تجمع حوامل ليبيا

[عيون زوجي]

يقين كيف حال حناك توا...
ومبروك ماشريتي انتي وام قصي وكل الليبيات
البارح وجعني المطار والخطوط الافريقية ويلي قتلني اكتر الجثث يلي انحرقت في الهنقر وعدد المفقودين 50الف مفقود رقم خيالي
يارب ارحم كل موتانا وشهدائنا واجمع كل حي باهله يارب
6شهور ررررررررررررعب
ياريته هرب فنزويلا من اول مرة خيرله وخيرلنا
قدر الله وما شاءالله فعل

[ام روفيدة]

المشاركة الأصلية كتبت بواسطة عاشقة الصحراء

السلااااااااااااااام عليكم .... كيف حالكم يا بنات كلكم من غير استثناء ...؟؟ والله طايرة من الفرح إني نكلم فيكم توا استحشتكم موووووووووووووووووت ...
أم قصي حبيبتي كيف حالك مشتاقتلك أكتر وربي يخليك على سؤالك عليا .. تسلميلي يارب ...
ميرنا وحبل الوصل ألف ألف مبروك الحمل والله فرحتلكم وعقبال ميمونة الحلوة يااااااااااااااارب وتكون حرية البلاد وجه خير عليها ...
أخباري إني ولدت بنوتة حلوة وزي القمر ماشالله عليها يوم 10/8 ولله الحمد وخاطري نحكييلكم على تفاصيل ولادتي لأني تعبت هلبا وصاروا معاي مغامرات ..
أول شي ياحبيباتي اني كملت شهري بدون ولادة مع ان الشهر التاسع فات عليا كله وجع وتقلصات وإنذارات كاذبة لدرجة مشيت للمستشفى أكتر من مرة ويطلع مش ولادة والرحم فاتح بس 1 سم . المهم دكتورتي قالتلي تعالي نديرلك وجع صناعي فرحت وقلت طيب خلي نفتك ونرتاح .. مشيت في الموعد المحدد وسبحان الله اليوم اللي قبله كله قلبي مقبوض وماجانيش نوم وحاسة بتصيرلي حاجة .. طلع الصبح وتوكلت علي ربي ومشيت الساعة 1 الظهر أول ماوصلت عطتني الدكتورة أول جرعة وجع صناعي وبعدها بساعة بدت لضربات والتقلصات لكن خفيفة بعدها من الساعة 4 بدت أقوى وقريبة من بعض ... خدوني عالصالة امتع الولادة والحق فرحت شويا نحساب روحي خلاص قريب مسألة ساعة أو ساعتين بالذات اني شفت كل اللي كانوا في الصالة كل شويا تجيب منهم وحدة واني نتوجع ونستنى ونصبر في روحي ونقول يالله هانت .. على هالحال لغاية الساعة 7 الصالة كلها فضت وقسم الولادة كله ماقعدش فيه حد غيري والوجع على أشده ونعيط بروحي حتى الممرضات برا يجهزوا في روحهم للفطور ..
تعرفوا حسيتها أطول ساعات عمري وأصعب شي إني بروحي ومسكين راجلي وأمي برا قلقانين وحالتهم حالة ...
المهم قعدت نتوجع للساعة 12 في الليل واللي قتلني ان الوجع يمشي ويجي كل دقيقتين يعني قريب من بعضه هلبا ومع هذا الدكتورة كل ماتجي تقيس تقوللي مازال 2 سم والله العظيم وقتها تمنيت الموت ...
