اهلا باهل الجود والكرم **اهلا بسيدات ليبيا**

[اوشي]

جيجي ..

الف لاباس عليك طهور ان شاء الله وربي يشفيك ويشفيني ويشفي جميع مرضى المسلمين

راك تستهوني بالعين والحسد ..

واخطر شي انك تكون مصاب بحسد وما تتبع رقية مناسبة

وكيف ماقال الرسول ..

اكثر من يموت من امتي بالعين ولو اكان اكثر شي اسرع من القدر لكان العين

والعين اتحط الجمال في القدور والرجال في القبور

اللهم احفظنا جميعا واهلنا واولادنا

[اوشي]

توة سلااااااام

ماشية زرررررررررررررردة

[dr.loly]

السلام عليكم ورحمة الله وبركاته


جيجي الف لاباس ع عويناااتك..ديري بالك ع روحك
وانا مع كلام اوشتي ..


اوشتي صحة الكيكة ماتوقعتش تشيز كيك لان ماشفتش طبقة تشيز
نحسابه طريقه اخري او اختراااع من ابداعتك

وماشاء الله ع السفرررره ..والزرادي والجو السمح


...

سوسو صحة الجاتووه بس مافهمتش كاتبه ف موضوع طنجره ماطنجره...؟

[dr.loly]

هدوووو وينك
شكله مازال لاب توبك ماصلح..؟
امتي عيد ميلاد الاموررره؟؟ قرب صح...



....

[dr.loly]

وينكن يابنات كنه التجمع يعمه الكساااااد؟

[هدية الخالق]

السلام عليكم ورحمة الله وبركاته كيف حالكم كلكم ان شاء الله تمام
جيجي ان شاء الله لاباس عليك ياروحي قاعدات عويناتك ان شاء الله بالشفي ننصحك كان متأكدة انه المراة اللي لاقيتيها عند الناس اللي مشيتيلهم هيا اللي عطتهلك عوينة استغفر الله إنك تحاولي تاخدي اثر وضوئها بطريقة غير مباشرة من حد قريب ليها وحتي كان اضطريتي بطريقة مباشرة عادي والله مايهمك ولا تتحشمي اهم حاجة عويناتك وكانهي زي ماقلتي مشهورة انها معينة مسكينة مفروض تتفهم الموضوع هيا او حد من اقاربها
خطر عليا موقف جيران اختي عندهم وليد صغير شعره ماشاء الله تبارك الله يحسدوا فيه عليه النساء المهم عندهم جار شيباني مشهور بالعين مسكين ديما يهربوا منا جيرانه امشي بالصدفة تلاقي هو والولد الصغير وبوه مروحين من الصلاة في الجامع امشي سلم عليهم وحط ايده علي راس الوليد وقاله وين ماشي بهالشعر حتي مراة ماحصلاته قالك سبحان الله الولد هذيك الليلة مارقدش مسكين يعيط ويحك في راسه والشعر يطيح خصلات علي طولهم واخت الوليد تقرأ مع بنت الراجل المعين في الجامعة مشتلها في الجامعة ونادتها بروحها علي جنب وقالتلها قولي لبوك يعطينا أثر وضوئه البنت رقالها قالتلها باهي بدون نفس ومشت وسيبتها هههههه قالت خلها تحمق شن بينفعنا رضاها اهم حاجة اوخيي يولوله شعيراته واصلا الراجل مشهور كل ماحد في شارعهم ينصاب بالعين والنفس طول يمشوا يطلبوا منا اثر وضوئه
ربي يحفظنا وخلاص
سوسو صحة التورته تسلم ايديك وحلوة فكرة الطنجرة عليك دماغ كلا انتي .باهي الطنجرة ماصارلها شي من الكوشة لانه الطواجين عادة يكونوا مخصصات لحرارة الكوشة لكن الطناجر مجازفة باهي نجحت معاك صحة علي ايدك المراة الفالحة ماتحيرش يقولك المثل ماتموتش في الشيشة والرشادة في ايدك
وعلي فكرة سامحيني لقيتك باعتيلي عالفيس تبيني نخبر البنات انه جهازك فاسد وفروسه تاخدلك اذن والله العظيم ماشفتها غير امس بس فتحت عالفيس من تيليفوني وضحكت في خاطري قلت مالقيتها لروحي حتي اني جهازي فاسد
اوشي صحتين التشيز كيك والصفر الحلوة ماشاء الله عليك وحتي اني زي فروسة مانحساباش تشيز كيك لانه ماشفتش طبقة تشيز عموما نستنوا في الطريقة
فروسة كيف الحال وكيف حال لولي شن مدايرة معاك في السهر هيا وخوها ان شاء الله تعدل نومهم وسألتيني علي عيد ميلاد سما ان شاء الله في هاليومين يوم 22 لكن مش مدايريلها ما نحتفلوش باعياد الميلاد حتي عندنا جارنا مصري بهدلنا ليه شهر يسأل امتا عيد ميلادها يبي يجيبلها هدية راجلي. قاله مانحتفلوش بيه امشي جابلها الاسبوع اللي فات هدية لعبة علي شكل ساعة وتغني وتقول في الحروف الانجليزية وكرت بقيمة 25دولار من محل اطفال
وبالنسبة لجهازي مازال ماجبناشي من المحل علي اساس يجهز الويكند هذا لكن زوجي قال ماانظنيش نقدر نمشي نجيبه لانه مش فاضي الويكند هذا جاي راجل من الخمس بيستقبله من المطار وبيدورله حوش وبيوريه الجامعة وبيمشي هو واياه للسوق بياخدله قضية وبضاعة للحوش قلتله هلبة نقعد بلا الجهاز للاسبوع الجاي قالي نحاول نمشيله كان حصلت فكة وتوا خاشة بالتيليفون دوخلي راسي الكتابة تلصق في بعضها نمسح ونعاود قداش مرة وراجلي علقلي الاكس بوكس عالنت ونتفرج علي اي حاجة نبيها من اليوتيوب نفوت في الكساد عليه بين ما صلح الجهاز وخلاص
فيفي واثري وخولة وشموسة وجنودة وامولة وام نوزةكيف حالكم ليكم وحشة

