برنامج للنفاس, خلطات للنفاس, جدول للنفاس,نظام سهل للنفاس

[عزيزة النفس]

برنامج للنفاس, خلطات للنفاس, جدول للنفاس برنامج للنفاس, خلطات للنفاس, جدول للنفاس,نظام سهل للنفاس برنامج للنفاس, خلطات للنفاس, جدول للنفاس,نظام سهل للنفاس

السلام عليكم ورحمة الله وبركاته
بعد البحث الطويل لقيت لكم هالموضوع عن خلطات النفاس وبتجربه منقوله لالحرف الواحد اتمنى تفيدكم:

هذا هو النظام بسيييييييييط وخفيييييف مو زي النظامات الثانيه
والله خواتي يطلعون صحتهم ممتاااازه وماعندهم مشاكل لا فوق ولا تحت كله بفضل الله عزوجل

عاد يابنات سمعت كثار يقولون انهم يشترون من حاريم خلطات النفاس اللي بـ600 واللي بـ1000
وهي ماتجي الا تقريبا 50 ريال والله حرام هالاستغلال

عاد اخذت من امي نظامها اللي تسويه لخواتي ... واللي كانت تسويه لنفسها قبل خواتي والحمدلله وش ملح خواتي وامي..



علبتين فاضيات مثل حجم علب حليب الأطفال
العلبه الاولى للحلبه , والعلبه الثانية خلطه مع الرشاد..
وعلبة ثالثه لكن صغيره...

- لتحضير الحلب :
الحلبة مقدار كثير تقريبا قد العلبة الفاضية + قبضة يد كمون + قبضة يد يانسون + قبضة يد سكر نبات + قبضة يد حبة البركة ....
كلهم يطحنون إلا حبة البركه ... يخلطون مع بعض وحطيهم في العلبه .

- لتحضير الرشاد :
رشاد مقداربسيط + قبضة يد كمون + قبضة يد يانسون + قبضة يد سكر نبات + قبضة يد حبة البركة ....
كلهم يطحنون إلا حبة البركه ... يخلطون مع بعض وحطيهم في العلبه .



- العلبه الصغيره :
يوضع فيها مقدار متساوي ولازم يكونون حب بدون طحن من (رشاد + حبة البركة) ..
هذي للأيام الخمس الأخيرة من النفاس يوخذ منها مقدار ملعقة وسط ملعقة الحلى وتبلع قبل النوم ..
--------------------------------

الفطور:
طحينه تقطع مربعات وكوليها + قهوة بدال الهيل حطي قرنفل ويسمى مسمار او عويدي + تمر معجون فية شوي من خليط الحلبه اللي بالعلبة تعجنينها كويس وتأكلين منه تقريباً 7 كور صغيرة تكورينها بشوي سمن عشان ماتتلصق بيدك.
اذا خلصتي متقهويه تجهزين الفطور ..

كاس حليب بالحلبه
2 بيضة مسلوقة
قرص (خبز الزيت)

* طريقة الحليب :
تطبخين شوي حلب بماء لين يصير لونه اصفر بعدين تصفينه
وتحطين نص الكأس حلب والباقي ماء وملعقة سكر على حسب الرغبة و 3 ملاعق حليب جافه وتحرك كويس.

* القرص:
تأخذين مرتين مقدار قبضتين بيدك دقيق بر
وتحطين ملعقة وسط من الحلب المطحون عجنيها كويس بشوي مويه وخليها تتخمر 5 دقايق
بعدين تجيبين المقلي وتحطين فيها شوي سمن وتكونين فارده القرص البر بيدك فرد مو مره وحطيها كلها فيالمقلى وخليها على النار لين يتحمر ويستوي كل الوجهين حاولي تثقبينها بالشوكه بكل مكان عشان يدخل فية السمن.
اذا استوت من كل الجهتين وحطيتيها في الصحن ادهنيها بملعقة عسل وبالعافيه.
---------------------------

الغداء :
مرق دجاج مع قطع دجاج يسلق الدجاج ويوضع فيه ملح وبهارات وماجي.
اذا حبيتي تحطين بطاطس وقرع على حسب اللي تبين وكاس صغير حطي فيه عصير منجا وملعقة صغيرة من الحلب احركيها وشربيها اذا خلصتي متغديه
كولي موز + تفاح ... المهم تأكلين فواكه . وبالعافية .

