السلام عليكم ورحمة الله وبركاته
الحمدالله كما ينبغي لحلال وجهه,,وعظيم سلطانه..
حبيت اقولكم قصة ولادتي بعبودي.....
طبعا انا اتابع عند مستوصف السلام بعنيزة وبما إن ماعندهم ولادة قررت اولد بمستشفى حكومي اللي هو مستشفى الملك سعود.. وخلصت التاسع بيوم الأربعاء 3رمضان,,,
وكان آخر موعد لي عند الدكتورة وقالت كل شي تمام والرحم مفتوح 2سانتي وولادتك خلال يومين طبعا ماصدقتها لأنه من الأسبوع 38 وهي تقول هالكلام..وكان من اسبوع وانا معي طلق بارد حييييل المهم نزلت معي السدادة يوم الخميس بعد المغرب وبعدها الطلق مع انه بارد انقطع....
طبعا خلاص انا طفشت وزوجي طفش معي؛؛ لاتلوموني والله يالعاشر يطفش,, وقلت بروح المستشفى واطلب طلق صناعي وأيدني زوجي بقوة بس ترددت كثير وقلت بما إن الرحم مفتوح بجرب أدهن ظهري بجوزة الطيب وزيت الزيتون ودهنته يوم الجمعة الظهر ولاشفت شي ويوم السبت بعد السحور رجعت ادهن بس هالمرة مع فكس وقلت بنتظر إلى العشاء ماجاء شي بروح اخذ طلق صناعي_مستعجلة_ وفعلا ماجاء شي وبعد صلاة العشاء تجهزت وطلعت المستشفى ودخلت عن طريق الطواري وكشفت علي الدكتورة وطلبت منها تعطيني صناعي بس رفضت "الله يجزاها خير" قالت انتظري إلى الأربعاء اما آلحين مستحيل أعطيك وانتي بكريه...
المهم رجعت البيت وبعد السحور ماكنت أحس باأي ألم وجلست أقرأ سورة مريم على بطني وسورة الزلزلة 7مرات..ودخلت اسولف مع حبيباتي بتجمع رمضان واقولهم اذا اليوم 7 وماحولي ولادة يعني بتفتح الجامعة وانا ماخلصت الأربعين؛؛شايله هم..
والساعه 6 الصبح رحت بنام ومجرد ماانسدحت إلا الألم باآخر بطني قلت عادي وعلطول خف ورجعت بنام ورجع نفس العوار بعد نص ساعه وكنت اقدر اتحمله قلت يمكن طلق بحسب واجلس احسب لين صار كل 10 دقايق وجاء زوجي من المسجد وكانت الساعه 8:30 قال يالله ع المستشفى قلت بنتظر إلى 9..وقلت بدخل اخذ شاور دافيء إلا ويزيد وصار كل6 دقايق وطلعت بسرعه وكنت اتحمل الألم وادخل المستشفى الساعه عشر وكشفت علي وكان مفتوح 3 وفيه طلق قلت بطلع ع مسؤليتي قالت نصيحتي انتي بكرية اجلسي وان شاء الله تولدين ع المغرب ونقلوني لغرف التنويم وسووا لي تخطيط طلق ونبض الجنين وجاتني السستر الساعه 12 قالت كل شي تمام قلت طيب ابغى شي اكله لاني بس فطرت ع ماء كنت قاريه فيه آيات تسهيل الولادة,,وجابت لي أكل ع الساعه 12:30 واخذت ملعقتين رز وانا لايعه علي كبدي قلت بس عشان تكون عندي طاقه وقت الولادة يكفي مانمت من امس الظهر وجت السستر قالت فيه أشعه رحت وقالت ماشاء مفتوح 5سانتي ونقلوني لغرف الإنتظار الولادة وبلغت زوجي وقفلت جوالي ع بالي ممنوع دخول الجوال والساعة 2 إلا ربع كنت عطشانه مرة وطلبت من السستر مويا ورفضت بعدين عطتني نقط مويا والساعه ثنتين قلت للسستر برجع قالت مو مشكله هاذي قربتي ولادة وتجي الدكتورة الساعه 2:30 قالت مفتوح 8 وتفك المويا وتطلع وترجع لي الساعه 3 قالت خلاص ولادة,,,
وينقلوني ع غرفة الولادة والسستر تقول اذا فيه وجع ادفعي مثل براز_تكرمون_طبعا ادفع بس ماني عارفة ادفع زين ورجولي ترجف من البرد ماني قادرة ارفعهم,,,, وتجي الدكتورة قالت اذا فيه طلق ادفعي واذا مافيه خوذي نفس وعلمتني كيف ادفع "الله يجزاها خير" والحمدالله الساعه 3:25 شرف أحلى عبودي وضميته ع صدري....الله يرزق كل المسلمات هاللحظه...
والله ان الدكتوره جلست تطلع المشيمه وتسوي لي خياطة وانا مو حاسه ابد جالسة اناظر بولدي والسستر تنظفه وبعدها طلعوني لغرفة التنويم وولدي معي.....والحمدالله افتكيت من الصناعي شفت 2 تعذبوا منه مررررة....
نصيحة؛؛كل ماشد معك الطلق لاتصرخين ادعي و استغفري والله اني كنت ادعي وفيه اشياء والله تحققت,,كنت ادعي إن أمي ماتدق ماودي تقلق وهي فيها ضغط والله انها تقول اخذ الجوال بدق تقول ثم اهون واقول يمكن نايمه.. وكنت ادعي أن الله يسهل علي ولادتي واولد قبل العصر والحمدالله تحقق..
ولله الحمد من قبل ومن بعد...
وآسفين ع الإطالة..