تجربتي التفصيلية في الحقن المجهري

[أم حبيبة ان شاء الله]

السلام عليكم ورحمة الله
ازيكم يااخوتي
حبيت احكيلكم تجربتي مع الحقن المجهري في مصر لاني لما كنت لسة مقبلة عليه مالقيتش تفاصيل كتير عنه خصوصا الأسعار والاماكن الكويسة وكدة
نبدأ بسم الله
اول حاجة عملتها طبعا انا وزوجي اننا رحنا للدكتور شرحناله ظروفنا وهي كالآتي متزوجين من خمس سنوات ومحصلش حمل نهائيا عملنا التحاليل الخاصة بيا وبه وعملنا تنشيط كتييير وعملنا تلقيح صناعي 3 مرات وعملنا منظار البطن والرحم ولكن لم يشأ الله الحمل في كل الخطوات السابقة
فهو شاف تحاليلنا واشعاتنا ومنظارنا إضافة لحالتي أمامه بالسونار وقال انا مش شايف في الحاجات دي كلها سبب يمنع الحمل لعل في مشكلة في الانابيب.. قولتله انا اكتر من دكتور قال ان في التهاب في الأنبوب واعطوني علاج يعني مفروض اتعالجت منه.. ممكن تكون اتكررت؟ الله اعلم

المهم قال مننتظرش اكتر من كده ونبدأ في الحقن المجهري.. انا طبعا مكنتش عاوزة اعمله خالص ولا اوصلله موتى وسمي اودة العمليات لكن قدر الله وما شاء فعل

اول حاجة قالي احلل مخزون المبيض و الغدة الدرقية و fshو lh
عملتهم وكان الحمد لله كله تمام
ملحوظة هنا. مش لازم تعملي التحاليل دي في معمل البرج ولا المختبر انا كنت فاكرة ان محدش بيعملهم الا هما وطبعا غاليين اوي يعدوا الالف ونص. مخزون المبيض لوحده اكتر من 600 جنيه فاحنا نعرف صديق مدير لمعمل البرج قولت لزوجي اسأله كدة يمكن يكرمنا فيهم.. قاله ماتيجي عندي في المعمل انا اللي بشتغل بأيدي هنا وهنا واعملهملك كلفونا كام؟ 320 جنيه كلهم والله

التحضير للعملية
مكنش في تحضير اوي يعني.
مجرد الامتناع عن مصادر التلوث زي الاكل اللي من برة والشيبسي والسناكس وابعد عن المبيدات والسجاير والمنظفات والحاجات الكيماوية
واني بدأت اخد فوليك اسيد وفيتامين ه يوميا. وكل التحضيرات دي من عندي الدكتور مقاليش اعملي كل ده ولا حتى قالي خسي مع ان وزني كبير ولما سألته عن الوزن قال مش هيفرق معانا في حاجة الا في جرعات العلاج

بدأت اخد الحقن تالت يوم الدورة
علما بأن كل الأدوية اللي بتتاخد في تنشيط الحقن المجهري حقن مفيش أقراص ولا كلوميد ولا كل ده. وكلها حاجات غالية
بناخد تلات انواع من الحقن
نوع بيكتر البويضات
نوع بيكبر البويضات
نوع بيخلي البويضات الكبيرة الكتيرة دي متخرجش الا لما نبطل الحقنة دي وندى التفجيرية

الأنواع دي اسمهم. مونابيور. جونابيور وستروتايد. اتهريت حقن وشكشكة طول الأسبوعين غير اننا دفعنا مبلغ وقدره حوالي 7 آلاف جنيه في الحقن دي وكان الدكتور بيتابعني مرتين في الأسبوع بالسونار وخلاني اعمل مرتين تحليل اسمه e2 ده بيبين عدد البويضات اللي نضجت كل 200 منه يعني واحدة نضجت 400 يعني اتنين نضجوا وهكذا لحد ما الأسبوعين قربوا يخلصوا شفنا السونار لقينا المبيض عامل زي عنقود العنب الصغنن كدة سطحه عليه كور مغطياه قال هو ده

