تجربة حقن مجهري ناجحة من اﻻلف الى الياء

[lelahelamr]

تجربة حقن مجهري ناجحة من اﻻلف الى الياء
تجربة حقن مجهري ناجحة من اﻻلف الى الياء



السلام عليكم ورحمة الله وبركاته
انا الحمد لله ربنا من عليا بالحمل بعد سنين طول عديت فيهم بكل حاجة ممكن تتخيلوها :-) .. حفظت فيهم يعني ايه منشط.. يعني ايه متابعة تبويض.. يعني ايه حقنة تفجيرية .. يعنى ايه تلقيح صناعي .. يعني ايه اشعة صبغة .. يعني ايه حقن مجهري ...
باختصار كدا اختكم بقت خبرة وﻻ احسن دكتورة نسا ههههههههه
انا جربت ده كله وكنت هارية النت تدوير عن اي معلومة او اي عرض من اعراض الحمل عشان كان نفسي اتشعبط في اي حاجة .. لحد في اﻻخر ماقررت اعمل حقن مجهري وكنت مأجﻻه من سنة تقريبا وعندي امل احمل طبيعي او بمنشط او بتلقيح صناعي وده طبعا من خوفي من الحقن المجهري وﻻني كنت شيفاه قصة كبيرة وتعب وتكلفة وفي اﻻخر مش مضمون من اول مرة وانى ممكن اقعد اكرره وده مكنتش حقدر عليه ماديا خالص ... وفي اﻻخر وبعد مايأست اتكلت على الله وعملته وصدقوني قلت ياريتنى عملته من زماااان ...
وكنت نادرة ندر اني افيد كل اخواتي اللى نفسهم يحملوا واللي انا اكتر واحدة حاسة بيهم واعمل الموضوع ده لوجه الله صدقة جارية افيدكم فيه بكل التكات والنصايح اللى انا استخلصتها من كل اللي قريته واللي طبقته وخﻻني بحول الله وقوته اوﻻ واخيرا انجح من اول تجربة للحمل المجهري..
وطالبة من كل واحدة تقدر تفيد بيه غيرها ماتبخلش وتاخده كوبي بيست وتعمل بيه موضوع جديد باسمها في كل المنتديات عشان يوصل لكل واحدة نفسها ربنا يكرمها بالذرية الصالحة..
الموضوع ده حقسمه الى كذا مرحلة..
اوﻻ .. قبل البريود تعملي ايه عشان تهيأي جسمك
ثانيا .. من بدابة البريود لحد يوم السحب وازاى تقدري بحول الله وقوته تكوني في احسن مراحل التبويض
ثالثا .. مابعد سحب البويضات والترجيع ولحد يوم التحليل ايه النصايح والممنوعات

