السلام عليكم ورحمة الله وبركاته ...
اخواتي ابغاااء حل فديتكم ضروري جدا جدا ... القصه لاخت صديقتي .. والله تقطع القلب اختها تسألني امس ماعرفت شقول لها ... وابي شوركم ..
قصتها انها تزوجت من 15 سنه تقريبا يعني لما كان عمرها 20 سنه تقريبا .. وتزوجت رجال متزوج وحده ومطلق الثانيه .. لاتسالو ليه لانها تقول انه نصيب وأنها ماتدري ليه وافقت ... هي لا بأس بها مابقولكم ملكة جمال ولا ولاشي هي وسط مايله للحلاوه وجابت بنوته (12)سنه وولد(10)سنين بس المشكله في زوجها ..
ام زوجها كانت عايشه معاها بنفس العماره وتطيح فيها سب واهانه واهي تبغى تمشي حياتها .. وزوجها جاته فتره كان يمد يده عليها واهي مره تروح لبيت اهلها ومره ترجع .. يعني تحملت ظلم مايعرفه غير رب العالمين .. وبصراحه احترت اكتب اي شي من الظلم ...
بس قبل 7 سنين راحت عند اهلها واستحملت الاهانه ببيت اهلها من كثر الاهانه اللي جاتها من زوجها وباعت ربع ذهبها عشان تدرس في معهد واخذت شهاده مع اصرارها وجاتها وظيفة عقد مدرسه محو اميه براتب 2500 ريال ...
وبعد سنتين اشترطت على زوجها لو بيرجعها يجيب لها بيت شرعي وبعد محاولات وتدخل بسيط من اخوها عطاها ارض قيمتها 9الف وشال ايده من الموضوع ورفض يدفع شي ثاني ... طبعا ضروف بناء بيتها صعبه كانت لازم تستحمل زوجة اخوها البغيضه اللي شايفه نفسها ولاترد عليها وتستحمل عيال اخوها عشان اخوها يكمل بني ببيتها ... لو صار وزعلت زوجة أخوها يتأجل البناء اسبوع او اسبوعين ...ومن ناحية زوجها شال ايده من الموضوع ...
نسيت اخبركم ا ن زوجها اكبر منها ب15 سنه تقريبا وبعد زواجها منه بسنه رجع زوجته اللي كان مطلقها وصار 3 حريم بنفس العماره .. طبعا الزوج معرووف بالتفرقه يعني كانت هي اقل وحده يعطيها حقها بابسط الاشياء من مصروف للبيت ووصلت لحد حقها الشرعي وبطل يجيها الا كل 4 شهور مره تقريباا ...مو لانه مايقدر بس لانه يروح لزوجته اللي رجعها ومافيه نوع من العدل .. طبعا زوجته اللي رجعها واللي يسمعوه انها مسويه له سحر الله يحمينا عشان يميل لها ...
طبعا انتها بيتها بعد مازوجها دفع 9 الف(باعو الارضيه لانها بعيده مرررره وبمنطقه شبه صحراويه) وابوها جاب لها قطعة ارض جنبهم واهي كملت كل شي بالبيت من ذهبها الباقي واللي كانت تجمعه من رواتبها ..
طبعا اثاث البيت ماتعنى فيه زوجها تحلف وتقول حتى توصيله للكهرب ماجابها !!! قال انتي عندش خير (يقصد راتبها 2500 بيكفي صرف لها ولعيالها ولبيتها واجبات اجتماعيه هذا غير ان عيالها يدرسون ويصرفون) طبعا تعدل الوضع بعد فتره وصار لاباس فيه يجيها 3 ايام ( كل وحده 3 ايام) وياليته مايجي.. الصراحه صار يجيب لها هي وعيالها 1000 ريال واحيان ينقصها ل500 او 700 يقول احتاج فلوس مع انه متقاعد من شركه كبيره وعنده راتب التقاعد 10 الاف كل شهروعنده ابل وغنم وغيرها حقين البدو المتأصلين.. بس هو يصرفه على حريمه الثانيات ... طبعا الحرمه متضايقه حيل لانه مايذكرهم بشي يعني يطلع حريمه وعيالهم ويمشيهم وعياله اللي منها مايذكرهم الالما تقوله وتصر ويصير مشكله فيطلعهم مره بالسنه ...
