3 و طلعت من البيت إلا بدخلت بابا و خيو و قالوا وين بتروحي و أنا ما رديت أصلا فيني الصيحة والعبرة خانقتني و ماما نفس حالتي أحسها شوي و تصيح جعلني فدا قلبها ,, و قالت لهم أن شكلي موصله خلاص وقربت ولادتي | يا ربي طاحت دموعي دقيقة بدور المناديل أمسحها ذكرت ذاك اليوم المليئ بالمغامرات و الأكشن والحب و الخوف و الحنان | المهم بابا يقولي الله معاك يالغالية و أخوي يقول معليه كلها بووش " ايه هين" و يطلع البيبي و أنا ضحكت بدون نفس هههه و ركبت مع زوجي و قالي اني وحشته وكذا ههههه و شغل سورة مريم و إنا طول الطريق أتألم و كل من يجي الألم أصارخ بس بشويش و أمسك إيد زوجي بقوووة و احيانا أمسك نفسي و أستغفر و أدعوا الله باللي ببالي ولا أصرخ ولا صرخة .. بعدين وصلنا المستشفى و بس ركبوني على الكرسي إلا بذااااك الصراخ القوووووووي بس مو من الألم أتوقع إنه صراخ خووف | يا ربي دموعي كل شوي بتطيح هع | و كان زوجي اللي يدفني هههه فديته يغار علي مو راضي للرجال اللي في الطوارئ يدفوني .. طبعا مسكين زوجي فديته بعدين اعترف لي لما سألته إنه صاح شوي يعني دموع و مسحهم بالشماغ لما صرخت أول ما دفني بلكرسي ثم حطوني الممرضات في سرير بصراخي بس كله صراخ خوف مو ألم .. و غطوني بالشرشف حق السرير و طيران لغرفة الولادة على طول ما حطوني في غرفة الكشف و زوجي معاهم ويمسك يدي فديته و أنا أشد عليها بقوووة | .. بيني و بينكم احسن إني دخلت المستشفى بصراخي علشان في الطوارئ ما يأذوني بقياس الوزن و الحرارة و مسخرة ههههه | و قاسوا الرحم و الحمدلله 4 سانتي أنا اسبشرت خير يعني قربت الولادة الحمدلله رب العالمين .. و كل حين ألم ومره أمسك نفسي و مره أصارخ بشويش " علشان ما أرهق نفسي " يعني بس أأن من الألم .. شوي جات وحده سعودية وقالت لو عندك جوال أو أي شي ثمين عطيه زوجك إحتياط علشان محد ياخذهم .. ووقلت لها تناديه ونادته لي و حضني وكلمته وحسسني وجوده بالأمان و ظل شوي وراح لأن قالوا له بس خمس دقايق .. بعدين جات السستر و قالت أعطيك أكسجين قلت لها ايوه .. حطته لي بس صراحة ما يخفف الأم بس يخليني مثل النايمة و أصحى مع الطلقة وما أقدر أصرخ يعني كأن شي مسكر ع أنفاسي و احس نفسي صرت أهلوس وقتها ههههه مدري شو أقول بصوت صغير ولا ينسمع.. و أحيانا إذا تألمت وصرخت يعلموني طريقة التنفس الصحيح .. وكل حين يقيسون و مره شافوه 7 و بعدين 9 و بعدين عشرة و صاروا يراكضون و يجهزن المكان و الأدوات اللي بيشرحوني بها ههههه و بعدين قالت لي الدكتورة فديتها كثيييييير حنونه وتشجعني إذا جاتك الطلقة شدي و دفعي | يعني تكرمون مثل البراز| و أنزل راسي لين صدري.. و اتبعت تعليماته و كل حين أسوي اللي تقوله ويطلع ويدخل بعدين قالت إنها شافت راسه و المولود اصلع خرعتني ههههه المهم الحمدلله رب العالمين اللهم صل على محمد و آل محمد تقريبا ثلث ساعة بس و شرف حبيبي و نور عيني ميمووو الساعة 5 و 5 المغرب يعني عند الآذان و لما شفته كان كله دم طبعا حسيت جد قطعه مني طالعة كان ودي أقوم و آخذه لحضني و أبوسه و أقوله اخيرا شرفت ينور عيني و لما صرخ اااه ردت الروح فيني .. و بعدين طلعت المشيمة واااع شكلها مقرف استغفرالله ثم ابتدت تخيطني و أحس شوي بدخلت الإبرة و هي الدكتورة تسولف معي و أنا أرد عليها بدون ما أركز كثييير و مو عاطيتها بال أصلا كانت نظراتي على مولودي وين ما يروحون به وهم ينضفونه و أردد الحمدلله و ماني مصدقة حاسة نفسي بحلم و بعدين صارت الممرضة تضغط ع سري علشان يطلع الدم و ألحين سري صار حفرة بعدما كان صغير ههههههه .. المهم خلصوا وغيروا لي لبسي و حطوا قمري صغيري على صدري و بسته وحضنته بعدين أخذوه الحضانه علشان أرتاح و خلوني في غرفة الولادة ساعتين و نص أريح .. و طبعا طفوا اللمبة علشان أنام بس وين يجيني النوم " كنت أفكر في الولادة و النونو و ماني مصدقة و الم الطلق و كل شي .. و فجأة دخل حبيبي و شمعة حياتي زوجي وحضني وحضنته و حركات و رومنسيات ما بعد الولاده خخخخخ و سولفنا شوي و كلمنا الأهل رسلت لصاحباتي إني ولدت وكذا.. وصورني في غرفة الولادة بكشتي هههه و حتى أنا صورته وانتهت قصتي و الحمدلله ع سلامتي و سلامة صغيري هههه..