معلش رغيت كتييير ... ياﻻ نبدأ بسم الله
مهما كانت الموانع عندك او عند زوجك صدقيني لو مشيتو على اللي حقوله بالتفصيل حتوصلوا للحمل بإذن الله..
اول حاجة شيلي كل الشك واليأس من جواكي واتكلي على الله وصلي ركعتين استخارة..
اعملي تحليل غدة درقية عشان ده مهم ولو في مشكلة تلحقي تعالجيها اﻻول..
خﻻص نويتي تعملي الحقن؟... يبقى من قبل البريود بشهر عاﻻقل تبدأي تاخدى انتي وزوجك الفيتامينات دى :
الزوجة : زنك - فيتامين سي - اوميجا 3 - فوليك اسيد - رويال جيلي
الزوح : زنك - رويال جيلي - اوميجا 3
ده بالنسبة للفيتامينات التحضيرية بس دى مش كل حاجة .. ﻻزم زوجك يقلل التدخين جدا ان مقدرش يبطله بس الشهر اللي قبل الحقن .. وﻻزم انتى تبدأي تهتمي بأكلك .. يعنى خضار وفاكهة كتيييير واكل صحي وابعدي خالص عن اﻻكل السريع واي مواد حافظة من الشهر الي قبل بريود الحقن ولحد ماتحملي بإذن الله حبيبتي.
كمان يااااااااسﻻم بقى لو جبتي كدا بطرمان عسل نحل اصلي وتحطي فيه معلقة كبيرة حبة البركة على معلقة كبيرة حبوب اللقاح ومعلقة كبيرة طرح النخل ودول تجيبيهم من العطار وتخلطيهم سوا وكل يوم تاخدولكم انتى وزوجك معلقة الصبح ومعلقة باليل يا سﻻم سلم كدا تبقوا تمااام..
قبل الدورة طبعا حتروحي للدكتور ومعاكي تحليل الغدة وتتفقي معاه ويبدأ يكتبلك المنشطات اللي حتبدأي فيها من تاني يوم بريود ... حقن كتير ماتخافيش مش بتوجع وحتعدي ماتستتقليش اي حاجة خديها ببساطة وخلي نفسيتك دايما عالية وخلى على لسانك طول ال 24 ساعة حاجتين : اىستغفار .. وقول ﻻ حول وﻻ قوة اﻻ بالله ..

عايزة نصيحتي... بﻻش تقولي لحد انك حتعملي حقن خلي الموضوع بينك انتى وزوجك بسسسسس ولو مامتك ماشي بس محدش تاني خااااالص ... عارفة ليه؟ عشان الضغط النفسي وكونك حاسة ان اللي حواليكي مستنيين ده بيزود الضغط عليكي صدقيني..

ها ابتدينا مرحلة التنشيط؟.. امنعي بقى الفراخ عشان الهرمونات وكلي مكانها سمك ولحوم .. وطبعا حتمشي على الفيتامينات اياها لحد يوم السحب متوقفيهاش وغالبا الدكتور حيكتبلك اسبوسيد عشان السيولة تاخديه معاهم اوعي تهملي..
وقت البريود بقى يا حبيبتي تشربي كل يوم قرفة عشان تنضف الرحم من اى دم فاسد وتدخلي الحقن على نضافة كدا ورحمك مهيأ ونظيف..
في ناس كتير بتشكر في عصير اﻻناناس الطبيعي للتبويض اشربي منه برده من وقت البريود لحد معاد السحب جميل
اشربي لبن كتييييييير .. اشربي مياه بافترا :-) ماتسيبيش ازازة المياه من ايدك..
وحتتابعي التبويض مع الدكتور لحد مايوصل حجم وعدد البويضات للمطلوب ويحددلك معاد السحب..

