الحمد لله حمدا كثيرا طيبا مباركا فيه .. والله يا بنات لو ظليت احمده ليل نهار ما أوفيه حقه سبحانه .. بقولكم قصة ولادتي ببنتي الله يحفظها حـــــــلا .. اللي تعبتني مرررررررررررررررررة في ولادتي ..
في يوم الجمعة 28-8 الساعة 10 الليل كنت بروح عند أهلي لي فترة
ما شفتهم وانا ألبس العباية إلا أحس شي طق طبعا انفجعت .. ايش اللي صار ؟؟؟؟ نزلت على الموية .. خفت مرة وكلمت زوجي .. زوجي مرة خواف قال لي بسرعة عالمستشفى .. أنا مارضيت قلتله اصبر شوية لما يجيني الطلق .. والله مسكييييييييينة .. كنت افكر انه بيجيني طلق زي باقي الحوامل .. استنيت ساعتين ومافي الم بالمرة ..
بعدين رحت المستشفى ونوموني وعملولي تخطيط .. تقولي الدكتورة في طلق .. اقولها ماني حاسة بشي .. تقولي اصبري بكرة يجيك الطلق .. واستنيت الطلق وعملولي تخطيط مرة ثانية .. طلع مافي طلق مررررررررة .. اختفى !! قالتلي الدكتورة قومي امشي في ممر المستشفى ومشيت مشيت لما انهلكت .. جات تقيس الرحم 2 سانتي بس ..اهئ اهئ .. وربي اتحطمت .. رحت غرفتي اللي بالمستشفى ,, لقيت زوجي ناااااااااااايم حبيبي والله مرة تعب معايا .. جلست ومن التعب نمت عالكنبة .. قمت واكلت عسل لعل وعسى يساعد على فتح الرحم .. وخرجت من الغرفة امشي في الممر ورجعوني تاني لغرفة التخطيط .. برضوا مااااااااافي طلق .. والرحم حالف ماينفتح 2 سانتي بس .. واسمع اصوات اللي بيولدوا واقول يارب متى دوري وأولد متى ؟؟؟ وكل ماتولد وحدة اتوتر زيادة .. كنت اقول في نفسي ليه هما اللي بيولدوا مو أنا ؟؟؟ استغفر الله .. وعدا اليوم الأول (السبت) وأنا بين تخطيط ومشي ,, لكن بدون أي تقدم .. اليوم الثاني الصبح دخلوني غرفة التخطيط مافي طلق والرحم 2 سانتي .. جات الدكتورة وعملتلي سونار وقالتلي موية الجنين مرة ناقصة .. يالا اطلعي فوق بنعملك ابرة طلق .. قلت في نفسي الحمد لله اهم شي أولد .. طلعت فوق ولبسوني لبس المستشفى .. وحطت الأبرة في المحلول .. إلا شوية تجي الدكتورة تقول للسستر شيلي الأبرة وخليها تقوم تمشي في الممر.. وعملتلي تحريض بيدها ونزلت الدم وانفتح 3 سانتي .. وقمت امشي لما تعبت ورحت غرفتي واخذت المصحف وقرأت البقرة بنية تسهيل الولادة .. وارتحت مرة الحمدلله .. وعدا اليوم الثاني (الأحد ) طبعا مافي طلق والرحم اتقدم شوية 3سانتي .. قالتلي الدكتورة روحي غرفتك ارتاحي وبكرة الساعة 4 الفجر تروحي لغرفة التخطيط ويعملولك تحميلة طلق .. قمت الصباح ورحت للغرفة وكنت متوترة عالآخر .. جات الدكتورة تقولي انتي ماغرتي من اللي ولدوا ..ياشيخة انا غرت .. وحطت لي التحميلة .. طبعا هنا بدأ الألم يزيد شوية شوية .. وزااااد الألم وتجي الدكتورة تكشف لسه 3 سانتي .. انا هنا بكيييييييييت .. هذا الألم كله و3 سانتي .. صار زوجي وامي الله يسعدهم يهدوا فيا ويصبروني .. وانا اتـألم شوية ويجيبولي كمامة فيها مخدر صرت اشفط منها لما حسيت اني مدوخة ريحتني الحمدلله .. بصراحة السسترات عالدكاترة عسسسسسسل ماقصروا معايا .. حسسوني اني انا لوحدي اللي بولد عندهم .. المهم جات الساعة 12 الظهر أول يوم في رمضان( الأثنين ) وبعد ماكشفوا اكثر من 10 مرات طلع الرحم مفتوح 8 سانتي ووقف مارضي يكمل ال10 سانتي .. هنا قالت الدكتورة بنعطيها ابرة طلق حتى يساعد الرحم يفتح .. ودخلوني غرفة الولادة والرحم ما انفتح اكثر من 8 سانتي .. الدكتورة اتجننت !! تقول بالأول ماكان في طلق وانفتح الرحم والحين في طلق والرحم مو راضي ينفتح !!! وانا ابكي وماسكة بيد زوجي ما أبغاه يسيبني ودخلته الدكتورة وقالتله اوقف عند راسها .. مع انه المستشفى والدكتورة اللي ولدتني مستحيل تدخل أحد .. بس شافت حالتي ونفسيتي الله يسعدها قامت دخلت زوجي .. المهم .. كانت تقولي دفي حاولي تساعدينا وانا مافيا طلق مايصير ادف .. وابكي وزوجي عند راسي يقرأ البقرة .. صرت ادف بدون طلق وارجف بقوة قاموا اثنين سسترات سعوديات الله يسعدهم مسكوا ايديني .. في هذي اللحظة زوجي ماقدر يشوفني بهذي الحالة خرج بره يبكي ويدعيلي .. وامي تدعيلي .. قالت الدكتورة للسستر وانا سامعتهم اذا ماولدناها قبل الساعة 3 الظهر بنحولها عمليات .. وانا اقول في نفسي يارب طبيعي .. قامت السستر وضغطت ضغطة قوية على بطني والحمدلله خرج البيبي .. وشرفت حـــــلا ربي يسعدها لي ولأبوها وخرجوا السسترات يبشروا زوجي وامي .. والله طاروا من الفرح مو مصدقين اني ولدت قاموا يعطوا السسترات من ميتين ميتين من الفرحة .. بس ماانتهت المعاناة هنا .. اللي صار انقطع عنق الرحم قطع كبير ونزفت دم كثيييييير وطلعتلي بواسير .. خافت الدكتورة وحولتني على طول على غرفة الملاحظة وحطولي حديد وفيتامينات ومحاليل كثيرة .. والله تخيلوا يخلص محلول بسرعة يجوا يحطوا الثاني وجلست يوم كامل على هذا الحال . ويوم الثلاثاء خرجت لغرفتي الحمدلله .. وكنت تعبانة .. صح ان هذي ثالث ولادة لي بس كانت جدا متعبة .. بس الحمدلله اني ولدت طبيعي مو قيصري .. وانا الحين في بيتي مافيا إلا العااااااااااااااافية .. وحلا الغاليه في احضاني .. الله يرزقني برها ويجعلها واخوانها من الصالحين ..
حبيباتي الحوامل بالذات البكريات .. لاتخافوا من الولادة والله انها تساهيل من رب العالمين ,, انا ولدت قبل كذا وكانت ميسرة الحمدلله .. بس ولادتي بحلا كانت متعبة ,, يمكن عشان من زماااااااااااان نفسي ببنت .. فاتغلت علي .. وماجات بسهولة ..هههههههههه ..
هذي قصتي بالتفصيييييييييييل الممل ان شاء الله ماتملوا من قرائتها ..