التفجيرية بكرة والعملية بعدها ب 36 ساعة

خدت التفجيرية وقعدت اعيط لما شبعت عشان اروح العملية هادية وكويسة

وطبعا في صيام قبل العملية حوالي 8 ساعات لان العملية ببنج كلي
يوم العملية
المفروض ان الست بتخلع ملابسها بالكامل وتلبس بتاع العمليات كدة بس مش قماش لا حاجة شبه الوايبس كدة قولتلهم مستحيل طبعا البس حاجة زي دي ياتاخدوني زي مانا كدة يابلاش
وانا عندي حق علي فكرة المفروض اننا نخلع هدومنا لما نكون هنفنح البطن لان ممكن التلوث يتسرب للجرح لان ده مكان طول الوقت مقفول لكن لما تبقى العملية من المهبل اللي هو كدة كدة فتحة طبيعية وملامسة للهدوم دي يبقى هيبجي منين التلوث.
المهم اصريت وندهوا الدكتور ولا همني.. في الاخر جابولي 2 عباية من الخضرا القماش بتاعة العمليات دي واحدة البسها بالمعدول وواحدة بالمقلوب وتحتها البتاع اللي عامل زي الوايبس ده وبنطلون منه مفتوح من الحجر. انا ع ماطلعت من العملية كان البنطلون ده اتقطع بالكامل يعني لو سمعت كلامهم كنت طلعت من غير هدوم
فصممي ان يعملولك احسن حاجة ومتسمعيش كلامهم في المسخرة دي

خدروني وتم السحب وفوقت في اودتي وكان عندي مغص جامد شوية
كتبلي مضاد حيوي اوجمنتين
وفوليك اسيد ميعرفش اني باخذه من شهرين هههه
وجوسبرين
وسيكلوبروجنوفا الأقراص البيضاء
وحقن برونتوجيست مثبت

وقال الارجاع بعد من 3 الي 5 ايام انتظر منهم تليفون

بعد خمس ايام اتصلوا وقالوا اجي بكرة. كنت مبسوطة ان الارجاع هيكون اجنة اليوم الخامس اللي بتبقى أقوى شوية بس طبعا هو لو كان شايف اني ارجع في الثالث او الرابع مكنتش هتكلم

الارجاع بقى عادة مش بيكون ببنج لكن نظرا لحالتي العصبية واني فضحتهم عشان اللبس يوم السحب قال انا مش هعمل العملية دي وانتي قاعدة تعدلي عليا. انتي تنامي احسنلك واحسنلي
قولت احسن انا كدة كدة مضمنش اني ابقى هادية بس كنت هادية والله لما جم ياخدوا هدومي قولتلهم مش كل يومين هنكتر في الكلام هاتيلي العبايتين اللي جبتيهم المرة اللي فاتت

وقومت الحمد لله مفيش وجع ولا حاجة وكنت موصية الممرضة تستودع اجنتي وهو بيحطهم عشان انا نايمة
وكنت موصية زوجي يستودعهم اول مايشوفني واستودعتهم اول مافوقت

كانوا عاوزين يمشوني بعد ساعة من العملية بس انا فضلت عاملة عيانة لحد ماتميت تلات ساعات نايمة بعد العملية ولما كنا مروحين فردولي كرسي السيارة الأمامي سرير ونمت عليه
لو معندكيش عربية اجري عربية اوعي تروحي في المواصلات يهبدوكي مطب يضيعوا تعبك

العلاج بعد الارجاع بقى كان نفس العلاج بعد السحب ماعدا المضاد الحيوي والمسكن
في هنا ملحوظة مهمة. في نوع فوليك اسيد موجود في السوق اسمه فوليكاب الدكاترة بتكتبه كتير اوي. انا كان كاتبهولي
متجيبيش النوع ده.. ليه؟ لأن جرعته قليلة 0.2 والجرعة المطلوبة يوميا هي 0.4 في أنواع تانية فيها.0.5 هاتي ده

