السلام عليكم*
بحكيلكم من البدايه عشان تفهمون علي بوضوح
وبنفس الوقت البكريه تنتبه لحملها وماتسوي مثلي
في حملي الأول كنت بكريه كنت اراجع عند دكتوره خااايسه بمعنى الكلمه تصدقون كنت اروح لها بس انا اللي اكون عندها استنكرت الوضع مو معقوله كل مره اكون لوحدي وكنت اخاف في عيادتها بالرغم انها متلزمه ومصريه وواضح عليها تعشششق الفلوس كانت تحب تسوي تحاليل وفوق كذا كنت بكريه مااعرف شي عن الحمل وقلت لها ابي حبوب تثبيت قالت ماتحتاجين قلت لها طيب انا ابي اخذها قالت مرره ماتحتاجين لها وفوق كذا كنت في الشهور الأولى واعرف نفسي اني مارتاح وكل شوي اطلع وبيتي في الدور الثاني واهلي بمنطقه ثانيه وكل اسبوع اروح لهم
المهم طقت كبدي منها وسحبت عليهاا*
ورحت للدكتور ثاني وسوناره كان قديييييييييم جدا للأسف وهو شايب بس كانوا يمدحونه لأنه قديم ومعروف
بس اللي رافع لي ضغطي سوناره مثل التلفزيونات القديمه اللي تجي الشاشه صغيره*
وكان يقول لي هذي اليد وهذي الرجل وكنت اقول ايه وانا ماادري وين ماادري وين رجله ويده 😂
المهم كنت في حملي مااحس اني حامل كنت اروح مناسبات وأطلع وانزل من الدرج بيتي كان في الدور الثاني وماكنت ارتاح واذكر في الشهر الرابع سافرت بالسياره وفي الشهر الخامس كنت اروح الأسواق وامشي كثير وكنت اطلع اتمشى بمنطقه تبعد عنا 200 كيلو*
وفي الشهر السادس توحمت على التمر والقهوه كنت ادمااان والقهوه كان فيها زعفران ماكنت ادري على نفسي ان الزعفران يأثر ع الحمل والتمر نفس الشي*
اذكر جاني الم ماسك بطني مع ظهري وطنشت*
وفي اليوم الثاني نفس الشي وقلت لزوجي عنه*
ورحت للدكتور وقال احتمال يكون بوادر طلق وكتب لي حبوب يوتوبار توقف الطلق اكيد اغلبكم عارفينها وماتحملتها سببت لي خفقان وارتجف امسك الجوال يطيح احس اني بموت رجف مو طبيعي وقلبي يدق بسرعه*
الدكتور خبرني ان من اعراضها كذا وقال لو ماتحملتيها اقسمي الحبه واكلي النص*
قسمت الحبه ونفس الشي ماتحممملت جداً متعبه*
وسمعت انها ممنوعه*
وتركت الحبوب من عندي ووصلت نهاية الشهر السادس وكنت انزل واطلع من الدرج ومااقعد في البيت ولاحظت صايره تنزل مني افرازات خضراء بدون ريحه وحكه وطنشتها*
وغير كذا كنت اكل تمر تقريباً اكلت علبه ورحت للحمام الله يكرمكم وكان معي امساك وضغطت على نفسي ونزل مع الأمساك افرازات فيها دم وخفت اتصلت على الدكتور قال تعالي بكره
ورحت له وسوا لي سونار قال انتي طحتي او احد ضربك على بطنك ! قلت لا
قال اشتباه انفصال جزئي بالمشيمه لأن الرحم مقفل عندك*
وكتب لي نفس حبوب الطلق وحبوب ثانيه توقف الدم*
بس وقتها كنت اخذ اسبرين نسى يقول لي وقفي الاسبرين*
والدم كنت الاحظه مع الافرازات اذا مسحت*
وفي اليوم الثاني جاني الم مو طبيعي كل بعد دقايق يزيد الى مااستمر وعرفت انه طلق مع الطلق كنت الاحظ الجنين يتحرك ومتجمع في مكان واحد ع الجنب*
وفي السياره مالاحظت اي حركه بالرغم من الام الطلق*
ورحت للمستشفى وتأخرت توصل الدكتوره وقتها الساعه 6 صبح قالوا تجي 9 طيب وش يصبرني انا*
المهم مااحس بنفسي الا وينزل مثل الشي وادفع ومحد حولي واتألم لوحدي وانا ادفع جاني الدكتور ونزل الجنين بالكيس وكانت بنت بس ماتت في بطني ان شاءالله شفيعه لي*
ودخل يده الدكتور جوا وقال عنق الرحم ضعيف والحمل الثاني سوي ربط*
وأنا عارفه نفسي ان السبب الاساسي هو اهمالي وماكنت اقعد وفي الجماع كنت احس بانقباضات الجماع*
وكنت اطلع وانزل من الدرج الى ماارتخى رحمي*
الحمدلله على كل حال*
المهم الحمدلله ربي عوضني وحملت والحين في الشهر الرابع اراجع عند دكتور ماشاءالله شاطر ومعروف وسوناره جديد وواضح وارتحت له*
وعيادته زحمه واذا قرب دوري يتصلون علي
المهم قلت له ابي ربط وحكيت له قصتي
وقال تعالي الاسبوع الجاي حشرانه عشان أأكد لك اذا تحتاجين
وكشف علي قال ماتحتاجين طول العنق 3 سم ونص
قلت طيب الضعف مايوضح بالسونار قال الضعف هو نفس طول عنق الرحم اذا ضعف يقصر واذا قصر يعني العنق ضعيف
وارتحت على كلامه واعطاني ابر تثبيت اخذها للشهر التاسع*
وأنا حالياً مرتااااحه عند اهلي مااتحرك كثير بس منسدحه بس اقوم للصلاه او للحمام الله يكرمكم*
لو وحده فيكم مكاني ممكن تسوي ربط ؟*
بما انكم قريتوا قصتي تتوقعون ان السبب التمر هو اللي فتح لي رحمي او كثرة المشي وعدم الراحه*
انا للحين محتاره من كلام الدكتور اللي قال عنق الرحم ضعيف لأني مارحت له بعد الولاده ولا حتى قالولي السبب الأكيد بالرغم ان الدكتور الاول قال اشتباه انفصال المشيمه وغير كذا الجنين توفي بطني*
طمننننوني تشوفون اني احتاج ربط او لااا بصراحه ابي ردود تطمني اكثر*
انا حالياً في الاسبوع 15 وكل شهر اتأكد من عنق الرحم والحمدلله متفائله وبنفس الوقت خايفه*
سؤالي يعني اذا الوحده صارت لها ولادات مبكره لازم تحتاج ربط ؟ طيب اللي مثل حالتي وقالها الاستشاري ماتحتاج ؟!!
بالرغم وحده من قريباتي صارت لها اكثر من اربع ولادات مبكره ومن ضمنهم تؤام وقالها نفس الدكتور ماتحتاجين ربط وتمت عالابره وماشاءالله تم حملها
وانا ابي تجاربكم او سمعتوا احد مثل حالتي
دعواتكم ربي يتمم لي حملي على خير لشهر التاسع*