طوارئ التخصصي الطبي بالرياض يستقبل الولادة بتأمين بدون اجراءات سابقة؟

[ms.semo]

السلام عليكم ..
انا حامل لي 10 ايام من التاسع
أعيش حالة نفسية ومرمطة ماعشتها بحياتي
السالفة ومافيها كنت اراجع بالنخبة الطبي بالرياض عند الدكتورة جيهان صبحي مرتاحة لها مرة مرة واستفسرت عن توليدها قالت احولك على الحمادي اولدك فيه ..
انا كذا تماااام ومتطمنة لكن المصيبة يوم دخلت التاسع قالت خلاص الحمادي موقف التعامل معنا من رمضان يسوون ترميمات ولايبون ضغط خارجي على المستشفى ,, ابعطيك نسخة من الملف احتياط قدميه على المستشفى اللي بتولدين فيه انا هنا
ياربيه وين اروح , ورجعت للتأمين وشفت انه يغطي التخصصي الطبي قلت اتوكل عليه
طبعا علطول حجزت موعد عند اقرب دكتورة بس علشان ادخل الملف اخاف اولد
حجزت عند الدكتورة اسماء باحارثة حضرمية , مدري تناظرني نظرة تهكم يوم جبت لها الملف قلبته قالت لازم نرجع نسوي لك تحاليل عندنا والتراساوند بما انك بتولدين عندنا..
انا هنا طيرت عيوووني امس مسويتهم كلهم وجايبة النتيجة وكل شي ماأبي زيادة مواعيد وانتظار موافقة تأمين وحالة
السؤال عقب القصة أعلاه .. دكتورتي جيهان مطمنتني على وضع الجنين قبل ماأطلع من عندها والدم اخذت كورس حديد بالوريد الاسبوع الماضي , عادي اسحب على مواعيد التخصصي واجيهم وقت الولادة طوارئ وبس ؟ من جربها بالمستشفى نفسه راح وقت الولادة بس وكيف اجراءات الدخول بتأمين ؟ اخاف يقولون لازم موافقة الولادة من التأمين وحالة
طبعا أبو الشباب مررة متضايق وتعب من المشاوير كل يوم وهو مستأذن من الدوام
طولت عليكم وشكرا

[فاقده الغالي]

والله ياعمري انا اراجع من بداية حملي بالمستشفى لكن حالتك مادري عنها
ابدائي معاهم واذا جاتك خلاص روحي للطوارئ اكيد بيولدونك انا توني والده
عندهم عنايه حلوه بك وبالبيبي الله يهون عليك

[Orchid109]

شوفي يا حبيبتي واضحة انتي دخوليتك عليها ماخلاها تكسب المبلغ اللي تبيه فعشان كذا تبي تعيد التحاليل

شوفي نصيحتي اسحبي عليهم
وتابعي مع دكتورتك القديمة وروحي لهم وقت الطوارئ فقط

المهم الدكتورة ذي ماراعت حالتك النفسية وأنك تعبانة فايش راح تسوي معاك وقت الولادة الأفضل تستخيري الله قبل الاتروحي لها

بالنسبة للتأمين الأفضل تكلمي نفس المستشفى تستفسري منهم عشان ماتتوهقين بيوم الولادة

موفقة

[إحساس إمرأة]

يَ حياتي إنتي والله أن حاسة فيك
الله ييسرهآآ ويسهل عليك يَ رب
أنا أعتقد الروتين إللى بيسوونه مثلاً تحاليل وسونار عشان يتطمنون عليك
صار معي مثل كذا بس الفرق كان مستشفى حكومي
أنا كنت أراجع بمستشفى بعيد عن بيتي على أخر شهري أفضل أولد بمستشفى قريبه من بيتي
عشان بناتي كلهم في المدرسة
المهم رحت عندهم سوولي تحاليل من أول وجديد
وملفي إللى من المستشفى الثاني مو كأنه موجود

الله يعينك يَ قلبي :(
إن شاء الله الله ييسرهآآ معاك
والله يَ عمري أبو الشباب يتحمل شوي هذآ الشي مو بكيفك !!
أنتي لو ود ودك من البيت على طول ع المستشفى بدون أوراق حتى
ههههههههههههههههههههه
الخير إللى عندك عندي يَ قلبي
الله يسعدك ويرعاك
ودي لكِ ♥

[همس محبه]

السلام عليكم ورحمه الله وبركاته
هذي اول مشاركه لي في المنتداى
حبيبتي انا دكتورتي اسماء بحارث الحضرميه الي في التخصصي مرره حلوه وشغلها حلو ونظيف
والطوراء بيستقبلونك على طول اذا كنتي ولاده ماراح يردونك والتأمين زوجك يزينه اذا دخلتي مايبون الا تحديث عندهم في الجهاز بس
والله يتمم عليك ويسهل عليك