فيفي ربي يسهل عليك وينوضك بالسلامة وماشاء الله سوسو وفروسه كفو ووفوا وخلي نقولك شن وتيت أني بالزبط
أول حاجة حوايج البيبي اكيد وطبعا الحفاظات ومعدات الاستحمام منهم هذا كانا زينا نظامهم أني الحق لقيت درج في سرير البيبي فيه حفاضات وحوايج وشامبو وكريم للحساسية امتاع الحفاظ وقطن ليا وزوز أرواب امتاع المستشفي ليا ومناشف ليا وللبيبي هدوما منهم طبعا
واللبس الحق رفعت بيجامات لأنه اللي بتولدني دكتوره وممرضات وحتي بعدين ما جانيش دكتور بكل وخذيت راحتي حتي بدون وشاح والروايح قالولي ممنوع ما تحطيش بكل بس ما عرفتش السبب استنتجت إنه ممكن علي خاطر البيبي لما بيرضع مني قويه عليه الريحه تصوري حتي مزيل والا لوشن جسم فيه ريحة قالولي لا
وحاجتين مهمات ردي بااااااالك تنسيهم كريم لتشققات الصدر وفوط حمايه للصدر باش ما يتسربش الحليب لحوايجك والله لقيتهم زي الرحمه ساعدوني أني في البداية ما خديتهمش تبهدلت كل شويه نغير في حوايجي وفي مفرش السرير من الحليب اللي يتسرب لما نكون راقده فلهذا الفوط هدوما يساعدوا هما فكرتهم زي ألالويز بس علي شكل دائره ينحطو فوق السنتيان يمصو الحليب المتسرب وغيريهم كل أربع ساعات باهي وشن تاني ؟؟؟
ايوة ما تنسيش تحطي في شنطك اكلات خفيفة بسكويت وشوكلاته وتمر يعني حاجات خفيفة تسلي بيهم لو جعتي بين الوجبات أو ما عجبكش ماكلتهم أو ياكلهم زوجك لو قعد معاك أني مسكين بات معاي في المستشفي واول ليله كان جيعان قاعد من الفطور ما كلي شي وطبعا في المستشفي ما يحسبوش في المرافق نزل جاب من الكفيتيريا كيك وعصير مشا حاله بيهم وخلاص ماباش ياكل معاي قالي هوا يا دوب يسدك هههههههه فعلا هما يجيبو في الوجبة تقول لعيل حبتين وحبه هههه بالذات أول ليله بعذ كملت كنت جيعانه منموت الساعة 3في الليل جابولي مثلت صغير تست فيه دحي نص طياب وطاسه حليب هذا هوا ههههههه والغدي والعشي كله خضار لأنه هذا الحلال عندهم ورز صامت لا بنة لا صنه حاشا النعمه غير باهي الحمد لله تاني يوم قامت بيا حماتي وجابتلي أشكال والوان واني مطولتش في المستشفي بتت ليلتين بس
وحاجة اخيره ما تنسيش كرسي السيارة امتاع البيبي ما يخلوكش اطلعي البيبي بدونه هوا يجي مع العربة بس في ناس ما تاخدش فيه علي إنه غالي بس هو ضروري بالذات في الشهور الاولي صعب العيل يتقعد في العربة مش كويس لظهره
إيه وما تنسيش الشفأطه الفترة الاولي اكيد حتحتاجيها مرات صدرك يتشقق من الرضاعة ويبدا صعب ومرات البيبي ما يعرفش يشده كويس الواحد يحط كل الاحتمالات ويعبي بروحه وان شاء الله ربي يسهل علي وتنوضو صحيحين إنتي وبنوتك وتكون ولادتك سهله وميسرة \
سامحيني كترت عليك وان شاء الله ما يكونش في غلط في الكتابة لأني نكتب عالعمياني ما نشوفش فيه من كثر صغر الخط وزيادة سوما في حجري وقلبه الدنيا
04-09-2014, 10:31 PM
رد: سيدات ليبيا الحبيبات ..تفضلووو
هدية الخالق 
.
جديد منتدى ملتقى عضوات حوامل
العرض العادي