[هدية الخالق]

ام معاذ كيف حالك وكيف حال الصغار وخصوصا ابوني شن مداير معاك وشن اخر تطوراته وكيف حال ام ورد وسنفوراتها ربعنت والا مازال

[ام معاد]

السﻻﻻم عليكم كيف ال الجميع

[هدية الخالق]

تعرفوا يابنات اختي عندها مشكلة عزوزتها الله يهديها مهبلتها وقريب تخربلها حوشها لاسمح الله
هيا راجلها راس وليد لاعنده لاأخ ولا أخت وبوه متوفي يعني كاين ساكن هوا وأمه بس شكلها متعلقة بيه هلبة ولما تزوج هسترت وولت علي اختي
واختي مسكينة مش مقصرة ومدايرة اكثر من اللازم قالت من اول يوم الجمعة بعد العرس قالت الساعه تسعة الصبح عرسان طبيعي راقدين قالت خبطت علينا الباب قريب كسراته تبيهم ينوضواقالت نين انخلعت جيت مقعمزة والايام الاولي كلها تنوض فيهم بكري قالت اختي مسكينة والله مرات الساعة تمانية نبدا عين مفتوحة وعين مغمضة ومقعمزين معاها في هذاك الصبح نسايروا فيها تو عزوز ماوراها شي شن منوضها من الافجار وتنوض في العرسان اللي ساهرين ولما حامل قالت راجلي يطلع الصبح بكري للعمل تخشلي عزوزتي طول للدار توقف علي راسي وتنوض فيا نين ننخلع شن دخلها للدار بدون استئذان وزيادة لابسة حاجة مش مستورة
وفي رمضان عز الوحم تخلي فيها بروحها في المطبخ في النو ولما ادوخ والا ترجع حشاكم تقوللها دلع هذا وبعد هذا كله تمشي لجاراتها العزوز وتقوللهم زي درت كنة زي لا فطوري وغداي قدا الجيران !!!!!
وقالت ياكلوا بروحهم في دارهم ويخلوا فيا زي الكلبة حاشاكم بروحي
ولما جابت دارتلها حالة لانه مافيهاش حليب قالتلها رضعي البنت شني نوكلوا فيك في الشواء والجغوم بلاش .......
وديما تاخد في بنتها منها تقوللها هادي بنتي اني حتي لما تطلع ماتخليهاش فيها اطلعها معاها الا بالسيف وبالعراكات
وهذا كله كوم واخر موقف دارتلها في هاليومين كوم ثاني
قالت كملت من الاربعين وبيصير جماع بينها وبين زوجها امشي دارت روحها رقدت بكري وخشوا هما لدارهم ونسوا يصكروا بالمفتاح بعد شوية جت وبكل ثقة فتحت باب الدار عليهم قالت ستر ربي متغطيين ببطانية وقعدت تنادي في ولدها من وراء الباب تعال نبيك هوا مسكين مش لابس قعد يقوللها خيرك شن تبي شوية ونجي شن دارت سبلتها قاتلهم عطوني البنت نرقدها عندي تو تنوضوها وهيا البنية في سابع نومة مسكينة
وفي موقف دارتلها بعد الجياب قالت في الليل ديما نمش لداري نرضع في بنتي ونهدرز علي زوجي شوي نين يرقد وبعدين نجي نرقد احداها هيا وامي امشي شافتها شادة بنتها وماشية للدار نادتها قدام امي وقالتلها تعالي جاي تو نظفتي انتي اللي ماشية لراجلك ؟ بالله شن رايكم في هالعزوز مش شي يشيب الراس
اختي قلتلها منعطيك وسام التحمل ووسعة البال قالت والله تعودت الا تعودت في البداية كنت نتأثر ونخش اداري نبكي لين نعيا كلا توا معادش نعدل حفظتها تبدأ تدوي بروحها واني ندير في حاجتي وساكتة ماكأنه حد يدوي
ربي يفرج عليها وبس

[ام معاد]

جيجي الف ﻻباس طهورا ان شاء الله اني مع كﻻم هدية اوشي ثحة السفرة التشيز كيك طريقته ياحبوبة سوسو ما شاء الله علي التورتة وماكول الهنا
هد هد اني والسنافر الحمد لله وابان اممممم الاتنين القادم بادن الله ايسكر السنة ودخلتله الصناعي وااحق ما زال ما يمشيش حتي اني اعباد الميﻻد ﻻﻻﻻﻻﻻاحتفل بيهم حتي دكري الزواج ليا خمسة سنييييين ما فيش مرة احتفل بيه اكتفي برسالة حلوة لزوجي او هو يلعتلي وخﻻﻻﻻﻻص وربي يديمنا علي شرعه يارب