خادمتي اسلمت ولكن هناك مشكله

[آروى الورد]

السلام عليكم ورحمة الله وبركاته
شغالتي اسلمت ولله الحمد بواسطة مكتب الجاليات وقالو لها كل اثنين تجيهم لمدة ساعتين تاخذ دروس اسلاميه وبعد 10 دروس تختبر ويعطونها شهادة الاسلام
والله الي اشوفه بالشغاله انها جاده بسالفة الاسلام محافظه على الصلاة وتسألني كثير عن اشاياء تتعلق بالصلاة والاسلام وتقول مرتاحه انها اسلمت وفي اشياء كثير كانت تجهلها وعرفتها يوم اسلمت وناويه تخلي اهلها يسلمون حتى بكت يوم اسلمت من الفرحه
المشكله هنا انا ساكنه مع اهل زوجي بشقه فوق وهم دور تحت والشغاله تشتغل عندي وعندهم وكانت تتضايق من قبل ومتحمله علشان لقمة العيش مسكينه وراحت 3 مرات الجاليات وصارت مشكله مع اهل زوجي جاتني الشغاله تشتكي تقول ان خوات زوجي مايعاملونها زين وانها ماتبي تشتغل عندهم
(هي من قبل الشغاله قبل لاتسلم تشتكي منهم )
وقالت لو بنزل بشتغل عند امه بس ماتبي تشتغل بالغرف وهذا شي من حقها لان بجد تعب عليها

وكلمت زوجي انها ماتبي تجلس وقال لامه وعصبت اول شي وتقول محد خربها الا مكتب الجاليات من اسلمت وهي متغيره وتقول كل مني انا يوم فتحت هالباب وتتحلطم الله يهديها
ووافقت اخر شي وقلت للشغاله خلاص محد بيكلمك من خواته واقتنعت ورضت تجلس
هنا المشكله
ام زوجي قالت لزوجي لاتوديها الجاليات يخربونها الشغالات الي تقابلهم وتقول له من اسلمت وهي مستقويه علينا وكل تبي تصلي وتغيب نص ساعه عن الشغل علشان تصلي سمعت ام زوجي بنفسي تقول كذا متضايقه علشان الشغاله تخلي الشغل وتصلي وتقول لزوجي مو كفو توديها الشغاله ماتمشي كلامها عليكم وتهدده لو وديتها لاتنزل عندي ( يعني بزعل عليك )
ام زوجي تفكر ان الشغاله مو جاده بسالفة الاسلام وانها تكذب وتكرر علينا قصة شغالة اختها اسلمت ويوم جات بتسافر رمت كل كتب الاسلام وارتدت
ما ادري ليه تفكر ان كل الشغالات الي يسلمون بيسوون نفس شغالة اختها

وزوجي بار بأمه مره ومايرضى بزعلها
ادري لاطاعه لمخلوق في معصية خالق
لاتقولون لي كلمي ام زوجك لان ام زوجي مستحيل تسمع لكلامي انا موعاجبتها ليه الله اعلم

مع اني وربي يشهد علي ماعمري غلطت معاها ومحترمتها بقوه والدليل الشغاله لي واخليها تشتغل لهم اكثر مني وساكته وعندي 4 اطفال وموظفه

ترا ام زوجي انسانه تصلي وتصوم وتتصدق وتاخذ عمره كل فتره ماشاء الله وفيها اشياء زينه كثيره

بس مشكلتها لسانها وسوء الظن بالناس الله يصلحها

وهي عندها 5 بنات كبار بالبيت اكبر وحده عمرها 33 واصغر وحده 15

وانا صابره على كل هذا علشان زوجي وعيالي بس مابي اسوي مشاكل وافتح باب ام زوجي دايم تسيء الظن فيني علشان كذا ماصرت اتكلم معاها

مو هذي مشكلتي مع انها مشكله بس الي حدني اكتب لكم المشكله اني ابيها تروح الجاليات وتتعلم الاسلام

افيدوني جزاكم الله خير