قصه ولادتي بمحمد

[وردة صفراء]

السلام عليكم اخواتي شخباركم ؟؟


انا والحمد لله ولدت تاريخ 10-6-2013
صابني سكري الحمل وقالولي لازم نولدك قبل الموعد
وانا موعدي المفروض 20-6-2013

تنومت في المستشفى وعطوني تحميله ومافادت
بعد 4 ساعات عطوني تحميله ثانيه ولا فادتني

واليوم الثاني عطوني التحميله الثالثه جاني طلق خفيف وبعدها راح ولافادت وانا كنت خاااايفه وسالت الدكتورة لو ماولدت بالطلق الصناعي شنو الحل؟

قالت لي بعطيك تحااميل الى ماتولدين واذا رفضتي بنسويلك عمليه قيصيريه

وزاد خوفي ودعيت ربي ان يسهل علي مليت كل شوي وحده تكشف علي من تحت


وبعد 4 ساعات عطوني التحميله الرابعه ومر الوقت ولا حسيت بشي جاتني امي وعطتني ماء ورد وقرت فيه ايات تسهيل الولاده واجربتني اني اشربه

حاولت اشربه وشربت شوي وحسيت بغثيان وتقيئت

شوي شوي احس بالام خفيف ويزيد ويزيد الى ماحسيت اني ماقدر اوقف ولا اقعد
ان قعدت حسيت بالم وضغط كبير وان وقفت حسيت بثقل

قالت لي امي تمشي عشان الله يسهل عليج

قمت امشي ودموعي تصب من الالم .. وانا امشي اقرى اقرى الادعيه وسورة مريم

وبعد فتره رحت الحمام اكرمككم الله ولقيت افرازات في ملابسي الداخليه وماهتميت ماكنت ادري انها السداده

ناديت الدكتورة وافحصتني لقت الرحم مفتوح 5 سانتي

حمدددددت ربي طول اليومين الي فاتوا مافتح ولا سانتي ..

وبعدها نزولوني غرفه الولاده وامي الله يخليها ويحفظها لي دخلت معاي غرفه الولادة وجلست معاي حسيت برااااااحه والله خففت عني الام الولادة بشكل كبير كانت معاي تساندني وتقرى علي قران..

المهم كل شوي كان الالم يزيد ومامللني الا التخطيط كانوا يجبروني انام على جنب واسكر رجولي وانا ماقدر احسن بضغط كبير واذا سكرت رجولي يزيد

دخلوني غرفه الولادة الساعه 8 بليل وتميت اطلق وبعدها حسيت بشي دافي ينزل مني وكانت كميه بسيطه مو مثل ماء الحنفيه مثل مايقول الببعض ..

حسيت بغثيان وقمت ارجع ..


المهم انا مع الحمل جاني بواسير الله يكرمكم

والله ان البواسير المتني وحسيت فيها وقت الولادة اكثر من اي شي ثاني
حسيت اني قاعده اولد من ورى من شده الالم مع اني كنت اتعالج بكريم للبواسير بس مافادني كان يخف ويرجع

بعد فتره حسيت بضغط كبير تحت ماقدر اسكر رجوولي وكل مافتحها الممرضه تهاوشني
ماقدرت اتحمل وقمت اصرخ بقووووه ضغط كبير والبواسير تالمني كثيييير

جاتني تجيكلي شافت الراس كلها دقايق وسمعت صرخه ولددي حبيبي وقعدت اصرخ وابكي واقول الحمد الله الحمدالله كنت مو مصدقه نفسي اني ولدت وارتحت خلاص


وانا اولد كنت اسمع وحده تصرخ في الغرفه الثانيه وولدت قبلي وقلت يارب سهل علي انا بعد ان شاء الله انا بعد اولد

والحمد الله بعدها بفتره بسيطه ولدت

كان ولدي صغييير 2كيلو ونص

وين السكر بالموضوع .. ولدوني وقالوا الجنين بيكبر وبيصير ضخم ومابتقدرين تولدينه وولدي صغير الى الحين ماقدر احميه بالحمام من كثر ماهو صغير..

الحمد الله على كل حال


والله بنات من اول ماحملت وانا اخاف من الولادة وافكر فيها كني بانعدم وبانشنق في هاليوم
لكن الله سبحانه يسهل ..
كلها ساعات وراح تنسون كل الام وكل شي ..




وبنات انا بعد الولادة غلطت غلطه من الفرحه الالم وحسيت روحي مافيني شي
اول مادخلت الغرفه حسيت ان نزل مني دم كثير

وقمت من السرير ورحت الحمام عشان اغير الفوطه الصحيه

وانا بطلع من الحمام حسيت بدوخه قويه في راسي وصرخت انادي امي قلتلها يمـــــــه

وماقمت الا اسمع امي شايلتني وتقولي بسم الله عليك بسم الله عليك
ونادت الممرضه وانا اشوف ضباب واشياء تدور
واغمى علي مره ثانيه وهم شايليني ,,

بعدها الممرضه عاتبتني كثير وقالت لي انتي فقدتي دم كثير لازم تقومين تدريجيا مو بسرعه وبقوه

وسامحوني على الاطاله ..

[بوران]

حدالله ع سىمتك والله يهونها علي وع كل المسلمات يااارب

[بنت النورر]

الحمدلله علي سلامتك
والف الف مبرووووووووووووووووك علي البيبي

[جونة]

مبروووووك ماجاكي والحمدلله على سلامتك وتسلم الايادي عالقصه

[أم تااالين]

الحمدلله على سلامتك ومبروك النونو يتربى بعزك
طيب خيتوو الطلق الصناعي وش رايك فيه بما انك جربتيه ؟
الألم صحيح ورى بعض

[ع ـشقي ع ـيونك]

ألححمدلله ع سسلآمتك ..
ولف مبروووووووووووك وعقبآلنا يـآآآآرب

[وردة صفراء]

الله يبارك فيكم وعقبال كل حامل


بالنسبه للطلق الصناعي انا ماجربت الطبيعي عشان اعرف الفرق ..

اخر تحميله الرابعه شوي شوي بدى يزيد وبقى مستمر عندي في غرفه الولادة ..

والي ساعدني وخفف عني الغاز الي يحطونه في غرفه الولادة ونستنشقه عند الالم
نسيت شسمه !
من يجي الطلق احط الكمامه ويخف علي واتركها واذا رجع استخدمها مره ثانيه ..

[oum tamer]

حمدلله على سلامك ومبروك البيبي
والله وانا بقرأ دمعت عيوني ،، الله ييسر ولادتي و ولاده كل أخت

[غربة أعياد]

ماشاءالله ألف ألف مبروك والحمد لله على سلامتك أختي

والله يحفظ لك حمودي وتفرحين به عريس يارب

[ثلاث وردات]

حمدالله علي سلامتك ومبروك ماجالك يتربي بعزك