دردشة بنات مصر , دردشة حوامل مصر , تجمع بنات مصر

[ام انس المصريه]

الموت يأتى بغتة والقبر صندوق العمل

............

اللهم اختم لنا بالايمان واجعل اخر كلامنا من الدنيا لا اله الا الله

...................

هو لو انا مت دلوقتى ياترى هتقولو عنى ايه ؟؟؟؟؟؟؟؟؟

انا بقرا فى الدردشه القديمه وبقرا كلامكو عن علياء وانها كانت مؤمنه ومحترمه ومؤدبه وبتثنو عليها خير

انا بقى هتقولو عليا ايه

تخيلو انكم سمعتو خبر وفاتى دلوقتى هتقولو ايه ياترى ؟؟؟؟؟؟؟؟؟؟؟؟

يارب اغفر لى وارحمنى برحمتك وتوفنى وانت راض عنى

[دودى مجدى]

حرام عليكى يا شيماء لية بتقولى كدة بس بعد الشر عنك يا حبيبتى يا رب يخليكى لابنك ويخليهولك وتفرحى بية ومنشوفش حاجة وحشة ابدا فيكى ولا فى اى حد هنا فى التجمع سبحان الله الواحد اتعلق بيكو جدا والله بقيتو اقربلى من اهلى ربنا يجمعنا على الخير دايما ويبعد عننا الشيطان يا رب

[نورلينا]

اللهم امين ازيكم يابنات انا من اسكندرية وعايشه في الدمام مع زوجي وانا حامل بالشهر التامن ادعولي تكون ولادتي سهله

[دودى مجدى]

اهلا بيكى حبيبتى نورلينا ربنا يقومك بالسلامة يا رب ويرزقك طفل سليم معافى

[ام انس المصريه]

الموت بياتى بغته يادينا ولازم نستعد له فى اى وقت

اهى علياء كانت وسطنا وفجاه سابتنا ممكن انا اسيبكم برضو فى اى لحظه واسيب احبابى

سيدناجبريل اوصى النبى وصيه وقال له

يامحمد عش ماشئت فاانك ميت واحبب من شئت فاانك مفارقه واعمل ماشئت فاانك مجزى به واعلم ان شرف المؤمن فى قيامه بليل وانا عزه فى استغنائه عن الناس

....................

ام سلمى قالت خبر وحش فى الصفحه اللى فاتت ان جوز علياء الله يرحمها ويحسن اليها اصيب بالشلل بسبب الحادثه

ربنا يعافيه ويشفيه ويصبر قلبه ويعوضه خير يااااااااااااااااااارب

[ام انس المصريه]

ربنا يقومك بالسلامه يانورلينا ويكمل حملك على خير انتى وكل المسلمات

[ام انس المصريه]

واحد صاحب جوزى كان واخد مراته وابنه وراه على الفسبا فعييل صغير بيعدى الطريق فهو عمل فرمله جامده

قامت مراته وابنه وقعو فجه الجرار وخبطهم وماتو فى ساعتها لكن قبل ماتموت مسكت ايد جوزها وقالت له انت راضى عنى ياابو عبد الرحمن انت مسامحنى قالها اه

فقالت اشهد ان لا اله الا الله وان محمد رسول الله وماتت هى وابنها

وهو اخ فاضل نحسبه كذالك ولا نزكيه على الله صبر واحتسب وسبحان الله بسبب صبره واحتسابه ربنا اكرمه ووسع رزقه

يعنى فى اى لحظه ممكن الانسان يصيبه اى بلاء

والبلاء والمحن دى اختبار من ربنا لينا بيشوفنا هنصبر ولا هنكفر

[منتظرة فرج الله]

السلام عليكم جميعا
وحشتونى كلكم
أم انس حمد الله على السلامة نورتى الشات
اخبارك واخبار الامور ايه ........؟ان شاء الله تكونوا بخير
كنت عاوزة أسألك يا بت هو ابنك فيه شعر ولا صحراوى ............؟
علشان كل الجيل ما شاء الله دماغهم ابيض يا فل

[AyoyA]

السلام عليكم
ازيك يا شوشو وانوس عامل ايه
بت يا دينا عامله ايه وزربيح عامل ايه
اميرة فينك يا بنتى اخبارك ايه

[أم سلسبيل]

السلام عليكم جميعا