أدري طوللللللللت هذرة بس هذا طبعي والله لو تعطوني مجال يمكن أكتب حتى يومياتي مع ميمو و تربيته والسهر والتعب و المغص و الغازات هههههه
بس قبل ما أنهي كلامي احب اوضح لكم ملاحظات ونصائح خصوصا للبكريات أمثالي >> خلاص راحت علي ما عدت بكرية هع
*الولادة مهما كان ألمها و تعبها تظل تجربه حلوووووووووووه و ما تنسي ..
*استغلي وقتك بالإستغفار والدعاء لأن الصراخ ما بيفيدك مثل الدعاء ,, بالعكس الصراخ بيتعبك .. يعني أنا دعيت الله أن ولدي ما يصير فيه بو صفار | لأن انا تعقدت أختي ولدت قبلي بشهر ورقدوا ولدها بسبب البوصفار| و الحمدلله رب العالمين استجاب دعوتي و ما صار بو صفار لولدي إلا نسبة خفيفة ما تحتاج لا علاج ولا لمبة بس تحتاج رضاعة طبيعية وتروح ..
*من الأشياء اللي سهلت ولادتي آكل التمر و العسل و النقع في ماي دافي و المشي على إني ما كنت أمشي كثير لأن صاير بررررررد .. و التوكل على الله و كنت قارية لي في ماي سورة مريم و آية الكرسي7 و الفاتحة 7و الزلزلة7 و كنت أشربهم طول اليومين اللي أطلق فيهم .. والحمدلله هذي كلها من بعد الله سبب في تسهيل ولادتي ..
*لا تسمعين كلام اللي ولدوا قبلك من وحده لوحده يختلف و اتركي الخوف عنك لأن الولادة جاية جاية لو شو تسون فأحسن تجي الولادة و انتي شجاعة مو خايفة لأني صراحة انصدمت سمعت أن الولادة موت وحياة و مدري وشو و رعب وهي الحمدلله رب العالمين سهله بفضل الله ..
*إذا حسيتي نفسك عطشانة وريقك يابس وقت الدفع ,,لا تستحين طلبي ماي ويعطونك و شربيه إذا وقفت الطلقة و الدفع.. لأني كنت أحس ريقي جاف فاطلبهم و يعطوني
* لا تخافي من الفحص أنا كنت خايفة منه بس سبحان الله ما كنت حاسة بألم أبدا .. مدري لأن الرحم متوسع أو لأني كنت مهدية أعصابي بس أهم شي وقت الفحص هدي أعصابك و ارخي نفسك ..
* حطي في بالك شي واحد أهم شي سلامة مولودك خصوصا وقت الدفع .. يعني انسي الألم و التعب و فكري في مولودك .. دفعي بأقوى ما عندك أهم شي يطلع صغيرك بالسلامة للدنيا .. لأن بعضهم يصير لهم نقص أكسجين مساكين الأطفال و يصيبهم تخلف عقلي لا سمح الله ..فسلامة مولودك أهم منك صراحة هع هع 
الله يسهل على كل الحوامل والوالدات و يرزق المحرومات
01-03-2012, 03:37 AM
قصة ولادتي بنظر عيني ميمووو
*قلب(H)حبيبي* 
رد: قصة ولادتي بنظر عيني ميمووو
.gif "94")
جديد منتدى إستفسارات مرحلة الولادة
العرض العادي
