حامل الشهر الثامن .. وساوس وافكار :(

[immortal]

مرحبا بنات

اكتب لكم وانا ضايق صدري وتعبانة

انا قبل سنة حملت واجهضت ب 6 اسابيع ومنها تعقدت وصادتني وساوس

الله رزقني بحمل ثاني هالسنة ووصلت الشهر الثامن

لكن من اول ما حملت للحين كله خايفة على الجنين افكر لا يضره شي سواء من الاكل اللي اكله او حركتي او اي شيئ

وصادني سكر حمل وتعبت اكثر في محاسبتي على الاكل

كل شي اكله اقرا مكوناته وما اكل من اي مكان وزوجي دايما يلومني على اني احط بالي اكثر من اللزوم

لدرجة حتى اللحم او الدجاج ما اكله الا مقصصته صغار حق اتأكد ان داخله مستوي زين

البارحة كنت طالبة مشويات الا هي الاضلاع ريش

وتأكدت ان مستوي عدل .. وعلى آخر حبة الا اجوف صوب العظم في دم تكرمون على طول طلعته من فمي قبل لا ابلعه :(

كثير خايفة من جرثومة التكسوبلازما او الليستيريا اللي تسبب مشاكل للجنين والمواليدا الجدد

اعد الايام حق اشوف ولدي بحضني وكله اخاف هاليوم ما افرح فيه ربي سامحني واغفر لي على هالافكار :(

وقبل يومين كنت طالعة مع زوجي .. وهو دايما يحاسب بالشارع بس كان شارع ظلام وجان ندش ب 3 حفر ورا بعض على طول رحت المستشفى الطوارئ قالو لي كل شي تمام س الدكتورة خربطت علي شي لو بيصير انفصال مشيمة احتمال بعد 24 ساعة يبين وافضل ارد اراجع مع ان حركة البيبي طبيعية جدا ..

بنات ادعو لي هالوساوس تروح عني وربي يبلغني واشوف ولدي واربيه

كنت متضايقة وحبيت افضفض سامحوني لو طولت عليكم

[لمياء ماهر]

حبيبتي تطمني هالوساوس بتتعبك غير كذا الله اللي ثبت لك كل هالشهور قادر يثبته لك حتى يحين موعود خروجه

وبدال ماتفكرين كذا حطي يدك ع بطنك واستودعي من لا تغفى عينه ولا تنام طفلك ومابعد هالامانه خوف وقلق لانك ودعتيه العظيم

الله يسر لك ويسهل علييك انا بعد اسبوع باكون بالثامن ويارب تيسسرك وحسن الخلق وهون الطلق

[جالكسي و الدنيا عكسي]

يا حبيبتي ....اللي ببطنك ما ثبت 8 شهور بسبب اهتمامك او وسواسك ..أبداً
بفضل الله سبحانه وتعالى ...أنتي استودعيه الله وادعي واستغفري ...و
كل ما جاتك هالافكار تعوذي من إبليس
واقري على نفسك وعلى بطنك كل يوم ...
واعرفي إن ما يصيبنا إلا ما كتب الله لنا ...



والله يطمن قليك ويفرحك بشوفته بحضنك سليم معافى ويسهلك ولادته. .
يااااااااارب العالمين. ...

[بنت ابويه]

الله. يثبت حملك يإرب. وأبعذي عنك الوسواس أشعلي. نفسك بأي شيء

[ms dior]

مالوومج لان جربت فقدان البيبي وجربت الولاده المبكرة وطول حملي لازم راحه تامه غصبن عني لازم افكر مو نفس الي مافيها شي وتمشي ايام حملها بسرعه ..

بس بعد متوكله على الله ..حبيبتي وكلي امرج لرب العالمين والله بيفرحج ان شاء الله بشوووفه ضناج في حضنج ..

والله احس فيج ♡

[sukar]

حبيبتي قوي إيمانك بالله
ةقولي ماراح يصير الا المكتوب

انتي اجهضتي بالاسبوع السادس .. انا ولدت بالشهر السادس
وكان يرفسني بعد ماولدته ما شالوه من تحتي

وعشر دقايق وتوفى .. حالتي اصعب من حالتك بس ايماني بالله هو اللي صبرني

وهذاني الحمدلله ربي اكرمني بهالحمل لا تعقدت ولاصابتني وساوس

ةعايشة حياتي طبيعي يارب لك الحمد

لاتوسوسي كثير تتعبين نفسك وجنينك واللي حولك
آمني بالله وان اي شي يصير هذا مقدر ومكتوب من لما كنتي في بطن امك

والحمدلله ماباقي لك شي وتولدي
والله هو اللي ثبت لك حملك مو اي شي ثاني

ربي ان اراد شي قال له كن فيكون .. احنا ضعوف مابيدنا شي ابد
كل شي بيد الله سبحانه

فلا تعقدي الامور اكثر .. وعيشي حياتك
وعسى ربي يثبت حملك ويتمم لك ع خير

[ahlam-f]

حبيبتي استودعيه الله
الذي لا تضيع وداعه
ربي الحاافظ والحاامي
توكلي على الله وابعدي
عن الوسواس بالعكس
هذي ايام حلوه بحيااتك
لاتضيعينها بوسواس وخووف ..

[حياة الورد]

السلام عليكم
حبيبتي البنات ماقصرو بالنصايح ماشاء الله
يارب يثبت حملك وتروح عنك الوساوس والي كاتبة الله بيصير
والحمد لله ع كل حال