معاناتي بالحمل وولادتي ب الحور .. الحمدلله ع كل حال .

[ورودي البيضاء]

السلام عليكم يا حلوات

يمكن كثير منكم كان متابعني بموضوعي اللي كتبته لكم اثناء الحمل
يااااه وربي كل ما افتكر من جد ادعيلكم كثيييير لأنه فعلا فعلا كان كلامكم ودعواتكم مصدر راحة وأحيانا أمل وكان مصدر تقوية ثقة لي بالله ..
والحين بعد مانتهيت من كل شي وروقت ورجعت لياتي الطبيعية والنفسية عال العال جا في خاطري اكتب قصتي .. اكيد حتفيد أحد ..
لأنه ماشاءالله تقريبا جمعت اغلب مشاكل الحمل في حملي هههه الحمدلله بس
احس الشغلة عين صابتني لأنه سبحان الله بالعيد كنت تعبانة وماحضرت الصباحية وامة لا اله الا الله مجتمعة .. وسألوا عني واهلي قالو للكل اني حامل .. والله بعدها بيومين مارجعت بيتي الا وبدت المشاكل .. مشكلة ورى مشكلة .. اخرج من وحدة .. ادخل بوحدة .. وكل مرة الدكاترة يحتاروا ومايعرفوا أسباب .. عشان كدا يابنات حصنووووووو نفسكم كل يوم
لا تتهاونوا بالشي دا .. انا مرة كنت متهاونة .. بس من بعدها كتبت ع ورقه ولصقتها عند الباب و عالكمبيوتر وفي اماكن اروحها كثير وصرت استمر الحمدلله ..

كثرت كلام ولسه مادخلت بالقصة وشكله هرجي كثييير الله يعينكم ..

ماراح افصل بقصة حملي لأنها بموضوعي الاول مفصلة والمستجدات برضو فيها .. راح اعدي عالسريع
من قبل ما انهي الشهر الثاني دخلت المستشفى عشان نزيف .. اعطتني دوفاستون
اربعة ايام ورجع النزيف تاني .. دخلوني تنويم .. كشفوا من هنا وكشفوا من هنا مالقو سبب للنزيف .. كل شي كويس الرحم مقفل الجنين كويس الكيس تمام المهبل مافيه جروح
استمر كم يوم وبعدها كتبتلي الدكتورة ع ابر تثبيت اخدها مع الدوفاستون .. ابرة كل ثلاثة ايام
من اول ابرة وقف الدم الحمدلله .. بس قالت لي ابرة كل ثلاثة ايام لمدة شهر ونص .. وبعدها مرة بالاسبوع حتى اكمل الشهرين وبعدها اوقف ..
وطبعا ترقيد كامل .. خصوصا بالبداية ممنوع اتحرك الا للحمام .. بعد ثلاثة اسابيع من الترقيد بديت الحركة الخفيفة ..

وعدت الشهرين ع خير .. وكل موعد اروحه يكون تمام .. بعد الشهرين ع نهاية الرابع رحت موعدي المعتاد ..
اول ماحطت السونار وجه الدكتورة قلب .. انفجعت الحرمة تقلي الشهر اللي راح كانت كل حاجة تمام .. كيف الموية تختفي في اقل من شهر ..
موية الجنين مو قليلة .. كانت منتهية .. مافي الا نقط يمكن .. بدت تشد شعرها الدكتورة تقلي كيف تنزل الموية وماتجيني .. قلتلها ابدا مانزلت الموية .. كان فيه زي رطوبة احسها من فترة لفترة .. كأنه المكان كان مبلل ونشف .. تقلي يمكن تسرب .. لكن حتى لو بالطريقة دي مستحييييل تختفي الموية فجأة كذا .. ونادت استشاريين ودنيا تجمعت عندي .. وطبعا تنويم وترقيد مرة ثانية بس في المستشفى المرة هذي ..
ومسك الحالة دكتوووور محترم فوق الاحترام .. تونسي اسمه عصام بمستشفى الهيئة .. شاطر جدا لدرجة انه مايمسك عيادة الا للي متابعهم من التنويم ززي حالتي يعني .. غير كدا مايمسك ماعنده وقت اصلا وممتاز جدا جدا لو وحدة من بنات ينبع عندها حالة خاصة تروح له وهي مغمضة .. مايمسك الا الحالات الصعبة .. لكنه جدا منفتح للاستشارات وخلوق لأبعد حد ..

