تجمع حوامل ليبيا

[المتفاااائلــــه]

المشاركة الأصلية كتبت بواسطة متفائلة بإذن الله

السلام عليكم ورحمة الله وبركاته

أخواتي كيف حالكم ... ان شاء الله ربي يثبت حمل كل وحدة حامل ويفرحها ياارب .. ومبروووك للي جابوا ان شاء الله من حملة كتاب الله ياارب ..

آني جديدة في المنتدى ... وبالنسبة ليا متزوجة ليا 3 شهور و12 يوم .. يعني عروسة ... ههههه ...

ومانعرفش لو كنت حامل أو لا ... لكن نبي نسئلكم لأني من أول آمس نحس في وجع في بطني وظهري وكأن الدورة بتجي وأكثر ولكن ماجتش ونغزات في صدري ووجع هلبة ... لكن مادرتش تحليل لأن موعد الدورة مفروض 19 -2 .. اللي هيا بعد 26 يوم من الدورة اللي فاتت ..

وآني من قبل تجيني الدورة في الغالب كل 26 يوم لكن الشهرين اللي فاتوا تجيني بعد 20 يوم .. فما نعرفش لو كان على أساس قبل اللي هوا 26 يوم مفروض تجي 19 - 2 ولو على أساس 20 يوم فمفروض ان موعدها من يومين فاتوا .. يعني تقريبا كيف جاني الوجع هلبة ,,,,

وأول يوم جاني فيه الألم كان اليوم كله يعني على طول مستمر .. لكن آمس واليوم يجي شوية في الصبح والا كيف بنرقد في الليل ومرة مرة ... لكن مافيش لا دوخة لا ترجيع ...

نبي نسئلكم هل يمكن يكون هذا حمل .. ولو كان درت تحليل وطلع حمل .. نبي نعرف دكتورة كويسة في طرابلس نتابع عندها ...

ولو ماطلعتش حامل .. هل تعتبر 3 شهور هلبة اني ماحملتش .. يعني تنصحوني نمشي اندير كشف ولو في حاجة نعالجها بكري .. او في نصائح يمكن تقولوهالي بحكم خبرتكم ...

نستنا في ردودكم ...

وفي حفظ الله ...

وبنسألكم ... لو كان هذا حمل وفي بدايته وما جتنيش الدورة ... هل الجماع في هذه الأيام يأثر عليه ... نستنا فيكم ..؟؟

[أم أجنادين 80]

السلام عليكم

عندي امل بالله ان شاء الله تكوني حامل

الأفضل تنتظري لموعد الدورة او تستني لبعدها بكم يوم

لو ماجتش اكيد حامل ,,,,

او اديري اختبار حمل في المنزل رغم انه نتائجه مش دقيقة هلبة

وبالنسبة لسؤالك الثاني الصراحة منقدرش نفيدك لان ماعنديش خبرة سابقة

اكيد البنات حيفيدوك اكثر مني

[أم أجنادين 80]

يابنات بنمشي لصاحبتي اليوم

وبنلبس فستان قصير رصاصي في الاسود وعليه جاكيت أسود

حرت شن ندير لون ظلال عيوني وهل نستخدم الأيلاينر أو لا

مرات انبالغ لو درته لان هيا عزومة بسيطة

شن تقترحوا عليا ,,,

[عيون زوجي]

الصورة سكرت دماغها ماتبيش تنزل رح نحاول تاني

[عيون زوجي]

بالنسبة للظلال ديري وردي هادي ولو انتي فالحة دخلي شوية اسود في نهاية العين يعطيك منظر سموكي ناعم والاي لاينر ديريه خط من فوق بس زي سمر ونهال في العشق الممنوع
مكياجهم ديمة وردي ناعم مع خط اي لاينر خفيف من فوق لنهاية العين

[عاشقة الصحراء]