جينا بقى لمرحلة تانية مهمة... بصي حبيبتي من قبل السحب بيومين كدا وقفي دوا السيولة عشان مايحصلش نزف او حاجة وقومي يوم السحب ده وطبعا حتكوني صايمة قبله ب 12 ساعة ﻻن دى عملية ببنج كلي بس بسيطة جدا جدا والله ما حتحسي باي حاجة خالص وحتعدي عليكي نسمة..
اصحي الفجر صلي وادعي كتييييييير ربنا ييسرلك الخير ... واقري سورة البقرة كلها وخليكي طول الطريق للمستشفى تستغفري..
ماتخافيش من العملية خالص مش حتحسي بحاجة ... البسي حاجة واسعة مريحة عشان وانتى راجعة وماتستخدميش اى عطور او اى كريم ضروري واقلعي الدهب سيبيه في البيت وخلي وطلعي صدقة وانتى رايحة المستشفى وخلي نفسيتك مرتاحة عاﻻخر
طبعا حياخدو من زوجك عينة السائل وبعدين يطلبوكي..اقري اية الكرسي وانتى داخلة ماتنسيش.. وقولي (اللهم ادخلني مدخل صدق واخرجني مخرج صدق واجعل لي من لدنك سلطانا نصيرا)
العملية حوالي نص ساعة وحيسيبوكي تفوقى كمان ربع ساعة ويودوكي اوضتك.. حتيجي الممرضة تديكي حقنة مسكنة وبس خﻻص.. تقعدى في السرير ساعتين تشربي عصير ولبن وبعدين بالسﻻمة على بيتك يا عسل..
طبعا حيبلغوكي سحبوا كام بويضة ويقولولك استنى مننا تليفون بكرة نبلغك موعد الترجيع
والدكتور حيديكي ادوية مثبتة غالبا تحاميل وحقن مع الفوليك اسيد واﻻسبوسيد بتاع السيولة تمشي عليها وطبعا مضاد حيوى عشان مايحصلش اى التهابات من العملية لو مش كتبهولك انتى اطلبيه وخديه لمدة 3 ايام زيادة امان..
ارجعي بيتك وصلي ركعتين شكر لله انك وصلتي للمرحلة دى ﻻن في ناس كتير مش بتستجيب للتنشيط وافضلي ادعي واستغفري لحد مايكلموكي تاني يوم ويطمنوكي..
ماتنسيش من يوم السحب ده مرحلة جديدة خالص توقفي فيها الفيتامينات والعسل اياه واﻻناناس والقرفة وكله ... اى حاجة استخدمناها وقت البريود والتنشيط خﻻص مهمتها انتهت وبعد كدا ممكن ﻻ قدر الله تجيب نتيجة عكسية ماتنسيش ... يعنى القرفة واﻻناناس في اﻻكل او الشرب ممنوعين منعا باتا من يوم السحب لحد معاد التحليل ..
حتوقفي اي منبهات زى الشاي والقهوة والكاكاو والشكوﻻتة ... حتوقفي اى مشروبات غازية... وطبعا ماتسيبيش ازازة المياه من ايدك ..
واكثري من الدعاء ده ( يا رزاق يا ذا القوة المتين ارزقنى )(رب ﻻ تذرني فردا وانت خير الوارثين)
ها اتصلوا بيكي يبلغوكي معاد الترجيع ؟ غالبا بيكون بعد 3 -5 يوم من السحب
صلي بقى ركعتين شكر لله ﻻن ده معناه حصل تلقيح والحمد لله وطلعي صدقة وماتنسيش اﻻستغفار وﻻ حول وﻻ قوة اﻻ بالله..
ياﻻ بقى قومي يا حلوة روقى شقتك ونضفيها وجهزى اكل في الفريزر يقضي اسبوعين وخليه عالتسخين او التحمير يادوب ﻻن زوجك العزيز هو اللي حيتولى الموضوع ده هههههه يا تروحي تقعدي عند مامتك لو حكيالها ولو ﻻء اتحججي باي حاجة لو عايزة تقعدي عندها يعني لو ظروف زوجك مش حتسمحله يخدمك اﻻسبوعين الجايين..
لو بتشتغلي اﻻفضل تاخدي اجازة .. هو مش اﻻفضل الحقيقة هو ﻻزم تاخدي اجازة . اعملي اي اجازة مرضي وخليكي في البيت ﻻن ده حيفرق كتييييييير اوى..
يوم الترجيع اصحي صلي الفجر وافطري فطار خفيف واشربي مياه كتييييييير ... وعالمستشفى .. في المرحلة دى ﻻزم المثانة تكون مليانة عاﻻخر عشان الدكتور يشوف الرحم بوضوح ويقدر يحط البويضات في احسن مكان..
انا بقى مكنتش بقدر استحمل سابوني في اﻻوضة مستنية قبل العملية كتير ومجرد ماشرب والمثانة تتملي مقدرش اقعد اكتر من كدا واجري عالحمام من وراهم ههههههههه واول ماخرج اشرب ازازتين مياه بسرعة قبل ماييجو هههههه لحد مادخلت
اول ماتدخلى الدكتور حيبلغك كام بويضة اتلقحوا ... وكام منهم درجة اولى ... نصيحة حاولى تحفظي اجنة في التجميد ضروري جداااااا لو العدد يسمح وطبعا اجنة التجميد ﻻزم تكون درجة اولى وده حيوفر عليكي لو ﻻ قدر الله الموضوع مانجحش فلوس كتير .. حيوفر عليكي اﻻدوية ومرحلة التنشيط ومرحلة السحب ويادوب الشهر اللي بعده تروحي ترجعي اﻻجنة المجمدة على طول .. يارب يرزقك بعدد مناسب من اﻻجنة تقدري تجمدي منهم .. يعني مثﻻ لو ربنا رزقك بعدد 4 اجنة درجة اولى وواحد درجة تانية مثﻻ رجعي 2 درجة اولى وواحد درجة

