قصتي مع الدورة الشهرية والاعراض التي جاتني بالفترة الاخيرة

[Raheefa]

السلام عليكم اخواتي الكرام

اخباركم

انا مسجلة من قبل شهر وشوي واشوف المواضيع من زمان حتى قبل ما اسجل

بس جيت اليوم اخبركم شنو سالفتي

انا دورتي من لما جاتني وانا عمري 12 او 13سنة بحياتي ماكانت منتظمة ولاعمرها انتظمت ..

يعني مرة كانت تجيني 20 يوم .. ومرة 15.. الله يكرمكم مثل النزيف

ومرات تغيب شهر او شهرين او ثلاثة .. وهذي حركاتها

المهم..

مرة من المرات بسنة 2009 باشهرها الاولى وقتها كان عمري 18 .. اخذتني امي على عيادة تسوي لي فحص بالسونار على رحمي .. كان اللي يفحص رجال .. يعني بس يشوف التلفزيون ويغض النظر عن الحرمة .. والممرضة تحرك السونار.. لذلك ما وراني ولاشفت شنو برحمي ..

بعد ذلك .. طلعت النتيجة بوجود تكيسات بالرحم.. طبعا انا ماستوعبت شنو هذا ولا فكرت ابحث عنه.. ولاهتميت

والوصفة كانت .. اني اشرب لمدة 3 شهور متواصلة حبوب منع الحمل .. يعني اشربها لمدة 21 واتركها .. وارجع بعد كم يوم اشربها 21 واتركها .. ونفس الحركة للشهر الثالث 21 يوم .

انا بديت اشربها في الشهر الاول .. وحصلت نتيجة (الله يعزكم) صارت تنزل علي قطع كثييييرة حمرة بالدورة الشهرية .. وصارت بس لمدة 7 ايام او 8 ايام مدتها..

بعد ماخلص حبوب للشهر الاول .. راجعت الصيدلية .. وعطوني حبوب منع الحمل .. قيل بانه نفس الاول .. ولكن هذا كان مختلف .. بديت اشربه يوم يومين ثلاثة .. بدت اثار جانبية تظهر لي .. حبوب بجسمي وحكة.. وقتها امتنعت عن شربه .. لسببين الاول للاثار الجانبية اما السبب الثاني لتخوفي من حبوب منع الحمل لاضرارها وخصوصا للذي لم تنجب سابقا تسبب عقم ..

قلت انا بنية سنة سنتين راح اتزوج .. ومابغي هالحبوب .. وطبعا اذا الشي مو مقتنعه فيه لاتسويه ..

المهم بعد شربي لهذا الدواء الذي لم يتجاوز 24 حبة .. الدورة ماصارت تجيني بنزيف .. صحيح انها ماكانت تجي كل شهر .. بس حمدت ربي انه النزيف وقف عني..

1\ 12\2009 جاتني الدورة .. بعد شهرين من انقطاعها

وبعدها تمت خطبتي في هذا الشهر

وجاتني بتاريخ 22\1\2010

و شهر 2 انقطعت

وبعدين جاتني حوالي 28\3\2010

وبعدها حوالي بتاريخ 27\4\2010 هم جتني

طبعا انا فكرت قلت لازم اشوف لي حل .. انا مخطوبة وباجر اتزوج والرجال يبي عيال ..

المهم بعد شهر 4

انقطعت عني 3 شهور يعني ماجاتني شهر 5 ولا 6 ولا 7

اخذت موعد على اخصائية نساء وحمل وولادة ..

فحصتني بالسونار .. ورتني الرحم والمبايض والتكيسات

وقالت لي ترى رحمك على وراء شوي (يعني ميلان قليل)

ومثانتك صغيرة ( لاني قلت لها كمان اني اتبول كثير واعطش كثير واشرب ماي كثير كل يوم حوالي 3 لتر او اكثر)(ذكروا الله) عشان جذي ماتحمل مثانتي سوائل كثير ومجرد شربي كوب ماء واحد فقط يخليني اتحصر واروح الحمام (اعزكم الله)

ووصفت لي حبوب تخلي الدورة تجي .. ونزلت بعد 3 شهور ونص من انقطاعها

وكمان وصفت لي حبوب سكر اسمه "كلوكوفاج" لتنزيل التكيس واشربه مرتين في اليوم

وكان وقتها دخلنا على شهر رمضان.

