تجمع الولاده القيصريه

[يارحيم]

المشاركة الأصلية كتبت بواسطة أم بذرة

بنات انا والد قيصري بسألكم عدة اسئلة
متي نبدأ نشرب الحليب ؟
وعادي نلبش مشد بعد العشرة ايام واذا لا متى؟
والي تعرف الارطا هل ممكن نستخدمها؟
وايش تستخدمون للمنطقة التحتية بعد الحمل الولادة ؟

اشربي حليب متى مابغيتي وش علاقة الحليب بالولادة؟

ما اعتقد تقدرين تلبسين مشد باول شهرين.. اسألي دكتورتك..

ماعرف ايش هي الارطا ماقدر افيدك

المنطقة التحتيه ما تحتاج شي بما انك والدة قيصري..

[جونة]

يارحيم
الله يسعدك حبيبتي ويخليلك خلودي يااارب
جزاكي الله خيرعالاجوبة الشافيه
اناخايفه بس من القسطرة وابرة الضهر
القسطرة تعور ؟ وماينفع يمشوهابدون قسطرة ؟ سمعت ناس مايحطولهم
وايش حكاية تصريف الدم بحبل.بعدالعمليه برضو تخووووف

[ليالي حب]

بنات كم العدد مسموح به ولاده قيصري ؟؟سمعت تسعه معقول وسمعت يقولوا ع حسب تحمل رحم ممكن بس مرتين وخلاص...

الى عندها اجابه شافيه تفيدنااا ؟؟

[جونة]

ليالي حب
الي اعرفو أنو كل حرمه تختلف عن التانيه مافي عدد محدد
ان شالله الأخوات يفيدوكي

[يارحيم]

المشاركة الأصلية كتبت بواسطة جونة

يارحيم
الله يسعدك حبيبتي ويخليلك خلودي يااارب
جزاكي الله خيرعالاجوبة الشافيه
اناخايفه بس من القسطرة وابرة الضهر
القسطرة تعور ؟ وماينفع يمشوهابدون قسطرة ؟ سمعت ناس مايحطولهم
وايش حكاية تصريف الدم بحبل.بعدالعمليه برضو تخووووف

القسطرة ما حسيت فيهم وهم يحطونها لانهم خدروني اول وحطو الستارة بعد.. يعني اكتشفت انه فيه قسطرة بعد ما طلعت من العملية.. ولما شالوها كان عادي الشعور تماما مافيه اي الم..

ابرة الظهر نفس شعور اي ابرة.. حسيت بوخز على ظهري وخلاص وسمعت كلام كثير انه يستمر الم الظهر ومدري وشو.. انا عادي تماما شالوها بدون ما احس لاني كنت مخدرة وبعدها الحمدلله ما جاني الا العافيه.. وبصراحه عمري ما سمعت عن احد يولد قيصري بدون قسطرة!! كيف يصرفو البول وانتي بتقعدين ساعات وانتي ما تتحركين؟

ايش تصريف الدم بحبل؟ ماعمري سمعت عنها ولا شفتها..

[يارحيم]

المشاركة الأصلية كتبت بواسطة ليالي حب

بنات كم العدد مسموح به ولاده قيصري ؟؟سمعت تسعه معقول وسمعت يقولوا ع حسب تحمل رحم ممكن بس مرتين وخلاص...

الى عندها اجابه شافيه تفيدنااا ؟؟

على حسب حالتك انتي.. فيه ناس جابو سته وسبعه بالقيصري بس يعتمد على الحرمة نفسها..

[يارحيم]

بنات انا والدة قيصري صارلي خمس اسابيع.. حابه انبهكم على شي بالمرة مرة مهم.. وهو الراحه وعدم الاجهاد وشيل الثقيل لين تخلصين نفاسك ولو تقدرين اكثر بعد..

انا بعد اسبوعين حسيت اني خفيت ولما كملت ثلاث اسابيع كنت طيبة مرة الحمدلله.. طلعت كم طلعه على خفيف وكنت احس اني مرتاحه.. لما كملت شهر حسيت اني تمام واخذت راحتي وطلعت كم مرة واطول وادف عربية خلودي.. مرة طلعت للسوق وكان عندي اشغاال كثير ودفيت العربيه بالسوق يمكن ثلاث ساعات.. الله لا يوريكم وش جاني.. رجعت لي الالام كني توني مسوية العمليه!!

رجعت على السرير كني توي والده ولا اتحرك الا بصعوبه واخذ مسكنات وحااااله.. وندمت ندمت على تهوري.. انتبهو وارتاحو.. عادي تطلعون بس لا تجهدون انفسكم ولا تشبلون شي او تدفون شي لين تكملون شهر ونص او شهرين بعد عشان ما تنتكسون زي حالاتي..

[- تـالـيـن ..]

السلام عليكم
الحمدالله انا ولدت بعمليه قبل خمس ايام
بس عندي شوية اسأله
وش البرنامج المناسب للغذاء يعني وش اللي اكله وش اللي ابعد عنه
وهل ممكن بعد الاربعين اسوي دلكه وساونا وحمام مغربي وحلاوه
لاني ناويه اهتم بنفسي بس ماني عارفه اقدر او لا
وبالنسبه للسره كيف تتعاملون معها وبعد كم يوم تطيح
والتطهير بعد السره كيف تتعاملون معه
ودي اعرف ياليت تفيدوني هذا اول مولود لي الله يخليه لي ولابوه يارب
وبالنسبه للرضاعه كم رضاعه باليوم اذا الحليب صناعي
واذا طبيعي كم مره باليوم
اسفه طولت عليكم بس ودي اعرف
مشكورين مقدما

[جونة]

يارحيم
الله يطمنك ريحتيني

[يارحيم]

المشاركة الأصلية كتبت بواسطة - تـالـيـن ..

