محتاجة استشارتكم الله يوفقكم في شغلي

[المحتارة=(]

أخواتي
السلام عليكم ورحمة الله وبركاته

أنا عندي مشكلة مضايقتني في شغلي ... أبي مساعدتكم الله يوفقكم

أولا .. أنا اشتغل مدخلة بيانات للشركة + صادر ووارد .. ومسكت هالشيء مع مهام أخرى من بداية تاسيس الشركة

أنا في شغلي فيه توقيع حضور وانصراف ... بس بدون مراقبة .. يعني محد يراقبك وقعتي حضور أو ما وقعتي .. وعادي لو توكلين غيرك في التوقيع ( بحكم ضغط العمل الواحد ينسى التوقيع ... طبعا ذا من باب تعاون رئيسة العمل معنا ) .. وفي حال الغياب عن العمل بعد تقدرين توكلين زميلتك بدون خصم في الراتب ( بعد من باب تعاون رئيسة العمل معنا ) !



مشكلتي لها الحين سنة ونصف ... تعينت زميلة معي في العمل ( يعني مسماها الوظيفي ومهامها الوظيفية مرتبطة معي ) .. وظيفتها مساعدتي .. يعني مهام عملنا مشتركة ولا يمكن تنفصل

زميلتي هذي متزوجة وعندها ولد ..

بداية شغلها زميلتي .. كانت منتظمة وملتزمة .. وبما نها مساعدتي .. ما أخفي عليكم اني ارتحت في البداية انها ما احتاجت الى تدريب

لكن ..

في يوم تغيبت عن عملها بداية شغلها .. وسألت زميلاتنا إذا لازم تجيب عذر طبي بغيابها أو لا .. طبعا قالوا لا مو لازم .. وماكو خصم رواتب ومن هالقبيل ..

استغلت زميلتي للأسف هالنقطة .. وصارت تغيب واجد .. وتقط كل الشغل اللي عليها علي ..؟!!

واستغلت بغيابها بعد إذا مرض ولدها ولا ارتفعت حرارته .. ولا إذا ما عندها مواصلات

وصار كل شيء ينقط علي !!!

ومحد يراقب .. أو اكتشف وضعها !!

وأنا مضطرة اني أسكت أو ممكن تصير مشكلة >> ( وهذا خطأي من البداية اني سكت من الأول )

طبعا حاولت وتكلمت معها .. بس للأسف ..تعذرت بظروفها واني مب نفس وضعها ... وان وضعها كأم وزوجة يختلف عن وضعي كعزباء من ناحية المسؤولية ( بالمختصر العزباء فاضية وما عندها مسؤوليات فتقدر تركز مع شغلها ... والمتزوجة عندها مسؤوليات وما تقدر تركز بشغلها !!! )

ضليت على هالحال 6 شهور ...

عقب اضطريت اتكلم مع مديرتي المباشرة ... عن وضع زميلتي .. وانه لازم تحط حد ..

بشرط .. اني ما أبي أضرها .. أو ممكن يسبب بطردها من الشغل

بس شوفوا وضعها في الحضور والغياب ونبهوها

وعدتني خير ...

ولا صار شيء ؟!!!

ومرت سنة للحين ولا تغير وضعها زميلتي للأسف !!!

وكل فترة أشتكي لمديرتي دون أي فائدة !!!

بالأخير .. صارت مديرتي تقول أني متشائمة ... وما أتأمل بزميلتي الالتزام !!!

شلون أتأمل وأنا أشوفها عينك عينك وهي مب ملتزمة بدوامها وكل شي ينقط علي ؟!!!

أنا اللي أكرف وأتعب وأتأخر حتى بعد نهاية دوامي وشوف عينهم وما همهم الا ان كل شيء منجز وعلى أكمل وجه !!!!!

بصراحة يا أخواتي .. ما أحس اني مرتاحة بشغلي لهالسبب فقط !!
غير كذا كمرتب وغيره لا الحمد الله كل شيء زين

ودي أغير المكان اللي أنا فيه .. بس البحث عن وظيفة صعب جدا مثل ما انتم عارفين

ولا هاين علي أشوف نفسي هي تغيب بكل مره عذر غير شكل وأنا أتحمل كل شيء فوق راسي !!!

صايره علاقتي مع الكل متوترة .. وصرت منعزلة عن الناس في الشغل .. صرت ما أحب شغلي .. وكل يوم أكون متوترة لا يجي منها مسج وتقول أنا باغيب بكره شيلي عني


حاولت طلبت نقل لقسم ثاني لهالسبب .. وقوبل طلبي بالرفض .. لأن السبب تافه من وجهة نظر مديرتي !!!


أنا ماودي أتقدم بشكوى رسمية ضدها مابي مشاكل ..ولا أبي أضرها بشيء .

بالله وش أسوي .. شوروا علي ..

هل أترك شغلي كاملا ( على الرغم ان البحث عن وظيفة صعب جدا )

أو أصبر وأسكت عن الظلم اللي أتعرض له ؟!!