في هنا حاجة لازم تتقال.. انا كنت رافضة جدا اعمل الحقن.. كنت خايفة ندفع فلوس كتير وميبقاش في نتيجة فاكون محرجة وبردو عشان عملية وتخدير وكدة. وكنت خايفة يكون إيماني ضعيف وان لو النتيجة سلبية ازعل وانهار وكدة واني هعدي ازاي اسبوعين الانتظار دول اكيد هتوتر جدا بس بجد اول ما روحت البيت بعد الارجاع كنت مرتاحة وهادية جدا وراضية باللي هيحصل والله وحاسة اني عملت كل حاجة نقدر نعملها ومقصرتش وربنا عليه جبر الخواطر
فقضيت الاربعتاشر يوم هادية ومبسوطة لحد قبل ميعاد التحليل بيوم.. كنت قاعدة افكر مع نفسي هعمل ايه لو محصلش حمل.. لقيت عندي إيجابية كدة وبقول لنفسي هخس وهاخد هدنة شوية وارتاح ولما ابقى كويسة اروح أكرر التجربة ما الناس بتعمل بالكام مرة انتي يعني متعبتيش ولا حاجة
خلال الأسبوعين دول محصلش اي اعراض من اللي بيقولوا عليها لا دم تعشيش ولا سخونية ولا نغزات ولا اي حاجة كان في حاجة واحدة بس المغص الخفيف بتاع قبل الدورة اللي هو اصلا كدة كدة بيجيلي كل دورة وقبل التحليل بيوم بدأت الافرازات تتلون اصفر. قولت بس. افراز اصفر وبعديه البني وبعديه الأحمر كالعادة
بس فضل اصفر ومحصلش حاجة وحللت والحمد لله طلعت حامل وفرحنا.. او هما فرحوا وانا كنت فرحانة على مش مصدقة. كل ما الاقيهم يجيبوا سيرة الحمل اقول لنفسي هما بيقولوا عليا؟ مين دي اللي حامل؟ مين اللي بيباركولها؟ حامل؟ يارب تقومي بالسلامة؟ انا؟

الحمد لله... ربنا يتم حملي على خير يارب ويرزقني الذرية الصالحة.. ويفرحكم ويجبر خاطركم بالذرية عاجلا غير آجل يارب

انا العملية كلفتني حوالي 28 الف جنيه بالأدوية بالدكتور بالمستشفى بالتحاليل وفي أماكن بتعمل اقل من كدة وعملتها مع د ياسر يونس في مركز انجاب في المنصورة
الكلام ده من تلات شهور

الحاجات اللي لازم تعمليها والحاجات اللي لازم تتجنبيها في فترة الانتظار
ممنوع تماما الجماع واي عمل منزلي. يعني تاخدي شنطنك وعند امك
ممنوع تناول الحاجات اللي فيها مواد حافظة واللي مش مطبوخة كويس والمياة الغازية والمخللات
متفضليش راقدة في السرير طول الوقت ريحي شوية وقومي اتمشى في البيت اتفرج على التلفزيون ارسمي اقرأي اعملي تريكو أعملي اكسسوارت اقراي قرآن صلى
صلى وانتي واقفة عادي واركعي واسجدي انتي مش مريضة والسجود بيوصل الدم للرحم والحركة بتنشط جسمك
استحمي عادي وبمية سخنة مفيش حاجة اسمها لو استحميتي او لو غسلتي شعرك تسقطي ده كلام فاضي هو انتي حامل في شعرك ولا في جلدك. اهم شي متطوليش في الاستحمام لأنك لو حامل هتكوني مرهقة المية السخنة لمدة كبيرة ممكن توطي ضغطك وتدوخي
اشربي حاجات سخنة عادي انتي مش حامل في معدتك الشوربة مش هتنزل ع العيل تشويه ولا حاجة ولا العيل ملزوق بصمغ هيفك من السخونة. ربنا قال علي الرحم قرار مكين. العيل مش هينزل الا لسبب واحد انه مش مكتوبله يتولد ويكون له رزق من الدنيا قدر من عند الله
كمان العسل مبيسقطش التمر مبيسقطش خدي معلوماتك من الدكاترة مش من ست بتفتي

اهم شيء لازم من اول ماتبداي العملية لحد ماتبشري بالنتيجة ان شاء الله تطلعي كل يوم صدقة ولو بسيطة وتصلي على النبي كتير وتستغفري كتير. الدكتور بنفسه هو اللي قالي الكلام ده قالي لو معملتش دول متجيش

وفي النهاية اتمنى تدعولي ربنا يتمم حملي على خير ويقومني بالسلامة ويرزقني الذرية الصالحة

[سحآبة فجر]

وعليكم السلام ورحمة الله
ماشاء الله تبارك الرحمن الف مبروك وربي يتمم لك حملك على خير ماقصرتي افدتينا