مساء الخير يامدامات ياحلووات ...كيف الحال ؟؟؟
حكومة ومتفائلة كيف حالكم يارب تكونوا بخير شكلكم من جماعى الليل تخشوا لأني في النهار مانتلاقاش معاكم ...
حبيبتي متفائلة انشالله ربي يفرح قلبك انتي وحكومة وميمونة ونسرينا وكل وحدة تستنى يارب في حال طلعتي حامل انشالله الجماع عادي لكن مش بعنف أو بحركة عنيفة مع هز متواصل ( فهمتيني ) وفيه وضعيات اللي تكوني فيها فوق حتى هاذي لا ... وربي يسخرلك لأن في الشهور الأولى نسبة الإجهاض من 80-90% والوحدة ضروري تكون حذرة لكن مش معناها جفاف هههههههههههههه
اللي يحذروا فيهم من الجماع في البداية هما اللي سبق لهم الإجهاض أكتر شي أو اللي تنزل منها مادة بنية أو تنزف وهي حامل هاذي تمتنع نهائيا وترتاح لفترة .. وبعيد السو عليك من هذا كله.
حبيبتي حكومة استمتعي عند صاحبتك وانشالله وقتك سعيد ..
عيووووووووووووووون قاعدة ؟؟؟
اني قاعدة تعبانة لكن أحسن من النهار تعرفي في الخدمة حسيت روحي مرتين قريب يغمى عليا وحلقي ملتهب حالة وتوا قبل شويا غلتلي حماتي ليمون وشربته صحصحت شويا وعالأغلب غدوة مش حنمشي للخدمة ونقعد نرتاح احسن ...
من قاعد توا باش نهدرز معاه قبل مايجي زوزي قريب يجي عال9:30 من الصبح ماتلاقيناش واستاحشته

[ميمونة]

هلا عشوقه شن الجو أنا مازال مايروحش للساعة10

[ميمونة]

متفائلة ربي يسخرلك وتبشرينا بحملك

[المتفاااائلــــه]

ال
السلام عليكم ؟؟؟ كيف حالكم توا ان شاء الله كويسين ..

والله آني متضايقة .... طلعنا امبكري لسوق الثلاث وروحت .. لقيت قطرة صغييييييييييييييرة دم .... وبعدها لتوة مانزلتش حاجة .. وفي ألم كأنها دورة قاعد فشكلها بتشرف والحمد لله .. لكن ما نعرفش علاش جت هكي ... توا ما غيش حاجة الا كان نمسح في العميق تطلع حاجة بسيييييطة زي بنية هااافتة ... والله ماعرفت شني القصة حتى في صلاتي حرت ... وتوا حاليا ما فيش حاجة الا وجع .. توا أكييد غدوة تجي رسمي والله المستعان ...وآني ناوية اني بنمشي لدكتورة على موضوع تلخبيط الدورة هذا وكيف تجي بالطريقة هادي ... بالله ادعولي .. كن نحس وكأني حامل .. لكن الحمد لله ..

[المتفاااائلــــه]

المشاركة الأصلية كتبت بواسطة عاشقة الصحراء

مساء الخير يامدامات ياحلووات ...كيف الحال ؟؟؟
حكومة ومتفائلة كيف حالكم يارب تكونوا بخير شكلكم من جماعى الليل تخشوا لأني في النهار مانتلاقاش معاكم ...
حبيبتي متفائلة انشالله ربي يفرح قلبك انتي وحكومة وميمونة ونسرينا وكل وحدة تستنى يارب في حال طلعتي حامل انشالله الجماع عادي لكن مش بعنف أو بحركة عنيفة مع هز متواصل ( فهمتيني ) وفيه وضعيات اللي تكوني فيها فوق حتى هاذي لا ... وربي يسخرلك لأن في الشهور الأولى نسبة الإجهاض من 80-90% والوحدة ضروري تكون حذرة لكن مش معناها جفاف هههههههههههههه
اللي يحذروا فيهم من الجماع في البداية هما اللي سبق لهم الإجهاض أكتر شي أو اللي تنزل منها مادة بنية أو تنزف وهي حامل هاذي تمتنع نهائيا وترتاح لفترة .. وبعيد السو عليك من هذا كله.

شكرا حبيبتي ... لكن للأسف.. شكله مش حمل ..الحمد لله ... مش واضحة الأمور