قصة ولادتي في بروكير الخبر عند دكتور فادي

[Loooly1]

مساء الخير بنات انا قريت كثير عن الولاده القيصريه وعن البنج النصفي وحبيت انقل لكم تجربتي عند الدكتور فادي حمدان في مستشفى الرعايه بروكير بالخبر


واتمنى القى ردود وتفاعل واي سؤال انا حاضره
طبعا انا بديت اراجع عنده من اول الحمل ولما وصلت التاسع كان وضع الطفل مقعدي وقرر الدكتور عمليه وكنت مكتئبه حدي لاني مجربه العمليه من قبل وكانت جدا صعبه الم وحاله وبنج كامل وكحه ومدري شنو وماعرف امشي طبعا هو قالي راح نبنجك نصفي افضل من الكامل وعملي تحاليل قبل العمليه بيومين وقالي انه الحمدالله تحاليلك سليمه تسمح بالبنج النصفي وقابلت طبيب التخدير دكتور عهد قبلها بيوم وشرح لي كيف راح يبنجوني المهم وجا يوم العمليه ورحنا الصباح الساعه6 كنت بالمستشفى ورحت غرفة التنويم وحطيت اغراضي واغراض البيبي وجاو ممرضتين صراحه يفتحون النفس وحبوبين وبشوشين ويريحونك ركبو علي المغذي وبعدها بساعه جابو لي ملابس بدلت واخذوني بسرير لغرفة العمليات وكنت ابكي حيل عشان بنتي عمرها4سنوات كانت مع امي بالغرفه تنتظرني وكسرت خاطري حسيت اني بدخل العمليات ومابطلع المهم وصلنا باب الغرفه للعمليات ووقفوني هناك والممرضات يهدوني ويسولفون معي ويضحكوني وجا دكتور فادي ودكتور التخدير كان اسمه منير ويكلموني ويسلفون معي وبوجه بشوش وارتحت نوعا ما صراحه
بعدها دخلوني الغرفه وجلسوني ومسكني دكتور فادي وممرضه عشان ابرة الضهر ويقولون لك ترى الحين بنحط محلول بارد لاتروعين وبعدها قالولي ابره بس مابتحسين الا بشكة دبوس وفعلا ماحسيت بالم بعدها ابره البنج قالو لي بتحسين بضغط بس بالضهر وفعلا حسيت بشي بضغط بس بعدها صارت رجولي دااااافيه وسدحوني بسرعه بعدين قالو لي حركي رجولك بس ماقدرت حطو علي ستاره وبدء دكتور التخدير يسولف معي وش قالو لك بنت والا ولد ؟ مبسوطه عشان بتولدين? الا دكتور فادي يقول مبروووك طلعنا البيبي وجلست تبكي ونضفوها. وجابوها لي ابوسها وبعدين خذوها الحضانه بس بعدها طولو جلست ساعه ونص وهم يضغطون على بطني وركبولي مغذي زياده استغربت سالت الدكتور منير وش فيه فادي تاخر ماسكرو بطني?قال الا خلصنا بس يعقمون الجرح سكروه المهم بعدها بساعه ونص طلعوني على غرفة الافاقه وجاني الدكتور فادي قالي حمد الله على سلامتك وترى عمليتك كانت صعبه لان صار نزيف بسبب العمليه الولاده الاولى ماكنت مضبوطه بس الحمد الله سيطرنا عليه ومابينا لك عشان هاتتوترين وامورك تمام الحين وكل يوم يجيني يتطمن على الجرح والمستشفى من جد روعه رعايه مو طبيعيه عندهم انصحكم فيه وجلست اول يوم منسدحه على ضهري ماتحرك وثاني يوم جاو الممرضات ساعدوني اقوم وصراحه بس 5 ايام وصرت مااحس بالجرح والحين كملت شهر من ولدت وحبيت انقل لكم تجربتي عند دكتور فادي لبناني الجنسيه لان مافي تجارب عنده بس من جد دكتور رائع وشاطر
تحياتي

[ام اسكندر]

حمدلله ع سلامتك

ومبروك ماجاكي

بس قوليلي هل القسطرة سووها لك قبل دخولك لغرفة العمليات ام بعد البنج؟؟

[فوضت امري لله]

الحمد لله على سلامتك

[خفايا الدنيا]

الحمدلله على سلامتك ومبروك البنوتة

[مملكة المشاعر]

الحمد لله على سلامتك ومبروك ماجاك

[Loooly1]

ربي يبارك فيكم حبيبتي ام سكندر القسطره بعد البنج ماحسيت فيها

[بشورة فيصل]

الف الف مبروووك
وتتربى بعزكم ان شاء الله
والحمد لله على سلامتك
وعقبالي بالولاده السهله والميسره والعاجله وعقبال الكروشات يارب

[برّو !]

الف حمدلله على سلامتك
شفت الفيس الاحمر قلت الظاهر مهي بشارة خير ههه

مبروك ماجاك

[ام حنونه3]

الف مبرررررررررررررروك
واالله يحسن الخلق ويهون الطلق
ويسخر لنا الممرضات والقابلات والسستترات وكل مواظفين المستشفي
ولا يكشف عوراتنا على رجال اجانب ابدا

[ام حماد]

الف مبروك والحمدلله على سلامتك
بسألك بما انك اخذتي ابرة الظهر ماحسيتي بعد مافك البنج بألم بمكان الابره او بالعصعص وظهرك بشكل عام يألمك او عادي وماجاتك مضاعفات مثل النوم الثقيل وصداع بالراس؟