المهم معروف عن حبوب السكر هذا قوته واثاره الكبيرة .. لدرجة انو مرضى السكر مايقبلون يشربونه .. فشلون انا مافيني سكر وجيت اشربه

شربته لمدة خمسة ايام بالضبط اي 10 حبات .. وعند شرب الحبة العاشرة .. صعبت حالتي .. واسترقدت في المستوصف لساعات.. وكانت اثاره ظاهرة علي من خلال شحوب وجهي كانه رقعة قماش اصفر واسوداد شفتاي وانغراز عيوني.. وكانني قد استرجعت روحي للتو

امتنعت بعدها عن شربه

وتوجهت للاخصائية مرة اخرى ووصفت لي حبوب سكر اخف حده من الاول وهو الدايمت 500 واشربه حبة واحده كل يوم في شهر رمضان وذلك لتاثري من هذه الادوية والصوم طيلة النهار .. وبعدها استمريت عليه حتى بعد شهر رمضان ..

المهم اجتني الدورة بعد ذلك تاريخ 5\9 \ 2010 واستمرت لمدة 7 ايام حسبما اذكر

وبعد ذلك وصفت لي الأخصائية حبوب الكلوميد والدفستون ..

طبعا انا قلت لها انو ماراح اشرب حبوب الكلوميد.

لذلك كان من المتوجب علي شرب حبوب لتنزيل الدورة "الدفستون" في نهاية الشهر 9 ولكني لانشغالي في تجهيزات الزفاف نسيت شربه.. حيث كان زفافي بتاريخ 27\9\2010

لذلك تاخرت علي ومانزلت الا بتاريخ 17\10\2010

قلت انا لازم اشرب الحبوب الدفستون ابيها تنزل كل شهر

واستمريت اشربه وجاتني تاريخ 14\11\2010 في كلا الشهرين 10 و11 .. كانت الدورة تنزل 7 ايام او 8 ايام بشكل طبيعي .. بدون الشعور باي اعراض جانبية..

لذلك فرحت ورجعت اشرب الدفستون بعدها جاتني تاريخ 13\12\2010 بس كانت هذي الدورة غريبة كيف؟؟؟ ..

اول يوم نزل علي احمر قليل جدا بحجم اقل من اصبع البنصر

ثاني يوم نزل بني ممزوج باحمر بشكل غريب كانه افراز بس كان كثير

ثالث يوم نزل بني شوي

رابع وخامس وسادس يوم ماكان ينزل في الفوطة اية شي بس لما امسح ..مرة اشوف افراز وردي ومرة اشوف افراز بني مصفر وهيك..

سابع يوم نزل علي احمر كثير شوي مرة وحده باليوم

وثامن يوم طهرت واغتسلت بتاريخ 20\12\2010

بس بتاريخ 27\12\2010 نزل علي دم واستمر لتاريخ 30\12 وكانما دورة شهرية ..لانو الدم كان كثير مرة

طبعا انا شكيت قلت يمكن صار حمل واجهضت .. وخصوصا انو بهالشهر كانت حاستي الشم مرة قوية .. بشم اشياء مايشمها احد جالس معي .. وكانت عندي لوعة اول مرة تجيني واستمرت ايام هالاشياء .. وغير هذا الالام المو طبيعي اللي برحمي ومبايضي وببطني .. كانه سكاكين تقطع بطني .. والم باعلى راسي وكان شي يضربني والدوران اللي كان مستمر براسي وحتى وانا جالسة بحس الدنيا تدور حولي ..

مع انو ماكنت افكر بالحمل ولا كنت رغبانة به كثير

قلت اروح اسوي تحاليل اشوف شالموضوع

باول مارحت عملت لي الدكتورة اربع تحاليل 2 تحليل ابوال و2 تحيل دم .. وصار انو كل شي طبيعي سكري طبيعي ودمي اوكي وماكو حمل ..

قلت لها اجل شنو افسر اللي فيني قالت بعمل تحليلين بعد .. 1 بول وهو لاستزراع البول الله يعزكم .. لاحتمال يكون عندي ترسبات او التهاب في البول وهو المسبب لالام البطن.. والثاني تحليل دم وهو لفحص مجموعة هرمونات ومن ضمنها هرمون الحمل ..

طبعا بعد كان كل شي طبيعي وحتى ضغطي طبيعي وهرمون الحمل صفر

المهم..

