معتقدات شامية

[مامي سارة]

معتقدات شاميه

* اذا انكسرت كاسة بيقولوا: انكسر الشر (تقولوا الشر مخلوق من الزجاج)

* اذا مر حدا فوق الطفل ما بقا يطول
( انو اذا طفل صغير متسطّح ما بصير حدا يمر من فوقوا
ليشششش لان ما بعود بيطول الولد بيطلع قصير؟؟!!!
و متل ما بقول المتل فشخة حية ولا فشخة بنية)

* قص الاظافر بالليل مو منيح
(لا تسألو ليش ما بعرف ولا حدا بيعرف بس مو منيح و خلص )

* مراششة الميه فراق (ما بصير حدا يرش رفيقو بالمي
لان بعدين بيتفرقوا اي شو عم يرشه بالزيت كاز )

* للي بيفوت على بيت جديد بيفوت معه عرق اخضر و
مقص و مصحف و يدخل بالرجل اليمين
(واللي بيعمل غير هيك بيتحول لسعدان !!)

* اذا اجت الكندرة فوق الكندرة يعني رايحين مشوار
(واذا اجت تحتها يعني راجعين من المشوار ؟؟!!)
* اذا زحف الولد او زقزقت العصافير معناها جاينا ضيوف
(وبهيك حالة لازم توقفوا ورى الباب لانهم بكونوا طالعين عالدرج)

*اذا طنت ادنك اليمين حدا عم يحكي عنا بالمنيح و
اذا طنت اليسار معناها حدا عم يجيب سيرتنا بالعاطل
(واذا طنوا مع بعض معناتها طرشت عليك العوض)

* اذا رفت عيني اليمين بيكون جاينا خبر طريف
*اذا رفت عيني الشمال بيكون جاينا خبر مو منيح
(اما اذا رفوا سوى فأنت اكيد احول)

* اذا حكني حاجبي معناها بدنا نستقبل حدا جاي من السفر

*إذا حكني كفي اليمين معناها بدي أقبض مصاري

*و إذا حكني كفي اليسار معناها بدي أدفع مصاري
(اما اذا حكك شي تاني بقى فأنت اكيد جربان روح تحمم)

* و ما بصير الحمام بالليل (طبعا شي بديهي لأن اكيد المي بتكون مقطوعة)

*و ما بينفع كب المي بالبلوعة بالليل من غير التسمية بالله و
الاستعاذة أولا (يالطيف مشان ما يأذونا ولا نأذيهن)
بس عرفتوا مين هدول؟؟؟؟؟؟؟؟؟؟؟؟؟؟............
ولا انا !!!!

*وإذا عمل العصفور تحتو على الأواعي يعني جاييكون رزقة
(وما لازم تغسل ملابسك شي سنة مشان الرزقة)

*و دلق القهوة رزقة وكمان نفس الحكي خليها مدلوقة لا تمسحها

*و شرب المي بعد القهوة قلة زوء (حتى لو اتشردقت موت ولا تشرب مي )

* كمان يلي حامل بصبي بتحلا واذا حامل ببنت بتتباشع

* وإذا الطفل قعد بالصينية وهي عالأرض بيرتعبوا
لأنه هاد الولد رح يضيع (ويمكن يتشرد هاد اذا ما طلع حرامي كمان )

* و كمان إذا حدا صبلك شاي او قهوة وملى الفنجان كتير
بكون قلبوه مليان منك واذا صبها ناقصة هدا دليل على انو هالشخص ناقص

*والي بيعدّ النجوم بيطلعلو تالولات بايدو (بس اذا حسن يحصيهم ما بيطلع شي)

*وبعد ما نخلص صلاة نطوي السجادة مشان
الشيطان ما يصلي عليها (خلّيه يصلّي بركدن يتوب ويصير يوسوسلنا بالخير!!)


بتمنى بعجبكن اول مواضيع وتكون مهضومة

[مامي نور]

ههههههههههههههههههههههههههههههههههههههههه والله شي بيضحك عاللآخر
بس في كتير أشيا ما كنت أعرفا قبل

بس اللي أحلا التعليقات كتير مهضومة

تسلميلي يا قلبي موضوع حلو كتير

[جارة القمر]

حلوين ...............مشكورة

[سماء الاحساء]

مافي معتقدات حساوية؟

[حنين الجنة]

ههههههههههههههههه

معقوله فى ناس كده

ولا التعليقاااااااااااات خطيرة

[rose]

ههههههههههههههههههههه
نحن عندنا تبع الكاسة معروووووووووووووف
انكسر الشر والاذن كمان
يسلموووووووووووووووووو حبيبتي

[يسرى]

هههههههههههههههههههههههههههههههه يسلمو هاليدين كتير حلوين

[نغمة حزن]

هههههههههههههههههههههههه انا شاميه وكل اللي احكيتهن عنا كتيييييييييييييير
بدي زيدك من الشعر بيت
احنا لمن تنكب عنا الئهوه بنحكي
خير خير انشالله
هههههههههههههههههه

[Salam]

تسلمي اختي ع الموضوع الحلوو

[سموةالجرح]

ههههههه حلوه أنا عجبتني اذا جت الكندره على الكندره