دردشة بنات ليبيا , دردشة حوامل ليبيا , تجمع بنات ليبيا

[اوشي]

السلام عليكم ورحمة الله وبركاته

[اوشي]

كيف حالكم جميعا بدون استثناء

وشكرا لكل من استفقدني وسئل عليا

[اوشي]

احنا هنا كان الابل امتاع الواي ماكس مقطوع

وردوه الخميس 30 -5 وانا هذا كان اخر يوم اشتراك والجمعة مشيت لهل داري العيال

نجحو خذينا الحفلة وعدينا

خذينا 2 تورتة وصندوق مشروب وصندوق سن توب ولحم وطني

ودرت انا العشا شربة ورز اصفر وصبيتي دارت سلاطة خيار وجرجير وطماطم

وبعد العشاء حطينا سلاطة فواكه ودلاع

[أمل ليبيا]

السلام عليكم
اهلين اوشي مبارك نجاح صغارك وان شاء الله بطول عمرهم وعقبال الدكتوراه يارب
\
سوسو بارك الله فيك حبوبه ع الطريقه وان شاء الله حنجربها اكيد وربي يعاونك اكيد حاصله في العزومه بس مافهمتش هما عائلة والا شباب؟لى كل حال ان شاء الله اجرك حاصل
\

ام فراس ان شاء الله ربي يعاونك ويسهلك سفرك وتوصلي بالسلامه يارب وماتنسيش المصحف والصلايه وزي ماقلتي صعبه توديع الاهل انا سلمت عليهم هما يبكو وانا لين وصلت المطار ودموعي ماكفوش ان شاء الله نبكو من فرحتنا بشوفتهم صحيحين مرة تانيه يارب انا وانتي
\
قلبي يسجد لله اهلين ياغاليه كيف حالك

[أمل ليبيا]

شموسه ربي يعطيك الصحه وان شاء الله ديما افراح عندكم شورك الكنة الكبيرة ليها الرأي وليها الشيره زي مايقولو ^ ^
\
ام معاد كيف حالك ياحلوة تعرفي اني زوجي من توا يقولي بتجيبي منه ان شاء الله بتحملي منه يموت في الصغار الحق هما نعمه من ربي ان شاء الله مايحرم منها حد وربي يخليلك صغارك ويحفظهم يارب
\
جوهرة ياغاليه الي صار اكيد سؤ تفاهم لا أكثر وهذه عوينة جت فيكم انتي تسرعتي شويا لكن ماشاء الله عليك اعترفتي بخطأك "وجلا من لا يخطئ"
لذلك ياريت ترجعي للتجمع فاقدينك ومخليه مكانك ربي يحفظك وخودي بخاطرنا وارجعي ياريت

\

الغاليه اثري في مدادي
وينك حبيبتي ان شاء الله المانع خير تعالي ونورينا

\

حبيبتي ليبيا قلبي كيف حالك وحال بنوتك ان شاء الله تكوني بالف خير يارب

\
ام ورد
كيف حالك وكم عندك صغار وورد هذا اسم ولدك والا بنتك اسفه ع القصقصه^_^

[أسيرة زوجي]

مشكوورين بنات ليبيا على الترحيب

يعطيكم ألف عافية

[شموسه 88]

السلام عليكم ورحمة الله وبركاته

[أم أجنادين 80]

السلام عليكم ورحمة الله وبركاته

[أم أجنادين 80]

لــــــــــــيكم وحشة
اوشي مبروك النجاح واحني وين حصتنا

,,,,,,,,,,,,,,,,,,,,,,,,,,,,,,,
ان شاء الله ربي يهدي النفوس ومايجيب زعل بيناتنا
عادي يصير ان الشخص يفهم غلط وبعدين يكشف غلطه والمهم يلقي من يسامح وينسي
والحمد لله كلكم بنات اصل وانا التمست هدا فيكم
من خلال تعليقاتكم
ان شاء الله ربي يدوم المحبة ببيناتنا
أحبـــــــكم في الله

[أم أجنادين 80]

سوسو اليوم عزومتك
ان شاء الله ربي يعاونك
وتنستري مع ضيوفك

امس كنت عند خالتي طبعا يوم الخميس قبل العصر
قلت خلي اندير البسبوسة والكيكة لان زوجي طالع امزرد مع صحابه ويروح متاخر وانا
احتمال نمشي قبل الجمعة لخالتي
درتهم علي السريع ومشيت لحوش عمي وطلعت معاهم لحوش خالتهم
روحنا وقعدت الي 2 ونص
ويوم الجمعة الصبح درت كاليزوني بيتزا , وبيتزا ملفوفة وبيتزا بنرفعها معاي لخالتي مع البسبوسة
والكيكة ..
ومشيت رفعنا راجلي انا وماما
القينا عندها خالتي البنت مش متزوجة وبنت خالتي الثانية بايتين عندها حسدتهم الصراحة في الحريية
وهيا عندها ملحق خارج حوشها دار وحمام ومطبخ والله كم مريح يقعد الحوش انظيف
مدايرة الغداء رشدة امبكبكة احني نقولوا امقطع
وبعد الجمعة جو خالاتي ومرت خالي الكبير ومرت خالي الصغير والأطفال طبعا معاهم
ماعدا خوتي لانهم ماشاء الله كبروا بدوا شباب اللي يخدم يخدم واللي راقد وووو الخ
وانا طبعا قعدت انعول معاهم
قدمنا عصير وشكلاطة وبعدين شاهي مع انواع مختلفة من الحلويات لان كل وحده جايبة حاجة حلوة وحارة معاها
وبعدها صفرة العشاء هوا قبل المغرب لاني كنت مستعجلة بنروح عندي مشوار ثاني
وكانت الصفرة مكونة من رز بالخلطة وامبطن ودجاج كنتاكي وفلفل محشي وبراك وسلايط
وطاجين خضرة
وللأسف روحت قبل مايقدموا الفروتة
والتورتة جايبتها خالتي للصغار بمناسبة النجاح مع هدايا
وكل وحدة فينا رفعت هدية معاها
وعزمتنا خالتي الثانية انباتوا عندها الجمعة