تانية وجمدي اتنين درجة اولى ... ماتسمعيش كﻻم الدكتور انك ترجعي ال 4 الدرجة اﻻولى كلهم وماتجمديش ﻻن ده نفسيا انك لسة عندك اجنة شيﻻهم وانك عندك فرصة تانية مش مكلفة ماديا حيفرق اوى في نفسيتك..
عملية الترجيع بالظبط زى كشف النسا في ناس كتير بتقول عليه سهل بس بالنسبة لى بيبقى دايما صعب شوية عشان المنظار بيوجعى شوية .. بس اتكلي على الله وقولى (اللهم جنبنا الشيطان وجنب الشيطان ما رزقتنا) وافضلى استغفري كتييييييير طول فترة الترجيع وﻻزم ﻻزم تبقى هادية ومش منقبضة ومرخية جسمك عاﻻخر عشان العملية تتم بسﻻم... انا ﻻن المنظار وجعني طلبت من الدكتور يتركنى دقايق اهدا قبل مايرجع اﻻجنة .. ولما استرخيت خالص واستغفرت وقعدت اتخيل شكل اوﻻدي في حضني قلتله انى جاهزة ورجعهم بسﻻم.. ووقتها تقولي (اللهم انى استودعك اجنتي يا من ﻻ تضيع ودائعه) وتفضلي تكرريها كل يوم لحد معاد التحليل..
حترجعي اوضتك وتتنقلي بشوييييييش لسريرك وتفضلي على ضهرك من غير اى حركة اكبر وقت ممكن .. انا فضلت 3 ساعات وطبعا حتحتاجي الحمام كذا مرة قولي للممرضات وهما حيساعدوكي بطريقتهم ماتتكسفيش..
الدكتور حيكتبلك حقن سيولة تتاخد كل يوم تحت الجلد لحد معاد التحليل والممرضة حتعلمك ازاي تاخديهم بنفسك وماتخافيش كله سهل ان شاء الله..
من اللحظة دى انتى حامل ... اتصرفى اكنك حامل في اﻻسابيع اﻻولى .. عشان جسمك يصدقك وينولك الحمل .. وانتى خارجة من المستشفى للبيت بشويييييش اتحركي ببطء .. حد يساعدك في اللبس وامشي بشويييش وجوزك يسوق بالراحة ويتفادى اى مطب لحد ماتوصلي بالسﻻمة .. ولو في سلم تطلعي درجتين وتستريحي وهكذا وبين كل دور والتاني تقفي 10 دقايق ومتديش نفسك فرصة تنهجي او نفسك يعﻻ ..واول ماتدخلي بيتك عالسرير ونامي على ضهرك

