الحمد لله ربنا رزقنى انس بعد طول انتظار 8 سنوات (حقن مجهرى)

[ام انس المصريه]

السلام عليكم ورحمة الله وبركاته
الحمد لله ربنا من عليا ورزقنى انس بعد طول انتظار 8 سنوات وبعد تعب ومشقه وحياه كئيبه

اللهم لك الحمد
انا كنت كتبت قبل كده موضوع ليه بيحكى عن حياتى قبل حملى فى انس
وده اللينك بتاعه
http://forum.hwaml.com/t53019.html

عملت الحقن المجهرى اول مره والحمد لله حملت كنت فرحانه ومبسوطه وجوزى كمان واهلى واهله كنا كلنا فرحانين ولكن شاء الله واراد الله ان الحمل ميكملش تعبت ونفسيتى تعبت ولكن اقسم بالله كنت حاسه انه هايجى يوم وهكون ام وكنت دايما ادعى ربنا واقول

((اللهم ارزقنى يقينا يجعلنى اؤمن انى يوما ما سااصبح ام))

وبعد ماحصل الاجهاض كان عندى اجنه مجمده فى المعمل روحت حقنت لتانى مره والحمد لله حملت فى انس وطول حملى بدعى ربنا انه يكملى على خير حصلى حاجات كتير ونا حامل الجنين نزل الحوض من الشهر السادس والدكتور قالى نامى على ظهرك
فى الشهر السابع ضغطى كان عالى وفى اول الشهر التامن الدكتور قالى عندك تسمم حمل طبعا خوفت واترعبت ولكن اقسم بالله كنت اقول لنفسى ربنا مش هيخذلك ومش هيضيعك وربنا هيكرمنى
الدكتور قال مش هينفع ناخد ولا يوم من التاسع وولدنى اول يوم فى التاسع بعد مااخدت 15 حقنة رئه للجنين
اعطانى معاد الولاده يوم 20 رمضان مكنتش خايفه من اوضة العمليات ومكنتش بعيط لما سبت امى وجوزى واخواتى ودخلت العمليات حتى مسلمتش على حد فيهم

لانى مش بخاف من اوضة العمليات دخلتها 7 مرات فخلاص بقى عندى مناعه هههههههههه
المهم دخلت طبعا دكتور البنج صاحبى خدرنى 6 مرات عادى ههههههههههه
فقالى هنديكى بنج نصفى علشان الضغط عالى قلت له ماشى
المهم ادانى البنج وشويه والدكتور جه بدا يفتح فى بطنى ونا حاسه كأن فى قلم بيمشى على بطنى

اقول لدكتور البنج انا حاسه انا حاسه يقولى اهمدى بقى بطلى كلام وترتينى اقوله والله حاسه قالى طب ارفعى رجلك ياام لسان

جيت ارفعها معرفتش
المهم لقيت فجاه السرير بيتهز جامد اوووووووووى وقلبى هيقف بقيت اقول الحقونى قلبى هيقف هموت هموت لا اله الا الله بموت الحقونى

حسيت ان قلبى اقسم بالله بيتخلع من صدرى وكان روحى بتخرج

الدكتور قالى اسكتى بقى العيل محشور فى بطنك ونادى للدكتور البنج ودكتور الاطفال بقو يضغطو على بطنى جامدددددددد اوى ونا اقول لا اله الا الله بموت

لحد ماانس حبيب قلب امه ونور عين امه خرج وسمعت واااااااء رفعولى راسى وقالو لى ابنك اهوووو

ساعتها

عيطت جامددددددددد اووووووووووووووووى

وبقيت اقول اللهم لك الحمد اللهم لك الحمد

ساعتها حسيت ان تعبى مرحش هدر
ساعتها حسيت ان ربنا مش بيضيع اجر الصابرين
ساعتها حسيت بنعمة ربنا وكرم ربنا ورحمة ربنا وعطف ربنا
سالت الدكتور بتاع الاطفال هو كويس قالى زى الفل
دعيت بنا انه يكون صالح ويكون بار بيه وبابوه ويقر عينى بيه ويفرحنى بيه
..
المهم لبسو انس وخارجين بيه من العمليات قلت للمرضه هاتيه ابوسه
المهم جابته بوسته وقلت للدكتور اخيرااااااااااااااااااااااااااااا بقيت ماما يادكتور
قالى المفروض تدعيلى ليل ونهار ربنا جعلنى سبب وحملتى وكمان جوزك مش هيجوز عليكى وكمان ربنا اعطاكى ولد اهو تحطى رجل على رجل وتطلبى وتتامرى كمان هههههههههههههههه متستغربوش ان الدكتور بيكلمنى عادى كده والله كنت معتبراه ابويا كان دكتور كويس جدا وبياخدنى على اد عقلى ههههههههههههه
المهم
انس خرج بره جوزى سال الدكتور بتاع الاطفال هو كويس

قاله الحمد لله كويس قام جوزى اتوضى ودخل الاوضه صلى اخويا دخل عليه لقاه بيعيططططططططط جامد اوى وقاعد يحمد ربنا قام اخويا كمان ياحبيبى قعد يعيط
ماما بقت تقول لاخواتى ياولاد صلو لربنا واحمدو ربنا اختكم ربنا رزقها وبقو اخوات جوزى كمان فرحانين اوووووووووى وامى شايله انس كانها بتقول انس ده بتاعى محدش هياخده منى وحتى مورتش الوله لاخوات جوزى
بقت وخداه فى حضنها
لما خرجت من العمليات محدش قالى حمد الله ع السلامه ههههههههههههههههههه

كان كل قلقهم وخوفم على انس بسبب ان كان عندى تسمم حمل
والحمد لله على كل حال وان مع العسر يسرا
بعد الجوع شبع وبعد الظمأ رى وبعد السهر نوم وبعد المرض عافيه سوف يصل الغائب وينقشع الظلام ويفك العانى
اذا رايت الصحراء تمتد تمتد فااعلم ان ورائها رياض خضراء ورافة الظلال
اذا رايت الحبل يشتد يشتد فااعلم انه سوف ينقطع
مع الدمعة بسمه ومع الخوف امن ومع الفزع سكينه
اى واحده فيكم لسه ربنا مرزقهاش ذريه

تتدعى ربنا كتير ويكون عندها امل فى الله وحسن ظن فى الله

والله العظيم كان جوزى يعايرنى ويقولى كلام يحرق دمى كنت اقوله
اقسم بالله ورب الكعبه ربنا هيرزقنى وهبقى ام كان يقولى قولى ان شاء الله

اقوله ان شاء الله تحقيقا لا تعليقا
والحمد لله على نعم ربنا الظاهره والباطنه
وربنا يجعل انس بار بيه وباابوه

وادعولى ربنا يرزقنى الحمل الطبيعى بعد كده ومعملش الحقن المجهرى تانى

لانى تعبت جدااااا من كتر العمليات والحمد لله ان تعبى مرحش هدر وعوضنى خير باانوسه حبيب قلب امه
معلش طولتتتتتتت عليكم
اه نسيت اقولكم ادعو لانس ربنا يعافيه من الصفرا بقى عنده شهر ولسه الصفرا عنده نسبتها 7