اللي ناويه تعمل أشعة الصبغه ..تعالي أفهمي

[المتأمله خير]

السلام عليكم و رحمة الله و بركاته

ازيكوا يارب تكونوا بخير هالموضوع حبيت افيد بيه و خصوصا انه فى مجال شغلى هتكلم انهردا عن اشعة الصبغه على الرحم و الانابيب اللى هى HSG اللى هى اختصار ل
Hysterosalpingogram

تعتبر اشعة الصبغه من الفحوصات المهمه اللى بتبين سبب تأخر الحمل
عاوزين نتابع مع بعض خطوه بخطوه من اول لما الدكتور بيطلب منك الاشعه لحد لما تروحى مركز الاشعه و تعمليها من غير لا خوف و لا قلق .


اول حاجه عاوزين نعرف ايه اهمية اشعة الصبغه اللى هتعمليها دى بالنسبه للدكتور يعنى بمعنى تانى ليه الدكتور طلبها منك ياترى هتبين ايه

اولا بتبين مدى سلامة الرحم و خلوه من الالتصاقات لان الالتصاقات دى بتأثر بالسلب على عمل قنوات فالوب .
ثانيا بتوضح هل الرحم فيه اورام او ألياف .
ثالثا بتعرفنا هل الرحم فيه عيوب و لا سليم و كمان بتوضح شكله لو كان غير طبيعى يعنى لو رحم ذو القرنين او الرحم المنقلب او الرحم المنقسم بحاجز .
رابعا بتوضح هل فيه انسداد فى قناتى فالوب و لا مفيش .
خامسا بتبين فين مكان الانسداد بالظبط .
سادسا و اخيرا الاشعه دى مش بس لها دور تشخيصى لا دى كمان لها دور علاجى مهم اوى سمعاكى ياللى بتسألى ازاى ؟؟؟
هقولك لان مرور الصبغه خلال الانابيب بيفتح الانابيب لو كان فيها انسداد .

لحد كدا فهمنا احنا هنعمل الاشعه دى علشان نبين ايه و هنستفاد منها فى ايه طاب خلاص اقتنعنا اننا هنعملها علشان مهمه و مش هنخاف و لا هنقلق طاب تيجى نحدد المعاد اللى هنعمل فيه الاشعه .

تانى حاجه عاوزين نعرف المعاد اللى تتعمل فيه اشعة الصبغه

طبعا انسب معاد تتعمل فيه الاشعه دى هو بعد انتهاء الدورة و قبل حدوث التبويض (يعنى امته )
من اليوم الرابع حتى اليوم السابع بعد انتهاء البيريود .
يعنى على سبيل المثال البيريود استمرت 4 ايام و خلاص غسلتى و صليتى تستنى 3 ايام و اليوم الرابع او اليوم الخامس او اليوم السداس او اليوم السابع تروحى علشان تعمليها
انا بفضل انها تتعمل خلال اليوم الرابع او اليوم الخامس بعد انتهاء البيريود.


تمام كدا حددنا المعاد............. و حان اليوم الموعود
تعالى هاتى ودنك و ركزى معايا ... خايفه ... قلقانه ... مرعوبه...طاب ليه كل دا الموضوع و الله ابسط من كدا بكتيييييييييييييييير احب اقولك متديش ودنك لواحده تقعد تخوفك و تضحك عليكى و تقولك دا انتى هتروحى هيطلعوا الرحم بره و كلام افلام كتير كدا طاب بالعقل كدا هنطلعه بره ازاى .
طاب بالمناسبه واحده جات تعملها قالتلى دول قالولى انكم هتطلعوا الرحم برده قلتلها انا نفسى اعرف مين اللى قالولك دول قالتلى بجد انتوا هتطلعوه قلتلها خلاص احنا فعلا هنطلعه و نحطه جنبك هنا على الترابيزه و بعد لما نخلص هدخلهولك تانى و الله قعدت تضحك على نفسها .

طاب تعالوا نفهم مع بعض ايه اللى هيحصل بالظبط علشان محدش يضحك علينا و لا يخوفنا
اولا هتختارى مكان كويس و ثقه و هتتصلى علشان تعرفى تمن الاشعه و كمان علشان تعرفى مين اللى هيعملك الاشعه يعنى دكتور و لا دكتوره فيه ناس كتييييير بتفضل دكتوره و كمان علشان تكونى مطمنه و فيه ناس تانيه النقطه دى مش بتفرق معاهم كتير .