من النهاردة بقى ولحد اسبوعين لما ييجي معاد التحليل مفيش اى حركة .. اول 3 ايام نايمة على ضهرك ماتقوميش غير للحمام والصﻻة وانتى عالكرسي افضل.. وبعد كدا ممكن تبتدي تنامي على جنبك واﻻفضل الجنب الشمال ﻻنه بيساعد ان الدم والغذا يوصلوا للجنين وممكن تتمشي في البيت بسيط وتعملى حاجات مش مرهقة بحذر عشان الدورة الدموية بتاعتك تشتغل ماتفضليش طول اليوم في السرير بس برده مجموع مشيك وحركتك جوة الشقة مايعديش نص ساعة في اليوم كله ومش ورا بعض يعنى تعملى طبق سلطة وترجعى سريرك ترتاحي.. تروقى السرير وتستريحي .. تغسلي طبقين تﻻتة وترجعى تنامي وهكذا..
نيجي بقى ﻻهم مافي الموضوع .. الممنوع والمطلوب في الحركة واﻻكل..
اسمعي اللى حقولك عليه ده ونفذيه بحذافيره حذفورة حذفورة عشان ربنا يكرمك وماتنسيش تبقى تدعيلي.. صدقيني لو عملتي باللي حقوله ربنا حيمن عليكي ان شاء الله من اول مرة..
الممنوع في الحركة :
- ماتوطيش خالص لو حاجة عاﻻرض خلى حد يجيبهالك
- ماتناميش على بطنك خاااااااالص
- ماتقفيش قدام اى حاجة سخنة بوتجاز او فرن خااااالص
- ماتحطيش اى حاجة سخنة على بطنك ابدا زى الﻻب توب او طبق اكل او اى حاجة
- حاولى ماتكحيش اكتميها قد ماتقدري وماتعطسيش لما تحسي اشربي مياه
- ممنوع تقعدى مربعة رجلك قرفصاء
- ممنوع تقعدي على اﻻرض
- ممنوع سشوار او ليس او اى حاجة حارة
- ممنوع غسل الشعر او اﻻستحمام اﻻ بعد التحليل ولو كان ﻻﻻﻻﻻﻻزم اوى ومش مستحملة بللي فوطى بمياه فاترة مش سخنة وامشي بيها على جسمك بعيد عن بطنك
- ممنوع استخدام اى مطهرات او منظفات او بخور او كريم للجسم اى نوع او صبغة للشعر او روائح من اى نوع او زيوت
- ممنوع السﻻلم خالص ولو في عندك حقن ﻻزم تاخديها هاتي حد يديهالك في البيت او جوزك يتعلم يديهالك انا جوزى اتعلم والموضوع سهل جدا وبقى هو يديني في البيت .
- طبعا ممنوع تشيلي اى حاجة تقيلة خالص.
- ممنوع تاكلي او تشربي اى حاجة سخنة او ساقعة اوى

نييجي بقى للممنوع والمرغوب في اﻻكل والشرب وده مهم جدااااااااا
- اشربي ميااااااه كتير اوى واشربي لبن كتييييير طول مانتى قاعدة اشربي منهم
- كلي زبادى وبيضتين كل يوم عالفطار بس خدي بالك البيض لو مقلي ﻻزم يكون مستوى حلو جدا وطي النار وسيبيه يستوى على مهله
- اشربي كل يوم عالريق كوب كبير مياه ودوبي فيه معلقة صغيرة مليانة نشا ده مهم جدا وبيساعد على لصق اﻻجنة
- كلى مهلبية ورز بلبن
- كلي خيار وخس كتيييييييييييير ﻻزم بيثبت اﻻجنة ومش حيخليكي يجيلك امساك خالص ان شاء الله
ملحوظة .. لو ﻻ قدر الله جالك امساك وقفي اى حاجة بنشا لحد مايروح بس ماتخافيش انا مجاليش ﻻنى كنت طول الوقت باكل خيار وخس
- البرتقال والتفاح مهمين جدا
بصى انا كان اكلي اليومي طول اﻻسبوعين (كوب ماء بنشا - 3 لتر مياه - 2 بيضة - كوب زبادى - 2 كوب كبير لبن - 7 خيارات - حزمة خس - برتقالة وتفاحة - طبق مهلبية - سمك او لحوم)