والله معاناتها معاناه ومايحترمها كلش ولا يقدرها ابد وهالثلاث ايام اللي يجيها سوي معاها مشاكل والله من كلام اختها احسه يبي يعاندها او يتسلى فيها ... يعني يعصب فيها وهو يمدح في حريمه ويقلل من قدرها واذاا قالت له خلاص لاتجي عندنا جاء لعندهم واذا طلبت منه يجيهم لانهم محتاجينه يطنش ...
وعلى فكره زوجته اللي كان مطلقها صاير مثل خاتم باصبعها لدرجة انها تسب فيه وتلعنه وتطرده من البيت ويجلس يبكي عند الباب تفتح له .. وترسله رسايل سب تقوله فيها انه حرمه والله كلام قوي مره ويرجع لها ...وصار يكذب عليها باوقات كثيره مايجيهم وتكتشف انه عند زوجته الثانيه..
وامه اللي كانت حاطه راسها براسها بعد مازعلت عند اهلها امه جربت الذل والاهانه من حريمه الثنتين ولا قالت شي بالعكس صارت تتحسف عليها لانها ماكنت تقصر معها بشي ...
نسيت اخبركم انها لما تزوجت كانت نحيفه وتجنن ومع المشاكل صارت دبدوووبه حيل وكان زوجها يضحك عليها وبعد مارجعت له نقصت وزنها وصار جسمها خياااااااااااااااااااال وربي صارت تجنن فصار يقول لها انتي ايش هذا الجسم (يعني ماعجبه شي).. مع هذا طول السنه اللي طافت ماعاملها كزوجه الا 3 مرات بسسسسس!!!!!
ومع هذا تحملت لانها عارفه ان مالها الا هو لاتقولو وين اهلها لانهم مابيستحملوها..
المشكله صارت اقووى عليها يوم درت ان زوجها بيني لزوجته اللي رجعها بيت لحالها ... ويترك الشقق لزوجته الاوله وهي مصرفها هي وعيالها مايعطيهم الا ناقص ...
قالتله وانا قال لها انتي عندك بيتك قالت اللي دافع فيه ارضيه بس 9الاف (الارض صارت ب30 الف بعد 7 سنين من وقت باعوها) قال لها انتي عندك خير (يقصد راتبها )قالت له والله ماعاد اقعد عندك لو سويتها قال لها عندك جدران ياكثرها دقي راسك باللي تبغي .... هو قال لها هالكلام وهي بتنفجر صار لها اسبوع وماتنام ..
طبعا لاتقولون تتطلق لانها لو تطلقت اخوانها بيرجعونها لبيت الاهل واخوها اللي بنى بيتها حاط عينه عليه بيأخذه وبيجلس فيه هو وزوجته البغيظه ... وهي بتموت دافعه فيه ذهبها وعمرها ورواتبوها ... ولو قلتو تقعد عنده ماتنفع لانها خلاص وصلت لحدها ... ولا تقولو تخلي اهلها يكلموه لان اخوانها لاهيين بحالهم ولا احد بيفكر بسال ولا بيوقفون معاها... وابوها الله يعطيه العافيه.. وامها بس تقوله كلمتين وخلاص لانها طيبه ...
بنات الله يخليكم أنا ماقدرت احكي مشكلتها صح ولا بتوسع بس حاولت اربط بعض الاشياء .. لان اللي يقول المشكله مو مثل راعيها ...
أسفه للأطاله بس والله هالكلام نقطه ببحر الواقع اللي هي عايشته....
عطوني نصيحه اعطيها اختها الله يرزقكــم الجنه ....