السلام عليكم
الحمدالله انا ولدت بعمليه قبل خمس ايام
بس عندي شوية اسأله
وش البرنامج المناسب للغذاء يعني وش اللي اكله وش اللي ابعد عنه
وهل ممكن بعد الاربعين اسوي دلكه وساونا وحمام مغربي وحلاوه
لاني ناويه اهتم بنفسي بس ماني عارفه اقدر او لا
وبالنسبه للسره كيف تتعاملون معها وبعد كم يوم تطيح
والتطهير بعد السره كيف تتعاملون معه
ودي اعرف ياليت تفيدوني هذا اول مولود لي الله يخليه لي ولابوه يارب
وبالنسبه للرضاعه كم رضاعه باليوم اذا الحليب صناعي
واذا طبيعي كم مره باليوم
اسفه طولت عليكم بس ودي اعرف
مشكورين مقدما

الحمدلله على سلامتك ويتربى بعزكم يارب..

الغذاء نفس عذاء النفساء.. اهتمي بالمفيد واهم شي كثري فواكه وخضار عشان مايجيك امساك مو زين للعملية.. اشربي موية كثير بعد عشان ما يجيك امساك وعشان الرضاعه (3 ليتر باليوم اذا ناويه ترضعين طبيعي).. اذا تقدرين تاخذين حلبة وماش هذولي مرة مفيدات ويرجعون لك صحتك باذن الله وطبعا التمر والعسل ما يحتاجون توصيه..

اهم شي بالنسبه للعمليه زي ما ذكرت بردي السابق احرصي على الراحه وانتهي انتبهي لا تشيلين اي شي ثقيل ولا ترا احتمال تنفتح عمليتك ولا يجيك نزيف!! حاولي تريحين نفسك لين تخلصين نفاسك

السرة خليتها زي ما هي حسب تعليمات الدكتور.. اهم شي قالي ما تروشين البيبي لين تطيح وخليها لحالها لين تنشف وتطيح لا تسوين فيها شي واهم شي تكون دايم ناشفه.. بعد اسبوعين طاحت وحممته بعدها بيومين.. وقالي اعصري عليها مسحه طبيه بعد ما تطيح مرتين باليوم وخلاص..

التطهير حسب نوعه وطريقه الدكتور.. انا طهروه ثاني يوم على طول وانا لسا بالمستشفى والحمدلله خلصت من سالفة السرة والطهار مع بعض.. كانو يقولون لي احط فازلين على قطعه شاش واحطها على الجرح والبسه الحفاظه وكل تغيير اغير الشاش واحط فازلين وبس لين طاب الحمدلله..

الرضاعه تكون لما يجوع البيبي والبيبي لما يجوع يبكي بس لازم من البدايه تتعرفين على بكا الببي لما يكون جوعان او لما يكون لاسباب ثانيه..لكن العادة رضاعه المواليد تكون كل ساعتين.. بس الطبيعي يختلف عن الصناعي.. يعني الطبيعي ينهضم بسرعه ويتعب وهو يرضعه.. يعني احتمال ما يرضع كثير لانه يبذل مجهود ويتعب وممكن ينام عليك كل شوي وهو يرضع.. لازم تصحينه واحسن حركه علموني اياها بالمستشفى احك رقبته يصحى على طول ويكمل رضاعه.. الصناعي ممكن يشبع وينام فترات اطول بدون ما يبكي لكن بتتعبين من المغص انا ولدي لما بديت اعطيه الصناعي صار يذبحني بالبكا والمغص مو زي الطبيعي..

طبعا المفروض يرضع كل ساعتين بس احتمال يصير يبكي كل ساعه او ساعه ونص.. انتبهي تعودينه يرضع كل ساعه ترا بتتعبين وهو بيتعود على هالعاده.. اذا بكا حاولي تلهينه او تعطينه مصاصه او تشلينه شوي لين يكمل ساعتين بعدين رضعيه بيكون جاع اكثر وبيرضع اكثر.. شوي شوي يتعود وبعدين لما يكمل شهر ابدي عوديه يقعد ثلاث ساعات بدون رضاعه وهو بيكون كبر ويرضع اكثر بوقت اقصر..

اهم شي لا تخافين الرضاعه الطبيعيه بالبدايه متعبه بالمرة انا كان ولدي يقعد 45 دقيقه يرضع ولما يخلص ساعه ويجوع مرة ثانيه.. صارت حياتي عبارة عن ترضيع!! بس سبحان الله اسبوع او اسبوعين ويبدا يرضع اسرع هو بس بالبدايه يكون مرة ضعيف وحنكه رخو ومايقدر يرضع زين وينام كل شوي عشان كذا يطول وهو يرضع مايشع زين ويرجع يبكي بعدها.. لما يكبر شوي ويشتد حنكه يتغير.. ولدي الحين ما يرضع الا ربع ساعه كل ثلاث ساعات.. فرق كبيييير عن اول الايام!! حاولي تكونين على الطبيعي لان اذا اخذ ولدك صناعي من البدايه احتمال يرفض صدرك لان الصناعي اسهل له وما يحتاج مجهود كبير بالمص زي الطبيعي.. ممكن تدخلين الصناعي لما يكمل شهر اذا ودك واحرصي انه يرضع من صدرك اكثر من الصناعي ولا احتمال يرفض صدرك..

يارب اكون افدتك اي سؤال انا حاضرة :)