طب ايه الممنوع يا بطة منك ليها؟
الثوم - التوابل الحارة - الكمون - القرفة - اﻻناناس - اى اعشاب زى النعناع والينسون والجنزبيل ..الخ - الشوكوﻻتة - المايونيز - الخل - اى اكل داخل فيه بيض ني - الزعتر - العسل - اى نوع جبنة صفرا او سايلة - الدجاج - اي لحوم مصنعة زى الﻻنشون والسجق والبسطرمة والهوت دوج والبرجر والكبدة - التونة - الكافيين زى الشاى والقهوة والنسكافيه - المشروبات الغازية - اﻻيس كريم - التونة - الماكريل والسردين والرنجة - الملوخية والبامية- اي مشويات على فحم- الليمون

يعني انا اى اكل كنت بعمله بملح ابيض بﻻش توابل .. كنت باكل بطاطس مسلوقة - مكرونة - سمك - لحمة كله بملح ابيض بس
اهم من ده كله حبيبتي تواظبي على صﻻتك وصﻻة الفجر وتدعي كتير في كل اوقات اﻻجابة.
قراءة سورة البقرة يوميا
قراءة الرقية الشرعية يوميا
قراءة سورة الطارق وانتى واضعة ايدك على بطنك يوميا 7 مرات
اﻻستغفاااااااااااااار
اخر حاجة حبيبتي هى اعراض الحمل اللي حسيت بيها بعد الترجيع...
اول 4 ايام ماكنش في اعراض تذكر غير الم بسيط للبريود يروح وييجي ووجع في ضهري لما اقف شوية مع الم صدري بس الم صدري ده كان معايا من اخر ايام التنشيط..
وكنت قارية وقتها ان الجنين بيبدأ انغراسه من اليوم السادس للترجيع
فكنت مترقبة اى تغيير احس بيه وفعﻻ من اليوم الخامس بدأ الم البريود يشد شوية وفي اليوم السادس من الصبح كان في نغزات بجنبي الشمال زى نبضات كدا متواصلة طول اليوم ماسابتنيش وعالمغرب كدا بدأ الم البريود شديد ووجع في الضهر ففضلت مستلقية عالسرير اقرا رقية تثبيت الحمل كنت جيباها من عالنت وادعي واستودع ربنا اجنتي..
بس كان في عرض مهم جدا يطمني عن انغراس اﻻجنة مستنياه بس محصلش يومها وهو نزول نقط وردي او بني زى مالواحد دايما بيسمع وقلقت شوية لما ماحصلش يومها ..
اليوم السابع مكنش في اعراض
اليوم الثامن قيست درجة حرارتي لقيتها 37.1 وده كان اول عرض مهم للحمل حصلي ﻻن معروف ان درجة حرارة الجسم بعد التبويض بتعلى ولو وصلت 37 او اكتر واستمرت ما نزلتش يبقى ان شاء الله حمل وفضلت ادعى انها ماتنزلش :-)
في اليوم ده كمان حصلي حاجة غريبة قمت باليل مليانة عرق والمياه بتسيل من كل جسمي اكنى في الصيف مع انى كنت في شهر 2 واستغربت وقمت غيرت هدومي كلها ونمت تانى
مهم اوى في الفترة دى تاخدي حذرك جدا ان ماييجيلكيش برد عشان درجة حرارتك ماتعﻻش اوى ويأثر عالجنين بعد الشر فﻻزم تدفي نفسك دايما وتقفلي اى مصدر هوا
اليوم التاسع والعاشر استمرت درجة الحرارة عالية 37.3 مع الم البريود ونفس الشيئ تكرر وانا نايمة موضوع العرق الشديد..
اليوم الحادي عشر وده كان معادى الشهري للبريود حصل اللي مستنياه واخيرت نزلت قطرات دم وردي فاتح جدا وانقطعت بعدها طبعا فرحت