لدرجة انه قبل مايدخل الغرفة يجلس برا يدق اكثر من مرة ويسأل الممرضة اكثر من مرة اذا يقدر يدخل اكيد .. حسرة عالسعودي اللي مسكني وقت النزيف .. بلا احم ولادستور يدرعم عندي بالغرفة الله يهديه ..

المهم .. التسرب وقف .. بدت مشاكل الموية تظهر .. بعدين بدت مشاكل الجنين تظهر ..الموية تؤدي لدنيا من المشاكل .. الجنين عنده مشاكل وتشوهات في الكلى .. عشان كدا ما بيفرز الموية لأنها اساسا عبارة عن بول الجنين سبحان الله .. كانت الكلية الاولى .. بعد فترة اكتشفنا الثانية .. بعد فترة اكتشفنا الجهاز البولي .. بعد فترة اكتشفنا تجمعات بالراس .. وهكذا مشاكل متتالية تفصل بينها فترات زمنية بسيطة .. محاولة بكل الطرق ان الموية تزيد لكن مافي ولا نقطة ..
تجمعوا عندي الاطباء ونصحوني بانهاء الحمل ..
لأن انعداام الموية خلت المشيمة وكل شي ببطني منكمش وضاغط عالجنين
الشي دا راح يسبب له تشوهات خارجية لأنه مافي مكان ينمو فيه بيكون ملتوي ومضغوط
وقعد الدكتور ع راسي ينصحني كل يوم افكر واسويها .. حيكون مشوه ومستحيييل يعيش

بس نفسي ماطاوعتني ابدا خصوصا انه مافي خطر علي انا .. واستفتيت وكانت الفتاوى واضحة .. حتى لو تأكد الاطباء بوجود التشوهات او انه ماحيعيش حرام انزله دام مافي خطر علي .. توكلت ع ربي واحتفظت فيه وكنت واثقة بربي ..
الجنين سبحان الله فاق كل التوقعات وتحمل الضغط وتحمل المشاكل وتحمل انعدام الموية ووسوء الغذا والاكسجين وعاش مع ان الكل توقع موته في اي لحظة ..
طبعا لانه مضغوط ماكان باين ولد او بنت .. وماكان يلف ويرفس .. مايقدر يتحرك .. يدوب احس بدق اصابعه او رجله فقط ..
وصلنا للسابع ...
كانت اصعب مرحلة .. كان فيها خيارات مرة وصعبة جدا ..
الدكتور .. كان معتبر الجنين ميت ميت فصب كل اهتمامه علي انا ويبغاني اطلع من المرحلة هذي بأقل خسائر .. بينما انا كأي أم اهتمامي فقط بالجنين ..

الخيارين الاولى اللي واجهتها .. هل اولد الجنين بالسابع ام انتظر للتاسع
الدكتور يبغاني انتظر للتاسع .. لأن الجنين مستحيل اصلا يعيش مابالك بالسابع .. الموي تأخر الرئة بالتالي هو عنده قصور اكثر من الاجنة العاديين .. قلي لو جلس للتاسع راح تكون فرصته اكبر من ناحية الرئة .. ناهيك عن المشاكل التانية خلوها ع جنب ..
في نفس الوقت ..
لو جلس للتاسع راح تزييييد التشوهات الخارجية بسبب كبر حجمه وضيق المكان .. راح تتضاعف ثلاثة او اربعة اضعاف ..
خيارين صعبة .. كل شهر له ايجابية وسلبية ..
بعد معاناة قررت اني اولد في السابع .. من واجبي احميه من التشوهات .. واذا ربي ماكتبله عمر .. فهذا قدري والحمدلله ..
ودخلت في صراع مع الدكتور .. رافض جدا .. واستخرت وطلعت برا عشان اولد .. سبحان الله كل المستشفيات تقفلت بوجهي وكل الطرق تقفلت .. حسيت انها من الاستخارة .. ابدا بشتى الطرق ما قدرت اولد برا ..رجعت وقلت دام اني استخرت هو الخير ..

