خليني احكي لكم تجربتي من البدايه (انا سعوديه واتعالج بامريكا)
الي سار .. لي متزوجه ست سنين اخذت حبوب منع حمل لمده 3 سنين وبعدين تركتها وال3 السنين الثانيه ماسار حمل .. حسيت ان الموضوع طول مره فرحت للدكتور اكشف ..
الكشف كان كالتالي.. حللو دم يمكن اكثر من 13 عينه وبعدها الترا ساوند وقالو كلو تمام بس عشان زياده تاكيد لازم نسوي عمليه ندخل زي كاميرا نشوف انو الاعضا كلها كويسه .. وسويت العمليه تحت تخدير كامل وبعدها حمدالله قال الدكتور كل شي كويس .. بعدها جا دور تحليل زوجي .. طبعا بعد افلام هنديه الين وافق يحلل.. والحمدلله يارب طلع سليم
بعدها قال الدكتور طفل الانابيب نسبة نجاحو بعيادتهم 70 ٪ للي بالعشرينات وبدانا العلاج..
اعطاني حبوب منع حمل لمده 10 ايام وبعدين وقفتها وبعدها حللت دم وبدات ابر يوميا لمده 12 يوم نوعين دوا اخلطهم سوا (مونوبير + بروفيل) وكل ثلاث ايام اروح العياده احلل دم واسوي الترا ساوند من تحت..
اليوم ال12 اخذت ابره اسمها ستروتايد مره وحده بس.. ووقفت المنوبير والبروفيل.. وبديت مضاد حيوي ..
وبعدها بيومين اخذت ابره التفجير الاوفدريل.. وبعد 36 ساعه كانت عمليه السحب تحت تخدير كامل
وبعد العمليه رجعت البيت عادي مافي ولا الم ولا شي ..
وبعد 5 ايام كان موعد الترجيع طبعا كنت شاربه مويا كثير عشان المثانه لازم تكون مليانه.. وبعدين قالولي تبغيه بتخدير بسيط او بدون ..سويته بدون ... وسالني كم جنين نرجع 2 والا 1 قال لو رجعنا 2 احتما التوام 30 فالميه وانا ماابغا توام فرجعت واحد قال لو رجعنا واحد نسبة النجاح تسير 65٪ مش 70٪
حمدالله سويت الترجيع لواحد .. مافيه الم ولاشي.. واعطوني صوره للجنين فالرحم ...نقططه صغييييره سبحان الله.. بعدها خلوني تقريبا نص ساعه مسدوحه.. ولما وقفت حسيت نغزه بجنبي اليمين ...
ثاني يوم من الترجيع بديت اخد تحاميل مهبليه وحبوب تحت اللسان 3 مرات باليوم ولصقات تتغير كل ثلاث ايام
ضهري سار يعورني احيان لما اصحا من النوم.. ولما امشي اتعب بسرعه واناهج كثير..
بعد 3 ايام حللت دم وقالو كلو تمام ...اليوم هو يومي الثامن من الترجيع حللت دم مره ثانيه ونسبة الهرمونات نزلت قالت الممرضه عادي بس الله اعلم....
بعد خمس ايام اكمل 14 يوم وحيكون تحليلي الاخير .. يااارب اكون حامل يارب عشان ماارجع اعيد هذا كلو لانو حقيقي تعب ... الحمدلله علا كل حال والله يرزقنا جميعا كل الي نتمناه .. يارب
دعواتكم