بسم الله الرحمن الرحيم
اخواتي انا قررت أحكيلكم قصتي بعد ماحسيت اني تعبت مره وماني قادره افضفض لاي أحد
انا انسانه متزوجه من 3 سنوات والحمدلله سعيدة بزواجي,,حملت في أول سنة وجبت ولد زي القمر وعشت معاه احلى احساس وهو الامومه اللي كنت اتمناها من زمان..كل يوم كان ولدي يكبر قدامي ويصير احلى من اليوم اللي قبله ,مرت اول سنة وانا طايره من الفرحه لما اسمع ولدي يناديني (ما ما) سبحان الله انا وولدي اتعلقنا كثييير ببعض بالذات لاننا في بلد بعيد عن اهلي واهل زوجي وكان دايما زوجي مشغول بعمله وكنت طول اليوم مع حبيبي الغالي(ولدي) لين اراد الله واشتغلت وكنت اخذ ابني معايا وكانت الامور على مايرام,,لين جا هذاك اليوم اللي رحت فيه للعمل بعد مالبست واتتشيكت طبعا لان المكان نسائي ومانسيت ابني بالتأكيد لبسته احلى لبس وعطرته وخليته زي العريس ماشاءالله ورحنا العمل كالعاده,,
ساعات قليله مرت وحصل حادث مفاجيء في مكان العمل وماصار الا على ابني للي كان في حضني طول الوقت وماقام من عندي اللي هذيك الثواني اللي فصلت بين حياته وموته....مات ابني فجأه
قدام عيني
خرجته من البيت بكامل عافيته وفجأه القاه بين يديني ميت
مات كل شي في لحظه
روحي طلعت بس للأسف ظل الجسد واقف ينظر للموقف بذهول
صرخت لين حسيت صوتي وصل للسماء بس ابني اللي بين ايديني ماسمع
الحمدلله على كل حال ,تخيلوكنت جالسه اجهز لحفل يوم ميلاده الثاني اللي كان المفروض بعد اربع شهور من هذاك اليوم بس ارادة ربي سبقت كل شي..
رحت لاهلي وظليت عندهم اكثر من شهر ورجعت البيت (زوجي أستأجر بيت ثاني) وانا موحاسه اي شي وكاني فقدت الاحساس باي حاجه حولي
قفلت على نفسي وكرهت كل شي لكن ظلو صديقاتي في العمل اللي ماتركوني ولا لحظه يتصلو ويتواصلو معايا ويجوني كل شويه لانهم عارفين اني وحدانيه في هذا البلد وماعندي احد بعد الله الا زوجي وهم
رجعت للعمل بعد فتره طويله وانا كارهة لكن تعبت نفسيتي من البيت والوحده لان زوجي طول اليوم برا بحكم عمله وقررت ارجع العمل بعد ماحسيت ان الوحده حتقتلني
رجعت وصحباتي ماقصرو وقفو جنبي وحسسوني بالامان وبدأت نفسيتي تتحسن برغم اني لسه مازلت ماني قادره أتأقلم مع الوضع لكن الحمدلله على كل حال صرت على الاقل اضيع وقتي بدل الوحده المره والحياه اللي تغيرت واصبحت موحشه وكلها تخيلات واحلام بشعه
مشكلتي بعد هذا كله ان الناس ماهي راحمتني من السنتهم..والله اتكلمو عليه كلام بشع ماادري ليش (قالو اني أم مهمله واني انا السبب في موت ابني واني انا قتلته واني مااستحق اكون أم)
ليش هذا كله ماادري والله..؟
تعبت والله فوق تعبي,,وصرت ابكي طول اليوم وماعاد اتحمل شي ولا اتحمل نظرات من اي احد..اي تجمع اروحه الاقي الناس يهاجموني باسالتهم واتهاماتهم الغير مباشره وكل ماالتفت على ناس الاقيهم يأشرو عليه ويتكلمو عني
سؤالي ليش؟انا ايش سويت؟ مو كفايه اللي انا فيه؟هذا وقفتكم جنبي؟لاحول ولاقوة الا بالله.