جت الساعة واحد في نص الليل وصارت الطامة الكبرى ........... انقطعت الكهرباء على مستشفى الخضرا اللي اني فيه وعينكم تشوف حالتي الدنيا ظلااااااااام واني الوحيدة اللي قاعدة ماجبتش في القسم كله وصار استنفار مش طبيعي وبدو يطلعوا في النساوين كلهم حتى اللي جابوا قبل ساعات ونزلوا الناس اللي مركبينهم عالأكسجين وقالولي بري قعمزي شويا جنب أهلك في الصالة برا باش ماتخافيش بروحك ... مشيت جنب أمي وراجلي ومقعمزة عالكرسي ونتوجع والناس كلهم يتفرجوا عليا ويدعولي ويقولوا مسكيييييييييييييينة ربي يعينها ... في عز المعمعة جاني مدير المستشفى شخصيا وقاللي يابنتي دوروا على مستشفى تاني ولا عيادة كان لقيتي سرير وبري لأني مانضمنش وضعك ممكن تحتاجي عملية وشايفة الوضع كيف حتى المولدات وقفوا طبعا شعوري كان صعب بشكل مش طبيعي ونتوجع ... اتصلنا بكذا عيادة اللي نكلموها يقولولنا مافيش سرير أو مافيش كهرباء وفي وقتها بالذات راجلي قاعد جنبي وحالته حالة ويتصل انفجرت مية الراس وبدت تصب واني بديت نعيط بأعلى حسي ... خدوني للقسم مرة تانية ومافيش شموع ومشي راجلي جابهم والوجع بدي أضعاف مضاعفة وجسمي بدي يبرد ويتشنج من كتر الوجع واللي هلكني وجنن الدكتورة ان الوجع هلبا لكن الرحم مايبيش يفتح آخر شي زادتني الدكتورة إبرة وجع تانية وحسيت بالموت قدام عيوني وبالفعل جسمي تشنج لدرجة ان ايديا ورجليا تعوجوا بدون إرادة مني ... الساعة 3 قلت للدكتورة جت الكهرباء وقعدت نترجا في الدكتورة باش تديرلي عملية وهي تقوللي اصبري شويا آخر شي سمعت نبض البيبي ضعيف واني معاش عندي جهد حتى نتنفس وشبه مغمى عليا وقتها خافت وبدت تعيط عليا مسكينة باش ننوض وتقولي هيا راهو بنتك بتموت .. سبحان الله وقتها ربي وغريزة الأمومة حركوني وجاني شوية جهد باش ندحم والدكتورة بدت تفتح في الرحم بايديها .. تجربة فظيعة يابنات لكن انتهت الساعة 4 تمام بطلوع أحلى بنوتة اسمها ( لجين ) ... 15 ساعة من العذاب نسيتهم لما شفتها وسبحان الله طلعت سااااااااااكتة ولا طلعت صوت ولا بكت تتحرك وفاتحة فمها تبي تاكل وتتفرج عالدنيا ..
هاذي قصتي الطويلة وانشالله مانكونش طولت عليكم زيادة ...
وانشالله يارب يارب يارب بجاه هالشهر الفضيل تعطي لكل محرومة وكل وحدة تستنى وتجيب اللي في خاطرها لكن من غير ماتشوف اللي شفته اني هههههههههههههههههههه
عيون حبيبتي كيف حالك وكيف حال وليدك ؟؟؟ طيب فيك اللي طهرتيه .. توقعتك تستني في ليلة عرسه ههههههههههههههههههههه
قاعدة مقعمزة والست لجين ماخلتنيش نرقد نهائيا من الساعة 6 وهي تلعب وتبكي وتاكل وماخلت شي في خاطرها واني عيوني تنفخوا من قلة النوم ومنظري ولا أحلى من كذا ... ( تشرد تاااام)