-------------------------
العشاء :
مرقوق باللحم الغنم أو حاشي او بعير المهم يكون باللحم الاحمر
كاس عصير منجا مخلوط فيه حلبه مقدار ملعقة وسط .. (الكأس هنا الصغير كاس الجبن)
تفاح + موز اللي تشتهين من الفواكه ..


استمري على الطريقة هذي 20 يوم بس ...
-----------------------


أما الـ 15 يوم الأخيرات نبداء بالرشاد ...
نفس النظام بس استبدلي الحلبه بالرشاد المطحون وكاس الحلبه وقفيه واشربي حليب عادي بدون شيء ..

والقرص اخلطي معه رشاد بدال الحلبة وعصير المنجا اخلطي فيه رشاد بدااااال الحلبه .

---------------------------

أما الـ 5 الايام الاخيره الباقيه ...
وقفي كل شي وكولي اللي تبين عادي اذا جيتي تنامين كولي ملعقه صغيره حب (رشاد + حبه سوداء) ... اللي خلطناه في العلبه الصغيره ..

العصر :
تقهوي عادي قهوة قرنفل اللي هو مسمار .... وسوي قرفة واشربيها بدل الشاي.

الكبو عادي اذا حسيتي بهواء أو وجع بالارحام تكبي...
الكبو :
( قشور بصل احمر + حب كمون + مره + حب حبة البركه )
قشور البصل حاولي تفتفتينه وتخلطينهم مع بعض وتحطينهم في علبه كل مابغيتي تتكبين تاخذين مقدار اللي تبين وتحطينه على جمره وتتكبين بالدخان من تحت على المنطقه على الاقل من 10 – 15 دقيقه ...
تلبسين سروال طويل قطني وشراب ولابد تدفيييين ولا يقربك هواء او براد

الشراب ماينشالون عن الرجلين ابد ولا حتى البنطلون...

اما المنطقه اللي تحط امي ماتحب الاعشاب للمنطقه اللي تحت ... تقول اللي تحت لازم نستخدم لها اللي يصرفونه لنا المستشفى من غسول وكريم
وصدق خواتي يارب لك الحمد والمنه ماشاء الله تبارك الله ... مايشتكون من شيء
يستعملون الغسول طبي وكريم ميبو اللي تصرفهم لهم الدكتوره اول مايطلعون من المستشفى

وبس
------------------
االاراء حول البرنامج:

احنا بالنسبه للقهوه نستبدل ( البن ) بقشر القهوة يقولون احسن للنفاس

نظامها جيد لكن ناقص اشياء احسها مهمة ..

وشي ثاني .. الموز والمنجا ما تصلح للنفاس نهائي

الله يخليلكم الوالدة ويجعلكم بارين فيها ياارب

نفس نظام امي تقريبا
بس ماما ما تطحن الرشاد

والخلطه ( رشاد + حبة البركه ) بسويها باخر النفاس


ممتاز وربي يسعدك ويوفقك ب
س احذر كم من المنجى والبيض والموز اللي عندها التهابات وفطريات او اكزيما من الحمل لازم تعالجها قبل
لانها من المهيجات للاكزيما والحساسيه


الله يخلي لكم الوالده ويطول بعمرهاا عالطاعه..
بس مهليش فيه ملاحظه...
الموز والمنجاا ماتصلح ابدا"...للنفاس
وماجابت امك سيره الفلفل الاسود والكمون بالاكل

مشكورة بس الموز والمنجا مايصلح للنفاس

يعطيك العافيه الغاليه
ملاحظه الرشاد مايطحن اوكيه
لانه يسسب تصفط للرحم
والموزمش كويس للنفاس يسبب خراب وخوذي العلم مني

الله يعطيك العافيه
موز ومانجا

ماتجى ابدا بالنفاس


ماتجى

الموز والمنجا مو زين للنفااااس

ووين الفلفل الاسود والابيض ماشوفك ذكرتيه وكمان عصيدة التمر مهمه

منقوووووووووووووووووووووووووووووووول

[ام مهداوي]

سلمت يمناك موضوع جدا جميل

[رونق الروح]

مشكووورة بارك الله فييييييييييييييييييك

[ام سلطااان]

يعطيك العافية

[اللهم لك الحمد]

يوووووووووووووه وانا اكل موز وعصير منقا لاااحول

شكرا ع التنبيه

[ارجوانا]

معلومات حلووووه

[عشوقة]

حلوووووووووووووووووو مرررررررررررررره