بسم الله الرحمن الرحيم
السلام عليكم ورحمه الله وبركاته
احس ان مانيب عارفه كيف ابدا واقولكم قصه ولادتي ولا وش اقول
بس المهم
انا آآجلت عمليتي اكثر من مره وصارت لي ظروف منعتني اولد الا باخر موعد حدده لي الدكتور وهو كان اقصى حد لعمليتي
المهم يوم الاربعاء بعد الفجر رحت المستشفى علشان اتنوم لان عمليتي صباح الاربعاء لما تنومت كنت ميته خوف ومرعوبه مو من العمليه لا وربي على بنتي كان الشيطان الله لايوفقه يوسوس بي ان بيصير بها شي كنت ااجل العمليه علشان هالسبب تقريبا وجت السستر عطتني ملابس دخول العمليه وخزياه فششششششششششله قالت شيلي كل شي مدام اناافكر ان الطبيعي بس الي تطلع فضايحهم المهم راحت ورجعت انا لابسه ملابسي الداخليه ولابسه لبس العمليه بالمقلوب<< هي طلبت مني كذا
لما رجعت قالت اوووه مدام شيلي كل شي والبسي بس لبس العمليه انا انحرجت موووت لان قالت كذا قدام زوجي حسيت شكلي مرره غلط لا وزاد ان الي بيسوي لي العمليه دكتور والله وقتها تمنيت الارض تنشق وتبلعني المهم رحت الحمام وسويت مثل ماقالت ورجعت وعلى سريري مانطقت ولا بكلمه فغطيت نفسي بالشرشف ونمت وحول الساعه 9 جت السستر تقول الحين يجي الدكتور عاد انا خفت وعرفت ان خلاص قرب وقتي من جد لان من يخلص مروره على المرضى بيبدا عملياته لان عمليتي بيوم مافيه متابعه يوم خاص بالعمليات
انا احب دكتوري واثق فيه وادري انه طيب وخلوق ويخاف الله الله يسعده ويطول بعمره ويحفظه من كل شر ومكروه
لما جا قال كيفك وش مسويه مستعده للعمليه قلت له دكتور انا خايفه على بنتي موت الشيطان يوسوس بي هذا اقصى حد وموعد لعمليتي بس ميته خوف على بنتي اخاف يصير بها شي قال لايابنتي بنتك مافيها الا العافيه لاتخافين ولاشي انتي الحين بالاسبوع ال 39 بنتك كامله ومافيها الا العافيه تشجعي ولا ماشتقتي لها قلت له دكتور انا مانيب خايفه من العمليه والله انا خايفه على بنتي قال توكلي على الله وقولي يارب وبس قلت له طيب متى عمليتي قال شويات بس خليك جاهزه اووك قلت له طيب وطلع الله يوفقه ويخليه لزوجته واهله وعياله يارب
وقعدت ادعي ولما جت الساعه 11 تثريبا جت السستر تقول مدام دكتور يقول انتي عمليه وجايبه معها سرير مت خوووف من العمليه وعلى بنتي قلت لها هونت ماعاد ابي اولد قالت ايوه الحين ولاده<< ياحبي لها مافهمت علي هههههههههه
قالت يله مدام قلت لها لالالا مابي قالت انا كلام دكتور نفر ثاني بعدين انتي اوكي؟ قال زوجي صبر سستر وقالي وجع هبال هو هبال خلصينا كلها نص ساعه وانتي طالعه قلت له خايفه على بنتي قال صجيتينا كن محد عنده بنت غيرك اخلصي قلت طيب ابي اروح الحمام على الاقل اول وطولت بالحمام ولما طلعت قالت السستر يله عمليات قلت صبر البس عبايتي قال لا مافي عبايه قال زوجي تستهبلين انتي قلت لا منجد اروح كذا تحت فيه رجال قال تغطيك بالشرشف خلصينا وانسدحت على السرير وغطتني بالشرشف انواع الخوف وقت العمليه وربي خفت من العمليه ماانكر بس خوفي على بنتي كان اكثر
لمادخلت كشك العمليات صرت اناظر ادور دكتوري كني طفل يدور امه كل الي هناك ماعرفهم سالت عن الدكتور قالو الحين يجي بس بعد مايعطوني بنج قلت طيب وسالتني السستر وش ابي بنج كامل ولانصفي قلت لها ابي اشوف الدكتور اساله<< ياحياتي انا وربي كانت حجه علشان بس اشوف الدكتور واتطمن
قالت الدكتور الحين يجي بس يسوي يخلص العمليه الي يسويها هو ماقالك وش تاخذين او ماتفقتي معه قلت لها بصراحه الا انا ابي نصفي وهو يقول كامل وانا ابي اشوفه قبل قال شوفي قبلك 3 كلهم اخذو نصفي انا انصحك بنصفي والدكتور الحين بس يخدرونك يكون خلص وبيجيك على طول قلت لها خلاص ابي نصفي < ابي اتاكد ان اشوفه ولان من اول ابي نصفي بس مابغيت اكسر كلامه لانه قال خذي كامل يجي يلاقني ماخذه نصفي
المهم جا دكتور التخدير ولما جا قال اجلسي ونزلي راسك قلت له وشو وش بتسوي؟
قال بعطيك مسكن علشان ماتتالمين وقت العمليه ولا بعد العمليه قلت له تخدير صح قال لا مسكن قلت له طيب