وجاني الخيارين الثثانية ..
طبيعي ولا قيصري
الدكتور مصر عالطبيعي رغم انه بنفسه قال تسعين بالمية حيموت الجنين اثناء الولادة ماحيتحمل ..
من يوم سمعت كلمته أصريت عالقيصري .. ودخلت في صراعات ثانية معاه ..
قالها لي مرة بعد ماطفشته .. يابنتي الجنين ميت ميت .. ما ابغاكي تخسري اثنين .. طفل وفوقها عملية ..

لكني أصريت وقلتله اللي علي بسويه .. اني اشيل عنه كل الخطر اللي اقدر عليه .. ايش الفايدة ما انهيت الحمل واستمريت فيه .. عشان اجي بالاخير اخد قرار يأكد ع موته ..
واستمرت المصاراعات وزوجي ضايع بالنص .. مقتنع بكلامي لكن كمان مقتنع بكلام الدكتور من ناحية الخسارة ..

سبحان الله ربي هو اللي حط القرار بالاخير لا انا ولا الدكتور .. كنت بنص السابع تقريبا بالصدفة وانا خارجة من عند الدكتور وكنت بدون موعد يعني مافي ملف ولا كشفت عالضغط ولا الوزن ولا شي .. المهم واحنا خارجين زوجي قال للدكتور بالله يادكتور اطلب الملف وحط الصور الجديدة فيه ..
ومن عند الباب رجعت عشان اخد الضغط والوزن مادام طلبنا الملف .. وسبحان الله رحمة من ربي ثم الاستخارة .. الضغط كان جدا مرتفع
طلب الدكتور تحليل زلال وكان مرتفع وبمرحلة الخطر .. وقلنا تنويييييم .. وقلي شكله في النهاية بيصير اللي تبغيه .. لو ماستقر الزلال لين بكرة بعده ع طول ولادة .. ونا وزوجي نطالع بعض ونضحك والدكتور بيشد شعره مننا ..
دخلت تنويم وجاني يقنعني لآخر مرة بالطبيعي ..
وفلتت اعصابي عليه وعلى الدكتورة وانهيت الموضوع قلتله على مسئوليتي قيصري وانتهينا ..
قلتله مستحيل اقدر ارضى اسوي طبيعي واموت جنيني بنفسي .. ماحقدر اقوم كل يوم من نومي واتساءل ياترى لو مامات بالولادة كان ممكن يعيش ...
تجميع بول و ابر و ادوية ضغط بس مافي امل .. مافي شي قاعد يستقر ..
اليوم الثاني الفجرية جاني ألم بعظمة القص بالصدر فظييييييييييع مع الم بالكتف .. كان خفيف وقعد يزيد يزيد يزييييد لين وصل لمرحلة اني ماكنت اقدر اكمل نفس كامل مع الالم
الممرضات انفجعوا وعملو استنفار تام
لأنه عندي تسمم .. والالم قوي وغير معتاد .. جات دكتورة الطواري واتصلو عالدكتور يجي .. وقلهم على طووول دخلوها غرفة ولادة لين ما اجي

