مخنوووقه

[loolito]

مساء الخير عالغاليين

بنات انا هذا اول موضوع لي بالمنتدى واعذروني ان خاني التعبير في بعض الكلام بس والله مو عارفه من وين ابدأ وبحاول اختصر .. انا متزوجه من سنه ونص تقريبا وزوجي والله مافيه منه احبه وهوا يحبني كمان .. والله يابنات ما اكذب عليكم اذا قلت انه مافي مشاكل بينا ووايد متفاهمين واذا صارت مشكله تنحل بوقتها وننساها والحمدلله وايد مرتاحين مع بعض بس مشكلتي هيا اهلي وبالاخص امي .. امي من النوع الغيور على بناتها يعني مثلا اذا شافتني رحت زياره على بيت اهل زوجي تغار وتبين انها متضايقه تبيني دايما عندها مع اني والله ما اقصر واحاول دايما ارضيها احنا اول ما سكنا بيتنا قريب من بيت اهلي اول فتره من زواجنا كانت امي كل ماتطلب مني شي اقلها لبيك وزوجي كان يقلي هاي امك وحقها عليكي وماكان يعترض ابدا .. امي من النوع الي طلباتها كثيره دايما تبي اغراض من السوق وكانت اول فتره اطلع معاها دايما تتصل فيا وتقي تعالي وزوجي كان يسكت مع انه مايحب اني اطلع كل يوم وكانت امي شبه يومي تطلعني.. مع الوقت صار يتضايق وانا بعد صرت اتضايق لاني ما احب اطلع واتركه بالبيت لحاله خصوصا انه هوا بيتوتي ومايطلع غير مره او مرتين بالاسبوع مع صاحبه ومايغيب بالكثير ساعتين ويرجع .. الحين بدت المشاكل وانه يتضايق من كثر طلعاتي والله معاه حق بس ما اقدر اقول حق امي لا ومجرد يا بنات يوم اعتذر هيا تضايق وتسير تقول انا ما اراعيها وهي دايما تحسسني انه زوجي مقصر معاهم ..مع انهم كثير ضروه وماكان يقول شي ويسكت بس عشان خاطري ولمن احاول اكلمها تعصب علي ليش ادافع عنه ضدهم مع اني والله اوقف مع الحق ومو عشانه .. اخر شي صار انه من ساعه اتصلت امي وبتروح تستقبل اختي بالمطار بكره وقالتلي تعالي معاي فقلت حق زوجي وعصب وقلي مو كل مشوار لازم تروحينه خليها تعتمد على حالها ( مع العلم انه امي مب مره كبيره كثير يعني تروح وتيجي لحالها عادي ) وحنا على اخر الشهر بننتقل من البيت وبنبعد عنهم ومايسير كل شوي تطلعين لعندهم لانه المشوار مو قريب كثير وقلتله معلش عشان المطار زحمه ومايسير تروح لحالها هوا عصب ودخل الغرفه وبس رحت احاول ادلعه وابين انه الموضوع عادي صدني وقلي ماتكلميني اليوم مو طايق اتكلم ونام واهوا متضايق ونفس الوقت انا تضايقت لانه قلي هاد الكلام انا وش ذنبي حاسه حالي بين نارين رضاه ورضا امي ومو عارفه شو اسوي
اعرف والله طولت عليكم بس جد متضايقه من هالموضوع مو عارفه شو اخرته :(
تحياتي لكم

[rose]

حبيبتي امك بينيلها قوليلها انا مستعدة اطلللللللع معاكي بيوم زيارتي لك
يعني لو تبيني اكررررف معاك باوقات زيارتي ماراح اقصر
بس زي ما انت لك حقوووووووووق زوجي له حقوق
ومايباني اطلللللللع
ومعليش اتحملي شوي انتي راح تنقلي وراح تجي بظروفها بس بشويش فهميها
وقوليلها انا مبسوطة معاه وماهو مقصر معاي
بس فيه عيب واحد مايبيني اطلع كتير
والمفروض انك تنبسكي ان زوجي يباني معاه دايما ولا يخرجج وبينيلها انه لو تركتيه ممكن يتعود يغيب مع اصحابه والاستراحات وووو
تعاليلها بشويش وربي يصلح حالك

[ياويل حاااالي]

حبيبتي رضا الام واججب بس مو في كل الحالات ..
يعني اليوم اللي زوجك راضي فيه تطلعين مع امك اطلعي واذا مو راضي لاتجبرين نفسك ولا زوجك بعدين تصير لك مشااكل كثيره ...
بـ آستاطعتك تتعذرين لـ آمك بـ آن زوجك مو راضي آو آنك مشغوله آو تعبآنه لآقدر الله ولآزعلت عليك روحي لها في اليوم اللي سامح لك زوجك تروحين بوسي راسها واعتذري وفهميها اوضاعك صعبه تفضلين اوامر امك على اوامر زوجك ..
يعني المفروض امك ماتتضايق وتحمد ربها انها تشوفكك وقريبه منها غيرك وربي الباب جنب الباب ولايرضى لها زوجها تروح تشوف آمها..
خليها تزعل كل مره وراضيها الين تتعود على الوضع ويصير عادي آنتي الحين خلاص صرتي ملك زوجك مو ملك امك ...

الله يسهل عليك ياقلبي واعذريني طولتها عليك..