[υм вtℓαα]

مديرتك ماتعدل بالحق
المفروض تكلمها بس الاغلب يمكن تعرفها او داخله بواسطتها لهيك مطنشه العالم وحاطه الغياب بجيبها

وانتي من البدايه المفروض رفضتي لاقالت كملي الشغل عني يعني وش الفايده تتعبين وهي مرتاحه وتاخذ راتب ماتحلله حرام

اذا انتي مرتاحه بعملك قدمي شكوى ياتداوم والا تتفنش يعني مايصير الظلم لابد من المساواه بين الجميع

واذا ماهي قد الشغل ليش تتوظف لاالمتزوجه ولاالعزبه كلن عندها اشغالها بس الواحد يقدر ظروف الثاني ويساعده مويتكل عليه بكل شي

انتي اذا منتي بحاجه الوظيفه ومستغنيه عنها اطلعي منها واذا تبينها ومرتاحه فيها قدمي شكوى يعني الموظفات الاخريات مايشوفن ويعدلن بالحق ع الاقل يقولون الحق

الله يسخر لك كل خير ويوفقك يارب

[المحتارة=(]

أختي أم بتلاء .. شكرا لردك

المفروض تكلمها بس الاغلب يمكن تعرفها او داخله بواسطتها لهيك مطنشه العالم وحاطه الغياب بجيبها

لا ما معها واسطة أو معرفة .. لأني موجودة من تأسيس الشركة ماش فت هالشيء أبد للأمانة

وانتي من البدايه المفروض رفضتي لاقالت كملي الشغل عني يعني وش الفايده تتعبين وهي مرتاحه وتاخذ راتب ماتحلله حرام

ما اقدر أرفض .. لأن مهامنا وحده لا يمكن تنفصل ..

يعني لو ما أنجزت مهامها أعتبر ما أنجزت مهامي أنا

أنا خطأي وأعترف اني سكت عليها من البداية .. بس ما توقعت انها انسانة استغلالية من الدرجة الأولى !!

اذا انتي مرتاحه بعملك قدمي شكوى ياتداوم والا تتفنش يعني مايصير الظلم لابد من المساواه بين الجميع

نتي اذا منتي بحاجه الوظيفه ومستغنيه عنها اطلعي منها واذا تبينها ومرتاحه فيها قدمي شكوى يعني الموظفات الاخريات مايشوفن ويعدلن بالحق ع الاقل يقولون الحق

أنا مرتاحة بكلش ما عدا وجود زميلتي هذي معي واستغلاليتها لي !

أنا فعلا محتاجة لوظيفتي .. هي مصدر رزقي وتسليتي

ودي أقدم شكوى .. بس بدخل بمشاكل .. وأنا مابي المشاكل ولا أحبها

ولما طلبت نقل عشان أبتعد عنها بدون مشاكل .. قوبل طلبي بالرفض !!

زميلاتي ما يعرفون حجم المشكلة والتعب اللي أعانيه ..

أولا لأن محد ماسك ألا أنا وهي بس

ثانيا .. هي معهم كله تتشكى .. ولدي مريض .. أنا مريضة .. زوجي عسر بالتعامل !!

هي كانت معي جذي كله تتشكى .. بس يوم شفت استغلاليتها صرت ما أسمع لها

فصارت تتشكى عند زميلاتي .. وطبعا يصدقونها .. وأطلع أنا الغلطانة بنظرهم !!!

[jojo 123456]

الحل سهلاا جداااا ان تخبري الادارة بتقاااسم المهاام بينك وبين زميلتك مثلاا انتي الصادرات وهي الواردات او العكس
مشاان كل حدا يتحمل مسؤوليتو ويحلل رزقو

[أم مـــاريا]

صحيح المفروض ينقسم الشغل عشان اذا وحده قصرت تتحاسب
اما اذا كان الشغل مخلوط كذا ظلم


حسافه تتركين الوظيفه
هذا انا تركت وظيفتي و ندمت
كملي و الا ماتلاقي حل


و صحيح ماتخلينها بمشاكل
تكلمي باالعقل و اقنعي مديرتك و اللي فوق مديرتك
و اكيد راح تلاقي احد يسمع لك و ينفذ مطالبك






باالتوفيق

[fofa21]

لو بتتركين وظيفتك الي هي رزقك ومكسبك وخبرتك وتسليتك وقيمتك .. !! من اجلها كذا رح تكوني ضعيفه بنظر نفسك ونظر الادارة

لو حابه تنقلي لشركة ثانيه انقلي لكن استقالة لاتستقيلين

انا من راايي تقابلينها برا الشركه في كافيه او مطعم وتتكلمين معها بهدوء وخليكي ذكية واحشريها بزاويه يعني اكيد بتقولك زوجي و ولدي .. انتي قوليلها امي فيها واختي فيها ههههه استغفرالله حطي اي عذر عشان تسكتين لسانها وصارحيها انك متضايقة انك تتحملي مسؤولية غيابها وقوليلها انتي لما تجي حضري نفسك لاعاد ترسليلي وتدخليني بمشاكل عطيها عالوووووجه لانه فيه ناس مايجون بالطيبه ... طبعا هاذا كله برا الشركه اوووكيه
ومديرتك لاعاد تتشكين لها هالنوعيه هاذي لو تبوسين رجلها ماتغير رايها وتستمر في مصالحها ومصالح الشركة ف لا تخسرين وظيفتك ومكانتك عشانها واعملي وماعليك منها اكسبي خبرة عالاقل