حبيبتى جمدتى قلبك و روحتى و حجزتى
طاب قاعده مستنيه ايه ؟؟؟
اه تمام يلا بينا نحضرك ...........
فيه بنات دماغها راحت لبعيد و تحضير العفاريت و كدا لا يا حبيبتى اقصد يجهزوكى هههههههههه مش اتفقنا بلاش خوف .
وقت التحضير دا اقصد التجهيز بيكون حوالى 30 دقيقه او 45 دقيقه ...
خلال الوقت دا هتاخدى مسكن زى بسكوبان( دا بيكون مضاد للمغص و يخفف من الالالم و التقلصات و دا كمان بيستخدم فى حالات التشخيص و العلاج بالاشعاع)
هما كمان خلال الوقت دا بيعقموا الالات اللى هيستخدموها فى الفحص و كمان الجهاز اللى هيصوروا بيه
سمعاكى يا ياللى بتقولى ايه الالات دى ؟؟؟
طاب ياستى متزعليش تعالى اعرفك
اولا منظار لفتح المنطقه ... casco speculum .
ثانيا ملقط خاص لمسك عنق الرحم ... forceps .
ثالثا انبوب خاص يدخل فى عنق الرحم علشان ندخل بيه الصبغه يعنى مش بنشك بالسن و لا حاجه
رابعا ساوند علشان لو عنق الرحم احتاج توسيع علشان يكون من السهل ادخال الانبوبه الخاصه اللى بيدخل من خلالها الصبغه .
خامسا الصبغه اللى هنحقنها .
سادسا السرير اللى هتنامى عليه .
سابعا و اخيرا جهاز الاشعه ال x-ray .

منقوووووووول جزاها الله خير صاحبة الموضوع

[ريتال أحمد]

راااائع انا عن نفسي عملتها وحسيت وقتها بالم بس مو كتييير كتيييير وللحمدلله كانت النتيجه سليمه

[نور الرافدين]

موضوع رائع

اني عندي موعد اذا نزلت الدورة اروح اعملها او اعمل ناظور..
ويارب ماتنزل ادعولي

تحياتي

[المتأمله خير]

نوووور وريتاااال شكرا على المرور ويااارب يرزقكم الذريه االصاااالحه

على فكره ريتال اسمك زي اسم بنووتي الله يحفظها

[امال جزائر]

انا كمان عملتها ووجعتني كتير بس الحمدلله سليمة
جزاك الله خير عالتوضيح
الله يرزقنا اجمعين ياااااااااااااارب

[mlobrn]

انا كمان عملتها من شهر و كان في الم بس بسرعة يزول و الحمدلله سليمة ...الله يرزقنا الذرية الصالحة

[M0ra]

مشكووووووورة يا حبيبتى على الموضوع الاكثر من رائع
انا عملتها بتخدير بس بردو مشكوووووورة عرفتينى حصل ايه
ربنا يرزقنا جميعا الذرية الصالحة المعافاة عاجل غير اجل يارب العالمين

　

♥ اللَّهُمَّ بَشِّرْنِي بِمَا أنْتَظِرُهُ مِنْكَ وَأنْتَ خَيْرُ المُبَشِّرِينَ ♥

[ربمة]

انا عملتها كمان**** وكانت النتيجة سليمة والحمد لله***
حسيت بالم*** بس مدة الفحص دقيقتين**ممكن الواحد يتحمل***والحمدلله مااحتجت لابرة ولاشيء..
وماجاني نزيف بعدها بس الاالام دورة لمدة نص ساعه بعد الفحص

[جورية شامية]

انا اليوووووووم عملتها و الحمدلله طلعت سليمة
والله يابنات ألمها مو هالألم الفظيع عادي عنجد متل ألم الدورة بالضبط بس أهم شي الوحدة فينا ما تخلي توترها يزيد الوجع
والله رحت وانا خايفة وحتى زوجي كان خايف عليي قد ما قرينا بهالمنتديات عن بنات صرخت و بكيت من الوجع واعتقد كلو نتيجة التوتر
الحمدلله الله يهونها على كل اللي بدون يعملوها يااااااااااارب

[ندوووش]

موضوع رائع الله يعطيك العافيه