وعطاني ابره الظهر قلت له دكتور هذا تخدير قال لاتتحركين اصبري اشوي قالت السستر لاتتحركين ماتخوف ولاتالم صح علشان يجي الدكتور مو من اول تسالين عنه قلت ايه وبعدين حطت لي مغذي ودوائر ملونه على صدري اظن انها تخطيط قلب وشي باصبعي اتوقع انها حقت دقات القلب << لاتلومونها بدويه هع هع هع هع
وحطو لي جهاز قياس الضغط وعطوني كمامه اشوي وداخل الدكتور قال كيفك يابنتي وكيف نفسيتك قلت له زينه بشوفتك دكتور قال يالله توكلي على الله ولاتخافين وحطو ستاره بيني وبينهم قال يابنتي ادعي ولاتخافين على بنتك خليك قويه قلت له دكتور انا مانيب خايفه من الشق ولا الدم قال ادري انا اقولك تتطمني ولاتخافين بنتك ان شاء الله بتكون بخير قلت له الله يسمع منك يارب
جت عندي السستر قالت تحسين بشي قلت لا ولاشي بس احس اني بردانه قالت اووك بعطيك ابره تدفيك اشوي وحطتها بالمحلول اشوي دخل دكتور التخدير وقام يسولف مع الدكتور من عند الباب ويرد عليه الدكتورماجا ببالي انهم يسولفون وهم بدو بالعمليه ابد لما طلع دكتور التخدير وربي ثواني سمعت بنتي تصيح لو الصوت مو قريب من عندي كان قلت ان وحده بالكشك الي جنبي ولدت كان تقول السستر الف مبروك مدام قلت لها مين انا؟ قالت ايوه انتي بنوته زي القمر قلت لها الله يبارك فيك وسكت وقال دكتور التخدير ولدت وش جابت بنت ولا ولد قالت السستر لابنوته قال الدكتور وروها امها خلو امها تشوفها وجابتها لي اناظر فيها مانيب مصدقه انها بنتي ولا مصدقه اني ولدت احس اني تنحت وقتها ولما شالوها قلت بيني وبين نفسي الاكيف شكل ملاامح بنتي انا ماركزت فيها ولا اتذكرها وراحو كل الي حولي من سسترات ودكاتره ماشوف الا وحده عند المحلول قلت لها الدكتور وينه راح؟ قال لايابنتي اناهنا قلت اشوى الحمدالله قال ماتخافي يابنتي خلاص خلصتي الحين تطلعين فوق قلت له الله يوفقك ويسعدك دكتور والله ماحسيت بشي قال الحمدالله على سلامتك وسلامه بنتك قلت لك العمليه سهله ماتخافي قلت له الحمدالله
وودواني غرفه الافاقه كنت ميته برد وعطوني ابر بالمحلول بس كنت مرره بردانه وقلت ابي بنتي تجي عندي قالو طلعناها الحضانه قلت ليه قالو يبلسونها ويشوفها دكتور الاطفال وتنزلك غرفتك قلت طيب
ومليت اخذو مني جوالي وبنتي ماعندي شي اشغل به نفسي ههههههههه
كان انادي السستر ولا ترد وجا الدكتور قال وش فيك يابنتي قلت له دكتور مليت ابي اطلع ماسمحو لي ادخل جوالي ابي اكلم امي ابي ابشر زوجي كنت ابي اصورك مع بنتي قال الحين اقولهم يطلعونك ممنوع الجوال هنا معليش وزوجك ينتظرك برى وقلت له انك ولدتي وودينا بنتك الحضانه وهو بيكلم امك اكيد قلت طيب دكتور خل السستر تطلعني الحين تكفى قال طيب وجت السستر تطلعني اول كنت متلحغه بالشرشف خايفه متغطيه فيه لما جيت طالعه لحفوني بنفس الشرشف ومنغطيه فيه بس ابي اشيله كل مارفعته عن وجهي قالت السستر مدام فيه رجال وتغطي وجهي وعل هالحال الين دخلنا المصعد رفعت الشرشف من على وجهي قالت مدام مايسمع صوت رجال قلت وجع صايره محمد الثاني على غفله قعد زوجي يضحك قال حلوه محمد الثاني ثلت وانا صادقه انت ساكت وهي تقول رجال رجال قال وهي صادقه الممر كله رجال ينتظرون حريمهم قلت عرفنا المهم انا تعبت بشيل الشرشف قال خلاص قربنا نوصل اصبري ثواني بس
ودخلت غرفتي وكلمت الحضانه قلت لهم ابي بنتي قالو البنت بردانه لان ماعندها ملابس قلت وجع لبسوها من عندكم مو تخلونها بدون ملابس وسكرت وقعدت اهاوش زوجي انت وانت وانت من اليوم اقولك جيب الملابس من السياره الحين لها ساعتين البنت عندهم ومالبسوها علشان ماجبت ملابسها ويقولون بردانه
وراح نزل وجاب ملابسها وعطاهم اياها ودقيت بعدين على ارنوبه ابشرها واقولها تقول للبنات اني ولدت بنص المكالمه فك البنج ومت الم وسكرت بعدين منهاوطلبت مسكن والحمدالله صرت زينه من اخذت المسكن ودقيت العصر اطلب بنتي قالو بيجبونها وماجابوها الا بعد المغرب والحمدالله ولدت وقمت بالسلامه انا وبنتي
والحين عقبال رورا الله يقومها بالسلامه ويشفى بنت ارنوبه وولد ملوكه ويفرح كل حامل بولدها يارب
واسفه اني طولت