وده تانى اهم اﻻعراض مع ارتفاع درجة الحرارة يا بنات ...
سيبك من اى اعراض تانية بتسمعي عنها او تقريها زى وجع الثدي او غمقان لون البول او الم الظهر او غيره ... صدقيني كل اﻻعراض دة كانت بتجيلي كل شهر لدرجة انى كان في اشهر كمان بحس فيها بغثيان ودوخة وكله وفي اﻻخر تشرف الهانم وانقهر...
لكن العرضين دول لو حصلولك قولي لنفسك مبروك مقدما : نقط دم بني او وردى واستمرار ارتفاع درجة الحرارة لحد معاد البريود وما بعدها..
وبس .. في اليوم الرابع عشر عملت تحليل البول وطلع موجب وسجدت لربنا شكر وحمد ﻻن في اﻻول واﻻخر لو ربنا ماكنش اذن مكانش دكاترة العالم كله نفعوكي فالحمد لله اوﻻ واخيرا..

حبيبتي .. انا اكتر واحدة حاسة بيكي وﻻزم يكون عندك يقين ان اليوم ده جاى وان دى روح ربنا حيخلقها في معاد مكتوب ... انا مابخلتش بأي معلومة والله وقعدت اكتب في الموضوع ده ساعات ويارب يكون صدقة جارية لكل واحدة تنشره وتفيد بيه غيرها .. امشي على كل كلمة قلتها وماتلغيش اى حاجة فيها وان شاء الله ربنا يجبر بخاطرك ويرزقك
ماتنسونيش ..ادعولى دعوة حلوة بظهر الغيب

[عايشه يوسف]

جزاك الله كل خير اختي والله موضوع صحيح
يستحق النششر والشكر علئ مجهودك الجبار في الكتابه والنصح
الله يجعله في ميزان حسناتك ويارب يرزق كل محرومه
والله يتمم لك علئ خير يارب

[Fetwn2016]

الف شكر لك فعلا كل اللي فيه معلومات قيمة ويعتبر مصدر للمقبلين على العمليه
يستاهل النشر����

[الدنيا حلوى]

السلام عليكم جزاكي الله خيرا اختي العزيزه وبارك الله فيك على نصائحك الجميله وان شاء الله في ميزان حسناتك 😍
بس بدي أسأل سأل مين بتعرفي دكتور شاطر بيعمل هي العمليه ويكون مضمون وشاطر كتير لأن أنا حائره وين أروح أعملها
بتمنى أنكم اتفيدوني وجزاكم الله خيرا 😍
أنا شكرولي الدكتور حسام زكي مين مجربه عندو اتفيدني بتمنى منكم الرد 😍
وبارك الله فيكم

[نونة البحرين]

جزاكِ الله خير على المعلومات
و الله يرزق كل محرومة

[Fetwn2016]

ارجو من المشرفين تثبيت هذا الموضوع لما يحتوي عليه من معلومات قيمه جدا

[lelahelamr]

ارجو من المشرفة تثبيت هذا الموضوع ليستفيد منه الجميع وجزاكم الله خيرا

[عذبهم شموخي]

حبيبتي الله يحزاك الفردوس الاعلى من الجنة موضوع رائع ومتعوب عليه


إن شاء الله بعمل بنصايحك

[Wafae1]

موضوع مهم جدا للمقبلات على عملية الحقن المجهري
شكرا حبيبتي على النصائح القيمة و المفيدة
الله اجعلوا في ميزان حسناتك

[مرسمه]

موضوع جميل
مع انه في اشياء رعبتني
الكحه والسعال
انا اليوم التاسع والكحه والسعال ما وقف الا امس
بس املي بربي كبير
ولا نزل مني قطرات دم
وحسيت حرارتي ارتفعت كم يوم
بس الان نزلت
طمنوني بنات مو شرط الحراره والدم صحيح