[المحتارة=(]

المشاركة الأصلية كتبت بواسطة jojo 123456

الحل سهلاا جداااا ان تخبري الادارة بتقاااسم المهاام بينك وبين زميلتك مثلاا انتي الصادرات وهي الواردات او العكس
مشاان كل حدا يتحمل مسؤوليتو ويحلل رزقو

شكرا أختي جوجو على ردك

المشكلة ان نظام الصادر والوارد كلها مرتبطة بادخال البيانات .. لا يمكن ينفصلوا

ولآأنا حاولت أفصلهم

جميعا مرتبطة بالحاسب وبدقة البيانات المدخلة ..

لو خطأ حصل بنتحمل كلنا أنا وهي

لكن بيغباتها .. صرت للسف أنا اللي اتحمل وأنا التقصير مني

أما هي يتعبرونها معذورة لأنها غايبة بظروفها !!!

[المحتارة=(]

المشاركة الأصلية كتبت بواسطة أم مـــاريا

صحيح المفروض ينقسم الشغل عشان اذا وحده قصرت تتحاسب
اما اذا كان الشغل مخلوط كذا ظلم


حسافه تتركين الوظيفه
هذا انا تركت وظيفتي و ندمت
كملي و الا ماتلاقي حل


و صحيح ماتخلينها بمشاكل
تكلمي باالعقل و اقنعي مديرتك و اللي فوق مديرتك
و اكيد راح تلاقي احد يسمع لك و ينفذ مطالبك






باالتوفيق

شكرا أم ماريا على ردك

حاولت أفصلهم وأقسم المهام .. لكن للأسف ما ينقسم ..

اي نعم .. كل الوظائف فيها مشاكل .. لكن صعب الواحد يتعرض لظلم ويسكت عن حقه .. مع اني منبهه بشرط ما تتضرر

ما أذري كيف أقنع مديرتي ؟

أنا ابي أبتعد عنها بدون مشاكل

ومديرتي رافضة !!!

[المحتارة=(]

المشاركة الأصلية كتبت بواسطة fofa21

لو بتتركين وظيفتك الي هي رزقك ومكسبك وخبرتك وتسليتك وقيمتك .. !! من اجلها كذا رح تكوني ضعيفه بنظر نفسك ونظر الادارة

لو حابه تنقلي لشركة ثانيه انقلي لكن استقالة لاتستقيلين

انا من راايي تقابلينها برا الشركه في كافيه او مطعم وتتكلمين معها بهدوء وخليكي ذكية واحشريها بزاويه يعني اكيد بتقولك زوجي و ولدي .. انتي قوليلها امي فيها واختي فيها ههههه استغفرالله حطي اي عذر عشان تسكتين لسانها وصارحيها انك متضايقة انك تتحملي مسؤولية غيابها وقوليلها انتي لما تجي حضري نفسك لاعاد ترسليلي وتدخليني بمشاكل عطيها عالوووووجه لانه فيه ناس مايجون بالطيبه ... طبعا هاذا كله برا الشركه اوووكيه
ومديرتك لاعاد تتشكين لها هالنوعيه هاذي لو تبوسين رجلها ماتغير رايها وتستمر في مصالحها ومصالح الشركة ف لا تخسرين وظيفتك ومكانتك عشانها واعملي وماعليك منها اكسبي خبرة عالاقل

شكرا أختي فوفو على الرد

كلامك صح .. هي من الأشخاص اللي لازم تعطينها بالوجه

بس للأسف لما لمحت لها بالبداية فاجأتني بردها انها متزوجة وعندها مسؤوليات وأنا لا !!

فبكذا أنا ما راعيتها ولا أحس فيها ولا بمشاكلها !!!

فوش أسوي معها

[زهرة ال]

حبيبتى انا حاسه فيكى ولو انتى فعلا عايزه ترتاحى وتريحى نفسك انسى انها معاكى اصلا لان مفيش حل غير كده وحتى لما تشتغلى الشغل كله لوحدك اعتبريها مش معاكى واذا كانت معاكى فى المكتب عامليها بحدود واليوم اللى تيجى فيه خليها تشتغل شغل كتير وقليلها انا بشيل كل الشغل لوحدى حاولى تشيلى شويه وقولى حسبى الله ونعم الوكيل ومن كلامك واضح انك ما بتاخدى اى اجازات حاولى تاخدى اجازه وخليها هيا تشيل شويه وفى حاله غيابك هيا مش هتقدر تغيب لان المديره مش هتسمح وربنا ماكى