حمد لله على سلامتك يا عاشقة وبارك الله لك في الموهوبة لك وشكرت الواهب وبلغت أشدها ورزقت برها كيف حالك وحال أهلك والحمد لله إنك بخير وشفناك ثاني والحمد لله معظم الاخوات اللي معانا بخير بس مازالت حبل الوصل في سبها وسبها إشتباكات ربي يحفظها ويحفظ كل الليبيين اللهم امين

[ام روفيدة]

الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد
الله أكبر الله أكبر الله أكبر لا إله إلا الله والله أكبر الله أكبر ولله الحمد

[عاشقة الصحراء]

السلااااااااااااام عليكم ياحبيباتي ... صحة فطوركم . شن أخباركم وشن مدايرين ؟؟؟
حبيبيتي ميمونة ربي يخليك ياااااااااااارب وعقبالك نباركلك ببيبي حلو زيك والله انتي اللي حلوة ياعسل وكل سنة وزوجك بخير انشالله بطول العمر يارب ...
يقين .. تسلميلي يارب والله يبارك فيك ويسهلك .
عيون عيون عيون ياقمر ياحلوة والله استاحشتك موت .. الله يبارك فيك وتسلميلي يارب والله تعرفي تعبانة من قلة النوم والظروف اللي عشت فيها ولادتي ونفاسي صعبة هلبا لأني نسكن في شارع الزاوية قدام مستشفى الحروق بالضبط .. وعينك تشوف القصف اللي صار علينا من باب العزيزية وكتائب الشفشوفة الله لا يرده .. تخيلي روحك نافس وقاعدة حتى الخياطة توجع فيك وعيلك على إيدك وحوشك تحت القصف وأكتر يوم تعبت فيه هو يوم سقوط العزيزية صار علينا قصف مش طبيعي بصواريخ الغراد لأنهم كانوا يبوا يكسروا مبنى الاستخبارات والبريد المركزي اللي جنب حوشنا وجونا الثوار للحوش وقالولنا اطلعوا للمستشفى وخليكم تحت لأن القصف عشوائي ... تعرفي ياعيون شعوري كان وقتها لا يوصف وكانت بنتي في حضني تبكي .
المهم اني ماطلعتش من حوشي وقلت لراجلي مش حنطلع حتى لو متت نموت في حوشي ومانبيش نرفع بنتي لمستشفى كله أمراض ومعبي ناس ..
والله بدون مبالغة قعدت من الساعة 10 الصبح لغاية الساعة 6 أو 7 مش متذكرة بالضبط المهم اللي نعرفه ان القصف وقف بعد ماطاحت العزيزية .. الوقت هذا كله قعدت حاضنة بنتي ومقعمزة في داري ندعي والحمد لله ربي حمانا وطاحت العزيزية الحقيرة أخيراً ..
بعد اللي عشته ياجماعة صدقوني الأحسن الوحدة ترعش وتخاف وهي حامل ولا تخاف وهي نافس والله في النفاس كل رعشة بحسابها والحليب يجف وتلقي قلبك بيتقطع عالعيل اللي في إيدك لكن وهو في بطنك أهون بهلبا ههههههههههه . ( رسمي شر البلية مايضحك ) .
بالنسبة للجنوب ياحبيبتي أوباري اللي أني منها واللي تجي بعد سبها سلموا بروحهم لكن العقدة كلها قاعدة في سبها يديروا في روحهم فالحين مازال ... لكن توا الناتو يتولاهم .. الحمد لله أهلي كلهم كويسين وربي سترهم انهم طلعوا من الحوش قبل الاشتباكات بيوم لأنهم ساكنين في العمارات الجديدة اللي جنب العزيزية عالطريق .. هما طلعوا وتاني يوم في الاشتباكات بين الثوار والكتائب جت قذيفة في عمارتهم وتضرر الدورين الثالث والرابع وحوش أهلي الدور الأول ... ربي سترهم الحمد لله .

بنسألكم ياصبايا .. شن مدايرين مع انقطاع المية والله تعرفوا تشرد مش طبيعي والخضرة واللحم اليوم بس خشوا حوشنا من بداية المشاكل والأسعار طبعا مانحكيلكمش كيلو الطماطم 6 دينار معقولة ؟؟؟ وكيلو اللحم 25 دينار تتخيلوا ؟؟؟
والله الحالة حالة وخلاص ( الحمد لله على كل حال )

[يقين]

عيون والله نقولوا الحمد لله كان مايفرج ربي

[أم أجنادين 80]

السلام عليكم ورحمة الله وبركاته

كيف حالكم يابنات والله ليكم وحشة كبيرة

شن اخباركم طمنوني عليكم ياهل طرابلس وبنغازي وسبها

الحمد لله علي سلامتكم ان شاء الله كلكم بخير

يارب يارب تفرج علينا وترجع بلادنا زي ماكانت واحسن

[أم أجنادين 80]

كل عام وانتم بخير

وان شاء الله رمضان والعيد الجاي تكون الاوضاع احسن

لااا ياأم قصي ماترحمي صغارك من فرحة العيد هدو صغار شن ذنبهم

الف الف مبروك ياعاشقة تتربي في عزك

[ام وسونة]

كل سنة وانتم طيبين ياحبايب

[soomaa83]

كل عام وانتو بالف خير وينعاد عليكم بصحة ولعافية يارب

الى كل ليبية نهنيكم باحلا عيد فى ليبيا

وربى يفرج على اهلنا ويصبرهم

[ام روفيدة]

تقبل الله منا ومنكم وغفر الله لنا ولكم وعيد مبارك علينا وعليكم وكل سنة وإنتم طيبين وكل عام وإنتم بخير وينعاد عليكم بالصحة والسلامة وربي يفرج على بلادنا ويتمم علينا النصر