انا قلت ازور اخصائيتي واقول شالسالفة خصوصا انو اخر مرة زرتها في شهر رمضان الكريم..

زرتها بشهر 1\2011 .. لانه انقطعت علي مرة ثانية بهالشهر.. طبعا اول ماستقبلتني بخشة ماتبشر بخير.. وصارت ترفع صوتها علي ومنقهرة حيل ليش اني للحين ماشربت الكلوميد .. قلت لها انا بنت توني عمري 20 سنة وتوني متزوجة قبل كم شهر .. وماني مستعجلة ع الحمل .. وانا جد جد قريت كثير عن الكلوميد ومارتحت له .. وابي احمل طبيعي كذا من الله .. وخصوصا انو زوجي قالي لاتاخذين الكلوميد .. لانو صديقه قاله انه زوجته تعرضت للخطر منه..

طيب.. قالت لي اجل بعطيك حبوب تنظيم الدورة بروجلتون..

وقالت لي اول ماتنزل الدورة اشربيه خامس الدورة لمدة 21 يوم واستمر شهرين

بعدها قلت لها انو على طول عندي افرازات .. بشكل موطبيعي من زمان من سنوات عندي هالافرازات .. ويختلف لونها مرة ابيض ومرة اصفر .. عملت لي فحص عنق الرحم .. وطبعا من عصبيتها ومن قهرها مني .. دخلت لي الجهاز بقوة .. وبسرعه .. وخرجت من عندها بالام كثيرة جدا .. لدرجة صار عندي صعوبة بالمشي .. لعدم مراعاتها .. وقالت لي ماعندي التهاب ..

وقالت لي خذي موعد لبعد شهرين

طلعت من عندها وكرهتها وحرمت ازورها مرة ثانية

ولاحتى فكرت تعمل لي سونار مرة ثانية بالرحم

جلست انتظر الدورة تشرف .. ماشرفت شهر 1 .. بس جاتني بتاريخ 22\2\2011 .. وترددت اشرب الحبوب البروجلتون ..بس توكلت على الله وشربته من يوم خامس الدورة وانا مستمرة على الوصفة الاولى الحين

وطهرت واغتسلت بتاريخ 1\3\2011 .. المهم

انا الان بنهاية ايام التبويض

حدث اتصال 3 مرات .. مرة قبل التبويض بيوم

ومرة اول يوم تبويض ومرة ثالث يوم تبويض (الله يكرمكم)

بس بالمرة الاخيرة استغربت انو مانزل السائل بعد الجماع تماما ..

بعدها بيوم حسيت بالم ووخز خفيف مرة باليمين بالرحم ومرة باليسار .. وطبعا مختلف عن الاوجاع اللي شعرتها سابقا ..

والحين زوجي سافر اللي يرده بالسلامة قولوا امين

ويوم الخميس وهو اليوم اللي بيسافر فيه .. اول ماصحيت حسيت بظهري ابد مو قادرة احركه .. ومع الحركة زاد الالم.. لدرجة انو حدث له تيبس ولم استطع ان اثني ظهري .. وهذا الالم اول مرة يجيني ..

الم ماقدر اوصفه .. احس عظام ظهري راكبه على بعض وتحتك ببعض مع الحركة ..

دلكتني امي امس واليوم ولازال الالم لا يذهب ابدا ..

لا اعلم ماسبب الوخز الجديد في رحمي .. وماسبب هذا الالم الشديد الذي في ظهري .. وايضا صدري صار كبير وخشن والم خفيف عند الضغط عليه

ادري طولت عليكم بقصتي .. بس انا حبيتكم من قلبي يااخواتي وحبيتكم تعرفون وش سالفتي ..

بغيت اسال بالاخر .. ممكن يكون هذا الالم بالظهر والوخز بالمبايض علامات مبكرة للحمل ؟؟ والا علامات تبويض

مع انو مستبعدة الحمل مدري ليه .. بس خاطري واتمنى الله يرزقني

وحبيت استفسر .. ممكن التكيسات تاخر الحمل؟؟ .. وممكن الميلان بالرحم ياخر الحمل؟؟؟ واعتقد الميلان درجة اولى يعني بسيط

نسيت اقولكم ان هالشهرين .. صارت تنزل معي افرازات كثير سائلة مائية صافية مالها لون واول مرة تنزل معي .. بالعادة او اصفر والا ابيض ثخين..