[●•• ShąhǿǾǿĎ ••●]

شوفي نصيحه مدام انه زوجج بيتوتي لاتخلينه بروحه باجر بيتعود على غيابج والقعده بروحه وبيدوورر شي يسليه والله والله انا قبل زوجي ماكان يطلع من البيت عاد اختج فالله انا قمت اخليه بالبيت واطلع بيت اهلي لين مل وصار الحين وايد يفكر بطلعات وبالربع ولا اذا بدا موسم المخيمات يطلع من المغرب مايرد لي ثاني يوم الصبح والحين والله ندمت وقاعده احاول على طول اكون معاه ولا اخليه بروحه ماتدرين شنو ممكن يصير امج زيارتها لها وقت مولازم كل مشوار انت معاها زوجج معاه حق يعني مثلا مشوار المطار ماله داعي تروحين دام انه امج تقدر تروح بروحها كلميها مردها بتتفهم الوضع وتتقبل انج الحين مو حقها بروحها

هذا رايي واتمنى تسمعين نصيحتي لني حاسه فيج ومريت بالوضع بس تحسفت والله على الوقت الي كنت اخليه بروحه دييييييري بالج يابنت الحلال لاااا يتغير طبع زوجج والله ويلاقيله شي يسليه غير قعدته معاج بالبيت

[أسميه]

حبيبتي شوفي ... ممكن الفكره شوي مجنونه
اطلبي من زوجك بس يوم واحد تروحين لامك وخذي شنطتك وروحي لها وقولي تزاعلنا وقولي بعيد الشر احتمال يعرس (يعني كذا خليها تخاف عليك )
واكيد امك تحبك وما تبي خراب بيتك وراح ترجعك ... الا اذا كانت راح تفتح سيره جديده فخلي اخواتك او خالاتك يكلمونها ويفهمونه انو ممكن تتسبب لك في مشاكل
والله يهديها .. ويعينك الام غاليه والزوج بعد غالي

[loolito]

مشكووووورين كثير يالغالين والله ريحتوني بكلامكم ومالي غيركم اشكيله همي وفعلا كلامكم صح لازم ادير بالي على زوجي اكثر ومن ناحيه امي والله حاولت معها بكل الطرق حاولت اني اقولها زوجي مايرضى فصارت ماتحبه هوا ودايما متضايقه منه وانا ما احب انها تكون شايله عليه فصرت دايما لمن ما اطلع اقولها انا السبب يعني تعبانه ولا وراي مشوار .. وحاولت مره رفضت قلتلها بدي اطلع اتغدا مع زوجي ويمكن نطول كانت ايامها بتسافر وتبي اغراض من الجمعيه وبس رحنا بليل نودعهم صارت تقلي انا مو كل يوم احتاجك وانا مسافره المفروض يتحمل هاليوم قلتلها اهو يمل من قعده البيت بروحه خصوصا كنت قبلها بيوم اصلا طالعه معها وايامها بعد زوجي عصب لانه قبل بيوم كنت واياها ليش ماجابت كل الاغراض ومارضي اني اطلعه وانا بعد ماكنت ابي .. ومره حاولت اكلمها واقلها انتي ليش تشيلين عليه عالعلم اختي الكبيره متزوجه بس مو عنا بنفس الديره فلانهم بعاد دايما شايفتهم ملاك ودايما تقارن بين زوجي وبين زوج اختي وقلتلها مافي مقارنه اصلا لانه زوج اختي انتي ماعاشرتيه اصلا وكل شخص له عيوبه وتجادلنا كثير بس والله كان جدال عميق .. وبصراحه انا احمل نفسي المسؤوليه لانه احنا بس 3 بنات وحده متزوجه بره الديره والثانيه بعد تدرس بره الديره يعني مافي غيري الي عندهم عشان هيك احس اني انا المسؤوله عليهم :(

انا الحين بحاول اخفف طلعاتي معها وخلص وقت الزياره اسوي الي تبي وعندي امل انه بس ننقل تخف هاي الامور عشان بنبعد يمكن تبطل تطلبني .. والله لو تعرفون انه زوجي بس قرر انه ننقل من البيت بس عشان هالموضوع يقلي انا اكبر غلطه اني قربت عليهم ولا المفروض ابعد تحلا ونبعد عن المشاكل والله المستعان
سامحوني ان طولت بس والله من خنقتي ومو هاين علي زعله والله وخصوصا اني عارفه معاه الحق

[احلى من العسل]

الله يعينك وزي ماقلت الاخت اسميه خلي احد من قرايببها ويكون شخص يمون عليها ويكلمها تخف عنك الطلبات حتى لاتتسبب بخراب بيتك بحيث لاتعلم هي انك انتي الي مرسله هذا الشخص عشان ماتعاند وتزعل منك انشالله وصلت الفكره

[جريحة المحبه]

زوجك جنتك ونارك حاولي تجمعين بين رضا امك ورضا زوجك

والله ييسر لك

[loolito]

تسلمونلي حبيابتي والله ماقصرتوا معاي .. وانا قلت خلاص بحاول الحين اخفف واشوف اخر الشهر لمن ننقل حتضل هاي العاده عندها ولالا اذا حسيتها لسا بكلم احد يحاول معها او انا بحاول اتكلم معها مافي غير هاي الطريقه
مشكوررررين يالغاليات