واعطتني ادوية ومسكنات ع اساس يحاولو مع الالم الغريب دا .. مانفع شي .. ويبغو يحطولي تخطيط بس ماكنت قادرة ارقد وانسدح يزيد الالم .. بس قاعدة اتلوى واخبط عالسرير وهم حولي
دقايق وجا الدكتور .. اول ماشاف حالتي قال على طوووول قيصرية دخلوها
وراح يجري ..
جهزوني حطولي القسطرة وماحسيت فيها الا بتكة بسيطة .. وحطوا الكانيولا ولبسوني وقمت ضغطت ع نفسي قضيت الفجر وصليت ركعتين استخارة .. وكنت احس اني بموت وانا بصلي من قوة الالم .. ونزلوني بسرعة للعمليات ..
جات دكتورة التخدير تسألني نصفي ولا كامل .. قلتلها كامل .. بدت تحاول معاي بالنصفي صرخت عليها قلتلها خلاص كاممممممل نوميني موتيني بس بنام ما ابغى احس بالالم ..
حالتي كانت حالة وهذي رايقة نصفي ولا كامل .. مع اني كنت مخططة نصفي بس خلاص كنت ابغى الالم يبعد بأي طريقة ..
وانا بغرفة العمليات اطالع التجهيزات واشوف الدكتور يجهز والمساعدات و الممرضات بعدها حطت لي الكمامة مهدئة وبعدين تنومت اخيرا .. وكأنها غفوة خمس دقايق .. اسمع احد يقومني

وكنت ع سرير داااافي يجنن وفيه زي الهوا الحار بيطلع منه ... مريييييييييييح
ماكنت حاسة بأي ألم .. مدرووووخة ..
الاقي بعض الممرضات اللي يعرفوني من التنويم جو يسألوا عني ..مافي احد بالمستشفى مايعرفني من كثر ماتنومت عندهم .. كنت العب معهم سكرابل بعد ماينتهي الشفت هههه
كل شوية اغفي واقوم .. اغفي واقوم .. وانا لسه بغرفة الافاقة .. شفت الدكتور جاني .. سألته بنت ولا ولد .. قلي بنت زي القمر ..
جيت للسؤال المهم .. قلتله كيف البنت ..
حسيته تهرب .. قلي ما ادري اكيد بالحضانة ..
حسيته مرة شفقان عليا .. قلي والله حاولت اعملك اصغر جرح اقدر عليه .. ههههه
وفعلا صغنون الجرح الحمدلله ..
دخلوني عناية لأن مشكلة الضغط والزلال مستمرين
كان ممنووووع احد يدخل .. عشان ضغطي .. ومشددين لي انا بالذات عشان حالتي ..
وحدة حزنت ع زوجي وهو برا من الصباح للظهر ماتحرك ودخلته بالدس خمسة دقايق
وكان مررررة مبهدل وتعبااااان .. وقلي البنت حلوة وتمام وشفتها وتجنن وصورتها لك .. قلتله تقدر عادي تدخل الحضانة تشوفها بأي وقت .. سكت شوي بعدين قلي ايوة .. انا عرفت على طووول انه كذاب .. ملامحه مختلفة وكلامه يبان فيه .. قلتله البنت ماهي كويسة صح ؟
سكت ودمعت عينه بعدين قلي ربنا اخدها على طول ..

اقل من ساعة وتوفت .. ماقدرت تتنفس وكل كلمة قالها الدكتور وتوقعها كانت صحيحة ..
ويوم سألته وانا بالافاقة كان داري لأني لما اسال اي احد كان يقلي كويس كويس ..متفقين الكل يتهرب مني ...

كنت سبحان الله احس بسكووون وتقبل .. مابكيت بس قعدت احمد الله وارجع للدروخة اللي انا فيها ..
تاني يوم طلعوني غرفتي واستقر الضغط الحمدلله .. وقتها اول مرة اشوف بنتي .. وراني صور لها وهي بالحضاني قعطعت قلبي الانابيب .. لكن جمالها كان جمال عجيب لا هي علي ولا ع ابوها ابدا .. والكل اللي دخل عليها بالحضانة مانسو جمالها ..
اكثر شي يألم اني ماشفتها ماشفت ملامحها ما لمستها ماضميتها .. حاول زوجي يدخلها ليا قبل الدفن بس طبعا رفضو بقوة رفض قاطع .. اصلا لممرضة يوم دخلت شافته يوريني الصور خاصمته هههه وقالت له تبغى الضغط يرجع يرتفع .. شيل الحاجات دي .. مسكين تهزأ لليل

