السلام عليكم هذي تجربتي الشخصية في مستشفى ادم
زوجي كان عنده مشكلة العدد والحركة والتشوهات عالية وحسب كلام المنتديات ومدحهم لمستشفى ادم قررنا نسوي تجربتنا هناك راسلتهم ورسلت تحاليلي قالو تعالي يوم 20 من الدورة وبعدين لما وصلت المستشفى الدور الثاني اللي استغربته اول ماشافو احنا مو مصريين قالو اطلعو فوق اكسبرس ولا انا عارفة ايش هو إكسبرس بس طلعنا ويحطونا في الامر الواقع دخلت على الدكتورة مها الشاهد اسلوبها غير لبق شككتني وحسستني ان مشكلة تاخر الحمل مني مو من زوجي ولا حتى كلفت على نفسها وقرت تحاليل زوجي
تسالني معقولة ماحملتي وكيف و ليه؟ طيب اعملي منظار اهم شي عندهم تسحيب الفلوس باي طريقة قلت لها دكتورة شفتي تحاليل زوجي قامت تشوف تقول اه صح .. قامت تقول لي طيب سوي تحاليل اجسام مضادة ..قلت لها ليش أصلا لوعندي ارتفاع في اجسام المضادة انتو كدا كدا تعطو كل المرضى ابر هيبارين من باب الاحتياط لاني شفت المنتديات كاتبين ان الكل المريضات اخدو هيبارين واسبوسيد كدا فليش اسوي التحاليل قامت تلخبطت تقول لا مانعطي للكل وبعدين رجعت تقول لا عشان برضو اعرف جرعة الهيبارين .. جيت ادفع للتحاليل قال لي اللي في الريسبشن الفين وشوي قلت له لا خلاص ماابي قال لا ماينفع تدخلي العملية من غيرهم،،نعم؟ يعني بالعربي غصب عن مناخيرك تدفعي الفلوس واخر شي سويت تحليل وطلعت سليمة الحمدلله وكمان عطوني ابر هيبارين واسبوسيد كان ايش لزمتها التحاليل؟
لا وكمان تقول تعالي ثاني يوم دورة طيب ليش ماقلتو لي اسافر ثاني يوم دورة يعني استنى كل هذا عشان الدورة تنزل ومصاريف الفندق والتكاسي والاكل على ظهورنا ... نجي ليوم التنشيط قالو لي في إكسبريس ان اللي بتابع تبويضي د.مها وفي الاخر طلعت الدكتورة منال اللي تابعت تبويضي وهذي الدكتورة غير ملتزمة بمواعيدها وعندها المريض عادي ينتظر ساعة ساعتين الموعد 6 المغرب توصل 7 هذا وانا دافعة اكسبريس
جا يوم السابع من التنشيط وقتها كنت غاسلة من الدورة صار لي يومين بس تفاجئت اني نزفت لما رحت الموعد اسال د. منال ايش سبب الدم؟تقول لي مش عارفة ..خوفتني اكتر بعدين قلت خلاص بروح اسال د. مها شافتني سونار تقول لا لا انتي حتنقلي مجمد بطانتك ضعيفة مش حتستحمل ننقل فريش؟؟؟؟ وانا مستغربة منها ان كيف قدرت تحكم من الحين وانا لسة ماخلصت تنشيط وماسويت سحب تضايقت كثيير وقلت لها مو انا بعدين راح اخد تحاميل مثبتة قبل النقل صح؟ قالت ايوه قلت لها طيب ممكن البطانة تكون اسمك بعد التحاميل صح؟ قالت ممكن اه وممكن لا مقدرش احكم....وتقولها بكل بروود ...عيشتني في قلق وكنت خايفة تعبي يروح على الفاضي وهي ولا همها .. والحمدلله نقلت فريش والبطانة كانت تمام كان ايش لزمتها التخويف والقلق؟
