تجمع حوامل ليبيا

ام قصى محمد · 08-23-2011, 02:46 AM

الله اكبر الله اكبر الله اكبر
لا اله الا الله
الله اكبر الله اكبر الله اكبر
ولله الحمد
الله اكبر الله اكبر الله اكبر
لا اله الا الله
الله اكبر الله اكبر الله اكبر
ولله الحمد
الله اكبر الله اكبر الله اكبر
لا اله الا الله
الله اكبر الله اكبر الله اكبر
ولله الحمد
الحمدلله النصر حان وليبيا حره الحمدلله
ام رويفده عاش من شافك
وينك رايفت عليك

hatoo · 08-23-2011, 06:29 AM

السلام عليكم ورحمه الله وبركاته
اهليييييييييييين بنات وينكم؟؟؟؟

ام قصى محمد · 08-23-2011, 08:39 AM

مرحبتين هاتو
وينكن يا بنات
لازم نحتفلو مع بعض وينكن مختفيات

soomaa83 · 08-23-2011, 12:00 PM

كيف حالكم يابنات

مبروك عليكم النصر وعقبال الرجعة لى لييا ياااااااااارب

عيون زوجي · 08-23-2011, 06:15 PM

السلام عليكم ورحمة الله
كيف حالك يا هاتووو...
احنا حالنا في طرابلس لا يفرح عدو ولا احبيب
الحاله رعب في رعب الله يفرجها اعلينا
صوت الرصاص والطيارات والقصف والمفرخ الصغير يلعب بالاسلحه في كل مكان
المحلات مسكرة ونص الناس هاربه برا وانا نص اهلي في تونس والتاني موجودين بس بعاد اعليا
واليوم الاتصالات مقطوعه للاطمئنان
حاشاكم رمضان صعب الله لا يورينا زي هالايام تاني
الناس العاديه والعايلات البسيطة هي الضحيه في هالاحداث
بنتي تعبانه نفسيا ابسط صوت تعيط خايفه من الصواريخ والقصف
وصغار الشارع يلعبوا بالنار يارب ارحمنا ارحمنا يارب
طرابلس في يوم وليله ولت ساحة حرب
الله المستعان
يلي عايش بينا مش فرحان لانه عايش في الرعب والخوف
اما يلي عايشين وهاربين برا يتفرجوا عالتلفزيون كانه فيلم ولا مسلسل ولا مباراة ويشجعوا منو يبوا
حرام عليكم
مش حاسين بينا حرام عليكم
احنا لا نبوا( هدا لا هدا )نبوا رحمة ربي تنزل علينا ويعم علينا الامن والامان والسلامة والاسلام

عيون زوجي · 08-23-2011, 06:18 PM

حسبنا الله ونعم الوكيل..
بالله بدل الفرح والاحتفال ادعولنا بالفرج والحفظ والرحمة لاننا عايشين في قلب النار مش زيكم

ليبياقلبي · 08-23-2011, 10:42 PM

اختي عيون زوجي حرام عليك علاش الكلام هدا والله انا صح طالعة بس والله مانطلع لانا حاسة بيكم هلبة كيف انا سبب طلوعي هروب الضي بنتي اضايقت بالله عليك انا طلعت ليا شهر والله العظيم ماني فرحانة بالطلوع نخمم علا البلاد وناسي لي غادي وبابا غادي وعلاش بالعكس والله قلبي معاكم علاش والله مقدرتك بس كلامك جرحني ومن حقنا نفرحوا بالنصر علا الطاغية والحمد لله والله اكبر حتى انا في الخمس كنت في رعب ضرب الناتو قريب علا حوشي بس الحرية مش ساهلة

ليبياقلبي · 08-23-2011, 10:43 PM

ميرنا ماتخافيش حتى انا في بنتي الحركة حسيتبيها في السادس

عيون زوجي · 08-24-2011, 12:24 AM

ليبيا قلبي ..كيف حالك وحال بنتك
بس يلي شافاته اعيوني واعياط بنتي وخوفها يخليني نكره السياسه من اصلها
لا ناقة ليا فيها ولا جمل
شن دخلي في الاول ولا التاني انا من عامة الشعب ومن ابسط العايلات فيه باش نتحمل على خاطرهم قصف وصواريخ وحوشي بينقلع من مكانه من صوت القصف
ومن 3 ايام حوشي حاله من صوت الرصاص وقلة البنزينه تصدقي نشري فيها ال 20 لتر ب 65 دينار ويادوبك تسد 10 ايام
وهروب الضي مصيبه عظمى حتى شريت مولد ب1000دينار طلع يخدم بالبنزينه واليوم الميه انقطعت كملت بقية البيعه والاتصالات مقطوعه
قداش بنادم بيتحمل بالله اعليكم انتم برا مش معرضين لنفس الضغوطات زينا
رمضان ما حسيناشي والعيد بدل ما نشروا حوايج العيد ونختاروا وندهوروا لابدين في حياشنا لا خشة لا طلعه
حتى العمل واقف والمرتبات وقفت
امي ما شفتهاش من رابع يوم رمضان هي وبوي
وحتى توا يا ليبيا قلبي البلاد وضعها ايخوف فراغ امني كبير تخافي من المفرخ متاع الحبوس ينقزوا على حوشك وفي ايدهم سلاح
العافنيين والخنابه موجودين والسلاح موجود اكتر منهم
ربنا يستر وايديرلنا طريق وحسبنا الله ونعم الوكيل
انا فرحتي لما كل شي يكمل كل شي ترجع ليبيا زي قبل محلات مفتوحة وطرق امنه ومطارات تخدم ونقدر نطلع ندهور ونبضع ونسافر وصغاري فرحانيين ونرجعوا للراحه النفسيه يارب يارب يارب
لا اله الا انت سبحانك اني كنت من الظالمين
نبي سؤال شن ضمنكم ان التاني خير من الاول بعد هالموت والحرب والعداب
بالك اجابتكم تريحني
وبالك نطلعوا من طيارات الناتو وقصفهم الحقير المرعب الدامي الى قوات بريه للناتو لحفظ الامن والسلام في المرحله الانتقاليه
وشن ضمنكم ان الناس يلي ماتوا اولادهم يلي بالالاف من الطرفين ما يبدوش حمام الدم للثار والسبب تسرب السلاح الغريب
وشن ضمنكم المرحله الانتقاليه تنتهي في اشهر ولا سنوات زي العراق
الضامن ربي صح
والاول ما شفنا خيره صح وتمت ايامه بس التاني زعمه يطلع خير منه وشيخ وعادل ويعرف ربي ويحكم بالكتاب والسنه
ياخوفي من للي جاي لان يلي فات مات مع انه ماماتش لعند الان

hatoo · 08-24-2011, 02:07 AM

متقوليش الكلام هضا ياعيون بدل متفرحي انا عارفه انكم في ضغظ نفسي من كل الاماكن بس لازم هضا كله عشان نحولوا الطاغيه الجبان كل مدينه في ليبيا مرت بلي مريتوا بيه والحمدلله ماصار شيء والليبين ايد وحده ومش حيثأرو علي بعضهم وان شاء الله فتره وحتمر وتعدي علي خير والناتو يساعد فينا علي الطاغيه الجرذ واعوانه انتي بس تعوذي من الشيطان وخليك علي الدعاء وعل فكره مش كلهم طلعوا من ليبيا انا في بنغازي وقاعده فيها والحمدلله علي كل حال الضيء في كل مكان ينقطع