الحمدلله ع كل حال .. العملية مررررة سهلة .. حاولت على طول اعتمد ع نفسي وامشي وفعلا سبحان الله المشي يخليكي تحسي بتحسن خلال ساعات
لومرة كنتي تمشي منحنية بعدها حتقدري توقفي عادي ..
ويابنا تالقيصري اهم نصييييحة اعطيكم هيا قلي عليها الدكتور .. قلي بعد اليوم الاول .. حاولي تشدي الجرح .. يعني .. لما تمشي امشي مستقيم عشان ينشد وتتوسع الخياطة . اليوم اللي بعده احني شوي ظهرك ع ورى عشان تنشد اكثر .. طبعا حتحسو صعب وماهو هذاك الشي لكن مررررة يفرق .. النتيجة .. انه الجرح مايلتئم وهم مشدود .. يلتئم وهو مرتخي وفيه مجال ..
يعني فرق بيني وبين اخت زوجي .. بعد مالتأم الجرح .. لو انها قامت بسرعة تتألم وينشد المكان .. لو انها مدت جسمها وتغطت مثل ابعد النوم يبدا الجرح يألم .. وهكذا
بينما لأني سويت اللي قال عليه الدكتور .. الحين اجري واتمغط وحتى اطق ظهري ولا احس ولا حتى بنغزة ..لانه جرحي التألم مرتخي وفيه مجال يتمدد ماهو مشدود

اتمنى فهمتو علي
هذه قصة حملي وولادتي والحمدلله خلصت واحس اني ببداية جديدة واحس فعلا بكل شي جديد والحمدلله انه الموضوع ماكان صدمة ويوم صار كنا هاديين ومتقبلين .. وناويين الحين ناخد فترة نقاهة طوييييييييييييلة ..
معليش مرررررررررررة طولت عليكم هههههه .. ع فكرة سميتها حــور ..
دعواتكم بالعوض الصالح وربي يبعد الشر عن كل كروشة ياااارب

[lody]

الله يعوضك خير ان شاء الله ،، الحمدلله على كل حال ..
ربي كتبها عصفوره من عصافير الجنه ،، وان شاء الله تشفع لك انتي وبابتها يوم القيامه بإذن الله ..
وتسقيكم من الجنه يا رب ..

[الأميره وبس]

ياروووووحي الله يعوضك بالذريه الصالحة ويجعلها شفيعه لك ولابوها ياااااااااااارب

[❤نجمهـ ويضويني حنآنهـ ❤]

يآآحياااتي

الله يعوووضج يااااارب بجمالهااااا واجمل منهآآ ..

وتشفع لج ولابوها يوم القيااامه

وحمد الله على سلآآمتج :)

[سديم ورنين]

قصتك قطعت قلبي والله ربي يعوضك انشالله
انا انشالله حولد عند هدا الدكتورالتونسي من جد مراا ممتااز

[أسوووم]

يارب رحممممتك

ربي يعوضك بالخير ..

وربي يجزاك على صبرك

والحمد الله انك قمتي بالسلامه

[نبع المحبة]

الله يعوضك بالذرية الصالحة يارب

[روحي ملاك]

الله يعوضك يااااارب
ويرزقك قريبا ياحي ياقيوم
وربي قصتك قطعت قلبي

[حلم$]

الحمدلله على سلامتك والله يعوضك
ويجعلها شفيعه لك ولاابوها

[سرووءة]

الحمدلله عسلامتك
والله يعوضك خير يارب..
وان الله اذا احب عبدا ابتلاه ..
وربنا يحبك ..
وانشالله بتكون لك شفيعة يوم القيامة
والله يعوضك خير يارب ..
اهنيكي على قوة ايمانك وثقتك بالله ..^^