نجي الى كبيرهم الدكتور مدحت عامر دكتور الذكورة اللي نفخو فيه لحد بكرة انسان مادي وصاحب بزنس مو اكثر وريناه تحاليل من قبل مانجي سويناها في السعودية اول ماعرف ان التحاليل مو من مركزه ماعجبه الموضوع وماقرا الورقه اصلا بالرغم ان الورقة قدامه وعلى فكره التحاليل هذي فيها زيادة اشياء عن معملهم بس ماهتم لان مو من مركزه ولما قلنا له ان كمان عملنا تحليل عندكم امس فجئة انبسط وصار يشوف ويتكلم كلمتين ..انسان مادي المهم شاف التحاليل قال كويس للحقن المجهري بس هالكلمتين واحنا اصلا داخلين نسأله ايش مشكلة زوجي ؟هل نقدر نحمل طبيعي لاني اجهضت قبل كد؟ ايش تنصحنا ياخد علاج؟ طلع دكتور همه انك تسوي عندهم حقن مجهري والسلام مافادنا بشي ساااكت وبارد قاعد يطقطق على اللابتوب ويرد على التلفون قلة احترام منه حتى زوجي زعل من هالتصرف وعلى ايش الناس تمدح وتشكر فيه بهالمنتديات !ايش الشي الزايد عن غيره؟ حتى عمليات مايسوي هو فقط وجوده منظر وسمعة للمركز
ونجي وقت العملية خلونا ندفع 19 الف جنيه بس عشان عملية من غير ادوية عشان ايش اكسبريس
بعد ماصحيت من البنج لقيت نفسي في غرفة مستقلة محد حولنا واستفراغ هيستيري مو قادرة أمسك نفسي ولا في دكتور ولا حتى ممرضة وزوجي ماهو عارف يهديني ولا يروح يدور على دكتور او ممرضة اخر شي لقى ممرضة وجت وحسستني اني اتدلع تقول متقرفيش نفسك وهدي واشربي موية تخيلو ... حسبي الله عليهم روحي كانت بتطلع وهم يماطلون فيا و جا واحد قاس ضغطي يقول تمام مش عارف ليه بترجع...طيب مستشفى ايش طولها اي عرضها ماعندهم شي يهدي الترجيع وظليت كدا من الساعة 1 الى 4 وزوجي تهاوش معاهم وكلم فلان وعلان اخر شي جابو لي ابرة تروح الاستفراغ وهديت الحمدلله وكل هالفترة محد جاني من الدكاترة وقال لي كم بويضة انسحبت وتلقحت شفتو المسخرة ورجعنا البيت بالليل وجا اليوم الثالث كلموني تعالي عشان النقل وصلت. وسالت الحضانة كم بويضة اخدتو وكم انقسمو؟ تقول لا لازم دمنال تقول لك كانه سر ومو من حقنا نعرف وانا طول هالوقت ابكي خايفة ان مافي الا بويضة وحدة انقسمت و الباقي فاسدين عشان كدا مايبون يقولو لي ويصدموني وزوجي يهديني
تخيلو تجي د منال تقول ياالله البسي ثوب العمليات عشان ننقل ولما سالتها كم بويضة ؟تقول ماادري ...حسبي الله ونعم الوكيل ..واقعد على سرير النقل تقول عندك فرط تنشيط وموية كثير في بطنك مانقدر ننقل لك الا 2 اجنة ووقعي هنا انك موافقة تخيلو المنظر أوقع على ورقة وانا على سرير العمليات وفاتحة رجلي بالله عليكم هذا تصرف انساني؟ماني قادرة افكر انشل تفكيري.. قلت لها طيب زوجي باخد رأيه تقول متخفيش انا حقولو مسسسخرة
بعد كللللل هالمرمطة مانجحت العملية ونزلت الدورة الحمدلله على كل حال و انقهرت كثير على كل اللي صار لي بس الحمدلله ارتحت من مرمطتهم ومستشفاهم اللي كانه مهرجان او سوق مافي لاترتيب ولا نظام وبهدلة اطلعي انزلي روحي تعالي لدرجة اشوف ناس مرضى جايين من قرى وارياف نايمين على الكنب وربي يتعبوهم فوق ماهم تعبانين من المشوار
لا وكاتبين ممنوع البقشيش والعاملات النظافة اخدو بقشيش لما قلت لها وقفو لي أسانسير
وأخيرا اسفة اني طولت ولكن حبيت اقول لكم انا مو متحاملة عليهم عشان مانجحت العملية لا وربي الف لا بالعكس اذا نجحت برضو راح اكتب عشان اوري الصورة الحقيقية للوضع اللي بتخوضه كل وحدة وماراح اخلي فرحة الحمل تنسيني