اريد ان احمل من دون منشطات ولا ابر .. فاملي كبير عند الله .. عموما انا وقفت من شهر 1 حبوب الدايمت ماحسيت استفيد منو

اسفة مرة ثانية طولت عليكم .. واللي تزروني هنا .. على الاقل تبارك الموضوع بدعواتها للمتمنيات الحمل..

ولا تحرموني من آرائكم..

سلام عليكم

[سموة المشاعر]

الله يرجعه لج بالسلامه ياااارب
يااعمري شكلج تعذبتي مع دكتورتج احسن لج غيريهااا من الحين حقدت عليهااا من تصرفاتهااا<<<<
انا ماعندي فكره بس ان شاء الله ربي يرزقج ويرزقني ويرزق كل من تمنت الحمل بالحمل السليم الثابت يارب ياكريم يارحيم يارحيم يارحيم

[Raheefa]

يسلمو حبيبتي .. يارب يسمع منك .. ويرزق كل محرومة

[سموة المشاعر]

آميــن يارب العالمين

[سوهان]

الله يعينك ويرجع لك زوجك سالم يارب العالمين

ماعندي فكره عن الموضوع ...

الله يرزقك ويرزق جميع المنتظراات للحمل ياارب العالمين

بودي اشوف جميع المواضيع تبريكات للحمل قولوا اميييين

[أصااايل]

الله يرزقك ويرزقنا اجمعين انه على كل شيء قدير

[احب سمينا]

الله يرزقك ويرزق كل محرومه آآآآآآآآآآآآآآآآآآآآآآآآآآآآآآآآآآآآآآآآآآآآمين

[الحلم الضايع]

حبيبتي اولا الله يشفيك ويعافيك ويرزقك بالطفل اللي يسر عينك وعين امك وزوجك
2 - التكيس لازم تعالجينه وتسألين عن دكتوره ممتازه بهالمجال وتبدين العلاج لان التاخر بالعلاج يزيد المشكله والتكيس لما يزيد ما يزول الا بجراحه مابي اخوفك بس احرصك من حبي لك لاني مريت بنفس معاناتك والتكيس وما حملت لين عالجته
3-انا عالجت بالجلوكوفاج وناسبني وارتحت عليه بس دامه ما ناسبك حبوب منع الحمل هي الخيار الثاني واعرف وحده مقربه عالجت التكيس وهي بنت بالحبوب والحين تزوجت وعندها بنت زي القمر ولا اثر فيها ولمى يقولون لا تاخذين حبوب منع الحمل تأثر هذي للسليمه لانهاممكن تحمل باي وقت عادي وممكن ياخر حملها اما حالتنا لازم العلاج لين تخف التكيسات وتتنظم الدوره وهذا كلام دكتورتي
4-التكيس ياخر الحمل ويلخبط الهرمونات ولو حصل حمل يسقطه لان الهرمونات ملخبطه فتطرح الجنين
5-نصيحتي لك عالجي وانا مابي اخوفك بس انا مجربه وابي لك الخير يا حبيبتي
6-وهنا بقولك خبر حلو 99% من حالات التكيس تشفى بعد اول حمل لن نشاط المبيض يوقف 9 شهور وتخف التكيسات وبعضها تعالج كل لما تبغي تحمل وانشا الله انك من اللي يشفون وترتاحين
واتمنى لك التوفيق بس عالجي وبشريني واذا تبين تستشيريني بشي عالخاص انا جاهزه لان عندي خبره بهالموضوع وممكن اسئلك دكتورتي وبالنسبه للاعراض لازم تكشفين واذا كان حمل تراجعين عند دكتوره وتشوف اللازم
وبالتوفيق

[سولآف]

الحلم الضائع كفت ووفت

وربي يرجع زوجك بالسلامه ويرزقك بالذريه الصالحه المعاافاة وكل محرومه يارب

[Raheefa]

يسلمو حبايبي ع الدعوات الحلوة ..ومشكورين ويارب يرزق كل محرومة
اختي حلم الضائع .. انا اللي عطاني امل انو صاحبتي عندها تكيس واكثر مني .. والحين حامل بدون علاج .. ماشاء الله تبارك الرحمن
ان شاء الله راح اشوف دكتورة غير في القريب العاجل .. وكل شي من ربنا صلاح