السلآم عليكم بنآت وصبآحكم ورد
آبشركم ولله الحمد ولدت بتآريخ 3-3-2012 يوم الجمعه السآعه 12:05 صبآحآ
بدخل بالسآلفه على طول مآلي بالمقدمات بس بقولها بالتفصيل الممل ههههههه ياخوفي تطفشون وانتو تقرون
المهم بسم الله نبدأ
من يوم الاربعآء وانا كنت حاسه بطلق بس مو منتظم واقدر اتحمله يوم الخميس رحت لاهلي زياره وزاد الم الطلق فيني بس مو منتظم وصبرت وسآكته وامي حست وقالت لي ترآ ممكن تفك المويه وتولدين فجأه لو فيك طلق روحي المستشفى شوفي الوضع قمت اوسوس اتصلت على زوجي وقلت له بولد ودني المستشفى قال طيب وصل بيت اهلي وقآل يلآ قلت له لا ابي ارجع بيتي اتروش واجهز مو جاهزه الحين قال اقول البيت بعيد وقومي الحين اوديك ركبت السياره والحمدلله طلع زوجي ناسي كرت المستشفى بالبيت ههههههه ورجعت البيت جهزت شنطة عيالي لاني بخليهم عند اهل زوجي وتروشت يوم طلعت من الحمام تكرمون حسيت الطلق اختفى وبصراحه كان فيني نوم مره وزوجي تعبان قلت له وش رايك ننام لو زاد فيني نروح لان الطلق مومنتظم ماتحمست مره يجي قوي ومره بارد يوم تروشت برد نمت وكل ما اطلق اصحى وكذا للفجر الساعه 4 جاتني طلقه قويه صحيت زوجي ورحنا المستشفى حطو لي تخطيط الطلق لمدة ساعه شافت الدكتوره التخطيط قالت طلقك بارد ومومنتظم وكشفت ع الرحم قالت مقفل والله تحطمت وقالت لي الى الاربعاء ماولدتي بنسوي لك طلق صناعي ونصحتني بالمشي وزيت الخروع والجماع
رجعت البيت متحطمه مع الم الطلق الي جنني وحاولت انام ونمت للظهر صحيت وضعي عادي ولا شربت خروع ولا سويت جماع جلست ع النت واتحلطم اقول في نفسي ليه هالدكتوره ماحطت لي طلق صناعي او اي شي بمآ اني اتعذب من طلق جاي ورايح واشتكيت لبنات التجمع فديتهم
يوم اذن العصر قمت بصلي رحت الحمام تكرمون نزلت مني افرازات بنيه ارتحت بعدها دريت ان الرحم فتح ورحت مشيت ساعه كامله ورجعت البيت تروشت بمويه دافيه وانا اتروش زادت الافرازات واحس بدا الطلق ينتظم وضغط على تحت
زوجي طلع وانا جلست بالبيت انتظر الطلق يحمى اكثر رحت احاول انام الساعه 7 بالليل نمت ل8 صحيت معاد اقدر اتحمل اتصلت على زوجي وقلت له بولد يلا جهزت وبوست عيالي وحطيتهم عند اهل زوجي وركبت السياره والله اني احس خلاص بولد الطلق صاير كل 5 دقايق قلت لزوجي مو شرط المستشفى العسكري بعيد مره يبي لنا ساعه ودني اقرب شي الولاده والاطفال حكومي المهم وصلنا ونزلت المستشفى طبعا اول مره ادخله وماعندي ملف ولا شي وهم متعودين يستقبلون اي حاله والله يابنات اني ما ارتحت يوم دخلته اسره جنب بعض وبينهم ستاره بس والحريم يطلقون سجلوني وكل شي وعطوني سرير وقالت لي اخلعي السروال بتجي الدكتوره انصدمت كيف اخلعه بين كل هالحريم بينا ستاره والله ان الطلق اختفى من الصدمه حطيت رجلي وهربت واتصلت على زوجي قلت له ما اقدر اولد فيه مارتحت قال طيب راجع لك ومشيت برا المستشفى ربع ساعه لما جا زوجي رحنا العسكري وصلنا وانا بحاله مايعلم فيها الا الله وكاتمه الصيحه وصابره والطواريء كان زحمه خلوني انتظر بغرفة الانتظار كان في حرمتين يدعون لي وحده منهم قالت يارب ماتخذين ساعه وتولدين كانت الساعه 11 بالليل
المهم الحمدلله جا دوري ودوني الكشف توها السستر بتحط التخطيط جات الدكتوره كشفت على الرحم قالت ماشاء الله مفتوح من 6 الى 7 سم والله اني ارتحت وقلت الحمدلله على طول نقلوني سرير ثاني وعلى غرفة الولاده وزوجي معاي دخلت غرفة الولاده ومع كل الم استغفر واقرا سورة الزلزله والله تريح سبحان الله ماكنت ابي زوجي يدخل اقول للدكتوره ما ابيه تقول مانقدر نمنعه اقول لزوجي روح![hwaml4](images/smilies/sad.gif)
يضحك واقف ورا الستاره وكل شوي اشوفه يطل وترني هههههه
وزاد معاي الالم عطتني اكسيجن عادي مو كمام وانا صابره مابي اصيح واسوي ازعاج وكل شوي يزيد قامت الدكتوره عطتني مسكن بعضلة الظهر وصابره واسمع وحده مسكينه تصيح قلت في نفسي اذا هذي قبلي وتصيح للحين اجل انا وش بيصير لي بس توكلت على الله وجاني الم قوي وحسيت اني بروح الحمام تكرمون اقول للدكتوره ابي حمام قالت لي لا هذا راس البيبي بعدها جاني ضغط على تحت وطلعت مويه الراس نزل اكثر وبعدها بدقايق مره ثانيه نزلت مويه اكثر ولاشعوري صرخت قالت ايوه خلاص بيطلع البيبي تنفسي واتنفس والممرضه تقول امسكي رجلك وانا ما ادري وين رجلي دخت معاهم والدكتوره تقول لي اي الم يجيك دفيه على تحت وتنفسي سمعت كلامها الحمدلله 5 دقايق الم متواصل ولدت وجبت بنوتي فديتها وزوجي مبسوط راح وراهم يصور البنت يوم خلصو مني وطلعو المشميه جا زوجي تحمد لي بالسلامه
تذكرت كلام الي دعت لي بالاستقبال سبحان الله والله احس ان دعوتها كانت من قلب جد بعد ساعه ولدت
والبنت الي من دخلت غرفة الولاده وهي تصيح مسكينه ولدت انا وهي باقي دعيت لها والله وبعد ولادتي بنص ساعه ولدت الحمدلله يارب
اتمنى انكم ماطفشتو وانتو تقرون ههههههه
واتمنى للجميع ولاده سهله بأذن الله